00806. ಬಾಳೆ ಹೊಂಬಾಳೆ


00806. ಬಾಳೆ ಹೊಂಬಾಳೆ
________________________

ಬಾಳು ಬಾಳೆಯ ಗಿಡದ ಹಾಗೆ – ನೆಟ್ಟ ನೇರವೂ ಹೌದು, ಹಗುರವೂ ಹೌದು, ಕತ್ತರಿಸಲು ಸುಲಭವೂ ಹೌದು, ಸಿಹಿಯೂ ಹೌದು, ಅಳಿಸಲಾಗದ ಕಲೆಯೂ ಹೌದು, ಉಣಿಸುವ ಬಾಳೆಲೆಯೂ ಹೌದು, ಆ ಎಲೆಯಷ್ಟೆ ನವಿರಾದ ಜತನವೂ ಹೌದು, ಕಲ್ಲು ಕರಗಿಸುವ ಸ್ಪರ್ಶಮಣಿಯೂ ಹೌದು. ಈ ಬಾಳಿನ ಹೊಂಬಾಳೆಯನ್ನು ಕಾಯಿಂದ ಮಾಗಿಸಿ ಹಣ್ಣಾಗಿಸುವ ಬದುಕಿನ ಚಿತ್ರ ಸೂಚಿ – ಈ ತ್ರಿವಳಿ ಕವನ. ಬಾಳೆ ಎಂದು ಓದುವಾಗ ಬಾಳೆಹಣ್ಣಿನ ಚಿತ್ರಣವನ್ನು ಮನದಲಿಟ್ಟುಕೊಂಡಂತೆ ಬಾಳು, ಜೀವನ ಎನ್ನುವ ಅರ್ಥವನ್ನು ಆರೋಪಿಸಿಕೊಂಡಾಗ ವಿಭಿನ್ನ ಅರ್ಥವೂ ಹೋರಾಡುತ್ತದೆ – ಕೆಲವು ಸಾಲುಗಳಲ್ಲಿ. ಬಾಳೆ ಹಣ್ಣಾಗಬೇಕು ಎನ್ನುವಾಗ ತಿನ್ನಲು ರುಚಿಯಿರಬೇಕಾದರೆ ಹಣ್ಣಾಗಿರಬೇಕು ಎನ್ನುವ ಅರ್ಥ ಹೊರಟಂತೆ, ಬದುಕಿದ್ದು ಸಾರ್ಥಕವಾಗಲು ಬಾಳು ಪಕ್ವವಾಗಬೇಕು, ಪ್ರಬುದ್ಧವಾಗಬೇಕು ಎನ್ನುವ ಅರ್ಥವೂ ಹೌದು; ನಮ್ಮ ಬಾಳೆ ಪ್ರಬುದ್ದತೆಯಲ್ಲಿ ಸಾಗಿ ಮಾಗಿ ಹಣ್ಣಾಗಬೇಕೆಂಬ ಆಶಯವೂ ಹೌದು. ಅದೆಲ್ಲ ಬಿಟ್ಟು ಬಾಳೆಗಿಡ, ಹಣ್ಣು, ಎಲೆಗಳ ಕುರಿತಾದ ಮಕ್ಕಳ ಪದ್ಯವೆಂದುಕೊಂಡರೂ ಸರಿಯೇ 😊


ಎಳೆತನ ಕಾಯ (ಬಾಳೆ ಹೊಂಬಾಳೆ – 01)
___________________________________

ಬಾಳೇ ಎಳೆ
ಎಳಸು ಬಾಳೆಲೆ
ತೆಳುವಾದ ಹಾಳೆ
ಜತನ ಕಾದರೆ ಬಾಲೆ
ಎಳೆಳೆಯಾಗಿ ತೆರೆಯುವಳೆ..!

ಎಳೆತನ ಕಾಯ
ಜಾರಿಸುವಪಾಯ
ಗಾಳಿಗ್ಹರಿವ ಸಮಯ
ಕಾಯುತ್ತಲೆ ಸರಿ ಪ್ರಾಯ
ಸುತ್ತಿ ಮುಚ್ಚಿಡಲು ಉಪಾಯ..!

ಎಲೆಯ ಸಾರ
ದೋಣಿಯಾಕಾರ
ಸಿಗಿದು ಬೆನ್ನ್ಮೂಳೆ ತರ
ಕತ್ತರಿಸಿ ಮೂರಾಗುವ ಪೂರ
ಎಲೆಯಿಡೆ ಮೂರಾಳಿಗೆ ಆಹಾರ..!

ಬಾಳೇ ಗಿಡ
ನಿಂತಾಗ ನೋಡ
ಕಲಿಯುತ ಗಾಢ
ಸೆಟೆದು ನಡೆವ ಜಡ
ಕಲಿತೆ ಬೆಳೆ ಬಾಳ ನಿಗೂಢ..!

ಗಿಡವಾಗಿ ಬಗ್ಗೆ
ಎಳೆ ಕಂದು ಕುಗ್ಗೆ
ಅಡಿಪಾಯದ ಮೊಗ್ಗೆ
ಮೈ ಮರೆತು ನುಗ್ಗಿ ನಗ್ಗೆ
ಜೀವಮಾನ ನೋವಿನ ಬುಗ್ಗೆ..!

——————————————————————-
ನಾಗೇಶ ಮೈಸೂರು
——————————————————————-

ಬಾಳೇ ಕರ್ಮಕಾಂಡ (ಬಾಳೆ ಹೊಂಬಾಳೆ – 02)
_____________________________________

ಬಾಳೇ ಕಾಂಡ
ಪದರದ ಅಂಡ
ಸಿಪ್ಪೆ ಸುಲಿಸಬೇಡ
ನಿಲುವ ಶಕ್ತಿಯ ದಂಡ
ಸುತ್ತಿಸುತ್ತಿಸಿಟ್ಟ ಪ್ರಕಾಂಡ..!

ಕರ್ಮಕಾಂಡ
ಹೋರಾಟ ನಿಭಿಢ
ಒಳಾಂಗಣ ನಿಗೂಢ
ಸವರೆ ಕತ್ತಿಯ ಜಾಡ
ತರಿದ ಶಕ್ತಿಯ ನೋಡಾ..!

ಬಾಳೇ ಕಂದು
ಕಂದಿಸದ ಬಂಧು
ಮಾಗಿದ ವಯಸೆಂದು
ಅನುಭವ ಅನುಭಾವಿಸದು
ಸಮ್ಮಿಶ್ರಣ ಯೌವ್ವನ ಸರಿದು..!

ಕಂದದೆ ತುಸು
ಕುಂದ ಸಾವಾರಿಸು
ಹಗಲಿರುಳಿನ ಕೂಸು
ಎದೆಗುಂದದೆ ಮುನ್ನಡೆಸು
ಬಿಡುವಿರೆ ನಡುವೆ ತೂಕಡಿಸು..!

————————————————————
ನಾಗೇಶ ಮೈಸೂರು
————————————————————

ಬಾಳೇ ಹಣ್ಣು (ಬಾಳೆ ಹೊಂಬಾಳೆ – 03)
_____________________________________

ಬಾಳೇ ಹಣ್ಣು
ನೀ ಸಾರ್ಥಕವೆನ್ನು
ಧನ್ಯತೆ ಸೇರಿದರಿನ್ನು
ಪೂಜಿಸಿ ತಿನ್ನೋ ತಾನು
ರುಚಿ ಪೋಷಣೆ ಕಾನೂನು..!

ಹಣ್ಣಿನ ರೀತಿ
ಜಗವಿರೆ ಪ್ರೀತಿ
ಸಿಪ್ಪೆ ಸುಲಿದ ನೀತಿ
ಅಡಗಿ ವಿಸ್ಮಯ ಪ್ರಕೃತಿ
ಹೆಣ್ಣಾದರೆ ಹಣ್ಣೆ ಜಾಗೃತಿ…!

ಬಾಳೇ ದಿಂಡು
ಅಂತರಂಗ ತಂಡು
ಜತನದಿ ಒಳಗಿಟ್ಟ ಕಡು
ಸ್ವಾಸ್ತ್ಯದ ಗುಟ್ಟಿನ ಕರಡು
ಬಲ್ಲಿದರಷ್ಟೇ ಬಲ್ಲ ತೆಳುತುಂಡು..!

ಬಿಚ್ಚೆ ಕಾಂಡ
ಪದರ ದಪ್ಪ ಗಿಡ
ಹೊಕ್ಕಂತೆ ಒಳ ನಾಡ
ತೆಳುವಾಗೊ ಬಾಳೇಪತ್ರ ಕೊಡ
ಅಪರೂಪದ ತರಕಾರಿ ತಿಂದುಬಿಡ..!

————————————————————
ನಾಗೇಶ ಮೈಸೂರು
————————————————————

ಬಾಳೇ = Banana Fruit , ಲೈಫ್

Published by

ನಾಗೇಶ ಮೈಸೂರು

ಜೀವನದ ಸುತ್ತಾಟ ಎಲ್ಲೆಲ್ಲಿಗೊ ದಾಟಿಸಿ, ಅರಿವಿನೆಲ್ಲೆ ಮೀರಿಸಿ ಅಲೆದಾಡಿಸತೊಡಗಿ ಇದ್ದಕ್ಕಿದ್ದಂತೆ ಮೂಲದ ಬೇರಿನ ತುಡಿತಗಳೆಲ್ಲ ಏನೆಲ್ಲಾ ತರದ ಸ್ವಗತಗಳಾಗಿ ಕಂಗಾಲಾಗಿಸತೊಡಗಿದಾಗ, ಅದರ ಹೊರ ಹರಿವಿಗೆ ಇದ್ದಕ್ಕಿದ್ದಂತೆ ತೆರೆದುಕೊಂಡ ಹಠಾತ್ ದ್ವಾರವೆ - ಈ 'ಮನದಿಂಗಿತಗಳ ಸ್ವಗತ' ಬ್ಲಾಗ್. ಹುಟ್ಟಿಕೊಂಡ ಹೊತ್ತಿನಿಂದ ಇನ್ನಿಲ್ಲದ ಕಕ್ಕುಲತೆಯಿಂದ ಅಪ್ಪಿಕೊಂಡ ಈ ಮನ ವೈಖರಿಯ ಪ್ರಕಟ ರೂಪ, 'ನನ್ನ ಪಾಡಿಗೆ ನಾನು' ಎಂದು ಹಾಡಿಕೊಂಡು ಹೋಗುವಾಗಲೆ ಅಲ್ಲಿಲ್ಲಿ ಸಿಕ್ಕ ಅವರಿವರನ್ನು ತಟ್ಟಿ, ಕೈ ಕುಲುಕಿ ಸಲಾಮು ಹೊಡೆದು ಮುಂದಕ್ಕೆ ನಡೆಯುತ್ತಲಿದೆ, ಇಲ್ಲಿಯವರೆಗೆ. ಬಾಲಿಶವಾಗಿ ಆರಂಭವಾದ ತುಡಿತ, ಸ್ವಗತಗಳು ತುಸು ಶಿಸ್ತಿನ ದಿರುಸುಟ್ಟು ಠಾಕುಠೀಕಾಗಿದ್ದಲ್ಲದೆ ನಡಿಗೆಯುದ್ದಕ್ಕು ಕಲಿಕೆಯ ವಿಸ್ಮಯವನ್ನು ಉಣಬಡಿಸುತ್ತ ಸಾಗಿವೆ. ಇದು 'ನನ್ನ ಮೈದಾನ, ನನ್ನ ಕುದುರೆ' ಎನ್ನುವ ಧೈರ್ಯಕ್ಕೊ ಏನೊ - ಬರೆಯಬೇಕೆನಿಸಿದ್ದೆಲ್ಲವನ್ನು ಬರೆದಿಟ್ಟು ನಿರಾಳವಾಗುವ ಪರಿ, ಇನ್ನು ಕೈ ಹಿಡಿದು ಮುನ್ನಡೆಸುತ್ತಲೆ ಇದೆ, ವಿವಿಧ ಪ್ರಯೋಗಗಳೊಡನೆ. ಮಂಕುತಿಮ್ಮನ ಪದ್ಯಗಳ ಮೇಲೆ ಟಿಪ್ಪಣಿ ಬರೆದುಕೊಳ್ಳುವಷ್ಟು ಹುಮ್ಮಸ್ಸು ಬರಲು ಬಹುಶ ಈ ಬ್ಲಾಗಿತ್ತ ಧೈರ್ಯವೆ ಕಾರಣವೇನೊ.. ಕೊನೆಯವರೆಗು ಜತೆಗುಳಿಯುವುದೂ ಕೂಡ ಬಹುಶಃ ಇದೇ ಏನೊ.. ಅಕಸ್ಮಾತಾಗಿ ಇಲ್ಲಿ ಇಣಿಕಿದರೆ - ಒಪ್ಪುಗಳ ಬಗೆ ಹೇಳದಿದ್ದರೂ ಸರಿಯೆ, ತಪ್ಪೇನಾದರು ಕಂಡರೆ ಒಂದು ಸಣ್ಣ ಸುಳಿವಿತ್ತು ಹೋಗಿ, ತಿದ್ದಿಕೊಂಡು ಕಲಿತು ಮುನ್ನಡೆಯಲು ಸಹಾಯಕವಾದೀತು, ಈ ನಿರಂತರ ಕಲಿಕೆಯ ಜೀವನ ಯಾತ್ರೆಯಲಿ 😊 ಪ್ರೀತಿಯಿಂದ, - ನಾಗೇಶ ಮೈಸೂರು

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ಬದಲಿಸಿ )

Google photo

You are commenting using your Google account. Log Out /  ಬದಲಿಸಿ )

Twitter picture

You are commenting using your Twitter account. Log Out /  ಬದಲಿಸಿ )

Facebook photo

You are commenting using your Facebook account. Log Out /  ಬದಲಿಸಿ )

Connecting to %s