01747. ಬರ್ದಾಕು ಮನಸಾದಾಗ..

01747. ಬರ್ದಾಕು ಮನಸಾದಾಗ..

____________________________

ಬಿಡು ಬರೆಯೋಣ ಮನಸಾದಾಗ

ಅಂದರಾಯ್ತ? ಆಗೋದ್ಯಾವಾಗ ?

ಅನಿಸಿದಾಗಲೆ ಬರಕೊ ಮರುಳೆ

ಯಾರಿಗ್ಗೊತ್ತು, ಏನಾಗುತ್ತೊ ನಾಳೆ ?! ||

ಬರೆಯೋಕಂತ ಬಂದಾಗ ಸ್ಪೂರ್ತಿ

ಹಿಡಿದಿಟ್ಕೋಬೇಕು ಕೈಯಲ್ಲಿ ಪೂರ್ತಿ

ಪದ ಮರೆಯೋದುಂಟು ಆಗಿ ಕಗ್ಗಂಟು

ಆಗೋಕೆ ಮುಂಚೆ ಬರೆದಾದ್ರೆ ನಂಟು ||

ಎಲ್ಲಾರಿಗು ಸಿಕ್ಕೊ ಸೌಭಾಗ್ಯ ಇದಲ್ಲ

ಸಾಲು ಬರೆಯೋದಕ್ಕು ತಿಣುಕ್ತಾರೆಲ್ಲ

ಬರೆಯೋಕೆ ಮನಸು ಇರಲಿ ಬಿಡಲಿ

ಗೀಚ್ತಾ ಇರ್ಬೇಕು ತೋಚಿದ್ ಗೀಚ್ಕೊಳ್ಲಿ! ||

ಸರಿಯೊ ತಪ್ಪೊಂತ ಯಾಕಪ್ಪ ಚಿಂತೆ?

ಬರೆದಿದ್ದನ್ಯಾರು ನೋಡೋದಿದೆ ಮತ್ತೆ?

ಬರ್ಕೊಳ್ಳೊ ತೆವಲು ನಮ್ಮನಸಿನ ಡೌಲು

ಮಳೆಗೆ ಗರಿ ಬಿಚ್ಚಿ ಕುಣಿದಾಡ್ದಂಗೆ ನವಿಲು ||

ಮನಸಾದಾಗ ಬರಿಯೋಕೆದೆ ಜಾಗ

ಇದ್ರೂನು ಭಾವನೆ ಬರದಿದ್ರೆ ಸರಾಗ

ಗೀಚಿದ್ದ ಮುದುರಿ ಎಸೆಯೋಲ್ವ ಕಾಣ್ದಂಗೆ

ಬರ್ದಾಕು ಈಗ್ಲೂನು ಎಸೀಬೋದು ಹಂಗೆ ! ||

– ನಾಗೇಶ ಮೈಸೂರು

೨೮.೦೫.೨೦೧೮

(Picture source: internet / social media)