01359. ನಗೆಯ ಮುಖವಾಡದ ಹಿಂದೆ..


01359. ನಗೆಯ ಮುಖವಾಡದ ಹಿಂದೆ..
_____________________________


ಇನ್ನೆಷ್ಟು ದಿನ ಹೀಗೆ ನಗೆಯ ಮುಖವಾಡ
ಹೊತ್ತಿರಲಿ ಮೊತ್ತ ಹೇಳು ಪ್ರಭುವೆ ನೀನೀಗ ?
ಮೊನೆಚು ಮೊಳೆಯಾ ಚೆಲ್ಲಿ ನೇಯ್ದ ಹಾಸಿಗೆ
ಸೂಜಿಮೊನೆ ಸಿಂಗಾರ ಹೊದಿಕೆ ಹೊದ್ದ ಬದುಕು ||

ಚುಚ್ಚಿ ಕಾಡುವ ಮೇಲು ಕೆಳಗಿನ ಅಲುಗ ತಿವಿತ
ಹೊರಳುವಂತಿಲ್ಲ ವಿಧಿಯಿಲ್ಲ ಬಸಿದಿವೆ ಬದುಕ
ಒಂದು ಮುಳ್ಳು ಚುಚ್ಚೆ ತೆಗೆದು ನಿಟ್ಟುಸಿರ ಬಿಡಲು
ಬಿಡದೆ ಹೊಕ್ಕುವ ಮತ್ತೊಂದು ಕ್ರೂರವಿಧಿ ಹೆಗಲು ||

ಯಾರಿಗ್ಹೇಳುವುದು? ಬಿಡುವುದು? ಎಲ್ಲಾ ಸ್ವಯಾರ್ಜಿತ
ಕರ್ಮವೊ ಮರ್ಮವೊ ತಾಪತ್ರಯವಾಗದು ಅನೂರ್ಜಿತ
ಅನುಭವಿಸಬೇಕೂ ಕುಣಿಯುತ ಬರಲಿ ಬಿಡಲಿ ಕುಣಿತ
ಕುಣಿಸುವಾತ ನಿರ್ಲಿಪ್ತ ಹಾಕು ಅವನಂತೆ ಸೋಗು ನಗುತ ||

ಹೇಳಲೆಷ್ಟು ಸುಲಭ? ಅನುಭವಿಸುವವರ ದುಃಖದ ಲೆಕ್ಕ
ಇಡಲ್ಹೊರಟು ಸೋತ ಚಿತ್ರಗುಪ್ತನ ಕಡತ ಅಳುತಲಿದೆ
ಯಾಕಿಡುವೆ ಬಿಡೊ ಲೆಕ್ಕ, ಅಗಣಿತಕಗಣಿತ ತಾನೆ ಅನಂತ ?
ಅನುಭವಿಸುತಲೆ ಕಲ್ಲೊ, ಹುಲ್ಲೊ, ಕರಗಿರೆ ನಿರಸ್ತಿತ್ವ ಗುಲ್ಲೊ ||

ನಗು ನಗು ನಗೆ ವಿಕಟಾಟ್ಟಹಾಸ ವಿಧಿ, ಎದೆ ಬಗೆವ ಬೇಗುದಿ
ಗೆಲ್ಲಲಾಗದ ಆಟವೆಂದ ಮೇಲೆ, ನನಗೂ ನಿರಾಳತೆ ಹೇಗೂ!
ನಡುವೆ ಬಿಡುವುದಿಲ್ಲ ಆಟ, ಹಾಕು ನಿನೊಂದೆಲೆ ನಾನೊಂದು
ಸುಡುವ ಬೆನ್ನ ಕೆರೆಯದೆ ಆಡುವೆ, ಆಟದೆಲೆಯ ಮುಖವಾಡದೆ ||

– ನಾಗೇಶ ಮೈಸೂರು
(Nagesha Mn)
(picture source : internet / social media)

Advertisements

01358. ಮಾತಾಟ…


01358. ಮಾತಾಟ…
____________________________


ಶೈಲಜ ರಮೇಶ್ (@Shylaja Ramesh) ರವರು ಹಾಕಿದ್ದ ಸುಂದರ ಚಿತ್ರ ಮತ್ತು ಅಷ್ಟೆ ಸೊಗಸಿನ ಕವನವನ್ನು ನೋಡಿದಾಗ ಉಂಟಾದ ಅನಿಸಿಕೆಗೆ ಪದ ರೂಪ ಕೊಟ್ಟ ಫಲಿತಾಂಶ ಈ ಕವನ ( ತುಸು ಲಘು ಲಹರಿಯಲ್ಲಿ, ನಾ ತಮಾಷೆಗೆ ಬರೆದ ಆವೃತ್ತಿ).
ಶೈಲಜ ರಮೇಶರಿಗೆ ಥ್ಯಾಂಕ್ಸ್ ಹೇಳುತ್ತ – ಅವರ ಮೂಲ ಕವಿತೆ, ಚಿತ್ರ ಈ ಲಿಂಕಿನಲ್ಲಿದೆ ನೋಡಿ:
https://www.facebook.com/groups/1579100179079308/permalink/1921897591466230/)

ಮಾತಾಟ…
____________________________

ಗೊತ್ತೇನೇ ಸುದ್ಧಿ ಮಲ್ಲಿಕಾ?
ಯಾಕೋ ಕೇಡುಗಾಲದಲಿಂತಾ ಬುದ್ಧಿ ?
ಏನೂ ಅರಿಯದ ಕೂಸು ಅಂತಿದ್ದೆ..
ನೋಡಾಗಿದ್ದಾಳಂತೆ ಗೆಣೆಯನ ಜೋಡಿ ಪರಾರಿ ! ||

ಹೌದಂತೇನೆ ಚಂಪಕ ! ?
ಮನೆ ಬಿಟ್ಟು ಕದಲದ ಜೀವ ನನದೆ
ಗೊತ್ತಾಗಲೆಂತು ಊರು ಕೇರಿಯ ಸುದ್ಧಿ ?
ಯಾರವಳು? ಯಾರ ಜತೆಗೆ ಹೋದಳಂತೆ ? ||

ಮತ್ತಿನ್ಯಾರು ಬಿಡು, ಸೇವಂತಿಕ..
ಮೆರೆಯುತಿದ್ದಳಲ್ಲ ತಾನೆ ಸುಂದರಿ ಅಂತ ?
ಅಬ್ಬಬ್ಬಾ! ಅವಳಿಗೆ ಸರಿ ಜೋಡಿ ಬಿಡು ಅವಂತಿಕ
ಇಬ್ಬರ ಹಿಡಿದು ನಿಲ್ಲಿಸಲಾರಿದ್ದರು ಹೇಳೆ ಮಹರಾಯ್ತಿ ! ||

ಹೌದಾ!! ಭಗವಂತ, ಎಷ್ಟೊಂದವಳ ಧೈರ್ಯ !
ಏನಿರಬೇಕವಳ ಕೆಚ್ಚು ! ಓಡಿಹೋಗುವ ಧಾರ್ಷ್ಟ್ಯ !!
ಎಲ್ಲಾ ಸರಿ, ಯಾರವನು ಬಲೆಗೆ ಕೆಡವಿಕೊಂಡವನು ?
ನಿಜಕೂ ಕಾಪಾಡುವನೇನು ? ಜಾರಬಿಡದೆ ಕೈ ಹಿಡಿದು ? ||

ನಾ ಕಾಣೆನಮ್ಮ, ನನ್ನಾಣೆ ನನಗಿಲ್ಲ ಧೈರ್ಯ
ಮೆಚ್ಚಲೆಬೇಕವಳ ಗುಂಡಿಗೆ ಒಪ್ಪಿದ ಗಂಡಿನ ಸಖ್ಯ
ಮನದಾಸೆಯಂತೆ ನಡೆವ ದಿಟ್ಟತನ ನಮಗೆಲ್ಲಿ ಬರಬೇಕು?
ನಡಿಯೆ ಸಾಕು ಮಾತು ಕೊಡವೆತ್ತು, ಬೈಗುಳ ಯಾರಿಗೆ ಬೇಕು ?! ||

– ನಾಗೇಶ ಮೈಸೂರು
(Nagesha Mn)
(Picture and inspiration : https://www.facebook.com/groups/1579100179079308/permalink/1921897591466230/)

01357. ಅವಳಂತೆ ದಸರಾ..!


01357. ಅವಳಂತೆ ದಸರಾ..!
_____________________________


ದಸರೆಯುಸುರುತಿದೆ ನಿನ್ನದೇ ಹೆಸರು
ರಂಗುರಂಗು ಥಳುಕು ನಿನ್ನ ಕಂಗಳದೆ ಕಾಂತಿ
ಜಗಮಗಿಸುತಿದೆ ದೀಪ ನಿನ್ನಂತೆ ಅಲಂಕೃತ
ಬೆಡಗುಟ್ಟ ನಗರ ನೀ ಸಿಂಗರಿಸಿ ನಿಂತ ಹೊತ್ತು ||

ಏನೊ ಮರೆತ ತಲ್ಲೀನತೆ ಯಾವುದೋ ಲೋಕ
ಕೂತವಳು ತಟ್ಟನೆ ಮೈಕೊಡವಿ ಮೇಲೆದ್ದಂತೆ
ಹೆಣ್ಣವಸರದ ಸಿದ್ಧತೆ ನಿಜವಾಗುವುದುಂಟೆ ?
ಅಂದುಕೊಂಡಾ ಅನುಮಾನ ನಿಜವಾಗದಂತೆ ! ||


ತಡವಾಯಿತೆಂದು ನೆನಪಿಸುವ ಕಾಮಗಾರಿ
ತಡಬಡಾಯಿಸುತೋಡಾಟ ಕನ್ನಡಿ ಸಹಿತ
ಪೌಡರು ಕ್ರೀಮುಗಳ ಹಚ್ಚಿ ಕುಂದಿಗೆ ಮೆರುಗು
ರಸ್ತೆ ಹಳ್ಳಕೊಳ್ಳ ಹೊದ್ದುಕೊಂಡಂತೆ ಸೆರಗು ||

ನಿನ್ನಾ ಆರ್ದತೆ ಗಡಿಬಿಡಿ ಧಾವಂತ ಸಡಗರ
ಮುಚ್ಚಿ ತೆರೆವ ಚಂಚಲ ಮೋಡ ಹನಿ ತುಂತುರು
ನಿನ್ನದೇ ಮನಸಲ್ಲಿ ಮಂಕೊಮ್ಮೆ ಹೊಳಪಿನ್ನೊಮ್ಮೆ
ಮಿಶ್ರಭಾವದ ಅಸ್ಪಷ್ಟ ದಸರೆ ನಿನ್ನದೆ ಮೆಲುಕು! ||


ಗೊಂಬೆಯಿಟ್ಟಂತೆ ಕೊನೆಗೆಲ್ಲ ಶಿಸ್ತಿನ ಸಂಭ್ರಮ
ಸಿಂಗಾರ ಸೊಬಗು ಕಂಗೊಳಿಪ ಪುತ್ಠಳಿಯವಳು
ಸಿದ್ಧವಾಗಿಹೋದಳು ಕಣ್ತುಂಬುವ ಅಂದಚಂದ !
ಮೆಚ್ಚಿ ಆಸ್ವಾದಿಸೊ ನವರಾತ್ರಿಯೊಲುಮೆ ಸನ್ನದ್ಧ ||

– ನಾಗೇಶ ಮೈಸೂರು
೨೧.೦೯.೨೦೧೭

(Picture 1: http://www.drikpanchang.com/dasara/mysore/mysore-dasara-date-time.html?year=2016
Picture 2:
Internet / social media
Picture 3:
https://goo.gl/images/TBzoZc)

01356. ಯಾಕನಿವಾರ್ಯ..?


01356. ಯಾಕನಿವಾರ್ಯ..?
_______________________


ರಾತ್ರಿಯೆಲ್ಲಾ ತಪನೆ ಕೂಡಿಟ್ಟ ಮೌನಗಳ
ಬೆರೆಸುತೊಂದು ನಿಟ್ಟುಸಿರ ಜತೆಜತೆಗೆ
ನಸುಕಿನಾ ಹಸುಳೆ ಮುಗ್ದತೆಯ ಚಿಮುಕಿಸಿ
ನುಡಿದಿತ್ತಧರ ಶುಭೋದಯ ಸಂದೇಶ ||

ಯಾಕಾಗಿ ಕಾಡಿತ್ತವಳ ಮೌನ ?
ಹೆಪ್ಪುಗಟ್ಟಿತ್ತಾವ ನೋವಿನ ಚಿಲುಮೆ ?
ಯಾವುದಿತ್ತು ಬಾವು ಕಾಣದ ಪ್ರಕಟ ?
ಏನಿದ್ದೀತು ಕಾಡುವ ಚಿಂತೆ, ನೋವಿನ ಗಣಿತ ? ||

ಹೇಳಲಿಲ್ಲವೇನನು ಬಾಯಿ ಬಿಟ್ಟು
ಹೇಳದಿದ್ದರೂ ಏನೋ ಹೇಳಿದಂತಿತ್ತು
ಕೇಳುವ ಕಿವಿ ಬಯಸುವುದೆಲ್ಲಾ ಸದ್ದಲೆ
ಕೇಳುಗರ ಕೋರಿಕೆ ತೀರಿಸಲಿಲ್ಲ ಬದ್ಧತೆ ||

ಮೌನದ ಬೆಟ್ಟ ಕರಗಿ ಪದಗಳಾಗಿ
ನಗೆ ಬುಗ್ಗೆಯೊ ಕಂಬನಿಯೊ ದನಿಯಾಗಿ
ಪ್ರವಹಿಸಬೇಕೆಲ್ಲವು ಒಡ್ಡೊಡೆದ ನೀರಂತೆ
ಖಾಲಿಯಾಗಿ ನಿರಾಳ ಮತ್ತೆ ತುಂಬುವವರೆಗೆ ||

ಮನದನಿವಾರ್ಯಗಳೆ ಹೀಗೆ ಬಿಡು
ಮೌನವಿದ್ದಾಗ ಬೇಕು ದಂಡಿ ಮಾತು
ಮಾತಿನ ಸಂತೆಗೆ ಮೌನದ ಬೆಳ್ಳಿ ಸೆರಗು
ಸಂವಹನದೀ ಬೆಡಗು ಬೆಸೆವ ಭಾಂಧವ್ಯ ವಿಚಿತ್ರ||

– ನಾಗೇಶ ಮೈಸೂರು
(Nagesha Mn)
(Picture source : internet / social media)

01355. ಪರವಶತೆ


01355. ಪರವಶತೆ
_______________________


ಪರವಶತೆ ಪರಧ್ಯಾನ ಮನ
ಈಗ ನಿನ್ನಲದು ಲೀನಾ ತಲ್ಲೀನ
ನೆನೆನೆನೆದು ತೇವದನುಭೂತಿ
ಒಳಗೆ ತಂಗಾಳಿ ತಂಪಿನ ಯಾನ ! ||

ಕೂರಲು ತಾವಿಲ್ಲದೆಡೆ ಪೂರ
ಕೂತಿತ್ಹೇಗೊ ನಿನ್ನದೆ ಚಿರ ಚಿತ್ರ ?
ತುಂಬಿಕೊಂಡಿದೆ ನರನಾಡಿ ನೆತ್ತರು
ನಿನ್ನ ಧ್ಯಾನವೆ ಅಣುವಣುವಿನ ಅತ್ತರಾಗಿ ||

ಹರಿದ ಸಂಚಲನೆ ನಿತ್ಯ ಸಹಜ
ನೀ ಬೆರೆತಾಗಿಹೋಗಿದೆ ನಿನ್ನಂತೆ ತಾಜ
ತಡಬಡಾಯಿಸುತಲ್ಲೆ ಹುಡುಕೆ ನಿನ್ನ
ಹುಡುಕಲೆಲ್ಲಿ? ಕಣಕಣದೆ ನೀ ಅಂತರ್ಧಾನ ||

ಪರವಶತೆ ಅರಿವಲಿದೆ ನಿಜ
ಯಾರ ಪರ? ಅರಿವಾಗದ ತ್ರಿಜ್ಯ
ನನ್ನದೊ? ನಿನ್ನದೊ? ಬಡಬಡಿಕೆ ಒಡಂಬಡಿಕೆ
ಯಾಕಿಲ್ಲಿಲ್ಲ ಪ್ರತಿಬಿಂಬ ಕಣ್ಣೆದುರೆ ನಿಚ್ಛಳ? ||

ಧ್ಯಾನದದ್ಭುತ ಪರವಶ ಮೌನ
ಪರಧ್ಯಾನದೇಕಾಗ್ರತೆ ಗ್ರಹಿತ ಮನ
ಏಕಾಂತದಲುಸುರುತಿದೆ ಉಲ್ಲಾಸದೆ
ಪದ ಹೇಳಲಾಗದ ಭಾವ ಸೀಮೋಲ್ಲಂಘನೆ ||

– ನಾಗೇಶ ಮೈಸೂರು
(Nagesha Mn)
(Picture source : internet / social media)

01354. ಸರ್ವಜ್ಞನ ವಚನ ೦೦೧೪: ಜಡೆಯ ಕಟ್ಟಲುಬಹುದು


01354. ಸರ್ವಜ್ಞನ ವಚನ ೦೦೧೪: ಜಡೆಯ ಕಟ್ಟಲುಬಹುದು
______________________________________


ಜಡೆಯ ಕಟ್ಟಲುಬಹುದು | ಕಡವಸವನುಡಬಹುದು |
ಬಿಡದೆ ದೇಗುಲದೊಳಿರಬಹುದು ಕರಣವನು |
ತಡೆಯುವದೆ ಕಷ್ಟ || ಸರ್ವಜ್ಞ ||

ಕಡವಸ : ತೊಗಲು, ಚರ್ಮ, ಅದರಿಂದಾದ ವಸ್ತ್ರ (ಕೃಷ್ಣಾಜಿನ)
ಕರಣ: ಇಂದ್ರೀಯಗಳು (ಜ್ಞಾನೇಂದ್ರಿಯಗಳು, ಕರ್ಮೇಂದ್ರಿಯಗಳು, ಅಂತಃಕರಣ)

ಸರಳ ಸಾರಾಂಶ:
ಸನ್ಯಾಸಿ/ಯೋಗಿಯಾಗ ಹೊರಟವನು ತನ್ನ ಬಾಹ್ಯದವತಾರವನ್ನು ಅದಕ್ಕೆ ತಕ್ಕಂತೆ ಬದಲಿಸಿಕೊಳ್ಳುವುದು ಸುಲಭ. ಆದರೆ ಮುಖ್ಯವಾಗಿ ಬೇಕಾದ ಇಂದ್ರಿಯ ನಿಗ್ರಹವನ್ನು ಸಾಧಿಸುವುದು ಕಷ್ಟಸಾಧ್ಯವೆನ್ನುವುದು ಈ ವಚನದ ಸಾರ.

ವಿಸ್ತೃತ ಟಿಪ್ಪಣಿ:
ಇದೊಂದು ಸುಂದರ ಸರಳ ವಚನ. ಬಾಹ್ಯದಾಚರಣೆಗು ಮತ್ತು ಅಂತರಂಗದ ನೈಜ ಸ್ಥಿತಿಗು ಇರುವ ವ್ಯತ್ಯಾಸವನ್ನು ಎತ್ತಿ ತೋರಿಸುವುದೊಂದು ಅಂಶವಾದರೆ, ಅವುಗಳ ಅನುಷ್ಠಾನದಲ್ಲಿರುವ ಕಾಠಿಣ್ಯತೆಯ ಮಟ್ಟವನ್ನು ಹೋಲಿಸಿ ತೋರಿಸುವುದು ಮತ್ತೊಂದು ಆಯಾಮ. ಈ ಹಿನ್ನಲೆಯಲ್ಲಿ ಈ ವಚನವನ್ನು ಅರ್ಥ ಮಾಡಿಕೊಳ್ಳಲು ಯತ್ನಿಸೋಣ.

ಸಾಮಾನ್ಯವಾಗಿ ಯಾರು ಬೇಕಾದರೂ ತಮ್ಮ ಸಾಂಸಾರಿಕ ಬಂಧಗಳನ್ನು ತ್ಯಜಿಸಿ , ಸನ್ಯಾಸಿ-ಋಷಿ-ಮುನಿಗಳಾಗಲು ಬಯಸಬಹುದು. ಹಾಗೆ ಬಯಸಲು ಕಾರಣ, ಹಿನ್ನಲೆ ಏನೇ ಇರಲಿ – ಹಾಗೆ ಎಲ್ಲಾ ಬಿಟ್ಟು ದೃಢ ಮನಸಿನಿಂದ ಹೊರಡುವವರ ಸಂಖ್ಯೆಯೆ ಬೆರಳೆಣಿಕೆಯಷ್ಟಿದ್ದೀತು. ಹಾಗೆ ಹೊರಟ ಮಾತ್ರಕ್ಕೆ ಅವರು ನಿಜಾರ್ಥದಲ್ಲಿ ಸನ್ಯಾಸಿ-ಋಷಿ-ಮುನಿಗಳಾಗಿಬಿಡುತ್ತಾರೆಯೆ? ಎನ್ನುವುದು ಇಲ್ಲಿನ ಮೂಲ ಪ್ರಶ್ನೆ.

ಬಾಹ್ಯದ ರೂಪದಲ್ಲೇನೊ ಅಗತ್ಯಕ್ಕನುಸಾರ ಅವರು ಸುಲಭದಲ್ಲಿ ಬದಲಾವಣೆ ಮಾಡಿಕೊಂಡುಬಿಡಬಹುದು. ಅವಶ್ಯಕತೆಗೆ ತಕ್ಕಂತಹ ವೇಷಭೂಷಣಗಳನ್ನು, ರೀತಿನೀತಿಗಳನ್ನು ಅಳವಡಿಸಿಕೊಳ್ಳಬಹುದು. ಸನ್ಯಾಸಿಯಾಗಲು ಬೇಕಾದ ಉದ್ದ ಜಡೆಯನ್ನು ಬೆಳೆಸಿ ಜಡೆ ಕಟ್ಟಬಹುದು; ಅಥವಾ ಋಷಿಮುನಿಗಳಂತೆ ಜಟೆಯನ್ನೂ ಮಾಡಿಕೊಳ್ಳಬಹುದು. ಕೃಷ್ಣಾಜಿನದಂತಹ ಕಡವಸದ (ತೊಗಲಿನ) ವಸ್ತ್ರ ಧರಿಸುತ್ತ ತನ್ನ ಬಾಹ್ಯಸ್ವರೂಪವನ್ನು ಮಾರ್ಪಾಡಿಸಿಕೊಳ್ಳಬಹುದು (ಅದೇ ಸನ್ಯಾಸಿಗಳಾದರೆ ಕಾವಿಯುಡುಗೆ ತೊಡಬಹುದು). ಇನ್ನು ಈ ಹಾದಿ ಹಿಡಿದ ಮೇಲೆ ಭಗವಂತನ ಸಾನಿಧ್ಯದಲ್ಲಿ ತಾನೇ ಇರಬೇಕು ? ಯಾವುದಾದರೊಂದು ಇಷ್ಟದೈವದ ದೇಗುಲಕ್ಕೆ ಹೋಗಿ ದಿನವೆಲ್ಲ ಅಲ್ಲೆ ಕೂತು ಕಾಲ ಕಳೆಯುವುದೇನೂ ಕಷ್ಟವಲ್ಲ. ಹೀಗೆ ಹೊರಗಿನವರ ದೃಷ್ಟಿಯಲ್ಲಿ ಯೋಗಿಯೆಂದೆನಿಸಿಕೊಳ್ಳಲು ಏನೆಲ್ಲಾ ಬೇಕೊ, ಏನೆಲ್ಲ ಸಂಪ್ರದಾಯ ಆಚರಿಸಬೇಕೊ ಅವೆಲ್ಲವನ್ನು ಮಾಡಿಬಿಡಬಹುದು. ಆದರೆ ನಿಜಾರ್ಥದಲ್ಲಿ ಬರಿಯ ಬಾಹ್ಯದ ತೋರಿಕೆಯ ಸ್ವರೂಪ ಮಾತ್ರದಿಂದಲೆ ಯೋಗಿಗಳಾಗಿಬಿಡಲು ಸಾಧ್ಯವೆ?

ಖಂಡಿತ ಇಲ್ಲ ! ಯೋಗಿಯಾಗಲು ಬಾಹ್ಯಕ್ಕಿಂತ ಮುಖ್ಯವಾಗಿ ಬೇಕಾದ್ದು ಅಂತರಂಗಿಕ ಸಿದ್ದತೆ. ಅರ್ಥಾತ್ ಕರಣಗಳ (ಇಂದ್ರೀಯಗಳ) ನಿಯಂತ್ರಣ. ಅವುಗಳ ಮೂಲಕ ಉಂಟಾಗುವ ಪ್ರಚೋದನೆ, ಪ್ರಲೋಭನೆಗಳನ್ನು ಗೆದ್ದು ನಿಭಾಯಿಸಿಕೊಂಡು ಅವುಗಳ ಹುಚ್ಚಾಟಕ್ಕೆ ತಡೆಹಾಕಲು ಸಾಧ್ಯವಾಗದಿದ್ದರೆ, ಬಾಹ್ಯ ತೋರಿಕೆಯ ಪೋಷಾಕುಗಳೆಲ್ಲ ಬರಿ ವ್ಯರ್ಥ, ಬೂಟಾಟಿಕೆ ಮಾತ್ರವಾಗುತ್ತದೆ. ಆ ಕರಣಗಳ ನಿಯಂತ್ರಣವನ್ನು ಸಾಧಿಸುವುದೇ ಕಷ್ಟಕರ, ಅವುಗಳ ಪ್ರಭಾವದಿಂದ ಪಾರಾಗುವುದೇ ಕಠಿಣ ಎನ್ನುವ ಮಾರ್ಮಿಕ ಸತ್ಯವನ್ನು ಬಿತ್ತರಿಸುತ್ತಿದೆ ವಚನದ ಕೊನೆಯ ಸಾಲು.

ಒಟ್ಟಾರೆ, ಯೋಗಿಯಾಗ ಹೊರಟವನು ಮೊದಲು ಸಾಧಿಸಬೇಕಾದ್ದು ಮಾನಸಿಕ ಸಿದ್ಧತೆ ಮತ್ತು ಇಂದ್ರೀಯ ನಿಗ್ರಹ ಶಕ್ತಿ. ಅದಿದ್ದರೆ ಮಿಕ್ಕಿದ್ದೆಲ್ಲ ಬಾಹ್ಯಸ್ವರೂಪವನ್ನು ಸುಲಭದಲ್ಲಿ ಹೊಂದಿಸಿಕೊಳ್ಳಬಹುದು ಎನ್ನುವುದು ಇಲ್ಲಿನ ಮೂಲ ಸಂದೇಶ.

– ನಾಗೇಶ ಮೈಸೂರು
(Nagesha Mn)
#ಸರ್ವಜ್ಞ_ವಚನ
(ನನ್ನರಿವಿಗೆಟುಕಿದಂತೆ ಬರೆದ ಟಿಪ್ಪಣಿ – ತಪ್ಪಿದ್ದರೆ ತಿದ್ದಿ)
(Picture source : Wikipedia)

01353. ಮೌನ ಧರ್ಮ..


01353. ಮೌನ ಧರ್ಮ..
___________________

(ನಂದಾ ದೀಪಾ ಅವರ ಪೋಸ್ಟಿನಲ್ಲೊಂದು ಪ್ರಶ್ನೆಯಿತ್ತು ‘ಮೌನವು ವಂಚನೆಯಾದೀತೆ ?’ ಅದನ್ನೋದಿದಾಗ ಅನಿಸಿದ ಬಗೆ ಪದವಾದದ್ದು ಹೀಗೆ)

ಮೌನ ಧರ್ಮ..
_______________________


ಭೀಷ್ಮ ದ್ರೋಣಾದಿ ಸಜ್ಜನ ಗಣ
ದ್ರೌಪದಿ ವಸ್ತ್ರಾಪಹರಣದೆ ಘನ
ತಲೆ ತಗ್ಗಿಸಿ ಕುಳಿತಾ ಮೌನ
ವಂಚನೆಯಾದೀತೆ?

ಕುಂತಿಯೆಂಬಾ ವನಿತೆ
ಕರ್ಣನ ಹೆತ್ತಾ ಒಗಟೆ
ತುಟಿ ಕಚ್ಚಿ ಹಿಡಿದಾ ಮೌನ
ವಂಚನೆಯಾದೀತೆ?

ಕುಂತಿಯೆಂಬಾ ಮಾತೆ
ಯುದ್ಧಕೆ ಮೊದಲು ಗುಟ್ಟೆ
ಮುರಿದ ಮೌನ, ಪಡೆದ ವಚನ
ವಂಚನೆಯಾದೀತೆ ?

ಯಾಚಿಸಿ ಪೀಡಿಸೊ ಪ್ರೇಮದಾಟ
ಸರಿ-ತಪ್ಪು ಎನ್ನಲಾಗದ ಧರ್ಮ ಸಂಕಟ
ಹೌದು ಇಲ್ಲಗಳ ನಡುವೆ ಮೌನವಾಗಿರೆ ಮೌನ
ವಂಚನೆಯಾದೀತೆ ?

ಸಮಯ ಸಂಧರ್ಭ ಅನಿವಾರ್ಯ
ಕಟ್ಟು ಹಾಕಿ ಕಟ್ಟಿಡುವ ಬಗೆ ಅನಾರ್ಯ
ವಂಚನೆಯೊ ಉಪಕಾರವೊ ಮೊತ್ತ
ಭವಿತದ ಬುತ್ತಿಯಲಷ್ಟೆ ವಿದಿತ !

– ನಾಗೇಶ ಮೈಸೂರು
(Nagesha Mn)

(Picture / Question Courtesy / thanks to : ನಂದಾ ದೀಪಾ)