00789. ಶಂಕೆ, ಅನುಮಾನ..


00789. ಶಂಕೆ, ಅನುಮಾನ..
__________________________

ಸಖ್ಯದಲಿ ಸೂಕ್ಷ್ಮ ಭಾವನೆಗಳದೆ ರಾಜ್ಯ.. 😊


ನೀ ನೋಡದಿರು ನೋಟ ಅನುಮಾನದಲಿ
ನಿನ್ನಾಣೆ ನಾ ನಿನ್ನ ಪ್ರೇಮದ ಬಲೆಯ ಮೀನು
ಯಾಕಿಂತ ಚಡಪಡಿಕೆ ? ಅನಸೂಯೆ ನೀನು
ನಿನ್ನೊಲವಿಗೆ ಬಿದ್ದ ಮೇಲೆ ಬೇರೆ ದಾರಿ ಇನ್ನೆಲ್ಲಿ ?

ಹಾದು ಹೋಗೊ ಸೊಬಗು ಮೀಟಿತೆ ಕಣ್ಣ
ಕಂಡ ಕಂಡ ಹೆಣ್ಣು ನಿನ್ನಂತಾದೀತೆ ಮನದನ್ನೆ ?
ಎದೆಯ ಪಲುಕು ಕುಲುಕಾಡಿಸೆ ಅಡ್ಡಾದಿಡ್ಡಿ
ನಿನ್ನ ಮಂದಹಾಸ ಮೊಗ ಇಳಿಸುತಲಿ ಭುವಿಗೆ..

ನೋಡೆ ಕುತೂಹಲವಲ್ಲ ಹೋಲಿಕೆಯ ಚಪಲ
ನಿನ್ನೆಲ್ಲ ಅಂದಚೆಂದ ತುಣುಕುಗಳ ಹುಡುಕಾಟ
ನಿನ್ನ ಕಣ್ಣು ಅವಳಲ್ಲಿ ಮೂಗು ಇವಳಲ್ಲಿ ಎನ್ನುತ
ತುಟಿ ಬಿಡದೆ ಹೋಲಿಕೆ ನಿನ್ನೆ ಗೆಲಿಸುತ ಸಮನೆ..

ಹಂಗಿಸದಿರೆ ಕರೆದು ಚಪಲ ಚಿತ್ತ ಚೆನ್ನಿಗರಾಯ
ಒಳಗೆಲ್ಲೊ ನೋಯುವುದು ಪರಿಹಾಸಕೂ ಸಲ್ಲ
ಕಾಣಲೆಲ್ಲೆಡೆ ನಿನ್ನ ತಡಕಾಡಿ ಮಿಡುಕೊ ಜೀವ
ಎಲ್ಲೆಲ್ಲೂ ಬರಿ ನಿನ್ನೆ ಕಂಡು ಬೆರಗಾಗುವ ಭಾವ..

ಬಲ್ಲೆ ನಿನ್ನ ಪ್ರೀತಿ ಆತಂಕದ ಮೂಲ ಪ್ರಿಯಸಖಿ
ಬರಿ ಮಾತಿದಲ್ಲ ಅಂತರಾಳ ನೀಡಿದ ವಾಗ್ದಾನ
ಎಣಿಸಿದರೇನು ಕೋಟಿ ನಕ್ಷತ್ರ ಗಗನದ ತುಂಬಾ
ಬೆಳಕಿಗೊಂದೆ ತಾರೆ ರವಿಗೆ ನೀ ಚಂದ್ರಮನಂತೆ..

– ನಾಗೇಶ ಮೈಸೂರು

(Picture source: http://goodmenproject.com/featured-content/is-your-relationship-doubt-normal-or-toxic-jnky/)

Advertisements

Published by

ನಾಗೇಶ ಮೈಸೂರು

ಜೀವನದ ಸುತ್ತಾಟ ಎಲ್ಲೆಲ್ಲಿಗೊ ದಾಟಿಸಿ, ಅರಿವಿನೆಲ್ಲೆ ಮೀರಿಸಿ ಅಲೆದಾಡಿಸತೊಡಗಿ ಇದ್ದಕ್ಕಿದ್ದಂತೆ ಮೂಲದ ಬೇರಿನ ತುಡಿತಗಳೆಲ್ಲ ಏನೆಲ್ಲಾ ತರದ ಸ್ವಗತಗಳಾಗಿ ಕಂಗಾಲಾಗಿಸತೊಡಗಿದಾಗ, ಅದರ ಹೊರ ಹರಿವಿಗೆ ಇದ್ದಕ್ಕಿದ್ದಂತೆ ತೆರೆದುಕೊಂಡ ಹಠಾತ್ ದ್ವಾರವೆ - ಈ 'ಮನದಿಂಗಿತಗಳ ಸ್ವಗತ' ಬ್ಲಾಗ್. ಹುಟ್ಟಿಕೊಂಡ ಹೊತ್ತಿನಿಂದ ಇನ್ನಿಲ್ಲದ ಕಕ್ಕುಲತೆಯಿಂದ ಅಪ್ಪಿಕೊಂಡ ಈ ಮನ ವೈಖರಿಯ ಪ್ರಕಟ ರೂಪ, 'ನನ್ನ ಪಾಡಿಗೆ ನಾನು' ಎಂದು ಹಾಡಿಕೊಂಡು ಹೋಗುವಾಗಲೆ ಅಲ್ಲಿಲ್ಲಿ ಸಿಕ್ಕ ಅವರಿವರನ್ನು ತಟ್ಟಿ, ಕೈ ಕುಲುಕಿ ಸಲಾಮು ಹೊಡೆದು ಮುಂದಕ್ಕೆ ನಡೆಯುತ್ತಲಿದೆ, ಇಲ್ಲಿಯವರೆಗೆ. ಬಾಲಿಶವಾಗಿ ಆರಂಭವಾದ ತುಡಿತ, ಸ್ವಗತಗಳು ತುಸು ಶಿಸ್ತಿನ ದಿರುಸುಟ್ಟು ಠಾಕುಠೀಕಾಗಿದ್ದಲ್ಲದೆ ನಡಿಗೆಯುದ್ದಕ್ಕು ಕಲಿಕೆಯ ವಿಸ್ಮಯವನ್ನು ಉಣಬಡಿಸುತ್ತ ಸಾಗಿವೆ. ಇದು 'ನನ್ನ ಮೈದಾನ, ನನ್ನ ಕುದುರೆ' ಎನ್ನುವ ಧೈರ್ಯಕ್ಕೊ ಏನೊ - ಬರೆಯಬೇಕೆನಿಸಿದ್ದೆಲ್ಲವನ್ನು ಬರೆದಿಟ್ಟು ನಿರಾಳವಾಗುವ ಪರಿ, ಇನ್ನು ಕೈ ಹಿಡಿದು ಮುನ್ನಡೆಸುತ್ತಲೆ ಇದೆ, ವಿವಿಧ ಪ್ರಯೋಗಗಳೊಡನೆ. ಮಂಕುತಿಮ್ಮನ ಪದ್ಯಗಳ ಮೇಲೆ ಟಿಪ್ಪಣಿ ಬರೆದುಕೊಳ್ಳುವಷ್ಟು ಹುಮ್ಮಸ್ಸು ಬರಲು ಬಹುಶ ಈ ಬ್ಲಾಗಿತ್ತ ಧೈರ್ಯವೆ ಕಾರಣವೇನೊ.. ಕೊನೆಯವರೆಗು ಜತೆಗುಳಿಯುವುದೂ ಕೂಡ ಬಹುಶಃ ಇದೇ ಏನೊ.. ಅಕಸ್ಮಾತಾಗಿ ಇಲ್ಲಿ ಇಣಿಕಿದರೆ - ಒಪ್ಪುಗಳ ಬಗೆ ಹೇಳದಿದ್ದರೂ ಸರಿಯೆ, ತಪ್ಪೇನಾದರು ಕಂಡರೆ ಒಂದು ಸಣ್ಣ ಸುಳಿವಿತ್ತು ಹೋಗಿ, ತಿದ್ದಿಕೊಂಡು ಕಲಿತು ಮುನ್ನಡೆಯಲು ಸಹಾಯಕವಾದೀತು, ಈ ನಿರಂತರ ಕಲಿಕೆಯ ಜೀವನ ಯಾತ್ರೆಯಲಿ 😊 ಪ್ರೀತಿಯಿಂದ, - ನಾಗೇಶ ಮೈಸೂರು

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s