00945. ಈ ದಿನದ ಸಲುವಾಗಿ ಸಖಿ

00945. ಈ ದಿನದ ಸಲುವಾಗಿ ಸಖಿ
________________________

ಎಷ್ಟೊಂದು ಪ್ರಶ್ನೆ ಕೇಳುವೆ ಗೆಳತಿ ?
ಉತ್ತರವಿಲ್ಲದ ದಕ್ಷಿಣ ದಿಕ್ಕಲಿ
ನಿಖರತೆ ಸ್ಪಷ್ಟತೆ ಸರಿಯುತ್ತರ ಕಾದರೆ
ಉತ್ತರ ದಕ್ಷಿಣ ನಡಿಗೆ ನಮ್ಮ ಪ್ರೀತಿಗೆ..

ದುರ್ಭರ ಬದುಕಲಿ ಬರಿ ಪಂಥಗಳು
ಯಾರು ತಾನೆ ಸಂತ ಸತ್ಯವಾನರು
ಅಂತೆಂದು ಪ್ರತಿಹೆಜ್ಜೆ ಯೋಜಿಸುವುದುಂಟೆ ?
ಇಟ್ಟರಾಯ್ತು ಎದುರಾಗೊ ಹಾಡಿಗನುಸಾರ..

ವಿರಮಿಸು ವಿಶ್ರಮಿಸು ಅರೆಗಳಿಗೆ ಮೌನ
ಕಟ್ಟಬೇಕಿಲ್ಲ ಒಂದೇ ದಿನದಲ್ಲಿ ಜೀವನ
ಏಕೀ ಧಾವಂತ ಅವಸರದ ಆಯಾಸ
ಅನುಭವಿಸಬಾರದೇ ಈ ಕ್ಷಣದ ಹರ್ಷ ದನಿ..

ಸಿರಿಯಿಲ್ಲ ನೆರಳಿಲ್ಲ ಹೊರುವ ರಥವಿಲ್ಲ
ಪಲ್ಲಕ್ಕಿ ಪಲ್ಲಂಗ ನಿರಾಳತೆಗೂ ಕಲ್ಲು
ಹಾಗೆಂದು ಕೂತರೆ ತಲೆ ಮೇಲೆ ಕೈಹೊತ್ತು
ನಾಳೆಯಾಗುವುದು ಇಂದು ನರೆದ ತಲೆ ಸುತ್ತು..

ಬದುಕುವ ಬಾರೆ ಸಖಿ ಈ ದಿನದ ಸಲುವಾಗಿ
ಸಣ್ಣ ಸಣ್ಣ ಸುಖದಲುಂಟು ಜೀವನ ಭೋಗ
ಹಿಡಿದುಕೊ ಕೈ ಅಪ್ಪಿ ನೇವರಿಸಿಕೊ ಮೈ ಮನ
ಕೇಶದಡಿ ಮುಗುಳುನಗೆ ಮರೆಸಲಿಲ್ಲ ಬವಣೆ..

– ನಾಗೇಶ ಮೈಸೂರು
19.10.2016
(Picture source Creative common)