01705. ಚಂದಿರನುಯ್ಯಾಲೆಯಲಿ..


01705. ಚಂದಿರನುಯ್ಯಾಲೆಯಲಿ..

__________________________________

ಗಗನದೂರಲಿ ಚಂದ

ಚಂದಿರನ ತೂಗುಯ್ಯಾಲೆ

ಕೂರೆ ಜೀಕುವೆ ನಿನ್ನ ಮನಸಾರೆ

ಹೇಳೆ ನಿನ್ನ ಅಂದಕೆ ಸಮನಾರೆ ||

ವಿಶಾಲ ಚಪ್ಪರವಲ್ಲಿ

ಗ್ರಹತಾರೆ ಕಾಯದ ಮೇಳ

ಜೀಕುತಲೆ ಮುಟ್ಟಿ ನೋಡೊಮ್ಮೊಮ್ಮೆ

ಸಿಕ್ಕೆ ಬಾಚೆ ಸಿಕ್ಕಷ್ಟ ಹಿಡಿ ಮಡಿಲಿನ ಹೆಮ್ಮೆ ||

ಶ್ವೇತಾಂಬರ ಶಶಿಯೆ

ಪಂಥದೆ ಸೋತ ವಿಷಯ

ಬರೆವೆ ನಾ ಪ್ರಣಯ ಕಾದಂಬರಿ

ನೀನದರ ನಾಯಕಿಯೆ ಶ್ವೇತಾಂಬರಿ ||

ಬಿಡು ಭೀತಿ ಬಾನಲಿ

ನೇತು ಹಾಕಿದ ಸರಪಳಿ

ಕಾಣದದೃಶ್ಯ ಕೊಂಡಿ ವಿಶ್ವವೆ

ಬ್ರಹ್ಮಾಂಡದಲದೆಂದಿಗು ವಿಶಿಷ್ಠವೆ ||

ಮರೆಯದಿರು ಮುಟ್ಟಿರೆ

ಸುರಲೋಕದ ಬಾಗಿಲ ಗೆರೆ

ಇಣುಕೊಮ್ಮೆ ತಂದುಬಿಡು ಸರಕ

ನಿನ್ನ ಸೆರಗಿಗಂಟಿಸಿ ಬೆರಗು ಪುಳಕ ||

ಕ್ಷಯದಿಂದಕ್ಷಯ ಮತ್ತೆ

ಅಕ್ಷಯದಿಂದಾಗುತ ಕ್ಷಯ

ಸಂಕುಚನ ವಿಕಸನ ಚಂದ್ರಮನ

ಕೊರೆ ನೀಗಿಸಿಹೆ ನೀನಾಗಿ ಪರಿಪೂರ್ಣ ||

– ನಾಗೇಶ ಮೈಸೂರು

೨೮.೦೪.೨೦೧೮

(Picture source: https://goo.gl/images/qdj8WK)

Advertisements