00545. ಕವಡೆ ಪಗಡೆ ಬದುಕು


00545. ಕವಡೆ ಪಗಡೆ ಬದುಕು
____________________________________

   
 
ಬೆಲೆಯಿಲ್ಲದ ಕಡೆ ಬದುಕೇ ದುಸ್ತರ
ಪಗಡೆಯಾಟದಾ ದಾಳ ಕವಡೆ ತರ
ಎಸೆದರು ಬಿದ್ದರೆ ಸರಿ, ಗರ ಅವರ ತರ
ಬರದಿದ್ದರೆ ಸರಿಯಂಕೆ, ಹೀಗಳೆದು ಬೈದರ ||

ಎಸೆದಾಗ ಒರಟು, ಬಿದ್ದಾಗ ನೋವು
ಗಟ್ಟಿ ನೆಲವು ಕುಟ್ಟಿ, ತರಚುವ ಬಾವು
ನಡೆಸೊ ಕಾಯಿಗೂ ಉಂಟು, ಮೆತ್ತೆ ಹಾಸಿನ ಭಾಗ್ಯ
ಪಗಡೆ ಕವಡೆಗೆ ಯಾಕೊ, ನೋವಿನ ದೌರ್ಭಾಗ್ಯ ||

ಹಸ್ತದಲ್ಲಿ ಕೂರಬಿಡದೆ ಸ್ವಸ್ಥ, ಉರುಳಿಸುತ ಸತತ
ಮತ್ತೊಂದು ಮುಚ್ಚಿ ಸುತ್ತ, ನಡುವೆ ಉಸಿರುಗಟ್ಟಿಸುತ
ಕುಲುಕಿಸಿ, ತಿರುವಿ, ರುಬ್ಬಿ, ದಬ್ಬಿ – ಎಸೆವಾಟ ಗೊತ್ತಾ?
ನೂರಾಟ ಆಡಿದರೂ ಯಾರು ಕೇಳರು – ಸುಸ್ತಾಯ್ತಾ ? ||

ಆದರೂ ದಾಳದ ಬದುಕು, ಅಂಕಿಯಲೆ ನಗಬೇಕು
ಸವೆದರು ಸಹಿಸುತ ಜನರ, ಸಂತಸಕೆ ಕುಣಿಯಬೇಕು
ವಿಧಿಯಾಟದ ಹೆಸರಲಿ ಯಾರೊ, ಆಡಿಸುವರು ಆಟ
ಗರ ಬೀಳದ ಹೊತ್ತಲ್ಲಿ ಮಾತ್ರ, ದಾಳಕಷ್ಟೆ ಬೈದಾಟ ||

ಚೌಕಾಭಾರ ಪಗಡೆಯಾಟ, ಮನರಂಜನೆ ವಕ್ತಾರ
ಯಾಕೊ ದಾಳವಾಗಿ ಹೋದೆ ? ಎಲ್ಲರಿಗು ಸದರ
ಬೆಲೆಯಿಲ್ಲದ ಕವಡೆಯ ಬದುಕು, ನಿಕೃಷ್ಟವಾಗಿ ನಿಸ್ಸಾರ
ಏಕಿಂತ ಜನ್ಮವೊ ಶ್ರೀ ಹರಿಯೇ, ದುರಿತವಿತ್ತೇನು ಅಪಾರ ? ||

– ನಾಗೇಶಮೈಸೂರು

(first picture from Kannada Wikipedia : https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Cypraeamoneta.jpg;
Dice picture from wikipedia: https://en.m.wikipedia.org/wiki/File:6sided_dice.jpg)

0544. ಮನಸಲೆ ಮನಸಾಗುವೆ ನಾನು… (ಹೀಗೊಂದು ವಿರಹ ಪ್ರೇಮ ಗೀತೆ)


0544. ಮನಸಲೆ ಮನಸಾಗುವೆ ನಾನು…
__________________________________
(ಹೀಗೊಂದು ವಿರಹ ಪ್ರೇಮ ಗೀತೆ : ಯಾರಾದರು ಸಿನಿಮಾದವರು ಓದಿ ಚಲನ ಚಿತ್ರ ಗೀತೆಯಾಗಲು ಚೆನ್ನಾಗಿದೆಯೆಂದು ಆರಿಸಿಕೊಳ್ಳಲೆಂಬ ‘ದುರಾಸೆಯೊಡನೆ) 🙂

  
(a still from movie shiva manasulo shruti , picked from http://www.thehindu.com/multimedia/dynamic/00921/hycp12SMS-Review_AR_921391e.jpg)

ಮನಸಲೆ ಮನಸಾಗುವೆ ನಾನು, ಹೇಳು ನೀ ಹೇಗಳಿಸುವೆ ನೀನು ?
ಕನಸಲಿ ಕನಸ ಕದಿವೆನಿನ್ನು, ಕಾಣದೆ ಹೇಗಿರುವೆ ನೀನು ?
ಹೃದಯದ ಬಡಿತಕು ತಪ್ಪಿಸುವೆ, ಲಯಬದ್ದ ನಿಯಮ
ಕಾಡುವೆ ಪ್ರೀತಿಯ ಸೂರಗಲ, ಮೀರಿದರು ಸಂಯಮ || ಮನಸಲೆ ||

ತಪ್ಪೇನು ನನ್ನದೀ ಎದೆಯ, ಗಡಿಯಾರ ಸರಕು
ಅಡವಿಟ್ಟು ಕೂತಿದೆ ಕೀಲಿಯನು, ನಿನ್ನಲಿ ಹುಡುಕು
ಅರಿವಿದ್ದೊ ಇರದೆಯೊ ನೀನದರ, ಕೀ ಕೊಡುವ ಒಡತಿ
ಕಳುವಾಗಿ ಹೋಗಿದೆ ನಿನ್ನೊಳಗೆ, ಮತ್ತೆ ಸಿಗದ ರೀತಿ || ಮನಸಲೆ ||

ಕಳುವಲ್ಲ ಕಾಡಲು ನಿನ್ನನ್ನು, ತೊಡೆಯಲು ಬೇಡದ ನೋವನ್ನು
ಅರಿತರು ಅರಿಯದ ಹಾಗೇನು, ನಿನ್ನ ನಡೆಯ ಕಾನೂನು?
ಅವರಿಸಿಕೊಂಡುಬಿಡುವೆ ನಿನ್ನ, ಸಂಚು ಮಾಡೊ ಕೋಟಲೆಗೆ
ದಾರಿ ತಪ್ಪಿಸಿ ಕಂಗಾಲಾಗಿಸುತ, ನಿಲುವೆ ಸತತ ನಿನ್ನಾ ಕಾವಲಿಗೆ || ಮನಸಲೆ ||

ನೀ ಹಾಕಿ ಕುಳಿತೆ ಮನಕೆ ಬೀಗ, ನಿಂತಿದೆ ನನ್ನೆದೆ ಗಡಿಯಾರ
ನೀ ಕದವ ತೆರೆಯದೆ ಸರಾಗ, ನಡೆಯಲೆಂತು ಜೀವದ ವ್ಯಾಪಾರ
ನಾನಾಗುವೆ ಅದರ ಮುಳ್ಳ ಚಲನೆ, ನೀ ಮೌಲ್ಯದ ಅಂಕಿ ಕಣೆ
ಅಪಮೌಲ್ಯವಾಗದಂತೆ ಪರಿಗಣನೆ, ಕಾಯುವೆನೆ ನಿನ್ನಾ ನನ್ನಾಣೆ || ಮನಸಲೆ ||

ಹೇಳಲಿದೆ ಕೋಟಿ ಕೋಟಿ ಮಾತು, ಆಡದಿರುವುದೆ ಉಚಿತ
ಹೇಳದೆಲೆ ಮಾಡುವುದೆ ಒಳಿತು, ಒಳಿತಾಗುವುದು ಖಚಿತ
ಬಿಟ್ಟುಬಿಡೆ ಶಂಕೆ ಅನುಮಾನ, ಕೊಟ್ಟಷ್ಟು ಕೊಡಲಿ ವಿಧಿ
ಸಿಕ್ಕಷ್ಟು ಸಿಗಲಿ ಹಿಡಿವೆ ಬೊಗಸೆ, ಇರುವಷ್ಟು ದಿನ ಸನ್ನಿಧಿ || ಮನಸಲೆ ||

– ನಾಗೇಶ ಮೈಸೂರು

00543. ಪುನರಪಿ….


00543. ಪುನರಪಿ….
_______________________________

  
(Picture fromWikipedia : https://en.m.wikipedia.org/wiki/File:EndlessKnot03d.png)

ಪುನರಪಿ ಜನನಂ, ಪುನರಪಿ ಮರಣಂ
ಜಾತಸ್ಯ ಧ್ರುವಂ, ಮರಣಂ ಶರಣಂ
ಪುನರಪಿ ಜನನೀ, ಜಠರೇ ಶಯನಂ
ಬರದೇಕೊ ಜೊತೆ, ಗತ ನಿಚ್ಚಳ ಸ್ಮರಣಂ ||

ಸ್ವರ್ಗವೆ ಜನನಿ, ಜನ್ಮಭೂಮಿ ಇನಿದನಿ
ಜನನ ಮರಣ ನಡು-ಮಾತ್ರಾ ಮನನಿ
ಯಾಕಾಗದು ಸ್ಮೃತಿ, ಮರುಕಳಿಪ ಪ್ರತಿಧ್ವನಿ ?
ಬೀಜಾಕ್ಷರದೆ ಸೂಕ್ಷ್ಮ, ಬರೆದೊಳಗಡೆ ಧಮನಿ ||

ಜನ್ಮಾಂತರ ಜಾಡು ಬರಿ, ಕರ್ಮಾಂತರ ಜಾಡ್ಯ
ಒಳಿತು ಕೆಡಕು ತೂಗಿ, ಕರ್ಮಶೇಷಾ ಪ್ರಾರಬ್ದ
ಅಕ್ಕಸಾಲಿಯಂತೆ ಅವ, ಹಳೆ ಚಿನ್ನಾ ಕರಗಿಸಿ
ತಿಲ ಗುಲಗಂಜಿ ಮಿಗಿಸಿ, ಹಣೆಗಂಟಿಸುವ ಪ್ರಾಪ್ತಿ ||

ಭುವಿ ನಿಶ್ಚಲ ನಿಲಯಂ, ಮನು ಚಂಚಲ ಹೃದಯಂ
ಕರ್ಮಸಂಚಯದ ಬೆಡಗು, ತಪನೆ ಯಾತನೆ ಜೀವನಂ
ನಿಮಿತ್ತ ಮಾತ್ರತೆ ಹೆಗಲೆ, ನಡಿಗೆ ಪೂರ್ವಯೋಜಿತ
ಮಾಯೆ ಕ್ಷಣಚಿತ್ತ ಕ್ಷಣಪಿತ್ತ, ಅಸ್ಥಿರತೆ ಗೊಣಗಾಡಿಸುತ ||

ಜನಜನಿತ ಗುಣ ವಿಸ್ಮೃತಿ, ಜನ್ಮಪಾಕದಲದ್ದಿ ಪರಿಪಕ್ವ
ಜನ್ಮಜನ್ಮ ಸರಕಾಗಿ ಚರ, ನಿವ್ವಳ ತುಲನೆ ಪಕ್ವಾಪಕ್ವ
ಮುಕ್ತಿಯಾಗೆ ಸಂಸಾರ ಚಕ್ರ, ಮೋಕ್ಷ ದೊರಕೆ ಸುಭೀಕ್ಷ
ಸರಿ ತಪ್ಪದದೆ ಪುನರಪಿಸಿ, ಮೋದಾಮೋದದೆ ಪರೀಕ್ಷ ||

– ನಾಗೇಶ ಮೈಸೂರು

ಬ್ಲಾಗಿನ ಮೊದಲಂಕಣ – ಮನದಿಂಗಿತಗಳ ಸ್ವಗತ!


ಮನದಲಿರುವ ತುಡಿತ, ಮಿಡಿತ, ಕಡಿತಗಳೆಲ್ಲ ಹೊರಬರಲು ಬರಹವ್ಹೇಗೆ ದಾರಿಯಾಗುವುದೊ, ಹಾಗೆ ಅದನ್ನು ಹೊರ ಜಗತ್ತಿಗೆ ಮುಟ್ಟಿಸಲು ಅಷ್ಟೆ ಪರಿಣಾಮಕಾರಿ ಸಾಧನಗಳು ಅತ್ಯಗತ್ಯ. ಹಿಂದೆ ಮತ್ತು ಈಗಲೂ ಪತ್ರಿಕೆಗಳು, ಪುಸ್ತಕಗಳು ಆ ಕಾರ್ಯವನ್ನು ಚೊಕ್ಕಟವಾಗಿ ನಿರ್ವಹಿಸುತ್ತಾ ಬಂದಿವೆ. ಅದರ ಹೊಸ ಅಯಾಮವಾಗಿ ತೆರೆದುಕೊಂಡ ತಾಂತ್ರಿಕತೆಯ ಅವಿಷ್ಕಾರಗಳು, ಮಾಹಿತಿ ಮತ್ತು ಸಂವಹನ ಜಗದಲ್ಲಿ ಹೊಸ ಕ್ರಾಂತಿಯನ್ನುಂಟು ಮಾಡಿ, ಜನಮನಗಣಗಳು ಸಂವಾದಿಸುವ ವಿಧಾನದಲ್ಲೆ ಮೂಲಭೂತ ಬದಲಾವಣೆ ತರುವತ್ತ ದಾಪುಗಾಲಿಕ್ಕುತ್ತಿವೆ. ಯಾರು ಇದರಿಂದ ಹೊರತಾಗುತ್ತಾರೊ ಅವರೆ ಈ ಬದಲಾವಣೆಯ ಕ್ರಾಂತಿಯಲ್ಲಿ ಪಾಲುದಾರರಾಗುವ ಸುವರ್ಣಾವಕಾಶದಿಂದ ವಂಚಿತರಾಗಬೇಕಾಗುತ್ತದೆ. ಬದಲಾಗಿ ಇದನ್ನಪ್ಪಿದವರಿಗೆ ಹೊಸ ಮಾಧ್ಯಮ, ದಾರಿಗಳು ಗೋಚರವಾಗಿ ಹೊಸತಿನ ಹೊಸ ಜಗತ್ತೆ ತೆರೆದುಕೊಳ್ಳಬಹುದು.

ಅಂಥ ಸಮೂಹ ಸಂವಹನದ ಮಾಧ್ಯಮವಾಗಿ ತೆರೆದುಕೊಂಡ ನೂರಾರು ಬಾಗಿಲುಗಳಲ್ಲಿ ಒಂದು – ಈ ಬ್ಲಾಗ್ ಅಂಕಣಗಳು. ಸೈದ್ದಾಂತಿಕವಾಗಿ ಇದರ ಆಳಗಲ ಅಪರಿಮಿತ – ಪ್ರತಿಯೊಬ್ಬನೂ ಪ್ರತಿಯೊಬ್ಬನನ್ನು ಮುಟ್ಟಬಲ್ಲ ಸಾಮರ್ಥ್ಯವನ್ನೊದಗಿಸಿಕೊಡಬಲ್ಲ ದೈತ್ಯ. ದೇಶ, ಕಾಲ, ಅವಕಾಶಗಳ ಪರಿಮಿತಿ ಎಲ್ಲೆ ಮೀರಿಸಿ ಎಲ್ಲೆಡೆಗು ತಲುಪಿಸಬಲ್ಲ ಜಾದುಗಾರ. ಅಂತೆಯೆ, ಪ್ರತಿಯೊಬ್ಬನಿಗೂ ತಲುಪಿದ್ದನ್ನು ಒಪ್ಪಿಕೊಳ್ಳುವ, ಅಪ್ಪಿಕೊಳ್ಳುವ, ನಿರಾಕರಿಸುವ, ರವಾನಿಸುವ ಸ್ವೇಚ್ಚೆ – ಸ್ವಾತ್ಯಂತ್ರವನ್ನೂ ನೀಡುವ ಹರಿಕಾರ. ಏನಿಲ್ಲದಿದ್ದರು ಕೊನೆಗೆ, ಮನದಿಂಗಿತಗಳನ್ಹೊರಹಾಕಬಯಸುವ ಚಡಪಡಿಕೆಗೆ ದಾರಿ ಮಾಡಿ ಮನ ನಿರಾಳ ಮಾಡುವ ಮನೋವೈದ್ಯ. ಯಾರು ನೋಡಲಿ – ಬಿಡಲಿ, ಓದಲಿ – ಬಿಡಲಿ, ತನ್ನ ಎದೆಭಾರವಿಳಿಸುವ ಮಾಧ್ಯಮವಾಗಿದ್ದರೆ ಸಾಕೆನ್ನುವವನಿಗೂ ಇದು ಸೈ.

ಅಂಥ ಒಂದು ಬ್ಲಾಗಿನಂಕಣದ ನನ್ನ ಮೊದಲ ಬರಹವಿದು. ಏನಿದರ ಹಿಂದಿನುದ್ದೇಶ? ನಿಜಕ್ಕೂ ಯಾವುದೆ ಗುರಿ ಉದ್ದೇಶವಿರದೆ ಬರಿ ಮನದನಿಸಿಕೆಗಳಿಗೆ ಬರಹದ ರೂಪಕೊಡುವ ಕಿರು ಆಶಯದೊಂದಿಗೆ ಬರೆಯುತ್ತಿದ್ದೇನೆ. ಲಹರಿಯ ವಿಹರಿ ಹರಿದು ಸ್ವಾದಾಸ್ವಾದನೆಗರ್ಹ ಬರಹಗಳಾಗಿ ಹೊರಬಿದ್ದರೆ, ಓದಿದವರು ಖುಷಿಯಿಂದ ಮೆಚ್ಚಿದರೆ ಅಥವ ಟೀಕಿಸಿ ಲೋಪದೋಷಗಳ ಅರಿವಾಗಿಸಿದರೆ ಸಂತಸ. ಆ ಪ್ರಕ್ರಿಯೆಯಲ್ಲೆ ಬಹುಶಃ ನಾನೂ ಬೆಳೆದು ನನ್ನ ಸ್ತರವನ್ನೆತ್ತರದ ನೆಲೆಗೊಯ್ಯಲು ಸಾಧ್ಯವಾದೀತು.

ನೋಡುವ,ಇದು ಎಲ್ಲಿಯತನಕ ಸಾಗೀತೆಂದು!

ಮನದಿಂಗಿತ ಸ್ವಗತ
————————————

ನಾನ್ಹುಡುಕೆ ನನ್ನಾಶಯ
ಬರೆಯಲೇನಿದೆ ವಿಷಯ
ತಲೆ ಕೆರೆದೂ ಖಾಲಿ
ಬರಿ ಬರೆವ ಖಯಾಲಿ!

ಡೈರಿ ಬರೆದಂತೆ ಬ್ಲಾಗು
ಬಯಲಿಗಿಟ್ಟ ಭಾವನೆಗು
ಬರುವರೆ ಗಿರಾಕಿ ಹುಡುಕಿ
ಸಂಶಯಗಳದೇ ಗಿರಕಿ!

ಮನ ಬಂದಂತೆ ಗೀಚಿ
ಮಾನದ್ದೆಲ್ಲ ಮರೆಮಾಚಿ
ಮನದೊಳಗೇ ಮೊಗಚಿ
ಕೊನೆಗೂ ಬೆಳಕ ದೋಚಿ!

ಬಿಟ್ಟೀತೆ ಛಿ!ಛಿ! ಭಾವ
ನಿರಾಳತೆಯಾಗಿ ಸಹಜ
ಉರುಳೀತೆ ನಿಲ್ಲದಲೆಗೆ
ನಾನೀಗೇರಿದಾ ಜಹಜ!

ಬ್ಲಾಗಂತೇ ಸೋಗಂತೆ
ಮನದಿಂಗಿತ ಸ್ವಗತ
ಕಾಳ್ಹಾಕಿಡಲ್ಹವಣಿಕೆಗೆ
ಮೆಚ್ಚು ಬೆಚ್ಚುತೆ ಗಣಿತ!

(ನಾಗೇಶ ಮೈಸೂರು)

00542. ತಬ್ಬಲಿಯು ನೀನಾದೆ ಮಗನೆ…(ಪ್ರೀತಿ)


00542. ತಬ್ಬಲಿಯು ನೀನಾದೆ ಮಗನೆ…(ಪ್ರೀತಿ)
________________________________

  
(picture source : https://i.ytimg.com/vi/5dei_D5SSx8/hqdefault.jpg)

ಪ್ರೀತಿಯೇಕೊ ಆಯ್ತಲ್ಲೆ ತಬ್ಬಲಿ, ತಬ್ಬಿದಾಗ ಶಂಕೆಯಾ ಹೆಬ್ಬುಲಿ 
ಅಬ್ಬರಿಸಿ ಹಿಡಿದವೆ ಅನುಮಾನ, ಮೌನ ಬೇಟೆಯಾಡಿ ಮಾತನ್ನ
ತಬ್ಬಿದದೆ ಮನಗಳದೇಕೊ ಮುನಿಸು, ಜಾರೆಲ್ಲಿ ಹೋಯಿತವೆ ಕನಸು ?
ಯಾಕಾಯಿತು ಹೀಗೆ ಹೇಳು ? ಬಿತ್ತನೆ ಪೈರಾಗುವ ಮೊದಲೆ ಹಾಳು ?

ಕೈ ಕೈ ಹಿಡಿದು ನಡೆದಂತೆ ಜೊತೆ, ಮನಸಾಗಿತ್ತಲ್ಲ ಜೋಡಿ ಕವಿತೆ ?
ಸಾಲು ಹಾಡುವ ಮೊದಲೆ ಪದ, ಮೂಡಿ ಅನುರಣಿಸಿತ್ತೆಲ್ಲಾ ನಿನಾದ ?
ಬಂದಿತ್ತೆಲ್ಲಿಂದಲೀ ನಂಟು ಬಂಧ ? ಎಂದ ಮಾತದೇಕೀಗ ಬರಿ ನಿಶ್ಯಬ್ದ ?
ಬಾಂಧವ್ಯದ ಬಾಂದಳದಲೀಗ, ಯಾಕೆ ಬರಿ ಬಂಧನದ ಹಿಂಸ ರಾಗ ?

ಅತಿಯಾದ ಪ್ರೀತಿಯವತಾರ , ರೂಪು ತಾಳಿತ್ತಲ್ಲ ಜನ್ಮಾಂತರ ಪ್ರವರ
ಮಿತಿಯಿಲ್ಲದತಿಯ ಪ್ರಕಟ, ಮಾಡಲ್ಹೊರಟಿತಲ್ಲ ನಿನ್ನ ಮೆಚ್ಚಿಸುವಾಟ ?
ಅರಿವಾಗದೆ ಹೋಯ್ತು ಅತಿ ಪ್ರೀತಿ, ಉಸಿರುಗಟ್ಟಿಸುವಾ ಅದರ ರೀತಿ
ಅತಿಯಿಂದ ಮೆಚ್ಚಿಸೆ ಪ್ರವಾಹ, ಅವಸರವೆ ಬಳಲಿಸಿ ಮನ ಪ್ರಯಾಸ ..

ಇಂದರಿವಾಗುತಿದೆ ಅದರ ನೋವು, ನೀ ದೂರ ನಿಂತ ಗಳಿಗೆಯ ಕಾವು
ಬೇಕೆನಿಸಿದ ಆಸೆಯ ಬೆರಗೆ, ತಂದು ಕೂರಿಸಿದೆ ನೋಡು ಹೃದಯ ಬೇಗೆ
ತಪ್ಪಾಯಿತು ನನಗೀಗರಿವಾಯ್ತೆ, ಅರಿತಾಗ ನೀನೇಕೊ ದೂರದೆ ನಿಂತೆ
ಕೊಡಬಾರದೆ ಒಂದವಕಾಶ ? ಸರಿ ಮಾಡಿಬಿಡುವ ಮರೆಸೆಲ್ಲ ತರ ಕ್ಲೇಷ..

ತಪ್ಪಾಗದು ಮತ್ತೆ ಎಂದು, ಹೇಳಲ್ಹೇಗೆ – ಹುಟ್ಟುಗುಣದ ಪರಿ ಬಿಡದು
ಆಗಬಿಡದೆ ಪ್ರೀತಿಸುವೆ ನಿನ್ನ, ತೂಗಿ ಅಳೆದು ಅತಿಯಾಗದಂತೆ ಚಿನ್ನ
ಮಾಡಿ ತೋರಿಸುವ ಹುಚ್ಚು ಬಿಡುವೆ, ಸಹಜದಲಿ ನಿನ್ನ ಜತೆಜತೆಗೆ ಬೆರೆವೆ
ಅರಳಿಸುವೆ ಪ್ರೀತಿಯ ಕುಸುಮ, ಮುದದೆ ತಾನಾಗಿ ವಿಕಸಿಸೆ ಸಂಭ್ರಮ..

00541. ಬುಡುಬುಡುಕೆ ದಾಸ


00541. ಬುಡುಬುಡುಕೆ ದಾಸ
______________________________

ಬುಡುಬುಡುಕೆ ದಾಸ, ಸಾಕ್ನಿನ್ಸಾವಾಸ
ನೂರೆಂಟ್ತರ ವೇಷ, ಮಾಡೋಕೆ ಮೋಸ
ಒಪ್ಪತ್ಗೊಂದ್ಮಾತು, ಒತಾರೆಗೇನೆ ತೂತು
ಹಚ್ಕೊಂಡು ಆಡ್ಕೊಂಡು , ಬದ್ಕೆ ಹಾಳಾಯ್ತು ||

ಹಾಳ್ಹೊಟ್ಟೆ ಸಾವಾಸ, ಮಾಡಿಸ್ತಾ ನಾಟ್ಕಾ
ಘಂಟೆಗೊಂದ್ಗಳ್ಗೆಗೊಂದ್, ತೋರುಸ್ತಾ ಜಾತ್ಕಾ
ಮಟ್ಟಾ ಹಾಕ್ತೀನಂತ, ಹೊರಟಿದ್ದು ಗುದ್ದಾಟಕ್ಕೆ
ಗುದ್ಬಿದ್ರು ತಿದ್ಕೊಳ್ದೆ, ಬರಿ ನರಳಾಟ ಗೊರಕೆ ||

ಅವನ್ಹತ್ತೋಕೆ ಹೊರಟ, ಕಾಲೆಳ್ಯೋದೆ ಕೆಲಸ
ಹತ್ತೋಕ್ಬಿಡ್ದೆ ಕಪ್ಪೆ , ಬಾವಿಗ್ಬೀಳ್ಸೋದೆ ಪ್ರತಿ ದಿವಸ
ಅಪ್ಪಿತಪ್ಪಿ ಹತ್ತೀದೊನ್ಗೆ, ಒದಿಯೋದೆ ಸುಲಭ
ಮೇಲ್ಯಾರು ಹತ್ತದಂಗೆ, ಕಾಯ್ತಾನೆ ಕಿರುಬ ||

ಕೂತ್ಮೇಲೆ ತಳಾರ, ಬರಿ ಅವರದೆ ವ್ಯಾಪಾರ
ಮೈಮುರ್ದು ಅವ್ರಿವ್ರ್ಗೆ , ದುಡಿಯೋ ಗ್ರಾಚಾರ
ಮೂರ್ಕಾಸಿನ್ ದೋಸೆಗ್, ಆರ್ಕಾಸಿನ್ ಕೆಲ್ಸಾ
ಸಾಯೊದ್ರೊಳಗುದ್ದಾರ, ಮಾಡ್ಬೇಕ್ನಂಬ್ದೋರ ||

ಈ ದಾಸಯ್ಯನ್ಸಂತೇಲಿ, ಗೂಸಾನೆ ಜಾಸ್ತಿ
ಮಾಡ್ತಾರೆ ತಿಂದೇನೆ, ಅವರಿವರಿಗ್ ಆಸ್ತಿ
ಅನ್ಭವ್ಸೋಕು ಮನಶ್ಯಾಂತಿ, ಇಲ್ದೇನೆ ಸುತ್ಸುತ್ತಿ
ಸಿವುನ್ಪಾದ ಸೇರ್ದಾಗ್ಲು, ಪಾಪಾಪುಣ್ಯದ್ಡೋಲಿ ||

00540. ಭಾವದ ನೂಲೇಣಿಯನೇರಿ (ಒಂದು ಯುಗಳ ಗೀತೆ )


00540. ಭಾವದ ನೂಲೇಣಿಯನೇರಿ (ಒಂದು ಯುಗಳ ಗೀತೆ )
___________________________________________

  
(picture source from Wikipedia (Romeo, Juliet) : https://en.m.wikipedia.org/wiki/File:DickseeRomeoandJuliet.jpg)

ಭಾವದ ನೂಲೇಣಿಯನೇರಿ ಹತ್ತಿದೆ ಆಗಸಕೆ
ತೂಗಿ ಜೋತಾಡುತ ಮೃದುಲ ಒಪ್ಪಿದೆ ನಿನ್ನ ಜತೆ
ಸಮ್ಮತಿಸಿದೆ ಮನದೊಳಗೆ, ನೀತಿ ಸಂಹಿತೆ ಬಳಿಗೆ
ಹತ್ತಿರಕು ಕಟ್ಟಿದೆ ಬೇಲಿ, ಸರಿದೂರ ಕಟ್ಟೆ ತಾಳಿ || ಭಾವದ ನೂಲೇಣಿಯನೇರಿ ||

ಬಯಸಿದೆನೆ ಬೆಚ್ಚನೆ ಮಡಿಲು, ಮಾತಿದ್ದರೇನು ಬರಸಿಡಿಲು ?
ಅಡಗಿಸದೆ ಆಡೆ ನಿರಾಳ, ಆಗುವುದೆ ನಿಚ್ಚಳ ಮನದಾಳ
ತೊಳೆದು ತಾನೆ ಖಾಲಿ ಮಲ, ಒಳಗಾಗುವುದು ಅಮಲ
ಕೊಡು ನಿನ್ನ ಭಾವದ ಕೊಳ, ನೆಡುವೆನಲ್ಲೆ ಕೆಸರಿನ ಕಮಲ || ಭಾವದ ನೂಲೇಣಿಯನೇರಿ ||

ನಿ ಕಾಣೆ ನಿನ್ನಯ ಮುಖವ, ಕನ್ನಡಿಯು ತೋರದು ಸಕಲ
ಇಣುಕಲಿದೆ ಅಂತರಂಗದೊಳಗೆ, ಚಿಮ್ಮಿಸಂತರಗಂಗೆಯ ಬುಗ್ಗೆ
ಚಿಲುಮೆಯದು ತಟ್ಟುವುದೆ ಪೂರಾ, ಮಜ್ಜನದೆ ಪ್ರೇಮದ ವ್ಯಾಪಾರ
ಕಾಣದೆಯೂ ಅರಿಯುವುದೆ ಸರತಿ, ಜಳಕದಲೆ ನಿರ್ಮಲ ಪ್ರೀತಿ || ಭಾವದ ನೂಲೇಣಿಯನೇರಿ ||

ಪಡೆದಿರುವೆ ಜನ್ಮಾಂತರ ಸಾಲ, ಕಂತಿನಲ್ಲಿ ತೀರಿಸುವ ಹಂಬಲ
ಕೊಡಲೊಲ್ಲೆ ಅಸಲೊಂದೆ ಸಲಕೆ, ಕೊಟ್ಟರೆ ಕಳುವಾಗುವ ಭಯಕೆ
ಕಟ್ಟುತಿದ್ದರೂ ಸರಿ ಬಡ್ಡಿ ಚಕ್ರಬಡ್ಡಿ, ಪ್ರೀತಿಗೆ ಪ್ರೀತಿ ಇರುವಾಗೇನಡ್ಡಿ ?
ಮತ್ತೆ ಮತ್ತೆ ಮಾಡುವೆ ಕೈಸಾಲ, ಮುಗಿಯದಂತೆ ಸಾಲದ ಶೂಲ ! || ಭಾವದ ನೂಲೇಣಿಯನೇರಿ ||

ಸಾಕು ಮಾಡು ಒಣ ವೇದಾಂತ, ಪ್ರೀತಿಗಲ್ಲ ಬದುಕಿನ ಕಹಿ ಗಣಿತ
ಇದ್ದಷ್ಟು ದಿನ ಕನಸಿನದೆ ತೋಟ, ನೆರೆ ಬಂದರು ನೆನಪುಗಳ ಕಾಟ
ಜಿಗುಟುತನ ಮಾಡದೆ ಬಾ ನಲ್ಲೆ, ಮಳೆಯಾಗಿ ಪ್ರವಹಿಸು ಹೊಳೆ
ಹೊಳೆದೀತು ಬಾಳಿನೊಲುಮೆ ಎಳೆ, ನೂಲೇಣಿಗಾಗುತ ಹೊಸತ ಸೆಲೆ || ಭಾವದ ನೂಲೇಣಿಯನೇರಿ ||