01697. ಶಿವನುಟ್ಟನೆ ಉಮೆಯ..


01697. ಶಿವನುಟ್ಟನೆ ಉಮೆಯ..

________________________________

ಶಿವನುಡಲು ತನ್ನಲಿ ಸತಿಯ

ವರಿಸಿಹನೆ ದಾಕ್ಷಾಯಿಣಿಯ

ಕೈ ಹಿಡಿದ ಬೆರಗದು ಪ್ರಳಯ

ಲಯದೊಡೆಯನ ಗೆದ್ದ ಪ್ರಣಯ ||

ಆಜಾನುಬಾಹು ಫಾಲನೇತ್ರ

ಕೊರಳಲಂಕರಿಸಿ ಫಣಿ ಪಾತ್ರ

ಜಟೆಗೆ ಮುಕುಟ ಶಿವ ಗೋತ್ರ

ಚರ್ಮಾಂಬರಗು ಕಟ್ಟಿ ಧೋತ್ರ ! ||

ಅವಳು ಸರ್ವಮಂಗಳ ಗೌರಿ

ಒಲಿಸಲೇನೆಲ್ಲ ಹಿಡಿದ ದಾರಿ

ಅಪರ್ಣೆ ಕೊನೆಗು ಛಲಕೆ ಬದ್ಧ

ಸುಟ್ಟರು ಕಾವನ ಶಿವ ಶರಣಾದ ||

ಹಿಮಸುತೆ ಶೈಲತನಯೆ ಮಾತೆ

ಕುಮಾರ ಜನನ ಕಾರಣ ಘನತೆ

ಭರಿಸುತ ಭವನ ತೇಜ ಘನಸತ್ವ

ದಾನವ ಕುಲಕೆ ಕೊಡಲಿ ಮಹತ್ವ ||

ವಿನೋದ ಜಗನ್ಮಾತಪಿತ ಕಲ್ಯಾಣ

ಅಗ್ನಿಕುಂಡ ಸುತ್ತಿ ಸಪ್ತಪದಿ ಚರಣ

ಹೋಮ ಹವನ ಅಗ್ನಿಸಾಕ್ಷಿ ಪವಿತ್ರ

ಆದಿದಂಪತಿಗು ಬೇಕಿತ್ತೇನಿ ಶಾಸ್ತ್ರ ?||

– ನಾಗೇಶ ಮೈಸೂರು

೨೪.೦೪.೨೦೧೮

(picture source : WhatsApp)

Advertisements

01696. ಅಮ್ಮನಿಗೊಂದು ಶುಭಾಶಯವಿಂದು..


01696. ಅಮ್ಮನಿಗೊಂದು ಶುಭಾಶಯವಿಂದು..

____________________________________________

ಜಾನಕಿ ಎಸ್ ಜಾನಕಿ

ಕುಹೂ ಕೋಗಿಲೆ ಸ್ವರದ ಹಕ್ಕಿ

ಹಾಡಿದ ಭಾಷೆಗಳ್ಹದಿನೇಳು

ನಲವತ್ತೆಂಟು ಸಾವಿರ ಹಾಡುಗಳು ! ||

ಸಾಲದೆನ್ನುವಂತೆ ಭಾರತೀಯ

ಜಪಾನಿ ಜರ್ಮನಿ ಪರಕೀಯ !

ಆರು ದಶಕಗಳ ಸೇವೆ ಮೊತ್ತ

ಹಾಡಿಯು ದಣಿಯದ ದನಿ ಸಂಪತ್ತ ! ||

ದಕ್ಷಿಣದಾ ಕೋಕಿಲ ಕಲವಾಣಿ

ಬರೆದದ್ದೂ ಉಂಟು ಸುಮವೇಣಿ

ತೇಜಸ್ಸಿನ ವಿಭೂತಿ ಹಣೆಯ ತುಂಬ

ಗೌರವದೆ ನಮಿಸೊ ಮಾತೆಯ ಪ್ರತಿಬಿಂಬ ! ||

ರಾಷ್ಟ್ರ ರಾಜ್ಯ ಪ್ರಶಸ್ತಿಗಳ ಸಗಟು

ಡಾಕ್ಟರೇಟು ಕಲೈಮಾಮಣಿ ಉಟ್ಟು

ಪಡೆದ ಕನ್ನಡ ರಾಜ್ಯೋತ್ಸವ ಪ್ರಶಸ್ತಿ

ಪದ್ಮಭೂಷಣ ಬೇಡೆಂದಾ ಛಲಗಾತಿ ! ||

ಇಂದಮ್ಮನಿಗೆ ಶುಭ ಜನುಮ ದಿನ

ಹಾಡಿ ಹೊಗಳೆ ಪದ ಸಾಲದು ಗೌಣ

ಎಂಭತ್ತರ ಹರೆಯ ದಾಟಿ ನೂರಾರು

ಜಯಭೇರಿ ಬಾರಿಸುತ ಸಾಗಲಿ ತೇರು ! ||

– ನಾಗೇಶ ಮೈಸೂರು

೨೩.೦೪.೨೦೧೮

(ಚಿತ್ರ / ಮಾಹಿತಿ ಮೂಲ : ವಿಕಿಪಿಡಿಯಾ; thanks to Vishalakshi NM for reminding and inspiring me to write this poem 🙏😊👍💐🌹)