00754. ಸಮ ಭೋಗ ಪ್ರವರ (01 & 02)


00754. ಸಮ ಭೋಗ ಪ್ರವರ (01 & 02)
_______________________________

ಪುರುಷ ಪ್ರಕೃತಿ ಸಂಯೋಗದ ಸ್ವರೂಪದಲ್ಲಿ ಸೃಷ್ಟಿ ಪ್ರಕ್ರಿಯೆಯನ್ನು ಆಯೋಜಿಸಿದ ಆ ನಿಯಾಮಕನ ವೈಜ್ಞಾನಿಕ ಜಾಣ್ಮೆಯನ್ನು ಹೊಗಳಲು ಖಾಲಿ ಪದಗಳಿಗೆ ಸಾಮರ್ಥ್ಯವಿಲ್ಲ. ಆ ಪ್ರಕ್ರಿಯೆಯ ಮೂಲ ವಿನ್ಯಾಸವಾಗಲಿ, ರೂಪುರೇಷೆಯಾಗಲಿ, ಅದರ ನಿರಂತರತೆಯನ್ನು ಕಾಯ್ದಿಡುವ ನೈಸರ್ಗಿಕ ಕ್ರಿಯೆಯಾಗಲಿ, ಹದ್ದು ಮೀರದ ನಿಯಂತ್ರಣದಲ್ಲಿರಲು ಅನುವಾಗುವಂತೆ ಗಂಡು- ಹೆಣ್ಣಿನ ನಡುವೆ ವಿಭಜಿಸಿಟ್ಟ ಚಾತುರ್ಯವಾಗಲಿ – ಎಲ್ಲವು ಅದ್ಭುತ ಅತಿಶಯಗಳೆ. ಇಂತಹ ಅದ್ಭುತವನ್ನು ಸರಳ ಸಾಮಾನ್ಯ ಕಾರ್ಯವಾಗಿಸಿ ಜನಜೀವನದ ಸಾಮಾನ್ಯ ಸಾಮಾಜಿಕ ಸಂಭವವಾಗಿಸಿದ್ದು ಅದಕ್ಕೂ ಮೀರಿದ ಅದ್ಭುತ.

ಆ ಅದ್ಭುತದ ಲಹರಿಯನ್ನು ಪದಗಳ ಹಿಡಿಯಲ್ಲಿ ಆದಷ್ಟು ಹಿಡಿದಿಡುವ ಯತ್ನ ಕೆಳಗಿನ ಎರಡು ಪದ್ಯಗಳದ್ದು ..

01. ಬೀಜಾಂಕುರ ಸುರತಿ
_____________________________________

(Picture source from : http://sugamakannada.com/assets/images/article/hasya/ganduhennu.jpg)

ಸಮಭೋಗ ಸಮರ
ಸೌಹಾರ್ದ ಸಾಗರ
ಸಹಜದೆ ಸಹಕಾರ
ಅಸಹಜ ಅನಾದರ ||

ಎರಡು ಜೀವ ಶುದ್ಧಿ
ಸೆಳೆತದಡಿ ಸಂವೃದ್ಧಿ
ಬುದ್ಧಿ ಸಂತಾನವೃದ್ಧಿ
ಸಹಯೋಗ ಕೆಳದಿ ||

ನೆಪವೆಷ್ಟು ಸರಸಕೆ
ಪೀಳಿಗೆಗೆ ಸರಸರಕೆ
ಜೋಳಿಗೆ ತುಂಬಾಕೆ
ಮಾಳಿಗೆ ಎಂಬಾಕೆ ||

ಕತ್ತಲೇಕೋ ಧನ್ಯಾ
ಬೆತ್ತಲೆಯೆ ಸುಕನ್ಯ
ಹಿತ್ತಲೇಕೊ ಕನ್ಯಾ
ಗುಟ್ಟು ಕಥೆಗಳಗಣ್ಯ ||

ವಸ್ತು ಸ್ಥಿತಿ ಮಾಹಿತಿ
ಕಾಮ ದೇವನ ಆಸ್ತಿ
ರೋಮಾಂಚಕೆ ಸ್ವಸ್ತಿ
ಬೀಜಾಂಕುರ ಸುರತಿ ||

– ನಾಗೇಶ ಮೈಸೂರು

02. ಗಂಡ್ಹೆಣ್ಣು ಸೃಷ್ಟಿಮನ
_________________________


(Picture source: http://www.nammabanavasi.com/?info=ಪುನರಾಭಿವೃದ್ದಿಗೆ-ಹೆಣ್ಣು-ಸ)

ತೆವಲು ತಿಕ್ಕಲು ತನು
ತಾಡಗಳ ಸಿಹಿ ಜೇನು
ಸುಖ ಬೆವರಿದರೇನು
ಸೊಗವಲ್ಲೆ ಇರದೇನು? ||

ಬೆರೆತಾಗಿಸಿ ಬೆವರು
ಒಳತಾಗಿಸಿ ನೀರು
ಒಳಿತಿಗೊಡ್ಡಿ ತೇರು
ಸೇರಲಿಲ್ಲವೆ ಮೇರು ? ||

ಪ್ರಕೃತಿ ಸಂಯೋಗ
ಪುರುಷ ಸುಯೋಗ
ಜನ್ಮಾಂತರ ಪ್ರಯೋಗ
ಫಲಿತ ಕರ್ಮಯೋಗ ||

ಆಗಿದ್ದರು ಸುಕೃತಿ
ಆಗಿಸುವ ವಿಕೃತಿ
ಮನಕಿಟ್ಟ ಸನ್ಮತಿ
ಜನಕಿಟ್ಟರೆ ಸದ್ಗತಿ ||

ಸಮ ಭೋಗ ಆರಾಮ
ದೈನಿಕ ವ್ಯಾಯಾಮ
ಆತಂಕ ಬಿಡೆ ಧಾಮ
ಗಂಡ್ಹೆಣ್ಣು ಸೃಷ್ಟಿ ಮನ ||

– ನಾಗೇಶ ಮೈಸೂರು

00753. ಆಸೆ?


00753. ಆಸೆ?
___________________


ಆಸೆ ಅನ್ನೋದು ಹೇಗಂದ್ರೆ –
ಬರೆದದ್ದು ತುಂತುರು ಮಳೆಯಾದರು
ಲೈಕು ಶೇರುಗಳು ಮುಂಗಾರು ಮಳೆಯಾಗಿರ್ಬೇಕು !

ಹಾಗೆ ಅಲ್ವಾ ಬದುಕು ?
ಹಾಕಿದ್ದು ಮೂರು ಅಕ್ಕಿ ಕಾಳಾದರು
ಹಕ್ಕಿ ಮಾತ್ರ ಬದುಕೆಲ್ಲ ಬಿದ್ದಿರಬೇಕು ಜೊತೆಗೆ..

– ನಾಗೇಶ ಮೈಸೂರು

00752. ಕಗ್ಗಕೊಂದು ಹಗ್ಗ ಹೊಸೆದು – ಟಿಪ್ಪಣಿ ೦೦೯ (readoo 30.05.2016)


00752. ಕಗ್ಗಕೊಂದು ಹಗ್ಗ ಹೊಸೆದು – ಟಿಪ್ಪಣಿ ೦೦೯ (readoo 30.05.2016)
___________________________________________________________

ಮಂಕುತಿಮ್ಮನ ಕಗ್ಗ – ಟಿಪ್ಪಣಿ ೦೦೯ : ಇವತ್ತಿನ ರೀಡೂ ಕನ್ನಡದಲ್ಲಿ ಪ್ರಕಟಿತ (೩೦.೦೫.೨೦೧೬)

ಕಗ್ಗಕೊಂದು ಹಗ್ಗ ಹೊಸೆದು…

00751. ನೆನೆದಿದ್ದು ಮಳೆಯೋ, ಮನವೊ ?


00751. ನೆನೆದಿದ್ದು ಮಳೆಯೋ, ಮನವೊ ?
________________________________


ತುಂತುರು ಮಳೆಯಲಿ ನೆನೆಯುತ್ತ
ಏನೇನನೊ ಮನದಲಿ ನೆನೆಯುತ್ತ
ಸಾಗಿದ್ದೆ ತುಂತುರು ಹನಿಸುತ್ತ ಮನಕೆ
ನೆನಪಿನ ಹನಿ ಹನಿ ಎರಚಿತ್ತಾ ಮುದಕೆ

ಯಾರನೊ ಮನಸದು ನೆನೆಸಿತ್ತು
ತುಂತುರು ಹನಿ ತಲೆಯ ನೆನೆಸಿತ್ತು
ನೆನೆದಿದ್ದು ಒಳಗೊ ಹೊರಗೊ ಗೋಜಲು
ಒಳಗ್ಹೊರಗೆಲ್ಲ ಒದ್ದೆಯಾಗಿ ಜುಳು ಜುಳು..

ನೆನೆದಾಕೆಯ ನಗು ನೆನೆದಾ ವದನ
ಹನಿ ಜತೆ ಬೆವರು ಸಾಲುಗಟ್ಟಿ ತೋರಣ
ನೆನಪಿನಾ ತೋಟದಲೆಲ್ಲಾ ಆವರಣ
ಬಿದ್ದ ಮಳೆ ಹನಿಗಾಯ್ತೆ ಗುಟ್ಟು ಅನಾವರಣ..

ಕಳ್ಳ ಹನಿಯೆ ತೊಡೆಯದಿರು ನೆನೆದಿರುವಾಗ
ಹನಿ ಹನಿಯ ತೊಳೆದರೆ ಮತ್ತದೇ ಜಾಗ
ಬಿಡು ಆಸ್ವಾದಿಸಲಿ ನೆನೆದ ನೆನಪ ಹನಿಗಳ
ಕಟ್ಟು ಹನಿಯ ಮೊಡವೆ ಸರ ಪೋಣಿಸಿ ಜಾಲ..

ಬೇಡ ಮುಸಲಧಾರೆ ತೊಟ್ಟಿಕ್ಕಿಸೊ ಧಾರಾಕಾರ
ಉಳಿಸದೇನೂ ನೆನಪ ನೆನೆಯಲೂ ನಿರಾಕಾರ
ಸುರಿವ ಹೊತ್ತ ಮಬ್ಬಲಿ ಕೂತು ನೋಡುವೆ ವಿಸ್ಮಯ
ಸೃಷ್ಟಿಯೆಲ್ಲ ನಿಗೂಢವ ಬಚ್ಚಿಟ್ಟುಕೊಂಡ ಅಯೋಮಯ..

– ನಾಗೇಶ ಮೈಸೂರು

00750. ಹೇಗಿರಬೇಕು, ಹೇಗಿರಬಾರದು (ಬ್ಲಾಗು)


00750. ಹೇಗಿರಬೇಕು, ಹೇಗಿರಬಾರದು (ಬ್ಲಾಗು)
_______________________________

ಬ್ಲಾಗು ಫೇಸ್ಬುಕ್ಕು ಹೇಗಿರಬೇಕು, ಹೇಗಿರಬಾರದು, ಏನು ಮಾಡಬೇಕು, ಏನು ಮಾಡಬಾರದು ಎಂದೆಲ್ಲಾ ತರದ ಪ್ರಶ್ನೆಗಳು ಎಲ್ಲರನ್ನು ಕಾಡುವುದು ಸಹಜ.. ಅದು ಕಾಡಿದ ಹೊತ್ತ ಅನಿಸಿಕೆಗಳಿಗಷ್ಟು ಪದ ಲೇಪನ ಕೊಟ್ಟಾಗ ಮೂಡಿದ ಸಾಲುಗಳಿವು. ನಿಮಗೂ ಹೀಗೆ ಅಥವಾ ಇನ್ನೇನೇನೋ ಅನಿಸಿದ್ದರೆ ಕಾಮೆಂಟಲಿ ಹಂಚಿಕೊಳ್ಳಿ 😊


ಬ್ಲಾಗಿರಬೇಕು ಹೇಗಿರಬೇಕು ?
__________________________

(೦೧)
ಮೊದಲಿರುತ್ತಿತ್ತು
ಸೈಡಿನಲೊಂದು ಬ್ಯಾಗು
ಈಗಿದ್ದರೆ ಸಾಕು ನಿಮದೆ ಬ್ಲಾಗು..

(೦೨)
ಅನಿಸಿದ್ದೆಲ್ಲ ಹೇಳೋಕಾಗಲ್ಲ
ಕೇಳೊ ಜನರಿಗೆ ಅರ್ಥವಾಗಲ್ಲ
ಇಲ್ಲಿ ಮನಸಿಗೆ ಬಂದದ್ದೆಲ್ಲಾ ವಾಂತಿ
ಸಿಕ್ಕರೂ ಸಿಗಬಹುದೇನೋ ಶಾಂತಿ..

(೦೩)
ಕೇಳಿದರ್ಯಾರೊ ನೀತಿ ನಿಯಮ
ಕಟ್ಟುವುದೇನು ಮನೆಯಾ, ಮದುವೆಯಾ ?
ಏನಾದರು ಕಟ್ಟು ಒಪ್ಪ ಓರಣದಲಿ
ಟ್ಯಾಗು ಕೆಟಗರಿ ವಿಷಯ ವಸ್ತು ಬಯಲಲಿ..

(೦೪)
ಅಶಿಸ್ತೆ ನಮ್ಮನೆ ದೇವರು ಗೊತ್ತಾ?
ಅಂದವರ ಬ್ಲಾಗಿಗೆ ಫೇಸ್ಬುಕ್ಕೆ ಸಾಕು
ಹಾಕು ಮನಸಿಗೆ ತೋಚಿದ್ದ ಶೋಧಿಸಿ ಶುದ್ಧ
ಸ್ಟೇಟಸ್ಸು ಪೋಸ್ಟು ಲೈಕು ಶೇರು ಸಮೃದ್ಧ..


(೦೫)
ಬ್ಲಾಗು ಫೇಸ್ಬುಕ್ಕು ಇದ್ದರೇನಿಲ್ಲ ನಿಶ್ಚಿಂತೆ
ಕನಸಲ್ಲೂ ಕಾಡಿ ಹಿಂಬಾಲಕರಿಲ್ಲದ ಚಿಂತೆ
ಬರೆದು ಸುರಿದರು ದಂಡಿ ಬರದ ಲೈಕ ರೀತಿ
ಯಾರಿಗೂ ಬೇಡದವರಾಗಿಬಿಟ್ಟೇವೆ ? ಒಳ ಭೀತಿ!

(೦೬)

ಜಾಸ್ತಿ ಲೈಕು ಬೇಕು, ಹಿಂಬಾಲಕರು ಬರಬೇಕು
ಮಾಡು ಹಾಗಿದ್ದರೆ ಶೇರು, ಬೇರೆಯವರ ಸರಕು
ಬರಿ ಹಾಳುಮೂಳಲ್ಲ, ಅಳೆದು ತೂಗಿದ ಸಾಮಾನು
ಮೌಲ್ಯವಿದ್ದೆಡೆ ಮೆಲ್ಲ, ಬಲ್ಲ ಜನ ಬರುವುದೆ ಕಾನೂನು..!

(೦೭)
ಸಖ್ಯ ಬೆಳೆಸುವುದು ಮುಖ್ಯ, ಸಾಲು ಸಾಲು ಗೋಜಲು
ಗೊತ್ತು ಗುರಿಯಿಲ್ಲದೆ, ಮಿತ್ರರಾಗುವ ಹವಾ ಮಹಲು
ಇರಲೊಂದು ಸಂತೆ, ಗದ್ದಲಕೆಂದೆ ಮೀಸಲಾದ ಖಾತೆ
ಮತ್ತೊಂದು ಖಾಸಗಿ ನಿಯಮಿತ, ಸಮಮನಸ್ಕರ ಜೊತೆ !

(೦೮)
ಸುಮ್ಮನೆ ನೋಡಿದರೆ ಸರಾಸರಿ ಲೆಕ್ಕಾಚಾರ
ಶೇಕಡಾ ಐದರಿಂದ ಹತ್ತರೊಳಗೆ ಮೆಚ್ಚುವ ಸಾರ
ಮಿಕ್ಕ ಕೆಳೆ ನಿಷ್ಪಲ ನಿರಾಸಕ್ತರ ಬಳಗವೆಂದಲ್ಲ ಅರ್ಥ
ಲೋಕೋಭಿನ್ನರುಚಿಃ ನಾನಾ ಗಮನದೆ ಎಲ್ಲ ಪ್ರವೃತ್ತ …

– ನಾಗೇಶಮೈಸೂರು

00749. ನಂಟಿನ ವ್ಯಾಖ್ಯೆ (ಹಾಯ್ಕು ಮಾದರಿ)


00749. ನಂಟಿನ ವ್ಯಾಖ್ಯೆ (ಹಾಯ್ಕು ಮಾದರಿ)
_______________________________

ಪ್ರತಿ ನಂಟಿಗು ಅವರವರದೇ ವ್ಯಾಖ್ಯೆ, ವಿಮರ್ಶೆ, ಅರ್ಥ – ಮನದ ಗುಣಿತಕನುಸಾರವಾಗಿ. ಹಾಯ್ಕು ಮಾದರಿಯ ಈ ಹನಿಗಳಲ್ಲಿ ಕೆಲವೊಂದನ್ನು ಕಟ್ಟಿಡುವ ಅರೆ-ಸಫಲ ಯತ್ನ.. 😊


(೦೧)
ನಂಟಿನ ಮನ
ಅವರವರ ವ್ಯಾಖ್ಯೆ
– ಮನದ ಗಂಟೆ.

(೦೨)
ನಂಟಿಗೆ ಬೇಕು
ಬೇವು ಬೆಲ್ಲದ ಕಾಲ
– ಅರಿಸುವಾಟ.

(೦೩)
ನಂಟಸ್ತಿಕೆಗೆ
ಅಂತಸ್ತೈಶ್ವರ್ಯ ಲೆಕ್ಕ
– ಮಿಕ್ಕಿದ್ದಾಮೇಲೆ.

(೦೪)
ನಂಟಿನ ಗಂಟು
ಅಂದುಕೊಂಡಿದ್ದೆ ಹೆಚ್ಚು
– ಆಗದೆ ಕಿಚ್ಚು.

(೦೫)
ಗೀಳಾಗಿ ನಂಟು
ಕಾಡುವ ಅನುಪಾತ
– ವಿಲೋಮ ದೂರ.

(೦೬)
ನಂಟಿಗರ್ಥವೆ
ನನದೆನ್ನುವ ಸ್ವಾರ್ಥ
– ಉಬ್ಬರವಿಳಿತ

(೦೭)
ಗಂಟು ಹಾಕಿದ್ದು
ನಂಟೇ ಆದರು ಮೊತ್ತ
– ಗೌರವ ಸೂಕ್ತ.

(೦೮)
ತಪಿಸಿ ನಂಟ
ಹುಡುಕಾಡಿಸೊ ಚಿತ್ತ
– ಸಿಕ್ಕಾಗ ಧೂರ್ತ.

(೦೯)
ನಂಟಿನ ಹಿತ
ಮುದದಷ್ಟೆ ಬೇಸರ
– ಇರಲಿ ನಿಗಾ.

(೧೦)
ನಂಟಿಗೆ ಗುಟ್ಟ
ರಟ್ಟಾಗಿಸೊ ನಂಬಿಕೆ
– ಗುಟ್ಟಾಗಿರಲಿ.

– ನಾಗೇಶ ಮೈಸೂರು

00748. ಬಂಧಕೊಂದಷ್ಟು ತುಣುಕುಗಳು..


00748. ಬಂಧಕೊಂದಷ್ಟು ತುಣುಕುಗಳು..
_______________________________

(೦೧)
ನೀ ದೂರಾಗಿ
ಕರ್ಕಶ ಸದ್ದಾದ ಮಾತು
ಎಷ್ಟೊ ವಾಸಿಯಿತ್ತು;
ಭೀಕರವೀಗ ಅದ ಮೀರಿಸೊ
ಕೊಲ್ಲುವ ಮೌನದ ಮೌನ.

(೦೨)
ಒಪ್ಪಿಕೊಳ್ಳುವ
ಮೊದಲಿತ್ತೆಲ್ಲಿ ಅರಿವೆ ?
ಅರಿವಾದರೇನೀಗ ಬೆತ್ತಲೆ
ಮುಚ್ಚಲೊಲ್ಲದ ಅರಿವೆ
ಮೈ ಮರೆವೆ..

(೦೩)
ಎಲ್ಲಿತ್ತು ಬೇಧ ?
ಅರ್ಧನಾರೀಶ್ವರರಂತೆ
ನಮ್ಮಿಬ್ಬರ ನಡುವೆ ಸೀಮೆ ;
ನಾರಿ ಈಶ್ವರರ ಛೇಧಿಸಿ
ವಿಭಜಿಸಿದ್ದು ಮಾತ್ರ
ಸ್ತ್ರೀಲಿಂಗ ಪುಲ್ಲಿಂಗದ ಮಹಿಮೆ..

(೦೪)
ಹತ್ತಿರವಾಗುತ್ತ ಪರಸ್ಪರ
ಹೊಕ್ಕುತಿಬ್ಬರ ಆವರಣ ಸಂಭ್ರಮ
ಅಸಾಧಾರಣ ಮಿಲನ ;
ಉಸಿರುಗಟ್ಟಿಸೊ ಮೊದಲೆ
ಹಿಂದೆತ್ತಿಕ್ಕದೆ ಒಂದಡಿ ಹೆಜ್ಜೆ ನಡಿಗೆ
ದೂರಾಗಿ ವಿದಾಯಕೆ ಕಾರಣ..

(೦೫)
ಅವರವರ
ಪರ್ಸನಲ್ ಸ್ಪೇಸ್
ಅವರವರಿಗೆ ಅಪ್ಯಾಯ…
ಬಿಟ್ಟುಕೊಂಡರು ಪ್ರೀತಿಗೆ ಒಳಗೆ
ಬೇಲಿಯಾಚೆಯೆ ಸುಳಿದಾಡುತಿರು
ಕಾಯುತ ಆಗಾಗಿಣುಕುವ ಸರಿ ಗಳಿಗೆಗೆ..

– ನಾಗೇಶ ಮೈಸೂರು

00747. ಲಘು ಹರಟೆ,ಹಾಸ್ಯ : ಗುಬ್ಬಣ್ಣ ಇನ್ ಪೀಯೂಸಿ ಫೇಲ್ ಎಪಿಸೋಡ್ !


00747. ಲಘು ಹರಟೆ,ಹಾಸ್ಯ : ಗುಬ್ಬಣ್ಣ ಇನ್ ಪೀಯೂಸಿ ಫೇಲ್ ಎಪಿಸೋಡ್ !
_________________________________________________________

(Picture source :http://indiatoday.intoday.in/education/story/karnataka-puc-2-supplementary-exams/1/439371.html)

ಗುಬ್ಬಣ್ಣ ಧಢದಢನೆ ಓಡೋಡುತ್ತ ಬಂದು ಕಣ್ಮುಂದೆ ಸ್ವೀಟ್ ಬಾಕ್ಸೊಂದನ್ನು ಹಿಡಿದು “ತಗೊಳ್ಳಿ ಸಾರ್, ತಿಂದು ಬಿಟ್ಟು ಕಂಗ್ರಾಟ್ಸ್ ಹೇಳಿ ..” ಎಂದಾಗ ಯಾಕೆಂದರಿಯದೆ ಸ್ವಲ್ಪ ಗೊಂದಲಕ್ಕೆ ಬಿದ್ದು ಅವನ ಮುಖಾ ನೋಡಿದೆ.

” ತೊಗೊಳ್ಳಿ ಸಾರ್.. ಮೊದಲು.. ಆಮೇಲೆ ಹೇಳ್ತೀನಿ ಯಾಕೆ ಅಂತ..” ಅಂದು ಇನ್ನಷ್ಟು ಹತ್ತಿರಕ್ಕೆ ತಂದ ಒಳಗಿನ ಸುವಾಸನೆ ಮೂಗೊಳಕ್ಕೆ ನೇರ ಅಟ್ಟುವವನ ಹಾಗೆ. ಯಾಕಾದರೂ ಹಾಳಾಗಲಿ, ಸ್ವೀಟು ನನ್ನ ವೀಕ್ನೆಸ್ ತಾನೇ ಅಂದುಕೊಂಡವನೆ ದೊಡ್ಡದೊಂದು ತುಂಡು ಬರ್ಫಿ ಬಾಯಿಗಿಡುತ್ತಿದ್ದಂತೆ ಚಕ್ಕನೆ ನೆನಪಾಯ್ತು – ಅವತ್ತು ಸೆಕೆಂಡ್ ಪೀಯೂಸಿ ರಿಸಲ್ಟ್ ಡೇ ಅಂತ. ಗುಬ್ಬಣ್ಣನ ಮಗಳೂ ಎಗ್ಸಾಮ್ ತೊಗೊಂಡಿದ್ದು ಗೊತ್ತಿತ್ತು..

” ಗೊತ್ತಾಯ್ತು ಬಿಡೋ ಗುಬ್ಬಣ್ಣ.. ಮಗಳ ರಿಸಲ್ಟ್ ಬಂತೂ ಅಂತ ಕಾಣುತ್ತೆ.. ಫಸ್ಟ್ ಕ್ಲಾಸಾ ? ಡಿಸ್ಟಿಂಕ್ಷನ್ನಾ? ಈಗೆಲ್ಲಾ ನೈಂಟಿ ಅಂಡ್ ಎಬೌ ಇದ್ರೇನೆ ಅಪ್ಪಾ ಮೆಡಿಕಲ್ಲು , ಇಂಜಿನಿಯರಿಂಗೂ ” ಅಂದೆ ಗುಟ್ಟು ಬೇಧಿಸಿದವನ ಗತ್ತಿನಲ್ಲಿ.

ಮೊದಲೆ ತೆರೆದ ಹಲ್ಲುಗಳನ್ನು ಮತ್ತಷ್ಟು ಅಗಲವಾಗಿ ತೆರೆದು ನಗುತ್ತ , ” ಕ್ರಾಕ್ಜಾಕ್ ಫಿಫ್ಟಿ, ಫಿಫ್ಟಿ ಸಾರ್ ” ಅಂದ – ಅರ್ಧ ಮಾತ್ರ ಸರಿಯಾದ ಊಹೆ ಅನ್ನೊ ಇಂಗಿತದಲ್ಲಿ..

“ನನಗರ್ಥವಾಗಲಿಲ್ಲ ಗುಬ್ಸ್.. ಯಾವ ಫಿಫ್ಟಿ ರೈಟು ? ಯಾವ ಫಿಫ್ಟಿ ರಾಂಗು ? ” ಸ್ವಲ್ಪ ತೀರಾ ಪ್ರೀತಿ ಜಾಸ್ತಿಯಾದಾಗ ನಾನು ‘ಗುಬ್ಸ್’ ಅಂತ ಕರೆಯೋ ವಾಡಿಕೆ. ಅದೂ ತೀರಾ ಅತಿಯಾದಾಗ ‘ಗೂಬ್ಸ್..’ ಆಗುವುದು ಉಂಟು. ಆದರೆ ಅವನೆಂತ ಪರಮ ಯೋಗಿಯೆಂದರೆ ಎಲ್ಲವನ್ನು ಸಮಚಿತ್ತದಿಂದ ಸ್ವೀಕರಿಸೊ ಸ್ಥಿತಪ್ರಜ್ಞ ಗಿರಾಕಿ.

“ಪೀಯೂಸಿ ರಿಸಲ್ಟ್ ಸರಿ ಸಾರ್.. ಆದರೆ ಪಾಸು, ಕ್ಲಾಸು ತಪ್ಪು ಸಾರ್..!”

“ಅಂದ್ರೆ..?”

” ‘ಅಂದ್ರೆ’ ಅಂದ್ರೆ ? ಫೇಲೂ ಅಂತ..! ಮೂರು ಸಬ್ಜೆಕ್ಟ್ಟಲ್ಲಿ ಡುಮ್ಕಿ ಸಾರ್..! ಅದಕ್ಕೆ ಪಾರ್ಟಿ ಕೊಡಿಸಬೇಕು ಅಂತಾ ಇದೀನಿ..!!” ಅಂದ.

ನಾನು ಬೆಚ್ಚಿಬಿದ್ದೆ ..! ಎಲ್ಲಾ ಪಾಸಾಗುವುದಕ್ಕು ಸ್ವೀಟ್ ಕೊಡದೆ ಬರಿ ಕ್ಲಾಸು, ಡಿಸ್ಟಿಂಕ್ಷನ್ನು, ರ್ಯಾಂಕಿಗೆ ಮಾತ್ರ ಏನಾದರೂ ಹಂಚುವ ಕಾಲ.. ಇವನು ನೋಡಿದರೆ ಫೇಲಿಗೆ ಸ್ವೀಟು ಕೊಟ್ಟಿದ್ದೆ ಅಲ್ಲದೆ ಪಾರ್ಟಿ ಬೇರೆ ಕೊಡಿಸೋ ಮಾತಾಡ್ತಾ ಇದಾನೆ ? ಎಲ್ಲೋ ‘ಸ್ಕ್ರೂ’ ಸ್ವಲ್ಪ ಲೂಸಾಗಿರಬೇಕು ಅಂತ ಡೌಟ್ ಶುರುವಾಯ್ತು… ಆ ಅನುಮಾನದಲ್ಲೇ,

“ಗುಬ್ಬಣ್ಣಾ.. ಆರ್ ಯೂ ಸೀರಿಯಸ್, ಆರ್ ಜೋಕಿಂಗ್ ?” ಎಂದೆ.

” ಜೋಕೆಂತದ್ದು ಬಂತು ತೊಗೊಳ್ಳಿ ಸಾರ್.. ನಮ್ಮಪ್ಪರಾಣೆಗೂ ಸತ್ಯದ ಮಾತು..”

“ಬಟ್ ದೆನ್ ಐ ಡೊಂಟ್ ಅಂಡರಸ್ಟ್ಯಾಂಡ್.. ಎಲ್ಲೋ ಏನೋ ಮಿಸ್ ಹೊಡಿತಾ ಇದೆ ಗುಬ್ಬಣ್ಣ.. ಕಮಾನ್ ವಾಟ್ಸಪ್ಪ್ ..?”

ಒಂದರೆಗಳಿಗೆ ಗುಬ್ಬಣ್ಣ ಮಾತಾಡಲಿಲ್ಲ… ಸ್ವಲ್ಪ ಬಿಲ್ಡಪ್ ಕೊಡುವಾಗ ಹಾಗೆ ‘ಪಾಸ್’ ಕೊಡುವುದು ಅವನು ಕನ್ಸಲ್ಟೆಂಟ್ ಆದಾಗಿನಿಂದ ಕಲಿತ ದುರ್ವಿದ್ಯೆ… ಒತ್ತಾಯಿಸಿ ಕೇಳಲಿ ಅನ್ನೊ ಕುಟಿಲ ಬುದ್ದಿ ಅಂತ ಗೊತ್ತಿದ್ದರಿಂದ ನಾನು ಬೇಕಂತಲೇ ನಿರಾಸಕ್ತನಂತೆ ಸುಮ್ಮನಿದ್ದೆ, ಅವನೆ ಬಾಯಿ ಬಿಡುವ ತನಕ.

” ಸಾರ್..ಹಳೆಯ ಮತ್ತು ಈಗಿನ ಚರಿತ್ರೆ ಎಲ್ಲಾ ಅವಲೋಕಿಸಿ ನೋಡಿದ ಮೇಲೆ ನನಗೆ ಒಂದಂತೂ ಅರ್ಥವಾಯ್ತು ಸಾರ್.. ಇಡಿ ಜಗತ್ತಿನಲ್ಲಿ ಸುಪರ್ ಸಕ್ಸಸ್ ಆಗಿರೋರೆಲ್ಲರಲ್ಲು ಬರಿ ಫೇಲಾದವರೆ ಜಾಸ್ತೀ..” ರಾಮಬಾಣದಂತೆ ಬಂತು ಏನೊ ಪೀಠಿಕೆ ಹಾಕುವ ತರ..

“ಅದಕ್ಕೆ..?”

” ಅದಕ್ಕೆ ನಾನೂ ಡಿಸೈಡ್ ಮಾಡಿಬಿಟ್ಟೆ ಅವಳೇನಾದ್ರೂ ಫೇಲ್ ಆದ್ರೆ ತಲೆ ಕೆಡಿಸಿಸಿಕೊಳ್ಳದೆ ಸೆಲಬ್ರೇಟ್ ಮಾಡೋದೆ ಸರಿ.. ಅಂತ”

” ಗುಬ್ಬಣ್ಣ.. ನಿನಗೆ ತಿಕ್ಕಲಾ? ಓದದವರು, ಫೇಲಾದವರೆಲ್ಲ ಬಿಲ್ ಗೇಟ್ಸ್, ಸ್ಟೀವ್ ಜಾಬ್ಸ್,ಅಬ್ರಹಾಂ ಲಿಂಕನ್, ಡಾಕ್ಟರ್ ರಾಜಕುಮಾರ್ ತರ ಸುಪರ್ ಸಕ್ಸಸ್ ಆಗಲ್ಲಾ ಲೈಫಲ್ಲಿ..”

” ಇರಬಹುದು ಸಾರ್.. ಆದ್ರೆ ಸಕ್ಸಸ್ ಆಗೊ ಛಾನ್ಸ್ ಆದ್ರೂ ಇರುತ್ತಲ್ಲಾ ?”

” ಏನು ಮಣ್ಣಾಂಗಟ್ಟೆ ಛಾನ್ಸ್ ? ಕೋಟ್ಯಾಂತರ ಜನ ಫೇಲಾದವರಲ್ಲಿ ನಾಲ್ಕೈದು ಜನ ಸುಪರ್ ಸಕ್ಸಸ್ ಆಗ್ಬಿಟ್ರೆ ಫೇಲಾದೊರೆಲ್ಲ ಬಿಲ್ಗೇಟ್ಸ್ , ಸ್ಟೀವ್ ಜಾಬ್ಸ್ ಆಗ್ಬಿಡಲ್ಲ ಗೊತ್ತಾ”

“ಗೊತ್ತು ಸಾರ್… ಒಪ್ಕೋತೀನಿ… ಹಾಗಂತ ಪಾಸಾದವರೆಲ್ಲ ಏನ್ ಅಂಬಾನಿ, ಟಾಟಾ, ಬಿರ್ಲಾಗಳಾಗ್ಬಿಟ್ಟಿದಾರ ? ಸೂಟು, ಬೂಟು, ಸ್ಕರ್ಟು, ಟೈ ಹಾಕ್ಕೊಂಡು ಹೈಟೆಕ್ ಹೊಲ ಗದ್ದೆ ಫೀಲ್ಡಲ್ಲಿ ಸೊಫಿಸ್ಟಿಕೇಟೆಡ್ ಕೂಲಿ ಕೆಲಸಕ್ಕೆ ತಾನೇ ಹೋಗ್ಬೇಕು ? ”

ನನಗೇನೊ ಮಲ್ಟಿ ನ್ಯಾಷನಲ್ ಕಂಪನಿಲಿ ಸಾವಿರಗಟ್ಟಲೆ, ಲಕ್ಷಗಟ್ಟಲೆ ಸಂಬಳ ತೊಗೊಳ್ಳೊ ವೈಟ್ ಕಾಲರ್ ಗುಂಪನ್ನೆಲ್ಲ ಸಾರಾಸಗಟಾಗಿ ಒಟ್ಟಾಗಿ ಸೇರಿಸಿ ಸೊಫಿಸ್ಟಿಕೇಟೆಡ್ ಕೂಲಿಗಳು ಅಂದಿದ್ದು ಬಿಲ್ಕುಲ್ ಇಷ್ಟವಾಗಲಿಲ್ಲ.. ಅದರಲ್ಲೂ ಅವನೂ, ನಾನು ಇಬ್ಬರೂ ಅದೇ ಮಂದೆಯಲ್ಲೆ ಮೇಯುತ್ತಿರೊ ಕುರಿಗಳು ಅಂತ ಗೊತ್ತಿದ್ದೂ. ಆದರು ಮೊದಲು ಅವನ ಆರ್ಗ್ಯುಮೆಂಟಿಗೆ ಕೌಂಟರ್ ಆರ್ಗ್ಯುಮೆಂಟ್ ಹಾಕುತ್ತ,

” ಅಂಬಾನಿ ಟಾಟಾ ಬಿರ್ಲಾಗಳೆಲ್ಲರ ಪೀಳಿಗೆಯವರು ಪಾಸಾಗಿ ಬಂದು ಸಕ್ಸಸ್ ಆಗ್ತಾ ಇಲ್ವಾ ಈಗಲೂ ? ನೋಡು ಹೇಗೆ ನಡೆಸ್ಕೊಂಡು ಹೋಗ್ತಾ ಇದಾರೆ ಅವರ ಪರಂಪರೆನಾ?”

” ಅವರು ಬಿಡಿ ಸಾರ್.. ಪಾಸ್ ಮಾಡಿದ್ರು ಲೆಕ್ಕವಿಲ್ಲ , ಫೇಲಾದ್ರು ಲೆಕ್ಕವಿಲ್ಲ.. ಅವರ ಅಪ್ಪಂದಿರು, ತಾತಂದಿರು ಮಾಡಿಟ್ಟಿರೊದು ನೋಡ್ಕೊಳೋಕೆ ಇನ್ನು ಹತ್ತು ಜನರೇಷನ್ ಬೇಕು..ನಮ್ಮ, ನಿಮ್ಮಂತಹ ಬಡಪಾಯಿಗಳಲ್ಲಿ ಹೇಳಿ ಸಾರ್, ಆದಷ್ಟು ಜನ ಪಾಸಾಗಿ ಆ ಥರ ಸಕ್ಸಸ್ಸು ಆಗಿರೋರು ? ಎಲ್ಲಾ ಹೋಗಿ ಅವರ ಅಥವಾ ಆ ತರದ ಕಂಪನಿಗಳಲ್ಲೆ ಕೂಲಿನಾಲಿ ಕೆಲಸಕ್ಕೆ ಸೇರ್ಕೊಂಡಿರೊರೆ ತಾನೆ ?” ಎಂದ.

ಅವನು ಹೇಳಿದ್ದು ಒಂದು ರೀತಿ ನಿಜವೇ ಅನಿಸಿತು.. ಹೆಸರಿಗೆ ನೆನಪಿಸಿಕೊಳ್ಳೋಣ ಅಂದ್ರೂ ಒಂದೆರಡೂ ನೆನಪಾಗ್ತಾ ಇಲ್ಲಾ – ಇನ್ಫೋಸಿಸ್ ತರದ ಹಳೆಯ ಕುದುರೆಗಳನ್ನ ಬಿಟ್ಟರೆ.. ಆದರೂ ತೀರಾ ಜುಜುಬಿ ಬೇಸಾಯಕ್ಕೆ ಹೋಲಿಸಿ, ಕೂಲಿನಾಲಿ ಅಂತ ಖಂಡಂ ಮಾಡೋದು ತೀರಾ ಅತಿಯೆನಿಸಿತು. ಆ ಉರಿಯಲ್ಲೆ ” ಅದೇನೆ ಆಗ್ಲಿ ಗುಬ್ಬಣ್ಣ.. ಅದನ್ನ ಕೂಲಿ ಮಟ್ಟಕ್ಕೆ ಹೋಲಿಸೋದು ನನಗೆ ಹಿಡಿಸೊಲ್ಲ ನೋಡು.. ದೇ ಆರ್ ಆಲ್ ರೆಸ್ಪೆಕ್ಟೆಡ್ ಜಾಬ್ಸ್.. ಹಾಗೆಲ್ಲ ಅವಹೇಳನ ಮಾಡೋದು ತಪ್ಪು..”

” ಸಾರ್..ನಾ ಎಲ್ಲಿ ಅವಹೇಳನ ಮಾಡಿದೆ ? ಇರೋ ವಿಷಯ ಹೇಳಿದೆ ಅಷ್ಟೆ.. ಯಾವುದೋ ದೇಶದ, ಯಾರೋ ಗಿರಾಕಿ ಆರ್ಡರು ಕೊಡ್ತಾನೆ.. ಅದನ್ನ ಬಾಡಿ ಸೈಜಿನ ಅಳತೆ ತೊಗೊಂಡು ಬಟ್ಟೆ ಹೊಲಿಯೊ ಟೈಲರುಗಳ ತರ ನಿಮ್ಮ ಈ ಪಾಸಾದ ಹುಡುಗರು ಪ್ರೊಗ್ರಾಮಿಂಗ್ ಅಂತಲೊ, ನೆಟ್ವರ್ಕಿಂಗ್ ಹೆಸರಲ್ಲೊ, ಆರ್ಕಿಟೆಕ್ಚರ್ ನೆಪದಲ್ಲೊ – ಯಾವುದೋ ಒಂದು ಹೆಸರಲ್ಲಿ ಮಾಡೊ ಕೆಲಸ ಕೂಲಿ ತರ ಅಲ್ದೆ ಇನ್ನೇನು ಸಾರ್..? ದಿನಗೂಲಿ ತರ ಅಲ್ದೆ ತಿಂಗಳ ಸಂಬಳ, ಬೋನಸ್ಸು ಅದೂ ಇದೂ ಅಂತ ಕೊಟ್ರೂ , ಅದೂ ಮಾಡಿದ ಕೆಲಸಕ್ಕೆ ಕೂಲಿ ಕೊಟ್ಟ ಹಾಗೆ ಲೆಕ್ಕಾ ತಾನೆ ?” ಅಂತ ಸಾರಾಸಗಟಾಗಿ ಇಡೀ ವರ್ಕಿಂಗ್ ಕಮ್ಯುನಿಟಿಯನ್ನೆ ಕೂಲಿ ಕೆಲಸದ ಹಣೆಪಟ್ಟಿಯಡಿ ಹಾಕಿ ಕೂರಿಸಿಬಿಟ್ಟ!

ಆದರು ನಾನು ಪಟ್ಟು ಬಿಡದೆ, “ಹಾಗಂತ ವಾದಕ್ಕೆ ಹೌದು ಅಂತ ಒಪ್ಕೊಂಡ್ರೂನು, ವ್ಯವಸಾಯಕ್ಕೂ ಮಾಡ್ರನ್ ಇಂಡಸ್ಟ್ರಿಗು ಹೋಲಿಸೋದು ಸರಿಯಿಲ್ಲ ಬಿಡು.. ಮಳೆ ನೀರು ನಂಬಿಕೊಂಡು ಉತ್ತಿಬಿತ್ತಿ ಬೆಳೆಯೊ ರೈತನೇನು ಕಮ್ಮಿ ಕೂಲಿನಾ? ಅವನ ಹೊಲದಲ್ಲಿ ಅವನೂ ಕೂಲಿನೆ ತಾನೆ ? ಅಲ್ಲಿರೋ ರಿಸ್ಕು ಕಡಿಮೆದೇನಲ್ಲಾ ಗೊತ್ತಾ?” ಎಂದೆ..

ಗುಬ್ಬಣ್ಣ ನನಗಿಂತಲೂ ಜಿಗುಟು.. ” ಅಯ್ಯೋ ಬಿಡಿ ಸಾರ್, ಅದಕ್ಯಾಕೆ ನಮ್ಮಲ್ಲಿ ಜಗಳ.. ಬೇಸಾಯ ಮಾಡ್ಕೊಂಡು ಹೋಗೋನು ಒಂತರ ಸೀ ಇ ಓ ಇದ್ದಂಗೆ ಅಂದ್ರೂ ಯಾರು ತಾನೆ ಕೇಳ್ತಾರೆ ? ಎಲ್ಲಾ ಬಣ್ಣದ ಜಗತ್ತನೆ ನೋಡ್ತಾರೆ.. ಅದಕ್ಕೆ ಹಳ್ಳಿ ಬಿಟ್ಟು ಪಟ್ಟಣಕ್ಕೆ ಹೋಗ್ತಾರೆ, ಬೆಂಕಿಪೊಟ್ನದ ತರ ರೂಮುಗಳಲ್ಲಿ ಇದ್ಕೊಂಡು ಶಿಫ್ಟು, ಟೈಮು ಅನ್ನೊ ಮುಖ ನೋಡದೆ ಹಗಲು ರಾತ್ರಿ ಕೂಲಿಗಿಂತ ಹೆಚ್ಚಾಗಿ ದುಡಿತಾರೆ.. ಕಾರು, ಮೊಬೈಲು, ಫೇಸ್ಬುಕ್ಕು, ಟ್ವಿಟ್ಟರು, ವಾಟ್ಸಪ್ಪು ಅಂತ ಯಾವುದೋ ಲೋಕದಲ್ಲಿ ಕಳೆದುಹೋಗಿ, ಏನೊ ಹುಡುಕ್ಕೊಂಡು ನರಳ್ತಾ ಇರ್ತಾರೆ.. ನಾ ಹೇಳಿದ್ದು ವ್ಯವಸಾಯ ಅನ್ನೊ ಲೆಕ್ಕದಲ್ಲಿ ಮಾತ್ರ ಅಲ್ಲ.. ಓದಿದವರೆಲ್ಲ ಹೋಗಿ ಇನ್ನೊಬ್ಬರಡಿ ಕೆಲಸಕ್ಕೆ ಸೇರ್ತಾರೆ ಹೊರತು ತಾವೇ ಹೊಸದಾಗಿ ಕೆಲಸ ಸೃಷ್ಟಿಮಾಡೊ ಎಂಟರ್ಪ್ರೂನರ್ಸ್ ಆಗಲ್ಲ ಅನ್ನೊ ಅರ್ಥದಲ್ಲಿ ಹೇಳಿದೆ ಸಾರ್.. ನೋಡ್ತಾ ಇರಿ.. ಹೀಗೆ ಆದ್ರೆ ಹಳ್ಳಿ ಕಡೆ ಬೇಸಾಯಕ್ಕು ಕೂಲಿಗೆ ಯಾರೂ ಸಿಗದೆ ಎಲ್ಲಾ ತುಟ್ಟಿಯಾಗಿಬಿಡುತ್ತೆ… ಈ ಜನರೆ ಬೈಕೊಂಡು ಕಾಸು ಕೊಡಬೇಕು ಅದಕ್ಕೆಲ್ಲ” ಎಂದು ದೊಡ್ಡ ಭಾಷಣ ಬಿಗಿಯುತ್ತ, ಎಲ್ಲಿಂದೆಲ್ಲಿಗೊ ಕೊಂಡಿ ಹಾಕಿಬಿಟ್ಟ ಗುಬ್ಬಣ್ಣ..

“ಸರಿ ಬಿಟ್ಟಾಕು ಗುಬ್ಬಣ್ಣ.. ನಿನ್ ಮಗಳಂತು ವ್ಯವಸಾಯ ಅಂತ ಹೋಗದ ಡೌಟ್.. ಬೇರೇನು ಮಾಡ್ತಾಳೆ ಅಂತೇಳು..” ಎನ್ನುತ್ತಾ ಮಾತನ್ನ ಮತ್ತೆ ಮೊದಲಿನ ಟ್ರಾಕಿಗೆ ತಿರುಗಿಸಿದೆ..

” ಅಯ್ಯೊ ತಲೆ ಕೆಡಿಸ್ಕೊಳೊದು ಯಾಕೆ ಬಿಡಿ ಸಾರ್..ಸೆಂಟ್ರಲ್ ಗೌರ್ಮೆಂಟುದು ನೂರೆಂಟು ಸ್ಕೀಮುಗಳಿದಾವಂತೆ – ಸ್ಕಿಲ್ ಇಂಡಿಯಾ, ಮೇಕಿನ್ ಇಂಡಿಯಾ ಹಾಗೆ, ಹೀಗೆ ಅಂತ. ಯಾವದಾದರು ಒಂದು ಹಿಡ್ಕೊಂಡು ಹೊಸ ಕಂಪನಿ ಶುರು ಮಾಡಿದ್ರೆ ಅವಳೆ ಸೀ ಇ ಓ ಆಗ್ಬೋದು.. ಹೇಗೆ ಸಾವಿರಾರು ಕಾಲೇಜುಗಳು ಬೇಕಾದಷ್ಟು ಕೆಲಸದವರನ್ನ ಹುಟ್ಟುಸ್ತಾನೆ ಇರ್ತಾರೆ ಪ್ರತಿವರ್ಷ.. ಹಳ್ಳಿಲಿ ಬೇಸಾಯಕ್ಕೆ ಕೂಲಿಗಳು ಸಿಗದೆ ಇರಬಹುದು… ಕಂಪನಿ ಕೆಲಸಕ್ಕೆ ಆಳುಗಳು ಸಿಗೋದು ಕಷ್ಟವಿರಲ್ಲ.. ಹೇಗೊ ನಡೆಯುತ್ತೆ. ಅದೃಷ್ಟ ಚೆನ್ನಾಗಿದ್ರೆ ಅವಳೂ ಕ್ಲಿಕ್ ಆಗ್ಬೋದು, ಯಾರಿಗ್ಗೊತ್ತು. ಇನ್ನು ನೂರಾರು ಸ್ಮಾರ್ಟು ಸಿಟಿಗಳು ಬರ್ತವಂತಲ್ಲಾ ಎಲ್ಲಾದರು ಒಂದು ಕೈ ನೋಡ್ಕೊಂಡ್ರಾಯ್ತು !” ಎಂದ..

ಈ ಕಾಲದಲ್ಲಿ ಯಾರು ಏನಾಗ್ತಾರೊ ಹೇಳೋದೇ ಕಷ್ಟ ಅನಿಸಿ ನಾನು ಸಹ ‘ಹೂಂ’ಗುಟ್ಟಿದೆ… ” ಏನೇ ಆಗ್ಲಿ ಹಾಗೆನಾದ್ರೂ ಆದರೆ ನಮ್ಮಂತೋರಿಗು ಕೆಲಸ ಕೊಡಿಸಪ್ಪ ಅಲ್ಲಿ.. ನಾವು ಬದುಕ್ಕೊತೀವಿ”

“ಸರಿ ಸಾರ್..ಇನ್ನು ಸ್ವೀಟ್ ಹಂಚೋದಿದೆ ನಾ ಹೊರಟೆ” ಎಂದವನನ್ನೆ ಬಿಟ್ಟಬಾಯಿ ಬಿಟ್ಟುಕೊಂಡೆ ಅವಾಕ್ಕಾಗಿ ನೋಡುತ್ತ ನಿಂತುಕೊಂಡೆ , ಮತ್ತೇನು ಹೇಳಲೂ ತೋಚದೆ..


(Picture source : http://dezinequest.com/home.php)

********
(ಸೂಚನೆ: ಇಲ್ಲಿ ಬರುವ ಅಭಿಪ್ರಾಯ, ಮಾತುಕಥೆಗಳೆಲ್ಲ ಗುಬ್ಬಣ್ಣನ ಸ್ವಂತದ್ದು.. ಅದಕ್ಕೂ ಲೇಖಕನಿಗೂ ಯಾವುದೆ ರೀತಿಯ ಸಂಬಂಧವಿರುವುದಿಲ್ಲ ಎಂದು ಈ ಮೂಲಕ ಸೃಷ್ಟಿಕರಿಸಲಾಗಿದೆ)

– ನಾಗೇಶ ಮೈಸೂರು

00746. ನಗು ಏನಾದರು ಬಿಡದೆ..


00746. ನಗು ಏನಾದರು ಬಿಡದೆ..
___________________________


ಕಷ್ಟಗಳೆ ಬದುಕಾದಾಗ
ನಷ್ಟವಾದದ್ದಾದರು ಏನು ?
ನಗುವೇಕಾಗಬೇಕು ಕನಿಷ್ಠ ?
ನಕ್ಕು ತೊಲಗಿಸಿಬಿಡು ಅನಿಷ್ಠ..

ಯಾರಿಲ್ಲಿ ತಮ್ಮ ಸುಖ ಪರಿಪೂರ್ಣ ?
ತಿಂದರು ಜೀರ್ಣವಾಗುವುದೆ ಅಪೂರ್ಣ
ತ್ಯಾಜ್ಯವನೆಸೆಯೇ ಕಲಿತಿಲ್ಲವೆ ದೇಹ ?
ಒಳಗಿದ್ದು ಅದರಂತಾಗದ ಕಳ್ಳ ಮನಸ !

ಚಿಂತೆಗಳಿಲ್ಲದ ಹೊತ್ತಿದೆಯೆ ಮೊತ್ತ ?
ಹಾಸಿ ಹೊದೆಯದ ಜನ ನಿಮಗೆ ಗೊತ್ತಾ?
ಓದದ ಕೀಳರಿಮೆ ಬಿಡದೆ ಕಾಡಿದರವನ
ಆಮೇಲಿನ್ನೇನು ಬದುಕು ಕಂಗೆಡಿಸಿವನ..

ಗೊತ್ತಿದೆ ಬದುಕಿಗೆ ಬೇಕೇನೆಂದು ಭ್ರಮಿಸಿ
ಗುಳೆ ಹೊರಟವರೆ ಎಲ್ಲ ಹುಡುಕುತ್ತ
ಅಚ್ಚರಿ ನೋಡರು ಬೇಕೇನೆಂದು ತಮಗೆ
ಅವರಿವರದೆ ಹಾದಿಯಲಿಡುತ ನಡಿಗೆ..

ಕಾಡಿದರೂ ಸಂಶಯ ಅಡಿಗಡಿಗೆ
ಎಲ್ಲರು ಒಂದೆ ಬಾಣಲಿಯೊಳಗೆ
ಅನುಭವಿಸೊಂದೆ ತರ ನೋವು ನಗಿರಣ್ಣ
ಧೀಮಂತಿಕೆ ಇದ್ದರೆ ಮನಸಿನ ಹಾದಿ ಹಿಡಿಯಣ್ಣ..

– ನಾಗೇಶ ಮೈಸೂರು

(picture source: https://en.m.wikipedia.org/wiki/File:Bundesarchiv_Bild_183-T0425-0005,_Grevesm%C3%BChlen,_Bekleidungswerk,_Wettbewerb.jpg)

00745. ಮುವ್ವತ್ತಮೂರು ಕೋಟಿ ದೇವತೆಗಳು !


00745. ಮುವ್ವತ್ತಮೂರುಕೋಟಿ ದೇವತೆಗಳು !
_______________________________

ದೇವರ ಮಾತು ಬಂದಾಗೆಲ್ಲ ನಮ್ಮಲ್ಲಿ ಮೂವ್ವತ್ತಮೂರು ಕೋಟಿ ದೇವರೆಂದು ಹೇಳುವುದನ್ನು ಕೇಳಿಯೇ ಇರುತ್ತೇವೆ. ಅದು ಯಾರ್ಯಾರು ಮತ್ತು ಯಾವ ಲೆಕ್ಕದಲ್ಲಿ ಇಷ್ಟೊಂದಾದರು ಎನ್ನುವ ಕುತೂಹಲವಿತ್ತು. ಅದಕ್ಕೆ ಅಂತರ್ಜಾಲ ಮಾಹಿತಿಯನ್ನು ಜಾಲಾಡಿಸಿದಾಗ ಸಿಕ್ಕ ಮಾಹಿತಿ ಆಸಕ್ತಿದಾಯಕವಾಗಿತ್ತು. ಮೊದಲಿಗೆ ಮುಖ್ಯ ಸಾರಾಂಶವೆಂದರೆ ಇರುವ ಪ್ರಮುಖ ದೇವರುಗಳು ಮೂವ್ವತ್ತಮೂರು; ಆ ಪ್ರತಿಯೊಬ್ಬರಿಗೂ ಅಂಟಿಕೊಂಡ ಮರಿದೇವರುಗಳ ಸಂಖ್ಯೆ ಒಂದೊಂದು ಕೋಟಿ. ಅಲ್ಲಿಗೆ ಮೂವ್ವತ್ಮೂರು ಕೋಟಿ ಆಯಿತಲ್ಲ ? ಇನ್ನು ಆ ಪ್ರಮುಖ ದೇವರುಗಳಲ್ಲು ಲೆಕ್ಕ ಹುಡುಕಿದರೆ – ಅಷ್ಟಾವಸುಗಳು ಎಂಟಂತೆ; ಏಕಾದಶ ರುದ್ರರು ಹನ್ನೊಂದು ; ಜತೆಗೆ ಹನ್ನೆರಡು ದ್ವಾದಶಾದಿತ್ಯರು ಸೇರಿದರೆ ಮೂವ್ವತ್ತೊಂದಾಯ್ತು. ಅದಕ್ಕೆ ದ್ಯು ಮತ್ತು ಪೃಥಿವಿ ಎಂಬಿಬ್ಬರನ್ನು ಸೇರಿಸಿದರೆ ಮೂವ್ವತ್ಮೂರಾಯ್ತು ಎನ್ನುವ ಲೆಕ್ಕ..

ನನಗೆ ಅದೆಲ್ಲ ದೇವರುಗಳ ಹಿನ್ನಲೆ, ವಿವರಗಳ ಆಳ ಜ್ಞಾನವಿರದಿದ್ದರು ಸಿಕ್ಕ ಮಾಹಿತಿ ಕಲೆಹಾಕಿಡಬೇಕೆನಿಸಿ ಈ ಕೆಳಗಿನ ಎರಡು ಪದ್ಯಗಳ ರೂಪದಲ್ಲಿ ಹಿಡಿದಿಡಲು ಯತ್ನಿಸಿದೆ. ಕನಿಷ್ಠ ಮಕ್ಕಳು ಇಂತಹ ಪ್ರಶ್ನೆ ಕೇಳಿದಾಗ ಉತ್ತರಿಸಲು ‘ರೆಫರೆನ್ಸ್’ ರೀತಿಯಲ್ಲಿ ಸಹಾಯಕವಾಗಲೆಂದು..😊 ಅಂತರ್ಜಾಲದ ಮಾಹಿತಿಯಾದ ಕಾರಣ ನಿಖರತೆಯ ಬಗ್ಗೆ ಖಚಿತವಾಗಿ ಗೊತ್ತಿಲ್ಲವಾದರೂ ಪ್ರಾಥಮಿಕ ಮಾಹಿತಿಯಾಗಿ ಬಳಸಲು ಅಡ್ಡಿಯಿಲ್ಲವೆಂದು ಭಾವಿಸುತ್ತೇನೆ ( ತುಂಬಾ ಹಿಂದೆ ಬರೆದ ಕಾರಣ ಹೆಚ್ಚಿನ ವಿವರಗಳು ನೆನಪಿನಲ್ಲಿಲ್ಲ ಕೂಡ)

ಮುವ್ವತ್ತಮೂರುಕೋಟಿ ದೇವತೆಗಳು – 01
__________________________________


(Picture source: https://www.facebook.com/Hindu-Yuva-Sena-Maddur-421129821374036/?fref=nf)

ಕಂದ ಗೊತ್ತೆ ನಿನಗೆ ಸವಾಲು
ನಮ್ಮ ಹಿಂದೂ ದೇವತೆಗಳು
ಎಲ್ಲಾ ಸೇರಿದರೊಟ್ಟು ತಾಳು
ಮುವ್ವತ್ತ ಮೂರು ಕೋಟಿಗಳು! ||

ಮುಖ್ಯ ದೇವತೆ ಮೂವತ್ಮೂರರ
ಒಂದೊಂದು ಕೋಟಿ ಪರಿವಾರ
ಪ್ರತಿಯೊಬ್ಬರದು ಮರಿ ದೇವರ
ಮುವ್ವತ್ಮೂರರ ಸಂಖ್ಯಾಗಣ ತರ ||

ಆ ಮುವ್ವತ್ಮೂರಕೆ ಸಿಗಲು ಲೆಕ್ಕ
ಏಕಾದಶ ರುದ್ರರೆ ಹನ್ನೊಂದಕ್ಕ
ಅಷ್ಟಾವಸು, ದ್ವಾದಶಾದಿತ್ಯರು
ದ್ಯು, ಪೃಥಿವೀಗೆ ಮೂವತ್ಮೂರು ||

ಮೂವತ್ಮೂರು ಮೂರಾಗಿ ಭಾಗ
ಹನ್ನೊಂದನ್ನೊಂದರ ಸಹಯೋಗ
ವಿಶ್ವವನೆ ಮೂರಾಗಿ ಕತ್ತರಿಸಿದ
ಪ್ರತಿ ಗುಂಪಿಗೊಂದೊಂದು ಜಾಗ ||

ವಿಶ್ವ ಭಾಗಾಕಾರ ಮೂರಾಕಾರ
ಭೂಲೋಕ ನಾಯಕ ಅಗ್ನಿ ಸ್ಥಿರ
ಅಂತರ್ಲೋಕ ಇಂದ್ರನ ಭಾರ
ದ್ಯುಲೋಕಕೆ ಸೂರ್ಯನೆ ಸಾರ ||

———————————————————-
ನಾಗೇಶ ಮೈಸೂರು
———————————————————-

ಮುವ್ವತ್ತಮೂರುಕೋಟಿ ದೇವತೆಗಳು – 02
__________________________________


(Picture source – http://image.indiaopines.com/wp-content/uploads/2014/12/330-million-god-hindu.jpg)

ವಿಶ್ವ ಪ್ರತಿ ಮೂರರ ಭಾಗಕ್ಕೂ
ಮುಖ್ಯದೇವತೆಗಳನ್ನೊಂದಕ್ಕೂ
ಗಂಟ್ಹಾಕಿದ ಗಮಕ ನಿಯಾಮಕ
ಸೇರೆ ಮುವತ್ಮೂರರ ಸುಖದುಃಖ ||

ಅಷ್ಟಾವಸು ಗಣ ದೇವತೆಗಳು
ಧರ್ಮವಸು ಮಾತಾಪಿತಗಳು
ಪ್ರಭಾಸ,ಧರ,ಪ್ರತ್ಯೂಷ,ಅನಲ
ಅಹಸ,ಸೋಮ,ಧ್ರುವ,ಅನಿಲ ||

ಭಾವೋದ್ಭವ ಆದಿತ್ಯಾತ್ಮಕ ಶ್ರೀರುದ್ರ,
ಶಿವಾ,ನೀಲೋಹಿತಾ,ಈಶಾನ,ರುದ್ರ
ಶಂಕರ,ಮಹದೇವಾ,ವಿಜಯರುದ್ರ
ಮಹಾರುದ್ರ, ದೇವದೇವ, ಭೀಮರುದ್ರ ||

ಧತ, ಆರ್ಯಮ, ಮಿತ್ರರೀ ಆದಿತ್ಯರು
ವರುಣ,ಇಂದ್ರ, ವಿವಸ್ವನ, ತ್ವಶ್ಥರಿಹರು
ವಿಷ್ಣು, ಅಂಶುಮನ, ಭಾಗ, ಪುಷ, ಸ್ವರ
ದ್ವಾದಶಾದಿ ಆದಿತ್ಯರ ಗುಂಪಿನ ಸಾರ ||

ಆಗ್ನೇಯ ಆಗ್ನಿ, ಉತ್ತರಕೆ ಕುಬೇರ
ದಕ್ಷಿಣಕೆ ಯಮಾ, ಪಶ್ಚಿಮಕೆ ವರುಣ
ಪೂರ್ವಕ್ಕೆಇಂದ್ರ, ಈಶಾನ್ಯ ಮಹೇಶ
ನೈಋತ್ಯ ನಿಖರತಿ, ಪ್ರವಾಹ ವಾಯು ||

———————————————————-
ನಾಗೇಶ ಮೈಸೂರು
———————————————————-

(ಈ ಮೂವ್ವತ್ತಮೂರು ಕೋಟಿ ದೇವತೆಗಳ ಮತ್ತೊಂದು ವಿಭಿನ್ನ ವ್ಯಾಖ್ಯಾನ ಈ ಕೊಂಡಿಯಲ್ಲಿದೆ.. : http://indiaopines.com/33-crore-gods-hindus-hinduism/)

00744. ‘ಮನ’ಗಮನ..


00744. ‘ಮನ’ಗಮನ..
________________________

ಗಮ್ಮನೆ ಸುಮ್ಮನಿರದ ಮನದ ಚಾಳಿಗೆ ಪದಗಳಾಗುವ ಚಟ – ಕೆಲವೊಮ್ಮೆ ಅರ್ಥಪೂರ್ಣವಾಗಿ, ಮತ್ತೆ ಕೆಲವೊಮ್ಮೆ ಅರ್ಥಗರ್ಭಿತವಾಗಿ, ಮಿಕ್ಕಾಗ ಅರ್ಥರಹಿತವಾಗಿ. ಅಂತಹ ಅರ್ಥರಾಹಿತ್ಯಕ್ಕೆ ಸಮೀಪವಾಗಿ ಗೀಚಿದ ಕೆಲವು ತುಣುಕುಗಳಿವು.. (ಹಾಯ್ಕು ಮಾದರಿಯಲ್ಲಿ) – ಜಸ್ಟ್ ಟೈಂಪಾಸ್ 🙂


‘ಮನ’ಗಮನ..
______________

(೦೧)
ಕಾಡುವ ಮನ
ಎಡಬಿಡದ ಶಿಸ್ತು
– ಅವಳ ಹಿಂದೆ.

(೦೨)
ಚೆಲ್ಲಾಟ ಮನ
ಪ್ರೇಯಸಿಗೆ ಹುಡುಕಿ
– ದುಂಬಿಯ ತನು.

(೦೩)
ಸತತ ಮನ
ನಿತ್ಯಾಲೋಚನೆಯಲಿ
– ನಿರತ ಶಿಲ್ಪಿ.

(೦೪)
ಯಾಕ್ಹೀಗೆ ಮನ
ಚಡಪಡಿಸುತಲಿ
– ದಿಕ್ಕೆಟ್ಟಲೆತ.

(೦೫)
ಮುದುರಿ ಮನ
ಏನೋ ಬೇಸರದ ಕ್ಷಣ
– ಯಾವುದೂ ಬೇಡ.

(೦೬)
ಹುಚ್ಚೆದ್ದ ಮನ
ಉತ್ಸಾಹದ ಯಾನ
– ಎಲ್ಲಿದ್ದ ಕಿಡಿ ?

(೦೭)
ಅವಳ ಮನ
ಅರಿತೂ ಅರಿಯದ
– ನಾಟಕ ಸೊಗ.

(೦೮)
ಅರೆ ಮನಸು
ಅರೆ ಬರೆ ಸಂಕೇತ
– ಗೊಂದಲ ಹಿತ.

(೦೯)
ಯಾವಳೋ ಮನ
ಕದ್ದು ಆಡಿಸುವಾಟ
– ಪ್ರೀತಿಯ ಬೇಸ್ತು.

(೧೦)
ಸಂಪಿಗೆ ಮನ
ಸುವಾಸನೆಯೆ ಹಿತ
– ಅನುಭಾವಕೆ.

– ನಾಗೇಶ ಮೈಸೂರು

00743. ಚಳಿ ಕುಟುಕಿದಾಗ..(ತುಣುಕುಗಳು – ೨೬.೦೫.೨೦೧೬)


00743. ಚಳಿ ಕುಟುಕಿದಾಗ..(ತುಣುಕುಗಳು – ೨೬.೦೫.೨೦೧೬)
_______________________________________________


(೦೧)
ಮುಂಜಾವು ಚಳಿ
ಮಾತಿಲ್ಲ ಕಸಿವಿಸಿ
– ಅವಳಿಲ್ಲದೆ.

(೦೨)
ಅದುರೊ ಚಳಿ
ನಡುಗಿಸಿ ಬಿಡದೆ
– ಜಲಬಾಧೆಗೂ.

(೦೩)
ಮೇಲೆಳೆದುಕೊ
ವಿಪರೀತ ಚಳಿಗೆ
– ಪ್ರೀತಿಯ್ಹೊದಿಕೆ .

(೦೪)
ಮುನಿಸ ಬಿಡು
ಇರುಳ ಬಗಲಲ್ಲಿ
– ಚಳಿಗಪ್ಪಿಕೊ.

(೦೫)
ಭುಜಕೊರಗಿ
ಬಳಸಿದ ತೋಳಲಿ
– ಚಳಿ ಬೆವರು.

(೦೬)
ಚಳಿಯ ಚಾಳಿ
ಮುನಿದವರಿಗ್ಹಚ್ಚೆ
-ವಿರಹದುರಿ.

(೦೭)
ತೀವ್ರ ಚಳಿಗೆ
ಸೆಟೆದು ಮರಗಟ್ಟೆ
– ಬೆಚ್ಚನೆ ಕರ.

(೦೮)
ಹಿಮದೊಳಗೆ
ಕಟ್ಟಿಕೊಂಡರೆ ಗೂಡು
– ಚಳಿ ಬೆಚ್ಚಗೆ.

(೦೯)
ಚಳಿಯೇ ಧೂರ್ತ
ಸೆಕೆ ಸಂಕಲ್ಪ ಧ್ವಂಸ
– ಅವಹೇಳನ.

(೧೦)
ಚಳಿ ಮಳೆಗೆ
ಕವಿತೆಯಾಗೊ ಬಾಳು
– ಬೇಸಿಗೆ ಕಥೆ.

– ನಾಗೇಶ ಮೈಸೂರು

00742. ಐವತ್ತು…. ಯಾವತ್ತು ?


00742. ಐವತ್ತು…. ಯಾವತ್ತು ?
__________________________

ಐವತ್ತು…. ಯಾವತ್ತು ?
ಯಾರಿಗೆ ಗೊತ್ತು ಬಿಜಿ ಹೊತ್ತು
ಅರ್ಧ ಸೆಂಚುರಿ ಆಗುವ ಹೊತ್ತು
ಅರ್ಧ ಆಯಸ್ಸು ಮುಗಿದೇ ಹೋಯ್ತು !

ಯಾವಾ ಲೆಕ್ಕದಲರ್ಧ ?
ಏನು ಖಾತರಿ ನೂರರ ತರ್ಕ ?
ಅರ್ಧಕು ಮೊದಲೆ ಬಿದ್ದವೆಷ್ಟೋ
ಅರ್ಧ ದಾಟಿ ಉದುರಿದವಿನ್ನೆಷ್ಟೊ !

ಅರ್ಧ ಕಳೆದರು ಇನ್ನು
ಅರ್ಧಂಬರ್ಧ ಬೆಂದಕ್ಕಿ ಜೀವ
ಮಾಡುವುದೇನ ಅರಿಯುವುದೇ ಆಯ್ತು
ಮಾಡಲಿರುವಾಗಲೆ ಅರ್ಧ ಕಳೆದು ಹೋಯ್ತು..

ಮಾಡೀಗ ಎಂದರೆ ಆಯ್ತೆ ?
ಕಸುವೆಲ್ಲಿದೆ ಅರಿವಿದ್ದರೆ ಸಾಕೆ?
ಹಲ್ಲಿದ್ದಾಗಿರದ ಕಡಲೆ ಬೊಗಸೆ ತುಂಬಾ
ತಿನ್ನಲಾಗದ ಸಂಕಟ ಹಲ್ಲೆ ನಿರ್ಬಂಧ..

ಮಾಡಬೇಕಿತ್ತು ತಯಾರಿ ಸಂತತಿ
ಮಾಡಲಪ್ಪಣೆ ಅಣತಿಯ ದಾರಿ
ಹುಡುಕಾಟ ತೊಳಲಾಟದೆ ಸಿಕ್ಕಿ ಪೀಳಿಗೆ
ತಾನೆ ನರಳುವಾಗ ತಂದೀತೇನು ಏಳಿಗೆ ?

ಬಿಡು ಬಿಡು ಎಲ್ಲಾ ಸಂಖ್ಯೆಯ ಜೂಟಾಟ
ಅಂಕಿ ಅಂಶಗಳ ಬೆನ್ನಟ್ಟಿದ ಜೂಜಾಟ
ಐವತ್ತರ ಒಳಗದೆ ಹಸಿ ಮನ ಎಳಸು
ಪಕ್ವತೆ ಕಾಣದೆ ಮಾಯದೆ ಮಾಗೀತೆ ತಿನಿಸು ?

– ನಾಗೇಶ ಮೈಸೂರು

(picture source: http://www.gifts.com)

 

00741. ಯಾರು, ಯಾರು ಅವರಾರು ?


00741. ಯಾರು, ಯಾರು ಅವರಾರು ?
__________________________


ಯಾರು ಹಚ್ಚಿದ ಪ್ರಣತಿ ?
ಯಾರು ನಡೆಸಿಹ ನೌಕೆ ?
ಯಾರಿದರ ಯಜಮಾನ ?
ತೀರದ ಭಾವಗಳ ಪಯಣ …

ಯಾರು ಜೊತೆಗೂಡಿದರು ?
ಯಾರು ಜೊತೆಗೂಡಿಸಿದರು ?
ಯಾರಣತಿಗಿಲ್ಲಿ ಕ್ರಮಣ ?
ಕಾಣದೆ ತಿಣುಕಿದರು ನಿಲ್ದಾಣ..

ಯಾರು ನಿರ್ಧರಿಸಿಹ ಸುಂಕ ?
ಯಾರು ಸುಖದುಃಖಕೆ ತೀರ್ಪು ?
ಯಾರ ತೀರ್ಮಾನದ ಅಂತಿಮ ?
ನೀಡಿದ ರೂಪುರೇಷೆ, ವಿನ್ಯಾಸ..

ಯಾರ ಕಲ್ಪನೆ ನರ ಕೂಸು ?
ಯಾರು ತನಮನಕೆ ವಾರಿಸು ?
ಯಾರ ಜೋಡಣೆಯಿಟ್ಟ ಕಲ್ಪನೆ ?
ಮೂಡಿಸಿದ ಬೆರಗು ನರ-ಮನೆ…

ಯಾರು ಯಾರೆಂದು ಹುಡುಕಿ
ಯಾರಾರಿಗೊ ತದುಕಿ ತಿರಿದು
ಯಾರದಿ ಒಳಗ್ಹೊರಗು ಶೋಧನೆ
ಸೃಜಿಸಿದ ವಿಚಿತ್ರ ಅಂತರಂಗದೆ ..

– ನಾಗೇಶ ಮೈಸೂರು.

(Picture source : http://guardianlv.com/wp-content/uploads/2014/07/Was-the-Universe-Created-650×487.jpg)

ಭಾನುಮತಿ ನೀ ಸುಮತಿ – ಈ ದಿನದ ‘ನಿಲುಮೆ’ಯಲ್ಲಿ (೨೫.೦೫.2016)


ಭಾನುಮತಿ ನೀ ಸುಮತಿ – ಈ ದಿನದ ‘ನಿಲುಮೆ’ಯಲ್ಲಿ (೨೫.೦೫.2016)

–  ನಾಗೇಶ ಮೈಸೂರು

ಮಹಾಭಾರತದಲ್ಲಿ ನಿರ್ಲಕ್ಷ್ಯಕ್ಕೊಳಪಟ್ಟು ನೇಪಥ್ಯಕ್ಕೆ ಸರಿಸಲ್ಪಟ್ಟ ಅನೇಕ ಸ್ತ್ರೀ ಪಾತ್ರಗಳಲ್ಲೊಂದು ಪ್ರಮುಖ ಪಾತ್ರ ಕೌರವೇಶ ದುರ್ಯೋಧನನ ಪತ್ನಿ ಭಾನುಮತಿಯದು. ಭೂಮಂಡಲವನ್ನಾಳುವ ಒಡೆಯನಾದ ಕೌರವೇಶನ ಸತಿಯಾದರೂ ಯಾಕೊ…

Source: ಭಾನುಮತಿ ನೀ ಸುಮತಿ.

00740. ಎಲೇಲಿ ಸಿಕ್ಕಿದ್ದು ನೊಣದ ಹೆಣಾ..


00740. ಎಲೇಲಿ ಸಿಕ್ಕಿದ್ದು ನೊಣದ ಹೆಣಾ..
_________________________________

ನಿಮ್ಮೆಲೆಲಿ ನೊಣ ಸತ್ತು ಬಿದ್ದಿದ್ರೆ ನೀವೇನು ಮಾಡ್ತೀರಾ ? ಆ ನೊಣ ನೈತಿಕತೆ, ನಿಸ್ವಾರ್ಥ, ಪಾಪ, ಪುಣ್ಯ ಅಂತೆಲ್ಲಾ ಅಂತ ಬೋರ್ಡ್ ಹಾಕ್ಕೊಂಡ್ ಬಿದ್ದಿದ್ರೆ ಏನ್ ಮಾಡ್ತೀರಾ ?

ಹೆಣ ಬಿದೈತ್ರಿ ಎಲೆಯಾಗೆ
ನೊಣದ ಹೆಣ ಬಿದ್ದೈತೆ ಸತ್ತು..

ನೋಟು ಚಿಲ್ಲರೆ ಕಾಸು ಚೆಲ್ಲಿ
ಬಡಿಸಿದಡಿಗೆ ಗಮ ಗಮ
ಉಣ್ಣೊದೆಂಗ್ರಿ ಬಾಯ್ನೀರು
ನೊಣದ ಹೆಣ ಬಿದ್ದಾ ಮೂಲೆ..

ಹೋಟಲ್ನಾಗೆ ಆಗಿದ್ರೆ ಸುಮ್ನೆ
ಮುಖಕ್ಕೊಡದಂಗೆ ಬಿಸಾಡ್ಬೋದಿತ್ತು
ಕರ್ದೂಟ ಹಾಕಿದ್ರೂನು
ಪಕ್ಕದ ಎಲೆಗೆ ಹಾರ್ಕೋಬೋದಿತ್ತು
ಹಾಳು, ನಾನೇ ಮಾಡಿದ ಅಡಿಗೆ
ಸಾರಿಗ್ಯಾಕೆ ಹಾರ್ಕೊಂಡಿತ್ತು ಮುಂಡೇದು..

ಬಾಡೂಟ ಬಾವಣಿಕೆ ಹಂದಿ
ಹೊಡೆದ ಮಾಂಸದ ಪಾಲು ಕಡಿದು
ಕರ್ದು ಹುರ್ದ ಸಾಂಬಾರದ ಗಮ
ನೀರೂರಿಸಿಕೊಂಡು ಬಾಯಲಿ ಹಸಿದು
ಎಲೆಗಾಕೋ ಹೊತ್ತಲ್ಲಿ ಎಲ್ಲಿತ್ತೋ ಹಾಳ್ನೊಣ
ಹಂದಿಗಂಟಿತ್ತೊ, ವಾಸ್ನೆ ಹಿಡ್ಕೊಂಡ್ಬಂದಿತ್ತೊ..

ಹಂದಿ ನೊಣ ಎರ್ಡೂ ಮಾಂಸದ ಮುದ್ದೆ
ಕಣ್ಮುಚ್ಕೊಂಡು ತಿಂದೇಳಲೆ ಅಂತು ಮನ್ಸು
ತಿನ್ನೊದೆಂಗೆ ನೊಣ ಬಿದ್ದ ಸಾರು ?
ತಡ್ದಿತ್ತ ಏನೋ ಕೈ ಹಿಡ್ದಂಗೆ
ಕ್ಷುಲ್ಲಕ ನೊಣ ಕ್ಷುದ್ರ ಹೋಗ್ ತಟ್ಟಿಯಿಂದಾಚ್ಗೆ
ಎತ್ತೆಸ್ದು ಕೂತ್ಕೊಂಡಿದ್ದೆ ಆದ್ರೂ ತಪಸ್ಸು ಮನಸ್ನಾಗೆ..

ಲೆಕ್ಕಾಚಾರ ಹಾಕ್ತಾ ಕೂತಿತ್ತು ಜೋಬು
ವಾರಕ್ಕಾಗೋ ಸಾರು ಬಾಡೂಟ ಜಬರ್ದಸ್ತು
ಮೂರ್ಕಾಸಿನ ನೊಣ ಬಿದ್ರೆ ಎಸ್ಯೋದುಂಟಾ ಶಿವನೆ ?
ತಿನ್ನೋ ಜನಕೆಲ್ಲಾನು ಒಂದೆ ಅಲ್ವಾ ಎಲ್ಲಾ ?
ಎತ್ತೆಸ್ಯೋ ನೊಣ ಮನಸಿಂದ ಬಸ್ಯಾ
ಕುದಿಸಿರೊ ಸಾಂಬಾರ್ಲಿರಲ್ಲ ರಾಗ ದ್ವೇಸಾ ದೋಷಾ..

ಪೇಪರ್ ಚೂರ್ನಾಗೆತ್ತಿ ನೊಣದಾ ಹೆಣವಾ
ಅಂಗಳ್ದಾಚೆಗೆಸ್ದೆ ಹಂಗೆ ಮಣ್ಮಾಡ್ಬಂದೆ
ಕಂಕ್ಳಲ್ಲಿತ್ತಲ್ಲ ಪಾಕೀಟು ತೆಗ್ದು ಬುಟ್ಕೊಂಡೆ ಕಣಣ್ಣ
ತೇಗೊ ಬಾಡೂಟ ಗಡದ್ದು, ಯಾವ್ನೊಣ, ಯಾರ್ಹೆಣ ?

ಹೆಣಗಳು ಬಿದ್ದಿರ್ತಾವ್ರಿ ಮನದಾಗೆ, ಮನೆಯಾಗೆ
ಎತ್ತೆಸೆದು ಉಣ್ತಾರೆ ಮಂದಿ, ಇದು ತುಟ್ಟಿ ಕಾಲ..

– ನಾಗೇಶ ಮೈಸೂರು

(Picture source: http://www.freepik.com)

00739. ನಿರಂತರ ಯಾನದಲಿ..


00739. ನಿರಂತರ ಯಾನದಲಿ..
_______________________


ನಡೆಯುತಿದೆ ನಿರಂತರ ಸತತ
ಭಾವಗಳ ನಾನಾ ಯಾತ್ರೆ
ಅವಳು ಇವನು ಅವರು
ಯಾರೆಲ್ಲ ಎಳೆದ ತೇರೋ ಸರಿದು..

ಜಾತ್ರೆಯ ರಥಬೀದಿ ತುಂಬ
ಕಿಕ್ಕಿರಿದು ನೆರೆದು ಕನಸು
ಹಳೆ ಬೇರು ಹೊಸ ಚಿಗುರು
ಎಲ್ಲಾ ಪ್ರಾಯಗಳಾಳದ ಸಂತೆ..

ಅದೇ ಅಂಗಡಿ ಸರಕು
ಕಬ್ಬಿನ ಜಲ್ಲೆ ಹಿಂಡಿದ ಹಾಡು
ಹೀರಿ ಹಿಪ್ಪೆಯಾದವರ ಬದುಕು
ಅಣಕಿಸುತ ಹೊಸದರ ಕೆಣಕು..

ಮತ್ತೆ ಒಗೆದಂತದನೆ ಬಟ್ಟೆ
ಮರುಕಳಿಸುತಿದೆ ಹೊಸತಾಗಿ
ಬಣ್ಣ ಹಚ್ಚಿದ ರೂಪಾಂತರ ಚಿಟ್ಟೆ ಹಾರಿ
ಹೊಸತಿಗ್ವಿಸ್ಮಯ ಕೆದಕಿ ಬೇರಿಗೆ ನೆನಪು..

ಸೂತ್ರ ಬಂಧ ನಿಬಂಧವೊಂದೂ ಕಾಣೆ
ನಿಸ್ತಂತು ತಂತ್ರಕೆ ಶರಣು ಜೋತುಬಿದ್ದು
ಕಂಡು ಕಾಣದ ಲಯವನೆಲ್ಲ ಉಂಡು ದೇಕಿಸಿ
ಜೀಕಿ ನಡೆಸುತಿದೆ ಬದುಕ ಅವ್ಯಕ್ತ ಪ್ರಣತಿ..

– ನಾಗೇಶ ಮೈಸೂರು

ದುರಂತ ನಾಯಕಿ ಸೀತೆಯ ಬದುಕು………! Published in today’s Readoo (24.05.2016)


ದುರಂತ ನಾಯಕಿ ಸೀತೆಯ ಬದುಕು………! Published in today’s Readoo (24.05.2016)
______________________________________________________________________________

(ಓದುವ ಮುನ್ನ : ರಾಮನ ಹಬ್ಬದ ಹಾಗೆ ಸೀತೆಗೊಂದು ಹಬ್ಬವನ್ನು ಪ್ರತ್ಯೇಕವಾಗಿ ಆಚರಿಸಿದ ನೆನಪಿಲ್ಲ ನನಗೆ. ಬಹುಷಃ ನಿತ್ಯವೂ ಸ್ಮರಣೆಯಾಗುವ ವ್ಯಕ್ತಿತ್ವಗಳಿಗೆ ದಿನನಿತ್ಯವೂ ಹಬ್ಬವೆಂಬ ಭಾವದಿಂದಿರಬೇಕು. ಆದರ್ಶ ದಾಂಪತ್ಯದ ಜೋಡಿಗೆ ಸದಾ ಉದಾಹರಣೆಯಾಗುವ ಸೀತಾರಾಮರ ಬದುಕಿನಲ್ಲಿ ಸೀತೆಯ ಬದುಕು ಅಷ್ಟೊಂದು ನಿರಾಳವಾಗಿತ್ತೆ ? ಎಂದು ನೋಡಿದರೆ ಹುಟ್ಟುವ ಪ್ರಶ್ನೆಗಳ ಒಂದು ಜಿಜ್ಞಾಸೆ ಈ ಲೇಖನದಲ್ಲಿದೆ – ನಾಗೇಶ ಮೈಸೂರು)

ದುರಂತ ನಾಯಕಿ ಸೀತೆಯ ಬದುಕು………!

00738.ಮೌನದ ಘರ್ಜನೆ ಸದ್ದು


00738.ಮೌನದ ಘರ್ಜನೆ ಸದ್ದು
_________________________


ಚೆಲ್ಲಿ ಮೌನ ತಬ್ಬಿದೆ ಹೆಬ್ಬುಲಿಯ ಹಾಗೆ
ಘರ್ಜಿಸುವ ಸದ್ದು ಕಾದ ಸೀಸದ ಹಾಗೆ
ಕೇಳಿಸಬಾರದು ಶುದ್ಧ ಮೌನದಾ ಸದ್ದು
ಎನ್ನದಿರೊ ಮೂರ್ಖ ಅರಿಯದದರ ದರ್ದು..

ನಿಶ್ಯಕ್ತ ಮಾತು ವ್ಯಯವಲ್ಲಿ ಚಲನ ಶಕ್ತಿ
ಅವ್ಯಕ್ತ ಮೌನ ಜಡಶಕ್ತಿಗದು ಅಭಿವ್ಯಕ್ತಿ
ಬಂಡೆಗಲ್ಲ ಹಾಗಿದ್ದ ಮಾತ್ರಕಲ್ಲಾ ದುರ್ಬಲ
ಅಂದುಕೊಂಡೆ ಬೇಸ್ತು ಸ್ಪೋಟಿಸೆ ಮಹಾಕಾಳ..

ನೋಡಲ್ಲಿ ಹೇಗೆ ಕೂತಿವೆ ಹೃದಯಗಳೆರಡು
ಆಡದಾ ಮಾತಿಲ್ಲ ಕೇಳಿದ ಜಗವೇ ಬೆರಗು
ದೂರವಿದ್ದವೆರಡು ಹತ್ತಿರಾಗುತೆ ಏನಾಯ್ತು ?
ತಬ್ಬಿದ್ದ ದಬ್ಬಿ ಹಬ್ಬಿತೇಕೆ ಮೌನದ ಸರಹದ್ದು ?

ಮೌನ ಮೌನಗಳ ನಡುವೆ ಕಡಲಿನ ಘೋರ
ತೀರದಲ್ಲಿ ಕಾದು ಕುಳಿತೆರಡು ಮನದಪಾರ
ಚಂಚಲತೆ ಶರಧಿ ಆಗಲೆಂತು ಸೇತುವೆ ನಡುವೆ
ತೇಲುವ ನೌಕೆ ಹಡಗು ಕಟ್ಟಿದ ದೂರ ತುಸುವೆ..

ಒಂದೆ ಕೋಣೆಯೊಳಗೆ ಎಷ್ಟು ವ್ಯಾಪ್ತಿಯಗಲ
ಅಳೆಯದಮೇಯ ದೂರಗಳ ತಬ್ಬಿ ಮನದಾಳ
ಬರಿ ದೂರುಗಳಲ್ಲಿ ತುಂಬಿ ಸಂದಿ ಗೊಂದಿ ಕುಟುಕೆ
ಧೂಳು ಹಿಡಿದು ಕೂತ ನಂಟಿಗೇಕೊ ಮೌನದ ತೆಕ್ಕೆ..

– ಮೈಸೂರು ನಾಗೇಶ

(Picture source from : https://en.m.wikipedia.org/wiki/File:The_Roaring_Silence.jpg . The Roaring Silence is an album released in 1976 by Manfred Mann’s Earth Band. The poem has  no relation to this song or band, but the picture is symbolically used to depict the poem’s  intent)

00737. ದೇಗುಲ, ಚಪ್ಪಲಿ, ಮನಸು..


00737. ದೇಗುಲ, ಚಪ್ಪಲಿ, ಮನಸು..
_________________________


(೦೧)
ಪ್ರಶಾಂತ ಮನ
ಬೇಡಿ ದೇಗುಲ ಸುತ್ತೆ
– ಹೊಸ ಚಪ್ಪಲಿ.

(೦೨)
ಪಾದುಕೆ ಜತೆ
ಬಿಚ್ಚಿಟ್ಟ ಮನ ಧೂರ್ತ
– ದೇವರ ಜತೆ.

(೦೩)
ಪೂಜೆ ಸಾಮಾನು
ಕೊಂಡರಲ್ಲಿ ಉಚಿತ
– ಚಪ್ಪಲಿ ಬಿಡಿ.

(೦೪)
ಟೋಕನ್ ಸಿಸ್ಟಂ
ನಿರಾಳ ಮನ ಸ್ವಸ್ಥ
– ಅಡಿಗಡಿಗೆ.

(೦೫)
ಯಾರೆಂದವರು
ಬದಲಾವಣೆ ಕಷ್ಟ
– ದೇಗುಲ ಮಾಯೆ.

(೦೬)
ದೇವಸ್ಥಾನದೆ
ಕಳುವಾದರೆ ಹಿಗ್ಗು
– ಚಪ್ಪಲಿ ಪಾಪ.

(೦೭)
ರಾಮ ಪಾದುಕೆ
ಹೊತ್ತ ಭರತ ಶ್ರದ್ಧಾ
– ಕಾಲಿಗೆ ಸಾಕು.

(೦೮)
ದೇಗುಲ ಹಾದಿ
ಒತ್ತುವ ಕಲ್ಲು ಮಣ್ಣು
– ಪಾದುಕೆ ಬೇಕು.

(೦೯)
ಚಪ್ಪಲಿ ಮನ
ಚಿಂತನೆಗೂ ನಿಕೃಷ್ಠ
– ಇರಲೇಬೇಕು.

(೧೦)
ಬರಿಗಾಲ್ಹೆಜ್ಜೆ
ಇಟ್ಟ ಪ್ರತಿ ಗಳಿಗೆ
– ಧರೆ ನೆನಪು .


– ನಾಗೇಶ ಮೈಸೂರು.

00736. ದೇವರ ಕಿತಾಪತಿ 😊


00736. ದೇವರ ಕಿತಾಪತಿ 😊
__________________________

<!–

https://en.m.wikipedia.org/wiki/File:Rose_Prickles.jpg

ನೋಡಿದಿರ ದೇವರದೆಂತಾ ಕಿತಾಪತಿ ?
ಗುಲಾಬಿ ಮೈಗೆಲ್ಲ ಮುಳ್ಳಿಟ್ಟ ಸ್ವರಕ್ಷೆಗೆ ;
ಒಂದಿನಿತೂ ಕರುಣಿಸದೆ ಮರೆತುಬಿಟ್ಟ
ಗುಲಾಬಿಗೂ ನವಿರಾದ ಹೆಣ್ಣು ಜೀವಕೆ !

00735. ಕವಿ(ತೆ)ಗಳ ಬಾಣಂತನ..


00735. ಕವಿ(ತೆ)ಗಳ ಬಾಣಂತನ..
__________________________


ಯಾರಿಗೆ ತಾನೇ ಗೊತ್ತು ?
ಕವಿ(ತೆ)ಗಳ ಗರ್ಭಧಾರಣೆ
ದಿನನಿತ್ಯದ ಪ್ರಸವ ವೇದನೆಗೆ
ಅಂತರಂಗದ ಪ್ರಸೂತಿಗೃಹದಲಿ ತಜ್ಞ
ನಿಷ್ಣಾತರಂತೆ ನಟಿಸುವ ಸೂತಗಿತ್ತಿತನ..

ಹಾಳು ಹೊತ್ತು ಗೊತ್ತಿಲ್ಲದ ಸಂಭೋಗ
ಧುತ್ತೆಂದುದಿಸಿ ಆವರಿಸಿ ತುಣುಕ ಚಳುಕು
ನೋವು, ನಗೆ, ಕುಹುಕ, ವ್ಯಂಗ್ಯ, ಹತಾಶೆ
ಕೋಪದಾಶಯವೆಲ್ಲ ಆವಿಯಾಗುವ ಮೊದಲೆ
ಭರಿಸಿಬಿಡಬೇಕು ಚಕಚಕ ಚಾಕಚಕ್ಯತೆ
ಧರಿಸಿಬಿಡಬೇಕು ಅದೇ ಗಳಿಗೆ ಗರ್ಭದಲಿ
ನವವೊ ಅಭಿನವವೊ ಕ್ಷಣವೊ ದಿನವೊ ಮಾಸವೊ
ಯಾರಿಡುವ ಲೆಕ್ಕಾಚಾರ ಬಸಿರ ಚೀಲ
ಏದುಸಿರ ಬಗಿಲಲಿಟ್ಟು ಮುಲುಗುತ
ಅನುಭವಿಸಬೇಕು ಪ್ರಸವ ಯಾತನೆ..

ಗರ್ಭಪಾತಗಳಾದದ್ದುಂಟು
ಅವಸರದ ಹೆರಿಗೆಯ ಅನುಭಾವ
ಅನುಭೂತಿಗಳದೆ ಸೊಗ ದುಗುಡ ಗೊಂದಲ
ಜಿಗುಟುತನದಲಿ ಬಿಡದೆ ಪ್ರಳಯ ಕಾವ್ಯ
ಹಿಂಡಿ ಕಸುವೆಲ್ಲವ ಪ್ರನಾಳ ಶಿಶು ಜನನ..

ಅಲ್ಲಿಂದ ಶುರು ಬಾಣಂತನಗಳಿಗೆ
ಹುಟ್ಟಿತೇನೊ – ಗಂಡೊ,ಹೆಣ್ಣೊ,ಮತ್ತಾರೊ.. ?
ಕೂಸೆ ಮೂಸೆಯಿಂದೆದ್ದು ನಿಂತು
ಕತ್ತ ಪಟ್ಟಿ ಹಿಡಿದು ದಬಾಯಿಸೊ ಗಮ್ಮತ್ತು ;
ಹುಟ್ಟಿಸಿದ್ದಾರನೆಂದರೆ ಹೇಳಲಿ ಏನ ?
ವೈದ್ಯನಾ ? ತಾಂತ್ರಿಕನಾ ? ಲೆಕ್ಕಿಗನ ? ಜವಾನನಾ ?
ಅಲ್ಲಾರೊ ಕುಳಿತ ಮೌನ ನ್ಯಾಯಾಧೀಶರು
ತೀರ್ಪೀಯುವವರೆಗು ಬದುಕೆಲ್ಲಿ ?
ಉತ್ತರವೆಲ್ಲಿ ಬದುಕಿನ ಗುನುಗಲ್ಲಿ..
ಯಾರು ಓದುವರೊ, ಯಾರ ಮಡಿಲೊ.

ಹರಿದ ಮುದುರಿದ ಬಟ್ಟೆ ಕೊಡವಿ
ಹಾಸಿಟ್ಟು ಜತನದಿ ಮಲಗಿದ ಹಸುಳೆ
ಕಾದು ಕೂರು ನಿನ್ನ ಸರದಿಯ ಸರತಿ ;
ಬರದಿದ್ದರೇನು ಬಿಡು ಹುಟ್ಟೆ ಸಂತೃಪ್ತಿ..
ಅಯೋನಿಜ ಜನುಮ ಭಾವಗಳ ಕೊಳ್ಳಿ
ನೀರಿಗದ್ದಿದಂತೆ ತಂಪು ಪ್ರಸವದಲಿ..

ಸುಮ್ಮನೆ ಕಾಯುವ …
ಮತ್ತೊಂದು ಪ್ರಸವದ ಹೊತ್ತು..
ಜೊತೆಗೆ ಜೊತೆಗಾರರು ಬರುವರು…
ಮುರಿದು ಮೌನದ ಏಕಾಂತವನು…
ನಿರಂತರ ಬಸುರಿ ಪ್ರಸವ ಬಾಣಂತನ
ಕವಿ(ತೆ)ಯಾ ಹಣೆಬರಹ.

– ನಾಗೇಶ ಮೈಸೂರು

00734. ನೀ ನಾ ಅವ ..( weekend time pass..😜)


00734. ನೀ ನಾ ಅವ ..( weekend time pass..😜)
__________________________________________


ನೀ ಸಾಯ
ನಾ ಸಾಯ
ಅವ ಸಾಯ
ಈ ವ್ಯವಸಾಯ ||

ನೀ ಫೀಸು
ನಾ ಫೀಸು
ಅವ ಫೀಸು
ಅದಕೆ ಆಫೀಸು! ||

ನೀ ಚೇಲ
ನಾ ಚೇಲ
ಅವ ಚೇಲ
ಎಲ್ಲಾ ಕುಚೇಲ ! ||

ನೀ ಮುಖ
ನಾ ಮುಖ
ಅವ ಮುಖ
ಎಲ್ಲಿ ಹಸನ್ಮುಖ ?😔 ||

ನೀ ವಿಶ್ರಾಮ
ನಾ ವಿಶ್ರಾಮ
ಅವ ವಿಶ್ರಾಮ
ಯಾರು ಪರಿಶ್ರಮ ? ||

ನೀ ಸುಖ
ನಾ ಸುಖ
ಅವ ಸುಖ
ಹೆಸರಿಗೆ ಸುಖದುಃಖ ||

ನೀ ದುಃಖ
ನಾ ದುಃಖ
ಅವ ದುಃಖ
ಯಾರು ಕಷ್ಟಕೆ ಸಖ? ||

ನೀ ಮೋಸ
ನಾ ಮೋಸ
ಅವ ಮೋಸ
ತೀರದು ವ್ಯಾಮೋಹ ||

ನೀ ಸ್ವಾರ್ಥ
ನಾ ಸ್ವಾರ್ಥ
ಅವ ಸ್ವಾರ್ಥ
ಬೆತ್ತಲೆ ನಿಸ್ವಾರ್ಥ ||

ನೀ ಬುದ್ಧ
ನಾ ಬುದ್ಧ
ಅವ ಬುದ್ಧ
ಆಗೆ ಜೀವನ ಪ್ರಬುದ್ಧ ||

———————————————————-
– ನಾಗೇಶ ಮೈಸೂರು
———————————————————-

00733. ಪಿಸುಗುಟ್ಟಿದ ಕತ್ತಲ ಮಾತು..(ಅವಧಿಯಲ್ಲಿ)


00733. ಪಿಸುಗುಟ್ಟಿದ ಕತ್ತಲ ಮಾತು..(ಅವಧಿಯಲ್ಲಿ)

ನನ್ನ ಒಂದು ಕವನ ಇಂದಿನ ಅವಧಿಯಲ್ಲಿ ಬಂದಿದೆ ನೋಡಿ (೨೧. ೦೫.೨೦೧೬)

ಪಿಸುಗುಟ್ಟಿದ ಕತ್ತಲ ಮಾತು..

00732. ‘ತಾಯ್ಗಂಡನ ತಂದು’ – ತಾಯಿಗೆ ಗಂಡ ಅದೆಂತು ?


00732. ‘ತಾಯ್ಗಂಡನ ತಂದು’ – ತಾಯಿಗೆ ಗಂಡ ಅದೆಂತು ?
___________________________________________

ಚಿಕ್ಕವನಿದ್ದಾಗ ಪ್ರೈಮರೀ ಸ್ಕೂಲಿನಲ್ಲಿದ್ದ ಹೊತ್ತಲ್ಲಿ ನಮಗೊಬ್ಬ ಕೊಡವತಿ ಹೆಡ್ ಮೇಡಮ್ಮಿದ್ದರು. ಅವರು ಮಾತು ಮಾತಿಗೂ ಅವರದೇ ಕೊಡವ ಕನ್ನಡ ಶೈಲಿಯಲ್ಲಿ ‘ತಾಯಿ ಗಂಡನ ತಂದು’ ಅಂತ ಬೈಯುತ್ತಿದ್ದರು. ನನಗೋ ಬೈಗುಳಕಿಂತ ಹೆಚ್ಚಿನ ಕುತೂಹಲ ‘ತಾಯಿಗೆ ಗಂಡ’ ಹೇಗೆ ? ಅಂತ. ಹೇಗಿರಬಹುದು ಅಂತ ಹೊಳೆದದ್ದು ದೊಡ್ಡವನಾದ ಮೇಲೆ ಈ ಕವನ ಬರೆಯುವಾಗ ಅನ್ಕೊಳ್ಳಿ.. ಅದರ ಕುತೂಹಲ ನಿಮಗೂ ಇದ್ದರೆ ಇದೊ ಇಲ್ಲಿದೆ ಆ ಕವನ. ನಿಮಗೆ ಇದರ ಹೊರತು ಬೇರೆ ಅರ್ಥ ಗೊತ್ತಿದ್ದರೆ ಕಾಮೆಂಟಿನಲ್ಲಿ ಹಂಚಿಕೊಳ್ಳಿ…😊


ತಾಯ್ಗಂಡನ ತಂದು..!
_______________________

ಕೊಡವತಿ ಅಜ್ಜಿ ಪ್ರೈಮರಿ ಹೆಡ್ಮೇಡಮ್ಮು
ತಂಟೆ ತಕರಾರಿಗೆ ಅವರದದೆ ರಿದಮ್ಮು
ಅದೆ ತರಕಾರಿಯೂಟ ದಿನವು ತಿಂದು
ಬೈಯೇ ಬೈಗುಳ ‘ತಾಯ್ಗಂಡನ ತಂದು’ ||

ಕೈಯಲ್ಹಿಡಿದೆ ಬೆತ್ತ ಸೆರಗಾಕಡೆ ಸುತ್ತಿತ್ತಾ
ಕೊಡವರ ಶೈಲಿಯ ಮಾತ ಮಲ್ಲಿಗೆ ಗತ್ತ
ಅಳುವ ಮಕ್ಕಳೆಡೆಗೆ ಕೆಂಗಣ್ಣನೆ ಬಿಡುತ
‘ತಾಯಿ ಗಂಡನ ತಂದು’ ಅನ್ನುವರು ಸತತ ||

ಆಗರಿವಿರದ ಕಾಲ ಏನ್ಹಾಗೆಂದರೆ ತಾಳ
ತಾಯಿಗೆ ಮಗ ಗಂಡನ್ಹೇಗೆಂದು ತಳಮಳ
ತಾಯ್ಗಲ್ಲವೆ ಮಗ ಹುಟ್ಟುವುದು ಸಕಲ
ಹುಟ್ಟೋ ಮೊದಲೆ ಪತಿ ಹೇಗೆ ? ಗೊಂದಲ ||

ಹಿಡಿಯಿತು ಸಮಯವೆ ಬಹಳ ನಿಗೂಢ
ಅರ್ಥವ ಬಿಡಿಸಲು ತಿಣುಕಾಡಿಸಿ ಕಾಡ
ಗಂಡನೆನೆ ಅರ್ಥ ಗಂಡನಿರಬೇಕಿಲ್ಲ ದಡ್ಡ
ಗಂಡಾಂತರದ ‘ಗಂಡ’ ತಿಳಿಲಿಲ್ಲವೆ ಭಂಡ ? ||

ತಾಯಿಗಂಡನ ಮಾತು ತಾಯಿಗೆ ಮಿತ್ತು
ಗಂಡಾಂತರ ತಂದೊಡ್ಡುವ ಗಂಡದ ಕುತ್ತು
ಅರಿವಾದಾಗ ನಿರಾಳ ಮನಸಿನ ಮಸ್ತು
ಗಂಡಾಂತರ ತಹ ತಾಕತ್ತಿನ್ಹೆಮ್ಮೆಗೆ ಸುಸ್ತು ||

ಕಾಟ ಕೊಡುವ ಗಂಡು ಮಕ್ಕಳಿಗಿ ಬಿರುದು
ಯಾಕೊ ಅರಿಯೆ ಹೆಣ್ಮಕ್ಕಳಿಗೆ ಬಾರದು
ಕೋಟಲೆ ಕೊಡದವರೆಂದೆನೇ ಅನಿಸಿಕೆಗೆ
ಮಾತಲ್ಹೊಂದದ ಹೊಂದಾಣಿಕೆ ಬೆಸುಗೆಗೆ ||

ತಾಯ್ಗಂಡರೋ ತಲೆ ತಿನ್ನುವ ಪೊಗರೋ
ಬಾಲ್ಯದಾ ಪದ ಕುಣಿತ ಆ ಹೆಣ್ಣ ಚಿಗುರೋ
ನೆನಪಿಸುವ ಚಿತ್ರ ಗೌರವ ರಕ್ಷೆಯ ತರಹ
ಮೂಟೆ ಕಟ್ಟಿದ ಸೆರಗ ಗತ್ತಿನ ಮುಖ ಬರಹ ||

———————————————————-
ನಾಗೇಶ ಮೈಸೂರು
———————————————————-

00731. ಯಕ್ಷಗಾನ – ಕಿನ್ನರ ಲೋಕ


00731. ಯಕ್ಷಗಾನ – ಕಿನ್ನರ ಲೋಕ
_________________________________


(Picture source: https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Yakshagana1.jpg)

ಕನ್ನಡ ನಾಡಿನ ಅಮೋಘ ಕಲಾಪ್ರಕಾರಗಳಲೊಂದಾದ ಯಕ್ಷಗಾನ, ಒಂದರಲ್ಲೆ ಹಲವು ಕಲೆಗಳು ಸಮ್ಮಿಳಿತವಾದ ವಿಶಿಷ್ಟ ಕಲೆ. ಹೆಸರಲ್ಲೆ ಯಕ್ಷ ಲೋಕದ ಗಾನ, ನಾಟ್ಯ, ದೃಶ್ಯಗಳನಿಟ್ಟುಕೊಂಡು ಬರುವ ಈ ಕಿನ್ನರ ಲೋಕ, ಸ್ವತಃ ಕಣ್ಣೆದುರೆ ನೋಡಿದಾಗ ಹುಟ್ಟು ಹಾಕುವ ರೋಮಾಂಚನ ಮಾತಿನಲ್ಹಿಡಿಯದಸದಳ. ಆ ದಿರುಸು, ನಾಟ್ಯ ವೈಭವ, ದೃಶ್ಯ ಕಾವ್ಯತೆ, ಗಾನ ಮಾಧುರ್ಯ, ತಾಳ ಮೇಳಗಳ ಸಾಂಗತ್ಯ ಜತೆಗೆ ಹಾಸ್ಯ ಲೇಪನದ ರಸಾಯನ – ಇದೆಲ್ಲವೂ ಒಂದೇ ಕಲಾ ಪ್ರಕಾರದಲ್ಲಿ ಮಿಳಿತವಾಗಿರುವ ಬಗೆಯನ್ನು ಕಂಡಾಗ, ಇದಕಿಟ್ಟ ಯಕ್ಷಗಾನವೆಂಬ ಹೆಸರು ಸಾರ್ಥಕವೆನಿಸದಿರದು . ಅದರ ಒಂದೆರಡು ತುಣುಕುಗಳನ್ನು ಹಿಡಿದಿಡುವ ಯತ್ನ, ಈ ಜೋಡಿ ಕವನದ್ದು. 2012 ರ ವರ್ಷದ ಕೊನೆಯಲ್ಲಿ ಸಿಂಗಪುರ ಕನ್ನಡ ಸಂಘದ ಆಶ್ರಯದಲ್ಲಿ ನಡೆದ ಯಕ್ಷಗಾನ ಕಾರ್ಯಕ್ರಮದ ಸರಣಿಯ ಹಿನ್ನಲೆಯಲ್ಲಿ ಹುಟ್ಟಿದ ಕಾವ್ಯಗಳಿವು.

ಇದರಲ್ಲಿ ‘ಯಕ್ಷಗಾನದಾಟ’ ಕವನ ಯಕ್ಷಗಾನ ಕಲಾಪ್ರಕಾರದ ಮೇಲ್ವಿವರದ ಅಂಶಗಳತ್ತ ಗಮನ ನೀಡುತ್ತ ಬಾಹ್ಯ ವರ್ಣನೆಯತ್ತ ಗಮನ ನೀಡುವ ಕಾವ್ಯ.

‘ಕಿನ್ನರ ತನ್ಮಯ ಲೋಕ’ ತುಸು ಆಳಕ್ಕೆ ಹೊಕ್ಕು ಆ ಕಲಾವಿದರ ದಿರುಸು, ಬಿರುಸು, ತಾಳ್ಮೆ, ಕಲಾಪ್ರೇಮ, ತನ್ಮಯತೆಗಳತ್ತ ಇಣುಕು ನೋಟವಿಕ್ಕುವ ಯತ್ನ ಮಾಡುತ್ತದೆ.

01. ಯಕ್ಷಗಾನದಾಟ
______________________


ಚಿಕ್ಕ ವಯಸಲಿ ನೋಡಿ ನಿಬ್ಬೆರಗಾಗಿ
ಅಚ್ಚಳಿಯದೆ ನಿಂತ ನೆನಪಿನ ಜೋಗಿ
ಕುಪ್ಪಳಿಸಿ ಕುಣಿದ ರಂಗಮಂಚ ಮಗ್ಗಿ
ನೆಲಕಪ್ಪಳಿಸಿದ್ಹೆಜ್ಜೆಗೆ ಮೈಮನ ಕರಗಿ ||

ಆಗೊಂದು ತೆರೆಸಿ ನಿಜ ಯಕ್ಷ ಲೋಕ
ಕಂಸ ಕಂಡ ಕನಸಂತೆ ಮೈಗೆಣ್ಣೆ ಸಖ
ಮರೆತು ಹೋದರು ಬೇರೆಲ್ಲಾ ನೆನಕ
ನೋಡಿದ್ಯಕ್ಷಗಾನಗಳ ಹಸಿರ ಪುಳಕ ||

ಮೋಹಕವೆಂದರೆ ಯಕ್ಷಗಾನ ನಾಮ
ಹೆಸರಲ್ಲೆ ಪರಲೋಕಕೊಯ್ವ ಸಂಗಮ
ಯಕ್ಷ ಗಂಧರ್ವ ಕಿನ್ನರ ನಾಟ್ಯಸಂಗೀತ
ನಾಟಕಾಭಿನಯ ಎಲ್ಲ ಸೇರಿದ ಭೂತ ||

ಕಥೆ ಮೋಹಕತೆ ದಿರುಸಿನ ಮಾಯೆ
ಭಾಗವತ ಸಂಗೀತ ಗಂಧರ್ವ ಛಾಯೆ
ಗಿರಗಿರನೆ ಗಿರಗಿಟ್ಟಲಿ ಸುತ್ತೆ ಕಣ್ಕತ್ತಲೆ
ದೇವರು ಬಂದಂತೆ ಕುಣಿವರೆ ಮತ್ತಲೆ ||

– ನಾಗೇಶ ಮೈಸೂರು,

(Picture source from: https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:FullPagadeYakshagana.jpg)

02. ಕಿನ್ನರ ತನ್ಮಯ ಲೋಕ!
_______________________


ಗಂಟೆಗಟ್ಟಲೆ ಅವಿರತ ಕುಣಿದಾ ಸತತ
ಆಯಾಸವಾಗದೆ ಕುಣಿದ್ಹಾಡಿದರದ್ಭುತ
ಕಲೆಯ ಮೇಲಣ ಪ್ರೇಮಾಭಿಮಾನವಿತ್ತ
ಮುಡಿಪಿಟ್ಟ ಭಾವೋದ್ರೇಕ ಪ್ರೇರೇಪಿಸಿತ್ತ ||

ಮೂರ್ಕಲೆಗಳ ಸಂಗಮ ನೂರ್ಕಲೆ ಸಮ
ಬಣ್ಣ ಬಣ್ಣದ ದಿರುಸು ಚಿತ್ತಾರಗಳ ಜಮ
ತಲೆಯಿಂದ್ಹಿಡಿದು ಕಾಲ್ತನಕ ಶೃಂಗಾರಕೆ
ತಲೆಗಿಟ್ಟ ಕಿರೀಟ ಚಕ್ರಾಯುಧದ ಸರಕೆ ||

ಅಷ್ಟೊಂದು ಕುಣಿದರು ಬೀಳದ ಶಿರಭಾರ
ಭೂಮಿಯಂತೆ ಸುತ್ತಿದರು ಎದೆಗಟ್ಟಿ ಸರ
ಯಾರಿಗೂ ಹೋಲಿಸಲಾಗದ ಅಪರೂಪ
ತನ್ನಂತಾನೆ ಬೆಳಗ್ಹೊಳೆವಂತೆ ಸ್ವರ್ಣದೀಪ ||

ಈಚೆ ಸಿಂಗಪುರದಲಿ ನಡೆದ ಯಕ್ಷಗಾನ
ನೆನಪಿಸಿತು ಹಳೆ ನೆನಪಿನ ಬೃಂದಾವನ
ಗಣೇಶ ಹಬ್ಬದ ಚಪ್ಪರದಡಿ ಕಿನ್ನರ ಗಾನ
ತುಂಬಿದ ಜನಸಂದಣಿ ನಡುವೆ ಪ್ರಸ್ಥಾನ ||

– ನಾಗೇಶ ಮೈಸೂರು

(Picture source from: https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Demon_Yakshagana.jpg)

00730. ನಮ್ಮ ಬಾಳು, ಮರದ ಬದುಕು.. (ಹಾಯ್ಕು ಮಾದರಿ)


00730. ನಮ್ಮ ಬಾಳು, ಮರದ ಬದುಕು.. (ಹಾಯ್ಕು ಮಾದರಿ)
___________________________________________

(೦೧)
ಹಗಲಿರುಳು
ದ್ಯುತಿ ಸಂಶ್ಲೇಷಿಸುತ
– ಅರಳಿ ಮರ.

(೦೨)
ಅರಳಿ ಮರ
ಇರುಳಾಮ್ಲಜನಕ
– ಕೊಡುವ ತರ.

(೦೩)
ಮರ ಜನಕ
ವಿನಿಮಯ ಇಂಗಾಲ
– ವಿಷಕಂಠರು.

(೦೪)
ಆಲದ ಮರ
ಅಪ್ಪ ಹಾಕಿದರೇನು ?
– ಆಳದ ಮರ.

(೦೫)
ಬಿಳಲು ಬೇರು
ಬೀಳಲು ಬಿಡದೆಲೆ
– ಹಿಡಿವ ತರ.

(೦೬)
ಆಲ ವಿಶಾಲ
ಚಾಚಿದರೂ ಕೆಳಗೆ
– ಬೆಳೆಯ ಬಿಡ.

(೦೭)
ಆಪ್ಯಾಯಮಾನ
ನೆರಳು ಬಿಳಲಡಿ
– ಆಲದ ರಕ್ಷೆ.

(೦೮)
ನೀರ ಹೀರಿಯು
ಮತ್ತೇರಿಸೊ ಕೊಸರು
– ಈಚಲ ಮರ.

(೦೯)
ತೆಂಗಿನ ಮರ
ಬೆಳೆದೆತ್ತರ ಫಲ
– ಎಟುಕೊ ಕಾಲ.

(೧೦)
ಹೊಂಗೆಯ ಮರ
ನೆರಳ ಸೆರಗ್ಹಾಸಿ
– ಬೆತ್ತಲೆ ಹೂವು.

– ನಾಗೇಶ ಮೈಸೂರು

00729. ಕಗ್ಗಕೊಂದು ಹಗ್ಗ ಹೊಸೆದು – ಕಗ್ಗದ ಟಿಪ್ಪಣಿ ೮


00729. ಕಗ್ಗಕೊಂದು ಹಗ್ಗ ಹೊಸೆದು – ಕಗ್ಗದ ಟಿಪ್ಪಣಿ ೮
__________________________________

ಕಗ್ಗದ ಟಿಪ್ಪಣಿ ೮, ಇಂದಿನ ರೀಡೂ ಕನ್ನಡದಲ್ಲಿ (೨೦.೦೫.೨೦೧೬)

ಕಗ್ಗಕೊಂದು ಹಗ್ಗ ಹೊಸೆದು…

00728. ತಂಗಳಲ್ಲ, ಉಳಿತಾಯ ಯೋಜನೆ..😛


00728. ತಂಗಳಲ್ಲ, ಉಳಿತಾಯ ಯೋಜನೆ..😛
_________________________________

ನಮ್ಮಾಕೆಗೆ ಸಂತಸ ಆನಂದ ಉತ್ಕಟ
ನಾ ರಾತ್ರಿಗೆ ತಂದರೆ ಪಾರ್ಸಲ್ ಊಟ;
ಮಾಯವಾಗೋ – ಸಾಗು,ಪಲ್ಯ,ಪಕ್ಕ-ಭಕ್ಷ್ಯ
ನಾಷ್ಟದ ಜತೆಗಾಗುತ್ತವೆ ನಾಳೆ – ಧುತ್ತನೆ ಪ್ರತ್ಯಕ್ಷ್ಯ !


– ನಾಗೇಶಮೈಸೂರು

00727. ಗುಬ್ಬಣ್ಣ, ಸೋಮಯಾಗ, ಸರ್ಟಿಫಿಕೇಟು ಇತ್ಯಾದಿ ( ಹಾಸ್ಯ ಬರಹ – ಲಘು ಹರಟೆ)


00727. ಗುಬ್ಬಣ್ಣ, ಸೋಮಯಾಗ, ಸರ್ಟಿಫಿಕೇಟು ಇತ್ಯಾದಿ ( ಹಾಸ್ಯ ಬರಹ – ಲಘು ಹರಟೆ)
______________________________________________________________


ಗುಬ್ಬಣ್ಣ ಸಕ್ಕತ್ ಗಡಿಬಿಡಿಯಲ್ಲಿ ಓಡಾಡುತ್ತಿದ್ದ ಕಾರಣ ಕೈಗೆ ಸಿಗೋದೆ ಕಷ್ಟವಾಗಿಹೋಗಿತ್ತು.

ಮೂರ್ನಾಲ್ಕು ಸಾರಿ ಪೋನ್ ಮಾಡಿದ್ರೂ ಆಸಾಮಿ ‘ಸಾರ್ ಸ್ವಲ್ಪ ಬಿಜಿ ಇದೀನಿ, ಆಮೇಲೆ ಪೋನ್ ಮಾಡ್ತೀನಿ’ ಅಂತ ಪೋನ್ ಕಟ್ ಮಾಡಿ ಇನ್ನೂ ರೇಗುವಂತೆ ಮಾಡಿಬಿಟ್ಟಿದ್ದ. ಸರಿ ಹಾಳಾಗಲಿ, ಅವನ ಗೊಡವೆಯೇ ಬೇಡ ಅಂತ ಬೈದುಕೊಂಡೆ ಲಿಟಲ್ ಇಂಡಿಯಾದ ಬಫೆಲೋ ರೋಡಲ್ಲಿ ತರಕಾರಿ ತಗೊಳೋಕೆ ಅಡ್ಡಾಡ್ತಾ ಇದ್ದಾಗ ಅಲ್ಲೆ ಅಂಗಡಿಯೊಂದರಲ್ಲಿ ಸಾಮಾನು ಖರೀದಿಸ್ತಾ ಇದ್ದ ಅವನೇ ಕಣ್ಣಿಗೆ ಬೀಳಬೇಕೆ?

‘ಈಗ ಸಿಕ್ಕಿದಾನಲ್ಲ , ಬೆಂಡೆತ್ತೋದೆ ಸರಿ’ ಅನ್ಕೊಂಡು ಅವನಿಗೆ ಗೊತ್ತಾಗದ ಹಾಗೆ ಹಿಂದಿನಿಂದ ಹೋಗಿ ಕತ್ತಿನ ಪಟ್ಟಿ ಹಿಡ್ಕೊಂಡಿದ್ದೆ, ಮೊದಲು ಬೆನ್ನ ಮೇಲೊಂದು ಬಲವಾದ ಗುದ್ದು ಹಾಕಿ.

ಬೆಚ್ಚಿಬಿದ್ದ ಗುಬ್ಬಣ್ಣ ರೇಗಿಕೊಂಡು ಹಿಂದೆ ತಿರುಗಿದವನೆ ನನ್ನ ಮುಖ ನೋಡಿ ಅರ್ಧ ಶಾಂತನಾದ – ಪೆಚ್ಚುನಗೆಯ ಟ್ರೇಡ್ಮಾರ್ಕ್ ಹಲ್ಲು ಗಿಂಜುತ್ತ. ಎರಡು ಕೈಯಲ್ಲಿರುವ ಬ್ಯಾಗಲ್ಲಿ ಅರಿಶಿನ, ಕುಂಕುಮ, ಧೂಪ, ಗಂಧದಕಡ್ಡಿ, ಹೋಮದ ಕಡ್ಡಿ – ಹೀಗೆ ಏನೇನೊ ಪೂಜಾ ಸಾಮಾನುಗಳು. ಅಷ್ಟೇನು ನಾಸ್ತಿಕನಲ್ಲದ ಗುಬ್ಬಣ್ಣ ಹಬ್ಬ ಹರಿದಿನ ಯಾವುದೂ ಅಲ್ಲದಿರುವ ಈ ಹೊತ್ತಲ್ಲೇಕೆ ಇಷ್ಟೊಂದು ಪೂಜೆ ಸಾಮಾನು ಹಿಡಿದಿದ್ದಾನೆ ? ಎಲ್ಲೊ ಹೆಂಡ್ತಿ ಆರ್ಡರಿರಬೇಕು ಅಂದುಕೊಂಡು ಬಾಯಿ ತೆಗೆಯೊ ಹೊತ್ತಿಗೆ ಸರಿಯಾಗಿ ಅವನೇ ಬಾಯ್ಬಿಟ್ಟ.

‘ ಸಾರ್.. ನಿಮಗೆ ಇಲ್ಲೆಲ್ಲಾದರೂ ಚಿಕನ್ ಸಿಕ್ಕೋ ಜಾಗ ಗೊತ್ತಾ ? ‘ ಅಂದ – ದಂಢಿಯಾಗಿ ಚಿಕನ್ ಮಾರೊ ಅಂಗಡಿ ಎದುರಲ್ ನಿಂತುಕೊಂಡಿದ್ದರೂ .

ನಾನು ರೇಗೊ ಸ್ವರದಲ್ಲೆ, ‘ಅದರ ಮುಂದೇನೆ ನಿಂತಿದೀಯಾ.. ಕಾಣೋದಿಲ್ವಾ?’ ಅಂದೆ.

‘ ಅಯ್ಯೋ .. ಆ ಚಿಕನ್ ಅಲ್ಲಾ ಸಾರ್.. ಅಲೈವ್ ..ಅಲೈವ್.. ಜೀವ ಇರೋ ಕೋಳಿ ಬೇಕು ..’

‘ಅಯ್ಯೋ ಗುಬ್ಬಣ್ಣಾ , ಏನೋ ಸಮಾಚಾರ ? ಪೋನಲ್ಲೂ ಕೈಗೆ ಸಿಗ್ತಾ ಇಲ್ಲಾ, ಇಲ್ಲಿ ನೋಡಿದ್ರೆ ಪೂಜೆ ಸಾಮಾನ್ ಅಂಗಡೀನೆ ಕೈಲ್ ಇಟ್ಕೊಂಡಿದೀಯಾ.. ಸಾಲದ್ದಕ್ಕೆ ದನ, ಕೋಳಿ, ಕುರಿಗಳನ್ನೂ ‘ಜೂ’ನಲ್ಲಿ ಮಾತ್ರ ನೋಡೋಕೆ ಆಗೋ ಈ ಸಿಂಗಾಪುರದಲ್ಲಿ ಜೀವ ಇರೊ ಕೋಳಿ ಎಲ್ಲಿ ಅಂತ ಹುಡುಕ್ತಾ ಇದೀಯಾ.. ಇಲ್ಲಿ ತಿನ್ನೋ ಕೋಳೀನೂ ‘ರೆಡೀ ಟು ಕುಕ್’ ಪ್ಯಾಕಿಂಗ್ ನಲ್ಲಿ ಇಂಪೋರ್ಟ್ ಆಗೇ ಬರೋದು ಅಂತ ಗೊತ್ತು ತಾನೆ ?’ ಎಂದೆ.

‘ ಅಯ್ಯೊ ಲೆಕ್ಕಾಚಾರಕ್ಕೆ ನಿಜವಾಗಲೂ ಜೀವ ಇರೊ ಕುರಿಯೊ, ಮೇಕೆಯೊ ಬೇಕು ಸಾರು.. ಅದು ಇಲ್ಲಿ ಸಿಗಲ್ವಲ್ಲಾ ಅಂತಲೇ ಕನಿಷ್ಠ ಕೋಳಿಗೆ ಹುಡುಕ್ತಿರೋದು..’

‘ ಗುಬ್ಬಣ್ಣ ಕಟ್ ದ ಕ್ರಾಪ್…ಫಟಫಟಾ ಅಂತ ಹೇಳಿಬಿಡು.. ವಾಟ್ಸ್ ಅಫ್ ?’ ಎಂದೆ, ಸುಮ್ಮನೆ ಅನವಶ್ಯಕ ಚರ್ಚೆ ಬೇಡ ಅಂದುಕೊಂಡೆ.

ಗುಬ್ಬಣ್ಣ ಕಿವಿಯ ಹತ್ತಿರ ಮುಖ ತಂದು ಪಿಸುದನಿಯಲ್ಲಿ ಏನೊ ದೊಡ್ಡ ಗುಟ್ಟು ಹೇಳುವವನ ಹಾಗೆ ನುಡಿದ -‘ ಸಾರ್.. ಜೋರಾಗಿ ಮಾತಾಡ್ಬೇಡಿ..ಸುಮ್ನೆ ಕೇಳಿಸ್ಕೊಳ್ಳಿ ಅಷ್ಟೆ – ‘ಸೋಮಯಾಗ’ ಮಾಡ್ತಾ ಇದೀನಿ ..!’ ಅಂತ ದೊಡ್ಡ ಬಾಂಬೆ ಸಿಡಿಸಿಬಿಟ್ಟ..

ನಾನು ಪಕ್ಕದಲ್ಲೆ ಬಾಂಬ್ ಬಿದ್ದವನಂತೆ ಬೆಚ್ಚಿಬಿದ್ದರು ಸಾವರಿಸಿಕೊಂಡು ಮುಖ ನೋಡಿದೆ ಜೋಕೆನಾದರೂ ಮಾಡುತ್ತಿದ್ದಾನಾ ಅಂತ.. ಈಚೆಗೆ ತಾನೆ ಹೆಡ್ಲೈನ್ಸ್ ನ್ಯೂಸಿನ ಸುದ್ದಿಯಾಗಿ, ಸೋಶಿಯಲ್ ಮೀಡಿಯಾದಲ್ಲೆಲ್ಲಾ ದಾಂಧಲೆ ಎಬ್ಬಿಸಿದ್ದ ಯಾಗದ ಗೀಳು ಇವನಿಗ್ಯಾಕೆ ಹತ್ತಿಕೊಂಡಿತು ಅನ್ನೊ ಅನುಮಾನದಲ್ಲೆ.

‘ ಜೋಕೇನೂ ಅಲ್ಲಾ ಸಾರ್… ಸೀರಿಯಸ್ಸೆ.. ನ್ಯೂಸು ನೋಡಿರಬೇಕಲ್ಲಾ ನೀವೂನು ? ಯಾವ ಹೋಮ, ಯಾಗ , ಪೂಜೆ ಏನು ಮಾಡಿದ್ರೂ ಒಂದು ಮೂಲೆ ಐಟಂ ಹಾಕ್ತಾ ಇದ್ದೋರು ಈ ಯಾಗಕ್ಕೆ ಮಾತ್ರ ಫಸ್ಟ್ ಪೇಜು ಹೆಡ್ಲೈನಲ್ಲಿ ಹಾಕೋ ಲೆವೆಲ್ಲಿದೆ ಅಂದರೆ ಇದು ಎಂಥ ಮಹಾನ್ ಯಾಗ ಇರ್ಬೇಕು ? ಇದನ್ನ ಇಲ್ಲೂ ಒಂದ್ಸಾರಿ ಮಾಡಿ, ಇಂಟನೆಟ್ಟಲ್ಲಿ ಒಂದೆರಡು ಪಿಕ್ಚರು ಹಾಕಿದ್ರೆ ಸಾಕು ನೋಡಿ, ಓವರ್ನೈಟ್ ವರ್ಡ್ ಫೇಮಸ್ಸು..!’

ನನಗೀಗ ಅನುಮಾನದ ಬದಲು ಗಾಬರಿ ಹೆಚ್ಚಾಯ್ತು, ಏನು ಮಾಡೋಕೆ ಹೊರಟಿದಾನೆ ಇವನು ಅಂತ…’ ಗುಬ್ಬಣ್ಣಾ.. ಇದು ತುಂಬಾ ಕಾಂಪ್ಲಿಕೇಟೆಡ್ ಮ್ಯಾಟರು ಕಣೊ.. ಅಲ್ಲೆಲ್ಲ ಸಿಕ್ಕಾಪಟ್ಟೆ ವಾರ್ ಆಫ್ ವರ್ಡ್ಸ್ ನಡೆದುಹೋಗಿದೆ. ಒಂತರ ಓವರ್ನೈಟ್ ಟಾಕ್ ಆಫ್ ದಿ ಟೌನ್ ಆಗೋಗಿದೆ.. ಅಲ್ಲದೆ ತೀರಾ ಪೊಲಿಟಿಕಲ್ ಮ್ಯಾಟರು ಬೇರೆ… ರಾಜಕಾರಣಿ, ಬುದ್ಧಿಜೀವಿಗಳಿಂದ ಹಿಡಿದು ಎಲ್ಲಾ ತರದವರು ಇನ್ವಾಲ್ವ್ ಆಗಿರೊ ಮ್ಯಾಟರು.. ಆರಾಮಾಗಿ ಕನ್ಸಲ್ಟೆನ್ಸಿ ಮಾಡ್ಕೊಂಡಿರೊ ನಿಂಗ್ಯಾಕೊ ಈ ಬೇಡದ ಉಸಾಬರಿ ? ಅದೆಲ್ಲಾ ಆ ರಾಜಕೀಯದವರಿಗೆ ಬಿಡೋದಲ್ವಾ ?’ ಎಂದು ಮಿನಿ ಉಪದೇಶ ಕೊಟ್ಟೆ, ಅವನು ಡೀಟೆಲ್ಸ್ಗೆ ಹೋಗೊ ಮೊದಲೆ.

‘ ಅದೇ ಸಾರ್ ಈಗ ಬಂದಿರೋದು.. ಎಷ್ಟು ದಿನಾಂತ ಈ ಹಾಳು ಕನ್ಸಲ್ಟಿಂಗಿನಲ್ಲಿ ಗುಂಪಲ್ಲಿ ಗೋವಿಂದ ಅಂತ ಕಾಲ ಹಾಕೋದು ? ಏನಾದ್ರೂ ಮಾಡಿ ಓವರ್ನೈಟ್ ಫೇಮಸ್ ಆಗ್ಬಿಡಬೇಕು.. ಆಮೇಲೆಲ್ಲಾ ಸುಲಭ – ಸಿಂಪಲ್ಲಾಗಿ ನಮ್ ಗುರುಗಳನ್ನ ಫಾಲೋ ಮಾಡ್ತಾ ಹೋದ್ರಾಯ್ತು.. ಸಿ ಎಂ ಲೆವೆಲ್ಲಿಗಲ್ಲದೆ ಹೋದ್ರು ಮೇಯರಾದ್ರೂ ಆಗ್ಬೋದು’ ಅಂತ ಮತ್ತೊಂದು ಬಾಂಬ್ ಹಾಕಿದ.

ಅದೇನು ಮೇಯರು ಅಂದನೊ ಮೇಯೋರು ಅಂದನೊ ಸರಿಯಾಗಿ ಸ್ಪಷ್ಟವಾಗದಿದ್ರು ಇದ್ದಕ್ಕಿದ್ದಂತೆ ಬಂದ ಗುರೂಜಿ ಡೈಲಾಗು ಕೇಳಿ ಇನ್ನೂ ಕನ್ಫ್ಯೂಸ್ ಆಯ್ತು..,’ಅದ್ಯಾರೊ ನನಗೆ ಗೊತ್ತಿಲ್ದೆ ಇರೊ ನಿನ್ನ ಹೊಸ ಗುರು..? ಯಾವುದಾದರು ಹೊಸ ಸ್ವಾಮಿಜಿ ಬೆನ್ನು ಹತ್ತಿದೀಯಾ ಹೇಗೆ ?’ ಅಂದೆ.

‘ಬಿಡ್ತು ಅನ್ನಿ ಸಾರ್.. ಸ್ವಾಮಿಗಳನ್ನೆಲ್ಲ ಯಾಕೆ ತರ್ತೀರಾ ಇಲ್ಲಿಗೆ ? ನಾ ಹೇಳಿದ್ದು ನಮ್ಮ ದಿಲ್ಲಿ ಗುರು ಕೇಜ್ರೀವಾಲ್ ಸಾಹೇಬ್ರನ್ನ.. ಗೌರಮೆಂಟ್ ಚಾಕರಿ ಮಾಡ್ಕೊಂಡು ಕೂತಿದ್ರೆ ಅವರು ಈ ಲೆವಲ್ಲಿಗೆ ಬರೋಕಾಗ್ತೀತಾ ? ಭ್ರಷ್ಟಾಚಾರ, ಲೋಕಾಯುಕ್ತ ಅಂತ ಶುರುಮಾಡ್ಕೊಂಡು ನೇರ ಸೀಎಂ ಸೀಟಿಗೆ ನೆಗೆದುಬಿಡ್ಲಿಲ್ವಾ ?… ನನಗು ಅಂತಾದ್ದೊಂದು ಸ್ಪ್ರಿಂಗ್ ಬೋರ್ಡ್ , ಲಾಂಚಿಂಗ್ ಪ್ಯಾಡ್ ಸಿಕ್ಬಿಟ್ರೆ ನೆಮ್ಮದಿಯಾಗಿ ದೊಡ್ಡ ಪೋಸ್ಟ್ ಹಿಡ್ಕೊಂಡು ರಾಜಕೀಯ ಮಾಡ್ತಾ ಆರಾಮಾಗಿರಬಹುದು..’ ಅಂದ ಗುಬ್ಬಣ್ಣ.

ನನಗದು ಸ್ವಲ್ಪ ಹೊಸ ಟ್ವಿಸ್ಟ್. ಗುಬ್ಬಣ್ಣ ಆಮ್ ಆದ್ಮೀನೂ ಅಲ್ಲ, ಆ ಪಕ್ಷದ ಫ್ಯಾನೂ ಅಲ್ಲಾ.. ಅಂತಾದ್ರಲ್ಲಿ ಏಕ್ದಂ ಗುರುಗಳು ಹೇಗಾಗ್ಬಿಟ್ರೂ ಅಂತ ಗೊತ್ತಾಗಲಿಲ್ಲ. ಅವನನ್ನೆ ಕೇಳಿಬಿಟ್ಟೆ, ಸುಮ್ನೆ ಯಾಕೆ ತಲೆ ಕೆಡಿಸಿಕೊಳ್ಳೋದು ಅಂತ..

‘ ಗುಬ್ಬಣ್ಣ..ನಿಂಗೂ ಆ ಪಕ್ಷಕ್ಕೂ ಎಣ್ಣೆ – ಸೀಗೆ ಕಾಯಿ …ಅಂತಾದ್ರಲ್ಲಿ..?’

‘ಅದು ಹೇಗೆ ಗುರು ಆಗ್ಬಿಟ್ರೂ ಅಂತಾನ? ಅದೊಂದು ತರ ಏಕಲವ್ಯ-ದ್ರೋಣಾಚಾರ್ಯರ ಗುರು-ಶಿಷ್ಯ ಸಂಬಂಧ ಸಾರ್..ಎಲ್ಲಾ ಸ್ಟ್ರಾಟೆಜಿ ಸಾರ್ ಸ್ಟ್ರಾಟೆಜಿ..’

‘ಏನು ಸ್ಟ್ರಾಟೆಜಿ ಮಣ್ಣು ? ಬರೀ ಡಿಗ್ರಿ ಸರ್ಟಿಫಿಕೇಟು ತರದ ಚಿಲ್ಲರೆ ವಿಷಯಗಳನ್ನೆ ದೊಡ್ಡ ಪಬ್ಲಿಸಿಟಿ ಮಾಡ್ಕೊಂಡು ಕೂರೋದು ದೊಡ್ಡಾ ಸ್ಟ್ರಾಟೆಜೀನಾ? ನನಗೇನೊ ಚೈಲ್ಡಿಶ್ ಅನ್ನಿಸ್ತಪ್ಪಾ ..’ ಅಂದೆ..

‘ ಅಲ್ಲೆ ಸಾರ್ ಇರೋದು ಸೀಕ್ರೇಟು.. ನೋಡಿ ನಮ್ ಗುರುಗಳು ಯಾರ್ಯಾರದೋ ಸರ್ಟಿಫಿಕೇಟ್ ಕೇಳಿದ್ರಾ ? ನೇರ ಹಾವಿನ ಹುತ್ತಕ್ಕೆ ಕೈ ಹಾಕೊ ಹಾಗೆ ಪ್ರೈಮಿನಿಸ್ಟರ್ ಕ್ವಾಲಿಫಿಕೇಷಂಗೆ ಅಟ್ಯಾಕ್ ಮಾಡ್ಬಿಟ್ರು..’

‘ ಅದೇ ನಾ ಹೇಳಿದ್ದು.. ಅದು ಸಿಲ್ಲಿ ಅಲ್ವಾ.. ? ಎಲ್ಲಾ ಬಿಟ್ಟು ಮೈನರ್ ಪರ್ಸನಲ್ ಮ್ಯಾಟರೂ..’ ಅಂತ ರಾಗ ಎಳಿತಿದ್ದವನನ್ನ ಅಲ್ಲೆ ತಡೆದು ಹೇಳಿದ ಗುಬ್ಬಣ್ಣಾ..

‘ ಸಾರ್.. ಅದೇ ನಿಮಗರ್ಥ ಆಗಲ್ಲ ಅಂದಿದ್ದು.. ಸಗಣಿಯವನ ಜತೆ ಸರಸಕ್ಕಿಂತ ಗಂಧದವನ ಜತೆ ಗುದ್ದಾಟ ಲೇಸು ಅಂತಾರೆ.. ನಮ್ ಗುರು ಮಾಡಿದ್ದೂ ಅದನ್ನೆ.. ಹಾಗೆ ಮಾಡಿದ್ದೆ ತಡ ಏನಾಯ್ತು ನೋಡಿ?’

‘ ಏನಾಯ್ತು..?’

‘ ಇಡೀ ಸೋಶಿಯಲ್ ಮೀಡೀಯಾ, ಪೇಪರುಗಳಲೆಲ್ಲ ಅದೆ ಸುದ್ದಿ.. ಇಂಟರ್ನೆಟ್ಟಲ್ಲಂತೂ ಐನ್ ಸ್ಟೈನ್ ನಿಂದ ಹಿಡಿದು ಗಾಂಧೀಜಿವರೆಗೆ ಎಲ್ಲರ ಡಿಗ್ರಿ ಸರ್ಟಿಫೀಕೇಟು ನಮ್ ಗುರುಗಳೇ ವೆರಿಫೈ ಮಾಡಿದ ಫೋಟೊ..!’

‘ಅದೆ ಹೇಳಿದ್ದು.. ತುಂಬಾ ಚೀಪಾಗಿ ಬಿಡಲಿಲ್ವಾ ಅಂತಾ..? ‘

‘ ಎಲ್ಲಿ ಸಾರ್ ಚೀಪೂ ? ಈಗ ಲೀಡರ್ಶಿಪ್ ವಿಷಯಕ್ಕೆ ಬಂದರೆ ಇಡೀ ದೇಶದಲ್ಲೇ ಯಾರ ಹೆಸರು ಸಾರು ಕೇಳೋದು ?’

‘ ಇನ್ಯಾರು ನಮ್ಮ ಪ್ರಧಾನ ಮಂತ್ರಿ ಮೋದಿಯವರದು ತಾನೆ?’

‘ ಅವರದು ಬಿಟ್ಟರೆ ನೆಕ್ಸ್ಟು ಕೇಳಿಸೋದು ?’

‘ ಅದು ಬಿಡು ಗುಬ್ಬಣ್ಣ.. ಎಲ್ಲಾ ಚೌಚೌ ಬಾತು.. ಸುಮಾರು ಹೆಸರು ಇದಾವೆ.. ಒಂತರ ಒನ್ ಟು ನೈನ್ ಬಿಟ್ಟು ಟೆನ್ ನಿಂದ ಲೆಕ್ಕ ಹಾಕ್ಬೇಕು ಅಷ್ಟೆ..’

‘ ಕರೆಕ್ಟ್ .. ಈಗ ನಂಬರ ಒನ್ ಇರೋ ಮೋದಿ ಅವರ ಹೆಸರಿನ ಜೊತೆ ಗುದ್ದಾಟಕ್ಕೆ ಇಳಿದರೆ, ಅವರನ್ನ ಬಿಟ್ಟರೆ ಜನರಿಗೆ ಯಾರ ಹೆಸರು ನೆನಪಿಗೆ ಬರುತ್ತೆ ಹೇಳಿ ?’ ಎಂದು ಪಾಸ್ ಕೊಟ್ಟ ಗುಬ್ಬಣ್ಣ..

‘ ಅರೆ ಹೌದಲ್ವಾ.. ? ಇದೊಂದು ತರ ನಾನೇ ನೆಕ್ಸ್ಟ್ ಅಲ್ಟರ್ನೇಟೀವ್ ಅಂತ ಇಂಡೈರೆಕ್ಟ್ ಮೆಸೇಜು ಕೊಟ್ಟ ಹಾಗೆ ಅಲ್ವಾ ? ಗುಡ್ ಆರ್ ಬ್ಯಾಡ್ ಎಲ್ಲಾ ನಿಮ್ ಗುರುಗಳ ಹೆಸರನ್ನೆ ಬಳಸ್ತಾ , ಅದನ್ನೆ ಫೇಮಸ್ ಮಾಡ್ತಾರೆ.. ಆಗ ಆಟೋಮ್ಯಾಟಿಕ್ ಆಗಿ ಪಾಪ್ಯುಲರ್ ಆಗ್ಬೋದು.. ಸ್ಮಾರ್ಟ್ ಮಾರ್ಕೆಟಿಂಗ್ ಸ್ಟ್ರಾಟೆಜಿ ಅಲ್ವಾ..!’

‘ಅದಕ್ಕೆ ಸಾರ್..ನಾನು ಈಗ ಅದನ್ನೆ ಮಾಡೋಕೆ ಹೊರಟಿರೋದು…. ಈಗ ಹೇಳಿ ಜೀವಂತ ಕುರಿ ಕೋಳಿ ಎಲ್ಲಿ ಸಿಗ್ತಾವೆ ಅಂತ’ ಅಂದ ಗುಬ್ಬಣ್ಣ.

‘ವಾಟ್ ಎವರ್ ಇಟ್ ಇಸ್ .. ಕೋಳಿ, ಕುರಿ, ಹಸು ಎಲ್ಲಾ ಜೀವಂತ ಸಿಗೋದೂ ಅಂದ್ರೆ ಸಿಂಗಾಪುರದ ಜೂನಲ್ಲಿ ಮಾತ್ರವೇ.. ಬೇಕೂಂದ್ರೆ ಬೆಕ್ಕು ಸಿಗುತ್ತೆ ನೋಡು.. ಅಂದಹಾಗೆ ಅದೆಲ್ಲ ರಿಯಲ್ ಪ್ರಾಣಿಗಳ ಚಿತ್ರ ಅಲ್ಲಾ, ಫೋಟೋ ಶಾಪ್ ಟ್ರಿಕ್ಕು ಅಂತಿದ್ರಲ್ಲ ಗುಬ್ಬಣ್ಣಾ..?’

‘ ಯಾಗದ ಮಧ್ಯೆ ಅಪಶಕುನದ ಮಾತು ಯಾಕಾಡ್ತಿರಾ ಬಿಡಿ ಸಾರ್.. ಅದು ಫೋಟೋಶಾಪ್ ಟ್ರಿಕ್ಕಾ ? ಅದಾದರೆ ನನ್ಮಗಳಿಗೆ ಫಸ್ಟ್ ಕ್ಲಾಸಾಗಿ ಬರುತ್ತೆ.. ಅದರಲ್ಲೇ ಏಮಾರಿಸ್ಬೋದು, ನಿಜವಾದ್ದು ಬೇಡಾ ಅಂತೀರಾ ?’

‘ ಹೂಂ ಮತ್ತೆ.. ‘

‘ ಒಳ್ಳೆ ಐಡಿಯಾ ಸಾರ್..ಖರ್ಚೂ ಉಳಿಯುತ್ತೆ.. ಹಾಗೆ ಮಾಡಿಬಿಡ್ತೀನಿ ಕೀಪ್ ವಾಚಿಂಗ್ ಮೈ ಫೇಸ್ಬುಕ್ ಸಾರ್.. ವರ್ಡ್ ಫೇಮಸ್ ಆಗೋಗ್ತೀನೊ ಏನೊ!?’ ಅಂದ.

‘ ಆದ್ರೆ ಗುಬ್ಬಣ್ಣಾ…ಈ ತರ ಮಹಾಯಾಗ ಮಾಡೋಕೆ ಏನಾದ್ರೂ ದೊಡ್ಡ ಕಾರಣ ಇರ್ಬೇಕಲ್ವಾ? ಮಳೆ ಬರಿಸೋಕೊ, ಬರ ತೊಲಗಿಸೋಕೊ ..ಇತ್ಯಾದಿ. ನೀ ಮಾಡೊ ಕಾರಣ ಏನು ಅಂದ್ರೆ ಏನು ಹೇಳ್ತಿಯಾ ?’

ಈ ಕ್ವೆಶ್ಚನ್ನಿಗೆ ಗುಬ್ಬಣ್ಣ ಸ್ವಲ್ಪ ಬೋಲ್ಡ್ ಆದ ಹಾಗೆ ಕಾಣಿಸ್ತು.. ಅದರ ಬಗ್ಗೆ ಇದುವರೆಗೂ ಯೋಚಿಸಿರಲಿಲ್ಲವೇನೊ..

‘ ಹೌದಲ್ಲಾ ಸಾರ್.. ನಾ ಅದನ್ನ ಯೋಚ್ನೆನೆ ಮಾಡಿರಲಿಲ್ಲ.. ನೀವೆ ಒಂದು ಐಡಿಯಾ ಕೊಡಿ ಸಾರ್..’

‘ ಅದಪ್ಪ ವರಸೆ.. ಮದುವೆ ಆಗೋ ಬ್ರಾಹ್ಮಣ ಅಂದ್ರೆ ನೀನೆ ನನ್ನ ಹೆಂಡ್ತೀ ಅಂದ ಹಾಗೆ..’

‘ ಅಯ್ಯೋ ಬಿಡೀ ಸಾರ್ ..ನಾ ಬ್ರಾಹ್ಮಣನೂ ಅಲ್ಲಾ, ನೀವು ಹೆಂಗಸೂ ಅಲ್ಲಾ.. ಆ ಮಾತ್ಯಾಕೆ? ಏನಾದ್ರೂ ಐಡಿಯಾ ಕೊಡಿ ಅಂದ್ರೆ..’ ಎಂದು ರಾಗವೆಳೆದ..

‘ ಸರಿ.. ಒಂದು ಒಳ್ಳೆ ಐಡಿಯಾ ಇದೆ ನೋಡಿ ಟ್ರೈ ಮಾಡ್ತೀಯಾ ?’

‘ ಏನಂತ ಹೇಳಿ ಸಾರ್..’

‘ ಈಗ ನೇತ್ರಾವತಿ ನೀರಿನ ಹಂಚಿಕೆ ಬಗ್ಗೆ ಸದ್ದು ಕೇಳಿಸ್ತಾ ಇದೆ.. ಇನ್ನೂ ಯಾರದೂ ಸರಿಯಾದ ಲೀಡರ್ಶಿಪ್ ಕಾಣ್ತಾ ಇಲ್ಲಾ ಆ ಚಳುವಳಿಗೆ..’

‘ ಅದಕ್ಕೂ ನಾ ಮಾಡೊ ಸೋಮಯಾಗಕ್ಕೂ ಏನು ಸಂಬಂಧ ಸಾರ್..?’

‘ ಅದೇ ಹೇಳ್ತಾ ಇದೀನಿ ತಡ್ಕೊ.. ನೇತ್ರಾವತಿ ವಿವಾದ ಶಾಂತಿಪೂರ್ವಕವಾಗಿ ಬಗೆಹರಿಲಿ ಅಂತ ಕಾರಣ ಹೇಳಿ ಸೋಮಯಾಗ ಮಾಡು.. ಅದಕ್ಕೆ ಪಬ್ಲಿಸಿಟೀನು ಸಿಗುತ್ತೆ.. ಜೊತೆಗೆ ಯಾರಿಗ್ಗೊತ್ತು..? ನಿನ್ನೆ ಲೀಡರ್ ಮಾಡ್ಕೊಂಡ್ರು ಮಾಡ್ಕೊಂಡ್ರೆ.. ನೀನು ಏಕ್ದಂ ಲಾಂಚ್ ಆಗಿಬಿಡ್ತೀಯಾ ಎಲ್ಲಾ ನ್ಯೂಸುಗಳಲ್ಲಿ..’

‘ ಪಬ್ಲಿಸಿಟೀ ಆಗುತ್ತೆ ಅಂತೀರಾ?’

‘ಮತ್ತೆ ? ಪುಟುಗೋಸಿ ಕಾಲೇಜಲ್ಲಿ ಭಾಷಣ ಮಾಡಿ ನ್ಯಾಷನಲ್ ಲೀಡರುಗಳಾಗೊ ಕಾಲ ಇದು, ಗೊತ್ತಾ?’

‘ನಿಜಾ ಸಾರ್..ಇದು ಬ್ರಿಲಿಯಂಟ್ ಐಡಿಯಾ..ಹಾಗೆ ಮಾಡ್ತೀನಿ..’ ಎಂದ ಉತ್ಸಾಹದಿಂದ ಗುಬ್ಬಣ್ಣ..

‘ಗುಡ್ ಲಕ್’ ಎಂದೆ ನಾನು..

‘ ಸರಿ ಸಾರ್ ಯಾವುದಕ್ಕೂ ಒಂದೆರಡು ಕೇಜಿ ಚಿಕನ್ ಕಟ್ಟಿಸಿಕೊಂಡೆ ಹೋಗ್ತೀನಿ.. ರಿಯಲಿಸ್ಟಿಕ್ಕಾಗಿರಲಿ ಪಿಕ್ಚರು’ ಅಂದವನೆ ಆ ಸ್ಟಾಲಿನತ್ತ ಹೆಜ್ಜೆ ಹಾಕಿದ.

ಶೀಘ್ರದಲ್ಲೆ ಗುಬ್ಬಣ್ಣ ಎಲ್ಲರಿಗು ಡಿಗ್ರಿ ಸರ್ಟಿಫಿಕೇಟ್ ವೆರಿಫೈ ಮಾಡಿಕೊಡ್ತಾ ಇರೊ ಫೋಟೊಗಳನ್ನ ಇಂಟರ್ನೆಟ್ಟಲ್ಲಿ ನೋಡ್ಬೇಕಾಗುತ್ತೊ ಏನೊ ಅಂದುಕೊಂಡು ನಾನು ತರಕಾರಿ ಅಂಗಡಿಯತ್ತ ಹೆಜ್ಜೆ ಹಾಕಿದೆ.

(ಮುಕ್ತಾಯ)

Thanks and best regards,
Nagesha MN

00726. ಜೀವನ ಚೈತ್ರದ ಓಟ


00726. ಜೀವನ ಚೈತ್ರದ ಓಟ
_______________________


ಜೀವನ ಚೈತ್ರದ ಹಾಗೆ ಸುಪರ್ ಓಟ
ನಮ್ಮ ಮನೆಯ ಬೆಳಗಿನ ಉಪಹಾರ
ಭಾನುವಾರ ರುಬ್ಬಿದ ಹಿಟ್ಟು ಬಿಡುಗಡೆ
ಮಿಕ್ಕ ವಾರಪೂರ್ತಿ ದಿನವೂ ದೋಸೆ !

(Picture source: https://en.m.wikipedia.org/wiki/File:Dosai_Chutney_Hotel_Saravana_Bhavan.jpg)

00725. ಲೈಕು, ಕಾಮೆಂಟು, ಇತ್ಯಾದಿ


00725. ಲೈಕು, ಕಾಮೆಂಟು, ಇತ್ಯಾದಿ
___________________________


ಅವಳೆಂದಳು
ಎಂತಹ ಖದೀಮ ಜಗ ?
ರಾತ್ರಿಯೆಲ್ಲಾ ನಿದ್ದೆಗೆಟ್ಟೂ
ಕಣ್ಣೆಗೆ ಎಣ್ಣೆ ಬಿಟ್ಟು ಬರೆದರೂ
ಯಾರೂ ಉಸಿರೆತ್ತುವುದಿಲ್ಲ
ಲೈಕುಗಳಿಲ್ಲ ಕಾಮೆಂಟಿಲ್ಲ , ಗೊತ್ತಾ ?

ಅವನೆಂದ
ಅದೆ ಜಗದೊಳಗೀಗ
ಓದುಗರು ಬರೆವ ಜನರು
ಎಲ್ಲಾ ಬರೆಯುವವರು
ಹೊತ್ತೆಲ್ಲಿದೆ ಓದಿ ಆಸ್ವಾದಿಸೆ ?
ಇನ್ನು ಲೈಕು ಕಾಮೆಂಟಿಗೆ… ? ಸರಿ ಸರಿ..

ಆದರು ಬೀಳುವುದಷ್ಟೊಂದು
ಲೈಕು ಕಾಮೆಂಟುಗಳಲ್ಲೆಲ್ಲ
ಗುಟ್ಟೆ ಅರಿವಾಗದಲ್ಲ ?
– ಸುಲಭ ಸರಳದ ಮಾತುಗಳವು
ಓದೆ ತಲೆ ಕೆರಿಯಬೇಕಿಲ್ಲ
ಹೆಜ್ಜೆಯ ಓಟದ ಸದ್ದು ಅವಕೆ !

ಎಲ್ಲರು ಓದುವರು ಓಡುವರು
ಕಾಲದ ಹಿಂದೆ ದೇಕುತ್ತಾ
ಕಂಡಾಗೊಮ್ಮೆ ಕಣ್ಣು ಹಾಯಿಸಿ
ಒತ್ತಿ ಲೈಕು, ಮುಂದುವರೆಯುತ್ತ
ಬಿಡುವಿದ್ದಾಗ ಓದೊ ಹಂಬಲ ಚಿತ್ತ ;
ಹೊಸತಿನ ಸತತ ಬಿಡದೆ ಕಾಡುತ್ತ..

ಬಿಡು ಚಿಂತೆ ಓದಲಿ ಬಿಡಲಿ
ಬರೆವುದು ಮನಸಿನ ಪ್ರವೃತ್ತಿ
ಬಿಡುಗಡೆಯಾದರೆ ಸಾಕು ಒತ್ತಡ
ಮತ್ತೇನೂ ಬೇಡದೆ ಜಾಸ್ತಿ
ನಡುವೆ ಬಿದ್ದರೆ ಹೆಜ್ಜೆ ಗುರುತು
ಸಂಭ್ರಮಿಸಿ ಮುನ್ನಡೆ ಸಾಕಷ್ಟೆ ಸಂತೃಪ್ತಿ..

– ನಾಗೇಶ ಮೈಸೂರು

ಪ್ರಾಜೆಕ್ಟು ಮುಕ್ತಾಯ published in Suragi (19.05.2016)


ಪ್ರಾಜೆಕ್ಟು ಮುಕ್ತಾಯ published in todays Suragi (19.05.2016):

http://surahonne.com/?p=11606

00724. ಮಾಡಿದ್ದುಣ್ಣೋ..


00724. ಮಾಡಿದ್ದುಣ್ಣೋ..
________________________


ಆ ನರಕದಂತದ್ದೆ ನರಕ
ಭೂಲೋಕದಲಿಟ್ಟಾ ಎರಕ
ಹೊಯ್ದಿಟ್ಟನವ ಜವರಾಯ
ದುಃಖ ದುಮ್ಮಾನ ಪ್ರಳಯ ||

ಬರೆದು ಪಾಪಪುಣ್ಯ ಸರಕ
ಚಿತ್ರಗುಪ್ತ ಕಡತದಲಿ ಲೆಕ್ಕ
ಪರೀಕ್ಷೆಗಳ ಗರಗಸ ಸತತ
ಸಂಕಲ್ಪ ಹುಡಿಯಾಗಿ ಸ್ವಾರ್ಥ ||

ನೋಡರಾರು ಅನ್ನೋ ಧೈರ್ಯ
ಮಾಡಿಸುತೇನೆಲ್ಲ ಗುಟ್ಟಲಿ ಕಾರ್ಯ
ಹೆಗಲಲ್ಲೆ ಕುಳಿತವನವ ಅನಾರ್ಯ
ನಿತ್ಯ ದಾಖಲಿಸೆ ತೋರದೌದಾರ್ಯ ||

ಬಿಡನಲ್ಲ ಯಮಧರ್ಮ ಕಾಡದೆ
ಅನುಭವಿಸಬೇಕೆಲ್ಲ ಅದೆ ಜನ್ಮದೆ
ಚುಕ್ತಾ ಮಾಡಿಸುವ ಬಾಕಿ ವಸೂಲಿ
ಮಾಡಿಸೆ ಸಂದಾಯ ಕಷ್ಟದ ನಲ್ಲಿ ||

ಪುಣ್ಯಕೊಮ್ಮೆಮ್ಮೆ ನಗೆ ನೆರಳುಗಳು
ಪುಣ್ಯ ಕಾರ್ಯದ ಸೇವಾರ್ಥಗಳು
ಸಹನೀಯವಾಗಿಸದಿರೆ ಈ ಬಾಳನು
ಮೂರಾಬಟ್ಟೆಯ ಪಾಡಲಿ ನರನು ||

– ನಾಗೇಶ ಮೈಸೂರು

(Picture source: https://en.m.wikipedia.org/wiki/File:Yama%27s_Court_and_Hell.jpg)

Readoo Kannada | ರೀಡೂ ಕನ್ನಡ Readoo Kannada | ರೀಡೂ ಕನ್ನಡ ಅಂಕಣ ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ.


ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ.

ಇಂದಿನ ರೀಡೂ ಕನ್ನಡದಲ್ಲಿ ಪ್ರಕಟಿತ ಬರಹ (೧೮.೦೫.೨೦೧೬)

ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ..

00723. ಫೇಲಾದವರಿಗೆಲ್ಲ ಅಭಿನಂದನೆಗಳು..


00723. ಫೇಲಾದವರಿಗೆಲ್ಲ ಅಭಿನಂದನೆಗಳು..
_______________________________


ಈ ಬಾರಿಯ ಪರೀಕ್ಷೆಯಲ್ಲಿ
ಫೇಲಾದವರಿಗೆಲ್ಲ ಅಭಿನಂದನೆಗಳು..
ಅವಹೇಳನವಲ್ಲ ನಿಜಕು
ಹೃತ್ಪೂರ್ವಕ ನಮನಗಳು..
ಮೊದಲಿಗೆ ಕುಕ್ಕುವ ಕಂಗಳ ನಡುವಲೆ
ತಲೆಯೆತ್ತಿ ನಡೆವ ನಿಮ್ಮೆದೆಗಾರಿಕೆಗೆ
ಮನಃಪೂರ್ವಕ ನಮನಗಳು
– ಅದು ನಾಯಕತ್ವದ ಹೆಗ್ಗುರುತು..

ಕಲಿತು ಮುನ್ನುಗಿದವರೆಷ್ಟೊ
ಉರು ಹೊಡೆದು ಪಾಸಾದವರು ಅಷ್ಟು
ಹಳ್ಳಕೆ ಬೀಳದೆ ಅನುಭವಕೆ ಶರಣಾಗಿ
ಮತ್ತೆ ಪರೀಕ್ಷೆ ಎದುರಿಸುವ ನಿಮ್ಮ
ಸಹನೆ ಸಹಿಷ್ಣುತೆ ಧೈರ್ಯಕೆ ಪ್ರಣಾಮಗಳು..
ಆಡುವ ಜನರ ನಡುವೆ ಕಲ್ಲಾಗಿ ನಿಲುತ
ಕಲಿತಿದ್ದನೆ ಮತ್ತೆ ಸರಿಯಾಗಿ ಕಲಿವ
– ಅನುಭವದ ಬೆಲೆ ಈಗಲೇ ಕಲಿತಿದ್ದಕ್ಕೆ..

ಪಾಸಾದವರೆಷ್ಟೊ ಮಂದಿ ಭಯಭೀತರು
ಸೋಲು ಕಂಡರೆ ಕಪ್ಪೆ ಹಾವೆಸದ ಲೆಕ್ಕ..
ಆ ಭೀತಿಗೆ ಹುಡುಕುವರು ಸುರಕ್ಷಾ ಹಾದಿ
ಸೋಲುಂಡನುಭವವಾದ ನಿಮಗೆಲ್ಲಿದೆ ಆ ಭೀತಿ ?
ಸೋಲು ಗೆಲುವಿನ ಮೆಟ್ಟಿಲು, ಆತ್ಮವಿಶ್ವಾಸ
ಸೋತ ರುಚಿ ಇದ್ದವ ತಾನೇ ತಡೆಯಬಲ್ಲ ಸೋಲನು ?
ಸೋತನುಭವ ಅನುಭೂತಿ ಅನುಭಾವಕೂ ಮಿಗಿಲು
– ಗೆದ್ದೇ ಗೆಲುವಿರಿ ಜಗವ, ನಿಮಗೆಂಥ ದಿಗಿಲು ?

ಆದರೂ ಗೆಲ್ಲುವ ಹಾದಿಯ ತುಂಬಾ
ಚೆಲ್ಲುವರಿದ್ದಾರೆ ಮುಳ್ಳು ಜಲ್ಲಿ ಟೀಕೆ
ಇರಲಿ ಲೆಕ್ಕಿಸದೆ ಮುನ್ನಡೆವ ಛಾತಿ..
ಅನುಭವ ಕಟ್ಟಿಕೊಟ್ಟ ಗಂಟು ಕಾಣಿಸದಾರಿಗು
ನಿಮ್ಮ ಗಮ್ಯ ತಲುಪಿ ಗೆಲುವ ನಗೆ ಬೀರುವ ತನಕ
ಹುಷಾರು..! ಅವರಿವರ ಮಾತ ಕೊಂಕಿಗೆ
ಇಂದೇ ಜೀವ ಬಿಟ್ಟೀರಾ, ಆ ಪೆದ್ದು ನುಡಿಗಳಿಗೆ..
ಸೋಲದ ಹೇಡಿತನಕಿಂತ ಸೋತು ಗೆಲ್ಲುವ ಛಲ ಮೇಲು !

– ನಾಗೇಶ ಮೈಸೂರು

(Picture source : https://media.licdn.com/mpr/mpr/p/4/005/072/0cd/0de8de1.jpg)

00722. ನೋವ ಬಿತ್ತಿ ನಲಿವ ಬೆಳೆವ ವ್ಯವಸಾಯ !


00722. ನೋವ ಬಿತ್ತಿ ನಲಿವ ಬೆಳೆವ ವ್ಯವಸಾಯ !
________________________________


ಅಲ್ಲಾ ಈ ನೋವು ಎನ್ನುವುದು ಎಂತಹ ವಿಚಿತ್ರ ಸರಕು ಅಂತೀನಿ ? ಬಡವ, ಬಲ್ಲಿದ ಅನ್ನದೆ ಎಲ್ಲರನ್ನು ಕಾಡೊ ಇದರ ಅಂತರ್ದರ್ಶನದ ಪರಿಚಯ ಎಲ್ಲರಿಗು ಇದ್ದರು ಯಾಕೋ ಇದರ ಪ್ರತ್ಯಕ್ಷ್ಯ ಸ್ವರೂಪ ದರ್ಶನ ಭಾಗ್ಯ ಯಾರಿಗೂ ಇದ್ದಂತಿಲ್ಲ. ಏನಾದರು ಏಟು ಬಿದ್ದು ಎಡವಟ್ಟಾದಾಗ ಕಣ್ಣಿಗೆ ಕಾಣಿಸಿಕೊಳ್ಳೊದು ಗಾಯ, ರಕ್ತ; ಕಾಣಿಸಿಕೊಳ್ಳದೆ ಅನುಭವಕ್ಕೆ ಮಾತ್ರ ನಿಲುಕೋದು ನೋವು. ಯಾರಾದರು ಮನಸಿಗೆ ಘಾಸಿ ಮಾಡಿದಾಗಲು ಅಷ್ಟೆ ಮಾಡಿದವರು, ಮಾಡಿದ ಘಟನೆಯನ್ನು ಕಾಣಬಹುದೆ ಹೊರತು ಅದುಂಟು ಮಾಡುವ ನೋವನ್ನಲ್ಲ; ಅದನ್ನು ಬರಿ ಅನುಭವಿಸಿಯೇ ತೀರಬೇಕು. ಹೋಗಲಿ ಬೇರೆಯವರಿಗೆ ಬೇಡಾ, ಅದನ್ನು ಅನುಭವಿಸುತ್ತಿರುವವರ ಕಣ್ಣಿಗಾದರೂ ಈ ನೋವು ಕಾಣಿಸಿಕೊಳ್ಳುತ್ತದೆಯೆ ? ಎಂದರೆ ಅದೂ ಇಲ್ಲ. ಬರಿ ಅನುಭವಗಮ್ಯ ಅಮೂರ್ತ ರೂಪಿ ಅಸ್ತಿತ್ವ ಈ ನೋವಿನದು.

ಹೊಟ್ಟೆಗಿಲ್ಲದ ಮಂದಿಯನ್ನು ಕಾಡುವ ಹಸಿವೆ, ಬಡತನ, ರೋಗರುಜಿನಗಳಂತಹ ಮೂರ್ತ ಸ್ವರೂಪಿ ನೋವುಗಳು, ಹೊಟ್ಟೆ ತುಂಬಿದ ಜನರನ್ನು ಕಾಡುವ ಏಕಾಂತ, ಖಿನ್ನತೆ, ಘನತೆ-ಪ್ರತಿಷ್ಠೆಯ ನೆಪದಲ್ಲಿ ಕಾಡುವ ಅಮೂರ್ತ ರೂಪಿ ನೋವುಗಳು – ಎರಡರ ಯಾತನೆಯೂ ಭೀಕರವೆ. ಇದರ ಜತೆಗೆ ಆಕಸ್ಮಿಕ ಅವಘಡಗಳು ತಂದಿಕ್ಕುವ ನೋವುಗಳು ಮೂರ್ತಾಮೂರ್ತಗಳೆರಡರ ಕಲಸು ಮೇಲೋಗರವಾಗಿ ಕಾಡುವ ಬಗೆ ಮತ್ತೊಂದು ರೀತಿಯ ದುರಂತ. ಇಂತಹ ವಿಶ್ವವ್ಯಾಪಿ ನೋವಿನ ವಿಶ್ವರೂಪಧಾರಣೆಯ ಮುಖವಾಡ ಕಳಚಿ ಅದರ ಗುಟ್ಟನ್ನೊಂದಿಷ್ಟು ಅನಾವರಣ ಮಾಡುವ ಚೇಷ್ಟೆ ಈ ಬರಹದ್ದು.. !

ನೋಡಿ ಮೊದಲಿಗೆ ಈ ನೋವೆಂತಹ ಖದೀಮ ಎಂದು. ತರತರದ ಸ್ತರಗಳಲ್ಲಿ ಅನುಭವಿಸಬಹುದಾದರು ಇವನನ್ನು ‘ಹೀಗೆ ಇರುವ’ ಎಂದು ಕಂಡವರಿಲ್ಲ. ಸ್ವಲ್ಪ ಎಡವಟ್ಟಾದರು, ಏರುಪೇರಾದರು ‘ಅಯ್ಯೋ ! ಅಮ್ಮಾ , ನೋವು’ ಎಂದು ಮುಟ್ಟಿ ನೋಡಿಕೊಂಡು ಕಿರುಚಿದರು ಅದು ನೋವಿನ ಅನುಭವವೆ ಹೊರತು, ಅದರ ರೂಪ ದರ್ಶನವಲ್ಲ. ಎಂತಹ ಗುಮ್ಮನಗುಸಕ ನೋಡಿ ಇವ..! ಎಲ್ಲಿ ಬರುತ್ತಿದ್ದಾನೆಂದು ಯಾತನೆಯಾಗಿ ಅನುಭವಿಸಬಹುದಂತೆ, ಹೇಗಿದ್ದಾನೆಂದು ನೋಡಹೊರಟರೆ ಮಾತ್ರ ಮಾಯವಿಯಂತೆ ನಿರಾಕಾರನಾಗಿ ಅದೃಶ್ಯ. ಆ ಲೆಕ್ಕದಲ್ಲಿ ನೋವನ್ನು ಸಾರಾಸಗಟಾಗಿ ಪರಬ್ರಹ್ಮನ ಸ್ವರೂಪದೊಡನೆ ಸಮೀಕರಿಸಿಬಿಡಬಹುದು ಬಿಡಿ – ನಿರಾಕಾರಾ, ನಿರ್ಗುಣ, ಸಾಕಾರ, ಸುಗುಣ – ಎಲ್ಲವೂ ಒಪ್ಪಿತವೆ.

ಈ ನೋವೊಂದು ತರಹ ನೆರಳಿನ ಹಾಗೆ ಅನ್ನಬಹುದು. ನೆರಳು ಸದಾ ಜತೆಯಲ್ಲೇ ಇದ್ದರು ಅದರ ಅಸ್ಪಷ್ಟ ದರ್ಶನವಾಗಬೇಕಾದರೂ ಸಹ ಕಟ್ಟಲು ಮತ್ತು ಬೆಳಕಿನ ಸಂಯೋಜಿತ ಸಹಕಾರ ಬೇಕು. ಆದರು ಕೇವಲ ಹೊರ ಅಂಚಿನ ಆಕಾರದ ರೂಪುರೇಷೆ ಮಾತ್ರ ನೆರಳಾಗಿ ಕಾಣಿಸಿಕೊಳ್ಳುತ್ತದೆಯೆ ಹೊರತು ಮಿಕ್ಕ ವಿವರಗಳಲ್ಲ. ನೋವು ಕೂಡ ಅದರ ಫಲಾನುಭಾವದ ರೂಪದಲ್ಲಿ ಮಾತ್ರ ಪ್ರಕಟಗೊಳ್ಳುತ್ತದೆಯೆ ಹೊರತು ಅದರ ಮೂಲ ಇನ್ನೆಲ್ಲೋ ಅಂತರ್ಗತವಾಗಿದ್ದುಬಿಡುತ್ತದೆ ಅಮೂರ್ತವಾಗಿ. ಕಾಣಿಸಿಕೊಳ್ಳುವುದೂ ಕೂಡ ನೆರಳಿನಂತೆಯೆ ಅಸ್ಪಷ್ಟವಾಗಿಯೇ ಹೊರತು ಬೆಳಕಿನಂತೆ ಸುಸ್ಪಷ್ಟವಾಗಲ್ಲ.

ನೋವಿನ ಪರಿಭಾಷೆ ಈ ತರದ್ದಾದರೆ ಇನ್ನದರ ಚಿಕಿತ್ಸೆಯ ವಿಷಯ ಇನ್ನು ಅಧ್ವಾನದ್ದು. ಗಾಯದ ಅಥವಾ ಕಾಡುವ ಯಾತನೆಗಳ ಮೂರ್ತ ಸ್ವರೂಪದಲ್ಲಿ ಕಾಣಿಸಿಕೊಂಡಾಗೇನೊ ಚಿಕಿತ್ಸೆ ಸ್ವಲ್ಪ ಸುಲಭವಾದೀತು – ಕನಿಷ್ಠ ಅವುಗಳ ಮೂಲಕ ಮೂಲ ಪತ್ತೆ ಹಚ್ಚಿ ಮದ್ದು ಕೊಡಬಹುದಾದ ಕಾರಣ. ಬಿದ್ದು ಪೆಟ್ಟಾಗಿ ರಕ್ತ ಸುರಿಯುವ ಜಾಗಕ್ಕೆ ಮುಲಾಮು, ಪಟ್ಟಿ ಹಚ್ಚಿದಷ್ಟೆ ಸುಲಭವಾಗಿ ನೋವಿನಿಂದ ಮುಖ ಹಿಂಡಿಕೊಂಡು ಹೊಟ್ಟೆ ಹಿಡಿದುಕೊಂಡಾಗ ಹೊಟ್ಟೆನೋವಿನ ಮದ್ದು ನೀಡಬಹುದು ; ತಲೆ ಮೇಲೆ ಕೈ ಹೋದರೆ ತಲೆನೋವಿಗೆ ಮದ್ದು ನೀಡಬಹುದು. ಆದರೆ ನಿಜವಾದ ತಲೆನೋವು ಮೂಗೇಟುಗಳದು – ಕಣ್ಣಿಗೆ ಕಾಣಿಸದಿದ್ದರು ಅಂದಾಜಿನ ಮೇಲೆ ಮದ್ದು ಹಾಕುವ ಪಾಡು ಇಲ್ಲಿಯದು.

ಆದರೆ ಇದೆಲ್ಲಕ್ಕೂ ಮೀರಿದ ಮತ್ತೊಂದು ಬಗೆಯ ಮಹಾನ್ ನೋವಿದೆ – ಇದೇ ನೋವುಗಳೆಲ್ಲದರ ಮುಕುಟವಿಲ್ಲದ ಮಹಾರಾಜ ಎನ್ನಬಹುದು. ಅದೇ ಮನಸಿನ ನೋವು – ಭಾವನಾತ್ಮಕ ಸ್ತರದಲ್ಲಿ ಉದ್ಭವಿಸಿ ಕಾಡಿಸಿ, ಕಂಗೆಡಿಸುವ ನೋವು. ನೋವಿನ ಅತೀವ ಅಮೂರ್ತ ರೂಪಿಗೊಂದು ಅತ್ಯುತ್ತಮ ಉದಾಹರಣೆ ಬೇಕೆಂದರೆ ಇದೆ ಸರಿಯಾದ ಗಿರಾಕಿ. ಯಾಕೆಂದರೆ ಮನಸಿನ ನೋವು ಇದೆಯೋ, ಇಲ್ಲವೋ ಎನ್ನುವುದರ ಕುರುಹು ಕೂಡ ಪರರಿಗೆ ಗೊತ್ತಾಗದಂತೆ ಮುಚ್ಚಿಟ್ಟುಬಿಡಬಹುದು. ಸ್ನೇಹದಲ್ಲಿ ತಿಂದ ಏಟಿಗೊ, ಅಲಕ್ಷಿಸುವ ತಾಯ್ತಂದೆಗಳೆನ್ನುವ ಕಾರಣಕ್ಕೊ, ಪ್ರೀತಿಯಲ್ಲಿ ಸಿಕ್ಕಿಸಿ ಆಕಾಶದ ಅಂತಸ್ತಿಗೇರಿಸಿ ಪಾತಾಳಕ್ಕುದುರಿಸಿದ ದಿಗ್ಭ್ರಾಂತಿಗೊ, ಎಂದೆಂದಿಗು ಮೋಸವಾಗದು ಎಂದು ನಂಬಿಕೆ ಇರಿಸಿದ್ದ ವ್ಯಕ್ತಿಯಿಂದಲೆ ಮೋಸಕ್ಕಿಡಾಗಿ ಅದರಿಂದುಂಟಾದ ಕೀಳರಿಮೆ, ಯಾತನೆ, ಸಂಕಟಗಳ ಕಾರಣಕ್ಕೊ – ಹೀಗೆ ನೂರಾರು ಮಾನಸಿಕ ಹಿನ್ನಲೆಯ ನೋವುಗಳು ಕಾಡಿದಾಗ ವಾಸಿ ಮಾಡುವುದು ಬಲು ಕಠಿಣ. ಕೆಲವರು ಅದರಲ್ಲೆ ಸಿಕ್ಕಿ, ನಲುಗಿ ಮಾನಸಿಕ ರೋಗಿಗಳಾಗಿ ಪಾತಾಳಕ್ಕಿಳಿಯುವ ದುರಂತ ಕಂಡರೆ, ನೀಸಿ ಜೈಸುವ ಛಲವುಳ್ಳವರು ಅದನ್ನೆ ಆಧಾರವಾಗಿಟ್ಟುಕೊಂಡು ಅದರ ಪ್ರಭಾವದಿಂದ ಫೀನಿಕ್ಸಿನಂತೆ ಮೇಲೆದ್ದು ಬರಲು ಯತ್ನಿಸುತ್ತಾರೆ.. ಅದೇನೆ ಆದರೂ ಆಗೀಗೊಮ್ಮೆ ಕಾಡುವ ನೋವಿನ ತುಣುಕುಗಳು ಕವನಗಳಾಗುತ್ತವೆ, ಮರೆತಿಲ್ಲವೆಂದು ನೆನಪಿಸುವ ಕಂಬನಿಯ ಹನಿಗಳಾಗುತ್ತವೆ, ದಿಕ್ಕೆಟ್ಟ ಬದುಕಿನ ನಾವೆಯನ್ನು ಛಲದಿಂದ ಮುನ್ನಡೆಸುವ ಪ್ರೇರಣೆಗಳಾಗುತ್ತವೆ.

ಅದೇನೆ ಆದರು ಒಂದಂತು ನಿಜ. ಬದುಕಿನಲ್ಲಿ ನೋವು ಪಾಠ ಕಲಿಸಿದಂತೆ ಮತ್ತಾರು ಕಲಿಸಲು ಸಾಧ್ಯವಿಲ್ಲ. ಬಹುಶಃ ನೋವೆ ಇರದಿದ್ದರೆ ಕಲಿಕೆಯೂ ಇಲ್ಲವಾಗಿ ಮಾನವನ ಪಕ್ವತೆ, ಪ್ರಬುದ್ಧತೆಗಳು ಚಲನ ಶಾಸ್ತ್ರದ ನಿಧಾನದ ಹಾದಿ ಹಿಡಿದು ಮಂದಗತಿಯಲ್ಲೆ ವಿಕಸನವಾಗುತ್ತಿದ್ದವೊ ಏನೋ..? ನೋವಿನ ದೆಸೆಯಿಂದ, ಆಗುತ್ತಿರುವ ಬಹು ದೊಡ್ಡ ಉಪಕಾರ ಇದೆ ಇರಬೇಕು – ಆ ಗಳಿಗೆಯಲ್ಲಿ ಅದಕ್ಕೆ ಹಿಡಿಶಾಪ ಹಾಕಿ ತುಚ್ಛೀಕರಿಸಿದರು, ಎಲ್ಲಾ ಮುಗಿದ ಮೇಲೆ ಆ ಅನುಭವ ಕಟ್ಟಿಕೊಟ್ಟ ಕಲಿಕೆಯನ್ನು ಅವಲೋಕಿಸಿದರೆ ಆ ನೋವು ವಹಿಸಿದ ವೇಗವರ್ಧಕದ ಪಾತ್ರ ಅರಿವಾದೀತು. ಬಹುಶಃ ಈ ಕಾರಣದಿಂದಲೆ ಇರಬೇಕು – ಕಷ್ಟ ಬಡತನದಲ್ಲಿ ನೋವನನುಭವಿಸಿ ಬಂದವರು ಪಕ್ವತೆ, ಪರಿಪಕ್ವತೆ, ಪ್ರಬುದ್ಧತೆಯಲ್ಲಿ ಹೆಚ್ಚಿನ ಮಟ್ಟದ ಸ್ತರವನ್ನು ತಮ್ಮ ಚಿಕ್ಕ ವಯಸ್ಸಿನಲ್ಲೆ ತಲುಪುವುದು.

ಒಟ್ಟಾರೆ ಸಾರಾಂಶದಲ್ಲಿ ಹೇಳುವುದಾದರೆ ನೋವು, ನೋವಿನ ಅನುಭವ ನೀಡುವುದಾದರು ಅದೊಂದು ಅನಿವಾರ್ಯ ಸಂಗಾತಿ ಎನ್ನದೆ ವಿಧಿಯಿಲ್ಲ. ಮೂರ್ತವೊ ಅಮೂರ್ತವೊ ಅದನ್ನು ಸರಿಯಾಗಿ ಬಳಸಿಕೊಂಡು ಕ್ರಿಯಾಶೀಲ ಫಲಿತವನ್ನಾಗಿಸುವುದೋ ಅಥವಾ ಅದರಲ್ಲೆ ಕೊರಗಿ, ಮರುಗಿ ನಿಷ್ಫಲ , ನಿಷ್ಕ್ರಿಯ ದುರಂತವಾಗಿಸುವುದೊ – ಎರಡೂ ನಮ್ಮ ಕೈಯಲ್ಲೇ ಇದೆ.

ನೋವನ್ನು ಮೊದಲು ಅನುಭವಿಸಿ, ನಂತರ ಅಧಿಗಮಿಸಿ, ಕೊನೆಗೆ ಅನಿಕೇತನವಾಗಿಸಿದರೆ ಅಸಾಧ್ಯವೆಂದುಕೊಂಡ ಸಾಧನೆಗಳೆಲ್ಲ ಹೂವೆತ್ತಿದ ಹಾಗೆ ಸಾಧ್ಯವಾಗುವುದರಲ್ಲಿ ಸಂಶಯವಿಲ್ಲ.

ಬನ್ನಿ ನೋವಿಗೆ ಹೆದರುವುದು ಬೇಡ – ಬದಲಿಗೆ ನೋವ ಬಿತ್ತಿ ನಲಿವ ಬೆಳೆಯೋಣ..!

– ನಾಗೇಶ ಮೈಸೂರು

(Picture source: https://en.m.wikipedia.org/wiki/File:OuchFlintGoodrichShot1941.jpg)

00721. ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ !


00721. ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ !
___________________________________

ನಾವು ಪ್ರೈಮರಿಯಲ್ಲಿ ಓದುತ್ತಿದ್ದಾಗ ಒಂದು ಒಂದು ಗಂಡು ಹೆಣ್ಣಿನ ಸಂವಾದ ರೂಪದ ಪದ್ಯವಿತ್ತು – ‘ ನೂಲಲ್ಲ್ಯಾಕ ಚೆನ್ನಿ, ನೂಲಲ್ಲ್ಯಾಕ ಚೆನ್ನಿ ‘ ಎಂದು. ಅದು ಜಾನಪದ ಸಾಹಿತ್ಯವಿದ್ದ ಹಾಗೆ ನೆನಪು. ಸ್ಥೂಲವಾಗಿ ( ಯಥಾವತ್ತಾಗಿ ಅಲ್ಲ) ಅದೇ ಧಾಟಿಯನ್ನು ಬಳಸಿ ಈಗಿನ ಆಧುನಿಕ ಯುಗದ ಕೆಲಸಕ್ಕೆ ಹೋಗುವ ಜೋಡಿಗಳ ಒಂದು ಕಾಲ್ಪಾನಿಕ ಸಂವಾದವನ್ನು ಚಿತ್ರಿಸುವ ಈ ಪದ್ಯ – ಈ ಕಾಲಮಾನಕ್ಕೆ ಪ್ರಸ್ತುತವೇನೊ. ಇಬ್ಬರು ದುಡಿಯುವ ಹೊತ್ತಲ್ಲಿ ಬೇಯಿಸಲು ಸಮಯವೆಲ್ಲಿ ಅನ್ನುವ ಪ್ರಶ್ನೆಗಿಂತ, ಬೇಯಿಸಲು ಬರಬೇಕೆಂಬ ಅವಶ್ಯಕತೆಯೆ ನಗಣ್ಯವಾಗುವ ರೀತಿಯಲ್ಲಿ ಹುಟ್ಟಿಕೊಂಡಿವೆ ಈಗಿನ ರೆಸ್ಟೊರೆಂಟು, ಹೋಟೆಲುಗಳ ಪರ್ಯಾಯ ವ್ಯವಸ್ಥೆ. ಹೊಸದಾಗಿ ಜೊತೆಗೂಡಿದ ಅಂತದ್ದೊಂದು ಜೋಡಿಯ ಸಂವಾದ ಹೀಗಿರಬಹುದೆಂಬ ಅಣಕು ನೋಟವಿದು – ಜಸ್ಟ್ ಫಾರ್ ಫನ್..!

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ !
____________________________

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಗ್ಯಾಸೆ ಇಲ್ವೋ ಜಾಣ, ಗ್ಯಾಸೆ ಇಲ್ವೋ ಜಾಣ
ಸಬ್ಸಿಡಿಗೆ ಕಾಯದೇನೆ, ಗ್ಯಾಸು ಹಾಕಿಸಿ ಕೊಟ್ಟ !

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಕುಕ್ಕರಿಲ್ವೊ ಜಾಣ, ಪಾತ್ರೆ ಪಗಡಿಗು ನಿರ್ವಾಣ
ಬಜಾರಿಗೆ ಹೋಗಿ ಕುಕ್ಕರು ಪಾತ್ರೆ ತೆಗೆಸಿ ಕೊಟ್ಟ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಮಿಕ್ಸಿ ಇಲ್ವೋ ಜಾಣ, ಮಿಕ್ಸಿ ಇಲ್ವೋ ಜಾಣ
ಬಿಗ್ಗು ಬಜಾರಿಗೆ ಓಡಿ, ಮಿಕ್ಸಿ ಸೆಟ್ಟು ತರಿಸಿಕೊಟ್ಟ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ದವಸಾ ಇಲ್ವೋ ಜಾಣ, ಧಾನ್ಯ ಇಲ್ವೋ ಜಾಣ
ಮೂಲೆ ಅಂಗಡಿ ಸುತ್ತಿ, ದವಸ ಧಾನ್ಯ ತಂದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ನೀರೆ ಇಲ್ವೋ ಜಾಣ, ನೀರೆ ಇಲ್ವೋ ಜಾಣ
ಸ್ಕೂಟರಿನಲಿ ಸುತ್ತಿ, ಬಾಟಲಿ ನೀರು ತಂದ…

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ತರಕಾರಿ ಇಲ್ವೋ ಜಾಣ, ತರಕಾರಿ ಇಲ್ವೋ ಜಾಣ
ಸುಪರ್ ಮಾರ್ಕೆಟ್ಟಿಗೆ ಹೋಗಿ, ತರಕಾರಿ ಹೊತ್ತು ತಂದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಪುರುಸೋತ್ತಿಲ್ವೋ ಜಾಣ, ಕೆಲಸಕ್ಕೆ ಹೊರಡೋಣ
ಸಂಜೆಗೆ ಬೇಯ್ಸು ಅಂದು, ಜತೆಗೆ ಡ್ಯೂಟಿಗೆ ಹೋದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ದುಡಿದು ಸುಸ್ತೋ ಜಾಣ, ದುಡಿದು ಸುಸ್ತೋ ಜಾಣ
ಜಾಣೆ ಒಟ್ಟಿಗೆ ಸೇರಿ, ಬೇಯ್ಸೋಣ ಬಾರೆ ಎಂದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ನಂಗೆ ಬರೋದಿಲ್ಲ ಜಾಣ, ನಂಗೆ ಬರೋದಿಲ್ಲ ಜಾಣ
ಕಡೆಗೆ ಹೋಟೆಲಿನೂಟ, ಕಟ್ಟಿಸಿ ತಂದು ಕೊಟ್ಟ..!

– ನಾಗೇಶ ಮೈಸೂರು

(Picture source :http://www.thegloss.com/2010/09/14/odds-and-ends/cooking-tips-for-people-who-dont-cook/)

00720. ಸತಿಸೂತ್ರ..!


00720. ಸತಿಸೂತ್ರ..!
________________


(೦೧)
ಹೆಂಡತಿ ಬೈದು
ಬದುಕಿದವರುಂಟೆ
– ಹೊಗಳಿ’ಬಿಡಿ’.

(೦೨)
ಚಿನ್ನಾ, ಬಂಗಾರ
ಮಾತಲಿ ಲಕ್ಷ ಬಾರಿ
– ಕೃತಿಗೆ ‘ಸಾರಿ’.

(೦೩)

ಲಕ್ಷಗಟ್ಟಲೆ
ಕೊಟ್ಟ ವರದಕ್ಷಿಣೆ
– ಕೊಂಡ ಸರಕು.

(೦೪)
ಗೋಳಾಡಿಸಿಯು
ಉಸಿರ ಬಿಡದಿರಿ
– ಗೆಲುವ ಅಶ್ರು.

(೦೫)
ಅಡಿಗೆ ಮನೆ
ಖಾಲಿ ಪಾತ್ರೆ ಸದ್ದಾಗೆ
– ಮೌನಧಾರಣೆ.

– ನಾಗೇಶ ಮೈಸೂರು

00719. ಸುಳ್ಳೆ ನಮ್ ಮನೆ ದೇವ್ರು ಗೊತ್ತಾ ?


00719. ಸುಳ್ಳೆ ನಮ್ ಮನೆ ದೇವ್ರು ಗೊತ್ತಾ ?
_______________________________


ನಾವು ಹುಟ್ಟಾ ಸುಳ್ಳರು ಗೊತ್ತಾ ಸ್ವಾಮಿ ?
ಬಾಯಿ ಬಿಟ್ಟರೆ ಅದೆ ಮೊದಲು ಹೊರಗೆ..!
ಎದುರಾದವರಾರೊ ಅಂದರು ‘ಹೇಗಿದ್ದೀರಾ?’
ತಲೆ ಕುಣಿಸಿ ಪೆಚ್ಚು ನಗೆ ನುಡಿ ಔಪಚಾರಿಕ ;
‘ ಓಹೋ..ಚೆನ್ನಾಗಿದ್ದೇನೆ.. ನೀವು ?’
‘ ನಾನೂ ಚಂದವೇ..’ ಅಂತಲೆ ಶುರು ಮೋಸ..
ನಿಜಕ್ಕೂ ಚೆನ್ನಾಗಿದ್ದೀವಾ ? ಬರಿ ಹಾಗಂತಿದ್ದೀವಾ ?
ಕುದಿಯುತ್ತಿಲ್ಲವ ಒಳಗೆ ನೂರಾರು ?
ಬೈದುಕೊಳ್ಳುತ್ತಿಲ್ಲವ ಒಳಗೆ ಇಟ್ಟವನವನಾರು ?
ಯಾರಿಗೆ ಮಾಡಿಕೊಳ್ಳುವ ಮೋಸ ಸ್ವಾಮಿ ?

ಹೋಗಲಿ ಬಿಡಿ, ಬಂತಲ್ಲ ಪೋನು ನೆಂಟ
ಗೆಳೆಯ ಸಂಬಂಧಿ ಪರಿಚಿತ ಅಪರಿಚಿತ ದಂಡು
ಮತ್ತದೇ ರಾಗ ತಾಳ ಪಲ್ಲವಿ ಮಾರಾಯ
‘ಚೆನ್ನಾಗಿದ್ದೀನಿ , ನೀವ್ ಚೆನ್ನಾಗಿದ್ದೀರಾ ..! ?’
ಸುಳ್ಳೆನ್ನೊ ಸುಂದರ ಹೂವಿಗೆ ನಗೆದಾರ ಪೋಣಿಸಿ
ಉಡಿದಾರವೊ ಕತ್ತಿನ ಹಾರವೋ ಎಂತದ್ದೊ
ಮಾತಾಡಿದ್ದೆಲ್ಲಾ ಬರಿ ಅಂತದ್ದು ಇಂತದ್ದು
ಮಾಡಲೆ ಇಲ್ಲವಲ್ಲ ಮನಸು ನಿಜದಾ ಸದ್ದು
ಆಡಿದ್ದೆ ಆಡೊ ಕಿಸುಬಾಯಿ ದಾಸ ದಾಸಿ ಲೆಕ್ಕ
ಎಲ್ಲಾ ಸುಳ್ಳೆ ನಮ್ ಮನೆ ದೇವರು ಅನ್ನೋ ಹಾಗೆ..

ದೂರದ ಅಪ್ಪ ಅಮ್ಮ ಕರುಳ ಬಳ್ಳಿಗಳು
ಕೇಳಿದರೂನು ಕಕ್ಕುಲತೆಯಿಂದ ಅದೇ ಮಾತು
ಇದ್ದರು ಸಂಕಟ ಯಾತನೆ ತುರಿಯುವ ಕಜ್ಜಿ
‘ಎಲ್ಲಾ ಸ್ವಸ್ಥಾ, ಆರಾಮ ಹೇಗಿದೆ ಆ ಮುದುಕಜ್ಜಿ ?’
ಹಾಸಲುಂಟು ಹೊದೆಯಲುಂಟು ಯಾಕೋ ನಿರ್ಲಿಪ್ತ
ಕೆಲಸ ಸಂಬಳ ರೋಗ ನಿರೀಕ್ಷೆ ಹಳಸಿದ ಸಂಬಂಧ
ನಿಸ್ತೇಜ ಬದುಕಲಿ ಅಟ್ಟಿದ್ದೇನೇನೊ ಭ್ರಮ ನಿರಸನ
ಕಾಡುವ ನೂರು ಬಗೆ ಸಂಕಟ ರೂಪಾಯಿಯ ತೂತು
ಹಣವಿದ್ದು ಹೆಣ ಹೊತ್ತಂತಿಹ ಮನ ನಗೆ ನಟಿಸುತ್ತ
ಹೇಳುತ್ತಲೇ ಇದೆ ಬರಿ ಸುಳ್ಳು ಮುಖವಾಡದ ಪಾತ್ರ..

ಅಂದ ಹಾಗೆ ಸ್ವಾಮಿ, ಸುಳ್ಳೆ ನಮ್ ಮನೆ ದೇವ್ರು ಗೊತ್ತಾ ?

– ನಾಗೇಶ ಮೈಸೂರು

(Picture from : http://1.bp.blogspot.com/-35cQOWSrh8M/TbmVGVqAMQI/AAAAAAAAMHk/KadhD3VKXPI/s1600/krish_open_mouth.jpg – original source unknown, picture available in Internet)

00718. ನೇತ್ರಾವತಿ ಅತ್ತ ಸದ್ದು..(in Today’s Readoo Kannada – 16.05.2016)


00718. ನೇತ್ರಾವತಿ ಅತ್ತ ಸದ್ದು..(in Today’s Readoo Kannada – 16.05.2016

ನೇತ್ರಾವತಿ ಅತ್ತ ಸದ್ದು..

00717. ಮನಸಿನ ವ್ಯಾಪಾರ


00717. ಮನಸಿನ ವ್ಯಾಪಾರ
___________________


ಬಿಕರಿಗಿಟ್ಟಂತಿತ್ತು ಸರಕು
ಚಂದದ ಬಣ್ಣ ಬಣ್ಣದ ರಂಗೋಲಿ
ನೋಡುತಲೆ ಹುಚ್ಚೆದ್ದು ಮನ
ಬಯಸಿತ್ತು ಬಗಲಲಿಡುವ ಹಂಬಲ
ಬಿಟ್ಟರೆ ಕಳುವಾದೀತೆಲ್ಲೊ ಅಳುಕು
ಹುಚ್ಚು ಛಲದಿ ಬೆನ್ನಟ್ಟಿತು ಹೃದಯ
ಧಾರಣೆ ಎಷ್ಟು ? ಹುಚ್ಚುತನದ ಪ್ರಶ್ನೆ
ಮೆಚ್ಚಿದ್ದಕ್ಕುಂಟೆ ಬೆಲೆ ಕಟ್ಟುವ ಯೋಗ್ಯತೆ ?
ಬಿಡದು ಕೇಳದು ಹುಚ್ಚು ಕುದುರೆ ಮನ
ಮಾಡಿತೇನೇನೆಲ್ಲ ಬಿತ್ತರ ಬಿನ್ನಾಣ ಬೆಡಗು
ಕೊಂಡೇಕೊಳ್ಳುವ ಒಂದೆ ಅವಸರದಲಿ
ಕಟ್ಟಲು ನಿಂತಿತ್ತು ಜೀವದ ಪೇಟೆಧಾರಣೆ
ಯಾಕೋ ಅರಿಯದಾಯ್ತು ಜೀವಕೆ
ಸರಕದು ಮನಸು ಕುದುರದು ಬೆಲೆಗೆ
ಕೂಗುವ ದರಕೆ ಹೆದರಿ ತಬ್ಬಿಬ್ಬಾಯ್ತೋ ಏನೋ ?
ಮೆತ್ತಗೆ ಜಾರಿ ಮೂಲೆಯ ಸೇರುತ್ತ
ಬಿಕರಿಗಿಲ್ಲ ಮಾಲು ಮೌನದೆ ಸಾರುತ್ತಾ
ಕಾಣೆಯಾಗಿತ್ತು ಹುಡುಕಿಯು ಸಿಗದ ಜಗದೆ..
ಹುಚ್ಚುತನವಿಂದು ಹುಡುಕತಲೆ ಇದೆ ಅದೇ ಸರಕ
ಪ್ರೀತಿಸಿದ ವ್ಯಾಮೋಹ ಬಿಟ್ಟು ಹೋಗದ ಮಾಯೆ
ಬಿಕರಿಗೊ ಬಿಟ್ಟಿಗೊ ಸಿಕ್ಕಿತೆನ್ನುವ ಉಸಾಬರಿ
ಕಂಡಿನ್ನು ನಗುತಲಿದೆ ಭಾವದ ರೊಕ್ಕ ಮೌನದೆ
ಸಿಗುವುದೋ ಬಿಡುವುದೋ ಸರಕು..
ಆಸೆ ಮಾತ್ರ ಬಿಕ್ಕುತಿದೆ..
ಏಕಾಂತದ ಮೂಲೆಯಲಿ..
ಒಬ್ಬಂಟಿಯಾಗಿ ಕೂತು…

– ನಾಗೇಶ ಮೈಸೂರು

00716. ಕಾಡುವ ಹೆಂಡತಿ ಮನೆಯೊಳಗಿದ್ದರೆ…(ಹಾಸ್ಯ)


00716. ಕಾಡುವ ಹೆಂಡತಿ ಮನೆಯೊಳಗಿದ್ದರೆ…(ಹಾಸ್ಯ)
_____________________________________________
(ಹಿಂದೊಮ್ಮೆ ಬರೆದಿದ್ದ ಬರಹ)


ಪ್ರತಿಯೊಬ್ಬ ಸಾಧಾರಣ ವ್ಯಕ್ತಿಯ ಮನದಾಳದ ಆಸೆ, ಆಶಯ, ಕನಸು – ಸುಂದರ, ನೆಮ್ಮದಿ ಸುಖದ ಸಂಸಾರ. ಬಾಲ್ಯದ ಮೆಟ್ಟಿಲು ದಾಟಿ, ವಿದ್ಯಾಭ್ಯಾಸ ಮುಗಿಸಿ, ಕೆಲಸ ಹಿಡಿದು ಜವಾಬ್ದಾರಿಯ ನೊಗಕೆ ಹೆಗಲ್ಗೊಡುವ ಹೊತ್ತಿಗೆ ಮಾನಸಿಕ ಹಾಗೂ ಆರ್ಥಿಕ ಸ್ವಾತ್ಯಂತ್ರದ ಗರಿಯೂ ಬಿಚ್ಚುತ್ತಾ ಹೋಗಿ ಸುಂದರ ಬದುಕಿನ ಆಸೆಯ ಹಕ್ಕಿಯೂ ನಿಧಾನವಾಗಿ ನೆಲದಿಂದ ಮೇಲೆದ್ದು ಹಾರಾಡತೊಡಗುತ್ತದೆ. ಸುಂದರ ಬದುಕು ಒಂದು ಕೈನ ಚಪ್ಪಾಳೆಯಿಂದ ಸಾಧ್ಯವಾಗುವುದಿಲ್ಲವಲ್ಲ? ತಾವಾಗಿ ಹುಡುಕಿದ್ದೊ ಅಥವಾ ಮನೆಯವರಿಂದ ಆರೋಪಿಸಿದ್ದೊ – ಸಾಂಗತ್ಯವೊಂದರ ಜತೆಗಾಗಿ ಮನದಲ್ಲಿ ತಹತಹನೆ, ಕುತೂಹಲ; ಭವಿಷ್ಯದತ್ತ ಆಸೆ ತುಂಬಿದ ಆಶಾವಾದ ಚಿಗುರಿ ಗಿಡವಾಗಿ ಹೂಬಿಡತೊಡಗಿ ಮೈ ಮನವೆಲ್ಲ ಹೂವಂತೆ ಅರಳುವ ಹೊತ್ತು.

ಒಟ್ಟಾರೆ ನಾಟಕೀಯತೆಯ ಜತೆಗೊ ಅಥವಾ ಮಾಮೂಲಿನ ಸದ್ದುಗದ್ದಲವಿಲ್ಲದ ತರದಲ್ಲೊ ಗಂಡು ಹೆಣ್ಣುಗಳೆರಡರ ಜತೆ ಸೇರಿ ಸಂಸಾರವೆನ್ನುವ ಚಕ್ರಕ್ಕೆ ಚಾಲನೆ ಸಿಕ್ಕಾಗ ಹೊಸ ಬದುಕಿನ ಆರಂಭ. ಹೊಸತಲ್ಲಿ ಎಲ್ಲವೂ ಸುಂದರವೆ ಆದರೂ ನಿಜವಾದ ಹೂರಣ ಹೊರ ಬೀಳಲು ಕೊಂಚ ಹೊತ್ತು ಹಿಡಿಯುತ್ತದೆ. ಕೃತಕ ಧನಾತ್ಮಕ ವೇಷಧಾರಣೆಗಳೆಲ್ಲ ಕಳಚಿ, ಸ್ವಾಭಾವಿಕ ಧನ – ಋಣಾತ್ಮಕ ಅಂಶಗಳ ನೈಜ್ಯ ಚಿತ್ರ ಅನಾವರಣೆಗೊಳ್ಳುತ್ತಾ ಹೋಗುತ್ತದೆ. ಈ ಸಮಯವೆ ಬಂಧಗಳನ್ನು ಕಟ್ಟುವ ಅಥವಾ ಉರುಳಿಸುವ ಸಂದಿಗ್ದ ಕಾಲ. ಸುಖಿ- ಅಸುಖಿ ಭವಿತ ಸಂಸಾರದ ನಿಜವಾದ ಬುನಾದಿ ಬೀಳುವುದು ಇಲ್ಲಿಂದಲೆ. ಕೆಲವು ಅದೃಷ್ಟಶಾಲಿಗಳಿಗೆ ಹಾಲು ಜೇನು ಬೆರೆತಂತೆ ಹೊಂದಾಣಿಕೆ ತಂತಾನೆ ಪ್ರಸ್ತುತಗೊಳ್ಳುತ್ತ, ಗಟ್ಟಿಯಾಗುತ್ತ ಹೋಗುತ್ತದೆ. ಮತ್ತೆ ಕೆಲವರಲ್ಲಿ ಸಣ್ಣಪುಟ್ಟ ಏರುಪೇರುಗಳಿದ್ದರೂ, ಹೆಚ್ಚು ಕಡಿಮೆ ಸಹನೀಯ ಶೃತಿಲಯದಲ್ಲಿ ಸಾಗುತ್ತದೆ ಜೀವನ. ಆದರೆ ನಿಜವಾದ ಬಿಕ್ಕಟ್ಟು ಬರುವುದು ಈ ಹೊಂದಾಣಿಕೆ ಕಾಣಿಸದ ಜೋಡಿಗಳಲ್ಲಿ. ಅಲ್ಲಿ ಸಣ್ಣ ಪುಟ್ಟ ವಿಷಯಗಳೆ ದೊಡ್ಡವಾಗಿ ಅಸಹನೀಯ ಹೊಂದಾಣಿಕೆಗಳೊಡನೆ ದಿನದೂಡುವುದೊ ಅಥವಾ ವಾಗ್ಯುದ್ಧ, ವೈರುಧ್ಯಗಳ ನರಕದಲ್ಲಿ ಬಿದ್ದು ಪ್ರತಿದಿನ ಜೀವನದಲ್ಲಿ ಹೆಣಗುತ್ತಲೆ ಸಾಗುವುದೊ ಆಗುತ್ತದೆ. ಸರ್ವ ಸಂಪೂರ್ಣ ಪಕ್ವತೆಯುಳ್ಳ ಸಂಸಾರಗಳು ಇಲ್ಲವೆ ಇಲ್ಲವೆನ್ನುವಷ್ಟು ಅಪರೂಪವಾದರೂ ಸರಾಸರಿ ಲೆಕ್ಕದಲ್ಲಿ ಸಹನೀಯತೆ-ಅಸಹನಿಯತೆಯ ಅಂದಾಜು ಮಟ್ಟದ ಅಕ್ಕಪಕ್ಕದಲ್ಲೆ ಜೋತಾಡುವುದು ಸಾಮಾನ್ಯವಾಗಿ ಕಾಣುವ ಚಿತ್ರಣ.

ಸಹನೀಯ ಹಿತಕರ ವ್ಯಾಪ್ತಿಯೊಳಗಿನ ಪುಣ್ಯವಂತ ಗಂಡಸರ ಯಶಸ್ಸಿನ ಹಿಂದೆ ಆ ಹೆಂಡತಿಯರ ಪಾತ್ರ ಕಂಡೂ ಕಾಣದ ಮಹತ್ತರವೆಂದೆ ಹೇಳಬೇಕು. ಅಂತಹ ಯಶಸ್ವಿ ಗಂಡು ಮನ “ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ ನನಗದೆ ಕೋಟಿ ರೂಪ್ಪಾಯಿ…” ಎಂದು ಹಾಡಿ, ಕುಣಿದು ಕೃತಾರ್ಥರಾಗುತ್ತಾರೆ. ಆದರೆ ಆ ಭಾಗ್ಯವಿಲ್ಲದ ಗಂಡಸರ ಪಾಡೇನು? ಕಾಟ ಕೊಟ್ಟು ಕಾಡುವ ಹೆಂಡತಿಗಳ ಕೈಲಿ ಸಿಕ್ಕಿ ಒದ್ದಾಡುವವರಿಗೆ ಯಾರು ಹಾಡಬೇಕು? (ಅವರಾಗಿಯೆ ಹಾಡುವಂತ ಮನಸ್ಥಿತಿಯಿರುವುದು ಅನುಮಾನ, ಮತ್ತು ಅಪರೂಪ ಬಿಡಿ!).

ಈಗಾಗಾಲೆ ಹಾಡಿದ್ದಾರೊ ಇಲ್ಲವೊ ಗೊತ್ತಿಲ್ಲ – ಬಹುಶಃ ಕೆಲವು ನೊಂದವರು ಬಾತ್ರೂಮುಗಳಲ್ಲಿ ಹಾಡಿಕೊಂಡಿರಬಹುದೊ ಏನೊ. ಏನಾದರಾಗಲಿ ಅಂತಹವರಿಗೆ ಸುಲಭವಾಗಲೆಂದು ಇಲ್ಲೊಂದು ಹಾಡಿದೆ – ಕನ್ನಡನಾಡಲ್ಲಿ ಸುಪ್ರಸಿದ್ಧವಾದ “ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ..” ಧಾಟಿಯಲ್ಲಿ. ಅದನ್ನು ತಮ್ಮ ಇಂಪಾದ ಕಂಠದಲ್ಲಿ ಹಾಡಿ ಅಮರಗೊಳಿಸಿದ ಮೈಸೂರು ಅನಂತಸ್ವಾಮಿಯವರ ರಾಗದಲ್ಲೆ ಹಾಡಿಕೊಂಡು ಆನಂದಿಸಿ!

ಕೊ.ಕೊ: ಈ ರೀತಿ ಕಾಟ ಕೊಡುವ ಹೆಂಗಸರು ಕನ್ನಡನಾಡಿನವರಲ್ಲ – ಬೇರೆ ಕಾಲ, ದೇಶ, ಪ್ರಾಂತ್ಯಕ್ಕೆ ಸೇರಿದವರು. ನಮ್ಮ ಕನ್ನಡದ ಹೆಣ್ಣುಗಳು ಅಪ್ಪಟ ಬಂಗಾರ. ಆದ ಕಾರಣ ಕನ್ನಡದ ಹೆಣ್ಣು ಮಕ್ಕಳು ಹಾಡನ್ನು ಓದಿ ತಮ್ಮ ಮೇಲೆ ಆರೋಪಿಸಿಕೊಂಡು , ತಪ್ಪಾಗಿ ಅರ್ಥೈಸಿಕೊಂಡು ಕೋಪಿಸಿಕೊಳ್ಳಬಾರದೆಂದು ಕೋರಿಕೆ!

ಕಾಡುವ ಹೆಂಡತಿ ಮನೆಯೊಳಗಿದ್ದರೆ…
_______________________________

ಕಾಡುವ ಹೆಂಡತಿ ಮನೆಯೊಳಗಿದ್ದರೆ
ಕರಗದಿರುವುದೆ ಕೋಟಿ ರುಪಾಯಿ
ಅಂಥ ಹೆಂಡತಿಯೊಬ್ಬಳು ಹತ್ತಿರವಿದ್ದರೆ
ಲೂಟಿ ಶಾಂತಿ, ಮನಸೆ ಬಡಪಾಯಿ || ಕಾಡುವ ||

ದಿನ ಹಗಲೆ ಇರುಳೆ ಯಾರಿಗೆ ಲೆಕ್ಕ
ಸಾಲಂಕೃತ ಕೋಟಲೆ ದುಃಖ
ಒಂದೆ ಸಮ ಜತೆ ಕಾಡುವ ಕಾಟ
ಸಹಿಸಿ ಬಾಳುವುದಲ್ಲ ಹುಡುಗಾಟ || ಕಾಡುವ ||

ಬೇಡವೆಂದರೂ ದೂರ ತಳ್ಳುವಂತಿಲ್ಲ
ಕಟ್ಟಿಕೊಂಡ ಜನ್ಮಗಳ ಪಾಪ
ದೂರ ತಳ್ಳಲೆಲ್ಲಿ ದೂರ ಹೇಳಲೆ ಕಷ್ಟ
ಸಿಡಿದು ಸಿಗಿಯುವ ಘನ ಕೋಪ || ಕಾಡುವ ||

ಛೀಮಾರಿಗೆಲ್ಲ ಏಮಾರೊ ಸರಕಲ್ಲ
ನಿರ್ದಯೆ ನಿರ್ದಾಕ್ಷಿಣ್ಯತೆ ಒಡವೆ
ಗಂಡನೆನ್ನುವ ಪ್ರಾಣಿ ಯಾವ ಲೆಕ್ಕಕಿಲ್ಲ
ಕೇಡ ಮಾಡಲೇಕವನ ಗೊಡವೆ || ಕಾಡುವ ||

ಹಬ್ಬ ಹರಿದಿನ ಹುಣ್ಣಿಮೆ ಹೋಳಿಗೆಗಿಂತ
ಬೈಗುಳದಡಿಗೆಯೆ ಪ್ರಚಂಡ
ಮಾಡದಿದ್ದರು ಸದ್ಯ ಕಾಡದಿದ್ದರೆ ಸಾಕು
ಎಂದು ಮೌನ ತಬ್ಬಿದವ ಗಂಡ || ಕಾಡುವ ||

ಅಪ್ಪಿ ತಪ್ಪಿ ಎಂದೊ ಮಾಡಿದ ಅಡಿಗೆ
ಪಾತ್ರೆ ಪಗಡಿಯೆಲ್ಲ ಚೆಲ್ಲಾಪಿಲ್ಲಿ
ವಾರಗಟ್ಟಲೆ ಪೇರಿಸಿದ ಮುಸುರೆಗಳೆ
ಗಂಡ ತೊಳೆಯದೆ ಆಗದೆ ಖಾಲಿ || ಕಾಡುವ ||

ಮನೆಗೊಬ್ಬಳೆ ಗೃಹಿಣಿ ಬೇರಿಲ್ಲದ ಕಾಟ
ಟೀವಿ ಧಾರವಾಹಿಗಳೆ ಪ್ರಖರ
ಕೂತ ಸೋಫಾವೆ ಹಾಸಿಗೆ, ಮೆತ್ತೆಗೆ ದಿಂಬೆ
ಊಟಕೆ ಹೊತ್ತಾದರು ಒಲೆಗೆ ಚೌರ || ಕಾಡುವ ||

ಇಂಥ ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ
ಬದುಕೆಲ್ಲ ಪೂರ್ತಿ ನರಕಾನೆ
ಹುಲಿಯಂತ ಗಂಡು ಇಲಿಯಾಗಿಬಿಡುವ
ಜೀವಂತ ಶವವಾಗುತ ತಾನೆ || ಕಾಡುವ ||

– ನಾಗೇಶ ಮೈಸೂರು
(ಮೂಲ ಕವಿ ಕೆ.ಎಸ್. ನರಸಿಂಹಸ್ವಾಮಿಯವರ ಮತ್ತು ಕವಿತೆಯ ಕ್ಷಮೆ ಬೇಡುತ್ತ 🙏)

(ಚಿತ್ರಕೃಪೆ : ಉದಯವಾಣಿ ಹಳೆಯ ಪುಟವೊಂದರಿಂದ : http://www.udayavani.com/kannada/news/ಕವನಗಳು/51551/ಹೆಂಡತಿಯ-ಹಾಡು)

00715. ವಾರದ ಕೊನೆಗಿಷ್ಟು ಹನಿಗಳು..


00715. ವಾರದ ಕೊನೆಗಿಷ್ಟು ಹನಿಗಳು..
___________________________


(೦೧)
ಪಾಪಿಯೊಡ್ಡಲಿ
ಪುನೀತರೊಡ್ಡಲಿ ಕೈ
– ತೊಳೆವ ಗಂಗೆ.

(೦೨)
ತುಂತುರು ಹನಿ
ಮೋಡ ಮುಸುಕಿದೆ
– ಬಿಸಿ ಪಕೋಡ.

(೦೩)
ಮುಗಿಲ ರಚ್ಚೆ
ವಾರದ ರಜೆ ಮುಚ್ಚೆ
– ಮನ ಕಾಶ್ಮೀರ.

(೦೪)
ಉದುರುತಿವೆ
ಹನಿ ಚಿಲ್ಲರೆ ಕಾಸು
– ಕರಗಿ ಸುತ್ತ.

(೦೫)
ಗುದ್ದಲಿ ಬಿಡಿ
ನಗರದ ವ್ಯಾಮೋಹ
– ತುಟ್ಟಿ ದಿನಸಿ.

(೦೬)
ಬೆಳೆಯಬೇಡಿ
ಕೊಂಡು ತಿನ್ನುವ ದಿನಾ
– ಆಮದು ವೃದ್ಧಿ.

(೦೭)
ಮಳೆಯಾಗಲಿ
ಮಾತಾಗಲಿ ಕರಗಿ
– ವೇದನೆ ಮುಕ್ತಿ.

(೦೮)
ಮುಂಗಾರು ಮಳೆ
ಕದಡದೆ ರಂಗೋಲಿ
– ನಗುತಿರಲಿ.

(೦೯)
ಬರದ ಕಾಲ
ಬಾರದ ಮಳೆಗಾಲ
– ಕೆಳೆ ಬರಲಿ.

(೧೦)
ಮೊದಲ ಮಳೆ
ನವಿರೆದ್ದು ಸಂಭ್ರಮ
– ಸಂಗಾತಿ ತೆಕ್ಕೆ.

– ನಾಗೇಶ ಮೈಸೂರು.

00714. ‘ಗಂಡ – ಹೆಂಡ’ತಿ ಫಂಢ..!


00714. ‘ಗಂಡ – ಹೆಂಡ’ತಿ ಫಂಢ..! 
_______________________________

(“ಸುಮ್ನೆ ಟೈಮ್ ಪಾಸ್ ಫಂಡಾ”)


ಗಂಡನೆಂಬುವ ಅಂತರ
ಇರದಿದ್ದರೆ ಅಭ್ಯಂತರ
ಕಾಡುವುದಂತೆ ತರತರ
ಗಳಿಗೆಗೊಂದು ಗಂಡಾಂತರ !

ಹೆಸರ್ಯಾಕಿಟ್ಟರು ಗಂಡ ?
ಅರಿವಾಗಲಿಲ್ಲವೇ ಫಂಢ !
ಸತಿ ಬಾಳಾಗಿರದಂತೆ ಸುಗಮ
‘ಗಂಡ’ವವನೆ ಆಗಿ ಆಗಮ !

‘ಗಂಡ’ ನೀಗಿಸೆ ‘ಅಸು’ ಗಂಡಸು
‘ಹೆಂಡ’ ಕುಡಿದಂತೆ ‘ಅತಿ’ ಹೆಂಡತಿ
‘ಗಂಡ-ಹೆಂಡ’ಗಳ ಕಟ್ಟಿದರೆ ಕಾಳಗ
ಎರಡಪಾಯಗಳ ಜಂಟಿ ಬಳಗ !

ಗಂಡನಾಗೆ ಯಮಗಂಡ ಕಾಲ
ಹಿಂಡುತ ಹೆಂಡತಿ ಬಿಚ್ಚೆ ಬಾಲ
ನೀರೆಯಾಗದೆ ಸತಿಯಾಗೆ ನೀರಾ
ಮತ್ತಿನ ಮಂಗಗಳ ಕುಸ್ತಿ ಸಂಸಾರ !

ಸಕಲ ಕಲಾ ವಲ್ಲಭ ಸುಧೀರ
ನಾಟಕವಾಡಲು ಬಲ್ಲ ರಣಧೀರ
ಆಗಿರಬೇಕಿಲ್ಲ ಅವ ಮಾಪುರುಷ
ಮಾಡುವಂತಿರೆ ಸಾಕು ಮನೆಗೆಲಸ !

ಅಂತೆಯೆ ಅತಿ ಲೋಕದ ಸುಂದರಿ
ಶಯನೇಶು ಮಂತ್ರಿ ದಾಸಿ ಕಿನ್ನರಿ
ಆಗಿರಬೇಕಿಲ್ಲ ಅನಸೂಯೆ ಮಾಸತಿ
ಸಾಕಿದ್ದರೆ ಸಂಸಾರ ತೂಗಿಸೊ ಛಾತಿ !

ಗಂಡಗಳೆ ಜೀವಕೆ ಬಹ ಅಪಾಯ
ಹೆಂಡ-ಅತಿ ಮತ್ತೆ ಇಹ ಉಪಾಯ
ಅದಕೆಂದೆ ಬೆಂಕಿ ಬೆಣ್ಣೆಗೆ ಬೀಳೊ ಗಂಟು
ಗುದ್ದಾಡಿಕೊಂಡೆ ಹೇಗೊ ಕುದುರಿಸಿ ನಂಟು..!

– ನಾಗೇಶ ಮೈಸೂರು

(Picture source: http://tinybuddha.com/blog/how-pain-can-cause-us-to-act-crazy-in-relationships/)

00713. ಅಹಲ್ಯಾ_ಸಂಹಿತೆ_೪೨ (ಫಲಿತಾಂಶದ ಯಶಸ್ವಿ ಕ್ರೋಢೀಕರಣ)


00713. ಅಹಲ್ಯಾ_ಸಂಹಿತೆ_೪೨ (ಫಲಿತಾಂಶದ ಯಶಸ್ವಿ ಕ್ರೋಢೀಕರಣ)
________________________________________________
(Link to previous episode no. 41: https://nageshamysore.wordpress.com/2016/04/24/00669-0041_%e0%b2%85%e0%b2%b9%e0%b2%b2%e0%b3%8d%e0%b2%af%e0%b2%be_%e0%b2%b8%e0%b2%82%e0%b2%b9%e0%b2%bf%e0%b2%a4%e0%b3%86_%e0%b3%aa%e0%b3%a7/)

ಅಂದಿನ ಸಭೆಯಲ್ಲೇನೊ ವಿದ್ಯುತ್ಸಂಚಾರವಾಗಿರುವಂತೆ ಇಡಿ ಪರಿಸರವೇ ಉತ್ಸಾಹ, ಉಲ್ಲಾಸದಿಂದ ತುಂಬಿ ತುಳುಕುತ್ತಿದೆ. ಸಮಾನಾಂತರ ಸ್ತರದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ನಾಲ್ಕು ತಂಡಗಳ ಎಲ್ಲಾ ಸದಸ್ಯರು ಆಗಲೆ ಅಲ್ಲಿ ಬಂದು ಸೇರಿಬಿಟ್ಟಿದ್ದಾರೆ. ಪ್ರತಿ ತಂಡವೂ ತಮ್ಮ ಪಾಲಿನ ಕೆಲಸವನ್ನು ಈಗಾಗಲೆ ಯಶಸ್ವಿಯಾಗಿ ಮುಗಿಸಿಬಿಟ್ಟ ಕಾರಣ ಪ್ರತಿಯೊಬ್ಬರ ಕುತೂಹಲವೂ ಮಿಕ್ಕ ತಂಡಗಳ ಫಲಿತದ ಕುರಿತು ಮತ್ತು ಅವೆಲ್ಲವನ್ನು ಹೇಗೆ ಸಮನ್ವಯಿಸಲಾಗುತ್ತಿದೆ ಎಂಬುದರ ಬಗ್ಗೆ. ಸಭೆಯ ಆರಂಭಕ್ಕೆ ಇನ್ನು ಸಮಯವಿರುವ ಕಾರಣ ಎಲ್ಲಾ ಸಣ್ಣ ಸಣ್ಣ ಗುಂಪುಗಳಲ್ಲಿ ಸೇರಿಕೊಂಡು ಪರಸ್ಪರ ಮಾತಿಗಿಳಿದಿದ್ದಾರೆ ಕಾಲಹರಣಕ್ಕೆಂಬಂತೆ.

ಆ ಸಭೆಯಲ್ಲಿ ಮುಖ್ಯ ಭೂಮಿಕೆ ನಿಭಾಯಿಸಬೇಕಾದ ತಂಡ ಮಾತ್ರ ಇನ್ನೂ ಅಲ್ಲಿಗೆ ಬಂದಿಲ್ಲ. ವೇದಿಕೆಯ ಹಿಂದಿರುವ ಮತ್ತೊಂದು ಚಿಕ್ಕ ಸಭಾಕೋಣೆಯಲ್ಲಿ ಕಡೆಯ ಗಳಿಗೆಯ ಚರ್ಚೆ, ಸಿದ್ದತೆಗಳನ್ನು ನಡೆಸುತ್ತಿದ್ದಾರೆ. ಊರ್ವಶಿ, ಬ್ರಹ್ಮದೇವ, ಸೂರ್ಯ, ದೇವೇಂದ್ರ, ಗೌತಮರ ಜತೆ ನಾಲ್ಕು ತಂಡದಿಂದಲು ಆಯ್ದ ಪ್ರತಿನಿಧಿಗಳು ಸಿದ್ದರಾಗುತ್ತಿದ್ದಾರೆ, ತಮ್ಮ ಪ್ರಯೋಗದ ಫಲಿತಗಳನ್ನು ವೇದಿಕೆಯ ಮೇಲಿನ ಪ್ರಾಯೋಗಿಕ ಪ್ರತ್ಯಕ್ಷದರ್ಶಿಯ ಅವತರಣಿಕೆಯಲ್ಲಿ ಪ್ರದರ್ಶಿಸಲು. ಆ ಪ್ರಾಯೋಗಿಕತೆಯ ಕಾರಣದಿಂದಲೆ ಕಡೆಯ ಗಳಿಗೆಯ ಪರೀಕ್ಷೆ ನಡೆಸುತ್ತಿದ್ದಾರೆ – ಎಲ್ಲವೂ ಸರಿಯಾಗಿ ಕಾರ್ಯ ನಿರ್ವಹಿಸುವಂತೆ. ಅದರೆಲ್ಲದರ ಉಸ್ತುವಾರಿ ನೋಡುತ್ತಿದ್ದ ಊರ್ವಶಿ ಕೊನೆಗೊಮ್ಮೆ ಎಲ್ಲಾ ಸಮರ್ಪಕವಾಗಿದೆಯೆಂದು ಖಚಿತ ಪಡಿಸಿಕೊಂಡ ನಂತರ ಗೌತಮನತ್ತ ತೆರಳಿ ಮುಂದಿನ ಕಾರ್ಯ ನಿರೂಪಣೆಯ ಪಟ್ಟಿಯನ್ನು ಅವನ ಕೈಗಿತ್ತಳು. ಅಂದಿನ ಪೂರ್ಣ ನಿರೂಪಣೆಯ ಹೊಣೆ ಗೌತಮನದು – ಸಿದ್ದಪಡಿಸಿದ್ದೆಲ್ಲ ಊರ್ವಶಿಯೆ ಆದರು. ವೇದಿಕೆಯ ಹಿಂದಿನ ಸಹಾಯಕಿಯಾಗಿ ಮಾತ್ರ ಅವಳ ಪಾತ್ರ. ಪಿತಾಮಹನಾಗಿ ಮಿಕ್ಕವರೆಲ್ಲರದು ಅಂದು ಪ್ರೇಕ್ಷಕರ ಪಾತ್ರವೆ. ಅಂತೂ ನಿಗದಿತ ಸಮಯಕ್ಕೆ ಸರಿಯಾಗಿ ಸಭೆ ಆರಂಭವಾಗುವಂತೆ ಚಾಲನೆ ನೀಡಿದ ಊರ್ವಶಿ, ನಿರೂಪಕನಾಗಿ ಗೌತಮನನ್ನು ವೇದಿಕೆಗೆ ಆಹ್ವಾನಿಸಿ ತಾನು ನೇಪಥ್ಯಕ್ಕೆ ಸರಿದುಬಿಟ್ಟಳು.

ಗೌತಮನ ನಿರೂಪಣೆಯೇನು ನೀರಸವಾಗಿರಲಿಲ್ಲ. ಹಾಗಿರಬಾರದೆಂದೆ ಹೆಚ್ಚಿನ ತಾಂತ್ರಿಕ ವಿವರಣೆಯ ಗೋಜಿಗೆ ಹೋಗದೆ ಪ್ರತಿ ತಂಡದ ಪ್ರಾತ್ಯಕ್ಷಿಕ ದರ್ಶಿಕೆಗೆ ನೇರ ಅನುವು ಮಾಡಿಕೊಟ್ಟು ನಡುನಡುವೆ ಅದರ ವಿವರಣೆಗೆ ತನ್ನ ಮಾತು ಸೇರಿಸತೊಡಗಿದ. ಆ ನಿಟ್ಟಿನಲ್ಲಿ ಮೊದಲು ಅವಕಾಶ ಪಡೆದ ಮೊದಲನೇ ತಂಡ ಜೀವಕೋಶದ ಕಸಿಯ ಕುರಿತಾದ ವಿವರಗಳನ್ನು ದೃಶ್ಯರೂಪದಲ್ಲಿ ಪ್ರದರ್ಶಿಸತೊಡಗಿತ್ತು. ಎಲ್ಲರಿಗು ಅರ್ಥವಾಗುವ ಸರಳ ರೂಪಿನಲ್ಲಿರಬೇಕೆಂಬ ಮೂಲ ನಿಯಮಕ್ಕೆ ಬದ್ಧರಾಗಿ ಮೊದಲು ಉಚ್ಚೈಶ್ರವಸ್ಸುವಿನ ಸೃಜಿಸುವಿಕೆಯನ್ನು ಉದಾಹರಣೆಯಾಗಿ ತೋರಿಸಲು ಮೊದಲ್ಗೊಂಡು, ಅದರ ಸಲುವಾಗಿ ಒಂದು ಕಡೆಯಿಂದ ಕುದುರೆ ಮತ್ತು ಇನ್ನೊಂದು ಕಡೆಯಿಂದ ಹಕ್ಕಿಯ ಸಾಂಕೇತಿಕ ರೂಪಗಳು ಮೂಡಿಬಂದು ಅವೆರಡು ಅಂಗಾಂಗಿಕ ಮಟ್ಟದಲ್ಲಿ ಸಮ್ಮಿಳನವಾಗುವ ಸ್ಥೂಲ ಚಿತ್ರಣವನ್ನು ಪ್ರದರ್ಶಿಸಿತು. ಕಸಿ ಹಾಕಿದ ವಿಭಿನ್ನ ಅಂಗಾಂಗಗಳು ಹೊಂದಿಕೊಳ್ಳುವ ಬಗೆಯ ವಿನ್ಯಾಸ, ತಂತ್ರಗಳ ಅನಾವರಣ ಮಾಡುತ್ತಲೇ ಕಾಲನುಕ್ರಮಣದಲ್ಲಿ ಅವು ಹೇಗೆ ನೈಸರ್ಗಿಕ ಬಂಧವನ್ನು ಏರ್ಪಡಿಸಿಕೊಂಡಿವೆಯೆಂದು ನಿರೂಪಿಸಿತು. ಹಾಗೆ ನಿರೂಪಿಸಿದ ಚಿತ್ರಣವನ್ನೆ ಆಂಗಿಕ ಮಟ್ಟದಿಂದ ಅಂಗಾಂಗ, ಅಂಗಾಶ, ಜೀವಕೋಶಗಳ ಮಟ್ಟಕ್ಕೆ ಒಯ್ದು ಹೇಗೆ ಎರಡು ವಿಭಿನ್ನ ಜೀವಕೋಶಗಳು ಕಸಿಯಾಗಿ ಒಂದು ಹೂಸ ಜೀವಕೋಶವಾಗಿ ಉತ್ಪನ್ನವಾಯ್ತು ಎಂಬುದರ ಪ್ರಾತ್ಯಕ್ಷಿಕೆಯನ್ನು ತೋರಿಸಲಾಯ್ತು. ಅದನ್ನು ನೋಡಿದ ಪ್ರತಿಯೊಬ್ಬರೂ ಜೀವಕೋಶಗಳೆರಡರ ಕಸಿಯಿಂದ ಹೊಸ ಜೀವಕೋಶವೊಂದರ ಉತ್ಪತ್ತಿ ಮಾಡಲು ಸಾಧ್ಯ ಎನ್ನುವುದನ್ನು ಸರಳ ರೂಪದಲ್ಲಿ ಅರಿಯಲು ಸಾಧ್ಯವಾಗುವಂತೆ ಸಂಯೋಜಿಸಿದ ಚಿತ್ರಣವದು.

ಅಲ್ಲಿಂದ ಮುಂದುವರೆದು ಅದೇ ಸಿದ್ದಾಂತವನ್ನು ಅಳವಡಿಸಿಕೊಂಡ ಊರ್ವಶಿ ಮತ್ತು ಬ್ರಹ್ಮದೇವರ ಕೋಶಗಳ ಕಸಿ ಮಾಡಿದ ವಿವರಗಳ ಪ್ರದರ್ಶನವಾಯ್ತು. ಒಂದೇ ಬಾರಿಗೆ ನಿಗದಿತ ಮಟ್ಟದ ಕಸಿ ದೊರಕದ ಕಾರಣ, ಹಲವಾರು ಮಜಲುಗಳಾಗಿ ನಡೆಸಿದ ಯತ್ನಗಳನ್ನು ಅನುಕ್ರಮವಾಗಿ ತೋರಿಸಿ , ಹೇಗೆ ಅಂತಿಮ ಮಜಲಿನ ಹೊಸ ಕೋಶದ ಸೃಷ್ಟಿಯತನಕ ತಲುಪಿದರೆನ್ನುವುದನ್ನು ಸಾದರಪಡಿಸಲಾಗಿತ್ತು. ತದನಂತರ ಹಳೆಯ ಜೀವಕೋಶ ಮತ್ತು ಹೊಸ ಜೀವಕೋಶಗಳನ್ನು ತುಲನಾತ್ಮಕವಾಗಿ ಪ್ರದರ್ಶಿಸಿ ಅವೆರಡರ ನಡುವಿನ ಅಂತರವನ್ನು ವಿವರಿಸಲಾಯ್ತು. ಸಾಧಾರಣವಾಗಿ ನೈಸರ್ಗಿಕ ವಿಕಸನ ಹಾದಿ ಹಿಡಿದಿದ್ದಾರೆ ಎಷ್ಟು ಕಾಲ ಹಿಡಿಯಬಹುದಿತ್ತು ಮತ್ತು ಈ ಕಸಿ ವಿಧಾನದಿಂದ ಎಷ್ಟು ಬೇಗನೆ ಅದೇ ವಿಕಸನ ಮಟ್ಟವನ್ನು ಸಾಧಿಸಲು ಸಾಧ್ಯವಾಯಿತೆಂಬುದರ ವರ್ಣನೆಯೇ ರೋಚಕ ಕಥಾನಕದಂತೆ ಭಾಸವಾಗಿತ್ತು ಅಲ್ಲಿ ನೆರೆದಿದ್ದ ವಿಜ್ಞಾನಿಗಳಿಗೆ.

ನಂತರದ ಸರದಿ ಎರಡನೆ ತಂಡದ ಬದಲು ಮೊದಲು ಮೂರನೆ ತಂಡದ್ದಾಗಿತ್ತು. ಮೂರನೆ ತಂಡದ ಫಲಿತವನ್ನು ಬಳಸಿಕೊಂಡು ಎರಡನೆ ತಂಡ ತನ್ನ ಗುರಿ ಸಾಧಿಸಿದ್ದ ಕಾರಣಕ್ಕೆ. ವೇದಿಕೆಗೆ ಬಂದ ಮೂರನೆ ತಂಡ ಮೊದಲು ಪ್ರದರ್ಶಿಸಿದ್ದು ಸಾಧಾರಣ ಜೀವಕೋಶದ ದೈನಂದಿನ ಹುಟ್ಟು – ಸಾವಿನ ಕುರಿತಾಗಿ. ಜೀವಕೋಶವೊಂದು ಹೊಸಕೋಶವಾಗಿ ಹೊರಹೊಮ್ಮಿದಂತೆ ಹೇಗೆ ತನ್ನ ಜೀವನ ಚಕ್ರ ಸವೆಸುತ್ತದೆ ಮತ್ತು ಅದರ ಜೀವಿತದ ಕಾಲಾವಧಿ ಎಷ್ಟು ಎಂಬುದರ ಚಿತ್ರಣ ಮೊದಲು ಮೂಡಿಬಂದಿತ್ತು. ತದನಂತರ ಅದರ ಜೀವಿತಾವಧಿಯನ್ನು ಸಕ್ರಿಯವಾಗಿಡುವ ರಾಸಾಯನಿಕದ ಮಾಹಿತಿಯನ್ನು ತೋರಿಸುತ್ತ, ಯಾವಾಗ ಆ ರಾಸಾಯನಿಕ ತನ್ನ ಕಾರ್ಯ ನಿಲ್ಲಿಸಿ ಸ್ಥಬ್ಧವಾಗುವುದೊ ಆಗ ಜೀವಕೋಶವು ನಿಷ್ಕ್ರಿಯವಾಗಿ ಸಾವಿಗೀಡಾದಂತೆ ನಶಿಸಿಹೋಗುವುದನ್ನು ತೋರಿಸುವ ಚಿತ್ರಣ ಮುಂದಿನದು. ಇವೆರಡೂ ಪ್ರಸ್ತುತ ಕೋಶದ ಕಾರ್ಯವೈಖರಿಯನ್ನು ಅರ್ಥಮಾಡಿಕೊಳ್ಳುವಲ್ಲಿ ಸಹಾಯಕವಾಗಿತ್ತು.

ನಂತರದ ಸರದಿ ಅವರು ಕಂಡು ಹಿಡಿದ ಹೊಸ ರಾಸಾಯನಿಕದ್ದು. ಪ್ರಸ್ತುತ ನಶಿಸಿಹೋಗಿದ್ದ ಜೀವಕೋಶವೊಂದಕ್ಕೆ ಆ ರಾಸಾಯನಿಕವನ್ನು ಸೇರಿಸುವುದರ ಮೂಲಕ ಅದು ಹೇಗೆ, ನಿಷ್ಕ್ರಿಯವಾಗಿದ್ದ ಮೂಲ ರಾಸಾಯನಿಕವನ್ನು ಪ್ರಚೋದಿಸಿ, ಉದ್ದೇಪಿಸಿ, ಚೇತನಶೀಲವಾಗಿಸಿ ಮತ್ತೆ ಸಕ್ರೀಯವಾಗಿಸಬಹುದೆಂಬ ಮಾಹಿತಿಯ ಪ್ರದರ್ಶನ. ಆ ರಾಸಾಯನಿಕವನ್ನು ಸೇರಿಸುತ್ತಿದ್ದ ಹಾಗೆ ಅದುವರೆಗೆ ಸಾವಿಗೀಡಾದಂತಿದ್ದ ಕೋಶದಲ್ಲು ಮತ್ತೆ ಚಟುವಟಿಕೆ ಆರಂಭವಾಗಿ ಜೀವಿತವಿದ್ದ ಮೊದಲಿನ ಹಾಗೆ ಕಾರ್ಯ ನಿರ್ವಹಿಸತೊಡಗಿತ್ತು…! ಈ ಹಂತದಲ್ಲಿ ಮತ್ತೆ ಗೌತಮನೆ ವೇದಿಕೆಗೆ ಬಂದು ಪುಟ್ಟ ವಿವರಣೆ ನೀಡಿದ – ಇದರರ್ಥ ಜೀವಕೋಶ ತನ್ನ ಕಾಲಾವಧಿಯಲ್ಲಿ ನಶಿಸಿಹೋಗುವ ಬದಲು ಮತ್ತಷ್ಟು ಜೀವ ಬಂದಂತೆ ತನ್ನ ಆಯಸನ್ನು ವೃದ್ಧಿಸಿಕೊಂಡು ದುಪ್ಪಟ್ಟಾಗಿಸಿಕೊಳ್ಳುತ್ತದೆ ಎಂದು. ಅದನ್ನೇ ಸರಳವಾಗಿ ವಿವರಿಸುತ್ತ ಜೀವಿಯೊಂದರ ಆಯಸ್ಸನ್ನು ಎರಡರಷ್ಟು ಮಾಡಿದಂತೆಯೆ ಈ ಲೆಕ್ಕ ಎಂದು ವಿವರಿಸಿದ.

ಆದರೆ ಅದನ್ನು ಮೀರಿದ ಆಶ್ಚರ್ಯ ಮುಂದಿನ ಹಂತದ ಪ್ರದರ್ಶನದಲ್ಲಿತ್ತು. ಹೊಸದಾಗಿ ಸೇರಿಸಿದ ರಾಸಾಯನಿಕ ಕೋಶದ ಜೀವಾವಧಿ ಕಾಲಮಾನವನ್ನೇನೊ ಎರಡರಷ್ಟಾಗಿಸಿತ್ತು; ತಾರ್ಕಿಕವಾಗಿ ದುಪ್ಪಟ್ಟು ಕಾಲವಾದ ನಂತರ ಕೋಶ ಮತ್ತೆ ನಶಿಸಿಹೋಗಬೇಕಿತ್ತು. ಆದರೆ ಹಾಗಾಗಲಿಲ್ಲ – ಬದಲು ಆ ಹೊಸ ರಾಸಾಯನಿಕದ ಮತ್ತೊಂದು ಪ್ರಚೋದಕ ತತ್ವದಿಂದಾಗಿ ಒಂದು ವಿಧದ ಸ್ವಯಂಭುತ್ವ ಪ್ರಾಪ್ತವಾದಂತೆ, ನಶಿಸಿಹೋಗಬೇಕಾಗಿದ್ದ ಜೀವಕೋಶ ಮತ್ತೆ ಪುನರುಜ್ಜೀವನಗೊಂಡಂತೆ ಸಕ್ರಿಯಗೊಂಡು ಮತ್ತೊಂದು ಜೀವನ ಚಕ್ರವನ್ನು ಆರಂಭಿಸಿಬಿಟ್ಟಿತ್ತು…! ಈ ಪ್ರಕ್ರಿಯೆ ಹೀಗೆ ಮುಂದುವರೆಯುತ್ತ ಸುಮಾರು ಒಂಭತ್ತು ಜೀವನ ಚಕ್ರಗಳ ಆವರ್ತನದ ನಂತರವಷ್ಟೆ ಆ ಮೂಲ ಜೀವಕೋಶ ಮತ್ತೆ ನಿಷ್ಕ್ರಿಯ ಸ್ಥಿತಿ ತಲುಪಿ ಸ್ತಬ್ದವಾಯ್ತು. ಅದು ಮುಗಿಯುತ್ತಿದ್ದಂತೆ ಮತ್ತೆ ವೇದಿಕೆಗೆ ಬಂದ ಗೌತಮ ಅದರ ಮಹತ್ವವನ್ನು ಎತ್ತಿ ತೋರಿಸಿದ. ಹೊಸ ರಾಸಾಯನಿಕದ ಫಲವಾಗಿ ಕೋಶ ಅರ್ಥಾತ್ ಜೀವಿಯ ಆಯಸ್ಸು ಹತ್ತುಪಟ್ಟು ಹೆಚ್ಚಾದಂತೆ ಎಂದು ವಿವರಿಸಿದ. ಜತೆಗೆ ಸೇರಿಸಿದ ಗಾತ್ರಕ್ಕನುಗುಣವಾಗಿ ಅದನ್ನು ಸ್ವಲ್ಪಸ್ವಲ್ಪವೇ ಬಳಸಿಕೊಳ್ಳುತ್ತ ಹಲವಾರು ಚಕ್ರಗಳಲ್ಲಿ ಪುನರಾವರ್ತಿಸಿಕೊಳ್ಳುವ ಅದರ ಸ್ವಯಂಭುತ್ವದ ಮಹತ್ವವನ್ನು ವಿವರಿಸುತ್ತ ಈ ತತ್ವ ಹೇಗೆ ಜೀವಿಗಳ ಕಾಲಾವಧಿಯನ್ನು ತನಗೆ ತಾನೇ ವಿಸ್ತರಿಸಿಕೊಳ್ಳುತ್ತ ಹೋಗಬಹುದೆನ್ನುವುದನ್ನು ವಿಷದೀಕರಿಸಿದ – ರಾಸಾಯನಿಕದ ಗಾತ್ರಕ್ಕನುಗುಣವಾಗಿ.

ಅದನ್ನು ಪ್ರಮಾಣೀಕರಿಸುವ ಮುಂದಿನ ಮಾಹಿತಿ ನಂತರ ಪ್ರದರ್ಶಿತವಾಯ್ತು. ಈ ಬಾರಿ ಹೊಸ ರಾಸಾಯನಿಕವನ್ನು ಹೊರಗಿನಿಂದ ಸೇರಿಸುವ ಬದಲು, ಜೀವಕೋಶವು ಅದನ್ನು ತಂತಾನೆ ಉತ್ಪಾದಿಸಿಕೊಳ್ಳುವಂತೆ ಮಾಡಿದ ಸಂಶೋಧನೆಯನ್ನು ತೋರಿಸಲಾಯ್ತು. ಜೀವಕೋಶದಲ್ಲೆ ಈ ತತ್ವ ಬೀಜರೂಪದ ಮಟ್ಟದಲ್ಲಿ ಸೇರಿಬಿಟ್ಟಿತೆಂದರೆ ಅದರರ್ಥ ಸಾವಿಲ್ಲದ ಅಮರತ್ವವನ್ನು ಸಾಧಿಸಿದ ಹಾಗೆ. ಆ ಕೋಶ ನಿರಂತರ ಜೀವನ ಚಕ್ರದ ಪುನಾರಾವರ್ತನೆಯಲ್ಲಿ ತೊಡಗಿಸಿಕೊಳ್ಳುವುದರಿಂದ ನೈಸರ್ಗಿಕ ಸಾವೆನ್ನುವುದೆ ಇಲ್ಲವಾಗಿಬಿಡುತ್ತದೆ. ಹೀಗೆ ಜೀವಿಯ ಆಯಸ್ಸಿನ ವೃದ್ಧಿಗೆ ಇದು ಸ್ವಯಂಚಾಲಕತ್ವ ನೀಡುವ ಅದ್ಭುತ ಸಂಶೋಧನೆಯೆಂದು ಮನದಟ್ಟಾಗಿಸುತ್ತಿದ್ದ ಹಾಗೆಯೆ ಸಭೆಯೆಲ್ಲ ಪ್ರಚಂಡ ಕರತಾಡನದಿಂದ ತುಂಬಿಹೋಯ್ತು.

ಇನ್ನು ನಂತರದ ಸರದಿ ಎರಡನೆ ತಂಡದ್ದು. ಮೂರನೆ ತಂಡದ ಫಲಿತಗಳೆಲ್ಲ ಜೀವಕೋಶದ ಮಟ್ಟದ್ದು. ಮೂಲರೂಪದಲ್ಲಿ ಅದನ್ನು ಬಳಸಿಕೊಳ್ಳುತ್ತ ಹೇಗೆ ಅಂಗ, ಅಂಗಾಶಗಳ ಮಟ್ಟಕ್ಕೆ ವಿಸ್ತರಿಸಬಹುದೆನ್ನುವ ಸಂಶೋಧನೆ, ಪ್ರಯೋಗ ಈ ತಂಡದ್ದು. ಮೊದಲ ತಂಡದ ಕಸಿ ಮಾಡಿದ ಜೀವಕೋಶಗಳನ್ನು ತೆಗೆದುಕೊಂಡು, ಅದಕ್ಕೆ ಎರಡನೆ ತಂಡದ ಫಲಿತಾಂಶವನ್ನು ಸಮೀಕರಿಸಿ ನಂತರ ಕಣ್ಣು, ಕೈ, ಹೃದಯದಂತಹ ಕೆಲವು ಉದಾಹರಣೆಗಳನ್ನು ಬಳಸಿ, ಈ ತತ್ವಗಳು ಕಾರ್ಯ ನಿರ್ವಹಿಸುತ್ತವೆಯೇ ಇಲ್ಲವೇ ಎಂಬುದನ್ನು ಖಚಿತ ಪಡಿಸಿಕೊಳ್ಳುವುದು, ಸಾಧಿಸಿ ತೋರಿಸುವುದು ಈ ತಂಡದ ಗುರಿಯಾಗಿದ್ದ ಕಾರಣ ಎಲ್ಲರಿಗೂ ಇಲ್ಲಿ ವಿಶೇಷ ಆಸಕ್ತಿ. ಹಸ್ತವೊಂದನ್ನು ಉದಾಹರಣೆಯಾಗಿಟ್ಟುಕೊಂಡು ಹೇಗೆ ಅದು ಹೆಚ್ಚುಕಾಲ ತನ್ನನ್ನೆ ಜೀವಂತವಾಗಿಟ್ಟುಕೊಳ್ಳುತ್ತದೆಂಬುದನ್ನು ನಿರೂಪಿಸುತ್ತ ಇದೇ ಮಾದರಿ ಎಲ್ಲಾ ಅಂಗಾಗಗಳಲ್ಲು ಪುನರಾವರ್ತಿಸಬಹುದೆಂದು ವಿವರಿಸಲಾಯ್ತು. ಅಲ್ಲೂ ಎಲ್ಲರಲ್ಲೂ ಕುತೂಹಲ ಮೂಡಿಸಿದ್ದು – ಕಡಿದು ಹಾಕಿದ್ದ ಬೆರಳಿನ ಭಾಗವೊಂದು ತಂತಾನೆ ಮತ್ತೆ ಚಿಗುರಿಕೊಂಡಂತೆ ಬೆಳೆದು ಮೊದಲಿನ ಆಕಾರಕ್ಕೆ ಕುದುರಿಕೊಂಡಿದ್ದು. ಈ ಬಾರಿ ಮತ್ತೆ ಗೌತಮ ವೇದಿಕೆಗೆ ಬಂದು ಈ ಸಂಶೋಧನೆಯ ಸಾಧಕಭಾಧಕತೆ , ಮಿತಿಗಳನ್ನು ವಿವರಿಸಿದ ನಂತರ ಮುಂದಿನ ನಾಲ್ಕನೇ ತಂಡದ ಸರದಿ. ಇದರ ನಾಯಕತ್ವ ಗೌತಮನದೆ ಆದ ಕಾರಣ ಅವನೆ ಮುಂಚೂಣಿಯಲ್ಲಿ ನಿಂತು ವಿವರಿಸತೊಡಗಿದ.

ನಾಲ್ಕನೇ ತಂಡವಾಗಿ ಪ್ರತಿಯೊಂದರ ಗುಣಮಟ್ಟ ಮಾಪನೆ ಮತ್ತು ಸಂಯೋಜಿತ ಮೇಲುಸ್ತುವಾರಿ ನೋಡಿಕೊಳ್ಳುತ್ತಿದ್ದ ಜವಾಬ್ದಾರಿಯನ್ನು ವಿವರಿಸಿದ ಗೌತಮ ತಮ್ಮ ತಂಡದ ನಿಜವಾದ ಕಾರ್ಯ ಇನ್ನು ಮುಂದಿನ ಹಂತದಲ್ಲಿ ಎಂದು ವಿವರಿಸುತ್ತ, ಆ ಹಂತದಲ್ಲಿ ಏನು ಮಾಡಲಿದೆ ಎನ್ನುವುದನ್ನು ಸಾಂಕೇತಿಕವಾಗಿ ಚಿತ್ರಿಸತೊಡಗಿದ. ಅದಕ್ಕೂ ಮುನ್ನ ಇದುವರೆಗೂ ನಡೆದ ಕಾರ್ಯಗಳು ಮೊದಲಿನ ಹಂತದ್ದಾಗಿ ಕೇವಲ ನಾಲ್ಕು ತಂಡಗಳಿಗೆ ಸೀಮಿತವಾಗಿದ್ದ ಹಿನ್ನಲೆ ವಿವರಿಸುತ್ತ, ಮುಂದಿನ ಮಹಾನ್ ಹಂತದಲ್ಲಿ ಮಿಕ್ಕವರೆಲ್ಲರೂ ಸಕ್ರೀಯವಾಗಿ ಪಾಲ್ಗೊಳ್ಳಬೇಕಾದ ಮಾಹಿತಿ ನೀಡುತ್ತ ತನ್ನ ವಿಶಾಲ ಕಾರ್ಯಯೋಜನೆಯನ್ನು ಬಿಚ್ಚಿಡತೊಡಗಿದ. ಸಾರಾಂಶದಲ್ಲಿ ಮೊದಲ ಹಂತದ ಫಲಿತಾಂಶಗಳನ್ನೆ ಮೂಲ ಸರಕಾಗಿ ಬಳಸುತ್ತ ಮಿಕ್ಕವರೆಲ್ಲರೂ ತಂತಮ್ಮ ವಿಭಾಗದಲ್ಲಿ ಕಾರ್ಯ ಮುಂದುವರೆಸಬೇಕಿತ್ತು. ಅದನ್ನು ಸಮಗ್ರ ರೂಪದಲ್ಲಿ ಆಯೋಜಿಸಿ, ಪರೀಕ್ಷಿಸುವ ಕಾರ್ಯವನ್ನು ನಾಲ್ಕನೇ ತಂಡ ಮುಂದುವರೆಸಲಿತ್ತು. ಎಲ್ಲಾ ತಾಂತ್ರಿಕ ವಿಷಯಗಳನ್ನು ವಿವರಿಸುತ್ತ ಕೊನೆಗೆ ಮುಂದಿನ ಹಂತದ ಕಾರ್ಯಯೋಜನೆಯನ್ನು ಸಾಧಿಸಬೇಕಾದ ಗುರಿಗಳ ಸಾರರೂಪದಲ್ಲಿ ಮಂಡಿಸಿದ ಗೌತಮ;

– ಮೊದಲ ಹಂತದ ಫಲಿತ ಬಳಸಿ ಪ್ರತಿ ಅಂಗಾಂಗಗಳನ್ನು ಹೊಸತಾಗಿ ನಿರ್ಮಿಸುವುದು

– ಎಲ್ಲವನ್ನು ಒಗ್ಗೂಡಿಸಿ ಮಾನವ ಜೀವಿಯಾಗಿಸಿ ಅದು ಸಮಷ್ಟಿತ ರೂಪದಲ್ಲಿ ಕಾರ್ಯ ನಿರ್ವಹಿಸುವಂತೆ ಮಾಡುವುದು

– ಹಾಗೆ ಕ್ರೋಢೀಕರಿಸಿದ ಮಾದರಿಯನ್ನು ‘ಅಹಲ್ಯೆ’ಯೆಂಬ ಹೆಸರಿನ ಜೀವಿಯಾಗಿಸಿ ಭುವಿಯ ವಾತಾವರಣದಲ್ಲಿ ಒಂದು ಜೀವಿತ ಕಾಲ ಪರೀಕ್ಷಿಸುವುದು

– ಕೊನೆಗೆಲ್ಲವನ್ನು ಸೂಕ್ಷ್ಮಾತಿಸೂಕ್ಷ್ಮ ಸೂತ್ರ ಬೀಜರೂಪಕ್ಕೆ ಪ್ರಕ್ಷೇಪಿಸಿ ವೀರ್ಯಾಣು, ಅಂಡಾಣುಗಳ ಮಟ್ಟಕ್ಕೆ ಬೇರ್ಪಡಿಸಿಟ್ಟು ಅಹಲ್ಯಾ ಸಂತಾನ ಅಥವಾ ಮುಂದಿನ ಸಂತತಿಯ ಆಯ್ದ ಮಾನವ ಜೀವಿಗಳಲ್ಲಳವಡಿಸಿ, ಸೃಷ್ಟಿಕ್ರಿಯೆಯ ನಿಯಂತ್ರಿತ ಸ್ವಯಂಚಾಲಿಕತ್ವವನ್ನು ಸಾಧಿಸುವುದು.

– ಭುವಿಯ ಸುತ್ತಲಿನ ಚರಾಚರ ಪರಿಸರದ ಮಟ್ಟದಲ್ಲಿ ಅದು ಹೊಂದಿಕೊಳ್ಳುವಂತೆ ಸೂಕ್ತವಾಗಿ ಮಾರ್ಪಡಿಸುವುದು.

– ಈ ಸೃಷ್ಟಿಕ್ರಿಯೆ ಸರ್ವತಂತ್ರ ಸ್ವತಂತ್ರವಾಗಿ, ಸ್ವಯಂ ನಿಯಂತ್ರಿತವಾಗಿ, ಸ್ವಯಂಚಾಲಿತವಾಗಿ ನಡೆಯುವಂತೆ ಬೇಕಾದ ಸಾಮಾಜಿಕ ಪರಿಸರ, ನೀತಿ ಸಂಹಿತೆ ಮತ್ತಿತರ ಪೂರಕಾಂಶಗಳನ್ನು ಆಯೋಜಿಸುವುದು.

ಇಷ್ಟೆಲ್ಲ ಆದ ಮೇಲೆ ಎಲ್ಲರಿಗು ತಮ್ಮ ಮುಂದಿನ ಹಂತದ ಹೊಣೆಗಾರಿಕೆಯನ್ನು ಮನವರಿಕೆ ಮಾಡಿಕೊಟ್ಟು ನಂತರ ಸಭೆ ಮುಕ್ತಾಯವಾಗಿತ್ತು – ದೊಡ್ಡ ಔತಣಕೂಟದೊಂದಿಗೆ.

(ಇನ್ನೂ ಇದೆ)

00712. ಯಾರು ಕೇಳುವರಿಲ್ಲಿ ಅಳಲು ? (3K Photo Kavana 38)


00712. ಯಾರು ಕೇಳುವರಿಲ್ಲಿ ಅಳಲು ?
____________________________


ದಿನ ನಿತ್ಯ ಚೀರುತಲೆ ಇರುವೆ
‘ಸಹಾಯಾ ಸಹಾಯಾ’ ನಾ ಅಬಲೆ
ಬರುವವರಾರಿಲ್ಲಿ ಅಸಹಾಯಕತೆ
ಧಾವಿಸಿ ಬರುವರೆಲ್ಲ ಅತ್ಯಾಚಾರಕೆ..
ಬಂದು ಅರೆಗಳಿಗೆಯೂ ವಿಶ್ರಮಿಸರು
ದುರುಳ ದುಶ್ಯಾಸನರು, ದುಶ್ಯಲೆಯರು
ಬಿಚ್ಚುವರೆನ್ನ ಮೇಲ್ವಸ್ತ್ರ ಸರಸರ ನಡುಬೀದಿ
ಗಣಿಸದೆ ಹಚ್ಚುವರು ದೀಪ ಹಾಡಹಗಲೇ
ಮುಟ್ಟುವರು ಕುಟ್ಟುವರು ಸವರಿ ನೇವರಿಸಿ
ಕಾಡಿ ಕೆಣಕಿ ಹೆಣಗಾಡಿಸಿ ಕೇಳುತ
ನೂರೆಂಟು ಪ್ರಶ್ನೆ ಉತ್ತರ ಚಿತ್ತಾರ
ಬರೆದೇನೆಲ್ಲ ಬಗೆ ಬಗೆ ಬೆತ್ತಲೆ ಮೈ ಮೇಲೆ,
ಕನಿಷ್ಠ ಗೌರವಕೂ ಕೇಳದೆ ಅನುಮತಿಯ..
ಸುಸ್ತಾಗಿ ಕುಗ್ಗಿ ಕುಸಿದರು ಬಿಡರು..
ಮದ್ದು ಕುಡಿಸಿ ಮತ್ತೆ ಮತ್ತೆ ತಿರಿಯುವ ಜನರು
ಗಣಕವೆನ್ನುತ ಗಂಟೆ ದಿನ ವಾರ ತಿಂಗಳು ವರ್ಷ
ಎರಗಿಹರೆನ್ನ ಮೇಲೆ ಸತತ ಸಾಮೂಹಿಕ ಸ್ವಾರ್ಥ
ಮಂದಗತಿಗೆ ಬೈದು, ವೇಗದೆ ಓಡಿದಾಗ ನಿರ್ಲಕ್ಷ್ಯ;
ಕೊನೆಗೊಂದು ದಿನ ಸಾಕಾಗಿ ಬಸವಳಿದು ಬಿದ್ದು
ಬೇಡಿದೆ, ಕೂಗಿದೆ, ಅರಚಿದೆ, ಸಹಾಯಕೆ…
ದುರ್ವಿಧಿಯೇ ! ಮೂಲೆಗೆತ್ತೆಸೆದು ನನ್ನ ಅಕಟಕಟ..
ಕೊಂಡುಕೊಂಡರು, ಹೊಸದೊಂದು ಕಂಪ್ಯೂಟರನ್ನ ..!

– ನಾಗೇಶ ಮೈಸೂರು

00711. ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ..


00711. ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ..
____________________________


ಹೂವಲ್ಲೂ ಗಂಡು ಹೂ ಮತ್ತು ಹೆಣ್ಣು ಹೂವಿರುವುದು ಸಾಮಾನ್ಯ ಜ್ಞಾನವಲ್ಲ. ಬಹುಶಃ ವಿಜ್ಞಾನದ ಕಲಿಕೆಯಲಿ ತೊಡಗಿರುವವರಿಗೆ ಗೊತ್ತಿರಬಹುದಾದರೂ, ಕವಿ ಕಲ್ಪನೆಯ ಮೂಸೆಯಲ್ಲಿ ಹೂವೆಂದರೆ ಹೆಣ್ಣಿನ ರೂಪವೆ ಕಣ್ಮುಂದೆ ಬಂದು ನಿಲ್ಲುತ್ತದೆ. ಕವಿಯತ್ರಿಗಳೂ ಸಹ ಹೆಚ್ಚು ಕಡಿಮೆ ಇದೆ ಅರಿವಿನ ಮೂಸೆಯಲ್ಲೆ ಕಾವ್ಯ ಹೊಸೆಯುವಂತೆ ಭಾಸವಾಗುತ್ತದೆ. ಈ ಗುಂಪಿನಲ್ಲಿ ಬಹುತೇಕ ಹೂವೆಂದರೆ ಹೆಣ್ಣಿನ ಪ್ರತೀಕವಾಗಿಬಿಡುತ್ತದೆ, ಗಂಡಿನ ಪ್ರತೀಕವಾಗಿ ಹಿಡಿಶಾಪ ಹಾಕಿಸಿಕೊಳ್ಳುವ ಬಡಪಾಯಿ ಪಾಪಾ ದುಂಬಿ!

ಈ ಜೋಡಿ ಕವನಗಳಲ್ಲಿ ಮೊದಲನೆಯದು ‘ಹೂವಲ್ಲೂ ಹೆಣ್ಣು ಗಂಡಿದೆ, ಗೊತ್ತಾ?’ ಈ ವಿಸ್ಮಯವನ್ನು ಬಿಟ್ಟಗಣ್ಣಿಂದ ನೋಡುತ್ತಾ, ನಮ್ಮ ಅರ್ಧನಾರೀಶ್ವರನಂತೆ ಒಂದೆ ಹೂವಿನೊಳಗೆ ಗಂಡು ಭಾಗ ಮತ್ತು ಹೆಣ್ಣು ಭಾಗ ಎರಡೂ ಇರುವ ವಿಚಿತ್ರವನ್ನು ಎತ್ತಿ ತೋರಿಸುತ್ತದೆ. ತಂತಾನೆ ಪರಾಗ ಸ್ಪರ್ಶ ಮಾಡಿಕೊಂಡು , ತಾನೆ ಸಂತತಿಯ ಸೃಷ್ಟಿಸುವ ಹರಿಕಾರನಾಗುವ ಹೂವಿಗೆ ಮತ್ತೊಂದು ಲಿಂಗವನ್ಹುಡುಕುವ ಪ್ರಮೇಯವೆ ಇಲ್ಲದೆ ಎಲ್ಲಾ ಕೂತಲ್ಲೆ ನಡೆಯುವ ಸರಾಗ ಬಂಧ, ಮತ್ತದರ ವರ್ಣನೆ ಈ ಪದ್ಯ.

ಎರಡನೆ ಕವನ ‘ಹೂವೊಳಗಿನ ಪುಲ್ಲಿಂಗ, ಸ್ತ್ರೀಲಿಂಗ’ ಇರುವ ವೈಚಿತ್ರದ ಕುರಿತೆ ಚಿತ್ರಿಸಿದರೂ, ಇಲ್ಲಿ ಒಂದೆ ಮರದಲಿರುವ ಪುಲ್ಲಿಂಗ, ಸ್ತ್ರೀಲಿಂಗಗದ ಹೂಗಳು, ಒಂದೆ ಕೊಂಬೆಯಲ್ಲಿರುವ ಸಜಾತಿಯ ಯಾ ವಿಜಾತಿಯ ಗುಂಪುಗಳು ಅಥವಾ ಒಂದೆ ಬಳ್ಳಿಯಲ್ಲಿರುವ ಗಂಡು ಮತ್ತು ಹೆಣ್ಣು ಹೂಗಳ ಚಿತ್ರಣ; ಆದರೆ ಒಂದೆ ಹೂವಿನೊಳಗಿರುವ ಅರ್ಧನಾರೀಶ್ವರ ಹೂ ಮಾತ್ರ ಈ ಗುಂಪಲಿ ಬೆರೆಯುವುದಿಲ್ಲ. ಅದು ಮೊದಲ ಪದ್ಯದಲ್ಲಿ ಮಾತ್ರ ನಿರೂಪಿತ.

ಹೂವಲ್ಲೂ ಹೆಣ್ಣು ಗಂಡಿದೆ ಗೊತ್ತ?
____________________________


ಅಕ್ಕ ನಿನಗೊಂದು ವಿಷಯ ಗೊತ್ತ
ಹೂವಲ್ಲೂ ಗಂಡು ಹೆಣ್ಣಿರುವ ಸತ್ಯ ?
ಒಂದೆ ಗಿಡದಲ್ಲೆ ಎರಡಿರುವ ದೃಶ್ಯ..
ಒಂದೆ ಹೂವಲ್ಲೆ ಇಬ್ಬರಿರೊ ಲಾಸ್ಯ ?||

ಅಚ್ಚರಿ ಪೆಚ್ಚು ಕುರಿ ಏಕೇಳು ಕಣ್ಣುರಿ ?
ಸೃಷ್ಟಿ ವೈಚಿತ್ರ ಎಷ್ಟೊ ಜಾಣ ಮರಿ
ಹೂವೆಂದರೆ ಹೆಣ್ಣೆನ್ನೆ ಅದರ ತಪ್ಪಲ್ಲ
ಗಂಡುವ್ವ ಗಮನಿಸದ ಬೆಪ್ಪೆ ನಾವೆಲ್ಲ ||

ಹೆಣ್ಣ ರೂಪವನಕ್ಕ ಹೂವಾಗಿಸಿ ನಕ್ಕ
ಕವಿ ಸಾರ್ವಭೌಮನೇನಲ್ಲ ಸರಿ ಪಕ್ಕ
ಗಂಡ್ಹೂವ್ವ ನೋಡಿದ ಕವಿಯತ್ರಿ ದಕ್ಕ
ಕವಿಯ ನಡುವೆ ಕವಿಯತ್ರಿಗೆ ಚೊಕ್ಕ ||

ಅರ್ಧನಾರಿಶ್ವರನಕ್ಕ ಹಂಚಿ ತನು ತಕ್ಕ
ನಡೆಸಿ ಸುಖ ಸಂಸಾರ ಸಂತತಿ ದಕ್ಕ
ಸಂಯೋಗ ಪರಾಗ ಸ್ವಕೀಯ ಸ್ಪರ್ಶ
ತನ್ನೊಡಲಲೆ ತನ್ನ ರೇಣು ಗರ್ಭ ಹರ್ಷ ||

ಪ್ರೀತಿ ಅಪರಿಮಿತವೆನ್ನಿ ಅಸಂಕರವೆನ್ನಿ
ತನ್ನ ಪಾಡಿಗೆ ತಾನೆ ವಂಶೋತ್ಪತ್ತಿ ದನಿ
ಒಂದಾಗಿ ಬೆರೆತ ಜೀವಗಳುದಾಹರಣೆ
ಬೇರೆಲ್ಲಿ ಸಿಕ್ಕೀತು ಗಂಢಭೇರುಂಡ ಕಣೆ ||

——————————————————————
ನಾಗೇಶ ಮೈಸೂರು
——————————————————————

ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ
_______________________________


ಅಕ್ಕ ಈ ಗಿಡ ಬರಿ ಗಂಡು, ಬರಿ ಹೆಣ್ಣು
ಆದರು ನೋಡ್ಹೇಗೆ ಒಂದೆ ಬಳ್ಳಿ ಗಿಣ್ಣು
ಒಂದೆ ತಾಯ್ಬಳ್ಳಿ ತಾಳಿ ಕಟ್ಟಿದ ಬಂಧ
ಇದು ಕೂಡ ಸ್ವಕೀಯ-ಸ್ಪರ್ಶ ಸಂಬಂಧ ||

ಇಲ್ಲು ಮರೆತುಬಿಡಕ್ಕ ಸಹಜಾತ ಸಖ್ಯ
ವಂಶ ಪರಂಪರೆ ಮುಂದುವರಿಕೆ ಮುಖ್ಯ
ಗಾಳಿ ಚಿಟ್ಟೆ ದುಂಬಿ ಪತಂಗ ಸಂವಾಹಕ
ಜೋಡಿಸಿಟ್ಟಿಹನ್ಹೀಗೆ ಜಗಕೆ ನಿರ್ಮಾಪಕ ||

ಅಲ್ನೋಡು ನಮ್ಮಂತೆ ಬೇರೆ ಗಿಡದ್ಹೂವು
ಗಂಡಲ್ಲಿ ಹೆಣ್ಣಲ್ಲಿ ಚೆಲ್ಲಾಡೀ ಚದುರಿದವು
ಗಾಳಿ ನೀರಿಂದ್ಹಿಡಿದು ಚಿಟ್ಟೆ ಜುಟ್ಟಾಡಿಸಿ
ಬೆಳೆಸೆ ವಂಶವಾಹಿ ವೈವಿಧ್ಯ ಚೌಕಾಸಿ ||

ಅಕ್ಕ ವಿಚಿತ್ರ ನೋಡು ಸಂತತಿ ಕಾವು
ಈ ಗಿಡದ ತುಂಬೇಕೆ ಬರಿ ಗಂಡು ಹೂವು
ಅಲ್ಲೊಂದಿಲ್ಲೊಂದರಂತೆ ಅರಳಿದ ಹೆಣ್ಣು
ಮಿಕ್ಕೆಲ್ಲ ಕೊಂಬೆ ಗೊಂಚಲು ಗಂಡ ಕಣ್ಣು ||

ಕೆಲ ಎಲೆಗಳೇ ಹೂವಾಗುವ ವಿಸ್ಮ್ಮಯ
ಬಣ್ಣಗಳೆ ಬದುಕಾಗುವ ಜೀವನ ಮಾಯ
ಹೆಣ್ಣು ಹೂವಷ್ಟೆ ಸಂತಾನ ಭಾಗ್ಯ ನಿಸರ್ಗ
ಮತ್ತೆಲ್ಲಾಕರ್ಷಣೆ ಹಿಡಿದಿಡಿಸೆ ಸಂಸರ್ಗ ||

——————————————————————
ನಾಗೇಶ ಮೈಸೂರು
——————————————————————

00710. ಫ್ರೈಡೆ ದ ಥರ್ಟೀನ್ !


00710. ಫ್ರೈಡೆ ದ ಥರ್ಟೀನ್ !
________________________

ಶುಕ್ರವಾರ ಮತ್ತು ಹದಿಮೂರನೆ ತಾರೀಕು ಜತೆಯಾಗಿ ಬಂದರೆ ಅಶುಭವೆನ್ನುವ ನಂಬಿಕೆ ಪಾಶ್ಚಾತ್ಯರಲ್ಲಿದೆ. ಜತೆಗೆ ಹದಿಮೂರು ಒಂದು ರೀತಿಯ ಅಶುಭ ಸಂಖ್ಯೆ ಸಹ. ಹೀಗಾಗಿ ದೊಡ್ಡ ಕಟ್ಟಡಗಳಲ್ಲಿ ಹದಿಮೂರನೆ ಅಂತಸ್ತೆ ಕಾಣೆಯಾಗಿ ಹನ್ನೆರಡರ ನಂತರ ಹದಿನಾಲ್ಕಕ್ಕೆ ನೆಗೆದುಬಿಡುತ್ತದೆ! ಹದಿಮೂರು ಭೌತಿಕವಾಗಿದ್ದರು ಹದಿನಾಲ್ಕರ ನಾಮಧೇಯ ಅಲಂಕರಿಸಿ ಪಾಪಮುಕ್ತವಾಗಿಬಿಡುತ್ತದೆ. ಇನ್ನು ಕೆಲವೆಡೆ ಆ ಅಂತಸ್ತು ಯಾವುದೊ ಕಮ್ಮಿ ಪ್ರಾಮುಖ್ಯತೆಯ ಕೆಲಸಕ್ಕೆ ಬಳಕೆಯಾಗಿ ಯಾರೂ ವಾಸಿಸದ ಅಂತಸ್ತಾಗಿಬಿಡುತ್ತದೆ. ಅದೆಲ್ಲದರ ಕೆಲವು ತುಣು’ಕಾಟ’ಗಳ ಲಹರಿ ಈ ಕೆಳಗೆ 😊😜


(೦೧)
ಥರ್ಟೀನ್ತ್ ಫ್ರೈಡೆ
ಪಾಶ್ಚಾತ್ಯರ ಪಾಲಿಗೆ
– ಗುಡ್ಡದ ಭೂತ.

(೦೨)
ವಿಚಿತ್ರ ನಂಬೆ
ಶುಕ್ರವಾರ ಹದ್ಮೂರು
– ತಿಕ್ಕಲು ಮನ.

(೦೩)
ಎಲಿವೇಟರು
ಗುಂಡಿ ಒತ್ತುವ ಹೊತ್ತು
– ಹದಿಮೂರಿಲ್ಲ!

(೦೪)
ಚೈನಾದಲ್ಯಾಕೊ
ಹದಿಮೂರರ ಜತೆ
– ನಾಲ್ಕು ನಾಪತ್ತೆ..!

(೦೫)
ಮುಚ್ಚೆ ಸುಲಭ
ಹನ್ನೆರಡಾದ ಮೇಲೆ
– ಬರಿ ಹದ್ನಾಲ್ಕು 😜

(೦೬)
ಮನೆ ನಂಬರು
ಹದಿಮೂರನೆ ಪ್ಲೋರು
– ಯಾಕೆ ಬೇಕಿತ್ತು ?😛

(೦೭)
ಭೀತಿಯೇ ಇಲ್ಲ
ಅಷ್ಟು ಮಹಡಿ ಮನೆ
– ನಾವು ಕಟ್ಟೊಲ್ಲ 😎

(೦೮)
ನಂಬದಿದ್ದರೂ
ಅಂಜಿ ಒಳಗೊಳಗೆ
– ಹುಷಾರಿನಲಿ 😟

(೦೯)
ಮೂಗಿಗೆ ತುಪ್ಪ
ನಂಬರು ಬದಲಿಸಿ
– ಫ್ಲಾಟು ಮಾರಾಟ !

(೧೦)
ಮೂಡನಂಬಿಕೆ
ಅಲ್ಲಗಳೆಯುತಲೇ
– ಮನದೆ ಭೀತಿ.

– ನಾಗೇಶ ಮೈಸೂರು.

(Picture from : https://en.m.wikipedia.org/wiki/File:Freitag_der_13._im_Kalender.jpg)

00709. ಕೇಜ್ರಿ, ಸರ್ಟಿಫಿಕೇಟು ಇತ್ಯಾದಿ..


00709. ಕೇಜ್ರಿ, ಸರ್ಟಿಫಿಕೇಟು ಇತ್ಯಾದಿ..
____________________________________

ಕೇಜ್ರಿವಾಲ ಕಿಲಾಡಿ, ಬರಿ ಮಾಡಿಹನೆಲ್ಲರನು ಅನಾಡಿ
ಡಿಗ್ರಿ ಸರ್ಟಿಫಿಕೇಟು ನೆಪದೆ, ಎಸೆಯುತಾ ಮಂಕುಬೂದಿ
ಮುಳುಗೊ ಕಾಂಗ್ರೆಸ್ ಹಡಗು, ಚಾಣಾಕ್ಷ್ಯ ರಾಜನೀತಿ ಸೃಜಿಸಿ
ಮಾಡಿಹ ತನ್ಹೆಸರ ಪರ್ಯಾಯ, ಕುಂಟುನೆಪದೆ ವಿಜೃಂಭಿಸಿ ! ||

ಕುರಿಗಳಾಗದಿರಿ ಸುಮ್ಮನೆ, ಸೋಶಿಯಲ್ ಮೀಡಿಯಾ ಪಡೆ
ಬರೆದಷ್ಟೂ ಕೀರ್ತಿ ಅವಗೆ, ನೀವ್ಹಿಡಿಯುವಿರಿ ಮೂರ್ಖರ ಜಾಡೆ
ಬರೆಯದೆ ಸುಮ್ಮನಿರೆ ಸಾಕು, ಮೈ ಪರಚಿಕೊಳುವ ಕೆರಳಿ
ಅರಚರಚಿ ಸುಸ್ತಾಗಿ ಕೊನೆಗೆ, ತನ್ನ ಬಾಲ ಮುದುರುವ ನರಳಿ ! ||

– ನಾಗೇಶ ಮೈಸೂರು

00708. ತುಣು’ಕಾಟ’ಗಳ ತಿಣುಕಾಟ..


00708. ತುಣು’ಕಾಟ’ಗಳ ತಿಣುಕಾಟ..
__________________________


(೦೧)
ತಿಥಿ ಅತಿಥಿ
ತಿಂದಾಗಷ್ಟೆ ಸದ್ಗತಿ
– ಕರ್ಮದ ಭೀತಿ.

(೦೨)
ಧಾರಾಳ ಮನ
ಖರ್ಚು ಮಾಡೇ ಸಮೃದ್ಧ
– ಆರ್ಥಿಕ ಬಿಡ.

(೦೩)
ಕನಸು ಕಾಣೆ
ಕಾಸಿಲ್ಲ ಸಂಭ್ರಮಿಸೆ
– ನನಸು ಜಾಣೆ.

(೦೪)
ಕನಸು ಕಟ್ಟಿ
ಏಣಿಯ ಹಾಕಿ ನಡೆ
– ನನಸು ಗಟ್ಟಿ.

(೦೫)
ಮನ ಬಗ್ಗಡ
ಕಾಣಿಸದಲ್ಲ ಸದ್ಯ
– ಕೊಳಕು ನಾಗ.

(೦೬)
ಜಾಣೆ ಸುಂದರಿ
ಅರಸಿತು ಮನ ಭ್ರಮೆ
– ಬರಿ ದಿಗ್ಬ್ರಮೆ.

(೦೭)
ಪರಿಪೂರ್ಣತೆ
ಯಾರಲ್ಲಿಲ್ಲದ ಸ್ವತ್ತು
– ಹುಡುಕೊ ವ್ಯರ್ಥ.

(೦೮)
ಅರ್ಥ ಮಾಡಿಕೊ
ದೌರ್ಬಲ್ಯ ಸಹಜತೆ
– ಒಪ್ಪಿ ಅಪ್ಪಿಕೊ.

(೦೯)
ಸ್ನೇಹ ಪ್ರೀತಿಯ
ಗೆರೆ ದಾಟಲು ಅಡ್ಡಿ
– ನೀತಿ ಸಂಹಿತೆ.

(೧೦)
ಬರೀ ಷರತ್ತು
ಪ್ರೀತಿ ಪ್ರೇಮದ ವಸ್ತು
– ಯುಗದ ಮಾತು.

– ನಾಗೇಶ ಮೈಸೂರು

(Picture source: http://www.activityvillage.co.uk/autumn-collage)

ಒಂದಿಷ್ಟು ಹಾಯ್ಕುಗಳು ಇಂದಿನ ಸುರಗಿಯಲ್ಲಿ ಪ್ರಕಟಿತ (೧೨.೦೫.೨೦೧೬)


ಒಂದಿಷ್ಟು ಹಾಯ್ಕುಗಳು ಇಂದಿನ ಸುರಗಿಯಲ್ಲಿ ಪ್ರಕಟಿತ (೧೨.೦೫.೨೦೧೬)

http://surahonne.com/?p=11558

00707. ತುಣು’ಕಾಟ’ಗಳು…


00707. ತುಣು’ಕಾಟ’ಗಳು…
_______________________

(೦೧)
ಕೇಳದೆ ಕೊಟ್ಟು
ಕೇವಲವಾಗೊ ದುಃಖ
– ತಡೆದು ಹಿತ.

(೦೨)
ದೂರವಿರಿಸಿ
ದೂರವಾಗೆ ದೂಷಿಸೆ
– ಶೋಷಿತ ಮನ.

(೦೩)
ಸಂವಹಿಸದೆ
ಮೌನ ಧರಿಸೊ ಪಾತ್ರ
– ಕಲ್ಪನೆ ಕೊಳ್ಳೆ.

(೦೪)
ಮುನವೇ ಸುಳ್ಳು
ಮಾತಿರದ ಗಳಿಗೆ
– ಕಾಲ ಸತ್ತಾಗ.

(೦೫)
ಯೋಚಿಸುತಲೆ
ಊಹಿಸೊ ತಲೆ ಒಲೆ
– ಪ್ರಮಾದಕರ.

(೦೬)
ನಡೆವ ಮುನ್ನ
ನಡೆಯಬಹುದೇನು
– ಚಿಂತಿಸೇ ಸುಸ್ತು.

(೦೭)
ಮನ ವಾಗ್ಯುದ್ಧ
ವಾದ ಪ್ರತಿವಾದಕೆ
– ಅದೇ ಫಲಿತ.

(೦೮)
ಜಗಳ ನೆಪ
ನೂರೆಂಟು ಒಳಗುದಿ
– ಕಕ್ಕಿಸಿ ವಿಷ.

(೦೯)
ದೂರವಿಟ್ಟಳು
ದೂರಾಗಳು ಮನದೆ
– ನಿಶ್ಚಲ ಚಿತ್ರ.

(೧೦)
ತುಚ್ಛಿಕರಿಸಿ
ಕಡೆಗಣಿಸಿದರು
– ಶುಭ ಹಾರೈಕೆ.

– ನಾಗೇಶ ಮೈಸೂರು

00706. ಮಂಕುತಿಮ್ಮನ ಕಗ್ಗ – ಟಿಪ್ಪಣಿ ೦೦೭ ( readoo Kannada on 12.05.2016)


00706. ಮಂಕುತಿಮ್ಮನ ಕಗ್ಗ – ಟಿಪ್ಪಣಿ ೦೦೭ ( readoo Kannada on 12.05.2016)

ಕಗ್ಗಕೊಂದು-ಹಗ್ಗ-ಹೊಸೆದು-4

ಕಗ್ಗಕೊಂದು ಹಗ್ಗ ಹೊಸೆದು…

00705. ಕಥಾಲೋಕ, ಚರಿತ್ರೆಯ ಪುಟ…


00705. ಕಥಾಲೋಕ, ಚರಿತ್ರೆಯ ಪುಟ…
___________________________


(೦೧)
ಅದ್ಬುತ ಗೊತ್ತ !
ಅಲ್ಲಾವುದ್ದೀನ್ ದೀಪ
– ಹುಡುಕಿದ್ದೇನೆ.

(೦೨)
ಏಳು ಸಮುದ್ರ
ದಾಟಿ ಬಂದರು ಇಲ್ಲ
– ರಾಜಕುಮಾರಿ.

(೦೩)
ಕುದುರೆ ಏರಿ
ಕನಸಿಗೆ ಹೊಕ್ಕರು
– ನಂಬದ ಮನ.

(೦೪)
ಆಣೆ ಪ್ರಮಾಣ
ಮಾಡದ ಜಾಣತನ
– ಪ್ರಾಮಾಣಿಕತೆ.

(೦೫)
ಈಗಿಲ್ಲ ಪ್ರಶ್ನೆ
ಪ್ರೇಮಕ್ಕೂ ಪರ್ಮಿಟ್ಟೇನು?
– ಇಲ್ಲ ಲಿಮಿಟ್ಟು.

(೦೬)
ಅಂತಃಪುರದ
ಹೆಣ್ಣು ಮನ ಅತ್ತರು
– ವಾಸನೆಯಿಲ್ಲ.

(೦೭)
ದಂಡಿನ ಧಾಳಿ
ಗೆದ್ದಾ ಸಂಪತ್ತಿನಲಿ
– ಜನಾನ ಭರ್ತಿ.

(೦೮)
ಕಲಿಗಳವರು
ಕಲಿತ ವಿದ್ಯೆ ತೋರೆ
– ಮರೆತ ಮನೆ.

(೦೯)
ಶಹಜಾದೆಯ
ದಿನಕ್ಕೊಂದು ಕಥೆಗೆ
– ನಾ ಜಹಪಾನ.

(೧೦)
ನೀತಿ ಹೇಳುವ
ಈಸೋಪನ ಕಥೆಗೆ
– ಒಗ್ಗದ ಬಾಳು.

– ನಾಗೇಶ ಮೈಸೂರು

(Picture source: https://en.m.wikipedia.org/wiki/File:Prince_Salim_(the_future_Jahangir)_and_his_legendary_illicit_love.jpg)

00704. ನೋವು ನಲಿವು….


00704. ನೋವು ನಲಿವು….
______________________


(೦೧)
ಜೀವನದೂಟ
ಬಡಿಸೆ ಬರಿ ನೋವು
– ನಂಚಿಕೊ ನಗು.

(೦೨)
ನೋವು ನಲಿವು
ಕಿಲಾಡಿ ನಿಯಾಮಕ
– ಮರೆಯ ಬಿಡ.

(೦೩)
ಗಟ್ಟಿ ಹೃದಯ
ಎದುರಿಸಿದ್ದು ಕಷ್ಟ
– ನೀರು ಕಣ್ಣಲ್ಲಿ.

(೦೪)
ಸರಿಸಮಾನ
ಶ್ರೀಮಂತನು ಬಡವ
– ನೋವು ನಲಿವು.

(೦೫)
ಹಮ್ಮು ಮುರಿವ
ಹಣದ ಮದ ಸೊಲ್ಲು
– ಗೆಲ್ಲದು ಜಡ್ಡ.

(೦೬)
ಕಷ್ಟ ಕೋಟಲೆ
ಅನುಭವಿಸೆ ಶಕ್ಯ
– ನೆನೆಯೆ ದುಃಖ.

(೦೭)
ಯಾರಿಗೆ ಯಾರೊ
ಆಗುವ ಸಮಯವೆ
– ಬಾಳ ವಿಸ್ಮಯ.

(೦೮)
ಹೊಡೆದಾಡುತ
ಬಿದ್ದು ಹೋಗುವ ಮುನ್ನ
– ಸಹಾಯ ಹಸ್ತ.

(೦೯)
ಪರರ ಕಷ್ಟ
ಅರಿತಾಗಷ್ಟೆ ಅರ್ಥ
– ಎಷ್ಟು ನಗಣ್ಯ.

(೧೦)
ಕುಗ್ಗಿಸಿ ಬಿಡು
ಸ್ಪ್ರಿಂಗಿನಂತೆ ಪುಟಿದು
– ಸೆಟೆದು ನಿಲ್ಲೆ.

– ನಾಗೇಶ ಮೈಸೂರು

(picture source: http://www.123rf.com/photo_15387483_simple-man-joy-and-sorrow.html)

ನೀನೋದಿದ ವಿದ್ಯೆಗೆಲ್ಲಿಡುವೆ ನೈವೇದ್ಯ?


ಈ ದಿನದ ನಿಲುಮೆಯಲ್ಲಿ (೧೧.೦೫.೨೦೧೬) ….

ನಿಲುಮೆ

– ನಾಗೇಶ ಮೈಸೂರು
EDUCATIONಹೀಗೆ ಯೋಚಿಸುತ್ತ ಕುಳಿತಿದ್ದೆ ಪಾರ್ಕಿನ ಬೆಂಚೊಂದರ ಮೇಲೆ. ಶನಿವಾರ, ಭಾನುವಾರಗಳ ಒಂದೂವರೆ ತಾಸಿನ ನಡೆದಾಟ ಮುಗಿಸಿ, ಹಿಂದಿರುಗುವ ಮುನ್ನ ಅಲ್ಲೊಂದರ್ಧ ಗಂಟೆ ಕೂತು ವಿಶ್ರಮಿಸಿ ಹೊರಡುವುದು ರೂಢಿ. ಹಾಗೆ ಕೂತ ಗಳಿಗೆ, ಮನಸಿಗಷ್ಟು ಹುರುಪೆದ್ದರೆ ಒಂದು ಕವನವೊ, ಚುಟುಕವೊ ಗೀಚುವುದುಂಟು. ಇಲ್ಲವಾದರೆ, ಕಿವಿಗುಟ್ಟುವ ಹಾಡಿನ ಜತೆ ಗುನುಗುತ್ತ ಯಾವುದೋ ಆಲೋಚನೆಯಲ್ಲಿ ಕಳುವಾಗುವುದು ಉಂಟು. ಪ್ರತಿಬಾರಿಯೂ ಇದೇ ಪದೇ ಪದೇ ಪುನರಾವರ್ತನೆಯಾದರೂ ಇನ್ನು ಬೋರೆನಿಸುವ ಮಟ್ಟಕ್ಕೆ ತಲುಪದ ಕಾರಣ, ಇದನ್ನು ಮನಸಿಗೆ ಹಿತವಾದ ಪ್ರಕ್ರಿಯೆಯೆಂದೇ ಅಂದುಕೊಂಡೇನೋ, ಒಂದೆರಡು ವರ್ಷಗಳಿಂದ ಇದು ಹಾಗೆ ಮುಂದುವರೆದಿದೆ.

View original post 684 more words

00703. ಬರೆಸು, ನೋವಲು ನಗೆಯಾ..


00703. ಬರೆಸು, ನೋವಲು ನಗೆಯಾ..
_____________________________


ಕಿತ್ತು ತಿನ್ನುವ ನೋವು
ಅಣಕ ವ್ಯಂಗ್ಯ ವೇದನೆ
ಬೇಕೇಕಾದರು ಬದುಕು ?
ಎಂದನಿಸಿದ ಹೊತ್ತಲು –
ಬರೆದೆ, ಬಿದ್ದು ಬಿದ್ದು ನಗುತ..

ಕಾಡಿತ್ತೇನೊ ನಿರಂತರ
ಬಿಟ್ಟಿದ್ದಾದರು ಯಾರನು ?
ಎಲ್ಲರ ದೋಸೆ ತೂತೆಂದು
ಮುನ್ನಡೆಸಿದಾಗದೇನೊ ಶಕ್ತಿ –
ಬರೆದಿದ್ದೆ, ಎದ್ದು ಬಿದ್ದು ನಗುತ..

ಮುರಿದು ಬಿದ್ದಾ ಕಾಲಿಗೆ
ಪಟ್ಟಿ ಹಚ್ಚುತ್ತಾ ಪಟ್ಟಿಗೆ ಪಟ್ಟಲಿ
ಉಳಿ ಪೆಟ್ಟು ಬಿದ್ದಾಗೆಲ್ಲ ನೋವಿಗೆ
ಅತ್ತು ಚೀರಿದ ಗಳಿಗೆ ಕೂಡ –
ಬರೆದಿದ್ದು, ನಗುವಿನ ಹೂರಣ..

ನೋವಿಂದಲೆ ನಗೆಯೆಂದ
ಬೆಂಕಿಯಿದ್ದೆಡೆ ಹೊಗೆಯೆಂದ
ಗಾದೆ ವೇದಗಳಲೆಲ್ಲ ಅರಸಿಯು
ಸಿಕ್ಕದ ಮುಲಾಮಿನಲು –
ಬರೆದೆ , ಮರೆಮಾಚುತ ಅಳದೆ..

ಇಂದೇಕೊ ಪ್ರಭು ನೀ ಕ್ರೂರ ?
ಯಾಕಳಿಸುವೆ ಆಗಿಸಿ ಎದೆ ಭಾರ ?
ಮಾಡದಿರಯ್ಯ ದುರ್ಬಲ ಹೃದಯ
ಕುಗ್ಗಿಸದಿರಿಂದು ಎದೆಯ –
ಬರಿಸು, ಬರೆಸು ನೋವಲು ಬರಿ ನಗೆಯ..

– ನಾಗೇಶ ಮೈಸೂರು

00702. ಪ್ರಾಜೆಕ್ಟು ಮುಕ್ತಾಯ


00702. ಪ್ರಾಜೆಕ್ಟು ಮುಕ್ತಾಯ…
________________________

ಐಟಿ ಜಗತ್ತಿಗೂ ಪ್ರಾಜೆಕ್ಟುಗಳಿಗು ಅವಿನಾಭಾವ ಸಂಬಂಧ. ಅದರಲ್ಲಿ ತೊಡಗಿಸಿಕೊಂಡವರಿಗೆಲ್ಲ ಪ್ರಾಜೆಕ್ಟಿನ ವಿಶ್ವರೂಪದ ವಿವಿಧ ಮುಖಗಳು ಪರಿಚಿತವೇ. ತಿಂಗಳು, ವರ್ಷಾನುಗಟ್ಟಲೆ ನಡೆಯುವ ಪ್ರಾಜೆಕ್ಟುಗಳ ಜೀವನ ಶೈಲಿಯಿಂದಾಗಿ ಅಲ್ಲಿ ಕೆಲಸ ಮಾಡುವವರಲ್ಲಿ ಹೆಚ್ಚಿನ ಒಡನಾಟವುಂಟಾಗಿ ಎಷ್ಟೊ ಸಖ್ಯ, ಗೆಳೆತನಗಳು ಬೆಳೆಯುವ ಹಾಗೆಯೇ ಮತ್ಸರ, ವಿರಸ, ದ್ವೇಷಗಳ ಕೊಸರು ಉಳಿಸಿಹೋಗುವುದೂ ಉಂಟು. ಒಳ್ಳೆಯದೋ, ಕೆಟ್ಟದ್ದೊ – ಅದೇನೆ ಇದ್ದರು ಪ್ರಾಜೆಕ್ಟಿಗಿರುವ ನಿಶ್ಚಿತ ಆರಂಭ, ಮುಕ್ತಾಯದ ಗುಣದಿಂದಾಗಿ ಒಂದಲ್ಲ ಒಂದು ದಿನ ಪ್ರಾಜೆಕ್ಟಿನ ಅಂತ್ಯ ಸಮೀಪಿಸಿ, ಎಲ್ಲಕ್ಕೂ ಮುಕ್ತಾಯ ಗೀತೆ ಹಾಡಲೆಬೇಕಾದ ಅನಿವಾರ್ಯ ಉಂಟಾಗುತ್ತದೆ – ಎಲ್ಲಾ ಭಾವೋನ್ಮೇಷಕ್ಕು ಲಾಲಿ ಹಾಡಿ ಮಲಗಿಸುವ ಹಾಗೆ. ೨೦೧೨ರಲ್ಲಿ ಅಂತದ್ದೊಂದು ಪ್ರಾಜೆಕ್ಟಿನ ಮುಕ್ತಾಯ ಹಾಡುವಾಗ ಕೊರೆದ ಸಾಲುಗಳಿವು. ಐಟಿ ಜಗದಲ್ಲಿ ಪ್ರಾಜೆಕ್ಟುಗಳ ಜಗದಲ್ಲಿ ಹೆಣಗಿದವರಿಗೆ ತುಸು ಪರಿಚಿತವೆನಿಸಬಹುದಾದ ಚಿತ್ರಣ..😊


ಪ್ರಾಜೆಕ್ಟು ಮುಕ್ತಾಯ
_____________

(೦೧)

ಪ್ರಾಜೆಕ್ಟು ಮುಗಿವಾ ಸಂಕಟ
ಕಟ್ಟಿದ ತಂಡ ಅಕಟಕಟ
ಎಷ್ಟು ದಿಟ ಸಂಕಟ ಕಾಟ
ಬಿಚ್ಚಬೇಕೆಂದರೆ ಆಗದೆ ಮಾಟ ||

ಶುರುವಿನಲ್ಲಿ ಅಪರಿಚಿತ ಮುಖ
ಆದಂತೆ ಮೀಟಿಂಗು ಸಖ
ಹೋದಂತೆ ಪ್ರಾಜೆಕ್ಟ್ಪೇಸು
ಆಗುವರಾತ್ಮೀಯ ಸುಖ ದುಃಖ ||

ಟೀಮೆಂದರೇನು ಟೀಮು ರಖಮು
ನೂಡಲ್ಲಿನ್ಹಾಗೆ ಕ್ಹೋರಮ್ಮು
ಬ್ರೆಡ್ಡಿಗೆ ಬಿದ್ದಂತೆ ಜ್ಯಾಮು
ಇಡ್ಲಿ ವಡೆ ಸಾಂಬಾರಿಗೂ ಟೈಮು ||

ಎಲ್ಲರು ಹರಿದಂಚಿದ ಪ್ರಪಂಚ
ಜಗದೆಲ್ಲ ಮೂಲೆಗು ಮಂಚ
ಮೂತಿ ನೋಡದ ಸರಪಂಚ
ಫೋನು ಕಂಪ್ಯುಟರ ಮಾತಿಂಚ ||

ಕೆಲಸವೆಲ್ಲ ಹರಿದ್ಹಂಚಿದ ಪಾಲು
ಎಲ್ಲರಿಗು ಅವರದೆ ರೋಲು
ಸಣ್ಣ ಮರಿ ತಂಡವೆ ಕೂಲು
ಕನ್ಸಲ್ಟೆಂಟುಗಳು ಜತೆಗೆ ಸಾಲು ||

(೦೨)

ಕಮ್ಯುನಿಕೆಷನ್ನೆ ನಿಜದೊಳಗುಟ್ಟು
ಅದಕಷ್ಟು ಸ್ಟೇಟಸ್ಸು ಕಟ್ಟು
ಮಾಹಿತಿ ಹಂಚುತ ಗಿಟ್ಟು
ತಕರಾರು ಮೊದಲೆ ಒಳಗಟ್ಟು ||

ಹೀಗೆಲ್ಲ ಕೂಡಿ ಕೊಳೆಕಸ ಗುಡಿಸಿ
ಲಂಚು ಡಿನ್ನರುಗಳ ಸುತ್ತಾಡಿಸಿ
ಉಂಡು ತಿಂದಾಡಿ ನಲಿಯಿಸಿ
ಹತ್ತಿರವಾದ ಟೀಮೆ ಪರಮಾಯಿಷಿ ||

ಪ್ರಾಜೆಕ್ಟು ಕೆಲಸ ಕರಿ ಮರ ತರಹ
ಕಡು ಕಷ್ಟಕರ ದಿನದ ಬರಹ
ಒಗ್ಗಟ್ಟಲಿ ಮಾಡಿದರೆ ತರಹ
ಸುಖವಾಗಿ ಮುಗಿವ ಹಣೆಬರಹ ||

ಐ ಟೆಸ್ಟುಗಳ ಅಗ್ನಿಪರೀಕ್ಷೆ ಮುಗಿಸಿ
ಕಟ್ಟೋವರುಗಳತ್ತ ಸರಿಸಿ
ಮಾಡಿ ದತ್ತದ ವಲಸೆ ಬಿಸಿ
ಗೋಲೈವಾದರೆ ಸಿಗುವ ಸದ್ಗತಿ ||

ಮುಂದಿನ್ನು ನಿಜದ ಪರೀಕ್ಷೆಯ ಕ್ಲೇಷೆ
ಸ್ಟೆಬಿಲೈಸೆಷನ್ನು ಪೇಸೆ ಜಯಿಸೆ
ಮುಗಿಸಲಣಿಯಾಗುವ ಕೂಸೇ
ಬೇಗ ಬೇಗ ಎಲ್ಲವನು ಮುಗಿಮುಗಿಸೆ ||

(೦೩)

ಅಲ್ಲಿಗೆ ಬಿದ್ದು ಕೊನೆ ಪರದೆಯಂಕ
ಕಲಿತ ಪಾಠಗಳ ಸೇವಾಂಕ
ಸರಿ ತಪ್ಪು ವಿಮರ್ಶೆಗಳ ಲೆಕ್ಕ
ಸೈನಾಫು ಪ್ರಾಜೆಕ್ಟು ಮುಕ್ತಾಯ ಪಕ್ಕಾ ||

ಅಲ್ಲಿಗೆ ತಂಡದ್ಹಣೆಬರಹ ನಿರ್ಧಾರ
ಬಿಚ್ಚಬೇಕು ಕಟ್ಟಿದವರವರ
ಹಿಂತಿರುಗಿ ಬಂದಾ ಸ್ಥಾವರ
ಕೆಲವರು ಮನೆ ಬಿಟ್ಟೆ ಹೋಗುವರ ! ||

ಆ ಗಳಿಗೆ ಗಟ್ಟಿ ತಂಡದ ಭಲೆ ಒಗಟು
ಎಲ್ಲರೊಂದೆ ಕುಟುಂಬದ ಕಟ್ಟು
ಮುರಿಯಲಾಗದ ಭಾವ ಬಂಧ
ತಂಡ ಮುರಿಯಲೆಲ್ಲರಿಗೂ ನಿರ್ಬಂಧ ||

ಆದರು ವಿಧಿಯಿಲ್ಲದ ಪ್ರಾಜೆಕ್ಟು ಯಾತ್ರೆ
ಮುರಿಯಲೇಬೇಕು ಜನ ಜಾತ್ರೆ
ಮತ್ತೆ ಅರಸುತ ಹೊಸ ಜಾಗ
ಓಡಿದರೆ ಮರಳಿ ಹೊಸ ಜನ ಜಗ ಲಾಗ ||

———————————————————-
ನಾಗೇಶ ಮೈಸೂರು
———————————————————-

(Picture source: http://free-management-ebooks.bmobilized.com/)

00701. ಜನ್ಮಾಂತರ ನಂಬಿಕೆ ವೈಚಿತ್ರ – 02


00701. ಜನ್ಮಾಂತರ ನಂಬಿಕೆ ವೈಚಿತ್ರ – 02
_________________________________

ಜನ್ಮಾಂತರದ ನಂಬಿಕೆ ನಮ್ಮಲ್ಲಿ ಅಂತರ್ಗತವಾಗಿ ಬಂದ ಭಾವ. ನಂಬಲಿ, ಬಿಡಲಿ ಯಾವುದಾದರೊಂದು ಬಗೆಯಲ್ಲಿ ಎಲ್ಲರನ್ನು ಕಟ್ಟಿಡುವ ಬಂಧ ಜಾಲ. ನಂಬಿದವರಿಗೆ ನಿಮಿತ್ತರೆಂಬ ನಿರಾಳತೆ, ನಂಬದವರಿಗೆ ಡೋಂಗಿ ಬುರುಡೆ ಕಥೆ. ಎರಡು ಅಲ್ಲದ ನಡುವಿನವರಿಗೆ ಒಂದೆಡೆ ವಿಸ್ಮಯ, ಮತ್ತೊಂದೆಡೆ ಅಪನಂಬಿಕೆ. ಈ ಕೂತೂಹಲದ ಮನ ಶೋಧವೆ ಈ ಕವಿತೆಯ ಸಾರ. ಜನ್ಮಾಂತರ ನಂಟಿದ್ದರೂ ನೆನಪೆ ಇರದ ವಿಸ್ಮಯವೊಂದು ಕಡೆ, ಎಲ್ಲೊ ಏನೊ ನೆನಪಿನ ಹಾಳೆಯೊದ್ದ ಅನುಭೂತಿ ಮತ್ತೊಂದೆಡೆ. ಆ ಎರಡರ ನಡುವೆ ಕಟ್ಟಿ ಕೊಡುವ ಬಾಳಿನ, ವಿಸ್ಮೃತಿಯ ನಡುಗಡ್ಡೆ ..


ಜನ್ಮಾಂತರ ವೈಚಿತ್ರ
_____________________
(ಜನ್ಮಾಂತರ ನಂಬಿಕೆ ವೈಚಿತ್ರ – 02)

ಬೆನ್ಹಿಂದೆ ಜನ್ಮಗಳ ಕಂತೆ
ಇದ್ದರೇಕೊ ಅಪರಿಚಿತತೆ
ತಿಲದಷ್ಟು ಅರಿವಿರದೆಲ್ಲ
ತೃಣ ಮಾತ್ರವು ಬರದಲ್ಲ ||

ಸಂಘಟನೆಗಳದೆ ಪ್ರವರ
ಬದುಕುಪವಾಸ ಸವಾರ
ರುಚಿಗೆ ತಕ್ಕ ಉಪ್ಪುಖಾರ
ಹಾಕುವನಾರೋ ಚೋರ ||

ಎಂಥಾ ಮೋಸದ ಅಡಿಗೆ
ಪಾಕದ್ಹೆಸರು ನಮ ನಮಗೆ
ಉಳಿದೆಲ್ಲ ಅವ ಕಟ್ಟಿ ಗಡಿಗೆ
ಹಣೆಬರಹದ್ಹೆಸರಡಿಗಡಿಗೆ ||

ಬಿತ್ತೆಲ್ಲ ಜಾತಕಫಲ ಮೂಲ
ಒಟ್ಟಿರಲಿ ಸುಭೀಕ್ಷ ಅಕಾಲ
ಸಂಪಾದನೆ ಸಂಗ್ರಹ ಸಕಲ
ಮರುಜನ್ಮ ಆಗದಿರೆ ಸಫಲ ||

ತಧ್ಭಾವದ ತನ್ಮಯ ಲೋಕ
ಜಗಕಟ್ಟಿದ ಜಾಣ ನಿಯಾಮಕ
ನಿಮಿತ್ತ ಮಾತ್ರಕೆ ನಿರ್ಧಾರಣ
ಬದಲಿಸಲವನಾ ವ್ಯಾಕರಣ ||

———————————————————-
ನಾಗೇಶ ಮೈಸೂರು
———————————————————–

(Picture source from: https://en.m.wikipedia.org/wiki/File:Reincarnation2.jpg)

00700. ಜನ್ಮಾಂತರ ನಂಬಿಕೆ ವೈಚಿತ್ರ – 01


00700. ಜನ್ಮಾಂತರ ನಂಬಿಕೆ ವೈಚಿತ್ರ – 01
______________________________

ಜನ್ಮಾಂತರದ ನಂಬಿಕೆ ನಮ್ಮಲ್ಲಿ ಅಂತರ್ಗತವಾಗಿ ಬಂದ ಭಾವ. ನಂಬಲಿ, ಬಿಡಲಿ ಯಾವುದಾದರೊಂದು ಬಗೆಯಲ್ಲಿ ಎಲ್ಲರನ್ನು ಕಟ್ಟಿಡುವ ಬಂಧ ಜಾಲ. ನಂಬಿದವರಿಗೆ ನಿಮಿತ್ತರೆಂಬ ನಿರಾಳತೆ, ನಂಬದವರಿಗೆ ಡೋಂಗಿ ಬುರುಡೆ ಕಥೆ. ಎರಡು ಅಲ್ಲದ ನಡುವಿನವರಿಗೆ ಒಂದೆಡೆ ವಿಸ್ಮಯ, ಮತ್ತೊಂದೆಡೆ ಅಪನಂಬಿಕೆ. ಈ ಕೂತೂಹಲದ ಮನ ಶೋಧವೆ ಈ ಕವಿತೆಯ ಸಾರ. ಜನ್ಮಾಂತರ ನಂಟಿದ್ದರೂ ನೆನಪೆ ಇರದ ವಿಸ್ಮಯವೊಂದು ಕಡೆ, ಎಲ್ಲೊ ಏನೊ ನೆನಪಿನ ಹಾಳೆಯೊದ್ದ ಅನುಭೂತಿ ಮತ್ತೊಂದೆಡೆ. ಆ ಎರಡರ ನಡುವೆ ಕಟ್ಟಿ ಕೊಡುವ ಬಾಳಿನ, ವಿಸ್ಮೃತಿಯ ನಡುಗಡ್ಡೆ ..


ಜನ್ಮಾಂತರ ನಂಬಿಕೆ
_______________________
(ಜನ್ಮಾಂತರ ನಂಬಿಕೆ ವೈಚಿತ್ರ – 01)

ಬೃಹನ್ಮಿತ್ರ ಸಹ ಕಳತ್ರ
ಸದ್ಯೋಜಾತ ಕದ ಸಚಿತ್ರ
ನಾನಜರಾಮರ ಭೂ ತರ
ಮನದಿಂಗಿತ ನಗೆ ವಿಚಿತ್ರ ||

ಜಾತಾಭಿಜಾತದೀ ಜನ್ಮ
ಏಳೇಳು ಜನುಮ ಕರ್ಮ
ಅರಿತವರಾರೋ ಮರ್ಮ
ನೆನಪಿರದೆ ಸವೆಸಿ ಮಮ ||

ಜನ್ಮದ ವಾಸನೆ ಅಂಟು
ಕಟ್ಟುವುದಂತೆ ತಾ ಗಂಟು
ಹೊತ್ತು ಬಗಲಿನ ಚೀಲ
ಮುಂದಿನ ಜನ್ಮದ ಕಾಲ ||

ಮಾಡಿದ ಪಾಪ-ಪುಣ್ಯ ಫಲ
ಸರಿಯಿದ್ದರೆ ಜೀವ ಸಫಲ
ಹುಟ್ಟುವ ಮಾನವ ಜನ್ಮ
ಪಾಪಕೆ ತಿಗಣೆಯ ಕರ್ಮ ||

ಸಂಗಾತಿಸಿ ಸಹಧರ್ಮಿಣಿ
ಹಿಂಬಾಲ-ಕರುವಿನ ಸರಣಿ
ಸರಿಯಿದ್ದರೆ ಜೀವಕೆ ಗಣಿ
ಬೆಸವಿದ್ದರೆ ಬಾಳೆ ಸಗಣಿ ||

———————————————————-
ನಾಗೇಶ ಮೈಸೂರು
———————————————————–

(Picture source: https://en.m.wikipedia.org/wiki/File:Reincarnation_AS.jpg)

00699. ಕುಡುಕ ಗಂಡನ ಕೊಬ್ಬು..


00699. ಕುಡುಕ ಗಂಡನ ಕೊಬ್ಬು..
________________________

(ಸುಮ್ನೆ ತಮಾಷೆಗೆ ಬರೆದಿದ್ದು …😜 )

ಏನೋ ಸ್ವಲ್ಪ ಕುಡ್ಕ
ವಾಸನೆ ಸ್ವಲ್ಪ ತಡ್ಕೊ
ಕಟ್ಕೊಂಡೋಂಗೆ ಡೌಲಾ ?
ಕುಡ್ಸೋದು ನಂದೆ ಡೀಲು..

ತಡಿಯೋಕಾಗ್ದೆ ಇದ್ರೆ
ನೀನೂ ರೂಢಿ ಮಾಡ್ಕೊ
ಬಿದ್ರೆ ಒಳಗೆ ಥರ್ಟೀ
ನಿನ್ವಯಸಾಗುತ್ತೆ ಟ್ವೆಂಟಿ..!

ಕುಡೀದೆ ಇದ್ರೆ ಮದಿರೆ
ಹತ್ರ ಬರಲ್ಲಾ ನಿದಿರೆ
ನೀ ಬರ್ದಿದ್ರೂ ಹೋಗೆ
ಕನಸಿನ ಕದ ತೆರೆದಾಯ್ತೆ..

ಸುಮ್ನೆ ಬೇಡಾ ಗಾಂಚಲಿ
ಹಾಕೆ ತಟ್ಟೆ ಪಾಂಚಾಲಿ
ಕುಡಿದಿದ್ ಹತ್ಬೇಕ್ ಮೈಗೆ
ತಿನ್ದಿದ್ರೆ ಹತ್ತೋದು ಹ್ಯಾಗೆ ?

ಹಾಸಿಗೆ ನಂದು ನಿಂದು
ಬೇಡಾ ಅಂದ್ರು ಮುನಿದು
ನಾ ಬಿಡಲ್ಲವೆ ಸಾವಾಸ
ಹೆಂಡ್ತಿ ಮಕ್ಕಳಿಗುಪವಾಸ..

– ನಾಗೇಶ ಮೈಸೂರು

(Picture from : http://www.freedictionary.com – drunkard)

00054. ಈ ಅಮ್ಮಗಳು


An old poem published on Mother’s Day in 2013..

 

ನಾಳೆಯ (12.May.2013) ಅಮ್ಮಂದಿರ ದಿನಾಚರಣೆಯ ಕುರಿತು ನಾನು ಬರೆದ ಒಂದು ಕವನ “ಈ ಅಮ್ಮಗಳು” – ‘ಕನ್ನಡ – ಒನ್ ಇಂಡಿಯ’ ಆನ್ಲೈನ್ ಪತ್ರಿಕೆಯ ಎನ್ ಆರ ಐ ವಿಭಾಗದಲ್ಲಿ ಪ್ರಕಟಿತವಾಗಿದೆ. ದಯವಿಟ್ಟು ಕ…

Source: 00054. ಈ ಅಮ್ಮಗಳು

00698. ಸೂರ್ಯನ ಎದುರಲ್ಲಿ ಹಾದು ಹೋಗಲಿರುವ ಬುಧಗ್ರಹದ ಅಪರೂಪದ ದೃಶ್ಯ !


00698. ಸೂರ್ಯನ ಎದುರಲ್ಲಿ ಹಾದು ಹೋಗಲಿರುವ ಬುಧಗ್ರಹದ ಅಪರೂಪದ ದೃಶ್ಯ !
________________________________________________________________

ಬುಧಗ್ರಹದ ಸೂರ್ಯಗಮನ – ಸೂರ್ಯನೆದುರಿನ ಹಾದುಹೋಗುವಿಕೆಯನ್ನು ತೋರಿಸುವ ಹಳೆಯ ನಾಸಾ ಉಪಗ್ರಹ ಚಿತ್ರ (ನಾಸಾ ಹ್ಯಾಂಡೌಟ್ ಫೋಟೊ)

ಇದು ಶತಮಾನವೊಂದರಲ್ಲಿ ಕೇವಲ ೧೩ ಬಾರಿ ಮಾತ್ರ ಸಂಭವಿಸುವ ವಿಸ್ಮಯ : ನಮ್ಮ ಸೌರವ್ಯೂಹದಲ್ಲೆ ಅತಿ ಕಿರಿಯನೆಂಬ ಕೀರ್ತಿಗೆ ಪಾತ್ರನಾದ ಬುಧಗ್ರಹವು (ಮರ್ಕ್ಯೂರಿ) ಸೂರ್ಯನ ಮುಂದೆ, ಅತ್ಯಂತ ಸಮೀಪದಿಂದ ಹಾದು ಹೋಗಲಿದೆಯಂತೆ. ಅಮೇರಿಕಾವೂ ಸೇರಿದಂತೆ ಜಗತ್ತಿನ ಬಹುತೇಕ ಭಾಗ, ಬರುವ ಸೋಮವಾರದಂದು ಬುಧಗ್ರಹವು ತನ್ನ ಅತಿಥೇಯ ನಕ್ಷತ್ರವಾದ ಸೂರ್ಯನೆದುರಲೊಂದು ಕಪ್ಪು ಚುಕ್ಕಿಯಾಗಿ ನಿಧಾನವಾಗಿ ಹಾದುಹೋಗಲಿರುವ ಈ ವಿಸ್ಮಯವನ್ನು ಕಾಣಬಹುದು. ಬರಿಗಣ್ಣಿನಿಂದ ಸೂರ್ಯನನ್ನು ನೋಡಲಾಗದ ಕಾರಣ ನೀವು ವಿಶೇಷ ಶೋಧಕವನ್ನಳವಡಿಸಿದ ದೂರದರ್ಶಕದ ಮೂಲಕವೊ ಅಥವಾ ಅಂತರ್ಜಾಲ ಬಿತ್ತರಣೆಗಳ ಮೂಲಕ ಬುಧಗ್ರಹದ ಈ ಕಿರಿಸಂಭ್ರಮಕ್ಕೆ ಸಾಕ್ಷಿಯಾಗಬಹುದು.

ನಿಮ್ಮಲ್ಲಿ ದೂರದರ್ಶಕವಿದ್ದಲ್ಲಿ ದೂರದರ್ಶಕಕ್ಕೆ ಸುರಕ್ಷತೆಯ ಶೋಧಕವನ್ನಳವಡಿಸಿಕೊಂಡು (ನಿಮ್ಮ ಕಣ್ಣುಗಳ ರಕ್ಷಣೆಯ ದೃಷ್ಟಿಯಿಂದ) ನೀವು ಈ ಸಂಘಟನೆಯನ್ನು ವೀಕ್ಷಿಸಬಹುದು. ಒಂದು ವೇಳೆ ಶೋಧಕ ಸಿಗದಿದ್ದರೆ ಒಂದು ಕಾಗದದ ಹಾಳೆಯನ್ನು ಬಳಸಿಕೊಂಡು ನೀವೊಂದು ಕೃತಕ ಹಾಗು ಸುರಕ್ಷಿತ ವೀಕ್ಷಣಾ ವಿಧಾನವನ್ನು ರೂಪಿಸಿಕೊಳ್ಳಬಹುದು. ಸೂರ್ಯನ ಛಾಯೆಯನ್ನು ಕಾಗದವೊಂದರ ಮೇಲೆ ಬಿಳಿಯ ಬಿಲ್ಲೆಯ ರೂಪದಲ್ಲಿ ಪ್ರಕ್ಷೇಪಿಸಿ, ನಂತರ ಬುಧಗ್ರಹವು ಒಂದು ಚುಕ್ಕೆಯ ರೂಪದಲ್ಲಿ ಸೂರ್ಯನಗಲಕ್ಕು ನಿಧಾನಕ್ಕೆ ಸಾಗುವುದನ್ನು ಕಾಣಬಹುದು. ಪರ್ಯಾಯವಾಗಿ ನಾಸಾದ ಅಂತರ್ಜಾಲ ಪುಟ ಅಥವಾ ಸೋಶಿಯಲ್ ಮೀಡಿಯ ಪುಟಗಳಲ್ಲಿ ಹಾಕುವ ನೇರ ಚಿತ್ರಗಳನ್ನು ಕೂಡ ಗಮನಿಸಬಹುದು. ನೀವ್ಯಾವುದಾದರು ಖಗೋಳ ವೀಕ್ಷಣಾಲಯ (ಅಬ್ಸರ್ವೇಟೊರಿ) ಅಥವಾ ವಿಜ್ಞಾನ ಕೇಂದ್ರಗಳ ( ಸೈನ್ಸ್ ಸೆಂಟರು) ಹತ್ತಿರದಲ್ಲಿ ವಾಸಿಸುವವರಾದರೆ, ಅವರ ಕಾರ್ಯಕ್ರಮ ಯೋಚನೆಯನ್ನೊಮ್ಮೆ ವಿಚಾರಿಸಿ ನೋಡುವುದೊಳಿತು – ಬಹುಶಃ ಅವರಲ್ಲಿರಬಹುದಾದ ದೂರದರ್ಶಕದಲ್ಲೊಮ್ಮೆ ಇಣುಕಿ ಈ ಸಂಘಟನೆಯನ್ನು ವೀಕ್ಷಿಸಬಹುದು.

ಇದೇನು ಮಹಾ ? ಯಾವುದೋ ಗ್ರಹದ ಚಲನೆಯನ್ನು ನೋಡಿ ಆಗಬೇಕಾದ್ದರೂ ಏನು ? ಯಾಕಾದರೂ ನೋಡಬೇಕು ಎನ್ನುವ ಅನುಮಾನವಿದ್ದರೆ ಇದೋ ಇಲ್ಲಿದೆ ಒಂದು ಮುಖ್ಯ ಕಾರಣ – ಈ ತಣ್ಣಗಿನ ಪುಟ್ಟ ಗ್ರಹಕ್ಕೆ ಇದೊಂದು ಅತಿ ವಿಶೇಷ ಘಟನೆಯಾದ್ದರಿಂದ.

ಬುಧಗ್ರಹ ಸೂರ್ಯನ ಸುತ್ತ ಒಂದು ಸುತ್ತು ಸುತ್ತಲು ಬೇಕಾದ ಆವರ್ತನಾವಧಿ ಕೇವಲ ೮೮ ದಿನಗಳಾದ ಕಾರಣ ಅದನ್ನು ನಮ್ಮ ಸೌರವ್ಯೂಹದ ‘ಅತೀ ವೇಗದಲ್ಲಿ ಸುತ್ತುವ ಗ್ರಹ’ ಎಂಬ ಕೀರ್ತಿಗೆ ಭಾಜನವಾಗಿಸಿಬಿಟ್ಟಿದೆ. ಅದೇ ರೀತಿ ನಮ್ಮ ಭೂಮಿ ಸಹ ತನ್ನದೇ ಆದ ಆವರ್ತನಾವಧಿಯಲ್ಲಿ (ಸರಾಸರಿ ೩೬೫ ದಿನ) ಸೂರ್ಯನ ಸುತ್ತ ಪ್ರದಕ್ಷಿಣೆ ಹಾಕುತ್ತಿದೆ. ವಿಭಿನ್ನ ಪ್ರದಕ್ಷಿಣಾ ಪಥಗಳ ಈ ಅಂತರದಿಂದಾಗಿ ಇವೆರಡು ಗ್ರಹಗಳು ಒಂದೇ ನೇರದಲ್ಲಿದ್ದು, ನಾವು ಭೂಮಿಯಿಂದ ಈ ಪುಟ್ಟ ಗ್ರಹದ ರವಿತಾಡನವನ್ನು ನೇರ ದಿಟ್ಟಿಸಬಹುದಾದ ಅವಕಾಶ ತೀರಾ ಅಪರೂಪಕ್ಕೆ ಸಿಗುತ್ತದೆ. ಈ ಬಾರಿಯ ಸಂಘಟನೆ ೨೦೦೬ ರ ನಂತರ ಘಟಿಸುತ್ತಿರುವ ಮೊದಲ ಅವಕಾಶ. ಇಂತಹದ್ದೆ ಮತ್ತೊಂದು ದೃಶ್ಯ ವೀಕ್ಷಿಸಬೇಕೆಂದರೆ ಮತ್ತೆ ೨೦೧೯ರ ತನಕ ಕಾಯಬೇಕು.

ತಾಳಿ, ಇದೇನು ಮಹಾ – ಒಂದು ದಶಮಾನಕ್ಕಿಂತ ತುಸು ಹೆಚ್ಚಿನ ಅವಧಿಯಲ್ಲೇ ಘಟಿಸುವುದಾದರು ಅದು ಸುಮಾರು ಬಾರಿ ನಡೆಯುವ ಪ್ರಕ್ರಿಯೆಯೇ ಆದಂತಲ್ಲವೆ ಎನ್ನಬೇಡಿ. ೧೩ ವರ್ಷದ ಸರಾಸರಿಯಲ್ಲಿ ಪರಿಗಣಿಸಿದರು ಒಂದು ಶತಮಾನದಲ್ಲಿ ಎಷ್ಟು ಬಾರಿ ನಡೆಯಲು ಸಾಧ್ಯ ? ಬುಧಗ್ರಹವು ಭೂಮಿ ಮತ್ತು ಸೂರ್ಯನ ನಡುವೆ ಪ್ರತಿ ೧೧೬ ದಿನಕ್ಕೊಮ್ಮೆ ಹಾದು ಹೋಗುತ್ತದೆಯಾದರೂ ಅದರ ಆವರ್ತ ಸಮತಲ ನಮ್ಮ ಭೂಮಿಯ ಆವರ್ತ ಸಮತಲಕ್ಕೆ ಕೆಲವು ಕೋನದಷ್ಟು ವ್ಯತ್ಯಾಸದಲ್ಲಿರುತ್ತದೆ. ಭುವಿಯ ದೃಷ್ಟಿಯಲ್ಲಿ ಬುಧನ ಪ್ರದಕ್ಷಿಣಾ ಪಥವು ಒಂದು ರೀತಿಯ ಓರೆಯಾದ ಪ್ರಕ್ಷೇಪಣಾ ಪಥದಲ್ಲಿರುತ್ತದೆ. ಹೀಗಾಗಿ ಭೂಮಿ ಮತ್ತು ಬುಧಗ್ರಹಗಳೆರಡರ ಪಥಗಳು ಪರಸ್ಪರ ಒಂದನ್ನೊಂದು ಸಂಧಿಸುವ ಅವಕಾಶವೂ ಕೂಡಿಬರಬೇಕು. ಈ ಸಂಯುಕ್ತ ಅಂಶಗಳ ಗಣಿತ ಆ ಸರಾಸರಿ ವರ್ಷಗಳನ್ನು ಏರುಪೇರಾಗಿಸಿಬಿಡುತ್ತದೆಯಾಗಿ ‘ಪ್ರತಿ ಇಂತಿಷ್ಟು ವರ್ಷಗಳಲ್ಲಿ ಇದು ಘಟಿಸುತ್ತದೆ’ ಎಂದು ಸರಳವಾಗಿ ಹೇಳುವಂತಿಲ್ಲ. ಆ ಆವರ್ತನ ಸಂಘಟನೆ ತನ್ನದೇ ಆದ ಮಾದರಿಯನ್ನು ಹೊಂದಿರುವುದಾದರು ಅದು, “ತುಸುಕಾಲ ಪ್ರತಿ ‘ಎಕ್ಸ್’ ವರ್ಷಗಳಿಗೊಮ್ಮೆ, ನಂತರ ‘ವೈ’ ವರ್ಷಗಳಿಗೊಮ್ಮೆ, ಹಾಗೆಯೇ ಮತ್ತೆ ‘ಜಡ್’ ವರ್ಷಗಳಿಗೊಮ್ಮೆ, ಮತ್ತೆ ‘ವೈ’ ವರ್ಷಗಳಿಗೊಮ್ಮೆ, ತದನಂತರ ಮೂರು ಬಾರಿ ‘ಜಡ್’ ವರ್ಷಗಳಿಗೊಮ್ಮೆ….” ಹೀಗೆ ಎರ್ರಾಬಿರ್ರಿಯಾಗಿ ಸಾಗುವ ಕೋಟಲೆ ಲೆಕ್ಕಾಚಾರ.

ಬುಧಗ್ರಹವನ್ನು ಬಿಟ್ಟರೆ ನಮಗೂ ಸೂರ್ಯನಿಗು ನಡುವಿರುವ ಶುಕ್ರಗ್ರಹ (ವೀನಸ್) ಕೂಡ ನಮಗೆ ಬುಧಗ್ರಹದಂತಹುದ್ದೆ ಪಥ ಸಂಚಲನ ವೀಕ್ಷಣೆಯ ಅವಕಾಶ ನೀಡುವುದಾದರು – ಅದು ಹೆಚ್ಚು ನಿಧಾನವಾಗಿ ಮತ್ತು ಬುಧಗ್ರಹಕ್ಕಿಂತಲೂ ಕಡಿಮೆಯದಾದ ಓರೆ ಕೋನ ಸಮತಲದಲ್ಲಿ ಘಟಿಸುತ್ತದೆ. ಹೀಗಾಗಿ ನಮ್ಮಾ, ಸೂರ್ಯನ ನಡುವೆ ಹಾದುಹೋಗುವ ಶುಕ್ರನ ಪ್ರಾತ್ಯಕ್ಷಿಕೆಯೂ ಅಪರೂಪದ್ದಾದರು ಸ್ವಲ್ಪ ಹೆಚ್ಚು ಸುಲಭವಾಗಿ ನಿಗಾ ಇಡಬಹುದಾದಂತದ್ದು: ಇಲ್ಲಿ ಇದು ಯಾವಾಗಲು ಎಂಟು ವರ್ಷಗಳ ಅಂತರದಿಂದ ಬೇರ್ಪಟ್ಟ ಒಂದು ಜಂಟಿ ಸಂಘಟನೆಯಾಗಿ (ಯುಗ್ಮದ ಹಾಗೆ) ನಡೆಯುವ ಮತ್ತು ಈ ಜಂಟಿ ಜೋಡಿ ಒಂದು ಶತಮಾನದಲ್ಲಿ ಒಂದು ಸಾರಿ ಮಾತ್ರವೇ ನಡೆಯುವ ಪ್ರಕ್ರಿಯೆ. ನೀವೊಂದು ವೇಳೆ ೨೦೧೨ರ ಹಾದುಹೋಗುವಿಕೆಯನ್ನು ಗಮನಿಸಲಿಲ್ಲವೆಂದಾದರೆ ನಿಮ್ಮ ಅದೃಷ್ಟ ಪರೀಕ್ಷೆಗೆ ಮುಂದಿನ ೨೧೧೭ ರ ತನಕ ಕಾಯಬೇಕು.

ನಮ್ಮ ಸೌರವ್ಯೂಹದ ನೆರೆಹೊರೆಯ ಇಂತಹ ಚಲನೆಗಳು ಇದೇ ಮಾದರಿಯದ್ದೆ. ಅಲ್ಲಿನ ಗ್ರಹಗಳು ತಮ್ಮ ಸೂರ್ಯರ ಮುಂದೆ ಹಾದು ಹೋಗುವ ಹೊತ್ತಲ್ಲಿ ಅವುಗಳ ಇರುವಿಕೆಯನ್ನು ಗಮನಿಸುವುದು ಮಾತ್ರವಲ್ಲದೆ ವಿವಿಧ ಮಾನಕಗಳ ಮೂಲಕ ಅವುಗಳ ಮತ್ತದರ ಸುತ್ತಲಿನ ವಾತಾವರಣವನ್ನು ಅಳೆದು ಅಲ್ಲೇನಾದರು ಜೀವವಿಕಾಸದ ಕುರುಹೇನಾದರು ಇದೆಯೇ ಎಂದು ಅಧ್ಯಯನ ಮಾಡುವುದು ಪ್ರಚಲಿತ ವಿಧಾನ.

ಈಗಾಗಲೆ ಈ ರೀತಿಯ ಅಧ್ಯಯನಗಳಿಂದ ನಮ್ಮ ನೆರೆಹೊರೆ ಗ್ರಹಗಳ ಪ್ರದಕ್ಷಿಣಾ ಪಥ ಮತ್ತು ಹಾದುಹೋಗುವಿಕೆಯನ್ನು ಎಷ್ಟು ಆಳವಾಗಿ ಅರಿತಿದ್ದೇವೆಂದರೆ, ಅವುಗಳೀಗ ಮೊದಲಿದ್ದಷ್ಟೆ ಅದ್ಭುತ ವೈಜ್ಞಾನಿಕ ಅವಕಾಶಗಳಾಗಿ ಉಳಿದಿಲ್ಲ.

” ವೈಜ್ಞಾನಿಕವಾಗಿ, ಕೆಲವು ನೂರು ವರ್ಷಗಳ ಹಿಂದೆ ಈ ವಿದ್ಯಾಮಾನಗಳು ಹೆಚ್ಚು ಪ್ರಾಮುಖ್ಯವಾಗಿದ್ದವು” ಎಂದು ‘ದಿ ಪೋಸ್ಟ್’ಗೆ ಹೇಳಿಕೆ ನೀಡಿದವರು ಮೆಸೆಂಜರ ಗಗನ ನೌಕೆಯ ಮುಖ್ಯ ವಿಜ್ಞಾನಿ ನ್ಯಾನಿ ಚಾಬೊಟ್ (ಕಳೆದ ವರ್ಷವಷ್ಟೇ ಮೆಸೆಂಜರ ಆಕಾಶ ನೌಕೆಯ ಬುಧಗ್ರಹಕ್ಕೆ ಅಪ್ಪಳಿಸಿದ ನಂತರ ಅದರ ಚಟುವಟಿಕೆಗಳನ್ನೆಲ್ಲ ಸ್ಥಗಿತಗೊಳಿಸಲಾಯ್ತು).

ಆದರೂ ಈ ಅಡ್ಡ ಹಾಯುವಿಕೆಯಿಂದ ವಿಜ್ಞಾನಿಗಳು ಕೆಲವು ಉಪಯುಕ್ತ ಮಾಹಿತಿಯನ್ನು ಪಡೆಯಬಹುದು. ಸೌರವ್ಯೂಹದಲ್ಲೆ ಅತೀ ತೆಳುವಾದ ಬುಧಗ್ರಹದ ವಾತಾವರಣದ ವಿಶ್ಲೇಷಣೆ ಮಾಡಿ ಅಲ್ಲಿ ಜೀವವಿರುವ ಕುರುಹುಗಳಿಗಾಗಿ ಹುಡುಕಬಹುದು ( ಆ ವಾತಾವರಣದಲ್ಲಿರುವ ಅಣುಗಳ ಮೂಲಕ ಹಾಯ್ದು ಬರುವ ಬೆಳಕನ್ನು ಪರೀಕ್ಷಿಸಿ, ವಿಶ್ಲೇಷಿಸುವ ಮೂಲಕ). ಬುಧಗ್ರಹದ ಜಾಗ ಮತ್ತು ಸೂರ್ಯನ ಮುಂದೆ ಹಾದುಹೋಗುವ ಪ್ರಕ್ರಿಯೆ ಕರಾರುವಾಕ್ಕು ಮತ್ತು ವಿಶ್ವಾಸಾರ್ಹ ನಿಖರತೆಯದ್ದಾಗಿರುವುದರಿಂದ, ಈ ಪ್ರಕ್ರಿಯೆಯನ್ನೇ ಆಧಾರವಾಗಿಟ್ಟುಕೊಂಡು ಗಗನ ನೌಕೆಗಳಲ್ಲಿರುವ ಪರಿಕರ, ಉಪಕರಣಗಳ ಸೂಕ್ಷ್ಮ ನ್ಯೂನತೆಗಳನ್ನು ಪರಿಶೀಲಿಸಿ ಸರಿಪಡಿಸಬಹುದು. ಬುಧಗ್ರಹದ ಸ್ಥಾನಿಕ ಆಧಾರದ ಮೇಲೆ ದೂರದರ್ಶಕಗಳನ್ನು ಸರಿಯಾದ ದಿಕ್ಕಿನತ್ತ ನಿಟ್ಟಿಸುವಂತೆ ಮಾಡಬಹುದಷ್ಟೆ ಅಲ್ಲದೆ, ಕೆಲವು ಉಪಕರಣಗಳ ದೃಷ್ಟಿದೋಷಗಳನ್ನು ಈ ಸಂಘಟನೆಯ ಆಧಾರದ ಮೇಲೆ ಸರಿಪಡಿಸಿಕೊಳ್ಳಬಹುದು.

“ಇದೊಂದು ರೀತಿ ಕ್ಯಟರಾಕ್ಟ್ ಇದ್ದ ಕಣ್ಣಲ್ಲಿ ಕಾಣುವ ಹಾಗೆ – ಮಂಜು ಕವಿದ ವಾಹನದ ಗಾಜಿನಿಂದ ನೋಡುತ್ತಿರುವ ಹಾಗೆ, ಪ್ರಕಾಶಮಾನ ಹೊಳಪಿನ ಬೆಳಕಿನ ಸುತ್ತ ನಾವು ತಾರಾ ರೀತಿಯ ಪ್ರಭಾವಲಯವನ್ನು ಕಾಣುತ್ತೇವೆ” ಎನ್ನುತ್ತಾರೆ ಮತ್ತೊಬ್ಬ ನಾಸಾ ವಿಜ್ಞಾನಿ ಡೀನ್ ಪೆಸ್ನೇಲ್. ಸೂರ್ಯನ ಅಗಾಧ ಬೆಳಕಿನೆದುರು ಬುಧಗ್ರಹವು ಸಂಪೂರ್ಣ ಕಪ್ಪು ಕಾಯವಾಗಿ ಕಾಣಿಸಿಕೊಳ್ಳುತ್ತದೆಯಾದರು, ಬಳಸುವ ಉಪಕರಣಗಳು ಬೆಳಕನ್ನು ಚದುರಿಸುವ ಬಗೆಯಿಂದಾಗಿ ಅದೊಂದು ತುಸು ಮೆಲುವಾಗಿ ಹೊತ್ತಿಸಿಟ್ಟ ಕಾಯದ ಹಾಗೆ ಕಾಣಿಸಿಕೊಳ್ಳಬಹುದು. ಈ ಸಂಘಟನೆಯ ಹೊತ್ತಿನ ಅವಕಾಶವನ್ನು ಬಳಸಿಕೊಂಡು ವಿಜ್ಞಾನಿಗಳು ಆ ಉಪಕರಣಗಳನ್ನು ತಿದ್ದಿ ಬುಧಗ್ರಹದ ನೈಜ ಬಣ್ಣಗಳನ್ನು ನೋಡುವಂತೆ ಸರಿಪಡಿಸಿಕೊಂಡರೆ, ಅವುಗಳನ್ನು ಮತ್ತಷ್ಟು ಅಜ್ಞಾತ ಕಾಯ ಮತ್ತು ವಸ್ತುಗಳ ಅಧ್ಯಯನಕ್ಕೆ ಮರು ಬಳಸುವ ಹೊತ್ತಿನಲ್ಲಿ ಉಂಟಾಗಬಹುದಾದ ತಪ್ಪೆಣಿಕೆ ಮತ್ತು ಅವಘಡಗಳಿಂದ ಕಾಪಾಡಿದಂತೆ ಆಗುತ್ತದೆ.

ಚಾಬೋಟ್ ಈ ಪ್ರಕ್ರಿಯೆ ನಮ್ಮ ಜನರನ್ನು ಆಕಾಶದತ್ತ ನೋಡುವಂತೆ ಮತ್ತು ನೆರೆಹೊರೆಯ ಗ್ರಹಗಳ ಕುರಿತು ಆಲೋಚಿಸುವಂತೆ ಪ್ರಚೋದಿಸಲೆಂದು ಆಶಿಸುತ್ತಾರೆ. ಕಳೆದ ಶುಕ್ರವಾರ ಆಕೆ ಮತ್ತವಳ ಮೆಸೆಂಜರ ತಂಡದ ಸದಸ್ಯರು ಬುಧಗ್ರಹದ ಸಂಪೂರ್ಣ ಮೇಲ್ಮೆ ಮಾಹಿತಿಯನ್ನೊಳಗೊಂಡ ಮೊಟ್ಟಮೊದಲ ಭೂಪಠವನ್ನು ಬಿಡುಗಡೆ ಮಾಡಿದರು.

” ಇದು ನಿಜಕ್ಕೂ ಸಕಾಲದಲ್ಲಿ ಬಿಡುಗಡೆಯಾಗುತ್ತಿದೆ..” ಮುಂದುವರೆದು ಆಕೆ ನುಡಿದರು ” ಈಗಾದರೆ ಜನಗಳು ಕೂಡ ಆಸಕ್ತಿಯಿಂದ ನೋಡುತ್ತಿರುತ್ತಾರೆ..”

ಈ ಅಧ್ಯಯನ ಕಾಲದಲ್ಲಿ ಆಕೆಯ ತಂಡ ಬುಧಗ್ರಹದ ಕುರಿತು ಅನೇಕ ರೋಚಕ ಮಾಹಿತಿಗಳನ್ನು ಗ್ರಹಿಸಿ ಕಲೆಹಾಕಿದ್ದಾರೆ. ಚಾಬೋಟ್ ನುಡಿಯುತ್ತಾರೆ “ಯಾವುದೊಂದನ್ನು ಇನ್ನೊಂದಕ್ಕಿಂತ ಹೆಚ್ಚು ಪ್ರಮುಖವಾದದ್ದೆಂದು ಗುರುತಿಸಲು ಬಯಸುವುದಿಲ್ಲ” – ಆದರು ಈ ಮೂರು ಕಾಡುವ ಅಂಶಗಳನ್ನು ಗಮನಾರ್ಹವೆಂದು ಪರಿಗಣಿಸುತ್ತಾರೆ:

” ಬುಧಗ್ರಹದಲ್ಲಿರುವ ದೈತ್ಯ ಗಾತ್ರದ ಆಗಾಧ ವಿಸ್ತೀರ್ಣದಲ್ಲಿ, ಯಾವುದೋ ಹಳೆಯ ಕಾಲದಲ್ಲಿ ಅದರ ಮೇಲ್ಮೆಯನ್ನೆಲ್ಲ ಆವರಿಸಿಕೊಂಡಿರುವ ಅಗ್ನಿಪರ್ವತದಿಂದುಗುಳಲ್ಪಟ್ಟ ಲಾವ – ಅಮೇರಿಕದ ಅರ್ಧಕ್ಕಿಂತಲು ಹೆಚ್ಚು ವಿಸ್ತೀರ್ಣದಲ್ಲಿ ಚಾಚಿಕೊಂಡಿರುವಂತದ್ದು, ಮೊದಲನೆಯ ಅಂಶ. ಅಗ್ನಿಪರ್ವತದ ಯಾವ ರೀತಿಯ ಮಹಾನ್ ಪ್ರಕ್ರಿಯೆಯ ಕಾರಣಗಳು ಇಂತಹ ಅಗಾಧ ಗಾತ್ರದ ಪರಿಣಾಮವನ್ನುಂಟು ಮಾಡಿತೆಂಬುದು ತೀವ್ರವಾಗಿ ಕಾಡುವ ಅಂಶ” ಆಕೆ ಹೇಳುತ್ತಾರೆ.

ಬುಧಗ್ರಹದಲ್ಲಿರುವ ಮತ್ತೊಂದು ಕಾಡುವ ಅಂಶವೆಂದರೆ ಬೇರೆಲ್ಲೂ ಕಾಣದ, ಬುಧನ ಮೇಲೆ ಮಾತ್ರ ಕಾಣುವ ‘ಹಾಲೋಸ್’ ಅಥವಾ ‘ಗುಂಡಿ’ ಬಿದ್ದಂತಹ ಗುರುತುಗಳು. ಈ ಚಿಕ್ಕ ಗುಂಡಿ ಗುರುತುಗಳು ಬುಧನ ಮೇಲ್ಮೈ ಪರಿಸರದಲ್ಲಿ ಉಳಿಯಲಾಗದೆ ಮಂಜಿನಂತೆ ಆವಿಯಾಗಿ ಕರಗಿಹೋದ ಬಂಡೆಗಲ್ಲುಗಳು ಉಳಿಸಿಹೋಗಿರುವ ಜಾಗದ ಗುರುತೆನ್ನುವ ಅನುಮಾನ.

” ಬಂಡೆಗಲ್ಲುಗಳು ಸಾಮಾನ್ಯವಾಗಿ ತಂತಾನೆ ವ್ಯೋಮದಲ್ಲಿ ಮಾಯವಾಗಿಹೋಗುವುದಿಲ್ಲ, ಆದರೆ ಬುಧಗ್ರಹದಲ್ಲಿ ಮಾತ್ರ ಹಾಗಾಗುತ್ತದೆ” ಎಂದು ವಿವರಿಸುತ್ತಾರೆ ಚಾಬೋಟ್.

ಚಾಬೋಟ್ ತಮ್ಮ ಬಹುತೇಕ ಗಮನ ಮತ್ತು ಸಮಯವನ್ನು ನಿರಂತರ ಕತ್ತಲ ನೆರಳಿನಲ್ಲಿರುವಂತಿರುವ, ಬುಧಗ್ರಹದ ಉತ್ತರ ಮತ್ತು ದಕ್ಷಿಣ ಧ್ರುವಗಳಲ್ಲಿ ಉಂಟಾಗುವ ನೀರುಗಡ್ಡೆಗಳ ಅಧ್ಯಯನಕ್ಕೆ ವ್ಯಯಿಸಿದ್ದಾರೆ. ಅವುಗಳ ಇರುವಿಕೆಯ ಸಂಶೋಧನೆಯೇನೊ ಮಹತ್ತರವಾದದ್ದೆ ನಿಜ, ಆದರೆ ಅದು ಮತ್ತಷ್ಟು ಹೊಸ ಪ್ರಶ್ನೆಗಳಿಗೆ ದಾರಿಮಾಡಿಕೊಟ್ಟಿದೆ ಎನ್ನುತ್ತಾರಾಕೆ. ಅವು ಅಲ್ಲಿಗೆ ಬಂದದ್ದಾರು ಹೇಗೆ, ಯಾವಾಗ ಎನ್ನುವ ಪ್ರಶ್ನೆಗೆ ಉತ್ತರ ಗೊತ್ತಾದಲ್ಲಿ, ನೀರು ಹೇಗೆ ಭೂಮಿಗೆ ತನ್ನ ದಾರಿ ಕಂಡುಕೊಂಡಿತು ? ಎನ್ನುವುದರ ಬಗ್ಗೆಯೂ ಬೆಳಕು ಚೆಲ್ಲಲು ಸಾಧ್ಯ ಎನ್ನುವ ಹಿನ್ನಲೆಯಲ್ಲಿ.

ಆಕೆಯೆನ್ನುತ್ತಾರೆ “ವಿಜ್ಞಾನದಲ್ಲಿ ಒಂದು ಸಮಸ್ಯೆ ಬಗೆಹರಿದು ಉತ್ತರ ದೊರಕಿದರೆ, ಅದರ ಹಿಂದೆಯೆ ಕಾಡುವ ನೂರೆಂಟು ಹೊಸ ಪ್ರಶ್ನೆಗಳನ್ನು ಉಳಿಸಿಹೋಗುತ್ತವೆ”

ಸಣ್ಣ ಚುಕ್ಕೆಯಾಗಿ ಬುಧಗ್ರಹ ಸೂರ್ಯನೆದುರು ಹಾದುಹೋಗುವುದನ್ನು ಗಮನಿಸಿ ನೋಡುವುದರಿಂದ ಈ ಪ್ರಶ್ನೆಗಳಿಗೆಲ್ಲ ಉತ್ತರ ದೊರಕಿಬಿಡುವುದೆಂದೇನಲ್ಲ; ಅಷ್ಟೇಕೆ, ಆ ಅಂಶಗಳ ಇರುವಿಕೆಯನ್ನು ಗಮನಿಸಲೂ ಸಹ ಸಾಧ್ಯವಾಗದಿರಬಹುದು. ಆದರೂ ಅದರ ಸಾಧ್ಯಾಸಾಧ್ಯತೆಗಳನ್ನು ಪರಿಗಣಿಸದಿರಲು ಅಸಾಧ್ಯವಾದ ಕಾರಣ, ಪರಿಶೀಲಿಸಿ ನೋಡಬೇಕಾದ ಅಗತ್ಯ ಇದ್ದೆ ಇರುತ್ತದೆ.

– ಕನ್ನಡ ಸಮೀಪಾನುವಾದ: ನಾಗೇಶ ಮೈಸೂರು

© 2016 ದಿ ವಾಷಿಂಗ್ಟನ್ ಪೋಸ್ಟ್ ( © 2016 The Washington Post )
(ವಾಷಿಂಗ್ಟನ್ ಪೋಸ್ಟಿನಲ್ಲಿ ಪ್ರಕಟಿತವಾದ ಬರಹದ ಕನ್ನಡ ಸಮೀಪಾನುವಾದ; ಎನ್.ಡಿ.ಟೀವಿ (NDTV) ಜಾಲ ಮಾಧ್ಯಮದಲ್ಲಿ ಪ್ರಕಟಿತವಾಗಿದ್ದ ರೂಪದಲ್ಲಿ )

Thanks and best regards,
Nagesha MN