00801. ಕನಸುಗಳು ಬರೆವ ಭಾಷ್ಯ


00801. ಕನಸುಗಳು ಬರೆವ ಭಾಷ್ಯ
_________________________________________

ಕನಸಿಗೊಂದು ಕವನದ ಲಗ್ಗೆ, ಬರಿ ಹೇಳಲಾಗದವುಗಳದೇ ಬುಗ್ಗೆ..!


ಯಾಕೆ ಕಾಡುವುದಿಂತು ಯಾವುದೋ ಕನಸುಗಳು ?
ಮುಂಜಾವಿನ ಬೆರಗಲಿ ಬೆಳಗಿಗೆ ಭಾಷ್ಯವ ಬರೆದು
ಇಬ್ಬನಿ ಹನಿ ಕುದುರಿಸಿ ನಗುವ ಮುತ್ತಿನ ಮಣಿಯ
ಹುಲ್ಲು ಗರಿಕೆಯ ಹಾರ ತೊಟ್ಟುಕೊಂಡೆಲ್ಲಾ ಸೊಗಸ..

ಯಾವ ಯಾವುದೊ ಭಾವ ಜರತಾರಿ ಸೀರೆಯನುಟ್ಟು
ಯಾವುದೋ ಅನುಭೂತಿ ಕುಂಕುಮದ ಹಣೆಬೊಟ್ಟಲಿ
ಏನೊ ಅನುಭವ ಅನುಭಾವದೊಡವೆ ಉಡುತೊಡುಗೆ
ಎಲ್ಲ ಮೇಳೈಸಿದ ಕನಸಲದೆಷ್ಟು ಬಣ್ಣದ ಎರಚಾಟ ?

ಕೈಗೆಟುಕದೆಲ್ಲ ಮುಗಿಲು ಬಗಲಲ್ಲಿ ತೇಲಿವೆ ಮುಕ್ತಾ
ಹಗುರಾದ ಹತ್ತಿಯ ತನು ತಾನು ಹಾರಿದೆ ಬಯಸಿ
ಬಯಕೆಯದೆಲ್ಲ ಗೊಂದಲ ಬಾಂದಳದಲೆಲ್ಲಿದೆ ಆಳ ?
ಹೆಕ್ಕುತ ನಿರಾಳ ಗ್ರಹ ತಾರೆ ನೀಹಾರಿಕೆ ವ್ಯೋಮಕಾಯ..

ಹಿಮವಲ್ಲಿ ಕಣಿವೆ ಕಾಲುವೆ ನದಿ ಜಲ ನೆಲ ಮರ ಬೆಟ್ಟಗುಡ್ಡ
ಒಂದೆಡೆ ಸೇರೆಲ್ಲ ಸಮ್ಮೇಳನ ನಡೆಸುವದೇ ಮಾಯಾಜಾಲ
ಸ್ವಪ್ನದಿ ಮಾತ್ರವೆ ಸ್ವಸ್ಥ ಅಸಂಗತಗಳೆಲ್ಲ ಸಂಗತ ಮೂರ್ತ
ನನಸೆಚ್ಚರದಲಿ ಬಿಡಿಸೆ ಜಟಿಲ ಒಗಟದು ನೆನಪೂ ಅಸ್ವಸ್ಥ..

– ನಾಗೇಶ ಮೈಸೂರು

(Picture source : https://www.urbanpro.com/a/dream-interpretation-analysis-course-india)

Advertisements

Published by

ನಾಗೇಶ ಮೈಸೂರು

ಜೀವನದ ಸುತ್ತಾಟ ಎಲ್ಲೆಲ್ಲಿಗೊ ದಾಟಿಸಿ, ಅರಿವಿನೆಲ್ಲೆ ಮೀರಿಸಿ ಅಲೆದಾಡಿಸತೊಡಗಿ ಇದ್ದಕ್ಕಿದ್ದಂತೆ ಮೂಲದ ಬೇರಿನ ತುಡಿತಗಳೆಲ್ಲ ಏನೆಲ್ಲಾ ತರದ ಸ್ವಗತಗಳಾಗಿ ಕಂಗಾಲಾಗಿಸತೊಡಗಿದಾಗ, ಅದರ ಹೊರ ಹರಿವಿಗೆ ಇದ್ದಕ್ಕಿದ್ದಂತೆ ತೆರೆದುಕೊಂಡ ಹಠಾತ್ ದ್ವಾರವೆ - ಈ 'ಮನದಿಂಗಿತಗಳ ಸ್ವಗತ' ಬ್ಲಾಗ್. ಹುಟ್ಟಿಕೊಂಡ ಹೊತ್ತಿನಿಂದ ಇನ್ನಿಲ್ಲದ ಕಕ್ಕುಲತೆಯಿಂದ ಅಪ್ಪಿಕೊಂಡ ಈ ಮನ ವೈಖರಿಯ ಪ್ರಕಟ ರೂಪ, 'ನನ್ನ ಪಾಡಿಗೆ ನಾನು' ಎಂದು ಹಾಡಿಕೊಂಡು ಹೋಗುವಾಗಲೆ ಅಲ್ಲಿಲ್ಲಿ ಸಿಕ್ಕ ಅವರಿವರನ್ನು ತಟ್ಟಿ, ಕೈ ಕುಲುಕಿ ಸಲಾಮು ಹೊಡೆದು ಮುಂದಕ್ಕೆ ನಡೆಯುತ್ತಲಿದೆ, ಇಲ್ಲಿಯವರೆಗೆ. ಬಾಲಿಶವಾಗಿ ಆರಂಭವಾದ ತುಡಿತ, ಸ್ವಗತಗಳು ತುಸು ಶಿಸ್ತಿನ ದಿರುಸುಟ್ಟು ಠಾಕುಠೀಕಾಗಿದ್ದಲ್ಲದೆ ನಡಿಗೆಯುದ್ದಕ್ಕು ಕಲಿಕೆಯ ವಿಸ್ಮಯವನ್ನು ಉಣಬಡಿಸುತ್ತ ಸಾಗಿವೆ. ಇದು 'ನನ್ನ ಮೈದಾನ, ನನ್ನ ಕುದುರೆ' ಎನ್ನುವ ಧೈರ್ಯಕ್ಕೊ ಏನೊ - ಬರೆಯಬೇಕೆನಿಸಿದ್ದೆಲ್ಲವನ್ನು ಬರೆದಿಟ್ಟು ನಿರಾಳವಾಗುವ ಪರಿ, ಇನ್ನು ಕೈ ಹಿಡಿದು ಮುನ್ನಡೆಸುತ್ತಲೆ ಇದೆ, ವಿವಿಧ ಪ್ರಯೋಗಗಳೊಡನೆ. ಮಂಕುತಿಮ್ಮನ ಪದ್ಯಗಳ ಮೇಲೆ ಟಿಪ್ಪಣಿ ಬರೆದುಕೊಳ್ಳುವಷ್ಟು ಹುಮ್ಮಸ್ಸು ಬರಲು ಬಹುಶ ಈ ಬ್ಲಾಗಿತ್ತ ಧೈರ್ಯವೆ ಕಾರಣವೇನೊ.. ಕೊನೆಯವರೆಗು ಜತೆಗುಳಿಯುವುದೂ ಕೂಡ ಬಹುಶಃ ಇದೇ ಏನೊ.. ಅಕಸ್ಮಾತಾಗಿ ಇಲ್ಲಿ ಇಣಿಕಿದರೆ - ಒಪ್ಪುಗಳ ಬಗೆ ಹೇಳದಿದ್ದರೂ ಸರಿಯೆ, ತಪ್ಪೇನಾದರು ಕಂಡರೆ ಒಂದು ಸಣ್ಣ ಸುಳಿವಿತ್ತು ಹೋಗಿ, ತಿದ್ದಿಕೊಂಡು ಕಲಿತು ಮುನ್ನಡೆಯಲು ಸಹಾಯಕವಾದೀತು, ಈ ನಿರಂತರ ಕಲಿಕೆಯ ಜೀವನ ಯಾತ್ರೆಯಲಿ 😊 ಪ್ರೀತಿಯಿಂದ, - ನಾಗೇಶ ಮೈಸೂರು

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s