01532. ಕಾಲದ ಹಕ್ಕಿಗೆ..


01532. ಕಾಲದ ಹಕ್ಕಿಗೆ..

_______________________

ಹಕ್ಕೇನಿದೆ ನಿನ್ನ ದೂರಲು

ಹದಿನೇಳರ ಹರೆಯದ ಹಕ್ಕಿ?

ಹಕ್ಕಿಯಾಗಿ ಹಕ್ಕಿಗಾಗಿ ಹಾರಿದೆ

ಕತ್ತಲನಟ್ಟಿ, ಬೆಳಕ ಬೆನ್ನಟ್ಟಿ..||

ಕೂತಿದ್ದುಂಟು ದೇಕಿ ದಣಿದು

ಅನಿಸಿದ್ದುಂಟು ಬರಿ ಕಗ್ಗತ್ತಲು

ಕಾಡಿರಲಾರೊ ಪಾತಾಳ ಭೈರವಿ

ಹರಿದೆಲ್ಲಿಂದಲೊ ದ್ಯುತಿ ಪ್ರವಾಹ ! ||

ತಮ ದುರ್ಗಮದಲು ಕಿಡಿ ಕಿಂಡಿ

ಸೆಳೆ ತೆರೆದು ಕದ ನಿರಾಳ ತಂಗಾಳಿ

ತೇಪೆ ಹಚ್ಚಿದ ರಂಗು ಹೊಂಬಿಸಿಲು

ಹಚ್ಚಿ ಬೆಳಗಿದ ಜ್ಯೋತಿ ದಾರಿ ದೀಪ ||

ಕಾಲದ ಹಕ್ಕಿ ಹಾರಿ ಗಾಯ ಮಾಯ

ಮಾಯದ ಗುರುತಿಗೆ ಪ್ರೀತಿ ಲೇಪನ

ಬೆಸೆದ ಹೃದಯ ಸಂವಾದ ಸಾಂಗತ್ಯ

ನಿಂತ ನೀರಲ್ಲ ಬದುಕು ಭ್ರೂಣ ಬಾಲ ||

ದಾಟಿಲ್ಲವಿನ್ನು ಕಾನನ ಕಾಲು ದಾರಿ ಸ್ಪಷ್ಟ

ಅಭೇದ್ಯವಿತ್ತೆನಿಸಿದ ಸರಕೀಗ ಸಹನೀಯ

ಹದಿನೆಂಟರ ಹೊತ್ತಗೆ ಹೊತ್ತಂತೆ ಆಶಯ

ಪ್ರಖರ ಭರವಸೆ ಕಾಂತಿ ಹಕ್ಕಿ ಕಾಲುಂಗುರ ||

– ನಾಗೇಶ ಮೈಸೂರು

(Nagesha Mn)

(ಹೊಳೆನರಸೀಪುರ ಮಂಜುನಾಥ ರವರ ವಾರಾಂತ್ಯದ ಚಿತ್ರಕ್ಕೆ ಹೊಸೆದ ಕವನ..)

01531. ೧೭ಕೆ ನಿದ್ದೆ, ೧೮ಕೆ ಸನ್ನದ್ಧೆ !


01531. ೧೭ಕೆ ನಿದ್ದೆ, ೧೮ಕೆ ಸನ್ನದ್ಧೆ !

__________________________________

ದೇಗುಲ ಘಂಟಾನಾದದ ಜೋಗುಳ

ಬಡಿದೆಬ್ಬಿಸಲೆಮ್ಮ ಅಂತರಾಳ

ತುದಿಗುರುಳಿದ ಹದಿನೇಳರ ಬಂಡಿ

ಹದಿನೆಂಟರ ಪುಳಕದ ಹೊಸಿಲಲಿ ||

ಸುತ್ತು ಸುತ್ತು ಸುತ್ತಿ ಮತ್ತದೆ ಸುತ್ತು

ಹೆಜ್ಜೆ ಮೇಲ್ಹೆಜ್ಜೆ ಇಟ್ಟಡಿ ಮೇಲಡಿ

ದಿನ ವಾರ ತಿಂಗಳ ದೂಡಿದ ವರ್ಷ

ಮರಳಿ ಚಕ್ರ ಮೊದಲ ಬಿಂದು ಸ್ಪರ್ಶಿಸಿ.. ||

ಪುನರಾರಂಭ ಲೆಕ್ಕ ಮೊದಲಿಂದ

ಕಳೆದುದೆಲ್ಲ ಕೊಡವಿ ಹೊಸತು ಗಣನೆ

ಮತ್ತದೆ ಸುರುಳಿ ಋತುವಂತೆ ಮರಳಿ

ಬಿಚ್ಚಿಡಲಿದೆ ಕಾಲ ತಾನಡಗಿಸಿಟ್ಟ ನಿಗೂಢ ||

ವಿದಾಯದ ಹೊತ್ತಲೊಂದು ಘಳಿಗೆ

ಸಾಲು ಜೋಡಿಸಿಟ್ಟ ಲೀಲೆ ಹಳೆ ಸರಕು

ಚಿಗುರ್ಹಣ್ಣೆಲೆಗೆಲ್ಲ ಮರುಕಳಿಸಲದೆ ಜಾಲ

ಚೆಲ್ಲಿದೆ ಜಗದಗಲ, ಸೆರೆ ಹಿಡಿ ಕೈಮೇಲೆ ! ||

ಮುಗಿದ ಕಥೆಯ ಚಿತ್ರಪಟ ಚೌಕಟ್ಟಲಿ

ಸಮೀಕರಿಸೆ ಬರಲಿಹ ದಿನ ಬೆಸುಗೆ

ಬರುವ ವರುಷದ ಮತ್ತದೆ ಅನುರಣದೆ

ಮರುಕಳಿಸಿ ಹಾರೈಕೆ ವ್ರತ ಗದ್ದಲ ಸದ್ದು ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via FB friends)

01530. ಅಂತರಾಳದ ಖೂಳ


01530. ಅಂತರಾಳದ ಖೂಳ

____________________________________

ಅಂತರಾಳದಲೆಲ್ಲೊ ಅಡಗಿಹಾ ಅದಮ್ಯ

ಹುಡುಕುತಿಹೆನೆಲ್ಲೆಡೆ ಎಲ್ಲಿ ನೆಲೆಸಿರುವೆ ?

ಶಿರದಲೊ? ಹೃದಯದಲೊ? ಕರದಲೊ? ಕರ್ಮದಲೊ?

ಎಲ್ಲಿದೆ ನಿನ್ನ ನೆಲೆ ? ಯಾವುದು ನಿನ್ನ ವಿಳಾಸ ? ||

ನೀ ತಾಳುವಾಕಾರ ಅನಂತಾನಂತ ಸ್ವರೂಪ

ತುದಿ ಮೊದಲಿಲ್ಲದ ಚಿಂತನೆ ಏನೇನೆಲ್ಲ ಸ್ವಗತ

ನೀ ಸಂತ, ನೀ ಸಾಧು, ನೀ ಕ್ರೂರಿ, ಕೊಲೆಗಡುಕ

ಮಥನದಲೆ ಮಾಡೆಲ್ಲ ತಣ್ಣಗಿಹ ಪರಿ ನೀನಿಹುದೆಲ್ಲಿ ? ||

ನೀ ಬಿತ್ತುವ ಬೀಜ ಬೆಳೆ ಸ್ವಾರ್ಥ ಲಾಲಸೆ ಕುಟಿಲ

ನಿನ್ನದೇ ಫಸಲಲ್ಲಿ ಕರುಣೆ, ದಯೆ, ದಾಕ್ಷಿಣ್ಯ, ಮಮತೆ

ನೀ ಹುಟ್ಟು ಹಾಕುವೆ ಕಾಮನೆ, ಮನ್ಮಥ ಚಿತ್ತವಿಕಾರ

ಕಾಣದಾಕಾರ ಸಾಕಾರ, ಕೃತಿಯಾಗಿ ಸಕ್ರಿಯ ದೈತ್ಯ ||

ನಿನ್ನರಿವ ಹೊಲಬು ಕಾಣದೆ ಕಂಗಾಲು ಬಡ ಜೀವ

ನನ್ನೊಳಗಿದ್ದು ನನ್ನೊಳಗ-ಹೊರಗನಾಡಿಸೊ ಸಂಜೀವ

ನಿನ್ನರಿವ ಬಲ ಬೇಡ ನಿನ್ನಿರುವಿಕೆಯ ತೋರಿಕೊ ಭ್ರೂಣ

ಮೊದಲಾಗಲಲ್ಲಿಂದ ಅಂಬೆಗಾಲಿಟ್ಟು ಅರಿವಿನೆಡೆ ಪಯಣ ||

– ನಾಗೇಶ ಮೈಸೂರು

(Nagesha Mn)

(ಚಿತ್ರಕೃಪೆ : ಅಂತರ್ಜಾಲ / ಸೋಶಿಯಲ್ ಮೀಡಿಯಾ ಗೆಳೆಯರಿಂದ ಸಂಗ್ರಹಿತ/ರವಾನಿತ ; ಮೊದಲನೆಯ ಚಿತ್ರ ಶ್ರೀಧರ ಬಂಡ್ರಿಯವರ Sridhar Bandri ಲಲಿತಸಹಸ್ರನಾಮ ಪೋಸ್ಟಿನಿಂದ ಎರವಲು ಪಡೆದಿದ್ದು)

01529. ರಾಧೆಗೊಂದೆ, ಮಾಧವಗೆ ನೂರೊಂದೆ..!


01529. ರಾಧೆಗೊಂದೆ, ಮಾಧವಗೆ ನೂರೊಂದೆ..!

____________________________________________

ಕಟ್ಟಲೇನೆ ಕಾಲಗೆಜ್ಜೆ ?

ಇಡುವೆ ತಾನೆ ಜತೆಗ್ಹೆಜ್ಜೆ ?

ತಂದಿರುವೆನಲ್ಲೆ ಒಡವೆ ಪೆಟ್ಟಿಗೆ

ನಿನ್ನ ಸಿಂಗರಿಸೆ ಕುಣಿಯಲೊಟ್ಟಿಗೆ ||

ಕಟ್ಟೊ ನಿನ್ನಿಚ್ಚೆ ಮಾಧವ

ಕಣ್ಣಲಿದೆ ಆರಾಧನ ಭಾವ

ಬಚ್ಚಿಡಲಿದೆ ಕದ್ದು ಅರವಿಂದಾ

ಅವಸರಿಸದಿರು ನೀ ಕಟ್ಟಿರೆ ಚೆಂದ ||

ನೀನದೆ ಬದಲಾಗದ ರಾಧೆ

ಎಷ್ಟು ನೋಡಿದರೇನು ನಾನದೆ

ನೀನೆ ನೋಡಿ ನೀನೆ ನಿವಾಳಿಸುವೆ

ಹೊತ್ತಾಗೆ ಮುನಿವ ಯಮುನೆ ದಡವೆ ||

ಮೊದಲಟ್ಟಿಬಿಡು ಗೋವಲ್ಲಿ

ನಮ್ಮ ಬರುವಿಕೆಯ ಕಾದಿರಿಸಲಿ

ನೀನಾವರಿಸೆನ್ನ ತೊಡಿಸೊಂದೊಂದೆ

ಕ್ಷಣ ಯುಗವಾಗಲಿ ಮುಗಿಯದ ಧಂಧೆ ! ||

ನಿನ ಪರವಶತೆಗೇನೆನ್ನಲಿ ?

ನಾನೊಬ್ಬನೆ ನೆಲೆ ನಿನ್ನ ಮನದಲ್ಲಿ

ನಿನ್ನ ಬದ್ಧತೆ ನಿನಗೊಂದೆ ಹೆಸರು ರಾಧೆ

ನಿನ್ನಂತಾಗದ ನನಗೆ ನೋಡು ನೂರಾರಿದೆ ! ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media – received via Madhu Smitha – thank you 🙏👍😊)

01528. ಮೊದಲ ಪತ್ರ


01528. ಮೊದಲ ಪತ್ರ

___________________________

ಅಮ್ಮಾ ಹೇಳೆ ಬರೆಯಲೇನ ?

ಪತಿಗಿದುವೆ ಮೊದಲ ಪತ್ರ..

ಬರೆಯಲೇನು ತೋಚುತಿಲ್ಲವೆ

ಹೇಳಿಕೊಡರೆ ಯಾರು ಸೂತ್ರ ||

ಯಾಕೆ ಪೆದ್ದು ಮೇಲ್ಪುಟದ ಮಧ್ಯ

ಆರಂಭಿಸು ‘ಶ್ರೀ’ ಬರಹ ಸುಸೂತ್ರ

ಎಡತುದಿಗೆ ಹಾಕೆ ‘ಕ್ಷೇಮ’ ಸಾಕಾರ

ಬಲತುದಿಯಲಿಟ್ಟು ತೇದಿ ಜತೆಗೂರ ||

ಅಯ್ಯೊ ಅಮ್ಮ ಇದು ಪ್ರೇಮಪತ್ರ

ಬರೆಯಲೆಂತೆ ಲಗ್ನ ಪತ್ರಿಕೆ ತರಹ?

ಚಡಪಡಿಕೆ ದೂರ ಬಿಟ್ಟಿರದ ವಿರಹ

ಕ್ಷೇಮ ಸಮಾಚಾರವಲ್ಲವೆ ಸರಸ ||

ಗೊತ್ತೆ ಹುಡುಗಿ ನಾನಾಗಿದ್ದೆ ಒಮ್ಮೆ

ಅನುಕರಿಸೆ ಚೆನ್ನವೆ ಸಂಪ್ರದಾಯ

ನಡುವಲೆಲ್ಲ ನಿನ ವಿರಹ ಬರಹ

ತುಂಬೆಲ್ಲ ಪ್ರೀತಿ ಪ್ರೇಮದ ಕಾವ್ಯ ||

ಗೊಡ್ಡೆಂದಿದ್ದೆ ನೀ ಚಾಲಾಕಿ ಅಮ್ಮ

ಹೌದಲ್ಲ ಹೇಗೆ ಬರೆದರು ಅವ ನಲ್ಲ

ಬಿಡಿನ್ನು ಸಾಕು ಎನ್ನರಸ ಚೆನ್ನರಸ

ಎಂದಾರಂಭಿಸುವೆ ಮೊದಲ ಸಾಲು ||

ತುಂಬಿಸು ಮಗಳೆ ನಿನ್ನ ಪ್ರೀತಿಯಲ್ಲಿ

ನಡುನಡುವೆಯಿರಲಿ ವಾಸ್ತವದರಿವು

ಪತ್ರವಲ್ಲ ಕೇವಲ ಅಕ್ಷರದ ಭಾರ ಮಗು

ಜೀವನದ ಹೊಣೆ ಭರಿಸಲದೆ ಅಸ್ತಿಭಾರ ||

– ನಾಗೇಶ ಮೈಸೂರು

(Nagesha Mn)

(Picture source: Internet / social media received via FB friends – thank you ! can’t remember who sent it – just raise your hand in comments 😊🙏👍)

01527. ಗರಿ ಬಿಚ್ಚಿದ ಮಯೂರ..!


01527. ಗರಿ ಬಿಚ್ಚಿದ ಮಯೂರ..!

________________________________

ಕವಿ ಕತ್ತಲೆ ಮುಗಿಲ್ಮೋಡ

ಗಾಢ ಸೆಳೆತ ಮಳೆಯಾಗದೆ ಬಿಡ

ಬಿಸಿ ತಾಪವೊ ತಪನೆಯೊ ಕುದುರಿ

ಹೊದ್ದಿರಲಾಗದೆ ಗರಿ ಬಿಚ್ಚಿದನೆ ಮಯೂರ ||

ಒಳಗೆಂತದೊ ಪುಳುಪುಳಕ

ನವಿರೇಳಿಸಿತ್ತೆ ಮಾಡೇನೊ ಜಳಕ

ನಿಮಿರಿಸುತ್ತ ನೆತ್ತರು ಗರಿಗರಿ ಸಲಿಗೆ

ಕಣ್ಣ ತೆರೆಯುತಿತ್ತ ಕದ ಒಂದೊಂದಾಗೆ ||

ಕಣ್ಣೋ! ಕಣ್ಣೊಳಗಿಟ್ಟ ಕಣ್ಣೊ

ಗರಿಗರಿ ನೇಯುತ ಬೆಸೆದ ಹೆಣ್ಣೊ

ಕನಸಿನ ಲೋಕವೊ ಗಲಿರು ಗಲಿರ್ಹೆಜ್ಜೆ

ನಡಿಗೆಯ ನಾಟ್ಯಕೆ ತುಂತುರ ಹನಿಯೆ ಗೆಜ್ಜೆ ||

ಅಮರಾವತಿ ಭೂಮಿಯ ಸರದಿ ಮಯೂರ ತಾನೆ ದೇವರಾಜ ಸನ್ನಿಧಿ ಹುಬ್ಬು ರೆಪ್ಪೆ ಪಾಪೆ ನೇತ್ರ ನೇಯ್ಗೆಯ ದಾರ ದಳದಳ ಬಿಚ್ಚುವ ಹೂವಂತೆ ನವಿಲೆ ಸರದಾರ ||
ಕುಣಿದಾಡುವ ಪರಿ ಚಾಮರವೆ

ಬಿಚ್ಚಿದಂತಿದೆ ಬೆನ್ನಲಿ ಐರಾವತವೆ

ವೈಭೋಗವದು ಉದಿಸುತ ನೀ ನಿಂತಲ್ಲೆ

ಎಣಿಸುತಲಿದೆ ನಡಿಗೆ ನಾಟ್ಯಕೆ ಹೊಂದಿಸಲೆ! ||

ಬಣ್ಣನೆ ವ್ಯರ್ಥ ಬಣ್ಣಿಸದೆಲ್ಲಾ ಸೊಗ

ಗರಿ ಕಣ್ಣ ಸುತ್ತ ಚದುರಿದೆಳೆಗೂ ಬೆರಗ

ಹೇಳಲೇನು ಬಿಡು ಅವನಿತ್ತಾಗಿದೆ ಮುಕುಟ

ಕತ್ತನೆ
ರ್ಯಕಿಟ್ಟ ಮುಹೂರ್ತ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media – received via Muddu Dear,Yamunab Bsy thank you both 😊🙏👍)

01526. ಗಂಡು ನವಿಲೆ ದೇವರಾಜ..!


01526. ಗಂಡು ನವಿಲೆ ದೇವರಾಜ..!

_________________________________

ಗೌತಮನಿತ್ತ ಶಾಪ ಇಂದ್ರಗೆ

ಸಹಸ್ರ ಯೋನಿ ಮೈಯೊಳಗೆ

ಕರುಣಿಸೆಂದಾ ಕರುಣಾಜನಕ

ಮೈಯೆಲ್ಲಾ ಕಣ್ಣಾದ ಸಹಸ್ರಾಕ್ಷ ||

ಬಲು ಚಿಂತಿತನಾ ದೇವರಾಜ

ಕೊರಗುತಿದ್ದ ಆಗಲೆಂತು ಪ್ರಕಟ?

ಅಡ್ಡಾಡುತಿತ್ತಲ್ಲೊಂದು ಗರಿ ಹಕ್ಕಿ

ಬಣ್ಣವಿಲ್ಲದ ಬರಿ ಹೊದಿಕೆ ತೂಗಿ ||

ತಟ್ಟನೊಂದು ಚಿಂತನೆ ತಾ ಸಿದ್ಧ

ಕರೆದನದನು ಮುದ್ದಿಸಿ ಸಮೃದ್ಧ

ಕಣ್ಣಾಗೊ ಬಯಕೆ ನಿನ್ನ ಗರಿ ತುಂಬ

ಚೆಂದ ನೆಲೆಸಲೇನು ಹೆಚ್ಚಿಸಿ ನಿನ್ನಂದ? ||

ಹೆಣ್ಣು ನಾನೊಲ್ಲೆ ನೀ ಗಂಡೆಂದಿತು

ಚಂದವೊ ಕುಂದೊ ಸಂಶಯವಿತ್ತು !

ಕಣ್ಣಿಗೆ ಬಿತ್ತಾಗ ಅಡ್ಡಾಡಿತ್ತಲ್ಲೆ ಗಂಡು

ಬೇಡಿದ ನೀಡಲೆ ನಿನಗಿಲ್ಲದ ಸೊಗಡು? ||

ಹಿರಿ ಹಿರಿ ಹಿಗ್ಗಲಿ ಕುಣಿಯಿತಾ ಪಕ್ಷಿ

ಕಿತ್ತೊಂದೊಂದನೆ ಅಂಟಿಸಲಲ್ಲೆ ಅಕ್ಷಿ

ಬಗೆಬಗೆ ಬಣ್ಣ ಕೋರೈಸುವ ಗರಿ ಕಣ್ಣು

ಗರಿ ಬಿಚ್ಚೆ ಸೋತು ಶರಣಾದಳು ಹೆಣ್ಣು ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via Muddu Dear,Yamunab Bsy – thank you very much ! 🙏😊👍)

01525. ಪ್ರೀತಿಗೂ ಜಾಹೀರಾತು!


01525. ಪ್ರೀತಿಗೂ ಜಾಹೀರಾತು!

______________________________

ನಿನ್ನ ಕಂಡ ಮೊದಲ ಗಳಿಗೆ

ಸೋತೆ ಚಂದ ಮಾತಿಗೆ

ಎಲ್ಲಿ ಕೊಡಲೆ ಜಾಹೀರಾತು

ಬೇಡೆ ನಿನ್ನ ಪ್ರೀತಿಗೆ ? || ನಿನ್ನ ||

ಆಧುನಿಕ ಜಗ ನವ ನವೀನ

ಒಪ್ಪಲೆಲ್ಲೆ ಹಳೆಯ ರೀತಿ

ಕೈ ಬರಹ ಪತ್ರ ಸಂವಿಧಾನ

ತಲುಪೊ ಮುನ್ನ ಪರರಾಸ್ತಿ || ನಿನ್ನ ||

ಕಾಳಿದಾಸ ಮೇಘ ಸಂದೇಶ

ಭಾವನೆ ಬಂಧ ಸ್ಪೂರ್ತಿ

ನಿಸ್ತಂತು ಕ್ಷೇತ್ರ ಸಾಕ್ಷಾತ್ಕಾರ

ಬೆರಳ ತುದಿಗೇ ಮಾಹಿತಿ || ನಿನ್ನ ||

ಬೆನ್ನ ಹಿಂದೆ ಬಿದ್ದು ಸುತ್ತುವ

ಹಳೆ ಅಮರ ಪ್ರೇಮಿ ಪೆದ್ದ

ಚಾಲಾಕಿ ಪೋನ ಸಂದೇಶ ಸಾಕು

ದೃಶ್ಯ ಕಾವ್ಯ ಶ್ರಾವ್ಯ ಸಮೃದ್ಧ || ನಿನ್ನ ||

ಮುಖತಃ ಭೇಟಿ ಘಟಿಸೊ ಮುನ್ನ

ನಿನ್ನ ಮಾರಬೇಕು ನೀನೆ ಸರಕು

ಸರಕಾಗಲಿಲ್ಲಿ ಮಾರಾಟದ ವಸ್ತು

ನೀ ಜಾಹೀರಾತು ಹಾಕಬೇಕು || ನಿನ್ನ ||

– ನಾಗೇಶ ಮೈಸೂರು

(Nagesha Mn)

(Picture source: https://goo.gl/images/RUFB6V)

01524. ತುಂಟ ಪೋರಿ..


01524. ತುಂಟ ಪೋರಿ..

______________________________

ತುಂಟಿಯವಳು ಜಗಳಗಂಟಿ

ಅಪ್ಪಿ ತಪ್ಪಿ ಹೆಣ್ಣಾದ ಜಗತಿ

ಗಂಡುಭೀರಿ ಬಜಾರಿಯವಳು

ಸೋಲದ ಜಾಯಮಾನ..! ||

ಕೈಲೊಂದು ಕೋಲ ಯಜಮಾನತಿ

ಬಾರಿಸೆ ನೋಡದೆ ಮುಖಾಮೂತಿ

ಗಂಡುಗಳೆ ಹೆದರಿ ತಾವಾಗಿ ಪರಾರಿ

ಹುಡುಗಿಯರ ತಂಡಕವಳದೇ ಸುಪಾರಿ..| ||

ಗೋಲಿ ಗಿಲ್ಲಿ ಲಗೋರಿ ಹುಡುಗರ ಜತೆ

ತಾನೆ ಓಡಿಸೊ ಚಕ್ಕಡಿ ಕಡಿಮೆ ಮಾತೆ?

ನಡುರಾತ್ರಿಯಲೊಬ್ಬಳೆ ಅಲೆದು ಬಹಳು

ಅವಳಾರ್ಭಟಕೆ ಸದ್ದಡಗಿ ಮೋಹಿನಿ ಖುದ್ಧು ||

ಗಂಡಂತಿಹಳು ಗಂಡಿನ ಹಾಗೆ ನಡೆನುಡಿ

ಹೆತ್ತವರ ಕಾಳಜಿ ತಾನೆ ಮಾಡುವಳಂತೆ

ಸಂಸಾರದ ಜತೆಯಲಿ ಹೊರಟರೆ ಪೇಟೆಗೆ

ಭೀಮಸೇನನಂತೆ ಕಾವಲು ಎತ್ತಿನ ಗಾಡಿಗೆ ||

ಅಲ್ಲವೆಂದಲ್ಲ ಮೃದುಲೆ ನಯನಾಜೂಕ ಲಲನೆ

ಹೊರಗಿನ ಕಾಠಿಣ್ಯ ಒಳಗಿರಿಸಿದೆ ಮೃದು ಹೃದಯ

ಕಷ್ಟಕೆ ಕರಗೊ ಮರುಗೊ ಕಣ್ಣೀರಿಡುವ ಹೆಣ್ಣುಜೀವ

ನೀಡಲೆಂತು ತೀರ್ಪು ಬರಿ ಹುಡುಗಾಟದ ವಯಸು ||

– ನಾಗೇಶ ಮೈಸೂರು

(Nagesha Mn)

(Picture source via internet / social media sent by Muddu Dear – thanks madam 🙏👍😊)

01523. ಸಾಕು ಬಿಡೆ ನಟನೆ…


01523. ಸಾಕು ಬಿಡೆ ನಟನೆ…

_______________________________

ನಟಿಸಬೇಡವೆ, ನಾಟ್ಯ ಮಯೂರಿ..

ಕಾದಂತೆ ನೀನು ಯಾರದೊ ದಾರಿ!

ನಟನವಾಡಿಬಿಡು ಇದೆ ರಂಗಮಂಚ

ತೆರೆದೆಲ್ಲ ನಿನ್ನ ರಂಗುರಂಗಿನ ಕುಂಚ ||

ಬರಲೆಂದು ಕಾಯೆ ವರ್ಷ ತುಂತುರು

ಚದುರಿದಾ ಮೋಡ ಕಟ್ಟಿ ತಹರಾರು?

ತಂದರೂ ಹಿಂಡಿ ಹಿಪ್ಪೆಯಾಗೆ ಜೋರು

ಕಾಯಬೇಡ ನವಿಲೆ ಭುವಿ ನಿನ್ನ ತೇರು ||

ನೋಡಲ್ಲಿ ಮಯೂರಿ ಕಾದಿಹಳೆ ದಾರಿ

ನೀ ಬಿಚ್ಚೆ ಗರಿಯ ತಾನಾಗಲೆ ಸಹಚರಿ

ನೀನಿಡಲು ಹೆಜ್ಜೆ ಲಯಬದ್ಧ ನಾಟ್ಯದಲಿ

ಸುತ್ತುವಳು ಸುತ್ತಲೆ ನಿನ್ನತ್ತ ಪ್ರೇಮದಲಿ ||

ಹಸಿರು ನೀಲಿ ಬೂದು ಕಪ್ಪು ಬಿಳಿ ಕಂದು

ತಪ್ಪುತಿದೆ ಲೆಕ್ಕ ಎಣಿಕೆ ಸಿಗದು ಬಚ್ಚಿಟ್ಟಿದ್ದು

ಬಿಚ್ಚಿಬಿಡು ಚಾಮರದಿ ಶೋಭಿಸಲಿ ನಕ್ಷತ್ರ

ಬಯಲಿಗಿಟ್ಟಂತೆ ಬಣ್ಣಬಣ್ಣ ಹೂವಿನ ಚಿತ್ರ ||

ಯಾರಿಟ್ಟ ವಿನ್ಯಾಸ? ಸಹನೆಯಲಿ ಕೂತು

ಸೃಷ್ಟಿಕರ್ತನೆ ಸ್ವತಃ ಜೋಡಿಸಿಹ ಸಾಬೀತು

ಮರುಳಾದ ಮಾಧವನೆ ಕದ್ದ ಮುಡಿಗೆಂದು

ಚಿಣ್ಣರು ಬಚ್ಚಿಡೆ ಪುಟದೆ ಮರಿ ಹಾಕಲೆಂದು ||

– ನಾಗೇಶ ಮೈಸೂರು

(Nagesha Mn)

(Picture Source – Internet / social media received via Yamunab Bsy – thank you 🙏😊👍)

01522. ವೈಕುಂಠ ಏಕಾದಶಿ..


01522. ವೈಕುಂಠ ಏಕಾದಶಿ..

______________________________

ವೈಕುಂಠದಲಿಂದು

ಕದ ತೆರೆವ ಹೊತ್ತು

ಉತ್ತರಾಯಣದತ್ತ

ಸಂಕ್ರಮಣಕೆ ಸನ್ನದ್ಧು ||

ತೆರೆದ ಬಾಗಿಲ ಕರೆ

ಏಕಾದಶಿ ದಿನದಲೆ

ಮುಕ್ಕೋಟಿ ದೇವರು

ಜತೆ ಭುವಿಗೆ ಬಂದರೆ ||

ಬಹ ಹರಿಯ ಕಾಣೆ

ಇಳೆಯೆಲ್ಲೆಡೆ ಸಾಲು

ದೇಗುಲವೆಲ್ಲ ಸರತಿ

ಜಾವದಿಂದಲೆ ಸೇರು ||

ಬೇಕೊಂದು ಸೇತುವೆ

ಧರಣಿ ಜತೆ ವೈಕುಂಠ

ಅದಕೆಂದೆ ಈ ನಂಟು

ಗಂಟು ಬಿಚ್ಚಿದರೆ ಪಾಲು ||

ಉಪವಾಸವಿದ್ದು ಸೇವೆ

ದಿನವೆಲ್ಲ ಪೂಜೆ ತಪನೆ

ವೈಕುಂಠದೊಂದು ಸ್ಥಾನ

ಬೇಕಿರೆ ಪಡುತ ಯಾತನೆ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via Nandini Krishnakumar – thank you 🙏😊)

01521. ರಸಋಷಿಯ ನೆನೆದು…


01521. ರಸಋಷಿಯ ನೆನೆದು…

________________________________

ಗೂಗಲಿನಲಿ ಇಂದಾರೊ

ಬಂದರು ಮಹನೀಯರು !

ರಸಋಷಿಯೆಂದರಿನ್ನಾರೊ?

ವಿಶ್ವಮಾನವನಿಗಿತ್ತ ಬಸಿರು! ||

ಕನ್ನಡವೆನಲು ಕುಣಿ ಕುಣಿದು

ಕುಪ್ಪಳಿಸಿದೀ ಕವಿ ಹೃದಯ

ಎಲ್ಲಾದರು ಇರು ಎಂತಾದರು

ಕನ್ನಡಿ ಕನ್ನಡದಾ ಕಾವ್ಯಾಲಯ ||

ಮಲೆನಾಡಲಿ ಬೇರೂರಿ ನೆಲೆ

ಕೊಂಬೆ ಚಿಗುರೆಲ್ಲೆಡೆಗೆ ಹರಡೆ

ಪದಪದ ಕೃಷಿ ಕುಸುಮ ವೃಷ್ಟಿ

ಕಟ್ಟಿ ಕನ್ನಡಮ್ಮನ ಕೊರಳಿಗಿಡೆ ||

ಯಾವಜನ್ಮದ ಮೈತ್ರಿಗೊ ಮಾಣೆ

ಮಾನಸದಿ ನೆಲೆ ಕನ್ನಡದ ಹೆಮ್ಮೆ

ದೋಣಿ ಸಾಗಿ ದೂರ ತೀರ ಕಾಣೆ

ಕವಿಕಾವ್ಯ ಹುಟ್ಟಾಯ್ತದೆ ಹಿರಿಮೆ ||

ಬಿರುದು ಬಾವಲಿ ಬಿಡು ಅಲಂಕಾರ

ರೋಮಾಂಚನವಿತ್ತ ಸಾಹಿತ್ಯ ಸಾಗರ

ಚಿಗುರೊ ಹನಿಯೊ ಟಿಸಿಲಾಗಿ ಸಾವಿರ

ಪಸರಿಸಿದೆ ಕಂಪ ಹರಿಸಿ ಮಹಾ ಪೂರ ||

– ನಾಗೇಶ ಮೈಸೂರ

(Nagesha Mn)

(Picture source :today’s google doodle)

01520. ರಾಧೆಯವಳೆತ್ತರದಾಳು..


01520. ರಾಧೆಯವಳೆತ್ತರದಾಳು..

________________________________

ಸ್ಪರ್ಶಿಸಲೆ ನಿನ ಪಾದ?

ಕಣ್ಣೀರಲೆ ತೊಳೆದು ಶುದ್ಧ

ಸಂತರ್ಪಿಸಲೆ ಅನುರಾಗ?

ರಾಧೆ, ನೀನಾದೆ ಅಂತರಂಗ ||

ಕಿರಿಯ, ನೀ ಹಿರಿಯಾಕೆ

ಹಿರಿಕಿರಿಯ ಗೊಡವೆ ಬೇಕೆ?

ನಿನ್ನರ್ಪಣ ಭಾವ ಚಿತ್ತ

ನೋಡೀ ಭುವಿದೇವನೂ ಸೋತ ||

ಕೆನ್ನೆಗೊತ್ತಿದೆನಲ್ಲ ಪಾದ

ಜುಳುಜುಳು ನದಿ ಕಣ್ಣೀರಾದ

ಭಾವದೆ ತೊಳೆದ ಪ್ರೇಮ

ಕುಳುಗುಟ್ಟಿ ಕಚಗುಳಿ ಸಂಭ್ರಮ ||

ನೀನದೆಷ್ಟು ನಿರಾತಂಕ

ಇನಿತೂ ಚಿಂತಿಸದ ನಿನ ಲೆಕ್ಕ

ಕೊಡು ಎಂದಾಗ ಕೊಟ್ಟೆ

ಪಾದವೊ ಪರವಶವೊ ಪರಾಕಾಷ್ಠೆ ||

ಕೊಡಲೇನ? ನಿರುತ್ತರ

ಶರಣಾದೆ ನಿನ ಪಾದದೆ ಪೂರ

ಓಲೈಸುವರೆಲ್ಲರು ನನ್ನ

ನಾನಾರಾಧಿಸುವೆ ಬರಿ ನಿನ್ನನ್ನ! ||

– ನಾಗೇಶ ಮೈಸೂರು

(Nagesha Mn)

(Picture source internet / social media received via Yamunab Bsy – thank you 😊👍🙏)

01519. ಏನಿದೇನು ರಂಗಿನಾಟ ?


01519. ಏನಿದೇನು ರಂಗಿನಾಟ ?

_____________________________

ಏನಿದೇನೆ ರಂಗಿನಾಟ ?

ರಾಧೇ, ನಿನಗೇನೀ ಚಟ ?

ನಾನಿಹೆನೆಂದು ಶ್ಯಾಮಲ ವರ್ಣ

ನೀ ಹಚ್ಚುವುದೇನೆ ನನದೆ ಬಣ್ಣ ? ||

ಸಾಕು ಸುಮ್ಮನಿರೊ ಮುರಳಿ

ತಾಳಲಾರೆ ಕೀಟಲೆ ಹಾವಳಿ

ನನ ಗೌರವರ್ಣ ಹೊಗಳುತಲೆ

ನೀ ಕಪ್ಪೆಂದರೆ ಹೇಗೆ ಸಹಿಸಲೆ ? ||

ಹುಚ್ಚಿ , ಅಂದುಕೊಳಲಿ ಬಿಡು

ಹಾಡಿ ನಲಿವ ಹೊತ್ತು ನೋಡು

ನನ್ನಂತರಂಗ ನಿನ್ನ ಗೌರ ವರ್ಣವೆ

ಮೀಸಲೆ ನಿನಗೆ ಕಪ್ಪಲಿ ಬಚ್ಚಿಟ್ಟಿಹೆ ||

ರಂಗಿನ ಲೆಕ್ಕ ನನಗಿಲ್ಲ ಮಾಧವ

ಲೆಕ್ಕಕಿಡೆನು ಛೇಡಿಸಲೆನ್ನ ಸ್ವಭಾವ

ನೀನೊ ಜೀವದ ಜೀವ ನನ ಭಾವ

ನಿನ್ನ ಹಂಗಿಸೆ ತಾಳದೊ ನನ್ನೀ ಜೀವ ||

ಬಿಡು ಸಖಿ ನೋಡೆಷ್ಟು ಮೋಹಕ

ಈ ವರ್ಣ ಭಂಗಿ ನಾಟ್ಯದ ಸುಖ

ಎಲ್ಲ ಮರೆತು ಕಟ್ಟುವ ನಮದೆ ಜಗ

ಕಪ್ಪ ಲೇಪಿಸೆ ಬಣ್ಣದೋಕುಳಿ ಸೊಗ ||

– ನಾಗೇಶ ಮೈಸೂರು

(Nagesha Mn)

(Picture source internet / social media : received via Madhu Smitha – thank you 🙏😊👍👌)

01518. ನೀ ನನಗೆ, ನಾ ನಿನಗೆ


01518. ನೀ ನನಗೆ, ನಾ ನಿನಗೆ

______________________________

ಇದು ಹೊಂದಾಣಿಕೆ ಬದುಕಕ್ಕ

ನೀ ಕೇರು ಮೊರದಲ್ಲಿ ಅಕ್ಕಿ

ಜೋಪಾನ ಚೆಲ್ಲೀಯೇ ನೆಲಕೆ

ಬಿದ್ದರು ನಾ ಆಯುವೆ ಮೇಯ್ವೆ ||

ಗೊತ್ತಕ್ಕ ತುತ್ತಿನ ಕೂಳು ತತ್ವಾರ

ಬದುಕಲ್ಲ ಸಾಹುಕಾರ ಮೊತ್ತ

ಕೊಡಲಿದ್ದು ಬಡವನ ಭಂಡಾಟ

ಮೊಂಡಾಟ ದೋಚುವ ಕೊಡದೆ ||

ಹೌದಕ್ಕ ನಿನ ನೆರಳಲ್ಲಿದೆ ಕೂಸು

ಪ್ರತಿ ಹೊಟ್ಟೆ ಸಂಭಾಳಿಸಬೇಕು

ನನಗು ನೆರಳಿದೆ ಮನೆಗೊಡೆಯ

ಚಿಳ್ಳೆಪಿಳ್ಳೆ ಹಸಿದು ಕಾಯೆ ದಾರಿಯ ||

ಬಿಡೆ ಚಿಂತೆ ಅಕ್ಕ ನನ್ನವಳು ಕಾವು

ಇಡುತಾಳೆ ಮೊಟ್ಟೆ ತಪ್ಪದೆ ದಿನದಿ

ಹಸಿದ ಕಂದಮ್ಮನಿಗುಣಿಸು ಅದನೆ

ಮಿಕ್ಕುಳಿದವು ಮರಿ ದಾರಿ ಸರಿಯೆ? ||

ನೀನುಂಡು ಮಿಕ್ಕಿದ್ದೆ ಸಾಕೆ ನನ್ನೊಡತಿ

ನಾನುಂಡು ನೀಡುವೆ ಮತ್ತೆ ನಿನಗೆ

ನಾನಾಗೆ ಬಾಡೂಟದ ಸರಕು ನಡುವೆ

ನನ್ನ ವಂಶಾವಳಿ ಮತ್ತದೆ ಹೊಂದಾಣಿಕೆಗೆ ||

– ನಾಗೇಶ ಮೈಸೂರು

(Nagesha Mn)

(Picture source – internet / social media received via FB friends – thanks!)

01517. ಕುಹೂ ಕುಹೂ ಕುಹೂ..


01517. ಕುಹೂ ಕುಹೂ ಕುಹೂ..

______________________________

ಕುಹೂ ಕುಹೂ ಕೋಗಿಲೆ

ಸುರಿಸೆ ನಿನ್ನಿಂಪಿನ ಸುರಿಮಳೆ

ದನಿಯಲ್ಲೆ ಹನಿಯ ಸಿಂಪಡಿಸೆ

ಕೇಳೆ ಕೂತಲ್ಲೆ ಮನ ಚಡಪಡಿಸೆ ! ||

ನೀನೆಳೆವ ರಾಗ ಮೋಹಕ

ಚಿಗುರೆಲೆ ಮೆಲ್ಲುತ ಚುಂಬಕ

ಕರೆದೆಯೇನೆ ಮಾತಿಗೆ ಸಖನ

ಮಾತೇ ಹಾಡಾಗೆ ಸೋಲದಿಹನಾ? ||

ನಡುನಡುವೆ ಬೇಕೆ ಮೌನ?

ಕಳೆದುಹೋಯ್ತೆ ಎಲ್ಲೊ ಧ್ಯಾನ

ಮೆಲ್ಲುವ ಹೊತ್ತಲಿ ಅಲ್ಪ ವಿರಾಮ

ಮತ್ತದೊ ಅನುರಣ ಬಂತೇ ಸಂಭ್ರಮ! ||

ಯಾಕೆಲ್ಲರ ಮನ ಸಹಚರ

ನಿನ್ನ ದನಿಯಂತಾಗೆ ಮಧುರ

ತವಕಿಸುತ ಇಂಚರದ ಗುನುಗು

ಸದ್ದಡಗಿಯು ನಿನ ರಾಗದ ಗುನುಗು ||

ಕಾಡಬೇಡ ನಿಂತರು ದನಿ

ಅನುರಣಿಸಿದೆ ಮನ ಸಂದಣಿ

ಅನುಭೂತಿ ದಿವ್ಯ ಗಂಧರ್ವ ಗಾನ

ಧನ್ಯವಾದ ನಿನಗೆ ಸುಖ ನೀಡಿದ ಕ್ಷಣ ||

– ನಾಗೇಶ ಮೈಸೂರು

(Nagesha Mn)

(Picture Source – https://kn.m.wikipedia.org/wiki/ಕೋಗಿಲೆ#/media/ಚಿತ್ರ%3AAsian_Koel_(Male)_I_IMG_8190.jpg)

01516. ಜಾತಕದ ಸುತ್ತ…


01516. ಜಾತಕದ ಸುತ್ತ…

___________________________

ನಾ ಜಾತಕ ನೋಡದ ಜಾತಕ ಪಕ್ಷಿ

ನನಗೂ ಕುತೂಹಲ ಏನಿದೆ ಬಹುಶಃ ?

ಅಕ್ಷಿಗೆಟುಕದ ಅಕ್ಷಾಂಶ ರೇಖಾಂಶ

ಭವಿತ ರೇಖಾಲೇಖ ಸಿಕ್ಕೀತೆ ಭಾಗಶಃ? ||

ಹಣೆಬರಹದ ಗೀಟುಗಳದೆಷ್ಟಿವೆ ಕಾಣೆ

ಕಾಣದ್ದೆಷ್ಟೊ ಕಂಡಿದ್ದಷ್ಟೂ ಗೊಂದಲವೆ

ಅದರೇನು ಬಿಡದು ತೀಡುವ ಕುತೂಹಲ

ಮಾತಿನಾ ಲಯದಲಿದ್ದೀತೇನೊ ಯೋಗ ? ||

ಚಾಚಿದಾ ಹಸ್ತ ರೇಖೆ ಯಾವುದಿದೆ ಪ್ರಶಸ್ತ ?

ನಿಲುಕಿಗೆಟುಕದ ನಕ್ಷೆ ತುಂಬಿ ತುಳುಕಿ ವ್ಯಸ್ತ

ಓದಬಲ್ಲ ಕುಶಾಗ್ರಮತಿಗಳೇನ ಹೇಳುವರೊ?

ಮತಿಯೊಳಗಿನಂತಃಕರಣ ಗೊಂದಲದ ಬೀಡು ||

ಆದರೇನು ಬಿಡದು ಸೋಜಿಗ ಅರಿವಾಸೆ ಭವಿತ

ಯಾಕದರ ಹಿಂದೆ ಬೆನ್ನಟ್ಟುವ ಮನದಾವರ್ತ?

ಜ್ಞಾನವೊ ವಿಜ್ಞಾನವೊ ಅಜ್ಞಾನಿಗೆಲ್ಲ ಒಂದೇ ಮೂಸೆ

ಅರಿಯಲಾಗದ ಮಾತ್ರ ಅವಹೇಳನಕೆ ದಕ್ಕುವುದೆ ? ||

ಅರಿಯಲಿ ಬಿಡಲಿ ನಡೆವುದು ನಡೆಯಬೇಕಾದ್ದು

ನಡೆವುದೇನೆಂದು ಅರಿವುದು ಕೌತುಕದ ಸರಹದ್ದು

ನೀಡಲದೆ ತುಸು ಮನದ ಸಮತೋಲನಕಡಿಪಾಯ

ಮಿಕ್ಕೆಲ್ಲ ನಗಣ್ಯ ನಡೆಯಲಿ ನಡೆಸುವವನ ಅಧಿಕಾರ ||

– ನಾಗೇಶ ಮೈಸೂರು

೨೫.೧೨.೨೦೧೭

(Picture source : google search)

01515. ಜಗ ಮರೆತಿಲ್ಲ…


01515. ಜಗ ಮರೆತಿಲ್ಲ…

______________________

ರಾಧೆ, ಯಾರೆ ನಿನ್ನ ಕೃಷ್ಣ ?

ಯಾಕವ ನಿನಗೆ ಮೃಗತೃಷ್ಣ ?

ಕಟ್ಟಿಕೊಂಡ ಸಾವಿರ ಸಾವಿರ

ಇನ್ನೊಂದೇನು ಮಹಾಲೆಕ್ಕ ? ||

ಅದೆ ಸೋಜಿಗ ನನಗೂ ಗೋಜಲು

ಪ್ರೇಮ ನಮದು ಎತ್ತರದ ಮಜಲು

ಯಾಕೊ ಕಾಣೆ ಒಯ್ಯಲಿಲ್ಲ ಮಹಲಿಗೆ

ಸಾವಿರದಲೊಂದಾಗೆ ಬಿಡದ ಒಲವೆ ||

ಬಿಡು ಲೆಕ್ಕವಿತ್ತೆ ಹದಿನಾರು ಸಾವಿರ ?

ಮೇಲೆಂಟು ಅಷ್ಟ ಮಹಿಷಿ ಜತೆ ಪ್ರವರ

ಮತ್ತೊಂದಾಗೆ ನವಮಿ ಆಗುತಿತ್ತೆ ಹೊರೆ ?

ಮುಳುಗಿಸಿದ ನಿನ್ನ ಬರಿ ಪ್ರೀತಿ ಆರಾಧನೆ ||

ಒಲವ ಸ್ವಾರ್ಥ ಗೀಳದು ಉತ್ಕಟ ನೋವೆ

ಗುಂಪಲೆಂತು ಪಡೆವೆ ಗೋವಿಂದನೊಲವೆ ?

ಬೇಕಿದ್ದರೆ ಬಾ ಗೋಕುಲದೆ ಕಾಯುವೆನೆಂದೆ

ಬರಲಾರದವನ ನಿಷ್ಠೆಯ ಪರಿ ತವಕ ಪರಿಕಿಸೆ ||

ಅವ ಬರಲಿಲ್ಲ ಕೈ ಸಿಗಲಿಲ್ಲ ನೀನಾದೆ ಒಂಟಿ

ಬಿಡಲಿಲ್ಲ ಕೈ ಹಿಡಿಯಲಿಲ್ಲ ಮಾತಲಷ್ಟೆ ಜಂಟಿ

ನಿಮ್ಮಿಬ್ಬರ ಕಥೆ ನಿಮಗೇ ಸರಿ ಅರ್ಥವಾಗದಲ್ಲ

ಒಪ್ಪಲೆಬೇಕು ಯುಗದಾಚೆಗು ಜನ ನಿಮ್ಮ ಮರೆತಿಲ್ಲ ! ||- ನಾಗೇಶ ಮೈಸೂರು

(Nagesha Mn)

(Picture source: Internet / social media received via FB friends – sorry, properly could not keep track who sent it, those who sent can mention in comment 😊)

01514. ರಾಧೆಗೆ ಬಾಧೆ, ಕೃಷ್ಣಗೆ ಶೋಧೆ !


01514. ರಾಧೆಗೆ ಬಾಧೆ, ಕೃಷ್ಣಗೆ ಶೋಧೆ !

_______________________________________

ಬಿಡು ಕಟ್ಟಬೇಡವೆ, ಕಾಲು ಕಟ್ಟಬೇಡವೆ, ರಾಧೆ..

ಗುಟುಕಿದ್ದಂತೆ ಸುಖವೆ, ಸಖಿ ಗುಟುಕಿರದೆ ಬಾಧೆ? ||

ಹೇಗೆ ಕಟ್ಟಲೊ, ಕೃಷ್ಣ ಕಟ್ಟದೆ ಹೇಗಿರಲೊ?

ಕೊಟ್ಟರೆ ನಿನಗೆ ಪ್ರೀತಿ, ಕೊಟ್ಟೆಯಲ್ಲ ಸಂದಿಗ್ದ ?||

ದೂರಬೇಡವೆ, ಮನಕೆ ತುಂಬಾ ಭಾರವೆ !

ಭೂಭಾರ ಘನಭಾರ, ನೀನಾದರು ಆಗಿಸೆ ಹಗುರ ||

ದೂರಿದಲ್ಲವೊ, ನಿನ್ನ ಹೊರೆಯ ಬಲ್ಲೇನೊ..

ಹೆಣ್ತನದೀ ಭೂಭಾರ, ಇನ್ನಾರಲಿ ಹೇಳಿಕೊಳಲೊ? ||

ಯಾರು ಅರಿತರೆ? ನನ್ನ ಮನಸ ನೀನರಿತ ಪರಿ..

ನಾನರಿತೂ ಅಸಹಾಯಕ, ಕೊಟ್ಟೆನಷ್ಟೆ ನವಿಲ ಗರಿ ||

ಕೊಟ್ಟೆಯೊ.. ಬಿಟ್ಟೆಯೊ.. ಬಿಡು ಬಿಡು ಹೋಗಲಿ

ಸುಮ್ಮನಿರು ಅರೆಗಳಿಗೆ, ಒರಗುವೆ ನಿನ್ನಾ ಮಡಿಲಲಿ ||

ಈ ಗಳಿಗೆ ಸುಖವಾಗಲೆ ಶಾಶ್ವತ, ನಿನ್ನವನೀ ಸಖ

ಜಗವೆಲ್ಲ ಮರೆತು ಮಲಗಿಬಿಡು, ಎಚ್ಚರದೆ ನಾನಿಲ್ಲ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via FB friends)

01513. ಒಂದರೊಳಗೊಂದು…


01513. ಒಂದರೊಳಗೊಂದು…

________________________________

ನಭಕೊಂದು ರಂಗವಲ್ಲಿ

ದಿಗಂತಕೊಂದು ಚಿತ್ತಾರ ಧಾಳಿ

ಬಡಿದ ರೆಕ್ಕೆ ಹಡೆದ ಯಾನ

ತುತ್ತಿದೆ ಕೈಲಿ ಜೋಪಾನ ! ||

ತಿಳಿನೀರಿಗು ತಿಳಿಗೇಡಿ ಸೂರ್ಯ

ಚೆಲ್ಲಿಬಿಟ್ಟ ಹೊಂಗಿರಣದ ಸಂಕಲನ

ಮೋಹಕ ಫಳಗುಟ್ಟಿದೆ ಶರಧಿ

ಮೈಮರೆತೆಯೊ ಬುತ್ತಿ ತಳದಿ! ||

ಹಾರೆ ಇಂಧನವೆಲ್ಲ ಜೈವಿಕ

ವಿಮಾನವಲ್ಲ ಮೆದುಳಾ ಕೈಚಳಕ

ನಡುವಲಿಲ್ಲ ನಿಲ್ದಾಣ ವಿರಾಮ

ಲೆಕ್ಕಾಚಾರ ತಪ್ಪದಂತೆ ಪಯಣ ||

ವಿಲವಿಲನೆ ಒದ್ದಾಟ ಖಚಿತ

ಉಡದಂತೆ ನಖದಿ ಭದ್ರ ಹಿಡಿತ

ತಪ್ಪೇನಿದೆ ಗುಟುಕಿನ ಸರಪಳಿ

ಇಂದಲ್ಲ ನಾಳೆ ನಮ್ಮೆಲ್ಲರ ಪಾಳಿ ||

ಬಿಡು ಜಗಕದುವೆ ವಿಸ್ಮಯ

ಹೋರಾಟದ ಬಾಳಲೆ ಸೌಂದರ್ಯ

ತೆರೆದೊಡೆ ಪುಟ ನವರಸವೆ

ತುತ್ತ ಕಾದಿವೆ ಮರಿ, ನನ್ನ ಗಮನವೆ ||

– ನಾಗೇಶ ಮೈಸೂರು

(Nagesha Mn)

(Picture source from Internet / social media received via Muddu Dear – thanks madam 😊👍👌🙏)

01512. Divine..


01512. Divine..

_______________

ಪರಮಾತ್ಮನ

ಭಕ್ತಿಯಲ್ಲಿ

ಅವಳು

ಡಿವೈನೊ ಡಿವೈನು..🙏🙏🙏

ನನದೂ ಅಷ್ಟಿಷ್ಟು

ಅಳಿಲು ಸೇವೆ:

ರೆಡ್ ವೈನು 🍷🍷🍷

ಇಲ್ಲಾ

ವೈಟ್ ವೈನು !🥂🥂🥂

– ನಾಗೇಶ ಮೈಸೂರು

(Nagesha Mn)

(Picture source from : https://goo.gl/images/VdYxGa)

01511. ಕಾಣದೆನ್ನ ಮೊಗವೆನಗೆ..


01511. ಕಾಣದೆನ್ನ ಮೊಗವೆನಗೆ..

_______________________________

ನನಗೇನು ಕಾಣದೊ ನನ್ನ ಮುಖ

ನಾನೆಂತು ಕಾಣಲೊ ನೀ ಕಾಣೊ ಪುಳಕ ?

ನನ್ನೊರಗನಿನಿತು ಕಂಡೆನಷ್ಟಿಷ್ಟು

ಒಳಗನಂತು ಬಿಡು ಕಾಣಲಿಲ್ಲ ಇಂದಿಗೂ ! ||

ನಾ ಕಂಡೆ ಕಣ್ಣ ಕನ್ನಡಿಯ ಸರದಿ

ನೀಡಲೇನು ಕಂಡಂತೆ ಸಚಿತ್ರ ವರದಿ ?

ವಿವರಿಸಲೇ ನೀನು ಕಾಣದ್ದೆಲ್ಲಾ ಹೆಣ್ಣೆ

ಕಣ್ಣು ಮೂಗು ಬಾಯಿ ಕೆನ್ನೆಯ ಜೇನದೊನ್ನೆ ||

ವಿವರಿಸೊ ಅರಸ ನಾ ಕಾಣೆ ನನ್ನ

ಕಂಡಂತೆ ಪರರ ಕಾಣಲಾಗದೊ ಚೆನ್ನ

ನಿ ಬಿಡಿಸಿ ಹೇಳು ದಳದಳವೆ ಬಿಚ್ಚಿ

ನಾನು ಅರಿವೆ ಅರೆಕೊರೆ ಮೆಚ್ಚುವ ಮಚ್ಚೆ ||

ಹೋಲಿಕೆಗೆ ಹೂವು ಹಣ್ಣು ನಿಸರ್ಗ

ಹೊಂದದಾವುದು ನಿನ್ನ ಚಂದವೆ ಸ್ವರ್ಗ

ನಿನ್ನನ್ನೆ ಉಪಮೆ ಬಳಸಬೇಕವಕೆ

ನಿನ್ನಾ ಹೋಲಿಕೆಗೆ ಬಿಡು ಅವೆಲ್ಲಾ ಯಾಕೆ ||

ಸಾಕಿನ್ನು ಜಾಣ ಸುಳ್ಳಿನಾ ಪುರಾಣ

ನಾ ಬಲ್ಲೆ ಕನ್ನಡಿದಿನ ತೋರಿಹುದು ಬಣ್ಣ

ನೀನೆಂತು ಕಾಣುವೆಯೆಂದಷ್ಟೆ ಕೌತುಕ

ಸುಳ್ಳು ಬೇಡ ಮನಸ ಹೇಳಷ್ಟೆ ಸಾಕ ||

– ನಾಗೇಶ ಮೈಸೂರು

(Nagesha Mn)

(Picture source : internet / social media received via FB friends)

01510. ಬಿಟ್ಟುಬಿಡು ಹೀಗೆ ಕಡೆವರೆಗೆ..


01510. ಬಿಟ್ಟುಬಿಡು ಹೀಗೆ ಕಡೆವರೆಗೆ..

____________________________________

ಕಳುವಾಗಿ ಹೋಗಿದೆ ಮನಸು

ಕೂತಲ್ಲಿ ನಿಂತಲ್ಲಿ ಅವನದೇ ಕನಸು

ಮೈ ಮರೆತು ಹೋದೆ ನೆನಪಿಲ್ಲ ಎಲ್ಲಿರುವೆ

ಎಲ್ಲಿದ್ದರೇನು? ಎಡಬಿಡದೆ ಬಂದು ಕಾಡುವೆ ! ||

ಅರುಣನೊ ಚಂದ್ರನೊ ನೆನಪಲಿಲ್ಲ

ಕೂತೆಷ್ಟು ಹೊತ್ತು ಕಳೆಯಿತೊ ಅರಿವಿಲ್ಲ

ಹಗಲಿತ್ತೆ? ಇರುಳಿತ್ತೆ? ಎಲ್ಲಾ ಅಯೋಮಯ

ನನ್ನೆ ಮರೆಸಿದನಲ್ಲ! ಏನಿರಬಹುದವನ ಮಾಯಾ! ||

ಮುಂಜಾವು ಮುಸ್ಸಂಜೆ ಹೊಂಬಣ್ಣ ಅದ್ದಿ

ಮಾಡಿಸಿದೆ ಮಜ್ಜನ ಎದೆಯೊಳಗ್ಹೊರಗ ಸುದ್ಧಿ

ನೀರಲ್ಲ ನೀರು ಹೊನ್ನೀರಾಗಿ ಹರಿದಿಟ್ಟ ಮುಹೂರ್ತ

ಕಾದು ಕುಳಿತಂತೆ ಮಾಡಿದೆ ನನ್ನನವನೆ ಆವರಿಸುತ್ತ ||

ಬಿರಿದ ಹೂ ಪ್ರಾಯ ತುಂಬಿದಾ ಕೊಡ

ತುಂಬಿ ತುಳುಕೊ ಆಸೆಗಳದೆಷ್ಟು ನಿಭಿಡ !?

ಹಿಡಿದಿಡಲೆಷ್ಟೊ ಕಾಣೆ ತುಳುಕಿ ತೊಟ್ಟಿಕ್ಕುತಿದೆ

ಜಾರಿ ಯೌವನದ ಕೊಡದಿ ನದಿಯಾಗಿ ಹರಿಯುತಿದೆ ||

ಬಿಟ್ಟುಬಿಡು ಹೀಗೆ ನಾನಿರುವೆ ಪರವಶದಿ

ಕದಲಿಸದಿರು ಮನಸ ಮರೆತುಬಿಡುವ ಸರದಿ

ನಿನ್ನೆ ಇಂದು ನಾಳೆ ಒಂದಾಗಿ ಕೂತಿಹ ಈ ಗಳಿಗೆ

ವಿಚಲಿಸದಿರೆನ್ನ ಬದುಕೆ ಇರಲುಬಿಡು ಹೀಗೆ ಕಡೆವರೆಗೆ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via Muddu Dear – thank you very much !🙏👌👍😊)

01509. ಹೊತ್ತಾದರು ಬರಲಿಲ್ಲವೇಕೆ?


01509. ಹೊತ್ತಾದರು ಬರಲಿಲ್ಲವೇಕೆ?

___________________________________

ಬಾರದೆ ಹೋದನೇಕೆ ಇನ್ನು

ಬರುವ ಹೊತ್ತಾದರು ಸಖ?

ಬರದ ಕಾತರ ಭೀತಿಯಾಗೆ

ಸುಖ ಭಾವ ಕರಗಿ ಆತಂಕ ||

ಬಂದೇ ಬರುವ ಇದೇ ಹೊತ್ತು

ಆಚೀಚೆ ಗಳಿಗೆ ಇದ್ದರೊಂದೆರಡು

ನಿತ್ಯದಂತಲ್ಲ ಕವಿದ ಕಾರ್ಮೋಡ

ಬೇಡಿದ್ದೆನಲ್ಲ, ನೀ ಬೇಗನೆ ಹೊರಡು? ||

ಹೊಸಿಲಲಿ ನಿಂತು ನೋಡಲೆಷ್ಟು

ಕಣ್ಣಿಗೆಟುಕುವಷ್ಟು ದೂರದ ತನಕ ?

ಬೆಳಗಿದೆ ದೀಪ ಬೆಳಗಿ ಮುಖವೆಲ್ಲ

ದೂರದಿಂದಲೆ ಕಾಣಲೆಂಬ ತವಕ ||

ನೀನೆ ಮೆಚ್ಚಿದ ಆಭರಣ ಉಡುಗೆ

ಉಟ್ಟು ನಿಂತೆ ಬರಿ ನಿನ್ನದೆ ಧ್ಯಾನ

ನೋಡುವನಿಲ್ಲ ಮುನಿದು ಸುಕ್ಕಾಗಿ

ಬಾರೆಯ ಮನ ಮುದುರೊ ಮುನ್ನ ? ||

ಎಂದಿನಂತಲ್ಲ ಇಂದು ಜನ್ಮದಿನ

ಮಾಡಿಹೆನಲ್ಲ ಪ್ರಿಯ ಸಿದ್ಧತೆ ಸಕಲ..

ಬಡಿಸಲಿದೆ ರಸದೂಟಪಾನಾಮೃತ

ಸರಸಸಲ್ಲಾಪಕೆ ಯಾಕಿನ್ನೂ ಬಂದಿಲ್ಲ ? ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via FB friends)

01508. ಬರೆಯಲೇಕೆ ಕವಿ, ಕವಿತೆ?


01508. ಬರೆಯಲೇಕೆ ಕವಿ, ಕವಿತೆ?

________________________________

ಕವಿಯೊಬ್ಬನ ಕವಿತೆ

ಜೀವಕೋಶದ ಮಾತೆ

ಮಾತಾಗಿ ಸೇರಿದ ಮಾತೆ

ಯಾರೊ ಕಾಣೆ ಹರಸುತೆ ||

ಪದ ಲಾಸ್ಯ ತುಸು ಹಾಸ್ಯ

ಜೀವಂತಿಕೆ ಭಾವದ ಮೋಹ

ಕೋಶದುತ್ಪನ್ನ ಜೀವದ ರಸ

ನಿಲದೇ ಹರಿದೆಲ್ಲೆಡೆ ತುಂಬುತ್ತ ||

ಬರೆಯದಿರಲೆಂತು ಕವಿಗೆ ?

ಬಿಗಿದು ಕಟ್ಟಲು ಅನಾಹುತ

ಓದಲಿ ಬಿಡಲಿ ಸಾರಸ್ವತರು

ಎದೆ ಹಗುರ ಮಾತಾಗೆ ಮೂರ್ತ ||

ಮೆಚ್ಚಿಸಲಲ್ಲ ಪದಕ ಪದವಿಗೆ

ಬರುವ ಪದದಲಿಲ್ಲ ಪಗಾರ

ಉಸಿರಾಡುವ ಪರಿ ಪದಗಾರಿಕೆ

ಹೈನುಗಾರಿಕೆ ಪದವೇ ಬೇಸಾಯ ||

ಸ್ರವಿಸುವ ತನಕ ಜೀವಕೋಶ

ತುಂಬುತಲಿ ಕವಿ ಭಾವಕೋಶ

ಬರೆಯುವ ತನಗಾಗಿಯೆ ಖುದ್ಧು

ತಾನಾಗದಿರೆ ತನದೇ ಸರಹದ್ದು ||

– ನಾಗೇಶ ಮೈಸೂರು

೨೪.೧೨.೨೦೧೭

01507. ಪರಾಕಾಷ್ಠೆ


01507. ಪರಾಕಾಷ್ಠೆ

_____________________

ತಲುಪಬೇಕಿದೆ ನಾ

ತೀವ್ರತೆಯ ಪರಾಕಾಷ್ಠೆ

ಕರೆದೊಯ್ಯುವೆಯಾ ಅಲ್ಲಿಗೆ ?

ಬರಬಹುದೆ ನಿನ್ನಾ ಜೊತೆಗೆ ? ||

ತಲುಪೆ ದಾರಿ ನೂರು

ಬಲ್ಲವರಾರು ಸ್ಪಷ್ಟ ನಿಖರ?

ಭೌತಿಕವೆ? ಲೌಕಿಕವೆ? ಪಯಣ

ಹೇಳು ನಿನಗಾವುದರತ್ತ ನಡಿಗೆ ಚಿತ್ತ? ||

ಮೋಕ್ಷವೆ? ಸುಭೀಕ್ಷವೆ?

ಬಂಧಿ ದ್ವಂದ್ವಗಳಡಿ ಮನಸು

ಬೇಡವೆನ್ನಲೆಂತು ಐಹಿಕ ಕೊರಮ

ಧರ್ಮಕಿದೆಯೆ ಸುಗಮ ದಾರಿ ಅಲ್ಲಿಂದ? ||

ಕರ್ಮ ನಿನ್ನದವನ ಮರ್ಮ

ಮನ ಸೋಲೊ ಗೆಲುವೊ ಭ್ರಮೆ

ಶರಣಾದರೊಂದು ಆಗಿದಿರಲೊಂದು

ಪಥವದನೇಕ ನಿನದೇನಿದೆ ಹುಡುಕಾಟ? ||

ಗುರುವೆ ಶರಣಾಗಿಬಿಡುವೆ

ತೋಚಿದ ದಾರಿಗೆ ಇಡುವೆ ಹೆಜ್ಜೆ

ತನುವನುಭವಿಸಲಿ ತೀವ್ರತೆ ಪರಾಕಾಷ್ಠೆ

ದಾಟಿಸಲಲ್ಲಿಂದಲೆ ಚಿತ್ತ ಮೊತ್ತದೆ ಎಲ್ಲಾ ನಿನ್ನಿಚ್ಛೆ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via FB friends)

01506. ಅದೃಶ್ಯವಾದವೊ..


01506. ಅದೃಶ್ಯವಾದವೊ..

______________________

ಯಾಕೊ ನಡೆವ ಹಾದಿಯಲ್ಲಿ

ಮಲ್ಲಿಗೆ ಘಮವಿಲ್ಲ

ಯಾಕೊ ಕಾಣೆ ಯಾವ ಹೆಣ್ಣು

ಮಲ್ಲಿಗೆಯನೆ ಮುಡಿದಿಲ್ಲ ! ||

ಯಾಕೆಂದೆನ್ನಲಿ ಎದುರಾದಾಗ

ಘಮಘಮ ಸದ್ದುಗಳು

ಗಂಡೊ ಹೆಣ್ಣೊ ಅವಿತದರೊಳಗೆ

ಅತ್ತರು ಅಗುಳಗುಳು ! ||

ಹೂವೆ ಇಲ್ಲದ ವಾಸನೆಯೆಂತೊ

ಗ್ರಹಿಕೆಗಷ್ಟೆ ಬರಿ ಸಾದೃಶ್ಯ

ಅದೆ ಹೂವನೆ ಚಚ್ಚಿ ತೇದು ಮಿಶ್ರ

ಗಿಡದ ಹೂವಂತು ಅದೃಶ್ಯ ! ||

ಹೂವಾಗಿತ್ತು ಮುಡಿ ತುಂಬ ದೃಶ್ಯ

ಮುಚ್ಚೆಲ್ಲ ಬಿರುಕು ಸಂದಿ

ಜಡೆ ನಾಗರ ಹಿಗ್ಗು ಮೊಗ್ಗಿನಾ ಜಡೆ

ಛಾಯಚಿತ್ರಕಷ್ಟೆ ಬಂಧಿ ! ||

ಎಲ್ಲಿ ಮಾಯವಾದವೊ ಎಲ್ಲ ಜಾದು

ಉಡುಗೆ ತೊಡುಗೆ ಸಹಿತ?

ಎಲ್ಲಿ ಮಾಯವಾದರೊ ಅರಸೊ ಮಂದಿ

ಮಾರುಕಟ್ಟೆಯಿರದೆ ಸರಕಿಲ್ಲ ! ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via FB friends)

01505. ಕುಸುಮಗಳದೀ ಪಿಸುಮಾತು..


01505. ಕುಸುಮಗಳದೀ ಪಿಸುಮಾತು..

____________________________

ಜೋಡಿ ಕುಸುಮ ಸಮಾಗಮ

ಕಾದಂತಿದೆ ಯಾರಪ್ಪಣೆಗೊ?

ವಿರಹ ಧೂರ್ತ ವಿಹಾರ ಸ್ವಸ್ಥ

ಪರಾಗ ಸ್ಪರ್ಶ ಚೆಲ್ಲಾಟಕೆ ಬಾ ! ||

ಕುಸುಮ ಜಗದಲೆಲ್ಲಿದೆ ಅಸಮ?

ವಂಶಾಭಿವೃದ್ಧಿ ನಿರಂತರ ಸಮರ

ಇದ್ದರಾಯ್ತು ಪುರುಷ ಶಲಾಕಾಗ್ರ

ಪ್ರಕೃತಿ ಅಂಡಾಶಯ ಅಮೂಲಾಗ್ರ ||

ಯಾರಿಲ್ಲಿ ಪುರುಷಾ ಪ್ರಕೃತಿ ?

ಆಕೃತಿಯಲಷ್ಟೆ ಸಾಕಾರ ತನ

ನೆರೆ ಹೊರೆಯಲಿದ್ದೂ ಅಂತರ

ಅಭ್ಯಂತರವಿರದಿದ್ದರು ದೂರ! ||

ಬರಲೇಳು, ಯಾರೊ ಹಾರುತ

ಚಿಟ್ಟೆ ಪತಂಗ ದುಂಬಿಯ ತರ

ಸಾಕಲ್ಲ ಬೀಸೊ ತಂಗಾಳಿ ಸ್ಪರ್ಶ

ಪರಾಗರೇಣು ಪ್ರೋಕ್ಷಿಸೆ ಸಂಗಮ ||

ಏಕಾಂತವಲ್ಲ ಸಮರ್ಪಣ ಭಾವ

ಸಭ್ಯತೆ ಮೀರಿ ಸಂಗಮದಾತುರ

ಅದಕೆಂದೆ ಜಗದ ಚೆಲುವೆಲ್ಲ ಇಲ್ಲೆ

ಆಸ್ವಾದಿಸು ಒಣಗಿ ಬಾಡುವ ಮುನ್ನ ||

ಪಿಸುಗುಟ್ಟಿ ಕುಸುಮಗಳೆರಡು

ತಡಕಾಡಿಕೊಂಡಂತಿವೆ ತಮ್ಮೆ

ಪಿಸುಮಾತುಲಿ ಪಸರಿಸಿ ನಶೆ

ಮತ್ತೇರಿಯೂ ಸುಮ್ಮ ಕೂತಿವೆ ||

– ನಾಗೇಶ ಮೈಸೂರು

೨೪.೧೨.೨೦೧೭

01504. ನಮಿಸಿ ಮುಂಜಾವಲಿ..


01504. ನಮಿಸಿ ಮುಂಜಾವಲಿ..

_______________________________

ಮಂದ ಮಾರುತ ಸಗಾಳಿ

ಮುಂಜಾವಿನ ಮಂಜಿನಲಿ

ನಸುಕನೆಬ್ಬಿಸುತ ದೇಗುಲ

ಅರುಣರಾಗ ಹಾಡುವ ಕಾಲ ||

ಢಣಢಣ ಘಂಟಾನಾದದೆ

ಪೂಜಾರತಿ ಬೆಳಕ ಸುಧೆ

ನಾದಸ್ವರ ವಾದನ ಜೋಡಿ

ಜತೆಜತೆ ಸುಪ್ರಭಾತ ಹಾಡಿ ||

ಆ ಹೊನ್ನ ಕಲಶದ ಮೇರು

ಗೋಪುರದೆ ನಿತ್ಯದ ತೇರು

ಚುಂಬಕ ತುದಿ ಸೆಳೆಸೆಳೆದು

ಪರಿಸರ ಶಕ್ತಿ ಪೀಠಕೆ ಸುರಿದು ||

ಸಂಧ್ಯೆ ದೈವಿಕ ಸಂಗಮದೆ

ಉಷೆ ಕಿರಣ ಹಾಲೂಡಿಸಿದೆ

ಮುಟ್ಟಿ ಪಾದಧೂಳಿ ನಮಿಸಿ

ದೈನಂದಿನ ಯಾತ್ರೆ ದ್ಯುತಿಸಿ ||

ನಕ್ಕಳಾ ತಾಯಿ ಬೆಳದಿಂಗಳು

ತಟ್ಟನೆ ಬೆಳಗಾಯ್ತು ಜಗದಲು

ಹಕ್ಕಿಗಳುಲಿದು ಮಂತ್ರಘೋಷ

ಜಗ ಕೊಡವಿ ಮೇಲೆದ್ದ ನಿಮಿಷ ||

– ನಾಗೇಶ ಮೈಸೂರು

(Nagesha Mn)

01503. ಬಾ, ಸುತ್ತಾಡಿ ಬರುವ.. (ಶಿಶು ಗೀತೆ)


01503. ಬಾ, ಸುತ್ತಾಡಿ ಬರುವ.. (ಶಿಶು ಗೀತೆ)

_________________________________________

(‘೩ಕೆ – ನಮ್ಮ ಚಿತ್ರ ನಿಮ್ಮ ಕವನ ೫೩’ ಕ್ಕೆ ಬರೆದ ಕವನ 2 : ಶಿಶು ಗೀತೆ)

ಬಾ, ಸುತ್ತಾಡಿ ಬರುವ.. (ಶಿಶು ಗೀತೆ)

________________________________

ನೀನು ಮರಿ

ನಾನೂ ಮರಿ

ಖಾಲಿ ಬಯಲಿದೆ ಕುದುರಿ

ನೀನೊಬ್ಬಂಟಿ

ನಾ ತುಸು ತುಂಟಿ

ಮಾಡಿಸೆಯ ಬೆನ್ನಲಿ ಸವಾರಿ? ||

ನಿನಗು ಹೊಸದು

ನನಗು ಹೊಸತು

ಗೊತ್ತಿಲ್ಲ ಇಬ್ಬರಿಗೂ ದಾರಿ

ನನಗೂ ಕೌತುಕ

ನಿನಗೂ ಪುಳಕ

ಕತ್ತ ಗಂಟೆಯಿದೆ ತಪ್ಪೆ ದಾರಿ ||

ಯಾರಿಲ್ಲ ಸುತ್ತ

ಕಾರ್ಯ ಪ್ರವೃತ್ತ

ನೋಡಿಗಲೆ ಸುಸಮಯ ಸರಿ

ಇಲ್ಲಿಲ್ಲ ನಿನ್ನಮ್ಮ

ಕಾಣಳು ನನ್ನಮ್ಮ

ಬರುವ ಮೊದಲೆ ಬಾ ಪರಾರಿ! ||

ಸುತ್ತಾಡುವ ಬಾಹತ್ತಿಳಿಯುವ ಬಾ

ಬೆಟ್ಟಗುಡ್ದ ಕಾನನದ ಹಸಿರು

ಶರವೇಗ ಮುಗಿಸಿ

ಮತ್ತಿಲ್ಲಿಗೆ ವಾಪಸಿ

ಏನರಿಯದ ಗುಮ್ಮ ನಾವಿಬ್ಬರು! ||

– ನಾಗೇಶ ಮೈಸೂರು

೨೩.೧೨.೨೦೧೭

01502. ಹೇ, ಭೀಮಕಾಯ


01502. ಹೇ, ಭೀಮಕಾಯ !

________________________

ಹೇ, ಭೀಮಕಾಯ

ನಾ ನಿಸ್ಸಹಾಯಕಿ

ಭಯದಲಿರುವ ನಿರ್ಭಯ..

ನಾ ಅಸಹಾಯಕಿ

ಹೊಸಕಲು ಆಹುತಿ

ನೀಡುವರುಂಟೆ ಅಭಯ ? ||

ನಿಜ ನಿನ ನೆರಳಿದೆ

ಗಂಟೆಯ ಕೊರಳಿದೆ

ಸೊಂಡಿಲಿನದೆ ತಡೆ ಗೋಡೆ..

ಗಾಳಿಯ ಸದರ

ಬಿರುಕಿನ ಪರಿಸರ

ಕಬಳಿಸೆ, ಇಹುದೆಲ್ಲಿ ತಡೆ ? ||

ಕೂಸಾದರೇನು ಬಿಡರು

ತುಂಬು ಪ್ರಾಯಕು ಖಳರು

ಯಾರಿಗಿಲ್ಲಿ ಯಾರು ಸಖರು?

ಯಾರ ನಂಬಿ ಯಾರಿರುವರು?

ತೋರೊ ದಿಕ್ಕು ಗಜರಾಯನೆ

ನಿನ ಶಕ್ತಿಗಿಲ್ಲ ಮೊದಲು ಕೊನೆ ! ||

ನೀ, ಸೂರ್ಯನೆದುರ ಹಣತೆ

ನಿನ ನೆರಳಾಗಿ ನಾನೆ ನಿಂತೆ..!

ಜೊತೆ ಜೊತೆಗೀವೆ ಎಚ್ಚರಿಕೆಯ ಗಂಟೆ..!

ಬೆಳೆದು ಬೆಳಗು ಇದರೊಳಗೆ

ಬೆಳೆಸಿಕೊ ನಿನ್ನೆ ನೀಸಲಹೊ ಬಗೆ

ಹೇ ನಿರ್ಭಯ, ನೀ ನೀನಗಾಗು ಅಭಯ ! ||

– ನಾಗೇಶ ಮೈಸೂರು

(Nagesha Mn)

(Picture: ‘೩ಕೆ – ನಮ್ಮ ಚಿತ್ರ ನಿಮ್ಮ ಕವನ ೫೩’ ಕ್ಕೆ ಬರೆದ ಕವನ)

01501. ನಳ, ನಾನೀಗ ಖಳ !


01501. ನಳ, ನಾನೀಗ ಖಳ !

_______________________________

ಮಲಗಿರು ಏಳದೆ ಭದ್ರೆ

ನನ್ನ ಸಖ್ಯವೀಗಲ್ಲ ಸುಭದ್ರ

ನಿನಗಿನ್ನೆಲಿಯದೆ ನೆಮ್ಮದಿ?

ರಾಜ್ಯ ಕೋಶವೆಲ್ಲ ಕಳೆದೆ ! ||

ಬರಿ ಕಳುವಾಯ್ತೇನು ಸಂಪದ

ಅಡವಿಯಲು ಬಿಡಲಿಲ್ಲ ದುರ್ವಿಧಿ

ಕಳೆಯದೆ ಬಿಟ್ಟರೂ ನಿನ್ನಾ ಮಾನ

ಬಿಡಲಿಲ್ಲ ನಮ್ಮ ಮೈಯೊಡವೆ ವಸ್ತ್ರ ||

ಸದ್ಯ! ಉಳಿಸಿದರೊಂದೀ ಅರಿವೆ

ಹಾಸಿ ಹೊದ್ದೆವಲ್ಲ ಇರುಳೆ ಯಾತನೆ

ಎಷ್ಟೆಂದು ತಡೆವೆ ಸುಕೋಮಲೆ ?

ಕಾನನ ವಾಸ ನಿನಗಲ್ಲ ದಮಯಂತಿ ||

ಬರುವಂತಿದೆ ಯಾತ್ರಿಕ ಗುಂಪೊಂದು

ನಿನ್ನ ಕರೆದೊಯ್ಯಲವರೆ ಸರಿ ನಂಟು

ಕ್ಷಮಿಸು ದೂರಾಗಲಲ್ಲ ದೂರಬೇಡ

ಕಷ್ಟವು ಹರಿದಾಗ ಮತ್ತೆ ಸೇರುವ ಕಾಲ ||

ಹರಿಯದೆ ವಿಧಿಯಿಲ್ಲ ನೀನುಟ್ಟ ಸೀರೆ

ತುಂಡದನೆ ಉಟ್ಟು ನಡೆವೆ ಮರೆಯಾಗೆ

ದುಃಖದೆ ಬಿಕ್ಕಿದರು ನಡೆ ತವರಿನ ಕಡೆ

ಕಾಲಚಕ್ರ ಸರಿಯಲಿ ಕಾದು ಬಿಡುಗಡೆಗೆ ||

– ನಾಗೇಶ ಮೈಸೂರು

(Nagesha Mn)

(Picture source : internet / social media , received via Nandini Krishnakumar -thank you 😊👍🙏)

01500. ಕೂಸೆ ಕೂಸೆ ಕೂಸೆ..


01500. ಕೂಸೆ ಕೂಸೆ ಕೂಸೆ..

_________________________

ಕೂಸೆ ಕೂಸೆ ಹಸುಗೂಸೆ

ಯಾರಿಗಿಲ್ಲ ನಿನ ಮೇಲಾಸೆ ?

ನೀ ನಕ್ಕರೆ ಚಂದ ಕಂದ

ಬೊಚ್ಚಲಿ ಅಂದ ಬಂತೆಲ್ಲಿಂದ ? ||

ಕೂಸೆ ನೀನತ್ತರೆ ಮುದ್ದು

ಮುಚ್ಚಿದ ಕಣ್ಣಿನಲೆಲ್ಲಾ ದೂರು

ಹಿಂಡಿದ ಕೆನ್ನೆ ಮುನಿಸಾಟ

ಯಾರ ಜತೆಗಪ್ಪ ಈ ಸೆಣೆಸಾಟ? ||

ಕೂಸೆ ಬೀಸಣಿಗೆ ನೀನಂತೆ

ತಂಗಾಳಿ ಸುಳಿದಾಡುತ ಬೀಸಿದ್ದೆ

ಕಿಲಕಿಲ ಸದ್ದಲಿ ಗಿಲಗಿಲಕಿ

ನಿನಗ್ಯಾಕೆ ಬೇಕು ಇನ್ನೊಂದಾಟಿಕೆ ? ||

ಕೂಸೆ ನಕ್ಷತ್ರಕು ನೋಡಾಸೆ

ಸೇರಿ ಮಿಂಚಿದೆ ನಿನ್ನಾ ಕಣ್ಣೊಳಗೆ

ಚಂದಿರನೇನು ತಾನೆ ಕಡಿಮೆ?

ಕಪ್ಪು ತೆಪ್ಪದ ಹಾಗೆ ತೇಲಾಟ ಕಣ್ಣಲ್ಲೆ ||

ಕೂಸೆ ಬಡಿದಾಡೆ ಕೈ ಕಾಲೆ

ಜೀವದ ಹಕ್ಕಿ ರೆಕ್ಕೆ ಬಿಚ್ಚಿ ಹಾರಿದವೆ

ಎದೆಯ ಕದ ತೆರೆಸುತ ಕಂದ

ಎಲ್ಲರ ಹೃದಯ ಗೆಲುವಾ ಗುಟ್ಟೇನು ? ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via Facebook friends)

01499. ಕವಿತೆ ಇದ್ದರೆ ಸಾಕು..


01499. ಕವಿತೆ ಇದ್ದರೆ ಸಾಕು..

_____________________________

ಕವಿತೆ ಇದ್ದರೆ ಸಾಕು

ಕವಿಗಿನ್ನೇನು ಬೇಕು ?

ಧಾರಾಕಾರ ಕವಿತೆಗಳು

ಕವಿ ತೆಗಳ ಓದದಿದ್ದರು ! ||

ಕವಿತೆ ಅವಳಿದ್ದರೆ ಸಾಕು

ಕವಿಗಿನ್ನೇನು ಜತೆ ಬೇಕು ?

ಮನಭಾವದ ಮಿಲನೋತ್ಸವ

ಶಿಶುವಿನಂತೆ ಪ್ರಸವ ಕಾವ್ಯ ||

ಕವಿತೆ ಕವಿಯುಟ್ಟಂತೆ ಸೀರೆ

ಹೊಕ್ಕವಳೊಳಗಾಗುವ ತದ್ಭವ

ತಂಗಾಳಿ ಸೆರಗು ಮುಂಗುರುಳಲೆ

ಜೊಂಪೆ ಜೊಂಪೆ ತತ್ಸಮ ಕವಿತೆ ||

ಕ’ವಿ’ತೆಯೊಳಗವಿತಿಹನೆ ಕತೆ

ನಡು ‘ವಿ’ಸ್ಮಯ ಹೊರದೂಡೆ

ಕತೆಯಾಗಲಲ್ಲಿ ಕವಿ ನಿರುಪಾಯ

ವಿದಾಯ ಗೀತೆ ಬರೆವಾ ಸಮಯ ||

ಕವಿತೆ ಲೋಕದ ಕನ್ನಡಿ

ಬಿಚ್ಚಿಡೆ ನೈಜ ಕಲ್ಪನೆ ಲಹರಿ

ತನ್ನಂದ ತಾನೆ ಕಾಣದ ನೀರೆ

ಚಂದ ಕವಿತೆ ಕಾಣದು ತನ್ನನ್ನೆ ||

ಕವಿಗಿಲ್ಲ ಸುಖ ದುಃಖ

ಭಾವನೆ ಪುಂಖಾನುಪುಂಖ

ಸಂಭಾವನೆ ಆಸ್ವಾದಿಸೆ ಘನತೆ

ಅಭಾವದಲು ಸೃಜಿಸುವ ಕವಿತೆ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media / Creative Commons)

01498. ಪಾಪುವಿನ ರೋಪು..!


01498. ಪಾಪುವಿನ ರೋಪು..!

_______________________________

ಪುಟ್ಟದೊಂದು ಪಾಪ

ಹಾಕಿತೊಂದು ರೋಪ

ಹೊತ್ತುಕೊಳದಿರೆ ತೆಕ್ಕೆಗೆ

ಅತ್ತು ಚೀರಾಡುವ ಶಾಪ ! || ಪುಟ್ಟ ||

ಹೊತ್ತರೆ ಸಾಲದು ಮತ್ತೆ

ಸುತ್ತಬೇಕು ನನ್ನ ಹೊತ್ತೆ

ಕಿಲಕಿಲ ನಗುವಿರಬೇಕು

ನಗಿಸದಿರೆ ಅಳಲಷ್ಟೆ ಗೊತ್ತೆ ! || ಪುಟ್ಟ ||

ಸುತ್ತುವಾಗಲೆ ಸಿಕ್ಕಿದ್ದೆಲ್ಲ

ಕೈಗೆಟುಕಿಸಿದರೆ ಸಾಕಲ್ಲ

ಬಾಯಿಗಿಟ್ಟು ರುಚಿ ನೋಡಿ

ವಸಡಿಗೊತ್ತಿ ಸಂತೈಸಲೆಲ್ಲ || ಪುಟ್ಟ ||

ಜಾರುವೆನು ನಡು ನಡುವೆ

ಬೇಕವರಿವರದೆಲ್ಲ ಗೊಡವೆ

ಅಂಬೆಗಾಲ ಸುರುಸುರು ಬತ್ತಿ

ಓಡಿ ಬಂದರಷ್ಟೆ ಕೈಗೆ ಸಿಗುವೆ || ಪುಟ್ಟ ||

ಸುಂಕ ಬೇಡದ ಸುಖ ನನದು

ಹೊಟ್ಟೆಗಿಷ್ಟು ಬಿದ್ದರಾಯ್ತು ಗಡದ್ದು

ಮುಕ್ಕಾಲು ದಿನ ನಿದಿರೆ ಗುಂಗು

ಮಿಕ್ಕ ಹೊತ್ತು ಬರಿ ನನದೆ ಸದ್ದು || ಪುಟ್ಟ ||

– ನಾಗೇಶ ಮೈಸೂರು

(Nagesha Mn)

(Picture source1: https://goo.gl/images/JaezFJ)

01497. ಮನದ ಗದ್ದಲ..


01497. ಮನದ ಗದ್ದಲ..

__________________________

ಸದ್ದಿಲ್ಲ ಸುಳಿವಿಲ್ಲ

ಇದ್ದಕ್ಕಿದ್ದಂತೆ ಮಾಯ

ಮಾತಿಲ್ಲ ಕಥೆಯಿಲ್ಲ

ಏನಿದು ಅನ್ಯಾಯ? ||

ಮಾತಿದ್ದಾಗ ಬೇಸರ

ಇಲ್ಲದಿರಲು ಘೋರ

ಬಳಿಯಿದ್ದಾಗ ಸದರ

ಇರದಿರೆ ನೂರವತಾರ ||

ಬೇಕೇ ಬೇಕೆನ್ನೊ ಹಠ

ಅದು ಹತ್ತಿರವಿರದಾಗ

ಎದ್ದು ಬಿದ್ದು ಪಡೆದಾಯ್ತು

ಮೂಲೆಗಿಟ್ಟು ಪೂಜೆ ಯೋಗ ||

ಗಮನವಿಡದೆ ನಿರ್ಲಕ್ಷ್ಯ

ಇದೆಯೆಂದಲಕ್ಷಿಸುತ

ಬಿದ್ದರಲ್ಲಿ ಯಾರದೊ ಕಣ್ಣು

ಮತ್ತಲ್ಲಿ ತಟ್ಟನೆ ಗಮನ ಸುತ್ತ ||

ವಿಚಿತ್ರವಿದು ಮನ ಮಾಯೆ

ಬಯಸುತೆಲ್ಲವ ತನ್ನದಲ್ಲ

ತಿಳಿದೂ ಪರರದು ಬಯಸಿತಲ್ಲ

ಮಾಯಾವಿ ಮನಸ ಅರಿತವರಿಲ್ಲ ||

– ನಾಗೇಶ ಮೈಸೂರು

(Nagesha Mn)

(Picture source internet / social media received via FB friends)

01496. ಬಿಟ್ಟು ಬಿಡು ನಿನದಲ್ಲ..


01496. ಬಿಟ್ಟು ಬಿಡು ನಿನದಲ್ಲ..

____________________________

ಬಿಟ್ಟು ಬಿಡು, ಯಾವುದು ನಿನದಲ್ಲ

ಬಿಗಿ ಹಿಡಿದಿಡುವ, ಹಂಬಲ ಬೇಡ

ಹಂಬಲಿಸೆ, ಬೆಂಬಲಿಸದ ಬದುಕು

ಬೆಂಬಿಡದೆ ಕಾಡೆ, ದೂರ ಮನಸು ||

ಹಕ್ಕಿ ಹಾರೊ ಹೊತ್ತು ,ರೆಕ್ಕೆ ಬಲಿತು

ಕುತೂಹಲ ಅದಮ್ಯ, ಗತ್ತು ಹುರುಪು

ಅದರದರದೆ ಗುಟ್ಟು, ತನ್ನಿಚ್ಚೆ ಜುಟ್ಟು

ಹೆಜ್ಜೆಗಡ್ಡ ನಿಂತರು, ನಂಟ ಸಹಿಸದು ||

ಕಾಯುವಾತಂಕ ಕಟ್ಟೆ ರಕ್ಷಣೆ ಕೋಟೆ

ಸಿಟ್ಟು ಸೆಡವು ಅಸಹನೆ ಫಲಿತ ಮಂಕೆ

ಶತಸಿದ್ಧ ಒತ್ತಡವೆ ದೂಡುತ ಸೆಳೆಯದೆ

ಇಷ್ಟಿಷ್ಟೆ ದೂರಾಗಿಸಿ ನೋಡಲ್ಲಿ ಕಂದಕ ||

ಚಡಪಡಿಸುವುದು ಸ್ವಾತ್ಯಂತ್ರ ಕಟ್ಟಿಹಾಕೆ

ತಡವರಿಸುವುದು ಸ್ವೇಚ್ಛೆ ಕಟ್ಟದೇ ಬಿಚ್ಚಿಡೆ

ನಡುವಲೆಲ್ಲೊ ಮಧ್ಯೆ ಸುವರ್ಣ ಸೂತ್ರವೆ

ಕಟ್ಟಿಯೂ ಕಟ್ಟದ ಅದೃಶ್ಯ ಬಂಧ ಸೊಗಸು ||

ನಂಟಾವುದಾದರೇನು ಹೆತ್ತವರು ಮಕ್ಕಳು

ಕಟ್ಟಿಕೊಂಡವರು ಒಲವನೊಪ್ಪಿ ಅಪ್ಪಿದವರು

ಕೆಳೆ ಸಾಂಗತ್ಯ ಸಹೋದ್ಯೋಗಿ ಪರಿಚಿತ ಸಖ್ಯ

ನೆನಪಿರಲೆಲ್ಲೆಡೆ ಮರುಳೆ ಸಡಿಲ ಬಿಡು ತುಸು ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via Facebook friends)

01495. ತುರಿಯುವ ಮಣೆ !


01495. ತುರಿಯುವ ಮಣೆ !

_________________________

ಯಾರೆ ಗಗನದ ಬಯಲಲಿ

ಹರಿತದ ತುರಿಮಣೆ ಇಟ್ಟವರು ?

ಬಿಳಿಮೋಡದ ಕಾಯ ಸವರಿ

ತುಂತುರು ಹನಿ ತುರಿದವರು ? ||

ಕಾಣದ ತುರಿಮಣೆ ಮೇಘವ ಕಂಡಾಗ

ಬಿಸಿಲ ದೆಸೆಗೆ ತುರಿವ ಬಾಯಿಗೆ ಬೀಗ

ತುರಿತುರಿದು ರವಿ ತೊಗಲಲ್ಲಿ ಬಿಸಿಲ

ಹನಿಹನಿ ವರ್ಷಧಾರೆ ಬೆವರಾಗಿ ಸಲಿಲ ||

ಕಂಡರು ಕಣ್ಣಿಗೆ ತುರಿಗೆ ಸಿಗುವ ಮುನ್ನ

ಗಾಳಿಯೆಂಬೊ ಕಾಣದ ಚೋರನ ಕನ್ನ

ಎತ್ತೆತ್ತಲೊ ಹಾರಿದ ಮೋಡಕೆ ಬದಲು

ತುರಿತುರಿದ ಗಾಳಿ ಚಳಿಯಾಗಿ ಹೆಗಲು ||

ನಡುವಲೊಮ್ಮೊಮ್ಮೆ ಸಖ್ಯ ಸಿಕ್ಕಾಗ ಹರ್ಷ

ತುರಿಮಣಿ ಹುಚ್ಚೆದ್ದು ತುರಿದಾಗ ಸುರಿವರ್ಷ

ತುಂತುರಲ್ಲ ಮುಸಲಧಾರೆ ಇಳೆಗಿಳಿದ ಪಾಕ

ಹಸಿರುಡುಗೆತೊಡುಗೆ ತೊಟ್ಟ ಧಾರಿಣಿ ಲೋಕ ||

ನಿಸರ್ಗದಲಿದೆ ತುರಿಮಣೆ ತುರಿದು ಕಲ್ಪವೃಕ್ಷ

ನೀಡುತಿದೆ ತರತರ ತುಂತುರಲೆ ರಸ ದ್ರಾಕ್ಷ

ಅಮಾಯಕ ಕಾಯವೀ ಕಾಯಾದರೆ ಸಹಜ

ತುರಿದೀತು ಬದುಕಿಗೆ ತುಂತುರು ಖುಷಿ ಖನಿಜ ||

– ನಾಗೇಶ ಮೈಸೂರು

(Nagesha Mn)

(Picture source: 1&2 Internet / social media received via Facebook friends; 3,4,5 – self )

01494. ಯಾಕೆ ಸಿಡಿಮಿಡಿ ?


01494. ಯಾಕೆ ಸಿಡಿಮಿಡಿ ?

________________________

ಯಾಕೆ ಹೀಗೆ ಸಿಡಿಮಿಡಿಗುಟ್ಟುವೆ ?

ಪ್ರತಿ ಮಾತಲಿ ಯಾಕೀ ಅಸಹನೆ?

ಪೂರ್ತಿಯಾದರು ಕೇಳಬಾರದೆ?

ಚಿಂತಿಸದೆ ನುಡಿವ ಹವ್ಯಾಸವೇಕೆ ? ||

ನಾನಿನ್ನೂ ಮುಗಿಸಿಲ್ಲ ಮಾತಿನುದ್ದ

ಮುನ್ನವೆ ನುಡಿಯಬೇಕೆ ಏನೊ ಅಪದ್ಧ ?

ಮಾತಿನರ್ಥ ಅರಿವಿಗು ಬೇಕು ಬಿಡುವು

ನೀಡದೆ ಅರ್ಥೈಸೆ ಚೆಲ್ಲಾಪಿಲ್ಲಿ ಸಂಗತಿ ||

ಯಾಕಂದುಕೊಳ್ಳಬೇಕು ಎಲ್ಲಾ ಮೊದಲೆ ?

ತರವಲ್ಲದ ಅನಿಸಿಕೆ ಯಾವತ್ತೂ ಮುಜುಗರವೆ!

ತೊಟ್ಟ ಬಾಣ ಆಡಿದ ಮಾತು ತಗ್ಗದ ವೇಗ

ಎದೆ ಸೀಳಿದ ಗಾಯಕೆ ಮದ್ದಿಲ್ಲದ ಬೇಗೆ ಬೇನೆ ||

ಇದ್ದರೇನು ನಿಕೃಷ್ಟ ಭಾವ ಮನದಲ್ಲಿ

ನಿರ್ಲಕ್ಷ್ಯ ತರವಲ್ಲ ಗೊಣಗಾಟ ಸಾಕು

ಹೇಳುವುದನೆ ನೇರ ಬಿಚ್ಚಿ ಹೇಳೆ ಅಹವಾಲು

ಸ್ಪಷ್ಟ ಸ್ವಚ್ಚ ಪ್ರಾಮಾಣಿಕ ಮಾತಿಗಿಲ್ಲ ಸೋಲು ||

ಬಂಧವೊ ಸಂಬಂಧವೊ ನಂಟಿನ ಗಂಟು

ಜತೆಗ್ಹೊತ್ತುಕೊಂಡು ಹೋಗರಿಲ್ಲಿ ಕೊನೆಗ್ಯಾರು

ಹೊತ್ತು ನಡೆವ ಹೊತ್ತಲಿ ಬೇಕೆ ಹೆಣ ಭಾರ ?

ಸಿಡಿಮಿಡಿಗುಟ್ಟದೆ ನಡೆಸು ಮಾತಿನ ವ್ಯಾಪಾರ ! ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media)

01493. ಅಹಮಿಕೆಯೆಂಬಿ ಜುಟ್ಟು…


01493. ಅಹಮಿಕೆಯೆಂಬಿ ಜುಟ್ಟು…

_________________________________

ತಟ್ಟು ಚಪ್ಪಾಳೆ ಹಾಳು ಅಹಮಿಕೆ ಬಿಟ್ಟು

ಇನ್ನೆಷ್ಟು ದಿನ ಈ ಚಿಟಿಕೆಯ ಸಹವಾಸ?

ಸಾಕಾಗದೇನು ಬರಿ ಮುಸುಕಿನ ಗುದ್ದಾಟ?

ಪ್ರಕ್ಷುಬ್ಧ ಮೌನಾ ಕಲಹ, ಸದ್ದುಗದ್ದಲವೆ ವಾಸಿ ||

ಅಹಮಿಕೆಯೆಂಬೀ ಜುಟ್ಟ ಕಟ್ಟಿ ಸೊಗದೆ

ಯಾಕೆ ನೀಡಿರುವೆ ಚಂಚಲ ಚಿತ್ತದ ಕೈಗೆ ?

ಮನ ಮರ್ಕಟ ಮೊದಲೆ ಕುಡಿದಂತೆ ಮದಿರೆ

ತಾನಾದರೆ ಚಾಲಕ ಚಾಟೀಯೇಟಿನ ಬಾಸುಂಡೆ ||

ನಿಜ ಅಹಮಿಕೆ ಅಲಂಕಾರ ತನ್ನತನ ಸರಿ

ಕಟ್ಟಲಿ ಬಿಚ್ಚಲಿ ಮುಡಿ ಸೊಗವಿರುವಂತೆ ನಗೆ

ಕಟ್ಟಿದ ಶಿಸ್ತಂತೆ ಬಿಚ್ಚಿದ ಕೇಶದಾ ಸಾಮ್ರಾಜ್ಯ

ಎಲ್ಲವೂ ಸರಿಯೆ ಬುಡದ ಬೇರಾಗಿರೆ ಸುಭದ್ರ ||

ಸ್ವೇಚ್ಛೆಯಲಿ ಹಾರಾಡ ಬಿಟ್ಟು ಬಯಲಲಿ

ಘರ್ಷಿಸಿ ಸುತ್ತ ಸಂಘರ್ಷಗಳ ಸರಮಾಲೆ

ಕಹಿ ಗೆಲುವ ಜಯಮಾಲೆಗೆ ಮತ್ತಷ್ಟು ಹಗೆ

ಪಾತಾಳಕೆ ದೂಡೆ ತಬ್ಬಲಿಯಾಗಲ್ಲಿ ಅಲೆವೆ ||

ಹಾಕೊಂದು ರೇಖೆಮಿತಿ, ರೇಖಾಲೇಖ ಪರಿಧಿ

ಕೊಡುಕೊಳ್ಳು ವ್ಯವಧಾನ ಇದ್ದರದೆ ಸಂವಿಧಾನ

ಅಹಮಿಕೆಯಾಗೆ ಗತ್ತು ಸೌಂದರ್ಯಕಾಗದೆ ಕುತ್ತು

ಚಂದ ಹೊಂದಾಣಿಕೆ ಬದುಕು ಕೊಟ್ಟು ಪಡೆಯಬೇಕು ! ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media received via face book friends)

01492. ಕನ್ನಡ ನಾಡು


01492. ಕನ್ನಡ ನಾಡು

___________________________

ಕನ್ನಡ ನಾಡಿಗೆ ಕನ್ನಡವೆ ಗಾರುಡಿ

ಧಮನಿ ಧಮನಿ ಹರಿದಾಡುವ ಹೊನ್ನುಡಿ

ನೆತ್ತರ ಕಣಕಣ ಬರೆದ ಮುನ್ನುಡಿ

ನರ ನಾಡಿಗಳಲಿ ಅನುರಣಿತ ಜೇನ ನುಡಿ || ಕನ್ನಡ ||

ಭುವನೇಶ್ವರಿ ತಾನಾಡುವ ಭಾಷೆ

ಕವಿಕಾವ್ಯ ಲಹರಿಯಲಿ ಮೆರೆದು ಪರಿಷೆ

ಆಡು ಮಾತೇನು ಬೌದ್ಧಿಕತೆ ಶುದ್ಧ

ಮಿಕ್ಕಿ ಮೂರು ಸಾವಿರ ವರ್ಷ ಪಕ್ವ ಪ್ರಬುದ್ಧ || ಕನ್ನಡ ||

ನಾಡೋಜರಾಳಿದ ಸಾಹಿತ್ಯಲೋಕ

ಪೀಳಿಗೆಯಿಂದ ಪೀಳಿಗೆಗೆ ದಾಟಿಸಿ ಬೆಳಕ

ನಿಂತ ನೀರಲ್ಲ ನಿರಂತರ ಹರಿವು

ಹಳೆ ನಡು ಹೊಸತಲಿ ಕನ್ನಡತನ ಗೆಲುವು || ಕನ್ನಡ ||

ಲಿಪಿಗಳಾ ರಾಣಿ ಮುತ್ತ ಜೋಡಿಸಿತೆ

ದುಂಡುಮಲ್ಲೆ ದಂಡೆ ಸಾಲಾಗಿ ರಾರಾಜಿಸಿತೆ

ಪೋಣಿಸಿ ಕನ್ನಡಿಗರ ಹೃದಯ ಭವ್ಯ

ಕನ್ನಡನಾಡಾಯ್ತೆ ಕನ್ನಡಿಗರೆದೆ ಬರೆದಾ ಕಾವ್ಯ || ಕನ್ನಡ ||

ನಾಡಭಾಷೆ ನಾಡು ಕಟ್ಟಿದ ಚಂದ

ಬೇಧ ಭಾವ ಮರೆಸಿ ಒಗ್ಗೂಡಿಸಿದ ಆನಂದ

ಕರುನಾಡ ಸೀಮೆ ಬೆಸೆದಾಯ್ತು ಏಕ

ಕನ್ನಡಮ್ಮನ ತೇರು ಎಳೆದಾಯ್ತು ಕರ್ನಾಟಕ || ಕನ್ನಡ ||

– ನಾಗೇಶ ಮೈಸೂರು

೨೦.೧೨.೨೦೧೭

01491. ಸೃಷ್ಟಿ ಗಡಿಯಾರದ ಕೀಲಿ


01491. ಸೃಷ್ಟಿ ಗಡಿಯಾರದ ಕೀಲಿ

_________________________________

ಅದ್ಭುತದೊಳಗೊಂದದ್ಭುತ

ಪ್ರಕೃತಿಯೊಳಗೊಂದಾಕೃತಿ

ಕೃತಕವಲ್ಲ ನೈಸರ್ಗಿಕ ರೀತಿ

ಜೈವಿಕ ಗಡಿಯಾರದ ಗಣಕ ||

ಅಣಕವಲ್ಲ ಸುಂದರ ಗಣಿತ

ವಾರ ಮಾಸ ನಿಖರತೆ ಲೆಕ್ಕ

ತಪ್ಪಿಲ್ಲದ ಕಾಗುಣಿತ ಗಣನೆ

ಕಂದ ಅಮ್ಮನ ಅನುಕರಣೆ ||

ನಂಟಿನ ಸಂಕೋಲೆ ಗಟ್ಟಿ

ಜಟ್ಟಿ ಕತ್ತಲಲು ಚಾಲಾಕಿ

ಲೆಕ್ಕವಿಡೊ ಕಿಲಾಡಿ ಕೂಸು

ಅನುಕರಿಸಿ ಅಮ್ಮನ ಗೀಟು ||

ಯಾರಿಗಿಲ್ಲಿ ಯಾರು ಗುರು ?

ಯಾರೊಳಗೆ ಯಾರಿರುವರು ?

ಯಾರ ಪ್ರಪಂಚ ಯಾರೆನ್ನೋಣ ?

ಯಾರ ಕುಂಚ ಇವರೆಂದರೆ ಚನ್ನ ? ||

ಬಿಟ್ಟುಬಿಡುವ ಅವರ ಪಾಲಿಗೆ

ಸೃಷ್ಟಿ ಜಗದ ನಿಗೂಢತೆಯಡಿ

ಆಡಿಕೊಳ್ಳಲಿ ಅವರಿಚ್ಛೆಯಾಟ

ಬೇಸತ್ತಾಗ ಬಿಚ್ಚಿಕೊಳ್ಳಲಿ ಜಗಕೆ ||

– ನಾಗೇಶ ಮೈಸೂರು

೧೯.೧೨.೨೦೧೭

(Picture source : Internet / social media received via Mohan Kumar D M – thank you sir 😍👌🙏👍😊)

01490. ಎಟುಕದೇಕೆ ಅವನ ಚಿತ್ರ?


01490. ಎಟುಕದೇಕೆ ಅವನ ಚಿತ್ರ?

________________________________

ಯಾಕೊ ಮತ್ತೆ ಮತ್ತೆ ಮರೆತು

ಹೋಗುತಿರುವುದವನ ಮುಖ

ನೆನೆದು ನೆನಪಲಿಟ್ಟರು ಚಹರೆ

ಯಾಕೊ ಕಾಣೆ ಮಸುಕು ಕಣೆ ||

ನೋಡಿದ್ದೆ ಗೊತ್ತಾ ಕದ್ದು ಕದ್ದೂ

ಮೂಗು ಕಣ್ಣು ಬಾಯಿ ಕಿವಿ ಗಲ್ಲ

ಒಂದಾದರು ಎಟುಕಿಗೆ ನಿಲುಕೆ

ಮೊಗದ ಚಿತ್ರ ಬರೆದೀತು ಮನ ||

ಏನೋ ಅಸ್ಪಷ್ಟ ಆಕಾರ ರೂಪ

ಆಜಾನುಬಾಹು ಸಾಕಾರ ಘನ

ಭುಜದ ಮೇಲಿಟ್ಟ ಶಿರವೇ ಗೌಣ

ಕಲಸುತೆಲ್ಲ ಮರೆಮಾಚಿ ಅವನನು ||

ಮೆಚ್ಚಿ ನೆಚ್ಚಿ ಹತ್ತಿರವಾದ ಸಖನೆ

ಅದೆಷ್ಟೊ ಬಾರಿ ಮಾತಾಡಿ ಜೊತೆ

ಕಳೆದ ಕಾಲ ಪರಿಚಿತ ಅನವರತ

ಅಪರಿಚಿತನಂತೆ ಯಾಕೆ ಕಾಡುವ ? ||

ಬಯಸಿ ಪಡೆದ ಪ್ರೀತಿಯ ಪರಿಯೆ ?

ಸಾಲದೆನುವ ಅದಮ್ಯತೆ ಕುರುಹೆ ?

ಅಪರಿಮಿತತೆ ಅವನಾದನೆ ಅಮೇಯ?

ಮೇಯವಾಗದೆ ಮನ ಚಡಪಡಿಕೆ ಪ್ರಾಯ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media – received via one of the FB friend some time before – sorry forgotten the name 😊🙏👌)

01489. ಮನಸಿದ್ದಂತೆ ಮಹದೇವ


01489. ಮನಸಿದ್ದಂತೆ ಮಹದೇವ

_________________________________

ಇದ್ದೇವಾ? ಇಲ್ಲವಾ?

ಯಾರಿಗೆ ಗೊತ್ತು..

ಇದ್ದರು ಇಲ್ಲದ ಹಾಗೆ

ಇಲ್ಲದೆ ಇದ್ದರು ಸೋಗೆ ||

ಅವನಿಗೆ ಮಾತ್ರ ಗೊತ್ತು

ಅಂದೊರು ಸಾವಿರ

ಅವನಾರು ಗೊತ್ತಾಗದು

ಹೊರಗಿಲ್ಲ ಒಳಗಿನ ಖುದ್ದು ||

ಎದುರಾದವರಲ್ಲಿ ರೂಪ

ಕಾಣುವ ತುಸುವೆ

ಕಂಡೀತಾದರೆ ಪೂರ್ತಿ

ಅವರಲ್ಲಿ ಒಲವಾಗಿ ಸ್ಪೂರ್ತಿ ||

ಇರುವೆ ಗೊತ್ತಾಗದಂತೆ

ಏಕಾಂಗಿ ಜಗದಲಿ..

ವೈರಾಗ್ಯವೆಲ್ಲ ಮಾಯ

ಅವನೆದುರಾದ ಸಮಯ ||

ಇದ್ದೇವೆನ್ನುವ ಸಮಯ

ಮಾಯಾಲೋಕ ಸುತ್ತ..

ಬಾಳಲ್ಲೇನೆಲ್ಲ ಆಡಿಸುವ

ಮನಸಿದ್ದಂತೆ ಮಹದೇವ..! ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media via Sridhar Bandri posts – thank you 😍🙏👍😊👌)

01488. ಕೊಡು ನಿನ್ನೆ , ಕೊಡು ನಾಳೆ !


01488. ಕೊಡು ನಿನ್ನೆ , ಕೊಡು ನಾಳೆ !

____________________________________

ಅವಳಾರೊ ಅಲ್ಲೊಬ್ಬಳು

ಕೇಳಿದ್ದೆಲ್ಲ ಕೊಡುವ ಕಾಮಧೇನು

ಬೇಕೇನು ಕೇಳು ಕೇಳೆಂದಳು

ಕೇಳಲೇನ? ಕಂಗಾಲು ನಾನು.. ||

ಕೇಳಲೇನೇನೊ ಒಳಗ್ಹವಣಿಕೆ

ಏನೆಂದು ಅರಿವಾಗದ ಗೊಂದಲ

ಕೇಳಲಿದ್ದರೇನು ಸಾವಿರ ತರ

ಭೀತಿಯ ಗೆದ್ದವರಾರು ಪ್ರಾಂಜಲ ||

ನಂದಿನಿ ತೀರಿಸಬಲ್ಲಳು ಕಾಮನೆ

ಯಾವುದಸಾಧ್ಯ ಅವಳು ಮನಸು ಮಾಡೆ

ಜಮದಗ್ನಿಯ ಕಾದವಳವಳೆ ತಾನೆ ?

ಕೋರಿದ್ದನು ಕೊಡುವಳು ಕೋರಿಕೆ ನೀಡೆ ||

ಕೋರಲೇನು ತೋಚದಲ್ಲ ಭೌತಿಕ

ಬಯಸುವುದೆಲ್ಲ ಮನ ಭಾವುಕ ಸೆಳೆತ

ಬಯಕೆಯಾಗೆ ಕಾರ್ತ್ಯವೀರಾರ್ಜುನ

ಬಲಿ ಹಾಕದಿರುವುದೆ ಗುಟುರಿನ ಸೈನ್ಯ ? ||

ಬಯಕೆಯೆ ಹಾಗೆ ಬಯಸೆಲ್ಲ ಮೊತ್ತ

ಬೇಕೆನ್ನುತ ಆವರಿಸುವ ಚಿತ್ತ ಪ್ರಲೋಭನೆ

ಬೇಕೆಲ್ಲ ನಿನದೆಲ್ಲ ನನಗೆನ್ನುವ ಸ್ವಾರ್ಥ

ಹೋರಾಟದಿ ಮನ ಕಳುವಾಗದಿರಲಿ ಸಖ್ಯ ||

– ನಾಗೇಶ ಮೈಸೂರು

(Nagesha Mn)

(Photo / Picture Source : Internet / social media received via FB friends Madhu Smitha,Yamunab BsyMuddu Dear – thank you all ! 😍🙏👍😊👌)

01487. ಮಾರ್ಜಾಲ ಮನ


01487. ಮಾರ್ಜಾಲ ಮನ

_________________________

ಬೆಕ್ಕೆ ಬೆಕ್ಕೆ ಬೆಕ್ಕೆ

ಮಳ್ಳ ಮಳ್ಳ ನಗೆ ನಕ್ಕೆ

ಮನಸೆಂಬ ಕಳ್ಳ ಬೆಕ್ಕೆ

ಈ ಕಳ್ಳಾಟ ನಿನಗೇತಕ್ಕೆ ? || ಬೆಕ್ಕೆ ||

ಮೆಳ್ಳಗಣ್ಣ ನೋಟ ಸಿಕ್ಕೆ

ಸಾಧು ಸನ್ಯಾಸಿ ತರ ತೆಕ್ಕೆ

ಕ್ರೂರತೆ ದಿಟ್ಟಿಸೊ ಚೆಲುವು

ನಿನ್ನಾಟ ಮಾತ್ರ ಹಾಲಹಾಲವು! || ಬೆಕ್ಕೆ ||

ತಪದಲ್ಲಿ ಕೂತ ಜೋಗಿ

ಕಣ್ಮುಚ್ಚಿ ಮುದ್ರೆ ಹಠಯೋಗಿ

ಮಾರ್ಜಾಲ ಮನಸೆ ನೀ ಠಕ್ಕಗುರು

ಬಿಡು ನಿನ್ನಾಟದೆ ನಿನ್ನ ಗೆಲ್ಲುವರಾರು || ಬೆಕ್ಕೆ ||

ಕಣ್ಮುಚ್ಚಿ ಕುಡಿದೆ ಹಾಲು

ಇನಿತಾಗಲಿಲ್ಲವೆ ಕಂಗಾಲು

ನೋಡಲಿ ಬಿಡು ನೋಡೊ ಜಗ

ನೀ ಕುಡಿದು ಖಾಲಿ ಮಾಡುತ ಜಾಗ || ಬೆಕ್ಕೆ ||

ಅಂಥ ಬೆಕ್ಕೊಂದು ಮನದೆ

ಕೂತಾಗಿದೆ ಜನುಮಜನುಮದೆ

ಕುಣಿದಾಡಲೇನು ಕುಣಿತ ನೂರಾಟ

ಕುಣಿಕೆಯವನದೆ ಕೊನೆ ಗಂಟ ಹಾಕುತ || ಬೆಕ್ಕೆ ||

– ನಾಗೇಶ ಮೈಸೂರು

(Nagesha Mn)

(Photos: received via friend)

01486. ಪರಕೀಯನ ಪರಕಾಯ ಪ್ರವೇಶ


01486. ಪರಕೀಯನ ಪರಕಾಯ ಪ್ರವೇಶ

_______________________________________

ಪರಕೀಯನ ಪರಕಾಯ ಪ್ರವೇಶ

ತನುವಿಗೇನೊ ಸಖ್ಯ ಖಚಿತ ;

ಮನಕಾಗದಿರೆ ಚಿರ ಪರಿಚಿತ

ಅಪರಿಚಿತ ಭಾವ ಕೊಲ್ಲುವ ಧೂರ್ತ ||

ಸಖ್ಯ ಸಾಂಗತ್ಯ ಅರ್ಥಹೀನ, ಅನುಚಿತ

ಬರಿ ತಬ್ಬಿದ ದೇಹಗಳ್ಹೊರಳಾಟ

ಭೌತಿಕ ಮಿಲನ ಸೃಷ್ಟಿಸಿಯೂ ಜೀವ

ಒಂದಾಗದ ಮನ ಹೊಂದಾಣಿಕೆ ಅಭಾವ ||

ಮಿಲನವಲ್ಲ ಕಾಮೋತ್ಸವ ದೈಹಿಕ ಹಿತ

ಪರಕಾಯ ಪ್ರವೇಶ ಭೌತಿಕ ಮೂರ್ತ

ತುಂತುರಲುತ್ತಿಬಿತ್ತಿ ಹದ ಬೇಸಾಯ

ಮನದಮೂರ್ತ ಚಿಗುರಿಸದಿರೆ ಅಪವ್ಯಯ ||

ಪರಕೀಯನ ಪರಕಾಯ ಆಗಬೇಕು ಸ್ವಕೀಯ

ಪ್ರವೇಶವಲ್ಲ ಸಮ್ಮಿಲನ ಅರ್ಧನಾರೀಶ್ವರ

ಪ್ರತಿ ಹೆಜ್ಜೆಹೆಜ್ಜೆಯ ಸದ್ದು ನಂಬಿಕೆ ವಿಶ್ವಾಸ

ಅರಳಿಸಿದಂತೆ ಸಮರ್ಪಣ ಭಾವದೇಕ ಶ್ವಾಸ ||

ಬದುಕಲಿ ಪರಕೀಯನ ಪ್ರವೇಶವಲ್ಲಾ ನಗಣ್ಯ

ಆವರಿಸಿಕೊಳ್ಳೆ ಧುತ್ತನೆ ಕಕ್ಕಾಬಿಕ್ಕಿ ತಾರುಣ್ಯ

ಮನ್ಮಥನ ಬಿಸಿ ಕರಗಿ ನಡೆಸೆ ಮನ-ಮಥನ

ಪರಕಾಯ ಪ್ರವೇಶವದು ನೈಜ ರೋಮಾಂಚನ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media)

01485. ಇದ್ದಾಗ, ಇಲ್ಲದಾಗ


01485. ಇದ್ದಾಗ, ಇಲ್ಲದಾಗ

_____________________________

ಇದ್ದರಾಯ್ತೆ ಅಶನ ವಸನ ?

ಬಿಡಬೇಕಲ್ಲ ಕೈ ಹಿಡಿದ ವ್ಯಸನ

ಇದ್ದರೇನು ನೆರಳಿಗೆ ವಸತಿ ?

ಇರಬೇಕಲ್ಲ ನೆಮ್ಮದಿ ಸಂಗಾತಿ ! ||

ಇದ್ದರೇನು ಗಟ್ಟಿ ಆಳುಕಾಳು

ಬರಬೇಡವೆ ಕುಯ್ಲಿಗೆ ಫಸಲು ?

ಇದ್ದರಾಯ್ತೆ ಹಾರೆ ಕುಡುಗೋಲು

ಬರಬಾರದು ಬರ ಪೀಡಿಸೆ ಗೋಳು ||

ಇದ್ದರೇನು ಸಿರಿವಂತಿಕೆ ಮೊತ್ತ

ಇರಬೇಡವೆ ತನುಮನವದು ಸ್ವಸ್ಥ ?

ಇದ್ದರಾಯ್ತೆ ಖಂಡುಗ ಭತ್ತದ ಕಣಜ

ತಿನ್ನಲಿರಬೇಡವೆ ದೇಹಪ್ರಕೃತಿ ಸಹಜ ||

ಇದ್ದರೇನು ಮನೆ ತುಂಬ ಮಕ್ಕಳು

ಇರಬೇಡವೆ ವಯಸಾದಾಗ ಜತೆಗಾಳು?

ಇದ್ದರಾಯ್ತೆ ಜನ ಹಬ್ಬ ಹರಿದಿನದೆ

ಭಣಭಣ ಮನೆಮನೆಕಥೆ ಮಿಕ್ಕ ದಿನಗಳದೆ ! ||

ಇರಲೇಳು ಇಲ್ಲದಿರಲೇಳು ಸತ್ಯ

ಇರದಿದ್ದೆಡೆ ಮರುಗುವ ಮನ ನಿತ್ಯ

ಇದ್ದುದ ಸೂಕ್ತ ಅನುಭವಿಸೊ ಮನುಜ

ಇರದಿದ್ದುದರ ಚಿಂತೆ ಸೃಜಿಸೊ ಅಸಹಜ ||

– ನಾಗೇಶ ಮೈಸೂರು

೧೪.೧೨.೨೦೧೭

(Picture Source – Internet / social media received via Madhu Smitha – thank you 😍👌🙏👍😊)

01484. ಗುಂಡಿಗೆಯವರಾರಿಲ್ಲಿ?


01484. ಗುಂಡಿಗೆಯವರಾರಿಲ್ಲಿ?

________________________________

ಶಾಕಿನಿ ಡಾಕಿನಿ ಮೋಹಿನಿ

ವಿಷಾಚಿ ಪಿಶಾಚಿ ಪ್ರೇತಾತ್ಮ

ಶಾಪ ವಿಮೋಚನೆ ಸಲುವೆ

ಮಂತ್ರದ ಸೇಬ ಹಿಡಿದಿರುವೆ ||

ಹಣ್ಣೇನೊ ಕೈ ಸೇರಿದೆ ಸ್ವಸ್ಥ

ನಡೆ ವಿಧಿವಿಧಾನ ಅಸ್ತವ್ಯಸ್ತ

ಅರಿವಿಲ್ಲ ಮಂತ್ರಬೀಜಾಕ್ಷರ

ಬರಬೇಕಂತಲ್ಲ ರಾಜಕುಮಾರ ! ||

ನಾ ಹೇಳಬಾರದಂತೆ ಗುಟ್ಟು

ನನ್ನ ಪೂರ್ವಾಶ್ರಮದ ಒಗಟು

ನುಡಿದರೆ ನಿಜವ ರಾಜಕುಮಾರಿ

ಮತ್ತಿಲ್ಲವಂತೆ ವಿಮೋಚನೆ ದಾರಿ ||

ಕಾದು ಕುಳಿತಿಹೆನದಕೆ ಹಿಡಿದು

ಬರಲೊಬ್ಬ ರಾಜಕುಮಾರನೆಂದು

ಕಚ್ಚಿ ತಿನ್ನಬೇಕು ಹಣ್ಣ ಹಸಿದವರಂತೆ

ಹೆದರದೆ ಅಪ್ಪೆ ಈ ಶಾಪ ಕಳೆವುದಂತೆ ||

ನೀನಾ? ನೀನಾ? ಅವನಾ?

ಯಾರಾಗುವಿರಿ ಸಾಹಸಿ ಶೂರ ಘನ!

ದಕ್ಕುವ ಫಲ ಸಿಕ್ಕುವ ಸಂಪದ ಅಪಾರ

ಗುಂಡಿಗೆಯವರು ಬಂದೆನ್ನಾ ಅಪ್ಪುವಿರಾ? ||

– ನಾಗೇಶ ಮೈಸೂರು

೧೭.೧೨.೨೦೧೭

(Picture : muddu?)

01483. ಯಾಕೆ ಹೀಗೆ ಕಾಡುವೆ?


01483. ಯಾಕೆ ಹೀಗೆ ಕಾಡುವೆ?

______________________________

ಕೆಲವೊಮ್ಮೆ ಹಳಸಿದ ಸಂಬಂಧಗಳು ಎಷ್ಟು ದೂರ ಮತ್ತು ಆಳಕ್ಕೆ ಹೋಗಿಬಿಟ್ಟಿರುತ್ತವೆಯೆಂದರೆ ಅದನ್ನು ಮತ್ತೆ ದುರಸ್ತಿ ಮಾಡಲಾಗದಷ್ಟು. ಆದರೂ ಬದುಕಿನ ಅನಿವಾರ್ಯತೆಯಿಂದಲೊ, ಸಾಮಾಜಿಕ ಒತ್ತಡದ ಅಸಹಾಯಕತೆಯಿಂದಲೊ ಬೇರಾಗದೆ ಒಟ್ಟಿಗೆ ಇದ್ದು ನೆಮದಿಯಿಲ್ಲದ ಹಿಂಸೆ ಅನುಭವಿಸಿತ್ತ ಬಾಳು ಸಾಗಿಸುವವರುಂಟು. ಆ ಹೊತ್ತಿನಲ್ಲಿ ಅನಿಸುವ ಅನಿಸಿಕೆಯ ಒಂದು ಲಹರಿ ಇದು..

ಯಾಕೆ ಹೀಗೆ ಕಾಡುವೆ?

_________________________

ಯಾಕೆ ಹೀಗೆ ಕಾಡುವೆ ನನ್ನ

ದೂರವಾಗಿ ಹೋಗದೆ ?

ಶ್ರುತಿಯಿಲ್ಲದ ಹಾಡ ಜತೆಗೆ

ಇನ್ನೆಷ್ಟು ದಿನ ಏಗುವೆ ? ||

ಕೊಳವೆ ಬಿದಿರೆಲ್ಲ ಕೊಳಲಾಗದು

ಎಷ್ಟು ನುಡಿಸಿದರೇನು ?

ನುಡಿಸ ಬರದಾಗ ಕೊಳಲಿದ್ದೇನು

ಊದೆವಲ್ಲ ನಾನು ನೀನು ? ||

ಅಂದಿತ್ತು ನಿಜವೆ ಹಿಗ್ಗು ಸುಗ್ಗಿ

ಹುಮ್ಮಸ್ಸು ಮರೆಸಿತ್ತೆಲ್ಲ ಅಂಕುಶ

ಹೊಂದಿಕೊಳ್ಳದ ಕ್ಷುಲ್ಲಕಗಳೆ

ಇಂದಾಳುತಿವೆ ನಮ್ಮ ನಿರಂಕುಶ ||

ಎಷ್ಟು ಕಾಲ, ಇನ್ನೆಷ್ಟು ಯುಗ

ನಡೆಸಬೇಕೆ ಈ ನಾಟಕ ?

ಇರುವುದೊಂದೆ ಬದುಕಷ್ಟನು

ಅಡವಿಟ್ಟು ನುಂಗುತ್ತ ದುಃಖ ? ||

ದೂರು ಸಲ್ಲ ದೂರಾಗದಲ್ಲ

ನಾವಾಗಲಿಲ್ಲ ಪ್ರಶ್ನೆಗೆ ಉತ್ತರ

ಬಿಟ್ಟು ಪ್ರಶ್ನೋತ್ತರ ಆಗೋಣ ದೂರ

ಆದೀತಾಗ ಬದುಕಿಬ್ಬರದು ಹಗುರ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media)

01482. ಕದ್ದನಲ್ಲ ಕಳ್ಳ..


01482. ಕದ್ದನಲ್ಲ ಕಳ್ಳ..

________________________

ಗಂಗೆ ಗೌರಿ ಕೃಷ್ಣೆ ಕಾವೇರಿ

ಬನ್ನಿರೆಲ್ಲ ಗುಟ್ಟ ಹೇಳುವ ಬಾರಿ

ಗೊತ್ತೇನವನು ಚಿತ್ತಾಪಹಾರಿ ?

ಕದ್ದ ಮನಸ ಹುಡುಕೆ ಪತ್ತೇದಾರಿ ||

ಕಳ್ಳನವನು ಮಳ್ಳನವನು

ಹೇಳಕೇಳದೆ ಧಾಳಿಯಿಟ್ಟವನು

ಬೆಳ್ಳನೆ ಹಾಲ ಹುಡುಗಿ ಚಿತ್ತ

ಕಣ್ಬಿಡುವುದರಲಿ ಕಳುವಾಗಿತ್ತ ! ||

ಕದ್ದೆನೆಂದು ಒಪ್ಪಿಕೊಳ್ಳನು

ಕದ್ದ ಮಾಲನೆಲ್ಲೊ ಬಚ್ಚಿಟ್ಟವನು

ಒಬ್ಬಂಟಿ ನಾ ಅಮಾಯಕಿ

ವಾಸನೆ ಹಿಡಿದು ಬನ್ನಿರೆ ಹುಡುಕಿ ||

ಶುದ್ಧ ಚಿತ್ತ ಕೆಡಿಸಿಬಿಡುವ

ಚಂಚಲವಾಗಿಸಿ ವರಿಸಿಬಿಡುವ

ನಾನಾದರೆ ಅವನ ಖೈದಿ

ಕಾಯುವರಾರೆ ನಿಮ್ಮ ಸನ್ನಿಧಿ? ||

ನನದಲ್ಲ ಪ್ರಶ್ನೆ ನಿಮ್ಮದಿದೆ

ನಾ ಬೇಕೆಂದರೆ ಹುಡುಕಬೇಕಿದೆ

ಹುಡುಕಿಕೊಟ್ಟರೆ ಜತೆಗುಳಿವೆ

ಸಿಗದಿದ್ದರೆ ನಿಮ್ಮಾ ಜತೆಗೊಯ್ಯುವೆ ||

– ನಾಗೇಶ ಮೈಸೂರು

(Nagesha Mn)

(Picture: ಹೊಳೆನರಸೀಪುರ ಮಂಜುನಾಥರ ವಾರಾಂತ್ಯದ ವಿಶೇಷ ಕವನ ಮಾಲಿಕೆಗೆ ಬರೆದ ಕವನ – ೧೬.೧೨.೨೦೧೭)

01481. ಮುಳ್ಳೊತ್ತಿದೆ


01481. ಮುಳ್ಳೊತ್ತಿದೆ

___________________

ಹುಸಿ ಮುಳ್ಳೊತ್ತಿದೆ ಪಾದಕೆ

ತುಸು ಕಾಲೆತ್ತಿದೆ ನೆಪಕೆ

ಭುಜವಿತ್ತ ಸಖಿಯಾಸರೆ

ಕಟ್ಟಲವಳ ಓಡಬಿಡದೆ ! ||

ತಿರುಗಿ ನೋಡುವ ಹಂಬಲ

ತಿರುತಿರುಗಿ ಅವನತ್ತ ಜಾಲ

ನೋಟಕೆ ಸಿಗದವನ ತಡುಕಿ

ಚಹರೆ ಕಟ್ಟಿಕೊಳ್ಳೇ ಹವಣಿಕೆ ||

ನಕ್ಕರೆ ನಗಲೇಳು ಸಖಿಗಳು

ಗೊತ್ತಾಗಲಿ ಹುನ್ನಾರ ತಾಳು

ಬಾಯಾಡುವ ನೆಪ ಸಟೆ ನಿಜ

ಅರಿತು ಛೇಡಿಸೊ ಅವರಾಟ ||

ಕಾನನದ ಹಾದಿ ದುರ್ಗಮ

ದಿಕ್ಕು ತಪ್ಪದ ನಡಿಗೆ ಸುಗಮ

ಯಾಕೊ ಚಿತ್ತಕವನೇಕೊ ಮರೆವು

ಎಷ್ಟು ನೋಡಲಿ ಮರೆವ ಮೊಗ ||

ಯೌವನ ಕೋಟೆ ಬೆಚ್ಚಗಿನ ತಾಣ

ಸುತ್ತುವರೆದವರದೆ ಧೈರ್ಯ ಘನ

ಕಾಲಧರ್ಮದಲಿದೆ ಎಲ್ಲಾ ಚಳಕ

ಸಂಯಮ ಸಂಹಿತೆ ಹಿನ್ನಲೆಗೌಣ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media – not sure – Raaja Ravi Varma painting?)

01480. ಕಿನ್ನರಿ ಕನ್ನಿಕೆ (ಮಕ್ಕಳಿಗೆ)


01480. ಕಿನ್ನರಿ ಕನ್ನಿಕೆ (ಮಕ್ಕಳಿಗೆ)

____________________

ಕಿನ್ನರಿ ನಾ ಕಿನ್ನರಿ

ಕಿನ್ನರ ಲೋಕದ ಪುತ್ಥಳಿ

ಹಾರುತ ಬರುತಿರುವೆ

ಗಂಧರ್ವ ಲೋಕವ ದಾಟಿ ||

ರೂಪದಿ ನಾ ಅಪ್ಸರೆ

ಕುಂದಿರದ ತೊಗಲ ಬಣ್ಣ

ಗುಲಾಬಿ ನವಿನವಿರು

ಹೊಳೆವ ಕಾಂತಿ ಅಪರಂಜಿ ||

ನನ್ನ ನಡಿಗೆ ಮೃದುಲ

ಗಾಳಿಯಲಿ ತೇಲುವ ಪರಿ

ನೀರಾ ಮೇಲಿನ ಹೆಜ್ಜೆ

ಮುಳುಗದ ಪಾದದ ಜಾಲ! ||

ಗಾಳಿಗು ಹಗುರ ವಸ್ತ್ರ

ಪಾರದರ್ಶಕ ಅಪಾರ ಹೊಳಪು

ಮಿರಮಿರನೆ ಮಿನುಗಾಟ

ತಾರೆಯ ಬೆಳಕ ನೂಲಲಿ ನೇಯ್ಗೆ ||

ಬಣ್ಣಿಸಲಾಗದ ಲೋಕ

ನಿಸರ್ಗ ತೊಟ್ಟ ರೂಪ ಅಪರೂಪ

ಸೌಂದರ್ಯ ಸಂಪದವೆಲ್ಲ

ಅನುಭೂತಿಯಾಚೆಯ ಸಿರಿ ಸೊಗಡು ||

– ನಾಗೇಶ ಮೈಸೂರು

(Nagesha Mn)

(Picture source from Internet / social media received via Yamunab Bsy – thank you 😍🙏👍😊👌)

01479. ಕನಸಿನ ಲೋಕ..


01479. ಕನಸಿನ ಲೋಕ..

________________________________

ಕಾಣಬಾರದ ಚಂದ ಕನಸೊಂದ ನಾ ಕಂಡೆ

ಹೇಳಬಾರದ ಕೆಂಡದನುಭವವ ನಾನುಂಡೆ

ಮಾತಾಡಲೊಲ್ಲೆ ಮೌನದಲಿರಲೊಲ್ಲೆ ಕೇಳು

ಆ ಕಸಿವಿಸಿ ಭ್ರಾಂತಿ ಮುಚ್ಚಿಡಲೆಂತು ಹೇಳು? ||

ನಾನಿರುವೆ ನೋಡಿಲ್ಲಿ ಎಷ್ಟೊಂದು ಹಗುರ !

ನನ್ನಾಣೆ ಅರಿವಿರಲಿಲ್ಲ ಯೌವನದ ಕಡು ಭಾರ

ಹೊಸತಾದ ಪ್ರಾಯಕೆ ತತ್ತರಿಸುತಿದೆ ಕನ್ಯಾಸೆರೆ

ತಡೆಯಲೆಂತೊ ಅದರ ಮೇಲಿರಿಸೆ ಕನಸ ಹೊರೆ ? ||

ತಟ್ಟನುದಿಸಿತಲ್ಲೊ ಸುತ್ತ ನನ್ನದೇ ಪ್ರಪಂಚ

ಮರೆಸುತೆಲ್ಲ ವಾಸ್ತವ ಲಟ್ಟಿಸಿ ಕಲ್ಪನೆ ಮಂಚ

ನನ್ನ ಜಗ ಜಗಮಗ ಕುಣಿಸಿರೆ ನನ್ನಾಗಿಸುತ ರಾಣಿ

ಇಹದ ಪರಿವೆ ಮರೆಸಿ ವಯಸ ಧೂಪ ಸಾಂಭ್ರಾಣಿ ||

ಹೊಳೆಹೊಳೆವ ಬಂಗಾರದ ಬೆಳಕ ಪ್ರಭೆ ಜ್ವಾಲೆ

ಎದ್ದು ಕಾಣುವ ಹಂಬಲ ನಾ ಕತ್ತಲಿನ ಕರಿ ಶಿಲೆ

ಫಳಫಳ ಮುತ್ತು ರತ್ನ ಪಚ್ಚೆ ಹವಳ ವಜ್ರ ವೈಡೂರ್ಯ

ಗಾಜಿನ ಗೋಳದ ಮೇಳ ನಶೆ ಕೈಗೆಟುಕದ ಐಶ್ವರ್ಯ ||

ಹೇಗೊ ಕುಣಿಸಿದೆ ಕನಸು ನನಸಂತೆ ದಿರುಸುಟ್ಟು

ನಿಜವೊ ಭ್ರಮೆಯೊ ಗದ್ದಲ ಅರಿಯಬಿಡದೆ ಗುಟ್ಟು

ತಾಳಮೇಳವಿರಲಿ ಬಿಡಲಿ ಕುಣಿಸುವ ಮನ್ಮಥನಾಟ

ಕನಸನ್ಹೊಡೆದು ನನಸಲ್ಹಡೆವ ಬದುಕೇನೀ ಹುಡುಗಾಟ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media)

01478. ನಾನು ಜಿಗಿವೆ, ನೀನು ಜಿಗಿಯೆ!


01478. ನಾನು ಜಿಗಿವೆ, ನೀನು ಜಿಗಿಯೆ!

_____________________________________

ನೋಡು ನಮ್ಮ ನಡುವೆ ಎಷ್ಟು

ಅಂತರ ಪ್ರಿಯೆ, ಅಭ್ಯಂತರ!?

ಮಧ್ಯೆ ಕಂದಕ ಕೈಗೆಟುಕದ ಕಾಯ

ಕತ್ತಲಲಿಡೆ ಹವಣಿಸುತಿಹ ಸೂರ್ಯ ||

ಬರದು ಜಿಗಿತ, ಬರದಲ್ಲ ನೆಗೆತ

ಬರಲೆಂತೊ ಹಾರಿ ನಿನ್ನ ಹತ್ತಿರ ?

ಹತ್ತಿರ ಗಗನದಲಿದ್ದು ಆಕಾಶಬುಟ್ಟಿ

ನೋಡಲಷ್ಟೆ ಕೈಗೆ ಸಿಗದಲ್ಲ ಆಧಾರ ||

ನಡುವಲಿ ಆಳ ಕಿರುಗಾಲುವೆ ನೀರು

ಬರಲೆಂತೆ ಸೇರೆ, ಈಜು ಬರದಲ್ಲ ?

ಗುಡ್ಡ ಹತ್ತಿಳಿದೆ ಮುಳುಗೆ ಗತಿಯೇನು?

ಎದುರಲ್ಲೆ ನೀನು, ಸೇರಲೆಷ್ಟು ಕಾನೂನು! ||

ತುಸು ಬೆಳಕಿದೆ ರವಿ ಕರಗೊ ಮುನ್ನ

ಮಾಡಬಾರದೆ ಏನಾದರು ಪ್ರಿಯತಮ ?

ಕತ್ತಲ ರಾಜ್ಯ ಕಂಗೆಡಿಸೊ ಸಾಮ್ರಾಜ್ಯ

ಹೇಗಾದರು ಹುಡುಕೊ ದಾರಿ ಸೇರಿಸೆ ನಮ್ಮ ! ||

ನಾನು ಜಿಗಿವೆ, ನೀನು ಜಿಗಿಯೆ

ಸಿಕ್ಕರೆ ಸಿಗಲಿ ಕೈಗೆ ಪುಷ್ಪಕ ವಿಮಾನ

ಬಿದ್ದರು ನೀರಿಗೆ ಒಟ್ಟಾಗಿ ತೇಲೋಣ

ಮುಳುಗೊ ಮುನ್ನ ದೇಕುತ ಸಿಕ್ಕಿದ ತೀರ ||

– ನಾಗೇಶ ಮೈಸೂರು

(Nagesha Mn)

(Picture source : Internet / social media, sent by Muddu Dear – thanks madam 😍👌🙏👍😊)

01477. ಕಾಲದ ಮುಖವಾಡ ಮಾಯೆ


01477. ಕಾಲದ ಮುಖವಾಡ ಮಾಯೆ

__________________________________

ತಲೆಯಲಿ ಹೊತ್ತವಳೊಬ್ಬಳು

ಹೆಗಲಲಿ ಇಟ್ಟವಳಿನ್ನೊಬ್ಬಳು

ಎದೆ ಕಲಶವಾಗಿಸಿ ಮತ್ತೊಬ್ಬಳು

ಯಾವುದವಳ ನಿಜರೂಪ ಸ್ವರೂಪ ? ||

ಕೊಡಪಾನ ಹಾಲೂಡಿಸಿದವಳು

ಹೆಗಲಲೆತ್ತಿ ಕುಣಿದಾಡಿಸಿದವಳು

ಮುದ್ದಲಿ ಕೆಡಿಸಿ ತಲೆಗೇರಿಸಿದವಳು

ಮೂವರಲ್ಲ ಅವಳೊಬ್ಬಳೆ ತಾಳು! ||

ರಮಣನಿಗದೆ ಕೊಡವಿತ್ತಾ ಮಹಿಳೆ

ಹೆಗಲಿಗ್ಹೆಗಲು ಕೊಡ ಹೊತ್ತಾಗಲೆ

ಶಿರದೆ ಹೊತ್ತು ನಿಭಾಯಿಸಿ ಒಬ್ಬಳೆ

ನೋಡು ಮೂವರಲ್ಲ ಅವಳೊಬ್ಬಳೆ! ||

ಮುಂದಾಲೋಚನೆ ನೋಟದೆ ಸಾಕಾರ

ಹಿನ್ನಲೆಯ ಇತಿಹಾಸ ಕೆದಕುವ ಕೊಸರ

ಪಾರ್ಶ್ವ ನೋಟದೆ ಗಮನಿಸುತ ಪರಿಸರ

ಮೂರಲ್ಲ ಒಂದೆ ಕೊಡದಾಚಾರ ವಿಚಾರ ! ||

ಬದುಕ ಕೊಡವೊಂದೆ ಪಾತ್ರಗಳ್ಹಲವು

ಪಾತ್ರೆಯ ನೀರಾಗಿ ಪಸರಿಸುವ ಸೊಗವು

ಭೂತ ಭವಿತ ಪ್ರಸ್ತುತ ಏಕೀಕೃತ ಸ್ತ್ರೀ ಕಲಶ

ಕಾಲದ ಮುಖವಾಡ ತೊಟ್ಟ ಮಾಯೆಯ ವೇಷ ||

– ನಾಗೇಶ ಮೈಸೂರು

(Nagesha Mn)

(Picture source from Internet / social media – received via Suma B R – thank you madam !!😍👌🙏👍😊)

01476. ಹಗುರ ಬೆಳಗು ಭಾರದ ಸಂಜೆ


01476. ಹಗುರ ಬೆಳಗು ಭಾರದ ಸಂಜೆ

_____________________________________

ನಸುಕು ಮಸುಕು ಮುಸುಕು

ಮುಸ್ಸಂಜೆ ಹಚ್ಚಿದ ಮತಾಪು

ಒಂದೇ ದಾಯದ ಗುಲಗಂಜಿ

ಬಂದು ಹೋಗು ಕೊರವಂಜಿ ||

ನಸುಕುಟ್ಟು ಅದಮ್ಯ ಉತ್ಸಾಹ

ಅರುಣೋದಯ ರಾಗದ ರಂಗು

ಮುಸ್ಸಂಜೆಯಲ್ಲ ಮ್ಲಾನವದನ

ಅಸ್ತಮಾನ ವೈಭವ ನಿಶಾಘಾತ ||

ಇದೆ ನಿತ್ಯದ ಹಾದಿ ಸವೆಸುತ

ಮುಸ್ಸಂಜೆ ಮುಂಜಾವಿನ ಮಬ್ಬ

ಕತ್ತರಿಸುವ ಹೆಜ್ಜೆ ಬೆತ್ತದ ಬುಟ್ಟಿ

ಚಿತ್ತ ಬಿಚ್ಚಿದ ಛತ್ರಿ ಶಿರ ಚಾಮರ ||

ನಸುಕ ಬುಟ್ಟಿ ತುಂಬ ಕನಸು

ಅಮಿತ ಆತ್ಮವಿಶ್ವಾಸ ಸರಕು

ಸಂಜೆ ತುಂಬಿದ ಹೊರೆ ಭಾರ

ಸರಕು ಇಲ್ಲಾ ನಿರಾಶೆಯದು ||

– ನಾಗೇಶ ಮೈಸೂರು

(Nagesha Mn)

(Picture source internet / social media received via Muddu Dear – thank you !😍👍🙏😊👌)

01475. ಸುಕ್ಕಿನ ಮುಖದ ಹಿಂದೆ


01475. ಸುಕ್ಕಿನ ಮುಖದ ಹಿಂದೆ

_____________________________

ಯಾಕೊ ಕಾಣಿಸುತಿದೆ ಬರಿ ಸುಕ್ಕು

ವರುಷಗಳಾದಂತಿದೆ ಆಕೆ ನಕ್ಕು…

ಗೆರೆಗೆರೆ ಭೈರಿಗೆ ಹಣೆ ಬರಹ ಸಾಲಾಗಿ

ಕಥೆ ಹೇಳಿದೆ ದಣಿಸಿದ ಬಾಳ ಶೋಷಣೆ ||

ಯಾರಲ್ಲ? ಯಾರೆಲ್ಲ? ಯಾರಾಕೆ ಈಗ

ಪ್ರಶ್ನೆಯದಲ್ಲ ಮೊತ್ತ ಯಾರಿಹರಾಕೇಗೀಗ ?

ನಡುಗುವ ಕೈ ತೊದಲಿಸಿ ತುಟಿಯದುರು

ಲೆಕ್ಕಿಸದೆ ನೀಡಿದ್ದೆಷ್ಟೆಂದು ನೆನೆನೆನೆದು ಕಣ್ಣೀರು ||

ನರೆತಿವೆ ಬಲಿತಿವೆ ಕೂದಲು ಬಿಳಿ ಸಮೃದ್ಧ

ಒತ್ತೊತ್ತಾಗಿದ್ದ ಪೊದೆಯಲು ಖಾಲಿ ಉದ್ದುದ್ದ

ಗಂಟಿನ ನಂಟ ಹಿಡಿದು ಹೊರಟಿಹ ಫಸಲು

ತಿಕ್ಕಿ ತೀಡಿ ಬಾಚಿ ಸಿಂಗರಿಸಲೆಲ್ಲಿ ಜನರಿಹರು ? ||

ಕೃಶಕಾಯ ಅಸಹಾಯ ಇನ್ನೆಲ್ಲಿ ಗತ್ತಿನ ಹೆಜ್ಜೆ ?

ಕೋಲ್ಹಿಡಿದು ನಡೆಯೆ ಬಿಗುಮಾನ ತಹ ಲಜ್ಜೆ

ಬಿದ್ದೇ ಬಿಡುವ ಭೀತಿ ಗೋಡೆಗಾತು ನಡೆವ ರೀತಿ

ಕೂತಲ್ಲೆ ಕೂರಲೆಷ್ಟು ಹೊತ್ತು, ದೈನಂದಿನ ಸಂಗತಿ ||

ನಗುತ್ತಾಳೆ ಸುಮ್ಮನೆ ಒಳಗತ್ತರು ಹೊರಗೆ ಅತ್ತರು

ಬರಿ ಚಂದದ ಮಾತಾಡುತ ಸಂತೈಸುವ ಕರುಳು

ಎಲ್ಲೊ ಹೇಗೊ ಬದುಕಿಕೊ ಸುಖವಾಗಿ ಎನ್ನುವ ಸದ್ದು

ಮರೆಮಾಚಿದ ಬಿಕ್ಕಳಿಕೆ ನಿಟ್ಟುಸಿರು ಕಣ್ಣಲ್ಲಿ ಏದುಸಿರು ||

– ನಾಗೇಶ ಮೈಸೂರು

(Nagesha Mn)

(Picture source internet / social media – sent Yamunab Bsy – thank you 😍🙏👍😊)

01474. ಮಾನಿನಿ, ಮದಿರೆ, ಕವನ, ಗಾಯನ..


01474. ಮಾನಿನಿ, ಮದಿರೆ, ಕವನ, ಗಾಯನ..

_________________________________________

ಮಾನಿನಿ ಮದಿರೆ ಮಧುರ

ಕಾವ್ಯದ ಜತೆ ಗಾಯನ ಕುದುರೆ

ನವಿರೇಳುತ ಮತ್ತಲಿ ತೂಗಾಟ

ಮತ್ತವಳದೊ? ಮದಿರೆಯದೊ ? ||

ನುಡಿಸುತ ವಾದನ ಮದನಾರಿ

ಇಣುಕು ನೋಟದೆ ಕೆಣಕುವ ಸ್ವರ

ಮತ್ತಿನ ಕಣ್ಣವಳ ಸಖ್ಯ ಮತ್ತೇರಿಸಿದೆ

ತೇಲುವ ಕಣ್ಣಾಲಿ ತಡಕಾಡಿಸಿ ಪದವ ||

ಬಿಡು ಚಿಂತೆ ಖಾಲಿಯಾಗದು ಮದಿರೆ

ನೋಡಲ್ಲಿ ಸುರೆ ಕರೆವ ಗೋವಳ ಚಂದ್ರ

ತುಂಬಿಸಿ ಹರಿಸಿಹನಲ್ಲ ಅಮೃತ ಧಾರೆ !

ನೀರೆ ನೀರಾ ಮೊಗೆಯಲಿಲ್ಲವೆ ಅವಸರ ! ||

ನನಗಾತಂಕ ಮದಿರೆಯದಲ್ಲ ಚದುರೆ

ಕರಗಿ ಹೋಗೊ ಯೌವನ ಹಿಡಿವವರಾರೆ?

ತನುವಾಗಲಿ ಮದಿರೆ ತೊಟ್ಟಿಕ್ಕಲಿ ವಿಸ್ಮೃತಿ

ಹೀರುವ ಭಾವಗಳಾಗಲಿ ಮಧುರಾನುಭೂತಿ ||

ಹಾಡಿರುವುದು ನಾನೊ, ನೀನೊ ಇಲ್ಲಾ ಪರಿವೆ

ಯಾರಿಗೆ ಬೇಕು? ಮನ ಉಲ್ಲಾಸ ಲೋಕದಲಿರೆ

ಮೈ ಮರೆಯಲಿ ಮದಿರೆಯ ಕುಡಿಸು ನಿಸರ್ಗಕು

ತೂಗೊ ತೊಟ್ಟಿಲಲಿ ತೂಗಾಡಲೆಮ್ಮ ಹಸುಗೂಸು ||

– ನಾಗೇಶಮೈಸೂರು

(Nagesha Mn)

(ಈ ಅದ್ಭುತ ಚಿತ್ರ, ಮತ್ತಷ್ಟೇ ಮತ್ತೇರಿಸುವ ಕವನ ಗುಚ್ಚದ ಜೊತೆ ಕವಿ ರಾಜ್ ಆಚಾರ್ಯ ಅವರ ಪೋಸ್ಟಿನಲ್ಲಿ ರಾರಾಜಿಸುತ್ತಿತ್ತು . ಚಿತ್ರದ ಪ್ರಚೋದನೆ ಮತ್ತು ಪ್ರಲೋಭನೆಗೆ ಸೋತು ನಾನೂ ಒಂದಷ್ಟು ಸಾಲು ಗೀಚಿದ್ದರ ಫಲ ಈ ಕವಿತೆ. ಧನ್ಯವಾದಗಳು ರಾಜ್ ಆಚಾರ್ಯ ಸಾರ್!😍👌👍🙏😊)

01473. ನನ್ನ ಪಾಡಿಗೆ ನಾನು


01473. ನನ್ನ ಪಾಡಿಗೆ ನಾನು

_______________________

ನಾ ಕಾದು ಕೂತಿಲ್ಲ ಯಾರಿಗು

ಕವಿ ಬರೆಯಬೇಡವೊ ಹುಸಿಗವನ

ನಾನು ನಾನಾಗಿ ಕೂತ ಹೊತ್ತು

ಬಿಟ್ಟುಬಿಡು ನನ ಪಾಡಿಗೆ ನನ್ನ ! ||

ಸಾಕು ಬಣ್ಣನೆ ಹಸಿರು ಸಿರಿ ಪ್ರಕೃತಿ

ನಿಸರ್ಗವೆ ಅವಳೆಂದಾ ಭ್ರಮಾಲೋಕ

ನಯನ ನಾಸಿಕ ಹಣೆ ಗಲ್ಲ ಕುರುಳ

ಬಣ್ಣಿಸಿ ನಿಜದ ನನ್ನೆ ಮರೆಸುವೀ ಕುಹಕ ||

ನಾನೆತ್ತಲೊ ನೆಟ್ಟ ನೋಟ ಅವನಲ್ಲ

ಒಳಗೊಳಗಿನ ಕಾರಣ ಎಟುಕುವುದಿಲ್ಲ

ನಾನಲ್ಲಿಹೆ ಪ್ರಪುಲ್ಲೆ ವಿಚಲಿತೆ ಚಕಿತೆ

ನನ್ನನರಿವ ಗೊಂದಲ ಬಿಡೆನಗಿರಲಿ ಎಲ್ಲ ||

ಬಯಸಿದೇಕಾಂತ ಕಾನನ ಪ್ರಕ್ಷುಬ್ಧ

ನಿಶ್ಯಬ್ಧದಲೆ ಹುಡುಕಿರುವೆ ಮೌನದ ಸದ್ದ

ಜಗದಾಚೆಯೆಲ್ಲೊ ಬ್ರಹ್ಮಾಂಡ ಮೂಲೆ

ಅಲೆದಲೆದು ಚಂಚಲ ಮನವಾಗಿಲ್ಲ ಸನ್ನದ್ಧ ||

ನೋಡೀ ಬೇಡಿಯು ಮತ್ತದೆ ಮಾಯಾಜಾಲ

ಬಿಡದೆ ಕಾಡುವ ಲೌಕಿಕ ಐಹಿಕ ಬರಿ ಗದ್ದಲಗಳು

ನಾ ಹುಡುಕಿಲ್ಲ ಪರಮಾರ್ಥ ಅಂತಿಮ ಸತ್ಯ

ಕೇವಲ ನಾನಾಗೆ ಕುಳಿತಿರುವೆ ಕವನವಾಗಿಸದಿರು ||

– ನಾಗೇಶ ಮೈಸೂರು

(Nagesha Mn)

(pictrue source internet / social media received via Muddu Dear – thanks madam 😍👌🙏👍😊)

01472. ದೂರವಿರು ಕನಸೆ, ವಾಸ್ತವದಿಂದ..


01472. ದೂರವಿರು ಕನಸೆ, ವಾಸ್ತವದಿಂದ..

_________________________________________

ಥೂ! ಹಾಳು ಸುಂದರ ಕನಸಿನಾ ಬದುಕೆ

ದೂರ ಸರಿ ತೆರೆಯಾಚೆ ವಾಸ್ತವದಲಿರಬೇಕಿದೆ

ನೀನೊಂದು ಚಿತ್ರಪಟ ತೆರೆದಿಡುವ ಸ್ವರ್ಗ

ಬರಿ ಕನಸಿನಾ ಲೋಕ ನನಸಲಿ ಸಿಕ್ಕದು ಅಗ್ಗ ||

ಬಣ್ಣಬಣ್ಣದ ವರ್ಣನೆ ಮಾಡುಮಹಡಿಮನೆ

ಮೋಡದ ನಡುವೆ ಅರಮನೆ ಜೋಡಿಸಿದಂತೆ

ಯಕ್ಷ ಕಿನ್ನರ ಗಂಧರ್ವಲೋಕದ ಸೊಗಡು

ಗಾಳಿಮೋಡದೆ ತೇಲುವ ನಾವೆ ಸೊಗವೀಡು ||

ಅಲ್ಲರಳಿದ ಘಮಗಮ ಇಲ್ಲಿಗು ಪಸರಿಸುತ

ಪ್ರಲೋಭನೆಯೊಡ್ಡುತ ಪ್ರಚೋದಿಸಿಹ ಭಾವನೆ

ಮನಸೋಲುತ ಬೆಕ್ಕಸ ಬೆರಗಾಗದಿರಲುಂಟೆ

ದಿಟಜಗದಾ ಕುಣಿಕೆ ಅರೆಗಳಿಗೆ ಜಾರುತ ತಂಟೆ ||

ನೋಡುಡಿಸಿಹೆ ನಿನ್ನ ದಿರುಸು ನಗ್ನ ವಾಸ್ತವಕೆ

ಬಚ್ಚಿಡಲೆಲ್ಲ ನೈಜ ಕಪಟ ಲೋಕದ ಅವತರಣಿಕೆ

ನಿನ್ನಂತೆ ಕಾಣುವ ಬಯಕೆ ಅಂತರಂಗದಲಿ

ಅದಕೆಂದೆ ಬಚ್ಚಿಟ್ಟಿದೆ ವಾಸ್ತವವ ಚಂದ ದಿರುಸಲ್ಲಿ ||

ನಡೆನಡೆ ದೂರಕೆ ಕನಸೆ ದೂರವಿರು ಕಾಣುತ

ದೂರದಿರು ದೂರುವುದಿಲ್ಲ ಚಿತ್ತ ನಡಿಗೆ ನಿನ್ನಾ ಸುತ್ತ

ಬೆರೆಸಬೇಕು ನಿಜಜೀವನ ರಸ ರಹಿತ ಸಾಹಿತ್ಯ

ರೋಚಕವಿರಿಸಲು ಬೇಕಲ್ಲ ನಿನ್ನ ರಸವತ್ತಾದ ಸಾಂಗತ್ಯ ||

– ನಾಗೇಶ ಮೈಸೂರು

(Nagesha Mn)

(Picture source internet / social media sent by Muddu Dear – thank you madam 😍👍🙏👌😊)

01471. ಹೃದಯ-ಮೆದುಳು


01471. ಹೃದಯ-ಮೆದುಳು

_____________________

ಹೃದಯಕಿದ್ದರೆ ಕಣ್ಣು

ಮಾಡಿತ್ತಿತ್ತೆ ಹುಣ್ಣು ?

ಕುರುಡು ಹೃದಯ ಸತ್ಯ

ಭಾವದೇರಿಳಿತ ವಿಪರೀತ ! ||

ಮಸ್ತಿಷ್ಕದ ತುಂಬಾ ಕಣ್ಣು

ಇಂದ್ರೀಯಗಳ ಶರಣು

ಅತಿ ಬುದ್ಧಿವಂತಿಕೆ ಸಮರ್ಥ

ನಿಯಂತ್ರಿಸುವಾಟ ವಿಪರೀತ ||

ಕೆಲವೊಮ್ಮೆ ಇವನಾಟ

ಮತ್ತೊಮ್ಮೆ ಅವನಾಟ

ಯಾರ ಗೆಲುವೊ ಸೋಲೊ

ಅನಿಶ್ಚಿತ ತೀರ್ಪಲ್ಲ ಖಚಿತ ||

ಹೃದಯವಂತಿಕೆ ಇರಬೇಕು

ಎಂದವರಿಗು ಬಿಡ ಆಘಾತ

ಬರಿ ಬುದ್ದಿವಂತಿಕೆಯೆ ಸಾಕು

ಎಂದವಗು ಹೃದಯಾಘಾತ ||

ಬದುಕಲರಿತ ಶ್ರೀ ಸಾಮಾನ್ಯ

ತಂತಿ ಮೇಲೆ ನಡೆಯೊ ದೃಶ್ಯ

ನಿಭಾಯಿಸುವ ತೂಗುತಲೆರಡ

ಒಮ್ಮೆ ಇದ ಮತ್ತೊಮ್ಮೆ ಅದ ಜಗ್ಗಿ ||

– ನಾಗೇಶ ಮೈಸೂರು

(Nagesha Mn)

(Picture source from Internet / social media, received via Yamunab Bsy – thank you 😍👌🙏👍😊)

01470. ನೆಮ್ಮದಿಯ ನಿದಿರೆ..


01470. ನೆಮ್ಮದಿಯ ನಿದಿರೆ..

_________________________

ತಾವರೆಯೆಲೆ ಹಾಸಿಗೆ

ಕಟ್ಟಿದ ಕನಸಿನ ಜೋಳಿಗೆ

ತೂಗುತಿದೆ ಜಲದಲೆ ತರಂಗ

ಮೈಮರೆತ ಲಲನೆ ನಿದಿರೆ ಪ್ರಸಂಗ ||

ಕಾವಲಿವೆ ತಾವರೆ ಸುತ್ತ

ತಾರೆ ಮೊಗದವಳ ಕಾಯುತ್ತ

ತೂಗಿ ಮುಟ್ಟಲವಳ ಮೊಗದಾವರೆ

ನಾಚಿದವಳ ಮೊಗವಾಗಿದೆ ಕೆಂದಾವರೆ ||

ಪಡೆಯುತ ಸ್ವಪ್ನದೆ ಆಸರೆ

ಹಡೆಯುತ ಜೀವದ ಜಗಧಾರೆ

ಜಲದಿಂದುದ್ಭವಿಸಿದ ಜೀವ ವಿಕಾಸ

ಪ್ರಕೃತಿ ಪುರುಷಗಳೆರಡು ಅವಳದೆ ಖಾಸ ||

ಜಲಚರ ಪತಂಗವಿಟ್ಟ ಕಚಗುಳಿ

ಕೈಕಟ್ಟಿದ ತಲ್ಲೀನತೆ ಬಿಡಿಸಿ ಮೈಚಳಿ

ಕನಸಿನೊಳಗೊಂದು ಕನಸಾಗುತ ಸಾಕಾರ

ಜಗ ನೆಮ್ಮದಿ ನಿದಿರೆಯಲಿ ಲಲನೆಯ ಸಂಸ್ಕಾರ ||

ಮಲಗು ಮಲಗು ಜಗದಾ ಸೃಷ್ಟಿ

ತುಸು ವಿಶ್ರಮಿಸು ಕಾಯಲಿ ಸಮಷ್ಟಿ

ನಿನ್ನೊಡಲಲೊಡಮೂಡಲಿ ಕಲ್ಪನೆ ಮೂರ್ತ

ನಮಗರಿವಾಗಲಿ ಬಿಡಲಿ ಪಾಲಿಸುವ ಅನವರತ ||

– ನಾಗೇಶ ಮೈಸೂರು

(Nagesha Mn)

(Picture source from Internet / social media , received via Uma Odayar – thanks madam 😍🙏👌👍😊)

01469. ಆಳ ಆಳ ಪಾತಾಳ


01469. ಆಳ ಆಳ ಪಾತಾಳ

____________________________

ಆಳ ಆಳ ಪಾತಾಳ

ಇಳಿದರೆ ಕೈಗೆ ಸಿಕ್ಕುವಳಾ ?

ಸಿಕ್ಕುವಳವಳಲ್ಲವೆ ಗಂಗೆ

ಸಿಗದಿರಲಾಗುವಳೆಂತು ಅಂಬೆ ? || ಆಳ ||

ಜೋತು ಬಿದ್ದ ಸಂಸಾರ

ಆಳಕಿಳಿದಷ್ಟು ಉದ್ದುದ್ದದ ಹಗ್ಗ

ಎಟುಕಲಿಷ್ಟೆ ಗುಟುಕು ನೀರು

ನೇಣಾಗೆ ಕುಣಿಕೆ ಕಾಯುವರಾರು ? || ಆಳ ||

ಕೆತ್ತಲೆಷ್ಟು ಮೆಟ್ಟಿಲ ದೊರೆ

ಬತ್ತಿ ಬತ್ತಿ ಯಾಕಿಷ್ಟು ಒಳಗಿಳಿವೆ ?

ನೀರಲ್ಲ ನೂರು ಕೆಸರ ರಾಡಿ

ನೀರಿಗು ಸಾಹಸ ನೀರೆಯ ಕಾಡಿ || ಆಳ ||

ಸರತಿ ಸಾಲು ಕಾದ ಕರ್ಮ

ಸಿಕ್ಕವರ ಪಾಲು ಸಿಗದಲ್ಲ ಸಮ

ಕೆಳಗಿಳಿದರು ಹತ್ತಿದರೆಷ್ಟೊ

ಇಳಿಯದೆ ಹತ್ತದೆ ಬಾಳಿದವರಷ್ಟು || ಆಳ ||

ಗಂಗೆ ಗಂಗೆ ಪಾತಾಳ ಗಂಗೆ

ಜೀವ ಹಿಡಿದಿಡಲು ನಿನ್ನಾ ಹಂಗಿದೆ

ನೀನೆ ತುಸು ತುಸುವೆ ಮೇಲೇರೆ

ನೀರಾಡಿ ಕಣ್ಣಾಲಿ ನಿನ್ನಾ ಪೂಜಿಪರೆ || ಆಳ ||

– ನಾಗೇಶ ಮೈಸೂರು

೦೮.೧೨.೨೦೧೭

01468. ಬಹನೇನೆ ?


01468. ಬಹನೇನೆ ?

__________________________

ಕೊರಳಲಿಹ ಮಾಲೆ ಬಾಡುವ ಮೊದಲೆ

ನೇಸರನ ಹಾದಿ ಮಸುಕ ಮಬ್ಬಾಗಬಿಡದೆ

ಕಾದು ಬೇಸತ್ತ ಮನವ ಇಬ್ಬಾಗವಾಗಿಸದೆ

ಸದ್ದುಗದ್ದಲವಿರದೆಡೆ ಸಂಭ್ರಮಿಸೆ ಬಹನೇನೆ ? ||

ಕಂಕಣ ಕಟ್ಟುವ ಕೈಲಿ ಕುಸುಮದ ದಂಡೆ

ನನ್ನೊಲವ ಭಾವ ಬರೆಯೆ ಎಲೆಯೆ ಓಲೆ

ಚಿಗುರ ಕಡ್ಡಿಯೆ ಲೇಖನಿ ಮೀರಿ ಮನದೆಲ್ಲೆ

ಸ್ಪುರಿಸಿಹ ಸೊಗದ ವರ್ಷಧಾರೆಗೆ ಬಹನೇನೆ ? ||

ನೋಡೆ ಸುತ್ತೆಲ್ಲ ಕವಿಯುತಿದೆ ಮೋಡ ಗಾಢ

ಮುತ್ತಿ ಆವರಿಸಿ ಕಾಡಲು ನಿಭಿಡಾ ನಿಗೂಡ

ಕಲ್ಲು ಮನದವಳೆಂದು ಕರಗಿಸೆ ವರ್ಷಧಾರೆ

ಸುರಿಸಿ ಶರಣಾಗಿಸುವ ಮೊದಲೆ ಬಹನೇನೆ ? ||

ನಾ ಬರೆದಿರುವೆ ಕವನ ಅವನ ನೆನೆಯುತ್ತ

ಕಾವ್ಯದೋಲೆಯ ತುಂಬ ಅವನದೇ ಗಣಿತ

ಕಳಿಸಿರುವೆ ಅವಿರತ ಅಗಣಿತ ಮೇಘಸಂದೇಶ

ಮೇಘದೂತನ ಕೋರಿಕೆ ಮನ್ನಿಸಿ ಬಹನೇನೆ ? ||

ಜಗದ ಪರಿವೆಯಿಲ್ಲ ಅರಿವೆ ಜಾರಿದರಿವಿಲ್ಲ

ಪ್ರಾಯದ ಪಾರ್ಶ್ವ ಬಯಲಿಗೆ ತೋರಿದರಿವಿಲ್ಲ

ಅವನೊಂದು ನೆಪವಾಗಿ ಅವನೆ ಸಖ ನೆನಪಾಗಿ

ಬರಿ ಕಾಡದೆ ತಡಕಾಡಿಸದೆ ಓಡೋಡಿ ಬಹನೇನೆ ? ||

– ನಾಗೇಶ ಮೈಸೂರು

(Nagesha Mn)

(ರವಿವರ್ಮರ ಈ ಚಿತ್ರ ಹೊಳೆನರಸೀಪುರ ಮಂಜುನಾಥರ ಪೋಸ್ಟಿನಿಂದ ಎರವಲು ಪಡೆದಿದ್ದು. ಅವರ ಪೋಸ್ಟಿನ ಕೋರಿಕೆಯನುಸಾರ ಬರೆದ ಕವನವಿದು)

01467. ಮರೆತುಬಿಡು ಮಿಕ್ಕೆಲ್ಲ..


01467. ಮರೆತುಬಿಡು ಮಿಕ್ಕೆಲ್ಲ..

_______________________________

ಮರೆತುಬಿಡು ಮಿಕ್ಕೆಲ್ಲ

ಈ ಗಳಿಗೆಯಷ್ಟೆ ಶಾಶ್ವತ

ತನ್ಮಯತೆಯಲಿ ಅನುಭವಿಸು

ಕಣ್ಮುಚ್ಚಿಕೊಂಡೆ ಮನಸಾ ||

ನೂರೆಂಟಿವೆ ಕಾಡಲು

ತೆರೆದ ಕಣ್ಣು ಮರೆಮಾಚದು

ಮುಚ್ಚಿದರೆಗಳಿಗೆ ಭ್ರಾಮಕ

ಲೋಕದಲಿದ್ದರು ಕಿರುಗಳಿಕೆ ||

ಯಾರಿಗಿಲ್ಲಿದೆ ಸಮಯ ?

ಸರಿ ತಪ್ಪು ಒಪ್ಪು ಸಂವಾದ

ಸರಿ ಸರಿ ಎನ್ನುವವರದೆ ಜಗ

ಸರಿಯದೆ ನೋಡೀಗ ನಮ್ಮದೆ ||

ಬೇಡ ಚುಕ್ಕಿ ಚಂದ್ರಮ ಲೆಕ್ಕ

ಕೃತಕ ಸೃಷ್ಟಿಯದು ಅಸಹನೆ

ಮುಚ್ಚಿದ ಕಣ್ಣೊಳಗಿದೆ ನಡಿಗೆ

ಬಿಚ್ಚದೆ ಗಳಿಗೆ ಹೊಕ್ಕು ನೋಡುವ ||

ಬಿಡು ಯಾವುದಿಲ್ಲ ನಿಯಮ

ಮನ ತೋಚಿದ್ದು ಮಾಡಲಿ

ಧರ್ಮ ಕರ್ಮ ಶ್ರದ್ಧೆ ಪರಿಣಿತಿ

ಎಲ್ಲ ಕಲಿಕೆ ತಪ್ಪಿನ ಬಯಲಿಲ್ಲಿ ||

– ನಾಗೇಶ ಮೈಸೂರು

(Nagesha Mn)

(Picture source internet / social media)

01466. ಕಾದ ಬದುಕಿನ ಕಥೆ


01466. ಕಾದ ಬದುಕಿನ ಕಥೆ
___________________
(೩ಕೆ – ನಮ್ಮ ಚಿತ್ರ ನಿಮ್ಮ ಕವನ ೫೨ಕ್ಕೆ ಬರೆದ ಕವನ)


ಯಾರಿಟ್ಟರಿಲ್ಲಿ ಬಂದು,
ಹೋದವರ ಲೆಕ್ಕ ?
ದಿನದ ಕೊನೆಯ ಶೂನ್ಯ
ಬರಿ ಖಾಲಿ ಖಾಲಿ…||

ಮಿಕ್ಕಿದ್ದು ಬರಿ ಭೂತಗಳೆ
ಪಂಚಭೂತದ ಶುದ್ಧ;
ಬೆಳಗೆದ್ದ ನಡಿಗೆಯಲಿ
ಪರಿಶುದ್ಧ ಭವಿತದ ಕಾಲ..||

ಕರೆದು ಬಂದಾರೆ ಬಾರಣ್ಣ
ಕುಂದರೆ ಕೂತು ಗಳಿಗೆ..
ನೋಡೆ ವಿಶಾಲ ಶರಧಿ ಗಗನ
ಕಾಡೆ ಕಪ್ಪುಬಿಳಿಯಾದ ಹಸಿರು..||

ನೆನಪುಗಳ ಗರಿಕೆ ಚಿಗುರು
ಎಲೆ ಚಿಗುರಿ ರೆಂಬೆ ಕೊಂಬೆ..
ಮುದಾಮುದ ಅಹವಾಲು
ಸಲ್ಲಿಸುವ ಹೊತ್ತ ತಂಗಾಳಿ..||

ಬಂದರು ಹೋದರು ಅಮಿತ
ಬಂದು ಹೋಗುವ ಅನಂತ..
ಬರುವೆಯೊ ಬಾರೆಯೊ ಅನಿಶ್ಚಿತ
ಬಂದ ಮೇಲೆ ಕೂತಾಡದೆ ವಿಧಿಯಿಲ್ಲ ||

– ನಾಗೇಶ ಮೈಸೂರು
(Nagesha Mn)

(೩ಕೆ – ನಮ್ಮ ಚಿತ್ರ ನಿಮ್ಮ ಕವನ ೫೨ಕ್ಕೆ ಬರೆದ ಕವನ – ಚಿತ್ರ ೩ಕೆ ಬಳಗದ್ದು)

01465. ಅನುಮಾನ..


01465. ಅನುಮಾನ..
______________________

ನನಗೆ ಹಾಸ್ಯ ಕವನ ಬರಿಯೋಕೆ ಬರಲ್ಲ – ಸುಮ್ನೆ ವೆರೈಟಿಗಿರಲಿ ಅಂತ ಒಂದು ಪ್ರಯತ್ನ ಅಷ್ಟೆ..😝😁🤔😳

ಅನುಮಾನ..
______________________


ಯಜಮಾನ, ಓ ಯಜಮಾನ
ಉದ್ದ ಕೂದಲು ಸಿಕ್ರೆ, ಜೋಪಾನ
ಉಪ್ಪಿಟ್ಟಲ್ಲಿ ಸಿಕ್ಕರೆ, ಆಕಸ್ಮಿಕ
ಮೈಮೇಲೆ ಸಿಕ್ಬಿಟ್ರೆ, ಬಿಚ್ತಾಳೆ ಜಾತ್ಕ ! ||

ಹೌದಪ್ಪ, ಪೂರಾನೆ ಅನುಮಾನ
ಹೆಣ್ಮಕ್ಳುದಂಗೆ ತಾನೆ, ಗುಣಗಾನ ?
ನಂಬೊದೆಂಗೆ ಗಂಡ, ಕೊಂಚ ದೇವೇಂದ್ರ
ಒಮ್ಮೆ ಕೃಷ್ಣಾನು ಆಗಿರಲಿಲ್ವೆ, ಶ್ರೀ ರಾಮಚಂದ್ರ ? ||

ಹುಷಾರಪ್ಪ ಶರ್ಟು, ಇದ್ರಲ್ಲಿ ಸೆಂಟು
ವಾಸ್ನೆ ಗಬಕ್ಕಂತ, ಹಿಡ್ದಾಕೊ ಸ್ಮಾರ್ಟು
ಕೂತ್ಕೊಂಡಾಗ ಅಕ್ಪಕ್ಕ , ಇರ್ಲಪ್ಪ ಎಚ್ಚರ
ಕುಡ್ದಿದ್ದು ಕಾಫಿನಾದ್ರು, ಪರ್ಸಂಗ ಅನ್ಬಿಡ್ತಾರ! ||

ಅಪ್ಪಿತಪ್ಪಿನು ಬಿಚ್ಬಾರ್ದು, ಅವ್ರಿವ್ರ ಸುದ್ಧಿ
ಪ್ರಶ್ನೆ ಕೇಳ್ತಾರೆ ನೂರೆಂಟು, ಅವ್ಳಲ್ಲ ಪೆದ್ದಿ
ಮಾಡ್ಕೋಬೇಡಪ್ಪ ಎಡವಟ್ಟು, ಶರ್ಟಲ್ಲಿ ಸುಕ್ಕು
ಮುಗ್ದೆ ಹೋದಂಗೆ ಅಲ್ಲಿದ್ರೆ, ಮಾರ್ಕು ಲಿಪ್-ಸ್ಟಿಕ್ಕು ! ||

ಏನು ಮಾಡೋದು ಹೆಣ್ಣಂದ್ರೆ, ಅನ್ಮಾನ ಆಸ್ತಿ
ಅದಿತ್ತಂದ್ರೆ ಅದರರ್ಥ, ಅವ್ರ ಪ್ರೀತಿನೂ ಜಾಸ್ತಿ
ಇರ್ಲಪ್ಪ ಅನುಮಾನ, ಊಟಕ್ಕೆ ಉಪ್ಪಿನಕಾಯಿ
ಅದೇ ಊಟ ಆಗ್ಬಿಟ್ರೆ, ಬದುಕಲ್ಲ ನರಕದ್ಬಾಯಿ ! ||

– ನಾಗೇಶ ಮೈಸೂರು
(Nagesha Mn)
(Picture source from Internet: https://www.houstonpi.com/cheating-spouse/)

01464. ನೀಡು ಕೈ ಜೊತೆಗೆ


01464. ನೀಡು ಕೈ ಜೊತೆಗೆ
_______________________

ಬದುಕು ನಿಭಾಯಿಸಲೆಂದು ಒಟ್ಟಾದ ಜೋಡಿ ಬದುಕಲ್ಲಿ ಬರುವುದನ್ನೆಲ್ಲ ಎದುರಿಸಲು ಪಡುವ ಶ್ರಮ ಕಡಿಮೆಯೇನಲ್ಲ. ಅದರಲ್ಲು ಬವಣೆ, ಯಾತನೆಗಳು ಕಾಡತೊಡಗಿದರೆ ಅದು ನಿಜಕ್ಕು ಪರೀಕ್ಷಾ ಸಮಯ. ಜತೆಯಲ್ಲಿ ಒಂದಾಗಿ ಎದುರಿಸಿ ಗೆದ್ದು ಬರಬಹುದು ಇಲ್ಲವೆ ಆ ಒತ್ತಡದಡಿ ಮುದುಡಿ ‘ನೀನು, ತಾನು’ ಎಂದು ಆರೋಪಿಸುತ್ತ ಪರಸ್ಪರರ ದೂಷಣೆಯಲ್ಲಿ ಮತ್ತಷ್ಟು ವಿಷಮ ಪರಿಸ್ಥಿತಿಯತ್ತ ಜಾರಲೂ ಬಹುದು. ನಡೆದ ಹಾದಿ, ಹಾಕಿದ ಹೆಜ್ಜೆ ಸರಿಯಿರಲಿ, ತಪ್ಪಿರಲಿ ಆ ಹೊತ್ತಿನಲ್ಲಿ ಬೇಕಾದ್ದು ದೂಷಣೆಯಲ್ಲ; ನಿಜಾಯತಿಯ ಸ್ವವಿಮರ್ಶೆ ಮತ್ತು ಮುಂದೆ ಹೇಗೆ ಸಾಗಬೇಕೆಂಬ ವಾಸ್ತವಿಕ ಚಿಂತನೆ. ಇಬ್ಬರು ಪರಸ್ಪರರಿಗೆ ಹೆಗಲಾಗಬೇಕೆಂಬ ಸಾಧಾರಣ ಅರಿವು ಆ ಪರಿಸ್ಥಿತಿಯನ್ನೆದುರಿಸುವ ಧೈರ್ಯವನ್ನು, ಸ್ಥೈರ್ಯವನ್ನು ಒದಗಿಸುತ್ತದೆ. ಹಾಗಿಲ್ಲದಿದ್ದರೆ ಸಮಸ್ಯೆ ಪರಿಹಾರವಾಗದೆ ಬಿಗಾಡಾಯಿಸುವುದೆ ಹೆಚ್ಚು.

ಅಂತಹ ಇಕ್ಜಟ್ಟಿನಲ್ಲಿ ಸಿಕ್ಕ ಜೀವಿಯೊಂದರ ಮನದ ಭಾವದ ತುಣುಕು ಈ ಪದ್ಯ.

ನೀಡು ಕೈ ಜೊತೆಗೆ
_______________________

ದೂರಬೇಡ ರಮಣ
ಕಿಡಿಗಾರಬೇಡ ಕರುಣ
ನಾನಾಗಿದ್ದೆ-ನಲ್ಲ ನಿನ್ನ ಪ್ರಾಣ
ಬದುಕಿನೇರಿಳಿತ ಕಹಿ ಸಾಧಾರಣ ||

ತೆರೆದ ಬಾಹು ಚಾಚೆ
ನೋಡೆಂದೆ ಪ್ರೀತಿಯಾಚೆ
ಹೊತ್ತೆ ಹೊಣೆ ನನ್ನೆ ಬದಿಗಿತ್ತು
ದುಡಿವೆ ನೋಡದೆ ಹೊತ್ತುಗೊತ್ತು ||

ತೋಚಿದಂತೆ ನಡೆದೆ
ಸರಿ ತಪ್ಪು ಎಲ್ಲಾ ಭರದೆ
ನಾನಿಹೆ ಸಾಗರದ ನೀರ ತರಹ
ತೀರಿಸಬಲ್ಲೇನೆ ಉಪ್ಪು ನೀರಲಿ ದಾಹ ? ||

ಅಂದುಕೊಂಡ ರೀತಿ
ನಡೆಯದೆಲ್ಲ ಅದು ಲೋಕರೀತಿ
ಕೊಟ್ಟೆ ನಲ್ಲ ಹೆಚ್ಚು ಧಾರಾಳ ಪ್ರೀತಿ
ಇತ್ತೆಂದುಕೊಂಡೆ ನಿಭಾಯಿಸೊ ಛಾತಿ ||

ಬೇರೇನು ಬೇಡ ಇನಿಯ
ಜತೆಗಿರು ಸಾಕು ಅದೆ ಅಕ್ಷಯ
ನಾನಾಗಲುಂಟೆ ಒಂಟಿ ಬಾಹುಬಲಿ
ತಪ್ಪೆಸಗಲಿ ಬಿಡಲಿ ಜತೆ ನಿನ್ನ ಹೆಗಲಿರಲಿ ||

– ನಾಗೇಶ ಮೈಸೂರು
(Nagesha Mn)
(Picture source – internet / social media)

01463. ನೀರೆ ನೀರೆ ಜಲಧಾರೆ


01463. ನೀರೆ ನೀರೆ ಜಲಧಾರೆ
________________________
(ಕವಿತೆಯ ವಸ್ತು ಎಲ್ಲೆಲ್ಲೆ ಸುತ್ತಿದರು ಕವಿ ಮನಕೆ ಮುದ ಕೊಡುವುದು ನಿಸರ್ಗವೆ. ಅಂತದ್ದೊಂದು ಚಿತ್ರದ ಮೇಲಿನ ಸರಳ ಕವನ)

ನೀರೆ ನೀರೆ ಜಲಧಾರೆ
________________________


ನೀರೆ ನೀರೆ ನೀನೆ ನೀರೆ
ಸಲಿಲ ಜಲಲ ಜಲಧಾರೆ
ಹರಿ ಹರಿವ ಲಾಲಿತ್ಯ ನಿನ್ನ ಸಕಲ
ಪಾತ್ರಕೆ ಹೆಣೆದು ನಿನ್ನಾಕಾರ ಸ್ಥೂಲ ||

ಮೇಲಲ್ಲಿ ಹುಣ್ಣಿಮೆ ಚಂದ್ರ
ಕತ್ತಲೆ ಜಗಕೆ ಸೃಷ್ಟಿ ಲಾಂದ್ರ
ತುಂಡು ಬೆಳದಿಂಗಳಾಗಿ ಕರಗಿ ಬಿದ್ದ
ನೀರಾಗಿ ನೀರೆ ದಿರುಸುಟ್ಟು ಮೆರೆದಿದ್ದ ||

ನೋಡವನೆ ಬ್ರಹ್ಮನಾ ಅವಧೂತ
ಬೆರೆಸುತ್ತ ಹಸಿರಿಗೆ ಶ್ವೇತಮುಕುಟ
ನೀಲಿ ಬಾಣಲೆಯಲರೆಯುತ್ತ ಸರಕ
ಬಂಡೆಗಲ್ಲಿನೆದೆಯಲೆಬ್ಬಿಸಿಹ ಪುಳಕ ||

ನೋಡಿಲ್ಲಿ ಪ್ರಕೃತಿ ಕಾರ್ಖಾನೆ
ನಿಸರ್ಗ ನಿರಂತರ ಉತ್ಪಾದನೆ
ನೀರಿಂದ ಚಲನೆ ನೀರೆ ಸೃಷ್ಟಿಗರಮನೆ
ಚಕ್ರದಾವರಣದೆ ಎಲ್ಲಿ ಮೊದಲುಕೊನೆ ||

ಕುಣಿದು ನಲಿದು ಬಾ ಬಾರೆ
ನೀನೆ ತಾನೆ ನಿಸರ್ಗದ ಸೀರೆ
ಉಟ್ಟು ತೊಟ್ಟು ಬಳುಕಲೆದೆಗೆ ಆಹಾ!
ಕಾದ ರಸಿಕ ಮನ ಆಸ್ವಾದಿಸಿ ಸ್ವಾಹ ! ||

– ನಾಗೇಶ ಮೈಸೂರು
(Nagesha Mn)
(Picture source : Internet / social media (once again don’t know the real source) received via Muddu Dear – thanks madam 😍👌🙏👍😊)

01462. ವಾರಿಜವಿದೆ ನಾರಿ ನಿನಗೆ..


01462. ವಾರಿಜವಿದೆ ನಾರಿ ನಿನಗೆ..
_____________________________

(ಒಂದೆರಡು ದಿನದ ಹಿಂದೆ ಹೊಳೆನರಸಿಪುರ ಮಂಜುನಾಥರವರ ಪೋಸ್ಟೊಂದರಲ್ಲಿದ್ದ ಚಿತ್ರ ಮನಸೆಳೆದು ಅದಕ್ಕೊಂದು ಕವನ ಹೊಸೆದಿದ್ದೆ – ಅದೀಗ ನಿಮ್ಮ ಅವಗಾಹನೆಗೆ)

ವಾರಿಜವಿದೆ ನಾರಿ ನಿನಗೆ..
_____________________________


ತಡೆಯಬೇಡವೆ, ತಾಳೆ ಮುಡಿಸಿಯೆ ಬಿಡುವೆ
ಕಮಲವದನೆಗೊಂದು ಚಂದ ಕಮಲದ ಒಡವೆ
ತಡೆವ ಕರವ ತಡೆವ ಕರದಪ್ಪುಗೆಯಲಿರಲಿ ಹಸ್ತ
ಬೆಚ್ಚಗಿರಲಲ್ಲಿ ಮುಡಿಸುವೆ ಮುಡಿಗೆ ಹೂ ಪ್ರಶಸ್ತ ||

ಎದೆಗೊರಗಿ ಕಣ್ಮುಚ್ಚೆ ನಿರಾಳ ನಾನೀವೆ ವಚನ
ಮುತ್ತ ಕದಿಯುವುದಿಲ್ಲ ಗುಟ್ಟಾಗಿತ್ತು ಚುಂಬನ
ಬೊಡ್ಡೆಗೊರಗದೆ ಅಡ್ಡ ನಾನಾಗಿ ನಿನ್ನಪ್ಪುಗೆ ಖೆಡ್ಡ
ಹಂಸತೂಲಿಕಾ ತಲ್ಪ ತಂಗಾಳಿ ಬೆರೆಸಿ ಸಂಗಡ ||

ನಿದಿರೆಯಾಗಲಿ ಸುಂದರ ಕನಸ ತಾವರೆಗೊಳ
ಕಣ್ಮರೆಯಾಗಲಿ ಕಾಡುವ ಎದೆಯೊಳ ತಳಮಳ
ಬಂಧನವಲ್ಲ ಭರವಸೆ ಕೈ ಬಿಡದ ಭದ್ರತೆ ಹೆಣ್ಣೆ
ಭದ್ರನಾಗಿ ಕಾಯುವೆ ಮರೆತೆಲ್ಲ ಮಲಗಿಕೊ ಕಣ್ಣೆ ||

ಭಾವದಪ್ಪುಗೆ ಬೆಚ್ಚಗೆ ಹದ ಮೀರದಿರಲು ನೀರಿಗೆ
ಕಾಲನಿಟ್ಟು ಕೂತಿಹ ಪ್ರಾಯದೆಚ್ಚರಕಿಟ್ಟೆ ಮೆಚ್ಚುಗೆ
ಸುತ್ತುವರೆದಿರುವೆ ನಿನ್ನ ಸುತ್ತೇಳು ಸುತ್ತಿನ ಕೋಟೆ
ಮುತ್ತಿಗೆ ಹಾಕಲೆಲ್ಲಿ ಬಿಡು ಅರಿಯಲಾಗದೊಳಗುಟ್ಟೆ ||

ಬಳೆ ಕಂಕಣ ತಾಯಿತ ಮುಂಡಾಸು ಕಟ್ಟುಪಾಡು
ಬಿಚ್ಚಿದ ಜಡೆ ಸ್ವೇಚ್ಛೆ ಕಟ್ಟದಿದ್ದರು ಸೊಬಗ ಸೊಗಡು
ತಲ್ಲೀನ ಪರವಶ ಭಾವದ ಮುದ್ರೆಯಾಗಲಿ ಪ್ರೇಮ
ದೈವೀಕ ಗಳಿಗೆಯಿದುವೆ ಹೃದಯಗಳ ಸಭ್ಯ ಸಂಗಮ ||

– ನಾಗೇಶ ಮೈಸೂರು
(Nagesha Mn)
(Picture source : Internet / social media – taken from a post of ಹೊಳೆನರಸೀಪುರ ಮಂಜುನಾಥ – thanks Manju sir 😍🙏👌👍😊)

01461. ಯಾಕೀ ಪರಿ ತ್ಯಾಗ ?


01461. ಯಾಕೀ ಪರಿ ತ್ಯಾಗ ?
______________________

ನಮ್ಮಲ್ಲಿ ಸಾಧಾರಣ ಕಂಡುಬರುವ ಒಂದು ಸಹಜ ಗುಣ ತ್ಯಾಗ. ಹೊಣೆಗಾರಿಕೆ ಹೊತ್ತುಕೊಂಡು ಅದನ್ನು ನಿಸ್ವಾರ್ಥದಿಂದ ಅಕ್ಷರಶಃ ಪಾಲಿಸಹೊರಟವರಲ್ಲಿ ಇದು ಎದ್ದು ಕಾಣುವ ಸ್ವಭಾವ. ತಂದೆ ತಾಯಿಗಳಿಗೆಂದು ಮಕ್ಕಳೊ, ಮಕ್ಕಳಿಗೆಂದು ಹೆತ್ತವರೊ, ಒಡಹುಟ್ಟಿದವರ ಸಲುವಾಗಿ ಅಣ್ಣನೊ, ತಮ್ಮನೊ, ಅಕ್ಕನೊ, ತಂಗಿಯೊ – ಕೆಲವೊಮ್ಮೆ ಗೆಳೆಯರ ಸಲುವಾಗಿ ಕೂಡ ತ್ಯಾಗದ ಸೆರಗ್ಹಿಡಿದು ನಡೆವ ಜನರಿದ್ದಾರೆ. ಅವರನ್ನು ಗುರುತಿಸಲಿ ಬಿಡಲಿ – ತಮ್ಮ ಕರ್ತವ್ಯವೆಂದು ಮಾಡಿಕೊಂಡು ಹೋಗುವ ಸ್ವಭಾವ ಇವರದು. ಎಷ್ಟೋ ಬಾರಿ ಇತರರ ಸಲುವಾಗಿ ತಮ್ಮ ಸುಖ ಸಂತೋಷಕ್ಕು ಬೇಲಿ ಹಾಕಿಕೊಳುವುದು ಅಪರೂಪವೇನಲ್ಲ.

ಆದರೆ ವಾಸ್ತವದಲ್ಲಿ ಅಂತಹವರ ತ್ಯಾಗವನ್ನು ದೌರ್ಬಲ್ಯದಂತೆ ಬಳಸಿಕೊಂಡು ದುರ್ಬಳಕೆ ಮಾಡಿಕೊಳ್ಳುವ ಜನರೇನು ಕಮ್ಮಿಯಿಲ್ಲ. ವಿಪರ್ಯಾಸವೆಂದರೆ ಯಾರಿಗಾಗಿ ತ್ಯಾಗ ಮಾಡಿಕೊಂಡು ಹೆಣಗಾಡುತ್ತಿರುತ್ತಾರೊ ಅವರೆ ಅದನ್ನು ದುರುಪಯೋಗಪಡಿಸಿಕೊಳ್ಳುವ ವ್ಯಕ್ತಿಗಳೂ ಆಗಿರುತ್ತಾರೆ. ಯಾರಿಗಾಗಿ ಯಾತನೆ, ಕಷ್ಟ, ತೊಡಕುಗಳನ್ನು ಅನುಭವಿಸುತ್ತಾರೊ ಅವರೆ ಅದನ್ನು ನಿರ್ಲಕ್ಷಿಸುವಾಗ – ‘ಯಾಕಾದರು ಬೇಕಿತ್ತು ಈ ಪಾಡು?’ ಎನಿಸಿದರು, ಹುಟ್ಟುಗುಣದಂತೆ ಆ ಪ್ರವೃತ್ತಿಯನ್ನು ಬಿಡಲಾಗದೆ ಮೌನದಲ್ಲಿ ನುಂಗಿಕೊಂಡು ಹೋಗುತ್ತಾರೆ.

ಅಂತದ್ದೊಂದು ಚಿತ್ರಣ ಈ ಕವನದಲ್ಲಿ. ಸಂಸಾರದ ಒಳಿತಿಗಾಗಿ ಬೇರೆ ಇರಬೇಕಾದ ಅನಿವಾರ್ಯತೆ, ಆ ಒಳಿತೆಂದುಕೊಂಡಿದ್ದನ್ನು ಪಡೆಯಲಾಗದ ಅಸಹಾಯಕತೆ, ಆ ತ್ಯಾಗವನ್ನು ಲೆಕ್ಕಿಸದ ಪರಿಸರ – ಕೊನೆಗೆ ಸುಖದ ಬೆನ್ನಟ್ಟಿ ಹೊರಟ ಪ್ರಕ್ರಿಯೆಯೆ ಅಸುಖ, ಅಶಾಂತಿಯ ಮೂಲವಾಗುವ ವಿಚಿತ್ರ ಪರಿಸ್ಥಿತಿ ಮತ್ತಷ್ಟು ಗೊಂದಲ, ಅಸಹಾಯಕತೆಯತ್ತ ತಳ್ಳಿದಾಗಿನ ವಿಹ್ವಲ ಸ್ಥಿತಿ – ಇಲ್ಲಿನ ಹಿನ್ನಲೆ.

ಯಾಕೀ ಪರಿ ತ್ಯಾಗ ?
___________________


ನಿನ್ನಳಲು ಅರಿವಾಗಿದೆ
ನಿನ್ನೊಳಗು ಬರಿ ನೋವಿದೆ
ಕಣ್ಣೊರೆಸುವ ಕೈಯಿದೆ ದೂರ
ಒರಗೊ ಹೆಗಲಿಲ್ಲದೆ ಎದೆ ಭಾರ ! ||

ಏನೊ ಮಾಡಲು ಹೋದೆ
ಯಾವ ಗುರಿಗೊ ದೂರಾದೆ
ಗುರಿಯೆ ಗುರಿ ತಪ್ಪಿದ ಘೋರ
ಕಾಡುವ ಮೊದಲಾಗೆಯ ಹತ್ತಿರ ? ||

ನೋಡೀಗ ನಡುವೆ ಜಾಲ
ಅತ್ತಲು ಇಲ್ಲ ಇತ್ತಲು ಸಲ್ಲ
ಸಲ್ಲದ ಮಾತಾಗುವುದೆ ಉತ್ತರ
ಹೇಳು ಏರುವುದೆಂತು ಗುರಿಯೆತ್ತರ ? ||

ಬೇಕೇನು ಇಷ್ಟು ತ್ಯಾಗ
ಇದಲ್ಲ ಲೆಕ್ಕ ಇಡುವ ಜಗ
ಬೆಳೆವ ತನಕ ಮಕ್ಕಳೆ ಮುಕುಟ
ರೆಕ್ಕೆ ಬಲಿತ ಮೇಲವರೆಲ್ಲೊ ಹಾರಾಟ ||

ಅವರ ಒಳಿತಿಗೆ ನೋಡಿ
ದೂರವಿದ್ದೆ ಆಗಿದ್ದೂ ಜೋಡಿ
ಏನಿದೇನು ಈ ಕಾಲದ ಮೋಡಿ ?
ಸುಖಕು ಖೋತ ಸುಖ ಸಂಸಾರದ ಹೆಸರಡಿ! ||

– ನಾಗೇಶ ಮೈಸೂರು
(Nagesha Mn)
(Picture source internet / social media)

01460. ಸಾಕಪ್ಪ ಸಾಕು ಅಡಿಗೆ


01460. ಸಾಕಪ್ಪ ಸಾಕು ಅಡಿಗೆ
_______________________


ಅಡಿಗೆ ಅಡಿಗೆ ಅಡಿಗೆ
ಮಾಡಬೇಕು ಅಡಿಗಡಿಗೆ
ಸಿಕ್ಕಿದರೆ ಕಂಡು ಹಿಡಿದವನ
ಮಾಡಬೇಕು ಸಾಷ್ಟಾಂಗ ನಮನ ||

ಬೆಳಗೆದ್ದು ಬಿಸಿ ಪೇಯ
ಬೇಕೆಲ್ಲರಿಗು ಮಹನೀಯ
ಇದ್ದರೇನು ಚಳಿಮಳೆಬಿಸಿಲು
ತಿಂಡಿ ಜತೆ ಮತ್ತೊಮ್ಮೆ ಫಸಲು ||

ಸಾಲಾಗಿ ಮನೆ ಮಂದಿ
ಮಾಡಿ ಹಂಚಬೇಕು ಬುದ್ಧಿ
ಮಾಡಿದ್ದು ಮುಗಿವ ಮೊದಲೆ
ತಿನ್ನದಿರೆ ಉಪವಾಸದ ಕೋಟಲೆ ||

ಮುಗಿಯಿತಪ್ಪ ಉಸ್ಸಪ್ಪ
ಸರಿ ಪಾತ್ರೆ ತೊಳೆದೆತ್ತಿಟ್ಟಪ್ಪ
ಉಸಿರಾಡಲಿಲ್ಲವೆ ಪುರುಸೊತ್ತು
ಮಧ್ಯಾಹ್ನದಡಿಗೆ ಊಟದ ಹೊತ್ತು ! ||

ಮತ್ತದೆ ಹಳೆ ರಾಮಾಯಣ
ಸಾಯಂಕಾಲ ಚಹಾಪುರಾಣ
ರಾತ್ರಿಯಡಿಗೆ ಮಾಡಲೇನ ಶಿವನೆ
ನಿಂತು ಪಾತ್ರೆ ತೊಳೆದು ಬೆನ್ನಿನ ಬೇನೆ ||

ಸಾಲದ್ದಕ್ಕೆ ಟೀವಿ ಪುರಾಣ
ಅಕ್ಕಪಕ್ಕ ಗುಸುಗುಟ್ಟೊ ಧ್ಯಾನ
ಮಡಿ ಮಜ್ಜನ ಪೂಜೆ ಪುನಸ್ಕಾರ
ಸಾಕಪ್ಪಾ ಸಾಕು ಹಾಳು ಸಂಸಾರ ||


– ನಾಗೇಶ ಮೈಸೂರು
(Nagesha Mn)

(Picture source : internet / social media)

01459. ಹೇಳೆ ಕನ್ನಡಿ


01459. ಹೇಳೆ ಕನ್ನಡಿ
_______________


ನೋಡೆ ಕನ್ನಡಿ
ನಾ ಸಿಂಗರಿಸಿಕೊಂಡೆ
ಹೇಳೆ ಕನ್ನಡಿ
ಅವನೊಪ್ಪುವನೇನೆ ? || ನೋಡೆ ||

ಗುಳಿ ಬಿದ್ದ ಕದಪಿಗೆ
ಮೆರುಗಿತ್ತೆ ಕಣೆ ಬಣ್ಣದಲಿ
ಮಿಕ್ಕರೆಕೊರೆ ಗುಳಿಯ
ಸರಿ ಮುಚ್ಚಿದವೇನೆ ಕನ್ನಡಿ ? || ನೋಡೆ ||

ತಿದ್ದಿ ತೀಡಿದೆ ಕಾಮನಾಬಿಲ್ಲು
ಸ್ಪುಟವಾದವೇನೆ ಕಣ್ಣಿನಾ ಹುಬ್ಬು ?
ನಾಸಿಕ ಮೇನೆ ಹೊತ್ತಂತೆ ತಾನೆ
ಗಾಂಭೀರ್ಯ ತಾನೆ ಹೇಳೆ ಕನ್ನಡಿ ? || ನೋಡೆ ||