00294. ಚಿಗುರ ತಹತಹ, ಗೊಂದಲ…
_________________________
ಪಾಪದ ಹುಡುಗ ಹುಡುಗಿಯರ
ಬದುಕರಳುವ ಗೊಂದಲ
ಕಳಚುತ್ತೆಷ್ಟೊಂದು ಪದರ
ಹುಡುಕಬೇಕು ಅಂಗುಲ, ಚದರ ||
ಹೇಳಿಕೊಡುವರಿಲ್ಲವೆನ್ನುವಂತಿಲ್ಲ
ಮಸಲ ಸಂಗತಾಸಂಗತ ಪ್ರಶ್ನೆ
ಹಿತಾಹಿತ ಸಂಶಯವೆ ಸಲಹುತ್ತ
ಹುತ್ತಗಟ್ಟಿದ ಭೂತ ಅನುಮಾನ ||
ಕಲಿಕೆಯೇನೊ ಸಹಜ ನಿಜ
ಕಲಿಯಲುಂಟು ಸಾಗರದಪಾರ
ಖನಿಜ, ಲವಣ, ಜೀವಜಲ ರಾಶಿ
ಕೈಯಿಡಲೆಲ್ಲಿ ಮೊದಲು, ಕೊನೆ? ||
ಆರಂಭಿಸಲೆಂತು ಎಲ್ಲೊ, ಹೇಗೊ?
ಅನುಭವದ ಸುಡು ಬೆಂಕಿ ತಂಪು
ಹುಮ್ಮಸ್ಸು ಉತ್ಸಾಹಗಳ ಗಂಟು
ದಾಟಿಸೆ ಸಾಕೆ ದರ್ಶಿಸುತ ಮಾರ್ಗ ? ||
ಬೀಜ ಮೊಳೆತು ಸಸಿಯಾಗರಿತು
ಗಿಡ ಮರ ಹೆಮ್ಮರವಾಗುವ ಚಿತ್ತ
ಅನಾವರಣಕನುವಾಗೆ, ಹಳೆ ಬೇರು –
ಪೋಷಿಸೆ ಚಿಗುರ ನಿರುಮ್ಮಳ, ನಿರಾತಂಕ ||
ಧನ್ಯವಾದಗಳೊಂದಿಗೆ
ನಾಗೇಶ ಮೈಸೂರು
ಚಿಗುರ, ತಹತಹ, ಗೊಂದಲ, ನಾಗೇಶ, ಮೈಸೂರು, ನಾಗೇಶಮೈಸೂರು, nagesha, mysore, nageshamysore
Advertisements
