01074. ವಿರಹ’ಕೊಂದು’ಬಿಡುವ ಸತತ


01074. ವಿರಹ’ಕೊಂದು’ಬಿಡುವ ಸತತ
______________________________


ಹೇಗೆ ಹೇಳಲಿ ವಿರಹ ಯಾತನೆ ಸಖಿ ?
ವಿನಾಕಾರಣ ಮನ ಅಂತರ್ಮುಖಿ
ಅರಸಿ ತೊಳಲಿದೆ ಬಳಲಿ ಒಳಗಿನ ಮೌನ
ಪದಗಳಾಗದು ಯಾಕೊ ಏನೊ ಗ್ರಹಣ… ||೦೧||

ಏನೆಲ್ಲಾ ಬದುಕಿನ ಜಂಜಾಟದ ಹುತ್ತ ಗೊತ್ತಾ?
ಹುಡುಕಿದ್ದು ಮಿಡಿ ನಾಗರಗಳ ಕೆಣಕುತ್ತ
ಭುಸ್ಸೆನ್ನುವ ಭೀತಿಯಾ ನಡುವಲು ಹೆಣಗಿದ್ದೆ
ಕಾಣಬಹುದೇನೋ ನಿನ್ನ ಎನ್ನುವ ದೂರದಾಸೆಯಲಿ ||೦೨||

ಈ ನೌಕೆಯ ಚುಕ್ಕಾಣೆ ಹಿಡಿದು ನಡೆದೆ ನಿಜ
ಕನಸ ಕಾಣುತ ನಿನ್ನ ಕನಸ ಮರೆಯೆ ಹವಣಿಕೆ
ಕನಸೇನು ಜಾರಿ ಕೊಸರುವ ಹಸುಗೂಸೆ ಕರಗೆ ?
ಮತ್ತೆ ಹೆಗಲೇರುವ ಪರಿಗೆ ಮಾಡಲೇನ ಉಪಚಾರ ? ||೦೩||


ನೀ ಸೃಜಿಸಿದ ಶೂನ್ಯಾವತಾರ ಗೊತ್ತಾ ಹೇಗಾಗಿದೆ ?
ತಾಳುವ ದಶಾವತಾರ ಪ್ರತಿಕ್ಷಣ ನೀನಿಲ್ಲದ ಗುಂಗೆ
ಗುನುಗುತ್ತ ನಿನ್ನ ನೆನಪಿನ ಕಣಕಣದ ಜೊತೆ ಸಂಯುಕ್ತ
ನಿರ್ಲಿಪ್ತವಿರಲೆಂತು ಬದುಕಿನ ಹಾದಿ ಯೋಜನ ದೂರ ||೦೪||

ವಾಸ್ತವದ ಬಯಲಲೆಂತು ಹಾರೀತು ಕನಸ ಹಕ್ಕಿ ?
ರೆಕ್ಕೆ ಬಿಚ್ಚಿ ಮುಗಿಲ ಕಡಲ ದಾಟಬೇಕು ಮನಸಾ ಸುಗ್ಗಿ
ನೀನಿಲ್ಲದ ಕೊರೆ ಕಾಡುತಿದೆ ಯಾರು ಹಾರುವರಿಲ್ಲ ಜತೆಗೆ
ಹಾರಬಿಡದ ಸಂಕೋಲೆಗಳಡಿ ನರಳುವ ಜಾತಕಪಕ್ಷಿ ಪಾಡು ||೦೫||


ನೀಡುತ್ತಿದೆ ಅದೆ ಬದುಕು ಸಮಜಾಯಿಷಿ ತ್ಯಾಗದ ಹೆಸರು
ಕೊಲ್ಲುತ ಆಸೆಯ ಬತ್ತಿಗೆ ತಣ್ಣೀರೆರೆದು ದಿನ ನಂದಿಸುತ
ಗೆದ್ದರೆ ಆಗುವೆನೇನೊ ಸಂತ ನಟಿಸಬಹುದು ಧೀಮಂತಿಕೆ
ಗೆಲ್ಲದ ಹುಡಿಮನ ನನ್ನದು ಮರೆಯಲೆಂತು ಕೈಗೆಟುಕದ ಪ್ರೀತಿ ? ||೦೬||

ಕತ್ತರಿಸಿದ ಕೇಶ ನಖ ನೆನಪಾಗಲಿ ಬೆಳೆದರೂ ನೋವಿಲ್ಲ
ಅಂತಿರಲಿ ನಿನ್ನ ನೆನಪು ಇದ್ದರು ಕಾಡದೆ ಜತೆ ಬಿಡದೆ
ಅನ್ನುತೆ ಜತನದೆ ಕಾಪಿಟ್ಟ ನಮ್ಮೊಲವಿನ ಓಲೆಗೆ ಸಿಂಗರಿಸಿ
ಬದುಕಿಡಿ ಬರೆವೆ ಭಾಷ್ಯ ನನಸಾದೀತೆಂಬಾ ಹುಸಿ ಆಸೆಯಲಿ ||೦೭||

– ನಾಗೇಶ ಮೈಸೂರು
೧೮.೦೧.೨೦೧೭
(Pictures: Creative Commons / internet / social media)

Advertisements

Published by

ನಾಗೇಶ ಮೈಸೂರು

ಜೀವನದ ಸುತ್ತಾಟ ಎಲ್ಲೆಲ್ಲಿಗೊ ದಾಟಿಸಿ, ಅರಿವಿನೆಲ್ಲೆ ಮೀರಿಸಿ ಅಲೆದಾಡಿಸತೊಡಗಿ ಇದ್ದಕ್ಕಿದ್ದಂತೆ ಮೂಲದ ಬೇರಿನ ತುಡಿತಗಳೆಲ್ಲ ಏನೆಲ್ಲಾ ತರದ ಸ್ವಗತಗಳಾಗಿ ಕಂಗಾಲಾಗಿಸತೊಡಗಿದಾಗ, ಅದರ ಹೊರ ಹರಿವಿಗೆ ಇದ್ದಕ್ಕಿದ್ದಂತೆ ತೆರೆದುಕೊಂಡ ಹಠಾತ್ ದ್ವಾರವೆ - ಈ 'ಮನದಿಂಗಿತಗಳ ಸ್ವಗತ' ಬ್ಲಾಗ್. ಹುಟ್ಟಿಕೊಂಡ ಹೊತ್ತಿನಿಂದ ಇನ್ನಿಲ್ಲದ ಕಕ್ಕುಲತೆಯಿಂದ ಅಪ್ಪಿಕೊಂಡ ಈ ಮನ ವೈಖರಿಯ ಪ್ರಕಟ ರೂಪ, 'ನನ್ನ ಪಾಡಿಗೆ ನಾನು' ಎಂದು ಹಾಡಿಕೊಂಡು ಹೋಗುವಾಗಲೆ ಅಲ್ಲಿಲ್ಲಿ ಸಿಕ್ಕ ಅವರಿವರನ್ನು ತಟ್ಟಿ, ಕೈ ಕುಲುಕಿ ಸಲಾಮು ಹೊಡೆದು ಮುಂದಕ್ಕೆ ನಡೆಯುತ್ತಲಿದೆ, ಇಲ್ಲಿಯವರೆಗೆ. ಬಾಲಿಶವಾಗಿ ಆರಂಭವಾದ ತುಡಿತ, ಸ್ವಗತಗಳು ತುಸು ಶಿಸ್ತಿನ ದಿರುಸುಟ್ಟು ಠಾಕುಠೀಕಾಗಿದ್ದಲ್ಲದೆ ನಡಿಗೆಯುದ್ದಕ್ಕು ಕಲಿಕೆಯ ವಿಸ್ಮಯವನ್ನು ಉಣಬಡಿಸುತ್ತ ಸಾಗಿವೆ. ಇದು 'ನನ್ನ ಮೈದಾನ, ನನ್ನ ಕುದುರೆ' ಎನ್ನುವ ಧೈರ್ಯಕ್ಕೊ ಏನೊ - ಬರೆಯಬೇಕೆನಿಸಿದ್ದೆಲ್ಲವನ್ನು ಬರೆದಿಟ್ಟು ನಿರಾಳವಾಗುವ ಪರಿ, ಇನ್ನು ಕೈ ಹಿಡಿದು ಮುನ್ನಡೆಸುತ್ತಲೆ ಇದೆ, ವಿವಿಧ ಪ್ರಯೋಗಗಳೊಡನೆ. ಮಂಕುತಿಮ್ಮನ ಪದ್ಯಗಳ ಮೇಲೆ ಟಿಪ್ಪಣಿ ಬರೆದುಕೊಳ್ಳುವಷ್ಟು ಹುಮ್ಮಸ್ಸು ಬರಲು ಬಹುಶ ಈ ಬ್ಲಾಗಿತ್ತ ಧೈರ್ಯವೆ ಕಾರಣವೇನೊ.. ಕೊನೆಯವರೆಗು ಜತೆಗುಳಿಯುವುದೂ ಕೂಡ ಬಹುಶಃ ಇದೇ ಏನೊ.. ಅಕಸ್ಮಾತಾಗಿ ಇಲ್ಲಿ ಇಣಿಕಿದರೆ - ಒಪ್ಪುಗಳ ಬಗೆ ಹೇಳದಿದ್ದರೂ ಸರಿಯೆ, ತಪ್ಪೇನಾದರು ಕಂಡರೆ ಒಂದು ಸಣ್ಣ ಸುಳಿವಿತ್ತು ಹೋಗಿ, ತಿದ್ದಿಕೊಂಡು ಕಲಿತು ಮುನ್ನಡೆಯಲು ಸಹಾಯಕವಾದೀತು, ಈ ನಿರಂತರ ಕಲಿಕೆಯ ಜೀವನ ಯಾತ್ರೆಯಲಿ 😊 ಪ್ರೀತಿಯಿಂದ, - ನಾಗೇಶ ಮೈಸೂರು

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s