00792. ಯಾವ ಚಿಗುರು, ಎಲ್ಲಿಯ ಬೇರು ?

00792. ಯಾವ ಚಿಗುರು, ಎಲ್ಲಿಯ ಬೇರು ?
____________________________

ಯಾವ ಚಿಗುರು ? ಯಾವ ಬೇರು ?
ಹೇಳಿ, ಯಾರಿಗೆ ಬೇಕೀಗ ಸ್ವಾಮಿ ?
ಚಿಗುರು ಚಿವುಟೊ ಉಗುರುಗಳ ಕಾಟ
ಬೇರ ಕಡಿಯೊ ಪೊಗರುಗಳು ಧೂರ್ತ..

ಗಳಿಕೆ ಉಳಿಕೆ ದುಡಿಸೊ ಪ್ರತಿಗಳಿಗೆ
ಮನೆ ಕಾರು ಬೈಕು ಸ್ಕೂಲು ಒಡವೆ
ಸಾಲು ಸಾಲು ಸಾಲದ ಗೊನೆ ಜುಟ್ಟು
ಮಟ್ಟಾ ಹಾಕಿದೆ ಬಾಳುವ ನೆಲೆಗಟ್ಟು..

ಅದೆಲ್ಲಾ ಸರಿ ಆದರೇಕೊ ಅಲ್ಲೆಲ್ಲೂ
ಚಿಗುರು ಬೇರು ಒಬ್ಬಂಟಿ ಅರ್ಧರ್ಧ
ಎಲ್ಲೊ ಬೇರು ಇನ್ನೆಲ್ಲೊ ಚಿಗುರ ಕುಡಿ
ಗಾಳಿ ನಿರ್ವಾತ ಜಲವುಣಿಸೊ ತಕ್ಕಡಿ..

ಖರ್ಚಿಲ್ಲದ ಬದುಕು ಕುರ್ಚಿಯಲೆಲ್ಲ
ತುಟಿ ಬೆರಳ ತುದಿಯಲ್ಲೆಲ್ಲಾ ಮುಕ್ತಾಯ
ಸುಕ್ಕಿದ ಮೊಗ ನಡುಗುವ ದನಿ ಕಂಡೂ
ಕಾಣದಸಹಾಯಕತೆ ಆ ಕೈಯಲ್ಲೆ ಉಂಡು..

ಭವಿತಕೆ ಭೂತದ ಕೊಂಡಿ ಪರಂಪರೆ
ಕಳಚಿದ ಆಸರೆ ದಣಿಸಿ ಚಿಗುರು ಬೇರನ್ನು
ಒಂದೆ ಮನದ ತೂಕ ಎರಡರ ಅಡಿಪಾಯ
ಆಯವ್ಯಯ ಲೆಕ್ಕ ಸೋಗೊ ಕೊರಗೊ ನಿರುಪಾಯ..

– ನಾಗೇಶ ಮೈಸೂರು

(Picture source: http://tvtropes.org/pmwiki/pmwiki.php/Main/MechanicalLifeforms)

00721. ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ !

00721. ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ !
___________________________________

ನಾವು ಪ್ರೈಮರಿಯಲ್ಲಿ ಓದುತ್ತಿದ್ದಾಗ ಒಂದು ಒಂದು ಗಂಡು ಹೆಣ್ಣಿನ ಸಂವಾದ ರೂಪದ ಪದ್ಯವಿತ್ತು – ‘ ನೂಲಲ್ಲ್ಯಾಕ ಚೆನ್ನಿ, ನೂಲಲ್ಲ್ಯಾಕ ಚೆನ್ನಿ ‘ ಎಂದು. ಅದು ಜಾನಪದ ಸಾಹಿತ್ಯವಿದ್ದ ಹಾಗೆ ನೆನಪು. ಸ್ಥೂಲವಾಗಿ ( ಯಥಾವತ್ತಾಗಿ ಅಲ್ಲ) ಅದೇ ಧಾಟಿಯನ್ನು ಬಳಸಿ ಈಗಿನ ಆಧುನಿಕ ಯುಗದ ಕೆಲಸಕ್ಕೆ ಹೋಗುವ ಜೋಡಿಗಳ ಒಂದು ಕಾಲ್ಪಾನಿಕ ಸಂವಾದವನ್ನು ಚಿತ್ರಿಸುವ ಈ ಪದ್ಯ – ಈ ಕಾಲಮಾನಕ್ಕೆ ಪ್ರಸ್ತುತವೇನೊ. ಇಬ್ಬರು ದುಡಿಯುವ ಹೊತ್ತಲ್ಲಿ ಬೇಯಿಸಲು ಸಮಯವೆಲ್ಲಿ ಅನ್ನುವ ಪ್ರಶ್ನೆಗಿಂತ, ಬೇಯಿಸಲು ಬರಬೇಕೆಂಬ ಅವಶ್ಯಕತೆಯೆ ನಗಣ್ಯವಾಗುವ ರೀತಿಯಲ್ಲಿ ಹುಟ್ಟಿಕೊಂಡಿವೆ ಈಗಿನ ರೆಸ್ಟೊರೆಂಟು, ಹೋಟೆಲುಗಳ ಪರ್ಯಾಯ ವ್ಯವಸ್ಥೆ. ಹೊಸದಾಗಿ ಜೊತೆಗೂಡಿದ ಅಂತದ್ದೊಂದು ಜೋಡಿಯ ಸಂವಾದ ಹೀಗಿರಬಹುದೆಂಬ ಅಣಕು ನೋಟವಿದು – ಜಸ್ಟ್ ಫಾರ್ ಫನ್..!

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ !
____________________________

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಗ್ಯಾಸೆ ಇಲ್ವೋ ಜಾಣ, ಗ್ಯಾಸೆ ಇಲ್ವೋ ಜಾಣ
ಸಬ್ಸಿಡಿಗೆ ಕಾಯದೇನೆ, ಗ್ಯಾಸು ಹಾಕಿಸಿ ಕೊಟ್ಟ !

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಕುಕ್ಕರಿಲ್ವೊ ಜಾಣ, ಪಾತ್ರೆ ಪಗಡಿಗು ನಿರ್ವಾಣ
ಬಜಾರಿಗೆ ಹೋಗಿ ಕುಕ್ಕರು ಪಾತ್ರೆ ತೆಗೆಸಿ ಕೊಟ್ಟ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಮಿಕ್ಸಿ ಇಲ್ವೋ ಜಾಣ, ಮಿಕ್ಸಿ ಇಲ್ವೋ ಜಾಣ
ಬಿಗ್ಗು ಬಜಾರಿಗೆ ಓಡಿ, ಮಿಕ್ಸಿ ಸೆಟ್ಟು ತರಿಸಿಕೊಟ್ಟ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ದವಸಾ ಇಲ್ವೋ ಜಾಣ, ಧಾನ್ಯ ಇಲ್ವೋ ಜಾಣ
ಮೂಲೆ ಅಂಗಡಿ ಸುತ್ತಿ, ದವಸ ಧಾನ್ಯ ತಂದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ನೀರೆ ಇಲ್ವೋ ಜಾಣ, ನೀರೆ ಇಲ್ವೋ ಜಾಣ
ಸ್ಕೂಟರಿನಲಿ ಸುತ್ತಿ, ಬಾಟಲಿ ನೀರು ತಂದ…

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ತರಕಾರಿ ಇಲ್ವೋ ಜಾಣ, ತರಕಾರಿ ಇಲ್ವೋ ಜಾಣ
ಸುಪರ್ ಮಾರ್ಕೆಟ್ಟಿಗೆ ಹೋಗಿ, ತರಕಾರಿ ಹೊತ್ತು ತಂದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ಪುರುಸೋತ್ತಿಲ್ವೋ ಜಾಣ, ಕೆಲಸಕ್ಕೆ ಹೊರಡೋಣ
ಸಂಜೆಗೆ ಬೇಯ್ಸು ಅಂದು, ಜತೆಗೆ ಡ್ಯೂಟಿಗೆ ಹೋದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ದುಡಿದು ಸುಸ್ತೋ ಜಾಣ, ದುಡಿದು ಸುಸ್ತೋ ಜಾಣ
ಜಾಣೆ ಒಟ್ಟಿಗೆ ಸೇರಿ, ಬೇಯ್ಸೋಣ ಬಾರೆ ಎಂದ..

ಬೇಯ್ಸಿಲ್ಯಾಕಾ ಬೇಬಿ, ಬೇಯ್ಸಿಲ್ಯಾಕಾ ಬೇಬಿ
ನಂಗೆ ಬರೋದಿಲ್ಲ ಜಾಣ, ನಂಗೆ ಬರೋದಿಲ್ಲ ಜಾಣ
ಕಡೆಗೆ ಹೋಟೆಲಿನೂಟ, ಕಟ್ಟಿಸಿ ತಂದು ಕೊಟ್ಟ..!

– ನಾಗೇಶ ಮೈಸೂರು

(Picture source :http://www.thegloss.com/2010/09/14/odds-and-ends/cooking-tips-for-people-who-dont-cook/)

00720. ಸತಿಸೂತ್ರ..!

00720. ಸತಿಸೂತ್ರ..!
________________

(೦೧)
ಹೆಂಡತಿ ಬೈದು
ಬದುಕಿದವರುಂಟೆ
– ಹೊಗಳಿ’ಬಿಡಿ’.

(೦೨)
ಚಿನ್ನಾ, ಬಂಗಾರ
ಮಾತಲಿ ಲಕ್ಷ ಬಾರಿ
– ಕೃತಿಗೆ ‘ಸಾರಿ’.

(೦೩)

ಲಕ್ಷಗಟ್ಟಲೆ
ಕೊಟ್ಟ ವರದಕ್ಷಿಣೆ
– ಕೊಂಡ ಸರಕು.

(೦೪)
ಗೋಳಾಡಿಸಿಯು
ಉಸಿರ ಬಿಡದಿರಿ
– ಗೆಲುವ ಅಶ್ರು.

(೦೫)
ಅಡಿಗೆ ಮನೆ
ಖಾಲಿ ಪಾತ್ರೆ ಸದ್ದಾಗೆ
– ಮೌನಧಾರಣೆ.

– ನಾಗೇಶ ಮೈಸೂರು

00719. ಸುಳ್ಳೆ ನಮ್ ಮನೆ ದೇವ್ರು ಗೊತ್ತಾ ?

00719. ಸುಳ್ಳೆ ನಮ್ ಮನೆ ದೇವ್ರು ಗೊತ್ತಾ ?
_______________________________

ನಾವು ಹುಟ್ಟಾ ಸುಳ್ಳರು ಗೊತ್ತಾ ಸ್ವಾಮಿ ?
ಬಾಯಿ ಬಿಟ್ಟರೆ ಅದೆ ಮೊದಲು ಹೊರಗೆ..!
ಎದುರಾದವರಾರೊ ಅಂದರು ‘ಹೇಗಿದ್ದೀರಾ?’
ತಲೆ ಕುಣಿಸಿ ಪೆಚ್ಚು ನಗೆ ನುಡಿ ಔಪಚಾರಿಕ ;
‘ ಓಹೋ..ಚೆನ್ನಾಗಿದ್ದೇನೆ.. ನೀವು ?’
‘ ನಾನೂ ಚಂದವೇ..’ ಅಂತಲೆ ಶುರು ಮೋಸ..
ನಿಜಕ್ಕೂ ಚೆನ್ನಾಗಿದ್ದೀವಾ ? ಬರಿ ಹಾಗಂತಿದ್ದೀವಾ ?
ಕುದಿಯುತ್ತಿಲ್ಲವ ಒಳಗೆ ನೂರಾರು ?
ಬೈದುಕೊಳ್ಳುತ್ತಿಲ್ಲವ ಒಳಗೆ ಇಟ್ಟವನವನಾರು ?
ಯಾರಿಗೆ ಮಾಡಿಕೊಳ್ಳುವ ಮೋಸ ಸ್ವಾಮಿ ?

ಹೋಗಲಿ ಬಿಡಿ, ಬಂತಲ್ಲ ಪೋನು ನೆಂಟ
ಗೆಳೆಯ ಸಂಬಂಧಿ ಪರಿಚಿತ ಅಪರಿಚಿತ ದಂಡು
ಮತ್ತದೇ ರಾಗ ತಾಳ ಪಲ್ಲವಿ ಮಾರಾಯ
‘ಚೆನ್ನಾಗಿದ್ದೀನಿ , ನೀವ್ ಚೆನ್ನಾಗಿದ್ದೀರಾ ..! ?’
ಸುಳ್ಳೆನ್ನೊ ಸುಂದರ ಹೂವಿಗೆ ನಗೆದಾರ ಪೋಣಿಸಿ
ಉಡಿದಾರವೊ ಕತ್ತಿನ ಹಾರವೋ ಎಂತದ್ದೊ
ಮಾತಾಡಿದ್ದೆಲ್ಲಾ ಬರಿ ಅಂತದ್ದು ಇಂತದ್ದು
ಮಾಡಲೆ ಇಲ್ಲವಲ್ಲ ಮನಸು ನಿಜದಾ ಸದ್ದು
ಆಡಿದ್ದೆ ಆಡೊ ಕಿಸುಬಾಯಿ ದಾಸ ದಾಸಿ ಲೆಕ್ಕ
ಎಲ್ಲಾ ಸುಳ್ಳೆ ನಮ್ ಮನೆ ದೇವರು ಅನ್ನೋ ಹಾಗೆ..

ದೂರದ ಅಪ್ಪ ಅಮ್ಮ ಕರುಳ ಬಳ್ಳಿಗಳು
ಕೇಳಿದರೂನು ಕಕ್ಕುಲತೆಯಿಂದ ಅದೇ ಮಾತು
ಇದ್ದರು ಸಂಕಟ ಯಾತನೆ ತುರಿಯುವ ಕಜ್ಜಿ
‘ಎಲ್ಲಾ ಸ್ವಸ್ಥಾ, ಆರಾಮ ಹೇಗಿದೆ ಆ ಮುದುಕಜ್ಜಿ ?’
ಹಾಸಲುಂಟು ಹೊದೆಯಲುಂಟು ಯಾಕೋ ನಿರ್ಲಿಪ್ತ
ಕೆಲಸ ಸಂಬಳ ರೋಗ ನಿರೀಕ್ಷೆ ಹಳಸಿದ ಸಂಬಂಧ
ನಿಸ್ತೇಜ ಬದುಕಲಿ ಅಟ್ಟಿದ್ದೇನೇನೊ ಭ್ರಮ ನಿರಸನ
ಕಾಡುವ ನೂರು ಬಗೆ ಸಂಕಟ ರೂಪಾಯಿಯ ತೂತು
ಹಣವಿದ್ದು ಹೆಣ ಹೊತ್ತಂತಿಹ ಮನ ನಗೆ ನಟಿಸುತ್ತ
ಹೇಳುತ್ತಲೇ ಇದೆ ಬರಿ ಸುಳ್ಳು ಮುಖವಾಡದ ಪಾತ್ರ..

ಅಂದ ಹಾಗೆ ಸ್ವಾಮಿ, ಸುಳ್ಳೆ ನಮ್ ಮನೆ ದೇವ್ರು ಗೊತ್ತಾ ?

– ನಾಗೇಶ ಮೈಸೂರು

(Picture from : http://1.bp.blogspot.com/-35cQOWSrh8M/TbmVGVqAMQI/AAAAAAAAMHk/KadhD3VKXPI/s1600/krish_open_mouth.jpg – original source unknown, picture available in Internet)

00718. ನೇತ್ರಾವತಿ ಅತ್ತ ಸದ್ದು..(in Today’s Readoo Kannada – 16.05.2016)

00718. ನೇತ್ರಾವತಿ ಅತ್ತ ಸದ್ದು..(in Today’s Readoo Kannada – 16.05.2016

ನೇತ್ರಾವತಿ ಅತ್ತ ಸದ್ದು..

00716. ಕಾಡುವ ಹೆಂಡತಿ ಮನೆಯೊಳಗಿದ್ದರೆ…(ಹಾಸ್ಯ)

00716. ಕಾಡುವ ಹೆಂಡತಿ ಮನೆಯೊಳಗಿದ್ದರೆ…(ಹಾಸ್ಯ)
_____________________________________________
(ಹಿಂದೊಮ್ಮೆ ಬರೆದಿದ್ದ ಬರಹ)

ಪ್ರತಿಯೊಬ್ಬ ಸಾಧಾರಣ ವ್ಯಕ್ತಿಯ ಮನದಾಳದ ಆಸೆ, ಆಶಯ, ಕನಸು – ಸುಂದರ, ನೆಮ್ಮದಿ ಸುಖದ ಸಂಸಾರ. ಬಾಲ್ಯದ ಮೆಟ್ಟಿಲು ದಾಟಿ, ವಿದ್ಯಾಭ್ಯಾಸ ಮುಗಿಸಿ, ಕೆಲಸ ಹಿಡಿದು ಜವಾಬ್ದಾರಿಯ ನೊಗಕೆ ಹೆಗಲ್ಗೊಡುವ ಹೊತ್ತಿಗೆ ಮಾನಸಿಕ ಹಾಗೂ ಆರ್ಥಿಕ ಸ್ವಾತ್ಯಂತ್ರದ ಗರಿಯೂ ಬಿಚ್ಚುತ್ತಾ ಹೋಗಿ ಸುಂದರ ಬದುಕಿನ ಆಸೆಯ ಹಕ್ಕಿಯೂ ನಿಧಾನವಾಗಿ ನೆಲದಿಂದ ಮೇಲೆದ್ದು ಹಾರಾಡತೊಡಗುತ್ತದೆ. ಸುಂದರ ಬದುಕು ಒಂದು ಕೈನ ಚಪ್ಪಾಳೆಯಿಂದ ಸಾಧ್ಯವಾಗುವುದಿಲ್ಲವಲ್ಲ? ತಾವಾಗಿ ಹುಡುಕಿದ್ದೊ ಅಥವಾ ಮನೆಯವರಿಂದ ಆರೋಪಿಸಿದ್ದೊ – ಸಾಂಗತ್ಯವೊಂದರ ಜತೆಗಾಗಿ ಮನದಲ್ಲಿ ತಹತಹನೆ, ಕುತೂಹಲ; ಭವಿಷ್ಯದತ್ತ ಆಸೆ ತುಂಬಿದ ಆಶಾವಾದ ಚಿಗುರಿ ಗಿಡವಾಗಿ ಹೂಬಿಡತೊಡಗಿ ಮೈ ಮನವೆಲ್ಲ ಹೂವಂತೆ ಅರಳುವ ಹೊತ್ತು.

ಒಟ್ಟಾರೆ ನಾಟಕೀಯತೆಯ ಜತೆಗೊ ಅಥವಾ ಮಾಮೂಲಿನ ಸದ್ದುಗದ್ದಲವಿಲ್ಲದ ತರದಲ್ಲೊ ಗಂಡು ಹೆಣ್ಣುಗಳೆರಡರ ಜತೆ ಸೇರಿ ಸಂಸಾರವೆನ್ನುವ ಚಕ್ರಕ್ಕೆ ಚಾಲನೆ ಸಿಕ್ಕಾಗ ಹೊಸ ಬದುಕಿನ ಆರಂಭ. ಹೊಸತಲ್ಲಿ ಎಲ್ಲವೂ ಸುಂದರವೆ ಆದರೂ ನಿಜವಾದ ಹೂರಣ ಹೊರ ಬೀಳಲು ಕೊಂಚ ಹೊತ್ತು ಹಿಡಿಯುತ್ತದೆ. ಕೃತಕ ಧನಾತ್ಮಕ ವೇಷಧಾರಣೆಗಳೆಲ್ಲ ಕಳಚಿ, ಸ್ವಾಭಾವಿಕ ಧನ – ಋಣಾತ್ಮಕ ಅಂಶಗಳ ನೈಜ್ಯ ಚಿತ್ರ ಅನಾವರಣೆಗೊಳ್ಳುತ್ತಾ ಹೋಗುತ್ತದೆ. ಈ ಸಮಯವೆ ಬಂಧಗಳನ್ನು ಕಟ್ಟುವ ಅಥವಾ ಉರುಳಿಸುವ ಸಂದಿಗ್ದ ಕಾಲ. ಸುಖಿ- ಅಸುಖಿ ಭವಿತ ಸಂಸಾರದ ನಿಜವಾದ ಬುನಾದಿ ಬೀಳುವುದು ಇಲ್ಲಿಂದಲೆ. ಕೆಲವು ಅದೃಷ್ಟಶಾಲಿಗಳಿಗೆ ಹಾಲು ಜೇನು ಬೆರೆತಂತೆ ಹೊಂದಾಣಿಕೆ ತಂತಾನೆ ಪ್ರಸ್ತುತಗೊಳ್ಳುತ್ತ, ಗಟ್ಟಿಯಾಗುತ್ತ ಹೋಗುತ್ತದೆ. ಮತ್ತೆ ಕೆಲವರಲ್ಲಿ ಸಣ್ಣಪುಟ್ಟ ಏರುಪೇರುಗಳಿದ್ದರೂ, ಹೆಚ್ಚು ಕಡಿಮೆ ಸಹನೀಯ ಶೃತಿಲಯದಲ್ಲಿ ಸಾಗುತ್ತದೆ ಜೀವನ. ಆದರೆ ನಿಜವಾದ ಬಿಕ್ಕಟ್ಟು ಬರುವುದು ಈ ಹೊಂದಾಣಿಕೆ ಕಾಣಿಸದ ಜೋಡಿಗಳಲ್ಲಿ. ಅಲ್ಲಿ ಸಣ್ಣ ಪುಟ್ಟ ವಿಷಯಗಳೆ ದೊಡ್ಡವಾಗಿ ಅಸಹನೀಯ ಹೊಂದಾಣಿಕೆಗಳೊಡನೆ ದಿನದೂಡುವುದೊ ಅಥವಾ ವಾಗ್ಯುದ್ಧ, ವೈರುಧ್ಯಗಳ ನರಕದಲ್ಲಿ ಬಿದ್ದು ಪ್ರತಿದಿನ ಜೀವನದಲ್ಲಿ ಹೆಣಗುತ್ತಲೆ ಸಾಗುವುದೊ ಆಗುತ್ತದೆ. ಸರ್ವ ಸಂಪೂರ್ಣ ಪಕ್ವತೆಯುಳ್ಳ ಸಂಸಾರಗಳು ಇಲ್ಲವೆ ಇಲ್ಲವೆನ್ನುವಷ್ಟು ಅಪರೂಪವಾದರೂ ಸರಾಸರಿ ಲೆಕ್ಕದಲ್ಲಿ ಸಹನೀಯತೆ-ಅಸಹನಿಯತೆಯ ಅಂದಾಜು ಮಟ್ಟದ ಅಕ್ಕಪಕ್ಕದಲ್ಲೆ ಜೋತಾಡುವುದು ಸಾಮಾನ್ಯವಾಗಿ ಕಾಣುವ ಚಿತ್ರಣ.

ಸಹನೀಯ ಹಿತಕರ ವ್ಯಾಪ್ತಿಯೊಳಗಿನ ಪುಣ್ಯವಂತ ಗಂಡಸರ ಯಶಸ್ಸಿನ ಹಿಂದೆ ಆ ಹೆಂಡತಿಯರ ಪಾತ್ರ ಕಂಡೂ ಕಾಣದ ಮಹತ್ತರವೆಂದೆ ಹೇಳಬೇಕು. ಅಂತಹ ಯಶಸ್ವಿ ಗಂಡು ಮನ “ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ ನನಗದೆ ಕೋಟಿ ರೂಪ್ಪಾಯಿ…” ಎಂದು ಹಾಡಿ, ಕುಣಿದು ಕೃತಾರ್ಥರಾಗುತ್ತಾರೆ. ಆದರೆ ಆ ಭಾಗ್ಯವಿಲ್ಲದ ಗಂಡಸರ ಪಾಡೇನು? ಕಾಟ ಕೊಟ್ಟು ಕಾಡುವ ಹೆಂಡತಿಗಳ ಕೈಲಿ ಸಿಕ್ಕಿ ಒದ್ದಾಡುವವರಿಗೆ ಯಾರು ಹಾಡಬೇಕು? (ಅವರಾಗಿಯೆ ಹಾಡುವಂತ ಮನಸ್ಥಿತಿಯಿರುವುದು ಅನುಮಾನ, ಮತ್ತು ಅಪರೂಪ ಬಿಡಿ!).

ಈಗಾಗಾಲೆ ಹಾಡಿದ್ದಾರೊ ಇಲ್ಲವೊ ಗೊತ್ತಿಲ್ಲ – ಬಹುಶಃ ಕೆಲವು ನೊಂದವರು ಬಾತ್ರೂಮುಗಳಲ್ಲಿ ಹಾಡಿಕೊಂಡಿರಬಹುದೊ ಏನೊ. ಏನಾದರಾಗಲಿ ಅಂತಹವರಿಗೆ ಸುಲಭವಾಗಲೆಂದು ಇಲ್ಲೊಂದು ಹಾಡಿದೆ – ಕನ್ನಡನಾಡಲ್ಲಿ ಸುಪ್ರಸಿದ್ಧವಾದ “ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ..” ಧಾಟಿಯಲ್ಲಿ. ಅದನ್ನು ತಮ್ಮ ಇಂಪಾದ ಕಂಠದಲ್ಲಿ ಹಾಡಿ ಅಮರಗೊಳಿಸಿದ ಮೈಸೂರು ಅನಂತಸ್ವಾಮಿಯವರ ರಾಗದಲ್ಲೆ ಹಾಡಿಕೊಂಡು ಆನಂದಿಸಿ!

ಕೊ.ಕೊ: ಈ ರೀತಿ ಕಾಟ ಕೊಡುವ ಹೆಂಗಸರು ಕನ್ನಡನಾಡಿನವರಲ್ಲ – ಬೇರೆ ಕಾಲ, ದೇಶ, ಪ್ರಾಂತ್ಯಕ್ಕೆ ಸೇರಿದವರು. ನಮ್ಮ ಕನ್ನಡದ ಹೆಣ್ಣುಗಳು ಅಪ್ಪಟ ಬಂಗಾರ. ಆದ ಕಾರಣ ಕನ್ನಡದ ಹೆಣ್ಣು ಮಕ್ಕಳು ಹಾಡನ್ನು ಓದಿ ತಮ್ಮ ಮೇಲೆ ಆರೋಪಿಸಿಕೊಂಡು , ತಪ್ಪಾಗಿ ಅರ್ಥೈಸಿಕೊಂಡು ಕೋಪಿಸಿಕೊಳ್ಳಬಾರದೆಂದು ಕೋರಿಕೆ!

ಕಾಡುವ ಹೆಂಡತಿ ಮನೆಯೊಳಗಿದ್ದರೆ…
_______________________________

ಕಾಡುವ ಹೆಂಡತಿ ಮನೆಯೊಳಗಿದ್ದರೆ
ಕರಗದಿರುವುದೆ ಕೋಟಿ ರುಪಾಯಿ
ಅಂಥ ಹೆಂಡತಿಯೊಬ್ಬಳು ಹತ್ತಿರವಿದ್ದರೆ
ಲೂಟಿ ಶಾಂತಿ, ಮನಸೆ ಬಡಪಾಯಿ || ಕಾಡುವ ||

ದಿನ ಹಗಲೆ ಇರುಳೆ ಯಾರಿಗೆ ಲೆಕ್ಕ
ಸಾಲಂಕೃತ ಕೋಟಲೆ ದುಃಖ
ಒಂದೆ ಸಮ ಜತೆ ಕಾಡುವ ಕಾಟ
ಸಹಿಸಿ ಬಾಳುವುದಲ್ಲ ಹುಡುಗಾಟ || ಕಾಡುವ ||

ಬೇಡವೆಂದರೂ ದೂರ ತಳ್ಳುವಂತಿಲ್ಲ
ಕಟ್ಟಿಕೊಂಡ ಜನ್ಮಗಳ ಪಾಪ
ದೂರ ತಳ್ಳಲೆಲ್ಲಿ ದೂರ ಹೇಳಲೆ ಕಷ್ಟ
ಸಿಡಿದು ಸಿಗಿಯುವ ಘನ ಕೋಪ || ಕಾಡುವ ||

ಛೀಮಾರಿಗೆಲ್ಲ ಏಮಾರೊ ಸರಕಲ್ಲ
ನಿರ್ದಯೆ ನಿರ್ದಾಕ್ಷಿಣ್ಯತೆ ಒಡವೆ
ಗಂಡನೆನ್ನುವ ಪ್ರಾಣಿ ಯಾವ ಲೆಕ್ಕಕಿಲ್ಲ
ಕೇಡ ಮಾಡಲೇಕವನ ಗೊಡವೆ || ಕಾಡುವ ||

ಹಬ್ಬ ಹರಿದಿನ ಹುಣ್ಣಿಮೆ ಹೋಳಿಗೆಗಿಂತ
ಬೈಗುಳದಡಿಗೆಯೆ ಪ್ರಚಂಡ
ಮಾಡದಿದ್ದರು ಸದ್ಯ ಕಾಡದಿದ್ದರೆ ಸಾಕು
ಎಂದು ಮೌನ ತಬ್ಬಿದವ ಗಂಡ || ಕಾಡುವ ||

ಅಪ್ಪಿ ತಪ್ಪಿ ಎಂದೊ ಮಾಡಿದ ಅಡಿಗೆ
ಪಾತ್ರೆ ಪಗಡಿಯೆಲ್ಲ ಚೆಲ್ಲಾಪಿಲ್ಲಿ
ವಾರಗಟ್ಟಲೆ ಪೇರಿಸಿದ ಮುಸುರೆಗಳೆ
ಗಂಡ ತೊಳೆಯದೆ ಆಗದೆ ಖಾಲಿ || ಕಾಡುವ ||

ಮನೆಗೊಬ್ಬಳೆ ಗೃಹಿಣಿ ಬೇರಿಲ್ಲದ ಕಾಟ
ಟೀವಿ ಧಾರವಾಹಿಗಳೆ ಪ್ರಖರ
ಕೂತ ಸೋಫಾವೆ ಹಾಸಿಗೆ, ಮೆತ್ತೆಗೆ ದಿಂಬೆ
ಊಟಕೆ ಹೊತ್ತಾದರು ಒಲೆಗೆ ಚೌರ || ಕಾಡುವ ||

ಇಂಥ ಹೆಂಡತಿಯೊಬ್ಬಳು ಮನೆಯೊಳಗಿದ್ದರೆ
ಬದುಕೆಲ್ಲ ಪೂರ್ತಿ ನರಕಾನೆ
ಹುಲಿಯಂತ ಗಂಡು ಇಲಿಯಾಗಿಬಿಡುವ
ಜೀವಂತ ಶವವಾಗುತ ತಾನೆ || ಕಾಡುವ ||

– ನಾಗೇಶ ಮೈಸೂರು
(ಮೂಲ ಕವಿ ಕೆ.ಎಸ್. ನರಸಿಂಹಸ್ವಾಮಿಯವರ ಮತ್ತು ಕವಿತೆಯ ಕ್ಷಮೆ ಬೇಡುತ್ತ 🙏)

(ಚಿತ್ರಕೃಪೆ : ಉದಯವಾಣಿ ಹಳೆಯ ಪುಟವೊಂದರಿಂದ : http://www.udayavani.com/kannada/news/ಕವನಗಳು/51551/ಹೆಂಡತಿಯ-ಹಾಡು)

00715. ವಾರದ ಕೊನೆಗಿಷ್ಟು ಹನಿಗಳು..

00715. ವಾರದ ಕೊನೆಗಿಷ್ಟು ಹನಿಗಳು..
___________________________

(೦೧)
ಪಾಪಿಯೊಡ್ಡಲಿ
ಪುನೀತರೊಡ್ಡಲಿ ಕೈ
– ತೊಳೆವ ಗಂಗೆ.

(೦೨)
ತುಂತುರು ಹನಿ
ಮೋಡ ಮುಸುಕಿದೆ
– ಬಿಸಿ ಪಕೋಡ.

(೦೩)
ಮುಗಿಲ ರಚ್ಚೆ
ವಾರದ ರಜೆ ಮುಚ್ಚೆ
– ಮನ ಕಾಶ್ಮೀರ.

(೦೪)
ಉದುರುತಿವೆ
ಹನಿ ಚಿಲ್ಲರೆ ಕಾಸು
– ಕರಗಿ ಸುತ್ತ.

(೦೫)
ಗುದ್ದಲಿ ಬಿಡಿ
ನಗರದ ವ್ಯಾಮೋಹ
– ತುಟ್ಟಿ ದಿನಸಿ.

(೦೬)
ಬೆಳೆಯಬೇಡಿ
ಕೊಂಡು ತಿನ್ನುವ ದಿನಾ
– ಆಮದು ವೃದ್ಧಿ.

(೦೭)
ಮಳೆಯಾಗಲಿ
ಮಾತಾಗಲಿ ಕರಗಿ
– ವೇದನೆ ಮುಕ್ತಿ.

(೦೮)
ಮುಂಗಾರು ಮಳೆ
ಕದಡದೆ ರಂಗೋಲಿ
– ನಗುತಿರಲಿ.

(೦೯)
ಬರದ ಕಾಲ
ಬಾರದ ಮಳೆಗಾಲ
– ಕೆಳೆ ಬರಲಿ.

(೧೦)
ಮೊದಲ ಮಳೆ
ನವಿರೆದ್ದು ಸಂಭ್ರಮ
– ಸಂಗಾತಿ ತೆಕ್ಕೆ.

– ನಾಗೇಶ ಮೈಸೂರು.

00714. ‘ಗಂಡ – ಹೆಂಡ’ತಿ ಫಂಢ..!

00714. ‘ಗಂಡ – ಹೆಂಡ’ತಿ ಫಂಢ..! 
_______________________________

(“ಸುಮ್ನೆ ಟೈಮ್ ಪಾಸ್ ಫಂಡಾ”)

ಗಂಡನೆಂಬುವ ಅಂತರ
ಇರದಿದ್ದರೆ ಅಭ್ಯಂತರ
ಕಾಡುವುದಂತೆ ತರತರ
ಗಳಿಗೆಗೊಂದು ಗಂಡಾಂತರ !

ಹೆಸರ್ಯಾಕಿಟ್ಟರು ಗಂಡ ?
ಅರಿವಾಗಲಿಲ್ಲವೇ ಫಂಢ !
ಸತಿ ಬಾಳಾಗಿರದಂತೆ ಸುಗಮ
‘ಗಂಡ’ವವನೆ ಆಗಿ ಆಗಮ !

‘ಗಂಡ’ ನೀಗಿಸೆ ‘ಅಸು’ ಗಂಡಸು
‘ಹೆಂಡ’ ಕುಡಿದಂತೆ ‘ಅತಿ’ ಹೆಂಡತಿ
‘ಗಂಡ-ಹೆಂಡ’ಗಳ ಕಟ್ಟಿದರೆ ಕಾಳಗ
ಎರಡಪಾಯಗಳ ಜಂಟಿ ಬಳಗ !

ಗಂಡನಾಗೆ ಯಮಗಂಡ ಕಾಲ
ಹಿಂಡುತ ಹೆಂಡತಿ ಬಿಚ್ಚೆ ಬಾಲ
ನೀರೆಯಾಗದೆ ಸತಿಯಾಗೆ ನೀರಾ
ಮತ್ತಿನ ಮಂಗಗಳ ಕುಸ್ತಿ ಸಂಸಾರ !

ಸಕಲ ಕಲಾ ವಲ್ಲಭ ಸುಧೀರ
ನಾಟಕವಾಡಲು ಬಲ್ಲ ರಣಧೀರ
ಆಗಿರಬೇಕಿಲ್ಲ ಅವ ಮಾಪುರುಷ
ಮಾಡುವಂತಿರೆ ಸಾಕು ಮನೆಗೆಲಸ !

ಅಂತೆಯೆ ಅತಿ ಲೋಕದ ಸುಂದರಿ
ಶಯನೇಶು ಮಂತ್ರಿ ದಾಸಿ ಕಿನ್ನರಿ
ಆಗಿರಬೇಕಿಲ್ಲ ಅನಸೂಯೆ ಮಾಸತಿ
ಸಾಕಿದ್ದರೆ ಸಂಸಾರ ತೂಗಿಸೊ ಛಾತಿ !

ಗಂಡಗಳೆ ಜೀವಕೆ ಬಹ ಅಪಾಯ
ಹೆಂಡ-ಅತಿ ಮತ್ತೆ ಇಹ ಉಪಾಯ
ಅದಕೆಂದೆ ಬೆಂಕಿ ಬೆಣ್ಣೆಗೆ ಬೀಳೊ ಗಂಟು
ಗುದ್ದಾಡಿಕೊಂಡೆ ಹೇಗೊ ಕುದುರಿಸಿ ನಂಟು..!

– ನಾಗೇಶ ಮೈಸೂರು

(Picture source: http://tinybuddha.com/blog/how-pain-can-cause-us-to-act-crazy-in-relationships/)

00713. ಅಹಲ್ಯಾ_ಸಂಹಿತೆ_೪೨ (ಫಲಿತಾಂಶದ ಯಶಸ್ವಿ ಕ್ರೋಢೀಕರಣ)

00713. ಅಹಲ್ಯಾ_ಸಂಹಿತೆ_೪೨ (ಫಲಿತಾಂಶದ ಯಶಸ್ವಿ ಕ್ರೋಢೀಕರಣ)
________________________________________________
(Link to previous episode no. 41: https://nageshamysore.wordpress.com/2016/04/24/00669-0041_%e0%b2%85%e0%b2%b9%e0%b2%b2%e0%b3%8d%e0%b2%af%e0%b2%be_%e0%b2%b8%e0%b2%82%e0%b2%b9%e0%b2%bf%e0%b2%a4%e0%b3%86_%e0%b3%aa%e0%b3%a7/)

ಅಂದಿನ ಸಭೆಯಲ್ಲೇನೊ ವಿದ್ಯುತ್ಸಂಚಾರವಾಗಿರುವಂತೆ ಇಡಿ ಪರಿಸರವೇ ಉತ್ಸಾಹ, ಉಲ್ಲಾಸದಿಂದ ತುಂಬಿ ತುಳುಕುತ್ತಿದೆ. ಸಮಾನಾಂತರ ಸ್ತರದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ನಾಲ್ಕು ತಂಡಗಳ ಎಲ್ಲಾ ಸದಸ್ಯರು ಆಗಲೆ ಅಲ್ಲಿ ಬಂದು ಸೇರಿಬಿಟ್ಟಿದ್ದಾರೆ. ಪ್ರತಿ ತಂಡವೂ ತಮ್ಮ ಪಾಲಿನ ಕೆಲಸವನ್ನು ಈಗಾಗಲೆ ಯಶಸ್ವಿಯಾಗಿ ಮುಗಿಸಿಬಿಟ್ಟ ಕಾರಣ ಪ್ರತಿಯೊಬ್ಬರ ಕುತೂಹಲವೂ ಮಿಕ್ಕ ತಂಡಗಳ ಫಲಿತದ ಕುರಿತು ಮತ್ತು ಅವೆಲ್ಲವನ್ನು ಹೇಗೆ ಸಮನ್ವಯಿಸಲಾಗುತ್ತಿದೆ ಎಂಬುದರ ಬಗ್ಗೆ. ಸಭೆಯ ಆರಂಭಕ್ಕೆ ಇನ್ನು ಸಮಯವಿರುವ ಕಾರಣ ಎಲ್ಲಾ ಸಣ್ಣ ಸಣ್ಣ ಗುಂಪುಗಳಲ್ಲಿ ಸೇರಿಕೊಂಡು ಪರಸ್ಪರ ಮಾತಿಗಿಳಿದಿದ್ದಾರೆ ಕಾಲಹರಣಕ್ಕೆಂಬಂತೆ.

ಆ ಸಭೆಯಲ್ಲಿ ಮುಖ್ಯ ಭೂಮಿಕೆ ನಿಭಾಯಿಸಬೇಕಾದ ತಂಡ ಮಾತ್ರ ಇನ್ನೂ ಅಲ್ಲಿಗೆ ಬಂದಿಲ್ಲ. ವೇದಿಕೆಯ ಹಿಂದಿರುವ ಮತ್ತೊಂದು ಚಿಕ್ಕ ಸಭಾಕೋಣೆಯಲ್ಲಿ ಕಡೆಯ ಗಳಿಗೆಯ ಚರ್ಚೆ, ಸಿದ್ದತೆಗಳನ್ನು ನಡೆಸುತ್ತಿದ್ದಾರೆ. ಊರ್ವಶಿ, ಬ್ರಹ್ಮದೇವ, ಸೂರ್ಯ, ದೇವೇಂದ್ರ, ಗೌತಮರ ಜತೆ ನಾಲ್ಕು ತಂಡದಿಂದಲು ಆಯ್ದ ಪ್ರತಿನಿಧಿಗಳು ಸಿದ್ದರಾಗುತ್ತಿದ್ದಾರೆ, ತಮ್ಮ ಪ್ರಯೋಗದ ಫಲಿತಗಳನ್ನು ವೇದಿಕೆಯ ಮೇಲಿನ ಪ್ರಾಯೋಗಿಕ ಪ್ರತ್ಯಕ್ಷದರ್ಶಿಯ ಅವತರಣಿಕೆಯಲ್ಲಿ ಪ್ರದರ್ಶಿಸಲು. ಆ ಪ್ರಾಯೋಗಿಕತೆಯ ಕಾರಣದಿಂದಲೆ ಕಡೆಯ ಗಳಿಗೆಯ ಪರೀಕ್ಷೆ ನಡೆಸುತ್ತಿದ್ದಾರೆ – ಎಲ್ಲವೂ ಸರಿಯಾಗಿ ಕಾರ್ಯ ನಿರ್ವಹಿಸುವಂತೆ. ಅದರೆಲ್ಲದರ ಉಸ್ತುವಾರಿ ನೋಡುತ್ತಿದ್ದ ಊರ್ವಶಿ ಕೊನೆಗೊಮ್ಮೆ ಎಲ್ಲಾ ಸಮರ್ಪಕವಾಗಿದೆಯೆಂದು ಖಚಿತ ಪಡಿಸಿಕೊಂಡ ನಂತರ ಗೌತಮನತ್ತ ತೆರಳಿ ಮುಂದಿನ ಕಾರ್ಯ ನಿರೂಪಣೆಯ ಪಟ್ಟಿಯನ್ನು ಅವನ ಕೈಗಿತ್ತಳು. ಅಂದಿನ ಪೂರ್ಣ ನಿರೂಪಣೆಯ ಹೊಣೆ ಗೌತಮನದು – ಸಿದ್ದಪಡಿಸಿದ್ದೆಲ್ಲ ಊರ್ವಶಿಯೆ ಆದರು. ವೇದಿಕೆಯ ಹಿಂದಿನ ಸಹಾಯಕಿಯಾಗಿ ಮಾತ್ರ ಅವಳ ಪಾತ್ರ. ಪಿತಾಮಹನಾಗಿ ಮಿಕ್ಕವರೆಲ್ಲರದು ಅಂದು ಪ್ರೇಕ್ಷಕರ ಪಾತ್ರವೆ. ಅಂತೂ ನಿಗದಿತ ಸಮಯಕ್ಕೆ ಸರಿಯಾಗಿ ಸಭೆ ಆರಂಭವಾಗುವಂತೆ ಚಾಲನೆ ನೀಡಿದ ಊರ್ವಶಿ, ನಿರೂಪಕನಾಗಿ ಗೌತಮನನ್ನು ವೇದಿಕೆಗೆ ಆಹ್ವಾನಿಸಿ ತಾನು ನೇಪಥ್ಯಕ್ಕೆ ಸರಿದುಬಿಟ್ಟಳು.

ಗೌತಮನ ನಿರೂಪಣೆಯೇನು ನೀರಸವಾಗಿರಲಿಲ್ಲ. ಹಾಗಿರಬಾರದೆಂದೆ ಹೆಚ್ಚಿನ ತಾಂತ್ರಿಕ ವಿವರಣೆಯ ಗೋಜಿಗೆ ಹೋಗದೆ ಪ್ರತಿ ತಂಡದ ಪ್ರಾತ್ಯಕ್ಷಿಕ ದರ್ಶಿಕೆಗೆ ನೇರ ಅನುವು ಮಾಡಿಕೊಟ್ಟು ನಡುನಡುವೆ ಅದರ ವಿವರಣೆಗೆ ತನ್ನ ಮಾತು ಸೇರಿಸತೊಡಗಿದ. ಆ ನಿಟ್ಟಿನಲ್ಲಿ ಮೊದಲು ಅವಕಾಶ ಪಡೆದ ಮೊದಲನೇ ತಂಡ ಜೀವಕೋಶದ ಕಸಿಯ ಕುರಿತಾದ ವಿವರಗಳನ್ನು ದೃಶ್ಯರೂಪದಲ್ಲಿ ಪ್ರದರ್ಶಿಸತೊಡಗಿತ್ತು. ಎಲ್ಲರಿಗು ಅರ್ಥವಾಗುವ ಸರಳ ರೂಪಿನಲ್ಲಿರಬೇಕೆಂಬ ಮೂಲ ನಿಯಮಕ್ಕೆ ಬದ್ಧರಾಗಿ ಮೊದಲು ಉಚ್ಚೈಶ್ರವಸ್ಸುವಿನ ಸೃಜಿಸುವಿಕೆಯನ್ನು ಉದಾಹರಣೆಯಾಗಿ ತೋರಿಸಲು ಮೊದಲ್ಗೊಂಡು, ಅದರ ಸಲುವಾಗಿ ಒಂದು ಕಡೆಯಿಂದ ಕುದುರೆ ಮತ್ತು ಇನ್ನೊಂದು ಕಡೆಯಿಂದ ಹಕ್ಕಿಯ ಸಾಂಕೇತಿಕ ರೂಪಗಳು ಮೂಡಿಬಂದು ಅವೆರಡು ಅಂಗಾಂಗಿಕ ಮಟ್ಟದಲ್ಲಿ ಸಮ್ಮಿಳನವಾಗುವ ಸ್ಥೂಲ ಚಿತ್ರಣವನ್ನು ಪ್ರದರ್ಶಿಸಿತು. ಕಸಿ ಹಾಕಿದ ವಿಭಿನ್ನ ಅಂಗಾಂಗಗಳು ಹೊಂದಿಕೊಳ್ಳುವ ಬಗೆಯ ವಿನ್ಯಾಸ, ತಂತ್ರಗಳ ಅನಾವರಣ ಮಾಡುತ್ತಲೇ ಕಾಲನುಕ್ರಮಣದಲ್ಲಿ ಅವು ಹೇಗೆ ನೈಸರ್ಗಿಕ ಬಂಧವನ್ನು ಏರ್ಪಡಿಸಿಕೊಂಡಿವೆಯೆಂದು ನಿರೂಪಿಸಿತು. ಹಾಗೆ ನಿರೂಪಿಸಿದ ಚಿತ್ರಣವನ್ನೆ ಆಂಗಿಕ ಮಟ್ಟದಿಂದ ಅಂಗಾಂಗ, ಅಂಗಾಶ, ಜೀವಕೋಶಗಳ ಮಟ್ಟಕ್ಕೆ ಒಯ್ದು ಹೇಗೆ ಎರಡು ವಿಭಿನ್ನ ಜೀವಕೋಶಗಳು ಕಸಿಯಾಗಿ ಒಂದು ಹೂಸ ಜೀವಕೋಶವಾಗಿ ಉತ್ಪನ್ನವಾಯ್ತು ಎಂಬುದರ ಪ್ರಾತ್ಯಕ್ಷಿಕೆಯನ್ನು ತೋರಿಸಲಾಯ್ತು. ಅದನ್ನು ನೋಡಿದ ಪ್ರತಿಯೊಬ್ಬರೂ ಜೀವಕೋಶಗಳೆರಡರ ಕಸಿಯಿಂದ ಹೊಸ ಜೀವಕೋಶವೊಂದರ ಉತ್ಪತ್ತಿ ಮಾಡಲು ಸಾಧ್ಯ ಎನ್ನುವುದನ್ನು ಸರಳ ರೂಪದಲ್ಲಿ ಅರಿಯಲು ಸಾಧ್ಯವಾಗುವಂತೆ ಸಂಯೋಜಿಸಿದ ಚಿತ್ರಣವದು.

ಅಲ್ಲಿಂದ ಮುಂದುವರೆದು ಅದೇ ಸಿದ್ದಾಂತವನ್ನು ಅಳವಡಿಸಿಕೊಂಡ ಊರ್ವಶಿ ಮತ್ತು ಬ್ರಹ್ಮದೇವರ ಕೋಶಗಳ ಕಸಿ ಮಾಡಿದ ವಿವರಗಳ ಪ್ರದರ್ಶನವಾಯ್ತು. ಒಂದೇ ಬಾರಿಗೆ ನಿಗದಿತ ಮಟ್ಟದ ಕಸಿ ದೊರಕದ ಕಾರಣ, ಹಲವಾರು ಮಜಲುಗಳಾಗಿ ನಡೆಸಿದ ಯತ್ನಗಳನ್ನು ಅನುಕ್ರಮವಾಗಿ ತೋರಿಸಿ , ಹೇಗೆ ಅಂತಿಮ ಮಜಲಿನ ಹೊಸ ಕೋಶದ ಸೃಷ್ಟಿಯತನಕ ತಲುಪಿದರೆನ್ನುವುದನ್ನು ಸಾದರಪಡಿಸಲಾಗಿತ್ತು. ತದನಂತರ ಹಳೆಯ ಜೀವಕೋಶ ಮತ್ತು ಹೊಸ ಜೀವಕೋಶಗಳನ್ನು ತುಲನಾತ್ಮಕವಾಗಿ ಪ್ರದರ್ಶಿಸಿ ಅವೆರಡರ ನಡುವಿನ ಅಂತರವನ್ನು ವಿವರಿಸಲಾಯ್ತು. ಸಾಧಾರಣವಾಗಿ ನೈಸರ್ಗಿಕ ವಿಕಸನ ಹಾದಿ ಹಿಡಿದಿದ್ದಾರೆ ಎಷ್ಟು ಕಾಲ ಹಿಡಿಯಬಹುದಿತ್ತು ಮತ್ತು ಈ ಕಸಿ ವಿಧಾನದಿಂದ ಎಷ್ಟು ಬೇಗನೆ ಅದೇ ವಿಕಸನ ಮಟ್ಟವನ್ನು ಸಾಧಿಸಲು ಸಾಧ್ಯವಾಯಿತೆಂಬುದರ ವರ್ಣನೆಯೇ ರೋಚಕ ಕಥಾನಕದಂತೆ ಭಾಸವಾಗಿತ್ತು ಅಲ್ಲಿ ನೆರೆದಿದ್ದ ವಿಜ್ಞಾನಿಗಳಿಗೆ.

ನಂತರದ ಸರದಿ ಎರಡನೆ ತಂಡದ ಬದಲು ಮೊದಲು ಮೂರನೆ ತಂಡದ್ದಾಗಿತ್ತು. ಮೂರನೆ ತಂಡದ ಫಲಿತವನ್ನು ಬಳಸಿಕೊಂಡು ಎರಡನೆ ತಂಡ ತನ್ನ ಗುರಿ ಸಾಧಿಸಿದ್ದ ಕಾರಣಕ್ಕೆ. ವೇದಿಕೆಗೆ ಬಂದ ಮೂರನೆ ತಂಡ ಮೊದಲು ಪ್ರದರ್ಶಿಸಿದ್ದು ಸಾಧಾರಣ ಜೀವಕೋಶದ ದೈನಂದಿನ ಹುಟ್ಟು – ಸಾವಿನ ಕುರಿತಾಗಿ. ಜೀವಕೋಶವೊಂದು ಹೊಸಕೋಶವಾಗಿ ಹೊರಹೊಮ್ಮಿದಂತೆ ಹೇಗೆ ತನ್ನ ಜೀವನ ಚಕ್ರ ಸವೆಸುತ್ತದೆ ಮತ್ತು ಅದರ ಜೀವಿತದ ಕಾಲಾವಧಿ ಎಷ್ಟು ಎಂಬುದರ ಚಿತ್ರಣ ಮೊದಲು ಮೂಡಿಬಂದಿತ್ತು. ತದನಂತರ ಅದರ ಜೀವಿತಾವಧಿಯನ್ನು ಸಕ್ರಿಯವಾಗಿಡುವ ರಾಸಾಯನಿಕದ ಮಾಹಿತಿಯನ್ನು ತೋರಿಸುತ್ತ, ಯಾವಾಗ ಆ ರಾಸಾಯನಿಕ ತನ್ನ ಕಾರ್ಯ ನಿಲ್ಲಿಸಿ ಸ್ಥಬ್ಧವಾಗುವುದೊ ಆಗ ಜೀವಕೋಶವು ನಿಷ್ಕ್ರಿಯವಾಗಿ ಸಾವಿಗೀಡಾದಂತೆ ನಶಿಸಿಹೋಗುವುದನ್ನು ತೋರಿಸುವ ಚಿತ್ರಣ ಮುಂದಿನದು. ಇವೆರಡೂ ಪ್ರಸ್ತುತ ಕೋಶದ ಕಾರ್ಯವೈಖರಿಯನ್ನು ಅರ್ಥಮಾಡಿಕೊಳ್ಳುವಲ್ಲಿ ಸಹಾಯಕವಾಗಿತ್ತು.

ನಂತರದ ಸರದಿ ಅವರು ಕಂಡು ಹಿಡಿದ ಹೊಸ ರಾಸಾಯನಿಕದ್ದು. ಪ್ರಸ್ತುತ ನಶಿಸಿಹೋಗಿದ್ದ ಜೀವಕೋಶವೊಂದಕ್ಕೆ ಆ ರಾಸಾಯನಿಕವನ್ನು ಸೇರಿಸುವುದರ ಮೂಲಕ ಅದು ಹೇಗೆ, ನಿಷ್ಕ್ರಿಯವಾಗಿದ್ದ ಮೂಲ ರಾಸಾಯನಿಕವನ್ನು ಪ್ರಚೋದಿಸಿ, ಉದ್ದೇಪಿಸಿ, ಚೇತನಶೀಲವಾಗಿಸಿ ಮತ್ತೆ ಸಕ್ರೀಯವಾಗಿಸಬಹುದೆಂಬ ಮಾಹಿತಿಯ ಪ್ರದರ್ಶನ. ಆ ರಾಸಾಯನಿಕವನ್ನು ಸೇರಿಸುತ್ತಿದ್ದ ಹಾಗೆ ಅದುವರೆಗೆ ಸಾವಿಗೀಡಾದಂತಿದ್ದ ಕೋಶದಲ್ಲು ಮತ್ತೆ ಚಟುವಟಿಕೆ ಆರಂಭವಾಗಿ ಜೀವಿತವಿದ್ದ ಮೊದಲಿನ ಹಾಗೆ ಕಾರ್ಯ ನಿರ್ವಹಿಸತೊಡಗಿತ್ತು…! ಈ ಹಂತದಲ್ಲಿ ಮತ್ತೆ ಗೌತಮನೆ ವೇದಿಕೆಗೆ ಬಂದು ಪುಟ್ಟ ವಿವರಣೆ ನೀಡಿದ – ಇದರರ್ಥ ಜೀವಕೋಶ ತನ್ನ ಕಾಲಾವಧಿಯಲ್ಲಿ ನಶಿಸಿಹೋಗುವ ಬದಲು ಮತ್ತಷ್ಟು ಜೀವ ಬಂದಂತೆ ತನ್ನ ಆಯಸನ್ನು ವೃದ್ಧಿಸಿಕೊಂಡು ದುಪ್ಪಟ್ಟಾಗಿಸಿಕೊಳ್ಳುತ್ತದೆ ಎಂದು. ಅದನ್ನೇ ಸರಳವಾಗಿ ವಿವರಿಸುತ್ತ ಜೀವಿಯೊಂದರ ಆಯಸ್ಸನ್ನು ಎರಡರಷ್ಟು ಮಾಡಿದಂತೆಯೆ ಈ ಲೆಕ್ಕ ಎಂದು ವಿವರಿಸಿದ.

ಆದರೆ ಅದನ್ನು ಮೀರಿದ ಆಶ್ಚರ್ಯ ಮುಂದಿನ ಹಂತದ ಪ್ರದರ್ಶನದಲ್ಲಿತ್ತು. ಹೊಸದಾಗಿ ಸೇರಿಸಿದ ರಾಸಾಯನಿಕ ಕೋಶದ ಜೀವಾವಧಿ ಕಾಲಮಾನವನ್ನೇನೊ ಎರಡರಷ್ಟಾಗಿಸಿತ್ತು; ತಾರ್ಕಿಕವಾಗಿ ದುಪ್ಪಟ್ಟು ಕಾಲವಾದ ನಂತರ ಕೋಶ ಮತ್ತೆ ನಶಿಸಿಹೋಗಬೇಕಿತ್ತು. ಆದರೆ ಹಾಗಾಗಲಿಲ್ಲ – ಬದಲು ಆ ಹೊಸ ರಾಸಾಯನಿಕದ ಮತ್ತೊಂದು ಪ್ರಚೋದಕ ತತ್ವದಿಂದಾಗಿ ಒಂದು ವಿಧದ ಸ್ವಯಂಭುತ್ವ ಪ್ರಾಪ್ತವಾದಂತೆ, ನಶಿಸಿಹೋಗಬೇಕಾಗಿದ್ದ ಜೀವಕೋಶ ಮತ್ತೆ ಪುನರುಜ್ಜೀವನಗೊಂಡಂತೆ ಸಕ್ರಿಯಗೊಂಡು ಮತ್ತೊಂದು ಜೀವನ ಚಕ್ರವನ್ನು ಆರಂಭಿಸಿಬಿಟ್ಟಿತ್ತು…! ಈ ಪ್ರಕ್ರಿಯೆ ಹೀಗೆ ಮುಂದುವರೆಯುತ್ತ ಸುಮಾರು ಒಂಭತ್ತು ಜೀವನ ಚಕ್ರಗಳ ಆವರ್ತನದ ನಂತರವಷ್ಟೆ ಆ ಮೂಲ ಜೀವಕೋಶ ಮತ್ತೆ ನಿಷ್ಕ್ರಿಯ ಸ್ಥಿತಿ ತಲುಪಿ ಸ್ತಬ್ದವಾಯ್ತು. ಅದು ಮುಗಿಯುತ್ತಿದ್ದಂತೆ ಮತ್ತೆ ವೇದಿಕೆಗೆ ಬಂದ ಗೌತಮ ಅದರ ಮಹತ್ವವನ್ನು ಎತ್ತಿ ತೋರಿಸಿದ. ಹೊಸ ರಾಸಾಯನಿಕದ ಫಲವಾಗಿ ಕೋಶ ಅರ್ಥಾತ್ ಜೀವಿಯ ಆಯಸ್ಸು ಹತ್ತುಪಟ್ಟು ಹೆಚ್ಚಾದಂತೆ ಎಂದು ವಿವರಿಸಿದ. ಜತೆಗೆ ಸೇರಿಸಿದ ಗಾತ್ರಕ್ಕನುಗುಣವಾಗಿ ಅದನ್ನು ಸ್ವಲ್ಪಸ್ವಲ್ಪವೇ ಬಳಸಿಕೊಳ್ಳುತ್ತ ಹಲವಾರು ಚಕ್ರಗಳಲ್ಲಿ ಪುನರಾವರ್ತಿಸಿಕೊಳ್ಳುವ ಅದರ ಸ್ವಯಂಭುತ್ವದ ಮಹತ್ವವನ್ನು ವಿವರಿಸುತ್ತ ಈ ತತ್ವ ಹೇಗೆ ಜೀವಿಗಳ ಕಾಲಾವಧಿಯನ್ನು ತನಗೆ ತಾನೇ ವಿಸ್ತರಿಸಿಕೊಳ್ಳುತ್ತ ಹೋಗಬಹುದೆನ್ನುವುದನ್ನು ವಿಷದೀಕರಿಸಿದ – ರಾಸಾಯನಿಕದ ಗಾತ್ರಕ್ಕನುಗುಣವಾಗಿ.

ಅದನ್ನು ಪ್ರಮಾಣೀಕರಿಸುವ ಮುಂದಿನ ಮಾಹಿತಿ ನಂತರ ಪ್ರದರ್ಶಿತವಾಯ್ತು. ಈ ಬಾರಿ ಹೊಸ ರಾಸಾಯನಿಕವನ್ನು ಹೊರಗಿನಿಂದ ಸೇರಿಸುವ ಬದಲು, ಜೀವಕೋಶವು ಅದನ್ನು ತಂತಾನೆ ಉತ್ಪಾದಿಸಿಕೊಳ್ಳುವಂತೆ ಮಾಡಿದ ಸಂಶೋಧನೆಯನ್ನು ತೋರಿಸಲಾಯ್ತು. ಜೀವಕೋಶದಲ್ಲೆ ಈ ತತ್ವ ಬೀಜರೂಪದ ಮಟ್ಟದಲ್ಲಿ ಸೇರಿಬಿಟ್ಟಿತೆಂದರೆ ಅದರರ್ಥ ಸಾವಿಲ್ಲದ ಅಮರತ್ವವನ್ನು ಸಾಧಿಸಿದ ಹಾಗೆ. ಆ ಕೋಶ ನಿರಂತರ ಜೀವನ ಚಕ್ರದ ಪುನಾರಾವರ್ತನೆಯಲ್ಲಿ ತೊಡಗಿಸಿಕೊಳ್ಳುವುದರಿಂದ ನೈಸರ್ಗಿಕ ಸಾವೆನ್ನುವುದೆ ಇಲ್ಲವಾಗಿಬಿಡುತ್ತದೆ. ಹೀಗೆ ಜೀವಿಯ ಆಯಸ್ಸಿನ ವೃದ್ಧಿಗೆ ಇದು ಸ್ವಯಂಚಾಲಕತ್ವ ನೀಡುವ ಅದ್ಭುತ ಸಂಶೋಧನೆಯೆಂದು ಮನದಟ್ಟಾಗಿಸುತ್ತಿದ್ದ ಹಾಗೆಯೆ ಸಭೆಯೆಲ್ಲ ಪ್ರಚಂಡ ಕರತಾಡನದಿಂದ ತುಂಬಿಹೋಯ್ತು.

ಇನ್ನು ನಂತರದ ಸರದಿ ಎರಡನೆ ತಂಡದ್ದು. ಮೂರನೆ ತಂಡದ ಫಲಿತಗಳೆಲ್ಲ ಜೀವಕೋಶದ ಮಟ್ಟದ್ದು. ಮೂಲರೂಪದಲ್ಲಿ ಅದನ್ನು ಬಳಸಿಕೊಳ್ಳುತ್ತ ಹೇಗೆ ಅಂಗ, ಅಂಗಾಶಗಳ ಮಟ್ಟಕ್ಕೆ ವಿಸ್ತರಿಸಬಹುದೆನ್ನುವ ಸಂಶೋಧನೆ, ಪ್ರಯೋಗ ಈ ತಂಡದ್ದು. ಮೊದಲ ತಂಡದ ಕಸಿ ಮಾಡಿದ ಜೀವಕೋಶಗಳನ್ನು ತೆಗೆದುಕೊಂಡು, ಅದಕ್ಕೆ ಎರಡನೆ ತಂಡದ ಫಲಿತಾಂಶವನ್ನು ಸಮೀಕರಿಸಿ ನಂತರ ಕಣ್ಣು, ಕೈ, ಹೃದಯದಂತಹ ಕೆಲವು ಉದಾಹರಣೆಗಳನ್ನು ಬಳಸಿ, ಈ ತತ್ವಗಳು ಕಾರ್ಯ ನಿರ್ವಹಿಸುತ್ತವೆಯೇ ಇಲ್ಲವೇ ಎಂಬುದನ್ನು ಖಚಿತ ಪಡಿಸಿಕೊಳ್ಳುವುದು, ಸಾಧಿಸಿ ತೋರಿಸುವುದು ಈ ತಂಡದ ಗುರಿಯಾಗಿದ್ದ ಕಾರಣ ಎಲ್ಲರಿಗೂ ಇಲ್ಲಿ ವಿಶೇಷ ಆಸಕ್ತಿ. ಹಸ್ತವೊಂದನ್ನು ಉದಾಹರಣೆಯಾಗಿಟ್ಟುಕೊಂಡು ಹೇಗೆ ಅದು ಹೆಚ್ಚುಕಾಲ ತನ್ನನ್ನೆ ಜೀವಂತವಾಗಿಟ್ಟುಕೊಳ್ಳುತ್ತದೆಂಬುದನ್ನು ನಿರೂಪಿಸುತ್ತ ಇದೇ ಮಾದರಿ ಎಲ್ಲಾ ಅಂಗಾಗಗಳಲ್ಲು ಪುನರಾವರ್ತಿಸಬಹುದೆಂದು ವಿವರಿಸಲಾಯ್ತು. ಅಲ್ಲೂ ಎಲ್ಲರಲ್ಲೂ ಕುತೂಹಲ ಮೂಡಿಸಿದ್ದು – ಕಡಿದು ಹಾಕಿದ್ದ ಬೆರಳಿನ ಭಾಗವೊಂದು ತಂತಾನೆ ಮತ್ತೆ ಚಿಗುರಿಕೊಂಡಂತೆ ಬೆಳೆದು ಮೊದಲಿನ ಆಕಾರಕ್ಕೆ ಕುದುರಿಕೊಂಡಿದ್ದು. ಈ ಬಾರಿ ಮತ್ತೆ ಗೌತಮ ವೇದಿಕೆಗೆ ಬಂದು ಈ ಸಂಶೋಧನೆಯ ಸಾಧಕಭಾಧಕತೆ , ಮಿತಿಗಳನ್ನು ವಿವರಿಸಿದ ನಂತರ ಮುಂದಿನ ನಾಲ್ಕನೇ ತಂಡದ ಸರದಿ. ಇದರ ನಾಯಕತ್ವ ಗೌತಮನದೆ ಆದ ಕಾರಣ ಅವನೆ ಮುಂಚೂಣಿಯಲ್ಲಿ ನಿಂತು ವಿವರಿಸತೊಡಗಿದ.

ನಾಲ್ಕನೇ ತಂಡವಾಗಿ ಪ್ರತಿಯೊಂದರ ಗುಣಮಟ್ಟ ಮಾಪನೆ ಮತ್ತು ಸಂಯೋಜಿತ ಮೇಲುಸ್ತುವಾರಿ ನೋಡಿಕೊಳ್ಳುತ್ತಿದ್ದ ಜವಾಬ್ದಾರಿಯನ್ನು ವಿವರಿಸಿದ ಗೌತಮ ತಮ್ಮ ತಂಡದ ನಿಜವಾದ ಕಾರ್ಯ ಇನ್ನು ಮುಂದಿನ ಹಂತದಲ್ಲಿ ಎಂದು ವಿವರಿಸುತ್ತ, ಆ ಹಂತದಲ್ಲಿ ಏನು ಮಾಡಲಿದೆ ಎನ್ನುವುದನ್ನು ಸಾಂಕೇತಿಕವಾಗಿ ಚಿತ್ರಿಸತೊಡಗಿದ. ಅದಕ್ಕೂ ಮುನ್ನ ಇದುವರೆಗೂ ನಡೆದ ಕಾರ್ಯಗಳು ಮೊದಲಿನ ಹಂತದ್ದಾಗಿ ಕೇವಲ ನಾಲ್ಕು ತಂಡಗಳಿಗೆ ಸೀಮಿತವಾಗಿದ್ದ ಹಿನ್ನಲೆ ವಿವರಿಸುತ್ತ, ಮುಂದಿನ ಮಹಾನ್ ಹಂತದಲ್ಲಿ ಮಿಕ್ಕವರೆಲ್ಲರೂ ಸಕ್ರೀಯವಾಗಿ ಪಾಲ್ಗೊಳ್ಳಬೇಕಾದ ಮಾಹಿತಿ ನೀಡುತ್ತ ತನ್ನ ವಿಶಾಲ ಕಾರ್ಯಯೋಜನೆಯನ್ನು ಬಿಚ್ಚಿಡತೊಡಗಿದ. ಸಾರಾಂಶದಲ್ಲಿ ಮೊದಲ ಹಂತದ ಫಲಿತಾಂಶಗಳನ್ನೆ ಮೂಲ ಸರಕಾಗಿ ಬಳಸುತ್ತ ಮಿಕ್ಕವರೆಲ್ಲರೂ ತಂತಮ್ಮ ವಿಭಾಗದಲ್ಲಿ ಕಾರ್ಯ ಮುಂದುವರೆಸಬೇಕಿತ್ತು. ಅದನ್ನು ಸಮಗ್ರ ರೂಪದಲ್ಲಿ ಆಯೋಜಿಸಿ, ಪರೀಕ್ಷಿಸುವ ಕಾರ್ಯವನ್ನು ನಾಲ್ಕನೇ ತಂಡ ಮುಂದುವರೆಸಲಿತ್ತು. ಎಲ್ಲಾ ತಾಂತ್ರಿಕ ವಿಷಯಗಳನ್ನು ವಿವರಿಸುತ್ತ ಕೊನೆಗೆ ಮುಂದಿನ ಹಂತದ ಕಾರ್ಯಯೋಜನೆಯನ್ನು ಸಾಧಿಸಬೇಕಾದ ಗುರಿಗಳ ಸಾರರೂಪದಲ್ಲಿ ಮಂಡಿಸಿದ ಗೌತಮ;

– ಮೊದಲ ಹಂತದ ಫಲಿತ ಬಳಸಿ ಪ್ರತಿ ಅಂಗಾಂಗಗಳನ್ನು ಹೊಸತಾಗಿ ನಿರ್ಮಿಸುವುದು

– ಎಲ್ಲವನ್ನು ಒಗ್ಗೂಡಿಸಿ ಮಾನವ ಜೀವಿಯಾಗಿಸಿ ಅದು ಸಮಷ್ಟಿತ ರೂಪದಲ್ಲಿ ಕಾರ್ಯ ನಿರ್ವಹಿಸುವಂತೆ ಮಾಡುವುದು

– ಹಾಗೆ ಕ್ರೋಢೀಕರಿಸಿದ ಮಾದರಿಯನ್ನು ‘ಅಹಲ್ಯೆ’ಯೆಂಬ ಹೆಸರಿನ ಜೀವಿಯಾಗಿಸಿ ಭುವಿಯ ವಾತಾವರಣದಲ್ಲಿ ಒಂದು ಜೀವಿತ ಕಾಲ ಪರೀಕ್ಷಿಸುವುದು

– ಕೊನೆಗೆಲ್ಲವನ್ನು ಸೂಕ್ಷ್ಮಾತಿಸೂಕ್ಷ್ಮ ಸೂತ್ರ ಬೀಜರೂಪಕ್ಕೆ ಪ್ರಕ್ಷೇಪಿಸಿ ವೀರ್ಯಾಣು, ಅಂಡಾಣುಗಳ ಮಟ್ಟಕ್ಕೆ ಬೇರ್ಪಡಿಸಿಟ್ಟು ಅಹಲ್ಯಾ ಸಂತಾನ ಅಥವಾ ಮುಂದಿನ ಸಂತತಿಯ ಆಯ್ದ ಮಾನವ ಜೀವಿಗಳಲ್ಲಳವಡಿಸಿ, ಸೃಷ್ಟಿಕ್ರಿಯೆಯ ನಿಯಂತ್ರಿತ ಸ್ವಯಂಚಾಲಿಕತ್ವವನ್ನು ಸಾಧಿಸುವುದು.

– ಭುವಿಯ ಸುತ್ತಲಿನ ಚರಾಚರ ಪರಿಸರದ ಮಟ್ಟದಲ್ಲಿ ಅದು ಹೊಂದಿಕೊಳ್ಳುವಂತೆ ಸೂಕ್ತವಾಗಿ ಮಾರ್ಪಡಿಸುವುದು.

– ಈ ಸೃಷ್ಟಿಕ್ರಿಯೆ ಸರ್ವತಂತ್ರ ಸ್ವತಂತ್ರವಾಗಿ, ಸ್ವಯಂ ನಿಯಂತ್ರಿತವಾಗಿ, ಸ್ವಯಂಚಾಲಿತವಾಗಿ ನಡೆಯುವಂತೆ ಬೇಕಾದ ಸಾಮಾಜಿಕ ಪರಿಸರ, ನೀತಿ ಸಂಹಿತೆ ಮತ್ತಿತರ ಪೂರಕಾಂಶಗಳನ್ನು ಆಯೋಜಿಸುವುದು.

ಇಷ್ಟೆಲ್ಲ ಆದ ಮೇಲೆ ಎಲ್ಲರಿಗು ತಮ್ಮ ಮುಂದಿನ ಹಂತದ ಹೊಣೆಗಾರಿಕೆಯನ್ನು ಮನವರಿಕೆ ಮಾಡಿಕೊಟ್ಟು ನಂತರ ಸಭೆ ಮುಕ್ತಾಯವಾಗಿತ್ತು – ದೊಡ್ಡ ಔತಣಕೂಟದೊಂದಿಗೆ.

(ಇನ್ನೂ ಇದೆ)

00712. ಯಾರು ಕೇಳುವರಿಲ್ಲಿ ಅಳಲು ? (3K Photo Kavana 38)

00712. ಯಾರು ಕೇಳುವರಿಲ್ಲಿ ಅಳಲು ?
____________________________

ದಿನ ನಿತ್ಯ ಚೀರುತಲೆ ಇರುವೆ
‘ಸಹಾಯಾ ಸಹಾಯಾ’ ನಾ ಅಬಲೆ
ಬರುವವರಾರಿಲ್ಲಿ ಅಸಹಾಯಕತೆ
ಧಾವಿಸಿ ಬರುವರೆಲ್ಲ ಅತ್ಯಾಚಾರಕೆ..
ಬಂದು ಅರೆಗಳಿಗೆಯೂ ವಿಶ್ರಮಿಸರು
ದುರುಳ ದುಶ್ಯಾಸನರು, ದುಶ್ಯಲೆಯರು
ಬಿಚ್ಚುವರೆನ್ನ ಮೇಲ್ವಸ್ತ್ರ ಸರಸರ ನಡುಬೀದಿ
ಗಣಿಸದೆ ಹಚ್ಚುವರು ದೀಪ ಹಾಡಹಗಲೇ
ಮುಟ್ಟುವರು ಕುಟ್ಟುವರು ಸವರಿ ನೇವರಿಸಿ
ಕಾಡಿ ಕೆಣಕಿ ಹೆಣಗಾಡಿಸಿ ಕೇಳುತ
ನೂರೆಂಟು ಪ್ರಶ್ನೆ ಉತ್ತರ ಚಿತ್ತಾರ
ಬರೆದೇನೆಲ್ಲ ಬಗೆ ಬಗೆ ಬೆತ್ತಲೆ ಮೈ ಮೇಲೆ,
ಕನಿಷ್ಠ ಗೌರವಕೂ ಕೇಳದೆ ಅನುಮತಿಯ..
ಸುಸ್ತಾಗಿ ಕುಗ್ಗಿ ಕುಸಿದರು ಬಿಡರು..
ಮದ್ದು ಕುಡಿಸಿ ಮತ್ತೆ ಮತ್ತೆ ತಿರಿಯುವ ಜನರು
ಗಣಕವೆನ್ನುತ ಗಂಟೆ ದಿನ ವಾರ ತಿಂಗಳು ವರ್ಷ
ಎರಗಿಹರೆನ್ನ ಮೇಲೆ ಸತತ ಸಾಮೂಹಿಕ ಸ್ವಾರ್ಥ
ಮಂದಗತಿಗೆ ಬೈದು, ವೇಗದೆ ಓಡಿದಾಗ ನಿರ್ಲಕ್ಷ್ಯ;
ಕೊನೆಗೊಂದು ದಿನ ಸಾಕಾಗಿ ಬಸವಳಿದು ಬಿದ್ದು
ಬೇಡಿದೆ, ಕೂಗಿದೆ, ಅರಚಿದೆ, ಸಹಾಯಕೆ…
ದುರ್ವಿಧಿಯೇ ! ಮೂಲೆಗೆತ್ತೆಸೆದು ನನ್ನ ಅಕಟಕಟ..
ಕೊಂಡುಕೊಂಡರು, ಹೊಸದೊಂದು ಕಂಪ್ಯೂಟರನ್ನ ..!

– ನಾಗೇಶ ಮೈಸೂರು

00711. ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ..

00711. ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ..
____________________________

ಹೂವಲ್ಲೂ ಗಂಡು ಹೂ ಮತ್ತು ಹೆಣ್ಣು ಹೂವಿರುವುದು ಸಾಮಾನ್ಯ ಜ್ಞಾನವಲ್ಲ. ಬಹುಶಃ ವಿಜ್ಞಾನದ ಕಲಿಕೆಯಲಿ ತೊಡಗಿರುವವರಿಗೆ ಗೊತ್ತಿರಬಹುದಾದರೂ, ಕವಿ ಕಲ್ಪನೆಯ ಮೂಸೆಯಲ್ಲಿ ಹೂವೆಂದರೆ ಹೆಣ್ಣಿನ ರೂಪವೆ ಕಣ್ಮುಂದೆ ಬಂದು ನಿಲ್ಲುತ್ತದೆ. ಕವಿಯತ್ರಿಗಳೂ ಸಹ ಹೆಚ್ಚು ಕಡಿಮೆ ಇದೆ ಅರಿವಿನ ಮೂಸೆಯಲ್ಲೆ ಕಾವ್ಯ ಹೊಸೆಯುವಂತೆ ಭಾಸವಾಗುತ್ತದೆ. ಈ ಗುಂಪಿನಲ್ಲಿ ಬಹುತೇಕ ಹೂವೆಂದರೆ ಹೆಣ್ಣಿನ ಪ್ರತೀಕವಾಗಿಬಿಡುತ್ತದೆ, ಗಂಡಿನ ಪ್ರತೀಕವಾಗಿ ಹಿಡಿಶಾಪ ಹಾಕಿಸಿಕೊಳ್ಳುವ ಬಡಪಾಯಿ ಪಾಪಾ ದುಂಬಿ!

ಈ ಜೋಡಿ ಕವನಗಳಲ್ಲಿ ಮೊದಲನೆಯದು ‘ಹೂವಲ್ಲೂ ಹೆಣ್ಣು ಗಂಡಿದೆ, ಗೊತ್ತಾ?’ ಈ ವಿಸ್ಮಯವನ್ನು ಬಿಟ್ಟಗಣ್ಣಿಂದ ನೋಡುತ್ತಾ, ನಮ್ಮ ಅರ್ಧನಾರೀಶ್ವರನಂತೆ ಒಂದೆ ಹೂವಿನೊಳಗೆ ಗಂಡು ಭಾಗ ಮತ್ತು ಹೆಣ್ಣು ಭಾಗ ಎರಡೂ ಇರುವ ವಿಚಿತ್ರವನ್ನು ಎತ್ತಿ ತೋರಿಸುತ್ತದೆ. ತಂತಾನೆ ಪರಾಗ ಸ್ಪರ್ಶ ಮಾಡಿಕೊಂಡು , ತಾನೆ ಸಂತತಿಯ ಸೃಷ್ಟಿಸುವ ಹರಿಕಾರನಾಗುವ ಹೂವಿಗೆ ಮತ್ತೊಂದು ಲಿಂಗವನ್ಹುಡುಕುವ ಪ್ರಮೇಯವೆ ಇಲ್ಲದೆ ಎಲ್ಲಾ ಕೂತಲ್ಲೆ ನಡೆಯುವ ಸರಾಗ ಬಂಧ, ಮತ್ತದರ ವರ್ಣನೆ ಈ ಪದ್ಯ.

ಎರಡನೆ ಕವನ ‘ಹೂವೊಳಗಿನ ಪುಲ್ಲಿಂಗ, ಸ್ತ್ರೀಲಿಂಗ’ ಇರುವ ವೈಚಿತ್ರದ ಕುರಿತೆ ಚಿತ್ರಿಸಿದರೂ, ಇಲ್ಲಿ ಒಂದೆ ಮರದಲಿರುವ ಪುಲ್ಲಿಂಗ, ಸ್ತ್ರೀಲಿಂಗಗದ ಹೂಗಳು, ಒಂದೆ ಕೊಂಬೆಯಲ್ಲಿರುವ ಸಜಾತಿಯ ಯಾ ವಿಜಾತಿಯ ಗುಂಪುಗಳು ಅಥವಾ ಒಂದೆ ಬಳ್ಳಿಯಲ್ಲಿರುವ ಗಂಡು ಮತ್ತು ಹೆಣ್ಣು ಹೂಗಳ ಚಿತ್ರಣ; ಆದರೆ ಒಂದೆ ಹೂವಿನೊಳಗಿರುವ ಅರ್ಧನಾರೀಶ್ವರ ಹೂ ಮಾತ್ರ ಈ ಗುಂಪಲಿ ಬೆರೆಯುವುದಿಲ್ಲ. ಅದು ಮೊದಲ ಪದ್ಯದಲ್ಲಿ ಮಾತ್ರ ನಿರೂಪಿತ.

ಹೂವಲ್ಲೂ ಹೆಣ್ಣು ಗಂಡಿದೆ ಗೊತ್ತ?
____________________________

ಅಕ್ಕ ನಿನಗೊಂದು ವಿಷಯ ಗೊತ್ತ
ಹೂವಲ್ಲೂ ಗಂಡು ಹೆಣ್ಣಿರುವ ಸತ್ಯ ?
ಒಂದೆ ಗಿಡದಲ್ಲೆ ಎರಡಿರುವ ದೃಶ್ಯ..
ಒಂದೆ ಹೂವಲ್ಲೆ ಇಬ್ಬರಿರೊ ಲಾಸ್ಯ ?||

ಅಚ್ಚರಿ ಪೆಚ್ಚು ಕುರಿ ಏಕೇಳು ಕಣ್ಣುರಿ ?
ಸೃಷ್ಟಿ ವೈಚಿತ್ರ ಎಷ್ಟೊ ಜಾಣ ಮರಿ
ಹೂವೆಂದರೆ ಹೆಣ್ಣೆನ್ನೆ ಅದರ ತಪ್ಪಲ್ಲ
ಗಂಡುವ್ವ ಗಮನಿಸದ ಬೆಪ್ಪೆ ನಾವೆಲ್ಲ ||

ಹೆಣ್ಣ ರೂಪವನಕ್ಕ ಹೂವಾಗಿಸಿ ನಕ್ಕ
ಕವಿ ಸಾರ್ವಭೌಮನೇನಲ್ಲ ಸರಿ ಪಕ್ಕ
ಗಂಡ್ಹೂವ್ವ ನೋಡಿದ ಕವಿಯತ್ರಿ ದಕ್ಕ
ಕವಿಯ ನಡುವೆ ಕವಿಯತ್ರಿಗೆ ಚೊಕ್ಕ ||

ಅರ್ಧನಾರಿಶ್ವರನಕ್ಕ ಹಂಚಿ ತನು ತಕ್ಕ
ನಡೆಸಿ ಸುಖ ಸಂಸಾರ ಸಂತತಿ ದಕ್ಕ
ಸಂಯೋಗ ಪರಾಗ ಸ್ವಕೀಯ ಸ್ಪರ್ಶ
ತನ್ನೊಡಲಲೆ ತನ್ನ ರೇಣು ಗರ್ಭ ಹರ್ಷ ||

ಪ್ರೀತಿ ಅಪರಿಮಿತವೆನ್ನಿ ಅಸಂಕರವೆನ್ನಿ
ತನ್ನ ಪಾಡಿಗೆ ತಾನೆ ವಂಶೋತ್ಪತ್ತಿ ದನಿ
ಒಂದಾಗಿ ಬೆರೆತ ಜೀವಗಳುದಾಹರಣೆ
ಬೇರೆಲ್ಲಿ ಸಿಕ್ಕೀತು ಗಂಢಭೇರುಂಡ ಕಣೆ ||

——————————————————————
ನಾಗೇಶ ಮೈಸೂರು
——————————————————————

ಹೂವೊಳಗಿನ ಸ್ತ್ರೀಲಿಂಗ ಪುಲ್ಲಿಂಗ
_______________________________

ಅಕ್ಕ ಈ ಗಿಡ ಬರಿ ಗಂಡು, ಬರಿ ಹೆಣ್ಣು
ಆದರು ನೋಡ್ಹೇಗೆ ಒಂದೆ ಬಳ್ಳಿ ಗಿಣ್ಣು
ಒಂದೆ ತಾಯ್ಬಳ್ಳಿ ತಾಳಿ ಕಟ್ಟಿದ ಬಂಧ
ಇದು ಕೂಡ ಸ್ವಕೀಯ-ಸ್ಪರ್ಶ ಸಂಬಂಧ ||

ಇಲ್ಲು ಮರೆತುಬಿಡಕ್ಕ ಸಹಜಾತ ಸಖ್ಯ
ವಂಶ ಪರಂಪರೆ ಮುಂದುವರಿಕೆ ಮುಖ್ಯ
ಗಾಳಿ ಚಿಟ್ಟೆ ದುಂಬಿ ಪತಂಗ ಸಂವಾಹಕ
ಜೋಡಿಸಿಟ್ಟಿಹನ್ಹೀಗೆ ಜಗಕೆ ನಿರ್ಮಾಪಕ ||

ಅಲ್ನೋಡು ನಮ್ಮಂತೆ ಬೇರೆ ಗಿಡದ್ಹೂವು
ಗಂಡಲ್ಲಿ ಹೆಣ್ಣಲ್ಲಿ ಚೆಲ್ಲಾಡೀ ಚದುರಿದವು
ಗಾಳಿ ನೀರಿಂದ್ಹಿಡಿದು ಚಿಟ್ಟೆ ಜುಟ್ಟಾಡಿಸಿ
ಬೆಳೆಸೆ ವಂಶವಾಹಿ ವೈವಿಧ್ಯ ಚೌಕಾಸಿ ||

ಅಕ್ಕ ವಿಚಿತ್ರ ನೋಡು ಸಂತತಿ ಕಾವು
ಈ ಗಿಡದ ತುಂಬೇಕೆ ಬರಿ ಗಂಡು ಹೂವು
ಅಲ್ಲೊಂದಿಲ್ಲೊಂದರಂತೆ ಅರಳಿದ ಹೆಣ್ಣು
ಮಿಕ್ಕೆಲ್ಲ ಕೊಂಬೆ ಗೊಂಚಲು ಗಂಡ ಕಣ್ಣು ||

ಕೆಲ ಎಲೆಗಳೇ ಹೂವಾಗುವ ವಿಸ್ಮ್ಮಯ
ಬಣ್ಣಗಳೆ ಬದುಕಾಗುವ ಜೀವನ ಮಾಯ
ಹೆಣ್ಣು ಹೂವಷ್ಟೆ ಸಂತಾನ ಭಾಗ್ಯ ನಿಸರ್ಗ
ಮತ್ತೆಲ್ಲಾಕರ್ಷಣೆ ಹಿಡಿದಿಡಿಸೆ ಸಂಸರ್ಗ ||

——————————————————————
ನಾಗೇಶ ಮೈಸೂರು
——————————————————————

00710. ಫ್ರೈಡೆ ದ ಥರ್ಟೀನ್ !

00710. ಫ್ರೈಡೆ ದ ಥರ್ಟೀನ್ !
________________________

ಶುಕ್ರವಾರ ಮತ್ತು ಹದಿಮೂರನೆ ತಾರೀಕು ಜತೆಯಾಗಿ ಬಂದರೆ ಅಶುಭವೆನ್ನುವ ನಂಬಿಕೆ ಪಾಶ್ಚಾತ್ಯರಲ್ಲಿದೆ. ಜತೆಗೆ ಹದಿಮೂರು ಒಂದು ರೀತಿಯ ಅಶುಭ ಸಂಖ್ಯೆ ಸಹ. ಹೀಗಾಗಿ ದೊಡ್ಡ ಕಟ್ಟಡಗಳಲ್ಲಿ ಹದಿಮೂರನೆ ಅಂತಸ್ತೆ ಕಾಣೆಯಾಗಿ ಹನ್ನೆರಡರ ನಂತರ ಹದಿನಾಲ್ಕಕ್ಕೆ ನೆಗೆದುಬಿಡುತ್ತದೆ! ಹದಿಮೂರು ಭೌತಿಕವಾಗಿದ್ದರು ಹದಿನಾಲ್ಕರ ನಾಮಧೇಯ ಅಲಂಕರಿಸಿ ಪಾಪಮುಕ್ತವಾಗಿಬಿಡುತ್ತದೆ. ಇನ್ನು ಕೆಲವೆಡೆ ಆ ಅಂತಸ್ತು ಯಾವುದೊ ಕಮ್ಮಿ ಪ್ರಾಮುಖ್ಯತೆಯ ಕೆಲಸಕ್ಕೆ ಬಳಕೆಯಾಗಿ ಯಾರೂ ವಾಸಿಸದ ಅಂತಸ್ತಾಗಿಬಿಡುತ್ತದೆ. ಅದೆಲ್ಲದರ ಕೆಲವು ತುಣು’ಕಾಟ’ಗಳ ಲಹರಿ ಈ ಕೆಳಗೆ 😊😜

(೦೧)
ಥರ್ಟೀನ್ತ್ ಫ್ರೈಡೆ
ಪಾಶ್ಚಾತ್ಯರ ಪಾಲಿಗೆ
– ಗುಡ್ಡದ ಭೂತ.

(೦೨)
ವಿಚಿತ್ರ ನಂಬೆ
ಶುಕ್ರವಾರ ಹದ್ಮೂರು
– ತಿಕ್ಕಲು ಮನ.

(೦೩)
ಎಲಿವೇಟರು
ಗುಂಡಿ ಒತ್ತುವ ಹೊತ್ತು
– ಹದಿಮೂರಿಲ್ಲ!

(೦೪)
ಚೈನಾದಲ್ಯಾಕೊ
ಹದಿಮೂರರ ಜತೆ
– ನಾಲ್ಕು ನಾಪತ್ತೆ..!

(೦೫)
ಮುಚ್ಚೆ ಸುಲಭ
ಹನ್ನೆರಡಾದ ಮೇಲೆ
– ಬರಿ ಹದ್ನಾಲ್ಕು 😜

(೦೬)
ಮನೆ ನಂಬರು
ಹದಿಮೂರನೆ ಪ್ಲೋರು
– ಯಾಕೆ ಬೇಕಿತ್ತು ?😛

(೦೭)
ಭೀತಿಯೇ ಇಲ್ಲ
ಅಷ್ಟು ಮಹಡಿ ಮನೆ
– ನಾವು ಕಟ್ಟೊಲ್ಲ 😎

(೦೮)
ನಂಬದಿದ್ದರೂ
ಅಂಜಿ ಒಳಗೊಳಗೆ
– ಹುಷಾರಿನಲಿ 😟

(೦೯)
ಮೂಗಿಗೆ ತುಪ್ಪ
ನಂಬರು ಬದಲಿಸಿ
– ಫ್ಲಾಟು ಮಾರಾಟ !

(೧೦)
ಮೂಡನಂಬಿಕೆ
ಅಲ್ಲಗಳೆಯುತಲೇ
– ಮನದೆ ಭೀತಿ.

– ನಾಗೇಶ ಮೈಸೂರು.

(Picture from : https://en.m.wikipedia.org/wiki/File:Freitag_der_13._im_Kalender.jpg)

00709. ಕೇಜ್ರಿ, ಸರ್ಟಿಫಿಕೇಟು ಇತ್ಯಾದಿ..

00709. ಕೇಜ್ರಿ, ಸರ್ಟಿಫಿಕೇಟು ಇತ್ಯಾದಿ..
____________________________________

ಕೇಜ್ರಿವಾಲ ಕಿಲಾಡಿ, ಬರಿ ಮಾಡಿಹನೆಲ್ಲರನು ಅನಾಡಿ
ಡಿಗ್ರಿ ಸರ್ಟಿಫಿಕೇಟು ನೆಪದೆ, ಎಸೆಯುತಾ ಮಂಕುಬೂದಿ
ಮುಳುಗೊ ಕಾಂಗ್ರೆಸ್ ಹಡಗು, ಚಾಣಾಕ್ಷ್ಯ ರಾಜನೀತಿ ಸೃಜಿಸಿ
ಮಾಡಿಹ ತನ್ಹೆಸರ ಪರ್ಯಾಯ, ಕುಂಟುನೆಪದೆ ವಿಜೃಂಭಿಸಿ ! ||

ಕುರಿಗಳಾಗದಿರಿ ಸುಮ್ಮನೆ, ಸೋಶಿಯಲ್ ಮೀಡಿಯಾ ಪಡೆ
ಬರೆದಷ್ಟೂ ಕೀರ್ತಿ ಅವಗೆ, ನೀವ್ಹಿಡಿಯುವಿರಿ ಮೂರ್ಖರ ಜಾಡೆ
ಬರೆಯದೆ ಸುಮ್ಮನಿರೆ ಸಾಕು, ಮೈ ಪರಚಿಕೊಳುವ ಕೆರಳಿ
ಅರಚರಚಿ ಸುಸ್ತಾಗಿ ಕೊನೆಗೆ, ತನ್ನ ಬಾಲ ಮುದುರುವ ನರಳಿ ! ||

– ನಾಗೇಶ ಮೈಸೂರು

00708. ತುಣು’ಕಾಟ’ಗಳ ತಿಣುಕಾಟ..

00708. ತುಣು’ಕಾಟ’ಗಳ ತಿಣುಕಾಟ..
__________________________

(೦೧)
ತಿಥಿ ಅತಿಥಿ
ತಿಂದಾಗಷ್ಟೆ ಸದ್ಗತಿ
– ಕರ್ಮದ ಭೀತಿ.

(೦೨)
ಧಾರಾಳ ಮನ
ಖರ್ಚು ಮಾಡೇ ಸಮೃದ್ಧ
– ಆರ್ಥಿಕ ಬಿಡ.

(೦೩)
ಕನಸು ಕಾಣೆ
ಕಾಸಿಲ್ಲ ಸಂಭ್ರಮಿಸೆ
– ನನಸು ಜಾಣೆ.

(೦೪)
ಕನಸು ಕಟ್ಟಿ
ಏಣಿಯ ಹಾಕಿ ನಡೆ
– ನನಸು ಗಟ್ಟಿ.

(೦೫)
ಮನ ಬಗ್ಗಡ
ಕಾಣಿಸದಲ್ಲ ಸದ್ಯ
– ಕೊಳಕು ನಾಗ.

(೦೬)
ಜಾಣೆ ಸುಂದರಿ
ಅರಸಿತು ಮನ ಭ್ರಮೆ
– ಬರಿ ದಿಗ್ಬ್ರಮೆ.

(೦೭)
ಪರಿಪೂರ್ಣತೆ
ಯಾರಲ್ಲಿಲ್ಲದ ಸ್ವತ್ತು
– ಹುಡುಕೊ ವ್ಯರ್ಥ.

(೦೮)
ಅರ್ಥ ಮಾಡಿಕೊ
ದೌರ್ಬಲ್ಯ ಸಹಜತೆ
– ಒಪ್ಪಿ ಅಪ್ಪಿಕೊ.

(೦೯)
ಸ್ನೇಹ ಪ್ರೀತಿಯ
ಗೆರೆ ದಾಟಲು ಅಡ್ಡಿ
– ನೀತಿ ಸಂಹಿತೆ.

(೧೦)
ಬರೀ ಷರತ್ತು
ಪ್ರೀತಿ ಪ್ರೇಮದ ವಸ್ತು
– ಯುಗದ ಮಾತು.

– ನಾಗೇಶ ಮೈಸೂರು

(Picture source: http://www.activityvillage.co.uk/autumn-collage)

00707. ತುಣು’ಕಾಟ’ಗಳು…

00707. ತುಣು’ಕಾಟ’ಗಳು…
_______________________

(೦೧)
ಕೇಳದೆ ಕೊಟ್ಟು
ಕೇವಲವಾಗೊ ದುಃಖ
– ತಡೆದು ಹಿತ.

(೦೨)
ದೂರವಿರಿಸಿ
ದೂರವಾಗೆ ದೂಷಿಸೆ
– ಶೋಷಿತ ಮನ.

(೦೩)
ಸಂವಹಿಸದೆ
ಮೌನ ಧರಿಸೊ ಪಾತ್ರ
– ಕಲ್ಪನೆ ಕೊಳ್ಳೆ.

(೦೪)
ಮುನವೇ ಸುಳ್ಳು
ಮಾತಿರದ ಗಳಿಗೆ
– ಕಾಲ ಸತ್ತಾಗ.

(೦೫)
ಯೋಚಿಸುತಲೆ
ಊಹಿಸೊ ತಲೆ ಒಲೆ
– ಪ್ರಮಾದಕರ.

(೦೬)
ನಡೆವ ಮುನ್ನ
ನಡೆಯಬಹುದೇನು
– ಚಿಂತಿಸೇ ಸುಸ್ತು.

(೦೭)
ಮನ ವಾಗ್ಯುದ್ಧ
ವಾದ ಪ್ರತಿವಾದಕೆ
– ಅದೇ ಫಲಿತ.

(೦೮)
ಜಗಳ ನೆಪ
ನೂರೆಂಟು ಒಳಗುದಿ
– ಕಕ್ಕಿಸಿ ವಿಷ.

(೦೯)
ದೂರವಿಟ್ಟಳು
ದೂರಾಗಳು ಮನದೆ
– ನಿಶ್ಚಲ ಚಿತ್ರ.

(೧೦)
ತುಚ್ಛಿಕರಿಸಿ
ಕಡೆಗಣಿಸಿದರು
– ಶುಭ ಹಾರೈಕೆ.

– ನಾಗೇಶ ಮೈಸೂರು

00706. ಮಂಕುತಿಮ್ಮನ ಕಗ್ಗ – ಟಿಪ್ಪಣಿ ೦೦೭ ( readoo Kannada on 12.05.2016)

00706. ಮಂಕುತಿಮ್ಮನ ಕಗ್ಗ – ಟಿಪ್ಪಣಿ ೦೦೭ ( readoo Kannada on 12.05.2016)

ಕಗ್ಗಕೊಂದು-ಹಗ್ಗ-ಹೊಸೆದು-4

ಕಗ್ಗಕೊಂದು ಹಗ್ಗ ಹೊಸೆದು…

00705. ಕಥಾಲೋಕ, ಚರಿತ್ರೆಯ ಪುಟ…

00705. ಕಥಾಲೋಕ, ಚರಿತ್ರೆಯ ಪುಟ…
___________________________

(೦೧)
ಅದ್ಬುತ ಗೊತ್ತ !
ಅಲ್ಲಾವುದ್ದೀನ್ ದೀಪ
– ಹುಡುಕಿದ್ದೇನೆ.

(೦೨)
ಏಳು ಸಮುದ್ರ
ದಾಟಿ ಬಂದರು ಇಲ್ಲ
– ರಾಜಕುಮಾರಿ.

(೦೩)
ಕುದುರೆ ಏರಿ
ಕನಸಿಗೆ ಹೊಕ್ಕರು
– ನಂಬದ ಮನ.

(೦೪)
ಆಣೆ ಪ್ರಮಾಣ
ಮಾಡದ ಜಾಣತನ
– ಪ್ರಾಮಾಣಿಕತೆ.

(೦೫)
ಈಗಿಲ್ಲ ಪ್ರಶ್ನೆ
ಪ್ರೇಮಕ್ಕೂ ಪರ್ಮಿಟ್ಟೇನು?
– ಇಲ್ಲ ಲಿಮಿಟ್ಟು.

(೦೬)
ಅಂತಃಪುರದ
ಹೆಣ್ಣು ಮನ ಅತ್ತರು
– ವಾಸನೆಯಿಲ್ಲ.

(೦೭)
ದಂಡಿನ ಧಾಳಿ
ಗೆದ್ದಾ ಸಂಪತ್ತಿನಲಿ
– ಜನಾನ ಭರ್ತಿ.

(೦೮)
ಕಲಿಗಳವರು
ಕಲಿತ ವಿದ್ಯೆ ತೋರೆ
– ಮರೆತ ಮನೆ.

(೦೯)
ಶಹಜಾದೆಯ
ದಿನಕ್ಕೊಂದು ಕಥೆಗೆ
– ನಾ ಜಹಪಾನ.

(೧೦)
ನೀತಿ ಹೇಳುವ
ಈಸೋಪನ ಕಥೆಗೆ
– ಒಗ್ಗದ ಬಾಳು.

– ನಾಗೇಶ ಮೈಸೂರು

(Picture source: https://en.m.wikipedia.org/wiki/File:Prince_Salim_(the_future_Jahangir)_and_his_legendary_illicit_love.jpg)

00704. ನೋವು ನಲಿವು….

00704. ನೋವು ನಲಿವು….
______________________

(೦೧)
ಜೀವನದೂಟ
ಬಡಿಸೆ ಬರಿ ನೋವು
– ನಂಚಿಕೊ ನಗು.

(೦೨)
ನೋವು ನಲಿವು
ಕಿಲಾಡಿ ನಿಯಾಮಕ
– ಮರೆಯ ಬಿಡ.

(೦೩)
ಗಟ್ಟಿ ಹೃದಯ
ಎದುರಿಸಿದ್ದು ಕಷ್ಟ
– ನೀರು ಕಣ್ಣಲ್ಲಿ.

(೦೪)
ಸರಿಸಮಾನ
ಶ್ರೀಮಂತನು ಬಡವ
– ನೋವು ನಲಿವು.

(೦೫)
ಹಮ್ಮು ಮುರಿವ
ಹಣದ ಮದ ಸೊಲ್ಲು
– ಗೆಲ್ಲದು ಜಡ್ಡ.

(೦೬)
ಕಷ್ಟ ಕೋಟಲೆ
ಅನುಭವಿಸೆ ಶಕ್ಯ
– ನೆನೆಯೆ ದುಃಖ.

(೦೭)
ಯಾರಿಗೆ ಯಾರೊ
ಆಗುವ ಸಮಯವೆ
– ಬಾಳ ವಿಸ್ಮಯ.

(೦೮)
ಹೊಡೆದಾಡುತ
ಬಿದ್ದು ಹೋಗುವ ಮುನ್ನ
– ಸಹಾಯ ಹಸ್ತ.

(೦೯)
ಪರರ ಕಷ್ಟ
ಅರಿತಾಗಷ್ಟೆ ಅರ್ಥ
– ಎಷ್ಟು ನಗಣ್ಯ.

(೧೦)
ಕುಗ್ಗಿಸಿ ಬಿಡು
ಸ್ಪ್ರಿಂಗಿನಂತೆ ಪುಟಿದು
– ಸೆಟೆದು ನಿಲ್ಲೆ.

– ನಾಗೇಶ ಮೈಸೂರು

(picture source: http://www.123rf.com/photo_15387483_simple-man-joy-and-sorrow.html)

00703. ಬರೆಸು, ನೋವಲು ನಗೆಯಾ..

00703. ಬರೆಸು, ನೋವಲು ನಗೆಯಾ..
_____________________________

ಕಿತ್ತು ತಿನ್ನುವ ನೋವು
ಅಣಕ ವ್ಯಂಗ್ಯ ವೇದನೆ
ಬೇಕೇಕಾದರು ಬದುಕು ?
ಎಂದನಿಸಿದ ಹೊತ್ತಲು –
ಬರೆದೆ, ಬಿದ್ದು ಬಿದ್ದು ನಗುತ..

ಕಾಡಿತ್ತೇನೊ ನಿರಂತರ
ಬಿಟ್ಟಿದ್ದಾದರು ಯಾರನು ?
ಎಲ್ಲರ ದೋಸೆ ತೂತೆಂದು
ಮುನ್ನಡೆಸಿದಾಗದೇನೊ ಶಕ್ತಿ –
ಬರೆದಿದ್ದೆ, ಎದ್ದು ಬಿದ್ದು ನಗುತ..

ಮುರಿದು ಬಿದ್ದಾ ಕಾಲಿಗೆ
ಪಟ್ಟಿ ಹಚ್ಚುತ್ತಾ ಪಟ್ಟಿಗೆ ಪಟ್ಟಲಿ
ಉಳಿ ಪೆಟ್ಟು ಬಿದ್ದಾಗೆಲ್ಲ ನೋವಿಗೆ
ಅತ್ತು ಚೀರಿದ ಗಳಿಗೆ ಕೂಡ –
ಬರೆದಿದ್ದು, ನಗುವಿನ ಹೂರಣ..

ನೋವಿಂದಲೆ ನಗೆಯೆಂದ
ಬೆಂಕಿಯಿದ್ದೆಡೆ ಹೊಗೆಯೆಂದ
ಗಾದೆ ವೇದಗಳಲೆಲ್ಲ ಅರಸಿಯು
ಸಿಕ್ಕದ ಮುಲಾಮಿನಲು –
ಬರೆದೆ , ಮರೆಮಾಚುತ ಅಳದೆ..

ಇಂದೇಕೊ ಪ್ರಭು ನೀ ಕ್ರೂರ ?
ಯಾಕಳಿಸುವೆ ಆಗಿಸಿ ಎದೆ ಭಾರ ?
ಮಾಡದಿರಯ್ಯ ದುರ್ಬಲ ಹೃದಯ
ಕುಗ್ಗಿಸದಿರಿಂದು ಎದೆಯ –
ಬರಿಸು, ಬರೆಸು ನೋವಲು ಬರಿ ನಗೆಯ..

– ನಾಗೇಶ ಮೈಸೂರು

00702. ಪ್ರಾಜೆಕ್ಟು ಮುಕ್ತಾಯ

00702. ಪ್ರಾಜೆಕ್ಟು ಮುಕ್ತಾಯ…
________________________

ಐಟಿ ಜಗತ್ತಿಗೂ ಪ್ರಾಜೆಕ್ಟುಗಳಿಗು ಅವಿನಾಭಾವ ಸಂಬಂಧ. ಅದರಲ್ಲಿ ತೊಡಗಿಸಿಕೊಂಡವರಿಗೆಲ್ಲ ಪ್ರಾಜೆಕ್ಟಿನ ವಿಶ್ವರೂಪದ ವಿವಿಧ ಮುಖಗಳು ಪರಿಚಿತವೇ. ತಿಂಗಳು, ವರ್ಷಾನುಗಟ್ಟಲೆ ನಡೆಯುವ ಪ್ರಾಜೆಕ್ಟುಗಳ ಜೀವನ ಶೈಲಿಯಿಂದಾಗಿ ಅಲ್ಲಿ ಕೆಲಸ ಮಾಡುವವರಲ್ಲಿ ಹೆಚ್ಚಿನ ಒಡನಾಟವುಂಟಾಗಿ ಎಷ್ಟೊ ಸಖ್ಯ, ಗೆಳೆತನಗಳು ಬೆಳೆಯುವ ಹಾಗೆಯೇ ಮತ್ಸರ, ವಿರಸ, ದ್ವೇಷಗಳ ಕೊಸರು ಉಳಿಸಿಹೋಗುವುದೂ ಉಂಟು. ಒಳ್ಳೆಯದೋ, ಕೆಟ್ಟದ್ದೊ – ಅದೇನೆ ಇದ್ದರು ಪ್ರಾಜೆಕ್ಟಿಗಿರುವ ನಿಶ್ಚಿತ ಆರಂಭ, ಮುಕ್ತಾಯದ ಗುಣದಿಂದಾಗಿ ಒಂದಲ್ಲ ಒಂದು ದಿನ ಪ್ರಾಜೆಕ್ಟಿನ ಅಂತ್ಯ ಸಮೀಪಿಸಿ, ಎಲ್ಲಕ್ಕೂ ಮುಕ್ತಾಯ ಗೀತೆ ಹಾಡಲೆಬೇಕಾದ ಅನಿವಾರ್ಯ ಉಂಟಾಗುತ್ತದೆ – ಎಲ್ಲಾ ಭಾವೋನ್ಮೇಷಕ್ಕು ಲಾಲಿ ಹಾಡಿ ಮಲಗಿಸುವ ಹಾಗೆ. ೨೦೧೨ರಲ್ಲಿ ಅಂತದ್ದೊಂದು ಪ್ರಾಜೆಕ್ಟಿನ ಮುಕ್ತಾಯ ಹಾಡುವಾಗ ಕೊರೆದ ಸಾಲುಗಳಿವು. ಐಟಿ ಜಗದಲ್ಲಿ ಪ್ರಾಜೆಕ್ಟುಗಳ ಜಗದಲ್ಲಿ ಹೆಣಗಿದವರಿಗೆ ತುಸು ಪರಿಚಿತವೆನಿಸಬಹುದಾದ ಚಿತ್ರಣ..😊

ಪ್ರಾಜೆಕ್ಟು ಮುಕ್ತಾಯ
_____________

(೦೧)

ಪ್ರಾಜೆಕ್ಟು ಮುಗಿವಾ ಸಂಕಟ
ಕಟ್ಟಿದ ತಂಡ ಅಕಟಕಟ
ಎಷ್ಟು ದಿಟ ಸಂಕಟ ಕಾಟ
ಬಿಚ್ಚಬೇಕೆಂದರೆ ಆಗದೆ ಮಾಟ ||

ಶುರುವಿನಲ್ಲಿ ಅಪರಿಚಿತ ಮುಖ
ಆದಂತೆ ಮೀಟಿಂಗು ಸಖ
ಹೋದಂತೆ ಪ್ರಾಜೆಕ್ಟ್ಪೇಸು
ಆಗುವರಾತ್ಮೀಯ ಸುಖ ದುಃಖ ||

ಟೀಮೆಂದರೇನು ಟೀಮು ರಖಮು
ನೂಡಲ್ಲಿನ್ಹಾಗೆ ಕ್ಹೋರಮ್ಮು
ಬ್ರೆಡ್ಡಿಗೆ ಬಿದ್ದಂತೆ ಜ್ಯಾಮು
ಇಡ್ಲಿ ವಡೆ ಸಾಂಬಾರಿಗೂ ಟೈಮು ||

ಎಲ್ಲರು ಹರಿದಂಚಿದ ಪ್ರಪಂಚ
ಜಗದೆಲ್ಲ ಮೂಲೆಗು ಮಂಚ
ಮೂತಿ ನೋಡದ ಸರಪಂಚ
ಫೋನು ಕಂಪ್ಯುಟರ ಮಾತಿಂಚ ||

ಕೆಲಸವೆಲ್ಲ ಹರಿದ್ಹಂಚಿದ ಪಾಲು
ಎಲ್ಲರಿಗು ಅವರದೆ ರೋಲು
ಸಣ್ಣ ಮರಿ ತಂಡವೆ ಕೂಲು
ಕನ್ಸಲ್ಟೆಂಟುಗಳು ಜತೆಗೆ ಸಾಲು ||

(೦೨)

ಕಮ್ಯುನಿಕೆಷನ್ನೆ ನಿಜದೊಳಗುಟ್ಟು
ಅದಕಷ್ಟು ಸ್ಟೇಟಸ್ಸು ಕಟ್ಟು
ಮಾಹಿತಿ ಹಂಚುತ ಗಿಟ್ಟು
ತಕರಾರು ಮೊದಲೆ ಒಳಗಟ್ಟು ||

ಹೀಗೆಲ್ಲ ಕೂಡಿ ಕೊಳೆಕಸ ಗುಡಿಸಿ
ಲಂಚು ಡಿನ್ನರುಗಳ ಸುತ್ತಾಡಿಸಿ
ಉಂಡು ತಿಂದಾಡಿ ನಲಿಯಿಸಿ
ಹತ್ತಿರವಾದ ಟೀಮೆ ಪರಮಾಯಿಷಿ ||

ಪ್ರಾಜೆಕ್ಟು ಕೆಲಸ ಕರಿ ಮರ ತರಹ
ಕಡು ಕಷ್ಟಕರ ದಿನದ ಬರಹ
ಒಗ್ಗಟ್ಟಲಿ ಮಾಡಿದರೆ ತರಹ
ಸುಖವಾಗಿ ಮುಗಿವ ಹಣೆಬರಹ ||

ಐ ಟೆಸ್ಟುಗಳ ಅಗ್ನಿಪರೀಕ್ಷೆ ಮುಗಿಸಿ
ಕಟ್ಟೋವರುಗಳತ್ತ ಸರಿಸಿ
ಮಾಡಿ ದತ್ತದ ವಲಸೆ ಬಿಸಿ
ಗೋಲೈವಾದರೆ ಸಿಗುವ ಸದ್ಗತಿ ||

ಮುಂದಿನ್ನು ನಿಜದ ಪರೀಕ್ಷೆಯ ಕ್ಲೇಷೆ
ಸ್ಟೆಬಿಲೈಸೆಷನ್ನು ಪೇಸೆ ಜಯಿಸೆ
ಮುಗಿಸಲಣಿಯಾಗುವ ಕೂಸೇ
ಬೇಗ ಬೇಗ ಎಲ್ಲವನು ಮುಗಿಮುಗಿಸೆ ||

(೦೩)

ಅಲ್ಲಿಗೆ ಬಿದ್ದು ಕೊನೆ ಪರದೆಯಂಕ
ಕಲಿತ ಪಾಠಗಳ ಸೇವಾಂಕ
ಸರಿ ತಪ್ಪು ವಿಮರ್ಶೆಗಳ ಲೆಕ್ಕ
ಸೈನಾಫು ಪ್ರಾಜೆಕ್ಟು ಮುಕ್ತಾಯ ಪಕ್ಕಾ ||

ಅಲ್ಲಿಗೆ ತಂಡದ್ಹಣೆಬರಹ ನಿರ್ಧಾರ
ಬಿಚ್ಚಬೇಕು ಕಟ್ಟಿದವರವರ
ಹಿಂತಿರುಗಿ ಬಂದಾ ಸ್ಥಾವರ
ಕೆಲವರು ಮನೆ ಬಿಟ್ಟೆ ಹೋಗುವರ ! ||

ಆ ಗಳಿಗೆ ಗಟ್ಟಿ ತಂಡದ ಭಲೆ ಒಗಟು
ಎಲ್ಲರೊಂದೆ ಕುಟುಂಬದ ಕಟ್ಟು
ಮುರಿಯಲಾಗದ ಭಾವ ಬಂಧ
ತಂಡ ಮುರಿಯಲೆಲ್ಲರಿಗೂ ನಿರ್ಬಂಧ ||

ಆದರು ವಿಧಿಯಿಲ್ಲದ ಪ್ರಾಜೆಕ್ಟು ಯಾತ್ರೆ
ಮುರಿಯಲೇಬೇಕು ಜನ ಜಾತ್ರೆ
ಮತ್ತೆ ಅರಸುತ ಹೊಸ ಜಾಗ
ಓಡಿದರೆ ಮರಳಿ ಹೊಸ ಜನ ಜಗ ಲಾಗ ||

———————————————————-
ನಾಗೇಶ ಮೈಸೂರು
———————————————————-

(Picture source: http://free-management-ebooks.bmobilized.com/)

00701. ಜನ್ಮಾಂತರ ನಂಬಿಕೆ ವೈಚಿತ್ರ – 02

00701. ಜನ್ಮಾಂತರ ನಂಬಿಕೆ ವೈಚಿತ್ರ – 02
_________________________________

ಜನ್ಮಾಂತರದ ನಂಬಿಕೆ ನಮ್ಮಲ್ಲಿ ಅಂತರ್ಗತವಾಗಿ ಬಂದ ಭಾವ. ನಂಬಲಿ, ಬಿಡಲಿ ಯಾವುದಾದರೊಂದು ಬಗೆಯಲ್ಲಿ ಎಲ್ಲರನ್ನು ಕಟ್ಟಿಡುವ ಬಂಧ ಜಾಲ. ನಂಬಿದವರಿಗೆ ನಿಮಿತ್ತರೆಂಬ ನಿರಾಳತೆ, ನಂಬದವರಿಗೆ ಡೋಂಗಿ ಬುರುಡೆ ಕಥೆ. ಎರಡು ಅಲ್ಲದ ನಡುವಿನವರಿಗೆ ಒಂದೆಡೆ ವಿಸ್ಮಯ, ಮತ್ತೊಂದೆಡೆ ಅಪನಂಬಿಕೆ. ಈ ಕೂತೂಹಲದ ಮನ ಶೋಧವೆ ಈ ಕವಿತೆಯ ಸಾರ. ಜನ್ಮಾಂತರ ನಂಟಿದ್ದರೂ ನೆನಪೆ ಇರದ ವಿಸ್ಮಯವೊಂದು ಕಡೆ, ಎಲ್ಲೊ ಏನೊ ನೆನಪಿನ ಹಾಳೆಯೊದ್ದ ಅನುಭೂತಿ ಮತ್ತೊಂದೆಡೆ. ಆ ಎರಡರ ನಡುವೆ ಕಟ್ಟಿ ಕೊಡುವ ಬಾಳಿನ, ವಿಸ್ಮೃತಿಯ ನಡುಗಡ್ಡೆ ..

ಜನ್ಮಾಂತರ ವೈಚಿತ್ರ
_____________________
(ಜನ್ಮಾಂತರ ನಂಬಿಕೆ ವೈಚಿತ್ರ – 02)

ಬೆನ್ಹಿಂದೆ ಜನ್ಮಗಳ ಕಂತೆ
ಇದ್ದರೇಕೊ ಅಪರಿಚಿತತೆ
ತಿಲದಷ್ಟು ಅರಿವಿರದೆಲ್ಲ
ತೃಣ ಮಾತ್ರವು ಬರದಲ್ಲ ||

ಸಂಘಟನೆಗಳದೆ ಪ್ರವರ
ಬದುಕುಪವಾಸ ಸವಾರ
ರುಚಿಗೆ ತಕ್ಕ ಉಪ್ಪುಖಾರ
ಹಾಕುವನಾರೋ ಚೋರ ||

ಎಂಥಾ ಮೋಸದ ಅಡಿಗೆ
ಪಾಕದ್ಹೆಸರು ನಮ ನಮಗೆ
ಉಳಿದೆಲ್ಲ ಅವ ಕಟ್ಟಿ ಗಡಿಗೆ
ಹಣೆಬರಹದ್ಹೆಸರಡಿಗಡಿಗೆ ||

ಬಿತ್ತೆಲ್ಲ ಜಾತಕಫಲ ಮೂಲ
ಒಟ್ಟಿರಲಿ ಸುಭೀಕ್ಷ ಅಕಾಲ
ಸಂಪಾದನೆ ಸಂಗ್ರಹ ಸಕಲ
ಮರುಜನ್ಮ ಆಗದಿರೆ ಸಫಲ ||

ತಧ್ಭಾವದ ತನ್ಮಯ ಲೋಕ
ಜಗಕಟ್ಟಿದ ಜಾಣ ನಿಯಾಮಕ
ನಿಮಿತ್ತ ಮಾತ್ರಕೆ ನಿರ್ಧಾರಣ
ಬದಲಿಸಲವನಾ ವ್ಯಾಕರಣ ||

———————————————————-
ನಾಗೇಶ ಮೈಸೂರು
———————————————————–

(Picture source from: https://en.m.wikipedia.org/wiki/File:Reincarnation2.jpg)

00700. ಜನ್ಮಾಂತರ ನಂಬಿಕೆ ವೈಚಿತ್ರ – 01

00700. ಜನ್ಮಾಂತರ ನಂಬಿಕೆ ವೈಚಿತ್ರ – 01
______________________________

ಜನ್ಮಾಂತರದ ನಂಬಿಕೆ ನಮ್ಮಲ್ಲಿ ಅಂತರ್ಗತವಾಗಿ ಬಂದ ಭಾವ. ನಂಬಲಿ, ಬಿಡಲಿ ಯಾವುದಾದರೊಂದು ಬಗೆಯಲ್ಲಿ ಎಲ್ಲರನ್ನು ಕಟ್ಟಿಡುವ ಬಂಧ ಜಾಲ. ನಂಬಿದವರಿಗೆ ನಿಮಿತ್ತರೆಂಬ ನಿರಾಳತೆ, ನಂಬದವರಿಗೆ ಡೋಂಗಿ ಬುರುಡೆ ಕಥೆ. ಎರಡು ಅಲ್ಲದ ನಡುವಿನವರಿಗೆ ಒಂದೆಡೆ ವಿಸ್ಮಯ, ಮತ್ತೊಂದೆಡೆ ಅಪನಂಬಿಕೆ. ಈ ಕೂತೂಹಲದ ಮನ ಶೋಧವೆ ಈ ಕವಿತೆಯ ಸಾರ. ಜನ್ಮಾಂತರ ನಂಟಿದ್ದರೂ ನೆನಪೆ ಇರದ ವಿಸ್ಮಯವೊಂದು ಕಡೆ, ಎಲ್ಲೊ ಏನೊ ನೆನಪಿನ ಹಾಳೆಯೊದ್ದ ಅನುಭೂತಿ ಮತ್ತೊಂದೆಡೆ. ಆ ಎರಡರ ನಡುವೆ ಕಟ್ಟಿ ಕೊಡುವ ಬಾಳಿನ, ವಿಸ್ಮೃತಿಯ ನಡುಗಡ್ಡೆ ..

ಜನ್ಮಾಂತರ ನಂಬಿಕೆ
_______________________
(ಜನ್ಮಾಂತರ ನಂಬಿಕೆ ವೈಚಿತ್ರ – 01)

ಬೃಹನ್ಮಿತ್ರ ಸಹ ಕಳತ್ರ
ಸದ್ಯೋಜಾತ ಕದ ಸಚಿತ್ರ
ನಾನಜರಾಮರ ಭೂ ತರ
ಮನದಿಂಗಿತ ನಗೆ ವಿಚಿತ್ರ ||

ಜಾತಾಭಿಜಾತದೀ ಜನ್ಮ
ಏಳೇಳು ಜನುಮ ಕರ್ಮ
ಅರಿತವರಾರೋ ಮರ್ಮ
ನೆನಪಿರದೆ ಸವೆಸಿ ಮಮ ||

ಜನ್ಮದ ವಾಸನೆ ಅಂಟು
ಕಟ್ಟುವುದಂತೆ ತಾ ಗಂಟು
ಹೊತ್ತು ಬಗಲಿನ ಚೀಲ
ಮುಂದಿನ ಜನ್ಮದ ಕಾಲ ||

ಮಾಡಿದ ಪಾಪ-ಪುಣ್ಯ ಫಲ
ಸರಿಯಿದ್ದರೆ ಜೀವ ಸಫಲ
ಹುಟ್ಟುವ ಮಾನವ ಜನ್ಮ
ಪಾಪಕೆ ತಿಗಣೆಯ ಕರ್ಮ ||

ಸಂಗಾತಿಸಿ ಸಹಧರ್ಮಿಣಿ
ಹಿಂಬಾಲ-ಕರುವಿನ ಸರಣಿ
ಸರಿಯಿದ್ದರೆ ಜೀವಕೆ ಗಣಿ
ಬೆಸವಿದ್ದರೆ ಬಾಳೆ ಸಗಣಿ ||

———————————————————-
ನಾಗೇಶ ಮೈಸೂರು
———————————————————–

(Picture source: https://en.m.wikipedia.org/wiki/File:Reincarnation_AS.jpg)

00699. ಕುಡುಕ ಗಂಡನ ಕೊಬ್ಬು..

00699. ಕುಡುಕ ಗಂಡನ ಕೊಬ್ಬು..
________________________

(ಸುಮ್ನೆ ತಮಾಷೆಗೆ ಬರೆದಿದ್ದು …😜 )

ಏನೋ ಸ್ವಲ್ಪ ಕುಡ್ಕ
ವಾಸನೆ ಸ್ವಲ್ಪ ತಡ್ಕೊ
ಕಟ್ಕೊಂಡೋಂಗೆ ಡೌಲಾ ?
ಕುಡ್ಸೋದು ನಂದೆ ಡೀಲು..

ತಡಿಯೋಕಾಗ್ದೆ ಇದ್ರೆ
ನೀನೂ ರೂಢಿ ಮಾಡ್ಕೊ
ಬಿದ್ರೆ ಒಳಗೆ ಥರ್ಟೀ
ನಿನ್ವಯಸಾಗುತ್ತೆ ಟ್ವೆಂಟಿ..!

ಕುಡೀದೆ ಇದ್ರೆ ಮದಿರೆ
ಹತ್ರ ಬರಲ್ಲಾ ನಿದಿರೆ
ನೀ ಬರ್ದಿದ್ರೂ ಹೋಗೆ
ಕನಸಿನ ಕದ ತೆರೆದಾಯ್ತೆ..

ಸುಮ್ನೆ ಬೇಡಾ ಗಾಂಚಲಿ
ಹಾಕೆ ತಟ್ಟೆ ಪಾಂಚಾಲಿ
ಕುಡಿದಿದ್ ಹತ್ಬೇಕ್ ಮೈಗೆ
ತಿನ್ದಿದ್ರೆ ಹತ್ತೋದು ಹ್ಯಾಗೆ ?

ಹಾಸಿಗೆ ನಂದು ನಿಂದು
ಬೇಡಾ ಅಂದ್ರು ಮುನಿದು
ನಾ ಬಿಡಲ್ಲವೆ ಸಾವಾಸ
ಹೆಂಡ್ತಿ ಮಕ್ಕಳಿಗುಪವಾಸ..

– ನಾಗೇಶ ಮೈಸೂರು

(Picture from : http://www.freedictionary.com – drunkard)

00698. ಸೂರ್ಯನ ಎದುರಲ್ಲಿ ಹಾದು ಹೋಗಲಿರುವ ಬುಧಗ್ರಹದ ಅಪರೂಪದ ದೃಶ್ಯ !

00698. ಸೂರ್ಯನ ಎದುರಲ್ಲಿ ಹಾದು ಹೋಗಲಿರುವ ಬುಧಗ್ರಹದ ಅಪರೂಪದ ದೃಶ್ಯ !
________________________________________________________________

ಬುಧಗ್ರಹದ ಸೂರ್ಯಗಮನ – ಸೂರ್ಯನೆದುರಿನ ಹಾದುಹೋಗುವಿಕೆಯನ್ನು ತೋರಿಸುವ ಹಳೆಯ ನಾಸಾ ಉಪಗ್ರಹ ಚಿತ್ರ (ನಾಸಾ ಹ್ಯಾಂಡೌಟ್ ಫೋಟೊ)

ಇದು ಶತಮಾನವೊಂದರಲ್ಲಿ ಕೇವಲ ೧೩ ಬಾರಿ ಮಾತ್ರ ಸಂಭವಿಸುವ ವಿಸ್ಮಯ : ನಮ್ಮ ಸೌರವ್ಯೂಹದಲ್ಲೆ ಅತಿ ಕಿರಿಯನೆಂಬ ಕೀರ್ತಿಗೆ ಪಾತ್ರನಾದ ಬುಧಗ್ರಹವು (ಮರ್ಕ್ಯೂರಿ) ಸೂರ್ಯನ ಮುಂದೆ, ಅತ್ಯಂತ ಸಮೀಪದಿಂದ ಹಾದು ಹೋಗಲಿದೆಯಂತೆ. ಅಮೇರಿಕಾವೂ ಸೇರಿದಂತೆ ಜಗತ್ತಿನ ಬಹುತೇಕ ಭಾಗ, ಬರುವ ಸೋಮವಾರದಂದು ಬುಧಗ್ರಹವು ತನ್ನ ಅತಿಥೇಯ ನಕ್ಷತ್ರವಾದ ಸೂರ್ಯನೆದುರಲೊಂದು ಕಪ್ಪು ಚುಕ್ಕಿಯಾಗಿ ನಿಧಾನವಾಗಿ ಹಾದುಹೋಗಲಿರುವ ಈ ವಿಸ್ಮಯವನ್ನು ಕಾಣಬಹುದು. ಬರಿಗಣ್ಣಿನಿಂದ ಸೂರ್ಯನನ್ನು ನೋಡಲಾಗದ ಕಾರಣ ನೀವು ವಿಶೇಷ ಶೋಧಕವನ್ನಳವಡಿಸಿದ ದೂರದರ್ಶಕದ ಮೂಲಕವೊ ಅಥವಾ ಅಂತರ್ಜಾಲ ಬಿತ್ತರಣೆಗಳ ಮೂಲಕ ಬುಧಗ್ರಹದ ಈ ಕಿರಿಸಂಭ್ರಮಕ್ಕೆ ಸಾಕ್ಷಿಯಾಗಬಹುದು.

ನಿಮ್ಮಲ್ಲಿ ದೂರದರ್ಶಕವಿದ್ದಲ್ಲಿ ದೂರದರ್ಶಕಕ್ಕೆ ಸುರಕ್ಷತೆಯ ಶೋಧಕವನ್ನಳವಡಿಸಿಕೊಂಡು (ನಿಮ್ಮ ಕಣ್ಣುಗಳ ರಕ್ಷಣೆಯ ದೃಷ್ಟಿಯಿಂದ) ನೀವು ಈ ಸಂಘಟನೆಯನ್ನು ವೀಕ್ಷಿಸಬಹುದು. ಒಂದು ವೇಳೆ ಶೋಧಕ ಸಿಗದಿದ್ದರೆ ಒಂದು ಕಾಗದದ ಹಾಳೆಯನ್ನು ಬಳಸಿಕೊಂಡು ನೀವೊಂದು ಕೃತಕ ಹಾಗು ಸುರಕ್ಷಿತ ವೀಕ್ಷಣಾ ವಿಧಾನವನ್ನು ರೂಪಿಸಿಕೊಳ್ಳಬಹುದು. ಸೂರ್ಯನ ಛಾಯೆಯನ್ನು ಕಾಗದವೊಂದರ ಮೇಲೆ ಬಿಳಿಯ ಬಿಲ್ಲೆಯ ರೂಪದಲ್ಲಿ ಪ್ರಕ್ಷೇಪಿಸಿ, ನಂತರ ಬುಧಗ್ರಹವು ಒಂದು ಚುಕ್ಕೆಯ ರೂಪದಲ್ಲಿ ಸೂರ್ಯನಗಲಕ್ಕು ನಿಧಾನಕ್ಕೆ ಸಾಗುವುದನ್ನು ಕಾಣಬಹುದು. ಪರ್ಯಾಯವಾಗಿ ನಾಸಾದ ಅಂತರ್ಜಾಲ ಪುಟ ಅಥವಾ ಸೋಶಿಯಲ್ ಮೀಡಿಯ ಪುಟಗಳಲ್ಲಿ ಹಾಕುವ ನೇರ ಚಿತ್ರಗಳನ್ನು ಕೂಡ ಗಮನಿಸಬಹುದು. ನೀವ್ಯಾವುದಾದರು ಖಗೋಳ ವೀಕ್ಷಣಾಲಯ (ಅಬ್ಸರ್ವೇಟೊರಿ) ಅಥವಾ ವಿಜ್ಞಾನ ಕೇಂದ್ರಗಳ ( ಸೈನ್ಸ್ ಸೆಂಟರು) ಹತ್ತಿರದಲ್ಲಿ ವಾಸಿಸುವವರಾದರೆ, ಅವರ ಕಾರ್ಯಕ್ರಮ ಯೋಚನೆಯನ್ನೊಮ್ಮೆ ವಿಚಾರಿಸಿ ನೋಡುವುದೊಳಿತು – ಬಹುಶಃ ಅವರಲ್ಲಿರಬಹುದಾದ ದೂರದರ್ಶಕದಲ್ಲೊಮ್ಮೆ ಇಣುಕಿ ಈ ಸಂಘಟನೆಯನ್ನು ವೀಕ್ಷಿಸಬಹುದು.

ಇದೇನು ಮಹಾ ? ಯಾವುದೋ ಗ್ರಹದ ಚಲನೆಯನ್ನು ನೋಡಿ ಆಗಬೇಕಾದ್ದರೂ ಏನು ? ಯಾಕಾದರೂ ನೋಡಬೇಕು ಎನ್ನುವ ಅನುಮಾನವಿದ್ದರೆ ಇದೋ ಇಲ್ಲಿದೆ ಒಂದು ಮುಖ್ಯ ಕಾರಣ – ಈ ತಣ್ಣಗಿನ ಪುಟ್ಟ ಗ್ರಹಕ್ಕೆ ಇದೊಂದು ಅತಿ ವಿಶೇಷ ಘಟನೆಯಾದ್ದರಿಂದ.

ಬುಧಗ್ರಹ ಸೂರ್ಯನ ಸುತ್ತ ಒಂದು ಸುತ್ತು ಸುತ್ತಲು ಬೇಕಾದ ಆವರ್ತನಾವಧಿ ಕೇವಲ ೮೮ ದಿನಗಳಾದ ಕಾರಣ ಅದನ್ನು ನಮ್ಮ ಸೌರವ್ಯೂಹದ ‘ಅತೀ ವೇಗದಲ್ಲಿ ಸುತ್ತುವ ಗ್ರಹ’ ಎಂಬ ಕೀರ್ತಿಗೆ ಭಾಜನವಾಗಿಸಿಬಿಟ್ಟಿದೆ. ಅದೇ ರೀತಿ ನಮ್ಮ ಭೂಮಿ ಸಹ ತನ್ನದೇ ಆದ ಆವರ್ತನಾವಧಿಯಲ್ಲಿ (ಸರಾಸರಿ ೩೬೫ ದಿನ) ಸೂರ್ಯನ ಸುತ್ತ ಪ್ರದಕ್ಷಿಣೆ ಹಾಕುತ್ತಿದೆ. ವಿಭಿನ್ನ ಪ್ರದಕ್ಷಿಣಾ ಪಥಗಳ ಈ ಅಂತರದಿಂದಾಗಿ ಇವೆರಡು ಗ್ರಹಗಳು ಒಂದೇ ನೇರದಲ್ಲಿದ್ದು, ನಾವು ಭೂಮಿಯಿಂದ ಈ ಪುಟ್ಟ ಗ್ರಹದ ರವಿತಾಡನವನ್ನು ನೇರ ದಿಟ್ಟಿಸಬಹುದಾದ ಅವಕಾಶ ತೀರಾ ಅಪರೂಪಕ್ಕೆ ಸಿಗುತ್ತದೆ. ಈ ಬಾರಿಯ ಸಂಘಟನೆ ೨೦೦೬ ರ ನಂತರ ಘಟಿಸುತ್ತಿರುವ ಮೊದಲ ಅವಕಾಶ. ಇಂತಹದ್ದೆ ಮತ್ತೊಂದು ದೃಶ್ಯ ವೀಕ್ಷಿಸಬೇಕೆಂದರೆ ಮತ್ತೆ ೨೦೧೯ರ ತನಕ ಕಾಯಬೇಕು.

ತಾಳಿ, ಇದೇನು ಮಹಾ – ಒಂದು ದಶಮಾನಕ್ಕಿಂತ ತುಸು ಹೆಚ್ಚಿನ ಅವಧಿಯಲ್ಲೇ ಘಟಿಸುವುದಾದರು ಅದು ಸುಮಾರು ಬಾರಿ ನಡೆಯುವ ಪ್ರಕ್ರಿಯೆಯೇ ಆದಂತಲ್ಲವೆ ಎನ್ನಬೇಡಿ. ೧೩ ವರ್ಷದ ಸರಾಸರಿಯಲ್ಲಿ ಪರಿಗಣಿಸಿದರು ಒಂದು ಶತಮಾನದಲ್ಲಿ ಎಷ್ಟು ಬಾರಿ ನಡೆಯಲು ಸಾಧ್ಯ ? ಬುಧಗ್ರಹವು ಭೂಮಿ ಮತ್ತು ಸೂರ್ಯನ ನಡುವೆ ಪ್ರತಿ ೧೧೬ ದಿನಕ್ಕೊಮ್ಮೆ ಹಾದು ಹೋಗುತ್ತದೆಯಾದರೂ ಅದರ ಆವರ್ತ ಸಮತಲ ನಮ್ಮ ಭೂಮಿಯ ಆವರ್ತ ಸಮತಲಕ್ಕೆ ಕೆಲವು ಕೋನದಷ್ಟು ವ್ಯತ್ಯಾಸದಲ್ಲಿರುತ್ತದೆ. ಭುವಿಯ ದೃಷ್ಟಿಯಲ್ಲಿ ಬುಧನ ಪ್ರದಕ್ಷಿಣಾ ಪಥವು ಒಂದು ರೀತಿಯ ಓರೆಯಾದ ಪ್ರಕ್ಷೇಪಣಾ ಪಥದಲ್ಲಿರುತ್ತದೆ. ಹೀಗಾಗಿ ಭೂಮಿ ಮತ್ತು ಬುಧಗ್ರಹಗಳೆರಡರ ಪಥಗಳು ಪರಸ್ಪರ ಒಂದನ್ನೊಂದು ಸಂಧಿಸುವ ಅವಕಾಶವೂ ಕೂಡಿಬರಬೇಕು. ಈ ಸಂಯುಕ್ತ ಅಂಶಗಳ ಗಣಿತ ಆ ಸರಾಸರಿ ವರ್ಷಗಳನ್ನು ಏರುಪೇರಾಗಿಸಿಬಿಡುತ್ತದೆಯಾಗಿ ‘ಪ್ರತಿ ಇಂತಿಷ್ಟು ವರ್ಷಗಳಲ್ಲಿ ಇದು ಘಟಿಸುತ್ತದೆ’ ಎಂದು ಸರಳವಾಗಿ ಹೇಳುವಂತಿಲ್ಲ. ಆ ಆವರ್ತನ ಸಂಘಟನೆ ತನ್ನದೇ ಆದ ಮಾದರಿಯನ್ನು ಹೊಂದಿರುವುದಾದರು ಅದು, “ತುಸುಕಾಲ ಪ್ರತಿ ‘ಎಕ್ಸ್’ ವರ್ಷಗಳಿಗೊಮ್ಮೆ, ನಂತರ ‘ವೈ’ ವರ್ಷಗಳಿಗೊಮ್ಮೆ, ಹಾಗೆಯೇ ಮತ್ತೆ ‘ಜಡ್’ ವರ್ಷಗಳಿಗೊಮ್ಮೆ, ಮತ್ತೆ ‘ವೈ’ ವರ್ಷಗಳಿಗೊಮ್ಮೆ, ತದನಂತರ ಮೂರು ಬಾರಿ ‘ಜಡ್’ ವರ್ಷಗಳಿಗೊಮ್ಮೆ….” ಹೀಗೆ ಎರ್ರಾಬಿರ್ರಿಯಾಗಿ ಸಾಗುವ ಕೋಟಲೆ ಲೆಕ್ಕಾಚಾರ.

ಬುಧಗ್ರಹವನ್ನು ಬಿಟ್ಟರೆ ನಮಗೂ ಸೂರ್ಯನಿಗು ನಡುವಿರುವ ಶುಕ್ರಗ್ರಹ (ವೀನಸ್) ಕೂಡ ನಮಗೆ ಬುಧಗ್ರಹದಂತಹುದ್ದೆ ಪಥ ಸಂಚಲನ ವೀಕ್ಷಣೆಯ ಅವಕಾಶ ನೀಡುವುದಾದರು – ಅದು ಹೆಚ್ಚು ನಿಧಾನವಾಗಿ ಮತ್ತು ಬುಧಗ್ರಹಕ್ಕಿಂತಲೂ ಕಡಿಮೆಯದಾದ ಓರೆ ಕೋನ ಸಮತಲದಲ್ಲಿ ಘಟಿಸುತ್ತದೆ. ಹೀಗಾಗಿ ನಮ್ಮಾ, ಸೂರ್ಯನ ನಡುವೆ ಹಾದುಹೋಗುವ ಶುಕ್ರನ ಪ್ರಾತ್ಯಕ್ಷಿಕೆಯೂ ಅಪರೂಪದ್ದಾದರು ಸ್ವಲ್ಪ ಹೆಚ್ಚು ಸುಲಭವಾಗಿ ನಿಗಾ ಇಡಬಹುದಾದಂತದ್ದು: ಇಲ್ಲಿ ಇದು ಯಾವಾಗಲು ಎಂಟು ವರ್ಷಗಳ ಅಂತರದಿಂದ ಬೇರ್ಪಟ್ಟ ಒಂದು ಜಂಟಿ ಸಂಘಟನೆಯಾಗಿ (ಯುಗ್ಮದ ಹಾಗೆ) ನಡೆಯುವ ಮತ್ತು ಈ ಜಂಟಿ ಜೋಡಿ ಒಂದು ಶತಮಾನದಲ್ಲಿ ಒಂದು ಸಾರಿ ಮಾತ್ರವೇ ನಡೆಯುವ ಪ್ರಕ್ರಿಯೆ. ನೀವೊಂದು ವೇಳೆ ೨೦೧೨ರ ಹಾದುಹೋಗುವಿಕೆಯನ್ನು ಗಮನಿಸಲಿಲ್ಲವೆಂದಾದರೆ ನಿಮ್ಮ ಅದೃಷ್ಟ ಪರೀಕ್ಷೆಗೆ ಮುಂದಿನ ೨೧೧೭ ರ ತನಕ ಕಾಯಬೇಕು.

ನಮ್ಮ ಸೌರವ್ಯೂಹದ ನೆರೆಹೊರೆಯ ಇಂತಹ ಚಲನೆಗಳು ಇದೇ ಮಾದರಿಯದ್ದೆ. ಅಲ್ಲಿನ ಗ್ರಹಗಳು ತಮ್ಮ ಸೂರ್ಯರ ಮುಂದೆ ಹಾದು ಹೋಗುವ ಹೊತ್ತಲ್ಲಿ ಅವುಗಳ ಇರುವಿಕೆಯನ್ನು ಗಮನಿಸುವುದು ಮಾತ್ರವಲ್ಲದೆ ವಿವಿಧ ಮಾನಕಗಳ ಮೂಲಕ ಅವುಗಳ ಮತ್ತದರ ಸುತ್ತಲಿನ ವಾತಾವರಣವನ್ನು ಅಳೆದು ಅಲ್ಲೇನಾದರು ಜೀವವಿಕಾಸದ ಕುರುಹೇನಾದರು ಇದೆಯೇ ಎಂದು ಅಧ್ಯಯನ ಮಾಡುವುದು ಪ್ರಚಲಿತ ವಿಧಾನ.

ಈಗಾಗಲೆ ಈ ರೀತಿಯ ಅಧ್ಯಯನಗಳಿಂದ ನಮ್ಮ ನೆರೆಹೊರೆ ಗ್ರಹಗಳ ಪ್ರದಕ್ಷಿಣಾ ಪಥ ಮತ್ತು ಹಾದುಹೋಗುವಿಕೆಯನ್ನು ಎಷ್ಟು ಆಳವಾಗಿ ಅರಿತಿದ್ದೇವೆಂದರೆ, ಅವುಗಳೀಗ ಮೊದಲಿದ್ದಷ್ಟೆ ಅದ್ಭುತ ವೈಜ್ಞಾನಿಕ ಅವಕಾಶಗಳಾಗಿ ಉಳಿದಿಲ್ಲ.

” ವೈಜ್ಞಾನಿಕವಾಗಿ, ಕೆಲವು ನೂರು ವರ್ಷಗಳ ಹಿಂದೆ ಈ ವಿದ್ಯಾಮಾನಗಳು ಹೆಚ್ಚು ಪ್ರಾಮುಖ್ಯವಾಗಿದ್ದವು” ಎಂದು ‘ದಿ ಪೋಸ್ಟ್’ಗೆ ಹೇಳಿಕೆ ನೀಡಿದವರು ಮೆಸೆಂಜರ ಗಗನ ನೌಕೆಯ ಮುಖ್ಯ ವಿಜ್ಞಾನಿ ನ್ಯಾನಿ ಚಾಬೊಟ್ (ಕಳೆದ ವರ್ಷವಷ್ಟೇ ಮೆಸೆಂಜರ ಆಕಾಶ ನೌಕೆಯ ಬುಧಗ್ರಹಕ್ಕೆ ಅಪ್ಪಳಿಸಿದ ನಂತರ ಅದರ ಚಟುವಟಿಕೆಗಳನ್ನೆಲ್ಲ ಸ್ಥಗಿತಗೊಳಿಸಲಾಯ್ತು).

ಆದರೂ ಈ ಅಡ್ಡ ಹಾಯುವಿಕೆಯಿಂದ ವಿಜ್ಞಾನಿಗಳು ಕೆಲವು ಉಪಯುಕ್ತ ಮಾಹಿತಿಯನ್ನು ಪಡೆಯಬಹುದು. ಸೌರವ್ಯೂಹದಲ್ಲೆ ಅತೀ ತೆಳುವಾದ ಬುಧಗ್ರಹದ ವಾತಾವರಣದ ವಿಶ್ಲೇಷಣೆ ಮಾಡಿ ಅಲ್ಲಿ ಜೀವವಿರುವ ಕುರುಹುಗಳಿಗಾಗಿ ಹುಡುಕಬಹುದು ( ಆ ವಾತಾವರಣದಲ್ಲಿರುವ ಅಣುಗಳ ಮೂಲಕ ಹಾಯ್ದು ಬರುವ ಬೆಳಕನ್ನು ಪರೀಕ್ಷಿಸಿ, ವಿಶ್ಲೇಷಿಸುವ ಮೂಲಕ). ಬುಧಗ್ರಹದ ಜಾಗ ಮತ್ತು ಸೂರ್ಯನ ಮುಂದೆ ಹಾದುಹೋಗುವ ಪ್ರಕ್ರಿಯೆ ಕರಾರುವಾಕ್ಕು ಮತ್ತು ವಿಶ್ವಾಸಾರ್ಹ ನಿಖರತೆಯದ್ದಾಗಿರುವುದರಿಂದ, ಈ ಪ್ರಕ್ರಿಯೆಯನ್ನೇ ಆಧಾರವಾಗಿಟ್ಟುಕೊಂಡು ಗಗನ ನೌಕೆಗಳಲ್ಲಿರುವ ಪರಿಕರ, ಉಪಕರಣಗಳ ಸೂಕ್ಷ್ಮ ನ್ಯೂನತೆಗಳನ್ನು ಪರಿಶೀಲಿಸಿ ಸರಿಪಡಿಸಬಹುದು. ಬುಧಗ್ರಹದ ಸ್ಥಾನಿಕ ಆಧಾರದ ಮೇಲೆ ದೂರದರ್ಶಕಗಳನ್ನು ಸರಿಯಾದ ದಿಕ್ಕಿನತ್ತ ನಿಟ್ಟಿಸುವಂತೆ ಮಾಡಬಹುದಷ್ಟೆ ಅಲ್ಲದೆ, ಕೆಲವು ಉಪಕರಣಗಳ ದೃಷ್ಟಿದೋಷಗಳನ್ನು ಈ ಸಂಘಟನೆಯ ಆಧಾರದ ಮೇಲೆ ಸರಿಪಡಿಸಿಕೊಳ್ಳಬಹುದು.

“ಇದೊಂದು ರೀತಿ ಕ್ಯಟರಾಕ್ಟ್ ಇದ್ದ ಕಣ್ಣಲ್ಲಿ ಕಾಣುವ ಹಾಗೆ – ಮಂಜು ಕವಿದ ವಾಹನದ ಗಾಜಿನಿಂದ ನೋಡುತ್ತಿರುವ ಹಾಗೆ, ಪ್ರಕಾಶಮಾನ ಹೊಳಪಿನ ಬೆಳಕಿನ ಸುತ್ತ ನಾವು ತಾರಾ ರೀತಿಯ ಪ್ರಭಾವಲಯವನ್ನು ಕಾಣುತ್ತೇವೆ” ಎನ್ನುತ್ತಾರೆ ಮತ್ತೊಬ್ಬ ನಾಸಾ ವಿಜ್ಞಾನಿ ಡೀನ್ ಪೆಸ್ನೇಲ್. ಸೂರ್ಯನ ಅಗಾಧ ಬೆಳಕಿನೆದುರು ಬುಧಗ್ರಹವು ಸಂಪೂರ್ಣ ಕಪ್ಪು ಕಾಯವಾಗಿ ಕಾಣಿಸಿಕೊಳ್ಳುತ್ತದೆಯಾದರು, ಬಳಸುವ ಉಪಕರಣಗಳು ಬೆಳಕನ್ನು ಚದುರಿಸುವ ಬಗೆಯಿಂದಾಗಿ ಅದೊಂದು ತುಸು ಮೆಲುವಾಗಿ ಹೊತ್ತಿಸಿಟ್ಟ ಕಾಯದ ಹಾಗೆ ಕಾಣಿಸಿಕೊಳ್ಳಬಹುದು. ಈ ಸಂಘಟನೆಯ ಹೊತ್ತಿನ ಅವಕಾಶವನ್ನು ಬಳಸಿಕೊಂಡು ವಿಜ್ಞಾನಿಗಳು ಆ ಉಪಕರಣಗಳನ್ನು ತಿದ್ದಿ ಬುಧಗ್ರಹದ ನೈಜ ಬಣ್ಣಗಳನ್ನು ನೋಡುವಂತೆ ಸರಿಪಡಿಸಿಕೊಂಡರೆ, ಅವುಗಳನ್ನು ಮತ್ತಷ್ಟು ಅಜ್ಞಾತ ಕಾಯ ಮತ್ತು ವಸ್ತುಗಳ ಅಧ್ಯಯನಕ್ಕೆ ಮರು ಬಳಸುವ ಹೊತ್ತಿನಲ್ಲಿ ಉಂಟಾಗಬಹುದಾದ ತಪ್ಪೆಣಿಕೆ ಮತ್ತು ಅವಘಡಗಳಿಂದ ಕಾಪಾಡಿದಂತೆ ಆಗುತ್ತದೆ.

ಚಾಬೋಟ್ ಈ ಪ್ರಕ್ರಿಯೆ ನಮ್ಮ ಜನರನ್ನು ಆಕಾಶದತ್ತ ನೋಡುವಂತೆ ಮತ್ತು ನೆರೆಹೊರೆಯ ಗ್ರಹಗಳ ಕುರಿತು ಆಲೋಚಿಸುವಂತೆ ಪ್ರಚೋದಿಸಲೆಂದು ಆಶಿಸುತ್ತಾರೆ. ಕಳೆದ ಶುಕ್ರವಾರ ಆಕೆ ಮತ್ತವಳ ಮೆಸೆಂಜರ ತಂಡದ ಸದಸ್ಯರು ಬುಧಗ್ರಹದ ಸಂಪೂರ್ಣ ಮೇಲ್ಮೆ ಮಾಹಿತಿಯನ್ನೊಳಗೊಂಡ ಮೊಟ್ಟಮೊದಲ ಭೂಪಠವನ್ನು ಬಿಡುಗಡೆ ಮಾಡಿದರು.

” ಇದು ನಿಜಕ್ಕೂ ಸಕಾಲದಲ್ಲಿ ಬಿಡುಗಡೆಯಾಗುತ್ತಿದೆ..” ಮುಂದುವರೆದು ಆಕೆ ನುಡಿದರು ” ಈಗಾದರೆ ಜನಗಳು ಕೂಡ ಆಸಕ್ತಿಯಿಂದ ನೋಡುತ್ತಿರುತ್ತಾರೆ..”

ಈ ಅಧ್ಯಯನ ಕಾಲದಲ್ಲಿ ಆಕೆಯ ತಂಡ ಬುಧಗ್ರಹದ ಕುರಿತು ಅನೇಕ ರೋಚಕ ಮಾಹಿತಿಗಳನ್ನು ಗ್ರಹಿಸಿ ಕಲೆಹಾಕಿದ್ದಾರೆ. ಚಾಬೋಟ್ ನುಡಿಯುತ್ತಾರೆ “ಯಾವುದೊಂದನ್ನು ಇನ್ನೊಂದಕ್ಕಿಂತ ಹೆಚ್ಚು ಪ್ರಮುಖವಾದದ್ದೆಂದು ಗುರುತಿಸಲು ಬಯಸುವುದಿಲ್ಲ” – ಆದರು ಈ ಮೂರು ಕಾಡುವ ಅಂಶಗಳನ್ನು ಗಮನಾರ್ಹವೆಂದು ಪರಿಗಣಿಸುತ್ತಾರೆ:

” ಬುಧಗ್ರಹದಲ್ಲಿರುವ ದೈತ್ಯ ಗಾತ್ರದ ಆಗಾಧ ವಿಸ್ತೀರ್ಣದಲ್ಲಿ, ಯಾವುದೋ ಹಳೆಯ ಕಾಲದಲ್ಲಿ ಅದರ ಮೇಲ್ಮೆಯನ್ನೆಲ್ಲ ಆವರಿಸಿಕೊಂಡಿರುವ ಅಗ್ನಿಪರ್ವತದಿಂದುಗುಳಲ್ಪಟ್ಟ ಲಾವ – ಅಮೇರಿಕದ ಅರ್ಧಕ್ಕಿಂತಲು ಹೆಚ್ಚು ವಿಸ್ತೀರ್ಣದಲ್ಲಿ ಚಾಚಿಕೊಂಡಿರುವಂತದ್ದು, ಮೊದಲನೆಯ ಅಂಶ. ಅಗ್ನಿಪರ್ವತದ ಯಾವ ರೀತಿಯ ಮಹಾನ್ ಪ್ರಕ್ರಿಯೆಯ ಕಾರಣಗಳು ಇಂತಹ ಅಗಾಧ ಗಾತ್ರದ ಪರಿಣಾಮವನ್ನುಂಟು ಮಾಡಿತೆಂಬುದು ತೀವ್ರವಾಗಿ ಕಾಡುವ ಅಂಶ” ಆಕೆ ಹೇಳುತ್ತಾರೆ.

ಬುಧಗ್ರಹದಲ್ಲಿರುವ ಮತ್ತೊಂದು ಕಾಡುವ ಅಂಶವೆಂದರೆ ಬೇರೆಲ್ಲೂ ಕಾಣದ, ಬುಧನ ಮೇಲೆ ಮಾತ್ರ ಕಾಣುವ ‘ಹಾಲೋಸ್’ ಅಥವಾ ‘ಗುಂಡಿ’ ಬಿದ್ದಂತಹ ಗುರುತುಗಳು. ಈ ಚಿಕ್ಕ ಗುಂಡಿ ಗುರುತುಗಳು ಬುಧನ ಮೇಲ್ಮೈ ಪರಿಸರದಲ್ಲಿ ಉಳಿಯಲಾಗದೆ ಮಂಜಿನಂತೆ ಆವಿಯಾಗಿ ಕರಗಿಹೋದ ಬಂಡೆಗಲ್ಲುಗಳು ಉಳಿಸಿಹೋಗಿರುವ ಜಾಗದ ಗುರುತೆನ್ನುವ ಅನುಮಾನ.

” ಬಂಡೆಗಲ್ಲುಗಳು ಸಾಮಾನ್ಯವಾಗಿ ತಂತಾನೆ ವ್ಯೋಮದಲ್ಲಿ ಮಾಯವಾಗಿಹೋಗುವುದಿಲ್ಲ, ಆದರೆ ಬುಧಗ್ರಹದಲ್ಲಿ ಮಾತ್ರ ಹಾಗಾಗುತ್ತದೆ” ಎಂದು ವಿವರಿಸುತ್ತಾರೆ ಚಾಬೋಟ್.

ಚಾಬೋಟ್ ತಮ್ಮ ಬಹುತೇಕ ಗಮನ ಮತ್ತು ಸಮಯವನ್ನು ನಿರಂತರ ಕತ್ತಲ ನೆರಳಿನಲ್ಲಿರುವಂತಿರುವ, ಬುಧಗ್ರಹದ ಉತ್ತರ ಮತ್ತು ದಕ್ಷಿಣ ಧ್ರುವಗಳಲ್ಲಿ ಉಂಟಾಗುವ ನೀರುಗಡ್ಡೆಗಳ ಅಧ್ಯಯನಕ್ಕೆ ವ್ಯಯಿಸಿದ್ದಾರೆ. ಅವುಗಳ ಇರುವಿಕೆಯ ಸಂಶೋಧನೆಯೇನೊ ಮಹತ್ತರವಾದದ್ದೆ ನಿಜ, ಆದರೆ ಅದು ಮತ್ತಷ್ಟು ಹೊಸ ಪ್ರಶ್ನೆಗಳಿಗೆ ದಾರಿಮಾಡಿಕೊಟ್ಟಿದೆ ಎನ್ನುತ್ತಾರಾಕೆ. ಅವು ಅಲ್ಲಿಗೆ ಬಂದದ್ದಾರು ಹೇಗೆ, ಯಾವಾಗ ಎನ್ನುವ ಪ್ರಶ್ನೆಗೆ ಉತ್ತರ ಗೊತ್ತಾದಲ್ಲಿ, ನೀರು ಹೇಗೆ ಭೂಮಿಗೆ ತನ್ನ ದಾರಿ ಕಂಡುಕೊಂಡಿತು ? ಎನ್ನುವುದರ ಬಗ್ಗೆಯೂ ಬೆಳಕು ಚೆಲ್ಲಲು ಸಾಧ್ಯ ಎನ್ನುವ ಹಿನ್ನಲೆಯಲ್ಲಿ.

ಆಕೆಯೆನ್ನುತ್ತಾರೆ “ವಿಜ್ಞಾನದಲ್ಲಿ ಒಂದು ಸಮಸ್ಯೆ ಬಗೆಹರಿದು ಉತ್ತರ ದೊರಕಿದರೆ, ಅದರ ಹಿಂದೆಯೆ ಕಾಡುವ ನೂರೆಂಟು ಹೊಸ ಪ್ರಶ್ನೆಗಳನ್ನು ಉಳಿಸಿಹೋಗುತ್ತವೆ”

ಸಣ್ಣ ಚುಕ್ಕೆಯಾಗಿ ಬುಧಗ್ರಹ ಸೂರ್ಯನೆದುರು ಹಾದುಹೋಗುವುದನ್ನು ಗಮನಿಸಿ ನೋಡುವುದರಿಂದ ಈ ಪ್ರಶ್ನೆಗಳಿಗೆಲ್ಲ ಉತ್ತರ ದೊರಕಿಬಿಡುವುದೆಂದೇನಲ್ಲ; ಅಷ್ಟೇಕೆ, ಆ ಅಂಶಗಳ ಇರುವಿಕೆಯನ್ನು ಗಮನಿಸಲೂ ಸಹ ಸಾಧ್ಯವಾಗದಿರಬಹುದು. ಆದರೂ ಅದರ ಸಾಧ್ಯಾಸಾಧ್ಯತೆಗಳನ್ನು ಪರಿಗಣಿಸದಿರಲು ಅಸಾಧ್ಯವಾದ ಕಾರಣ, ಪರಿಶೀಲಿಸಿ ನೋಡಬೇಕಾದ ಅಗತ್ಯ ಇದ್ದೆ ಇರುತ್ತದೆ.

– ಕನ್ನಡ ಸಮೀಪಾನುವಾದ: ನಾಗೇಶ ಮೈಸೂರು

© 2016 ದಿ ವಾಷಿಂಗ್ಟನ್ ಪೋಸ್ಟ್ ( © 2016 The Washington Post )
(ವಾಷಿಂಗ್ಟನ್ ಪೋಸ್ಟಿನಲ್ಲಿ ಪ್ರಕಟಿತವಾದ ಬರಹದ ಕನ್ನಡ ಸಮೀಪಾನುವಾದ; ಎನ್.ಡಿ.ಟೀವಿ (NDTV) ಜಾಲ ಮಾಧ್ಯಮದಲ್ಲಿ ಪ್ರಕಟಿತವಾಗಿದ್ದ ರೂಪದಲ್ಲಿ )

Thanks and best regards,
Nagesha MN

00697. ಗುಡಾಣದ್ಹೊಟ್ಟೆಗಳ ಪ್ರಪಂಚ – 01

00697. ಗುಡಾಣದ್ಹೊಟ್ಟೆಗಳ ಪ್ರಪಂಚ – 01
_______________________________

ಜನಸಾಗರಕೆ ಜಗದ ಅಂಚೆ
ಆಧುನಿಕ ಜೀವನ ಪ್ರಪಂಚೆ
ಸುಖ ಸಮೃದ್ಧಿಗಳನೆ ಹಂಚೆ
ಗುಡಾಣದ್ಹೊಟ್ಟೆಗಳಾ ಸಂಚೆ ! ||

ಗುಡಾಣ ಸಂಜ್ಞೆಯೆ ನೆಮ್ಮದಿ
ಹೊತ್ಹೊತ್ತಿಗೆ ತಿಂದುಣ್ಣೆ ಗಾದಿ
ಸುಖ ನಿದ್ರೆಗೆ ಆಲಸ್ಯ ಸರದಿ
ಹೆಜ್ಜೆ ಮೇಲ್ಹೆಜ್ಜೆ ತೆಳ್ಳ-ಉದರದಿ ||

ಸೋಮಾರಿತನವೊ ಸುಖವೊ
ಯೌವ್ವನ ದಾಟಿದಾ ನೇರವೊ
ಮದುವೆ ಮುಗಿದ ನಿರಾಳವೊ
ಪ್ರಗತಿಯ್ಹೊಟ್ಟೆಗೇ ಕರಾಳವೊ ! ||

ಹಾಗು ಬಾಯ್ಚಪಲವೆ ಸಫಲ
ನಿಯಂತ್ರಣ ರೇಖೆಯೆ ವಿಫಲ
ಬೆವರರಿಸದ ಆಲಸ್ಯಕಿಂಪಾಗಿ
ಭೂಮಿಯಾಗ್ಹೊಟ್ಟೆ ಸೊಂಪಾಗಿ.. ||

ಇದು ಸಾಮಾನ್ಯರ ಸಂಸಾರಕೆ
ಮಂತ್ರಿ ಮಹೋದಯರ ಸರಕೆ
ಗರ್ಭಿಣಿಯರಿಗಿಂತಲೂ ಜೋರೆ
ಭ್ರಷ್ಟಾಚಾರದೆ ತಿಂದ ತವರೆ ||

– ನಾಗೇಶ ಮೈಸೂರು.

(Photo source : http://edition.cnn.com/2015/11/11/health/beer-belly-fat-may-kill-you/)

00696. ಶ್ರೀ ಲಿಲಿತಾ ನಾಮ – ಹಾಯ್ಕು ಯತ್ನ (೦೦೧೯-೦೦೨೭)

00696. ಶ್ರೀ ಲಿಲಿತಾ ನಾಮ – ಹಾಯ್ಕು ಯತ್ನ (೦೦೧೯-೦೦೨೭)
_____________________________________________

ಲಲಿತಾ ಸಹಸ್ರ ನಾಮದ ಒಂಭತ್ತು (೧೯-೨೭) ಹೆಸರಿನ ಭಾಗಶಃ ನಾಮಾರ್ಥಗಳನ್ನು ಹಾಯ್ಕು ಮಾದರಿಯಲ್ಲಿ ಮೂಡಿಸುವ ಯತ್ನ. ಆ ಯತ್ನದಲ್ಲಿ ಅರ್ಥ ನಷ್ಟವೋ, ಹಾಯ್ಕು ನಿಯಮ ಉಲ್ಲಂಘನೆಯೊ ಆಗಿದ್ದರೆ ಕ್ಷಮೆಯಿರಲಿ 😊

(ಶ್ರೀಯುತ ರವಿಯವರ ಮೂಲ ಇಂಗ್ಲೀಷಿನಲ್ಲಿದ್ದ ಸಹಸ್ರನಾಮ ವಿವರಣೆಯನ್ನು ಕನ್ನಡೀಕರಿಸಿದ ಶ್ರೀ ಶ್ರೀಧರ ಬಂಡ್ರಿಯವರ ವಿವರಣೆಯನ್ನಾಧರಿಸಿ ನಾನು ಬರೆದಿದ್ದ ಪದ್ಯಗಳನ್ನು ಮೂಲವಾಗಿಟ್ಟುಕೊಂಡು ಈ ಹಾಯ್ಕುಗಳನ್ನು ಹೊಸೆದಿದ್ದೇನೆ. ಆ ಮೂಲ ಪದ್ಯಗಳನ್ನು ಜತೆಗೆ ನೀಡಿದ್ದೇನೆ, ತುಸು ಹೆಚ್ಚಿನ ಸ್ಪಷ್ಟತೆಗಾಗಿ)

೦೦೧೯. ನವಚಂಪಕ-ಪುಷ್ಪಾಭ-ನಾಸದಂಡ-ವಿರಾಜಿತಾ
___________________________________

ನೀಳ ನಾಸಿಕ
ಬಿರಿದಂತೆ ಸಂಪಿಗೆ
– ದೇವಿ ಸೊಬಗೆ.

ಸುಕೋಮಲ ಸುಂದರ ಸಂಪಿಗೆ ಬೀರುತ ಪರಿಮಳ
ಸೆರೆ ಹಿಡಿದಂತೆ ಮೈ ಮನ ಸುವಾಸನೆ ಮನದಾಳ
ಬಿರಿದರೆಷ್ಟು ಸೊಗವೆ ನೀಳ ನಾಸಿಕ ಅರಳಿದ ಹೂವೆ
ಹೊಚ್ಚಹೊಸತೆ ಬಿರಿದ ಪುಷ್ಪನಾಸಿಕ ದೇವಿ ಮೊಗದೆ ||

೦೦೨೦. ತಾರಾಕಾಂತಿ-ತಿರಸ್ಕಾರಿ-ನಾಸಭರಣ-ಭಾಸುರಾ
___________________________________

ಮೂಗುತಿ ಮಣಿ
ಗ್ರಹ ಮಂಗಳ ಶುಕ್ರ
– ಹರಿಸೆ ದೋಷ.

ಕೆಂಪು ಮಾಣಿಕ್ಯದಧಿಪತಿ ಮಂಗಳ ವಜ್ರಾಧಿಪತಿ ಶುಕ್ರ
ದೇವೀ ಮೂಗುತಿಯಾಗ್ಹಿಡಿದ ಗ್ರಹ ನಿಯಂತ್ರಣ ಸೂತ್ರ
ಮುತ್ತು ಮಾಣಿಕ್ಯದೆ ಮಿನುಗುವ ಮೂಗುತಿಯ ಧರಿಸೊ
ಲಲಿತಾ ಪೂಜೆಯ ಮಾಡುತೆ ಗ್ರಹದೋಷ ನಿವಾರಿಸೊ ||

೦೦೨೧. ಕದಂಬ-ಮಂಜರೀ-ಕ್ಲುಪ್ತ-ಕರ್ಣಪೂರ-ಮನೋಹರಾ
_____________________________________

ಕದಂಬ ವೃಕ್ಷ
ಹೂ ಸೊಗ ದೇವಿಮುಡಿ
– ಕರ್ಣಾಭರಣ.

ಚಿಂತಾಮಣಿ ದೇವಿಯರಮನೆ ಹೊರಗೆ
ಬಿಡುವ ಕದಂಬವೃಕ್ಷ ಹೂಗಳೆ ಸೊಬಗೆ
ದೇವಿ ಮುಡಿಯೇರಿ ವ್ಯಾಪಿಸವಳಾಕರ್ಣ
ದಿವ್ಯ ಪರಿಮಳ ಸೂಸೋ ಕರ್ಣಾಭರಣ ||

೦೦೨೨. ತಾಟಙ್ಕ-ಯುಗಲೀ-ಭೂತ-ತಪನೋಡುಪ-ಮಂಡಲಾ
_____________________________________

ಸೂರ್ಯಚಂದ್ರರೆ
ಕಿವಿಯೋಲೆ ಇಹದ
– ಚಟುವಟಿಕೆ.

ಅಮರತ್ವದ ಅಮರತ್ವ ಶಿವ ದೇವಿ ಕರ್ಣಾಭರಣ ಕಾರಣ
ಸೂರ್ಯಚಂದ್ರರೆ ಕಿವಿಯೋಲೆ ನಯನ ಪ್ರತಿನಿಧಿಸಿ ಸ್ತನ
ಬೀಜಾಕ್ಷರ ಸಂಯುಕ್ತ ಸಶಕ್ತ ಜಗದ ಚಟುವಟಿಕೆ ಸಮಸ್ತ
ಇಹಜೀವನ ಸ್ಥಿಮಿತತೆ ಕಾರಣ ರವಿ ಶಶಿ ನಿಯಂತ್ರಿಸುತ ||

೦೦೨೩. ಪದ್ಮರಾಗ-ಶಿಲಾಧರ್ಶ-ಪರಿಭಾವಿ-ಕಪೋಲಭೂಃ
_____________________________________

ಪ್ರತಿಫಲನ
ಓಲೆ ಕಪೋಲ ಕೆಂಪು
– ಕರುಣಾ ಚಿಹ್ನೆ.

ಚತುರ್ಚಕ್ರ ಮನ್ಮಥರಥ ವದನ ಶಿವನ ಕಾವ ಕಾಡೊ ರೂಪು
ವಿಶಾಲ ಕಪೋಲದಿ ಪ್ರತಿಫಲಿಸಿ ಕಿವಿಯೋಲೆಯಾ ಹೊಳಪು
ಮೃದು ಪದ್ಮರಾಗ ಮೈ ಕಾಂತಿ ಕದಪು ಮಣಿ ಆಭರಣ ಕೆಂಪು
ಕರ್ಣ ರಥಚಕ್ರ ರವಿಶಶಿಗೂ ಕೆಂಪಲೆ ಕರುಣಾ ಸಂಕೇತ ಕದಪು ||

೦೦೨೪. ನವವಿದ್ರುಮ-ಬಿಂಬಶ್ರೀ-ನ್ಯಕ್ಕಾರಿ-ರದನಚ್ಛದಾ
_____________________________________

ಕೆಂಪು ತುಟಿಯ
ಹವಳದ ಹೊಳಪು
– ತಾಯ ಸೌಂದರ್ಯ.

ಕೆಂಪು ತುಟಿಗಳ ದೇವಿ ಅಪ್ರತಿಮ ಸ್ವರೂಪ
ತೊಂಡೆಹಣ್ಣುಗಳನ್ನು ಮೀರಿಸುವ ಅಪರೂಪ
ಹೊಳಪೆ ಹವಳದಾ ರೂಪಾಗಿ ಫಳಫಳಿಸಿತ್ತು
ಜಗದೇಕ ಸೌಂದರ್ಯ ಲಲಿತೆಯ ರೂಪಾಯ್ತು ||

೦೦೨೫. ಶುದ್ಧ-ವಿಧ್ಯಾಙ್ಕುರಾಕಾರ-ಧ್ವಿಜಪಂಕ್ತಿತ-ದ್ವಯೋಜ್ವಲಾ
_____________________________________

ಲಲಿತಾ ದಂತ
ಶ್ರೀವಿದ್ಯಾ ರಹಸ್ಯತೆ
– ಅಹಂ ಬ್ರಹ್ಮಾಸ್ಮಿ.

ಶ್ರೀವಿದ್ಯಾ ಸಮರ್ಥತೆ ರಹಸ್ಯತೆಯಾಗಿ ದಂತ ಪಂಕ್ತಿ
ಶುದ್ಧ ಸ್ವಚ್ಚ ವಿದ್ಯಾಜ್ಞಾನ ಅಪ್ಪಟ ಜ್ಞಾನಕಿಹ ಸಾರಥಿ
‘ನಾನು ಅದೆ’ ಅಹಂ ಬ್ರಹ್ಮಾಸ್ಮಿ ಶುದ್ದಾದ್ವೈತ ತತ್ವಾ
ಲಲಿತಾದಂತ ಶ್ರೀವಿದ್ಯೆ ತರ ಕಾಣುವದ್ಭುತ ಮಹತ್ವ ||

೦೦೨೬. ಕರ್ಪೂರವೀಟಿಕಾಮೋಧ-ಸಮಾಕರ್ಷಿ-ದಿಗಂತರಾ
_____________________________________

ಜ್ಞಾನಿ ಅಜ್ಞಾನಿ
ಆಕರ್ಷಿಸೊ ಲಲಿತೆ
– ಪರಿಮಳದೆ.

ಜ್ಞಾನಿ ಜನ ಭಕ್ತಿ ಮುಖೇನ, ಅಮಾಯಕರ ಅಜ್ಞಾನ ಘನ
ಕರ್ಪೂರವೀಟಿಕಾ ಸುಗಂಧವ, ದೇವಿ ಪಸರಿಸಿ ಆಕರ್ಷಣ
ಕೇಸರಿ ಏಲಕ್ಕೀ ಲವಂಗ ಕಸ್ತೂರಿ ಜಾಪತ್ರೆ ಜಾಕಾಯಿಗೆ
ಕಲ್ಲುಸಕ್ಕರೆ ಪುಡಿ ತಾಂಬೂಲದೆ ಪರಿಮಳಿಸೊ ತಾಯಿಗೆ ||

೦೦೨೭. ನಿಜ-ಸಲ್ಲಾಪ-ಮಾಧುರ್ಯ-ವಿನಿರ್ಭರ್ತ್ಸಿತ-ಕಚ್ಛಪೀ
_____________________________________

ಲಲಿತಾ ದನಿ
ನಾಚಿ ಸರಸ್ವತಿಯ
– ವೀಣೆ ಸಂದೂಕ.

ಆಲಿಸುತಿಹ ಭಕ್ತ ಕೋಟಿಗೆ, ಸುಶ್ರಾವ್ಯ ಮಧುರ ಕರ್ಣಾನಂದ
ಕಲಾಧಿದೇವತೆ ಸರಸ್ವತಿ ಕಚ್ಛಪಿ ವೀಣೆಗೂ ಮೀರಿದ ಸುನಾದ
ಲಲಿತೆಯನೋಲೈಸಲೆ ಶಿವ ಲೀಲೆ ನುಡಿಸಿದರು ವೀಣಾಪಾಣಿ
ದೇವಿ ನುಡಿ ಝೇಂಕಾರಕೆ ನಾಚಿ ಸಂದೂಕ ಸೇರಿಸುವಳೆ ವಾಣಿ ||

– ನಾಗೇಶ ಮೈಸೂರು.

00695. ತಿಗಣೆ ನನ್ಮಗನೆ..! (ಹಾಯ್ಕು ಮಾದರಿ)

00695. ತಿಗಣೆ ನನ್ಮಗನೆ..! (ಹಾಯ್ಕು ಮಾದರಿ)
______________________________________

 
(೦೧)
ತಿಗಣೆ ಸರಿ
ಈ ಜನರಿಗೇನಪ್ಪ ?
– ಬರಿ ಜಿಗಣೆ.

(೦೨)
ತಿಗಣೆ ಜಾತಿ
ರಕ್ತ ಹೀರೊ ಸಹಜ
– ಸ್ವಾರ್ಥಿ ಜಗತ್ತು.

(೦೩)
ಚೀನದಲ್ಲಿಲ್ಲ
ತಿಗಣೆ ಕಾಟ ಗೊತ್ತ
– ಅಭಿ’ರುಚಿ’ಗೆ !

(೦೪)
ಆಸ್ಪತ್ರೆ ಬೆಡ್ಡು
ಸ್ವಚ್ಛ, ತಿಗಣೆ ಮುಕ್ತ
– ಅವರೇ ಸಾಕು !

(೦೫)
ರಾಜಕಾರಿಣಿ
ತಿಗಣೆ ನೆಂಟಸ್ತಿಕೆ
– ತರಬೇತಿಗೆ.

(೦೬)
ಹೊಸಕಿ ಹಾಕಿ
ತಿಗಣೆ ಸತ್ತರೇನು
– ಚಾದರ ಕಲೆ.

(೦೭)
‘ಟಪ್ಪೆಂ’ದು ಸದ್ದು
ಕೊಬ್ಬಿದ ತಿಗಣೆ ಹೊಟ್ಟೆ
– ನಮ್ಮ ನೆತ್ತರೆ !

(೦೮)
ತಿಗಣೆ ಕಚ್ಚೆ
ನಿರೋಧಿಸಲು ಶಕ್ತಿ
– ಆಳೊ ಅರ್ಹತೆ.

(೦೯)
ನೀತಿ ಸಂಹಿತೆ
ರಾತ್ರಿಗೆ ಮಾತ್ರ ಡ್ಯೂಟಿ
– ಪುಢಾರಿಗಲ್ಲ.

(೧೦)
ಸೊಳ್ಳೆಯ ಧಾಳಿ
ಚುಚ್ಚುಮದ್ದು, ಸಂಗೀತ
– ತಿಗಣೆ ವಾಸಿ !

(೧೧)
ಅದಕೂ ದುಃಖ
ತಿಗಣೆ ನನ್ಮಗನೇ
– ಬೈಯುವರಲ್ಲ.

(೧೨)
ಬಿಡದೆ ಕಾಡೆ
ತಿಗಣೆ ಜಾತಿ ಅಲ್ಲ
– ಕಾಡನು ಕಾಡೆ.

– ನಾಗೇಶ ಮೈಸೂರು

(Picture source: https://pixabay.com/en/bug-animal-nature-windows-162019/)

00694. ತಾಯಂದಿರ ದಿನಕಷ್ಟು (ಹಾಯ್ಕು ಮಾದರಿ)

00694. ತಾಯಂದಿರ ದಿನಕಷ್ಟು (ಹಾಯ್ಕು ಮಾದರಿ)
____________________________

(೦೧)
ಮುಟ್ಠಾಳತನ
ತಾಯಿಗೊಂದು ದಿವಸ
– ಅಲ್ಲದ ದಿನ.

(೦೨)
ಅವ್ವ ನನ್ನವ್ವ
ದೂರದಿಂದೆ ಹುಯಿಲು
– ಕ್ಷಮಾ ಧರಿತ್ರಿ.

(೦೩)
ಅವ್ವಗಳೆಲ್ಲ
ಒಂದೇ ಮೂಸೆ ಎರಕ
– ಮಕ್ಕಳ ಹಾಗೆ.

(೦೪)
ಹೆತ್ತ ಒಡಲು
ಕಡಲಿನ ಸಂಕಟ
– ಹೆತ್ತ ತಪ್ಪಿಗೆ.

(೦೫)
ಸೊಸೆಯವಳ
ಶಪಿಸಬೇಡ ತಾಯಿ
– ಅವಳೂ ತಾಯೆ.

(೦೬)
ಅಮ್ಮನ ನೆನೆ
ಅತ್ತೆಯನೂ ನೆನೆಯೆ
– ಮಗ ನೆನಸೆ.

(೦೭)
ಸ್ವಾರ್ಥಿಯವಳು
ಮಕ್ಕಳ ವಿಷಯದೆ
– ಮೊದಲು ಅಮ್ಮ.

(೦೮)
ಪಂಕ್ತಿ ಭೋಜನ
ಮಿಳ್ಳೆ ತುಪ್ಪ ಹೆಚ್ಚಿಗೆ
– ಮಗನೆಲೆಗೆ.

(೦೯)
ಕರುಳ ಬಳ್ಳಿ
ತವರಾಚೆ ತವಕ
– ಮಗಳ ಸುಖ.

(೧೦)
ಯಾವ ಕವಿಯೂ
ಬರೆಯಲಾರ ತಾಯ
– ಮಿಕ್ಕು ಬಹಳ.

– ನಾಗೇಶ ಮೈಸೂರು

(Picture source: https://pixabay.com/p-429158/?no_redirect)

00692. ಶ್ರೀ ಲಿಲಿತಾ ನಾಮ – ಹಾಯ್ಕು ಯತ್ನ (೦೦೦೧-೦೦೦೯)

00692. ಶ್ರೀ ಲಿಲಿತಾ ನಾಮ – ಹಾಯ್ಕು ಯತ್ನ (೦೦೦೧-೦೦೦೯)
_____________________________________________

ಲಲಿತಾ ಸಹಸ್ರ ನಾಮದ ಮೊದಲ ಒಂಭತ್ತು ಹೆಸರಿನ ಭಾಗಶಃ ನಾಮಾರ್ಥಗಳನ್ನು ಹಾಯ್ಕು ಮಾದರಿಯಲ್ಲಿ ಮೂಡಿಸುವ ಯತ್ನ. ಮೇಲ್ನೋಟಕ್ಕೆ ಅರಿವಾಗುವಂತೆ ಇದು ಸುಲಭಕ್ಕೆ ದಕ್ಕದ ಸಂಕ್ಷಿಪ್ತತೆ. ಆದರೂ ಒಂದು ಯತ್ನ – ದೇವಿ ಲಲಿತೆಯ ಸ್ತುತಿಯಾದರೂ ಆದೀತೆಂಬ ನೆಪದಲಿ. ಆ ಯತ್ನದಲ್ಲಿ ಅರ್ಥ ನಷ್ಟವೋ, ಹಾಯ್ಕು ನಿಯಮ ಉಲ್ಲಂಘನೆಯೊ ಆಗಿದ್ದರೆ ಕ್ಷಮೆಯಿರಲಿ 😊

(ಶ್ರೀಯುತ ರವಿಯವರ ಮೂಲ ಇಂಗ್ಲೀಷಿನಲ್ಲಿದ್ದ ಸಹಸ್ರನಾಮ ವಿವರಣೆಯನ್ನು ಕನ್ನಡೀಕರಿಸಿದ ಶ್ರೀ ಶ್ರೀಧರ ಬಂಡ್ರಿಯವರ ವಿವರಣೆಯನ್ನಾಧರಿಸಿ ನಾನು ಬರೆದಿದ್ದ ಪದ್ಯಗಳನ್ನು ಮೂಲವಾಗಿಟ್ಟುಕೊಂಡು ಈ ಹಾಯ್ಕುಗಳನ್ನು ಹೊಸೆದಿದ್ದೇನೆ. ಆ ಮೂಲ ಪದ್ಯಗಳನ್ನು ಜತೆಗೆ ನೀಡಿದ್ದೇನೆ, ತುಸು ಹೆಚ್ಚಿನ ಸ್ಪಷ್ಟತೆಗಾಗಿ)

೦೦೦೧. ಶ್ರೀ ಮಾತಾ
______________

ಬ್ರಹ್ಮಾಂಡ ಮಾತೆ
ಆತ್ಮ ಸಾಕ್ಷಾತ್ಕಾರಕೆ
– ದಾಟಿಸುವಾಕೆ.

ಮಾತೆಗಳಾ ಮಾತೆ ಬ್ರಹ್ಮಾಂಡದ ತಾಯಿ ಲಲಿತೆ
ಆವಿರ್ಭಾವ ಪ್ರಪಂಚ ನಡೆಸಾಣತಿ ಲಯ ಲೀನತೆ
ಸಂಸಾರ ಸಾಗರ ಅಡೆತಡೆ ಕಡೆಗಾತ್ಮಸಾಕ್ಷಾತ್ಕಾರ
ಈಜುತೆ ಪ್ರವಾಹದೆದುರೆ ದಾಟಿಸುತಲಿ ಸಂಸಾರ ||

೦೦೦೨. ಶ್ರೀ ಮಹಾರಾಜ್ಞೀ
________________

ಜಗದ ರಾಣಿ
ನಿಗೂಢ ಬೀಜ ಮಂತ್ರ
– ಜನ್ಮ ವಿಮುಕ್ತಿ.

ನಿಗೂಢ ಶಕ್ತಿಯುತ ಬೀಜಾಕ್ಷರ, ನಾಮಾವಳಿಯಂತರ್ಗತೆ
ಷೋಡಶೀ ಪರಮ ಮಂತ್ರ, ‘ಪಂಚದಶೀ’ಗೆ ಬೀಜಾಕ್ಷರ ಜತೆ
ಕ್ರಮಬದ್ಧ ವಿಧಿ ವಿಧಾನದಲುಚ್ಚರಿಸೆ ನವ ಲಕ್ಷ ಸಲ ಭಕ್ತಾ
ಜಗ ಪರಿಪಾಲಿಪ ಮಹಾರಾಣಿ, ಪುನರ್ಜನ್ಮ ವಿಮುಕ್ತಿಸುತ ||

೦೦೦೩. ಶ್ರೀಮತ್ ಸಿಂಹಾಸನೇಶ್ವರೀ
_______________________

ಜಗವನಾಳೊ
ಲಕ್ಷ್ಮಿ ಕಟಾಕ್ಷದಾತೆ
– ಬಿಂದು ಪೂಜಿತೆ.

ಜಗವನಾಳುವ ಸಿಂಹಾಸನೇಶ್ವರೀ ಅಂತಿಮ ಲಯಕರಿ
ಲಕ್ಷ್ಮಿಯಾಗೆಲ್ಲ ಐಹಿಕ ಐಶ್ವರ್ಯ ಭಕ್ತಗೀವ ಕರುಣಾಕರಿ
ಅಷ್ಟಸಿಂಹಾಸನಮಂತ್ರ ಉಚ್ಚಾರ ಚತುರ್ಪಾರ್ಶ್ವ ಅರಿತೆ
ಜತೆ ಬಿಂದುಪೂಜೆ ಇಪ್ಪತ್ನಾಲ್ಕು ದೇವತೆಗೊಡತಿ ಲಲಿತೆ ||

೦೦೦೪. ಚಿದಗ್ನಿಕುಂಡ ಸಂಭೂತಾ
______________________

ಅಜ್ಞಾನ ಕರ್ಮ
ಜ್ಞಾನಾಗ್ನಿಕುಂಡ ಸುಟ್ಟ
– ನಿರ್ಗುಣ ಪ್ರಜ್ಞೆ.

ಅಗ್ನಿಕುಂಡ ಸಂಕೇತ ಅಂಧಕಾರವನಟ್ಟುವ ನಿರ್ಗುಣ ಪ್ರಜ್ಞೆ
ಅಜ್ಞಾನದ ಕತ್ತಲ ಮಾಯೆಗೆ ಚೈತನ್ಯ ಸ್ವ-ಪ್ರಕಾಶದೆ ಆಜ್ಞೆ
ಜ್ಞಾನಾಗ್ನಿ ಧಗಧಗನುರಿದು ಬೂದಿಯಾಗಿಸುತೆಲ್ಲಾ ಕರ್ಮ
ಕರ್ಮ ಖಾತೆಯಲಿದ್ದರೆ ಶೂನ್ಯಶೇಷವಿನ್ನಿಲ್ಲದ ಪುನರ್ಜನ್ಮ ||

೦೦೦೫. ದೇವಕಾರ್ಯ ಸಮುದ್ಯತಾ
_______________________

ದೇವ ದಾನವ
ಜ್ಞಾನಾಜ್ಞಾನ ಸಂಕೇತ
– ದೈತ್ಯ ದಮನ.

ಅಜ್ಞಾನ ಅವಿದ್ಯೆ ರಾಕ್ಷಸ, ಜ್ಞಾನ ವಿದ್ಯೆಯೆ ದೇವತೆ ಮೊತ್ತ
ಅಮಾಯಕಪೂಜೆ ಸಾಮಾನ್ಯರೂಪ ಅಸಾಮಾನ್ಯ ನಿಮಿತ್ತ
ಆದಿ ಅಂತ್ಯಾಕಾರರಹಿತ ನಿರ್ಗುಣ ನಿರ್ಲಕ್ಷಣಾ ಪರಮಾತ್ಮ
ಅಸುರ ದಮನಕೆ ಪ್ರಕಾಶರೂಪ ವಿಮರ್ಶಾರೂಪ ಬ್ರಹ್ಮಾತ್ಮ ||

೦೦೦೬. ಉದ್ಯದ್ಭಾನು-ಸಹಸ್ರಾಭಾ
______________________

ಭೌತಿಕ ಧ್ಯಾನ
ಸುಲಭ ; ಸೂಕ್ಷ್ಮ, ಪರ
– ಮಂತ್ರ, ಮನದೆ.

ಅಗಣಿತ ಅರುಣೋದಯ ದಿನಮಣಿಯಷ್ಟು ಪ್ರಭೆ
ಕುಂಕುಮ ಲೇಪಿತ ಕೆಂಪಿನ ಮೈಕಾಂತೀ ಸೊಬಗೆ
ಭೌತಿಕ ರೂಪವಾಗಿಸಿ ಸುಲಭ ಧ್ಯಾನದಾ ಮಾರ್ಗ
ಸೂಕ್ಷ್ಮರೂಪಕೆ ಮಂತ್ರ ಪರಾರೂಪಕೆ ಮನದ ಜಗ ||

೦೦೦೭. ಚತುರ್ಬಾಹು-ಸಮನ್ವಿತಾ
______________________

ಪ್ರತಿ ಕರವು
ಲಲಿತೆಯ ಮಂತ್ರಿಣಿ
– ಸಹಾಯ ಹಸ್ತ.

ದೇವಿ ಲಲಿತಾಂಬಿಕೆ ಭೌತಿಕ ರೂಪ ಸುನೀತ
ಚತುರ್ಭುಜ ಬಾಹುಗಳಲಿ ದೇವಿ ರಾರಾಜಿತ
ಪ್ರತಿ ಕರವು ಪ್ರತಿನಿಧಿಸೆ ಲಲಿತೆಗೆ ಮಂತ್ರಿಣಿ
ಸಹಾಯದೆ ಜಗ ಪರಿಪಾಲಿಸಿ ಮಾತೆ ವಾಣಿ ||

೦೦೦೮. ರಾಗಸ್ವರೂಪ-ಪಾಶಾಢ್ಯಾ
_______________________

ಎಡದೆ ಪಾಶ
ಭಕ್ತರಾಸೆ ಸೆಳೆವ
– ಅಶ್ವಾರೂಡಿಣಿ.

ಆಶಾ ಪಾಶದ ಕುಣಿಕೆ ಸೆಳೆಯುವ ಹಗ್ಗ
ಭಕ್ತರಾಸೆಯೆಲ್ಲ ಪಾಶದೀ ಸೆಳೆವ ಸೊಗ
ಅಶ್ವಾರೂಢಾದೇವಿ ಪ್ರತಿನಿಧಿಸೊ ಎಡಗೈ
ಇಚ್ಚಾಶಕ್ತಿ ಬಳಸಿ ಆಸೆ ಮರೆಸೊ ತಾಯಿ ||

೦೦೦೯. ಕ್ರೋಧಾಕಾರಂಕುಶೋಜ್ವಲಾ
________________________

ಬಲದಂಕುಶ
ಕ್ರೋಧಾಸೂಯೆ ದ್ವೇಷಕೆ
– ಸಂಪತ್ಕರಿಣಿ.

ಬಲದ ಕೈ ಪ್ರತಿನಿಧಿಸೊ ಸಂಪತ್ಕರಿದೇವಿ ಕೆಲಸ
ಭಕ್ತರ ಕ್ರೋಧ ದ್ವೇಷಾಸೂಯೆ ನಶಿಸುವ ಅಂಕುಶ
ಜ್ಞಾನ ಪ್ರಸಾದಿತೆ ದೇವಿಯ ಸೂಕ್ಷ್ಮಶರೀರ ನಾಮ
ಭಕ್ತ ಜನರೆಲ್ಲರ ಕೆಡುಕು ಕಾಳಿಯಾಗಿ ನಿರ್ನಾಮ ||

– ನಾಗೇಶ ಮೈಸೂರು

00691. ಕೂಗಳತೆ..

00691. ಕೂಗಳತೆ..
_________________

ಓರ್ವ ವ್ಯಕ್ತಿ ವ್ಯಕ್ತಿತ್ವಕಿಂತ
ದೊಡ್ಡದು
ಪ್ರಜಾ ಸಮಷ್ಟಿ;
ಪ್ರಜಾ ಸಮಷ್ಟಿಗಿಂತ ದೊಡ್ಡದು
ವಿಶ್ವ ಸಮಗ್ರ ದೃಷ್ಟಿ..
ಸಮಗ್ರ ವಿಶ್ವ ನಿಯತಿಯಡಿಯಾಳು –
ಅದರಾಟ ನೋಟದಲಿ ನಮ್ಮ ಬಾಳು.

ಅದರಂತರಾಳದಲಿಲ್ಲ
ವ್ಯಕ್ತಿ ವ್ಯಕ್ತಿತ್ವದ ದನಿ ಸಂದಣಿ
ಕೇಳುವುದಿಲ್ಲ ಅಲ್ಲಿ
ಪ್ರಜಾವಾಣಿಯ ಗುಂಪು ಗದ್ದಲ
ಮೊಳಗುವುದೊಂದೆ ಅಲ್ಲಿ
ವಿಶ್ವವಾಣಿಯ ಕಹಳೆ
ಸೃಷ್ಟಿ ಸಮಸ್ತದ ನಿನಾದ.

– ನಾಗೇಶ ಮೈಸೂರು

00689. ನೀರು ನೀರು ನೀರು (ಹಾಯ್ಕು)

00689. ನೀರು ನೀರು ನೀರು (ಹಾಯ್ಕು)
_____________________________

(೦೧)
ಸುಖ ದುಃಖಕ್ಕೆ
ಹಾಕೇ ಬೇಕು ಕಣ್ಣೀರು
– ಉಳಿಸಿ ನೀರು.

(೦೨)
ಮಳೆಯ ಹನಿ
ಚಡಪಡಿಸಿ ಇಳೆಗೆ
– ಪ್ರಭೆಗೆ ಹಬೆ.

(೦೩)
ಹನಿ ಲೆಕ್ಕದೆ
ನೀರು ಮಾರುವ ಕಾಲ
– ನಿರ್ಲಜ್ಜ ಜೀವ.

(೦೪)
ಕೊನೆಯುಸಿರು
ಬಯಸೆ ಗಂಗಾ ಜಲ
– ಮಿಳ್ಳೆಯಾದರು.

(೦೫)
ಬಾಟಲಿ ನೀರು
ತೆತ್ತು ಕೊಳ್ಳುವರಾರು
– ಬಡವರಲ್ಲ.

(೦೬)
ಬತ್ತಿದ ಜಲ
ಕುತ್ತಿಗೆ ಹಿಸುಕಿದ್ದು
– ಬರದ ಬರೆ.

(೦೭)
ಅಂತರ-ಗಂಗೆ
ಅಂತರಂಗದ ಹಾಗೆ
– ಮಾಡಿದ್ದುಣ್ಣಿರೊ.

(೦೮)
ಅಂತರ್ಜಲಕೆ
ಏಣಿ ಹಾಕಿಳಿದರು
– ಏರದ ಜಲ.

(೦೯)
ಭಗೀರಥನ
ಸಂತಾನ ಎಲ್ಲಿಹರು ?
– ಇಳೆಯ ಮೊರೆ.

(೧೦)
ನೀರಿಗೂ ಬರ
ಬರಬಾರದು ನರ
– ಸಾಕು ನಿದಿರೆ.

– ನಾಗೇಶ ಮೈಸೂರು

00688. ಹಣತೆಯಲ್ಲ ಇದು ಅಣತಿ..!(3K photo)

00688. ಹಣತೆಯಲ್ಲ ಇದು ಅಣತಿ..! (3K photo)
____________________________

ಇವು ಹಣತೆಗಳಲ್ಲ ತಮ್ಮ
ಹಚ್ಚೀಯೆ ಜೋಕೆ! ಜೋಪಾನ..
ಹಚ್ಚಿದ ಅರಿಶಿನ ಕುಂಕುಮ
ಮರುಳಾಗದಿರು ಬಣ್ಣದ ಜಗಕೆ..
ಕನ್ನಡ ಬಾವುಟವಿದು ಧನ್ಯ
ಪೂಜನೀಯ ಭಾವದ ಚಿತ್ರಣ
ಕಿಚ್ಚು ಹಚ್ಚುವರೇ ತಾಯಿಗೆ ?
ಹಳದಿ ಕೆಂಪಿನ ಸೀರೆಯ ಸೆರಗು..

ತುಂಬದಿರು ಎಣ್ಣೆ ಬತ್ತಿ ಇತ್ಯಾದಿ
ಒಂದೊಂದರಲು ತುಂಬಲಿ ಆಶಯ
ತಾಯ್ನಾಡು ನುಡಿ ನೆಲದ ಸೊಗಡು
ಒಬ್ಬೊಬ್ಬರಿಗೊಂದೊಂದು ಲೆಕ್ಕದಲಿ ;
ಮುತ್ತೈದೆಯ ಬಾಗಿನ ತೆರದಲಿ
ಚೆಲ್ಲಾಡಲಿ ಕನ್ನಡ ಬಣ್ಣಬಣ್ಣದಲಿ
ಹೆಸರಾಗಲಿ ಉಸಿರಾಗಲಿ ಸಾಲಾಗಿ
ಉರಿಯದೆ ಚಿರವಾಗಲಿ ನಶಿಸದೆ…

ನಾನಾರೆನ್ನುವೇಯೇಕೊ ಅರಿಯೆ
ಕನ್ನಡಮ್ಮನ ಕುಡಿಗು ಸಂಶಯವೇ ?
ಭುವನೇಶ್ವರಿ ಮಾತ್ರವೆ ಮಾತೆ ?
ನಾ ಕಾಯಕದಲಿ ನಿರತೆ ಕೈಯಾಗುತೆ..
ಕರ ಜೋಡಿಸುವೆಯ ? ಬಾ ಮಗುವೆ
ಪಸರಿಸಿಬಿಡುವ ಭೂ ನೆಲ ಜಲದೆ
ಕನ್ನಡ ಬಾವುಟದಲಿ ಬೆರೆಸಿ ಉಸಿರು
ಹಸಿರಾಗಿಸುವ ನಾಡಿನ ಹೆಸರು..

– ನಾಗೇಶ ಮೈಸೂರು

00687. ಬೆಳಕಾಯ್ತು (ಹಾಯ್ಕು)

00687. ಬೆಳಕಾಯ್ತು (ಹಾಯ್ಕು)
______________________

(೦೧)
ನಸುಕು ತಮ
ಕೊಡವಿ ಮೈ ಮುರಿದ
– ಮೂಡಲ ಮನೆ .

(೦೨)
ಕೆಂಪು ಕದಪು
ಮಿಲನದ ರಾತ್ರಿಗೆ
– ಅರುಣ ರಾಗ.

(೦೩)
ಮುಂಜಾವಿನಲಿ
ಬೆಳಕ ಹೊಕ್ಕ ತಮ
– ಪುರುಷ ಗರ್ವ.

(೦೪)
ಮುಸ್ಸಂಜೆಯಲಿ
ಬೆಳಕ ನುಂಗಿ ತಮ
– ಪ್ರಕೃತಿ ಪಾಳಿ.

(೦೫)
ಮೆಲ್ಲಮೆಲ್ಲನೆ
ಕಣ್ಣ ಬಿಟ್ಟಿತೆ ನಭ
– ಅರುಣೋದಯ.

(೦೬)
ರವಿಗೆಚ್ಚರ
ಕನ್ನಡಿ ನೀರ ಬಿಂಬ
– ಕ್ಷಣಿಕ ಸುಖ.

(೦೭)
ಸೂರ್ಯ ಚಂದ್ರರ
ಹಗಲು ರಾತ್ರಿ ಪಾಳಿ
– ಮುಗಿದೇ ಇಲ್ಲ.

(೦೮)
ಹೊಳೆದು ನೀರು
ರವಿಯಾಕಳಿಕೆಗೆ
– ಫಳ ಫಳನೆ.

(೦೯)
ಭುವಿ ಸೆರಗು
ತೆರೆ ಹಗಲಿರುಳು
– ಇಬ್ಬರ ಸಖಿ.

(೧೦)
ಮುಂಜಾನೆ ಹನಿ
ಮಿಲನದ ಬೆವರು
– ಗುಟ್ಟು ಹುಲ್ಲಡಿ.

– ನಾಗೇಶ ಮೈಸೂರು

00686. ಮನಸಿನ ಸುತ್ತ (ಹಾಯ್ಕು)

00686. ಮನಸಿನ ಸುತ್ತ (ಹಾಯ್ಕು)
_________________________

(೦೧)
ಅನುಮನಸು
ಅರೆಮನಸಿನ ಕೂಸು
– ಚಂಚಲ ಚಿತ್ತ.

(೦೨)
ಕೊಟ್ಟ ಮನಸು
ಅಮೂರ್ತ ಸರಕದು
– ಘನ ವ್ಯಾಪಾರ.

(೦೩)
ಭಾವದ ಲೆಕ್ಕ
ವಿದೇಹಿ ವಿನಿಮಯ
– ಮನ ವಾಣಿಜ್ಯ.

(೦೪)
ಮನ ವ್ಯಾಪಾರ
ಭರ್ಜರಿ ಆಯವ್ಯಯ
– ನೋವು ನಲಿವು.

(೦೫)
ಮನದಾಸೆಯ
ಆಯಾತ ನಿರ್ಯಾತಕೆ
– ಕರ ವಿನಾಯ್ತಿ.

(೦೬)
ಸದ್ಯ ಕಾಣದು
ಬದುಕಿತು ಬಡ ಜೀವ
– ಮನದೊಳಗು.

(೦೭)
ಸಭ್ಯತೆ ಸೋಗು
ಹಾಕದು ಮನ ಸುಳ್ಳೆ
– ಬುದ್ಧಿ ಕುಟಿಲ.

(೦೮)
ಮನದ ಬೇಲಿ
ಬಾಯಾಗಿ ಮಾತ ಖೋಲಿ
– ಖಾಲಿ ಜೋಕಾಲಿ.

(೦೯)
ಮನ ಮನಸ
ಅರಿವ ಇಂದ್ರಜಾಲ
– ಇನ್ನೂ ಕನಸು.

(೧೦)
ಪರಸ್ಪರರ
ಚೆನ್ನಾಗಿ ಅರಿತಿವೆ
– ಪ್ರೇಮಿಯ ಭ್ರಮೆ.

– ನಾಗೇಶ ಮೈಸೂರು

(Picture source: https://en.m.wikipedia.org/wiki/File:Phrenology1.jpg)

00685. ಮರದ ಮಾತು (ಹಾಯ್ಕು)

00685. ಮರದ ಮಾತು (ಹಾಯ್ಕು)
__________________________

(೦೧)
ಮರ ಅಮರ
ಯಾವ ಕಾಲದ ಮಾತು ?
– ಬರಿ ಸಮರ .

(೦೨)
ಉಳಿಸಿಕೊಳ್ಳಿ
ಪ್ರೇಮಿ ಸುತ್ತಲಾದರು
– ಪ್ರೇಮ ಕುರುಡು.

(೦೩)
ನೆಟ್ಟರೆ ಸಾಕು
ನೆರಳಾಗೊ ನಿಯತ್ತು
– ಪುರುಸೊತ್ತಿಲ್ಲ.

(೦೪)
ಹತ್ತು ಮುರಿದು
ಹತ್ತಕ್ಕೊಂದೂ ನೆಡರು
– ನಾಡಿನ ಗಡಿ.

(೦೫)
ರೊಚ್ಚಿನ ಮಳೆ
ತೆರವು ಮಾಡಿ ರಸ್ತೆ
– ಮತ್ತೆ ನೆಡದೆ.

(೦೬)
ರಾ’ಮರ’ ಕಥೆ
ಹಿನ್ನೋಟ ಅಚಲತೆ
– ಹೆಸರ’ಮರ’.

(೦೭)
ಮರ ಮಾದರಿ
ಋತು ಸ್ನಾನ ಹೊಸತು
– ಜೀವನ ಚಕ್ರ.

(೦೮)
ಸೇವೆ ಅಮರ
ಹೆಸರಿಗಷ್ಟೇ ಮರ
– ಅಜರಾಮರ.

(೦೯)
ತರಿದಿದ್ದರು
ನರನ ಸ್ವಾರ್ಥ ಸಹಿಸಿ
ಮೌನದನ್ವರ್ಥ.

(೧೦)
ಬಿದ್ದು ಕಂಗಾಲು
ಕತ್ತರಿಸಿ ಕಟ್ಟಿಗೆ
– ಉರುವಲಷ್ಟೆ.

– ನಾಗೇಶ ಮೈಸೂರು

00684. ಮೋಡ, ಮಳೆ, ಇತ್ಯಾದಿ (ಹಾಯ್ಕು)

00684. ಮೋಡ, ಮಳೆ, ಇತ್ಯಾದಿ (ಹಾಯ್ಕು)
_________________________________

(೦೧)
ಬಸುರಿ ಮೋಡ
ನಿತ್ಯ ಚಡಪಡಿಕೆ
– ಹೆರಿಗೆ ನೋವು.

(೦೨)
ಮೋಡದ ಬೇಟ
ಪ್ರಣಯ? ಅತ್ಯಾಚಾರ?
– ಹುಟ್ಟಿದ್ದು ಮಳೆ.

(೦೩)
ಮಳೆ ಹುಟ್ಟಿಗೆ
ಯಾರೂ ಕೊಡುವುದಿಲ್ಲ
– ಜಾರಿಣಿ ಪಟ್ಟ.

(೦೪)
ಕಂಡೀತು ಮಳೆ
ಕಾಣದ್ದು ಮೋಡ ಸ್ರಾವ
– ಕರಗೋ ಕ್ರೂರ.

(೦೫)
ರವಿ ಪೊಗರು
ಮೋಡದ ಸೆರಗಲಿ
– ಮಂಕು ದೀವಿಗೆ.

(೦೬)
ಹುಲ್ಲು ಗರಿಕೆ
ಸುರಿಸಿದ ಜೊಲ್ಲದು
– ಮೋಡದಿಬ್ಬನಿ.

(೦೭)
ಮಿಂಚೂ ಗುಡುಗು
ಖಳರು ಮಿಲನಕೆ
– ಗುಟ್ಟಾಗಿಡರು.

(೦೮)
ನಮ್ಮದೇ ನಭ
ಹೆತ್ತ ಮೋಡದ ರಾಜ್ಯ
– ಮಳೆ ನಮ್ಮಿಷ್ಟ.

(೦೯)
ಬರ ಸಿಡಿಲು
ಬರಗಾಲ ಕಾಲಿಡೆ
– ಮರ ನೆಡರು !

(೧೦)
ಪ್ರಗತಿ ಬೇಕು
ಮುಚ್ಚಿಸಿ ಮಳೆ ಬಾಯಿ
– ನಾಳೆ ನೋಡೋಣ.

– ನಾಗೇಶ ಮೈಸೂರು

00683. ಕಾಡು ಮತ್ತು ಕ್ರೌರ್ಯ ( ಪುಸ್ತಕ ಪರಿಚಯ)

00683. ಕಾಡು ಮತ್ತು ಕ್ರೌರ್ಯ ( ಪುಸ್ತಕ ಪರಿಚಯ)
__________________________________________

ಸಾಧಾರಣ ತೇಜಸ್ವಿಯರ ಯಾವುದೇ ಪುಸ್ತಕವನ್ನು ಪರಿಚಯ ಮಾಡಿಸುವ ಅಗತ್ಯ ಇರುವುದಿಲ್ಲ. ಅವೊಂದು ರೀತಿ ‘ಸ್ವಯಂಭು’ ಪ್ರವೃತ್ತಿಯ ‘ಸ್ವಯಂದರ್ಶಿ’ ಜಾತಿಗೆ ಸೇರಿದವು. ಆದರೂ ಈ ಪುಸ್ತಕ ನೋಡಿದಾಗ ಒಂದು ಪರಿಚಯ ಮಾಡಿಸುವ ಅಗತ್ಯವಿದೆ ಎನಿಸಿತು. ಅದಕ್ಕೆ ಮೊದಲ ಕಾರಣ – ಇದು ೧೯೬೨ರಲ್ಲಿ ತಮ್ಮ ಎಂ.ಎ. ಮುಗಿಸಿದ ನಂತರದ ದಿನಗಳಲ್ಲಿ ತೇಜಸ್ವಿ ಬರೆದ ಮೊಟ್ಟಮೊದಲ ಕಾದಂಬರಿ. ನಾನಾ ಕಾರಣಗಳಿಂದ ಪ್ರಕಟವಾಗದೆ ತೀರಾ ಈಚೆಗೆ ಬೆಳಕು ಕಂಡ ಕೃತಿ. ಪ್ರಕಾಶಕರ ಮಾತಿನಲ್ಲೆ ಹೇಳಿದಂತೆ ಸ್ವರೂಪ ಮತ್ತು ನಿಗೂಢ ಮನುಷ್ಯರು ಬರೆದಾದ ಮೇಲೆ ಸ್ವತಃ ತೇಜಸ್ವಿಯವರೆ, ಈ ಪುಸ್ತಕ ಪ್ರಕಟಿಸುವ ಮಾತೆತ್ತಿದಾಗ ‘ಹೂಂ’ ಅಥವಾ ‘ಉಹೂಂ’ ಎರಡೂ ಅಲ್ಲದ ತಮ್ಮ ಕಥೆಗಳಷ್ಟೆ ನಿಗೂಢವಾದ ಮುಗುಳ್ನಗೆಯೊಂದನ್ನು ಬಿತ್ತರಿಸಿ ಸುಮ್ಮನಾಗಿಬಿಡುತ್ತಿದ್ದರಂತೆ. ಅಂತಹ ಪುಸ್ತಕವೊಂದು ಕೊನೆಗೂ ೨೦೧೩ ರಲ್ಲಿ, ಬರೆದ ಸುಮಾರು ಐವತ್ತು ವರ್ಷಗಳ ನಂತರ ಪ್ರಥಮ ಮುದ್ರಣ ಭಾಗ್ಯ ಕಂಡಿತೆಂದ ಮೇಲೆ ಅದರ ಕುರಿತಾದ ಪರಿಚಯ ಸಾಕಷ್ಟು ಕುತೂಹಲಕಾರಿಯಾದ ವಿಷಯವೆ ಅಲ್ಲವೇ ? ಬಹುತೇಕ ತೇಜಸ್ವಿ ‘ಪರಮಾಭಿಮಾನಿ’ಗಳಿಗು ಈ ಪುಸ್ತಕ ಪರಿಚಿತವಿರಲಾರದೆಂಬ ಅನಿಸಿಕೆಯಲ್ಲಿ ಹೀಗೊಂದು ಪರಿಚಯದ ಯತ್ನ.

ಅಂದಹಾಗೆ ತೇಜಸ್ವಿಯವರ ನಂತರದ ಪುಸ್ತಕಗಳನ್ನು ಓದಿದವರಿಗೆಲ್ಲ ಒಂದು ಮುನ್ಸೂಚನೆ. ಈ ಪುಸ್ತಕ ಅವರ ಮೊದಲ ಕಾದಂಬರಿಯಾದ ಕಾರಣ ಹೊಸತಿನ ಆ ಸಂಧಿಕಾಲದ ತೇಜಸ್ವಿಯ ಮನಃಸ್ಥಿತಿ, ಚಿಂತನೆ, ಆಲೋಚನೆ, ದಿಟ್ಟತನ, ಒರಟು ಪ್ರಾಮಾಣಿಕತೆ ಎಲ್ಲವೂ ಇಲ್ಲಿ ಹಸಿಹಸಿಯಾಗಿ ಬಿಂಬಿತವಾಗಿರುವ ರೀತಿ ಸ್ವಲ್ಪ ವಿಚಿತ್ರವೆನಿಸಬಹುದು. ಆ ವಯಸಿನಲ್ಲಿರಬಹುದಾದ ಆದರ್ಶ, ಧಾರ್ಷ್ಟ್ಯ, ಪರಿಸರ ಮತ್ತು ವ್ಯವಸ್ಥೆಯ ಬಗೆಗಿನ ಆಪ್ಯಾಯತೆ-ಆಕ್ರೋಶ ಎಲ್ಲವೂ ಮೂರ್ತವಾಗುವ ತಹತಹಿಕೆಯಲ್ಲಿ ನಾವು ಕಂಡಿರದ ಒಂದು ಬೇರೆಯದೇ ಆದ ತೇಜಸ್ವಿಯ ಅನಾವರಣವಾದಂತಾಗುತ್ತದೆ. ಬಹುಶಃ ಆ ಬಿರುಸಿನ ವಯಸಿನಲ್ಲಿದ್ದ ಪ್ರಾಮಾಣಿಕ ಅನಾವರಣತೆಯ ದಿಟ್ಟತನ, ನಂತರದ ಬರಹಗಳಲ್ಲಿ ಪಕ್ವತೆಯ ಕಾರಣದಿಂದಲೊ, ಅತೀ ಪ್ರಾಮಾಣಿಕತೆಯುಂಟುಮಾಡುವ ಸಾರ್ವತ್ರಿಕ (ಅಪ್ರಕಟ) ಮುಜುಗರ ಅಥವಾ ನಾಚಿಕೆಗಳ ದೆಸೆಯಿಂದಲೊ ಮತ್ತಷ್ಟು ಅಮೂರ್ತವಾಗಿ ಆದರೆ ಅದರ ಪರ್ಯಾಯವಾದ ಸರಳತೆಯಾಗಿ ಹೊರಹೊಮ್ಮಿರುವುದು ಗೋಚರವಾಗುತ್ತದೆ. ಬರಹಗಾರನಾಗಿ ಅರಳತೊಡಗಿದ್ದ ತೇಜಸ್ವಿ ಇಲ್ಲಿ ದಟ್ಟ ವಿವರಗಳತ್ತ ಕೊಡುವ ಗಮನ ಮತ್ತು ಹೋಲಿಕೆ, ಸಾರೂಪ್ಯಗಳತ್ತ ತೋರುವ ಮೋಹ, ಆರಂಭಿಕ ದಿನಗಳಲ್ಲಿ ಅವರಿಗಿದ್ದ ‘ಪ್ರಬುದ್ಧತೆ ಮತ್ತು ಪಕ್ವತೆ’ಯನ್ನು ಬರಹಗಳಲ್ಲಿ, ಅಕ್ಷರ ಮತ್ತು ಪದಗಳಲ್ಲಿ ಬಲವಂತವಾಗಿಯಾದರೂ ಬಿಂಬಿಸಬೇಕೆನ್ನುವ ಹಂಬಲವನ್ನು ಪ್ರದರ್ಶಿಸುತ್ತವೆ; ಅದೇ ಹೊತ್ತಿನಲ್ಲಿ ಅವೆಲ್ಲಾ ತರದ ವ್ಯಾಮೋಹಗಳನ್ನು ಶೀಘ್ರದಲ್ಲೆ ತ್ಯಜಿಸಿ ನಾವೆಲ್ಲಾ ಪರಿಚಿತರಾಗಿರುವ ರೀತಿಯ ಬರಹದತ್ತ ವಾಲಿದ ಅದ್ಭುತವನ್ನು ಮನಗಾಣಿಸುತ್ತದೆ. ಈ ಅನಿಸಿಕೆ ಮೂಡುವುದೂ ಕೂಡ ಎರಡನ್ನು ಓದಿ ತುಲನೆ ಮಾಡುವುದರಿಂದಲೇ ಹೊರತು, ಒಂದರ ಹಂಗಿಲ್ಲದೆ ಮತ್ತೊಂದನ್ನು ಓದುವಾಗ ಎರಡೂ ತಮ್ಮದೇ ಆದ ಸ್ವಂತ ಛಾಪನ್ನು ಮೂಡಿಸುವ ವಿಶಿಷ್ಠ ಶೈಲಿಯವದೆಂದು ತೀರ್ಮಾನಿಸುವಂತಹ ಛಾತಿಯುಳ್ಳವು. ಅದೇನೆ ಇದ್ದರೂ ಇಲ್ಲೊಂದು ತೇಜಸ್ವಿಯ ಅಪರಿಚಿತ ಮುಖದ ಅನಾವರಣವಾಗುವುದೆಂದು ನನ್ನ ಅನಿಸಿಕೆ ( ಮೊದಲ ಬಾರಿಗೆ ಸ್ವರೂಪ, ನಿಗೂಢ ಮನುಷ್ಯರು ಓದಿದಾಗ ನನಗೆ ಹೀಗೆ ಅನಿಸಿತ್ತಾದರೂ, ಈ ಪುಸ್ತಕದ ಮಟ್ಟದಷ್ಟು ಅನಿಸಿರಲಿಲ್ಲ).

ಬಹುಶಃ ಇಂತದ್ದೊಂದು ಸಂಭಾವಿತ ಅರಿವು ತೇಜಸ್ವಿಯವರಿಗು ಇತ್ತೇನೊ ? ಮೊದಲನೇ ಮುದ್ರಣದಲ್ಲಿ ಕೈಗೆ ಸಿಗದಿದ್ದ , ತದನಂತರ ಸಿಕ್ಕಿದ ‘ಓದುವ ಮುನ್ನ’ ಟಿಪ್ಪಣಿಯಲ್ಲಿ ತೇಜಸ್ವಿಯವರೆ ತಾವು ಈ ಕಾದಂಬರಿಯ ಬಗೆ ಏನೂ ಬರೆಯಹೋಗದೆ ಆ ಕಾಲದ ಜೀವನ ಸಂಧರ್ಭ, ಸುತ್ತಲಿನ ಸ್ಥಿತಿಗಳ ಬಗೆಗಿನ ವಿವರಣೆ, ವಿಶ್ಲೇಷಣೆಯ ಚರ್ಚೆಗಿಳಿಯುತ್ತಾರೆ ( ಅಂದಹಾಗೆ ಈ ಬರಹವೇ ಒಂದು ಅದ್ಭುತ ಲೇಖನ , ಮಿಸ್ ಮಾಡಿಕೊಳ್ಳದೆ ಓದಿ. ನನಗಂತೂ ಅದು ಆಗಿನ ತೇಜಸ್ವಿಯವರ ಮನಃಸತ್ವ, ದ್ವಂದ್ವ, ವೈಚಾರಿಕ ಪ್ರಬುದ್ಧತೆಗಳೆಲ್ಲದರ ಒಟ್ಟು ಒಳನೋಟ ನೀಡುವ ಪ್ರಬಂದದಂತೆಯೆ ಭಾಸವಾಯ್ತು). ಇಲ್ಲೂ ತೇಜಸ್ವಿಯವರು ಪ್ರಾಮಾಣಿಕತೆಯ ದ್ವಂದ್ವ, ವಿಭಿನ್ನ ಪರಿಸಗಳಲ್ಲಿ ಅದನ್ನು ಅನ್ವಯಿಸುವಾಗ ಎದುರಿಸುವ ಗೊಂದಲಗಳ ತುಣುಕುಗಳನ್ನು ಕಾಣಿಸುತ್ತಲೆ, ಬರಹಗಾರನಾಗಿ ತಾವು ಎದುರಿಸಬೇಕಾದ ತಾತ್ವಿಕ ಮತ್ತು ಆಲೋಚನಾ ಕೋಟಲೆಗಳ ಒಂದು ಸೂಕ್ಷ್ಮಚಿತ್ರ ನೀಡಿ ಬಿಡುತ್ತಾರೆ. ಅದೆಲ್ಲವನ್ನು ಮೀರಿ ನನಗನಿಸಿದ್ದು – ಈ ಕಾದಂಬರಿ ಓದಿದವರ ಮನಸಿನಲ್ಲಿ ಏಳಬಹುದಾದ ಸೂಕ್ಷ್ಮ ತುಮುಲಗಳ ಅರಿವು ಆಗಲೇ ಇದ್ದಿರಬೇಕು ತೇಜಸ್ವಿಯವರಲ್ಲಿ. ಅದಕ್ಕೆ ಉತ್ತರವಾಗಿಯೇನೊ ಎಂಬಂತೆ ಇದೆ ಈ ‘ಓದುವ ಮುನ್ನ’ ದಲ್ಲಿ ಚರ್ಚಿಸಿರುವ ವಸ್ತು ವಿಷಯ ಚಿಂತನಾಲೋಚನೆಗಳು.

ಇನ್ನು ಕಾದಂಬರಿಯ ವಿಷಯಕ್ಕೆ ಬಂದರೆ – ಸೋಮು, ನಳಿನಿ, ಲಿಂಗ, ಗಿರಿಯ, ವೆಂಕ, ಕಾಡು ಮತ್ತು ಹಂದಿಗಳ ಮುಖ್ಯ ಪಾತ್ರಗಳ ಸುತ್ತ ಸುತ್ತುವ ಪತ್ತೆದಾರಿಯ ತರಹದ ಕಥಾನಕ. ಮೊದಲಿಗೆ ಹೆಸರೇ ಹೇಳುವಂತೆ ‘ಕಾಡು ಮತ್ತು ಕ್ರೌರ್ಯ’ ಇಲ್ಲಿನ ಮೂಲತಂತು. ಕಾಡು ಎನ್ನುವುದು ನಿಗೂಢತೆಯ ಸಂಕೇತ. ಪ್ರಕೃತಿಯ ಪರಮಾವತಾರವಾದ ಅದು ಹೇಗೆ ಪ್ರವರ್ತಿಸುವುದು ಎನ್ನುವುದು ಅನೂಹ್ಯ. ಚಂಚಲತೆ ಮತ್ತು ಅಸ್ಪಷ್ಟತೆ ಅದರ ಹಾಸುಹೊಕ್ಕಾದ ಸ್ವರೂಪ. ಅಲ್ಲಿ ಪ್ರೀತಿಯಿದ್ದಷ್ಟೆ ಕ್ರೌರ್ಯವೂ ಅಂತರ್ಗತ – ಅದರಲ್ಲಿರುವ ಜೀವ ನಿರ್ಜೀವ ಸರಕುಗಳ ಪ್ರಕಟಾಪ್ರಕಟ ರೂಪದಲ್ಲಿ. ಆದರೆ ಕಥೆಯ ಅಂತರಾಳಕ್ಕೆ ಹೊಕ್ಕುತ್ತಿದ್ದಂತೆಯೆ ಅರಿವಾಗತೊಡಗುತ್ತದೆ ಇದು ಬರಿ ಪ್ರಕೃತಿಯ ನಿಗೂಢತೆ ಮತ್ತು ಕ್ರೌರ್ಯದ ಕುರಿತಾದ ಕಥೆಯಲ್ಲ ಎಂದು. ಪ್ರತಿಯೊಂದು ಸಂಭಾವಿತ- ಅಸಂಭಾವಿತ ಮನಸಿನಲ್ಲೂ ಅಡಗಿ ಅಂತರಂಗದಲೇನೊ ಇದ್ದರೂ, ಬಹಿರಂಗದಲ್ಲಿ ಮತ್ತೇನಾಗಿಯೊ ಅನಾವರಣವಾಗುತ್ತ, ತನ್ಮೂಲಕ ತನ್ನ ‘ಕಾಡಿನ ನಿಗೂಢತೆ’ ಮತ್ತು ಅದು ಪ್ರಚೋದಿಸುವ ಸೂಕ್ಷ್ಮವಾದ ಮೇಲ್ತೋರಿಕೆಗೆ ಕಾಣಿಸಿಕೊಳ್ಳದ ‘ಕ್ರೌರ್ಯ’ ವಾಗಿ ಪ್ರಕಟವಾಗುವ ಬಗೆಯನ್ನು ಅದ್ಭುತವಾಗಿ ಚಿತ್ರಿಸುತ್ತ ಸಾಗುತ್ತದೆ ಕಥಾನಕ. ಒಂದಕ್ಕೊಂದು ಸಂಬಂಧಿಸಿರದ ಅಂತರಂಗದ ತಿಕ್ಕಾಟ ಮತ್ತು ಬಾಹ್ಯದ ಸಂಘಟನೆಗಳು ಹೇಗೊ ಪರಸ್ಪರ ಸಂಘರ್ಷಿಸಿ ನಿಗೂಢ ಸ್ತರದಲ್ಲಿ ಅಯಾಚಿತ ಕ್ರೌರ್ಯವಾಗಿ ಹೊರಹೊಮ್ಮುತ್ತವೆನ್ನುವುದು ಇಲ್ಲಿ ಸೋಜಿಗ. ಹೀಗೆ ಸಾಗುತ್ತ ಕೊನೆಗೆ ಈ ನಿಗೂಢತೆ ಮತ್ತು ಕ್ರೌರ್ಯಗಳ ದೆಸೆಯಿಂದಾಗಿ ಸರಳ ಚಿತ್ರಣವಾಗಬಹುದಿದ್ದ ಬದುಕೊಂದು ಸಂಕೀರ್ಣ ಆಯಾಮ ಪಡೆದು , ಇನ್ನು ಕಟ್ಟಲೇ ಆಗದು ಎನ್ನುವ ಮಟ್ಟಿಗೆ ಮುರಿದುಹೋದಂತೆ ಬೆಳೆಯುವ ಪರಿ ಅಸಾಧಾರಣ. ಕೌತುಕವೆಂದರೆ ನಿಗೂಢತೆ ಮತ್ತು ಕ್ರೌರ್ಯಗಳ ಅದೇ ಸರಕು, ‘ಇನ್ನೇನು ಎಲ್ಲಾ ಮುಗಿದೇಹೋಯಿತು’ ಎನ್ನುವಂತಿದ್ದ ಹಂತದಲ್ಲಿ ಮತ್ತೊಂದು ಅನಿರೀಕ್ಷಿತ ತಿರುವು ನೀಡಿ ಕಥಾನಕದ ಹಾದಿಯನ್ನೆ ಬದಲಿಸಿಬಿಡುತ್ತದೆ. ಈ ತಂತ್ರಗಾರಿಕೆಯಲ್ಲಿ ಕಾದಂಬರಿಯಲ್ಲಿ ಚಡಪಡಿಸುತ್ತಿದ್ದ ಪ್ರತಿ ಪಾತ್ರವೂ – ನಳಿನಿಯಾಗಲಿ, ಸೋಮುವಾಗಲಿ, ಲಿಂಗನಾಗಲಿ, ವೆಂಕನಾಗಲಿ ಕಡೆಗೆ ಆ ಹಂದಿಯಾಗಲಿ – ಎಲ್ಲವೂ ತಮ್ಮದೇ ಆದ ರೀತಿಯ ಪರಿಹಾರದ ಮೋಕ್ಷವನ್ನು ಪಡೆದುಕೊಳ್ಳುವುದು ವಿಶಿಷ್ಠವಾಗಿ ಕಾಣುತ್ತದೆ.

ಇನ್ನು ಕತೆಯ ಅಂತರಾಳಕ್ಕಿಳಿದು ಗೂಡಾರ್ಥಗಳಿಗಾಗಿ ತಡಕಾಡಿದರೆ ಆಗ ತೋಚುವ ಭಾವಗಳೇ ಬೇರೆ. ಕ್ರೂರ ಕಾಡುಹಂದಿಯ ಚಿತ್ರಣ ನಮ್ಮೆಲ್ಲರ ನಿಗೂಢ ಮನಸಿನ ಕ್ರೌರ್ಯದ ಸಂಕೇತವಾಗಿಬಿಡುತ್ತದೆ. ಅದೇ ಮನದಾಳದ ಮೌಢ್ಯ ಮೂಢನಂಬಿಕೆಗಳ ಮೂರ್ತರೂಪವಾಗಿಬಿಡುತ್ತಾನೆ ವೆಂಕ. ಸ್ಪಷ್ಟತೆ ಅಸ್ಪಷ್ಟತೆಗಳ ನಡುವಿನ ತಾಕಲಾಟದಲ್ಲಿ ಪ್ರತಿಯೊಬ್ಬರೂ ಪ್ರತಿಯೊಬ್ಬರನ್ನೂ ಅನುಮಾನದಿಂದಲೆ ಕಾಣುವ ಅತಂತ್ರ ಭಾವ, ಅದರ ನಡುವೆಯೂ ಹೊಂದಿಕೊಂಡೆ ಹೋಗಬೇಕಾದ ಅನಿವಾರ್ಯತೆ ಮತ್ತು ಪ್ರೇರಕ ಸನ್ನಿವೇಶಗಳು – ಎಲ್ಲವೂ ಆಯಾ ಪಾತ್ರಗಳ ಮೂಲಕ ನಿರಂತರವಾಗಿ ಕಾಡುತ್ತ ಮನದಲ್ಲೊಂದು ಕಾಡನ್ನು ಹುಟ್ಟುಹಾಕಿ ಬಿಡುತ್ತವೆ. ಅದರ ತದನಂತರದ ಫಲಿತ ಚಿಂತನಾಲೋಚನಾ ಕ್ರೌರ್ಯಗಳನ್ನು ನಿಭಾಯಿಸಿಕೊಳ್ಳುವ ಹೊಣೆಯನ್ನು ಓದುಗರಿಗೆ ಬಿಡುತ್ತ !

ನೂರೈವತ್ತು ಪುಟ್ಟಗಳ ನೂರಿಪ್ಪತ್ತು ರೂಪಾಯಿಯ (ಪುಸ್ತಕ ಪ್ರಕಾಶನ) ಈ ಪುಸ್ತಕ ಯಾವುದೇ ತೇಜಸ್ವಿಯವರ ಪುಸ್ತಕದಂತೆ ಅದೇ ಅದ್ಭುತ ಅನುಭವ, ಲೌಕಿಕಾಲೌಕಿಕತೆಗಳ ನಡುವಿನ ಅನುಭೂತಿಯನ್ನು ಎಂದಿನಂತೆ ಕಟ್ಟಿಕೊಡುತ್ತದೆ.

ತಪ್ಪದೆ ಓದಿ !

– ನಾಗೇಶ ಮೈಸೂರು

00682. ಕಾರ್ಮಿಕ ದಿನಾಚರಣೆ (ಹಾಯ್ಕು)

00682. ಕಾರ್ಮಿಕ ದಿನಾಚರಣೆ (ಹಾಯ್ಕು)
_____________________________

(೦೧)
ಕಾರ್ಮಿಕ ದಿನ
ಕೆಲಸ ಮಾಡೊ ಜನ
– ಹಿರಿ ನಮನ..!

(೦೨)
ಯಾರು ಕಾರ್ಮಿಕ ?
ಯಾರಲ್ಲ ಕಾರ್ಮಿಕರು ?
– ಎಲ್ಲರ ದಿನ !

(೦೩)
ದುಡಿವ ‘ಮಿಕ’
‘ಕಾರು’ ಓಡಿಸೊ ದಿನ
– ಧನ್ಯ ಕಾರ್ಮಿಕ !

(೦೪)
ದಿನಾಚರಣೆ ?
ದೈನಂದಿನ ಸ್ಮರಣೆ
– ಆಗೆ ಸಾರ್ಥಕ !

(೦೫)
ಅಜ್ಞಾತ ಶ್ರಮ
ಐಷಾರಾಮಿ ಬದುಕು
– ನಮಿಸಿಬಿಡು !

(೦೬)
ಯಾರ ಸುಖಕೋ
ಕೂಲಿ ನಾಲಿ ಬದುಕು..
– ನಿತ್ಯ ಹೋರಾಟ !

(೦೭)
ಮರೆಯದಿರು
ಮಹಿಳಾ ಕಾರ್ಮಿಕರು
– ತೇಯುವ ಜೀವ !

(೦೮)
ಮನೆಯ ಜನ
ಕೇಳರಲ್ಲ ಸಂಬಳ
– ದುಡಿವ ಪ್ರೀತಿ !

(೦೯)
ಕಾರ್ಮಿಕ ಪ್ರಾಣಿ,
ಯಂತ್ರವಲ್ಲ – ಮನುಜ
– ಸೌಹಾರ್ದ ಜಗ !

(೧೦)
ನೆನಪಿರಲಿ:
ಮೂಗು ಪ್ರಾಣಿ ದುಡಿತ
– ಅವಕೂ ದಿನ !

– ನಾಗೇಶ ಮೈಸೂರು

00681. ತುಣುಕುಗಳು (30.04.2016)

00681. ತುಣುಕುಗಳು (30.04.2016)
___________________________

ರಾಜಕೀಯದ ಹೊಲಸು ಸಾಕಪ್ಪ ಸಾಕು
ನಾಯಿ ಬಾಲದ ಡೊಂಕು ನಮಗ್ಯಾಕೆ ಬೇಕು ?
ಅಂದುಕೊಂಡು ಕೂತೆ ಗಬ್ಬೆದ್ದು ಹೋಯ್ತು ದೇಶ
ತೊಳೆಯಿನ್ನು ಹೊಲಸ ಎಣಿಸದೆ ಮೀನಾಮೇಷ ! ||

ಭ್ರಮ ನಿರಸನ ಜನತೆ ದಾರಿ ಕಾಣದೆ ಹತಾಶೆ
ಕೂತ ಹೊತ್ತಲೆ ಕಡೆಗೂ ದಾರಿದೀಪದ ನಿರೀಕ್ಷೆ
ಕಣ್ಮುಚ್ಚಿ ನಂಬೆ ಮಾತಿನವೀರರ ಪಡೆ ಮೋಸ
ತೋರುತಿಹ ನೀಲನಕ್ಷೆ ನಂಬಿ ನಡೆಯೆ ಲೇಸ ! ||

ತಿಂದು ತೇಗಿದರಂತೆ ಹೆಲಿಕಾಪ್ಟರಲು ಹೊಲಸು
ಅಧಿಕಾರದಲಿ ಮೇಯ್ದು ಪಕ್ಕಾ ಪುಲ್ ಮೀಲ್ಸು
ಇಂಧನ ತುಂಬಿ ಹಾರಿ, ಭಾರಿ ಮಳ್ಳಿಯ ನಗು
ರಟ್ಟಾಗೆ ಬಯಲಾಟ, ಕತ್ತರಿ ಕಡತದ ಹೆಸರಿಗೂ ! ||

– ನಾಗೇಶ ಮೈಸೂರು

00680. ಗುಟ್ಟು, ಸುದ್ಧಿ, ಇತ್ಯಾದಿ (ಹಾಯ್ಕು ೩೦.೦೪.೨೦೧೬)

00680. ಗುಟ್ಟು, ಸುದ್ಧಿ, ಇತ್ಯಾದಿ (ಹಾಯ್ಕು ೩೦.೦೪.೨೦೧೬)
__________________________________________

(೦೧)
ಹೇಳಬಾರದು
ಹೇಳಬಾರದ ಗುಟ್ಟ
– ಕೇಳದ ನಿದ್ದೆ.

(೦೨)
ಕದ್ದು ಕೇಳಿದ
ಗುಲ್ಲು ರೋಚಕ ಸುದ್ಧಿ
– ನಮ್ಮದಲ್ಲದ್ದು.

(೦೩)
ಪಿಸುಗುಟ್ಟುತ
ಯಾರಿಗೂ ಹೇಳಬೇಡ
– ಎಂದು ನಕ್ಕಳು.

(೦೪)
ಅಡಿಗೆ ಮನೆ
ಕುಟುಂಬ ಸುದ್ಧಿ ಜಾಲ
– ಸಮಯವಿಲ್ಲ.

(೦೫)
ಮನೆಕೆಲಸ
ಮುಗಿಸಿ ಹರಟುತ್ತ
– ಗುಟ್ಟಿನಡಿಗೆ.

(೦೬)
ಮಾತಾಡೆ ಹಿತ
ಜತೆಗಿರದವಳ
– ಸುದ್ಧಿ ಸುಲಭ.

(೦೭)
ಎರಡು ಜಡೆ
ಮಾತಾಡೆ ನೆಟ್ಟಗಿತ್ತೆ
– ಮೂರನೆ ಜಡೆ.

(೦೮)
ಗಾಸಿಪ್ಪು ಸಿಪ್ಪು
ಸೊಪ್ಪು ಹಾಕುವ ಜಗ
– ಹೊಸ ಬಾಟಲಿ.

(೦೯)
ಗುಟ್ಟ ಮಾತಲಿ
ಗಂಡಸರೇನು ಕಮ್ಮಿ
– ಎಲ್ಲಾ ಬಾರಲಿ.

(೧೦)
ಹೆಣ್ಣೇನು ಕಮ್ಮಿ
ಬಾರು ಗೀರು ಹಂಗಿಲ್ಲ
– ಕಾರುಬಾರಲೆ.

– ನಾಗೇಶ ಮೈಸೂರು

00679. ಧುತ್ತನೆ ಮಳೆ – ಆಶಾವಾದ

00679. ಧುತ್ತನೆ ಮಳೆ – ಆಶಾವಾದ
__________________________________

[In nilume on 29.04.2016: ಮಳೆ ನಿಲ್ಲದ ಹಾಗೆ ಸುರಿಯುತ್ತಿರಬೇಕು ಒಂದೇ ಸಮನೆ – ಭಾವೋತ್ಕರ್ಷದ ಮುಸಲಧಾರೆಯ ಹಾಗೆ.. ಅದೇ ನನಗಿಷ್ಟ ..( ಪ್ರಕೋಪಕ್ಕೆಡೆಗೊಡದ ಹಾಗೆ ಅನ್ನುತ್ತಿದ್ದಾನೆ ಮರೆಯಿಂದ ಡೊಂಕುತಿಮ್ಮ 😜 )]

ಧುತ್ತನೆ ಆರಂಭವಾದ ಮಳೆಯೊಂದು ತೆರೆದಿಟ್ಟುಕೊಂಡ ಬಗೆಯನ್ನು ಚಿತ್ರಿಸುತ್ತಲೆ, ಅದು ಸತತವಾಗಿ, ನಿರಂತರವಾಗಿ ಸುರಿಯುತ್ತಲೆ ಇರಬೇಕೆಂದು ಬಯಸುತ್ತದೆ ಕವಿಮನ; ನಿಂತ ಮಳೆ ಪಿಚ್ಚನೆಯ ಭಾವದ ಪ್ರತಿನಿಧಿಯಾಗಿ ನೀರವತೆಯನ್ನು ತುಂಬುವ ವಿಕಲ್ಪವಾದರೆ, ಸತತ ಸುರಿಯುವ ಮಳೆ ಆಶಾವಾದ ಸಂಕೇತವಾಗಿ ಕಾಣುತ್ತದೆ ಕವಿಯ ಕಣ್ಣಿಗೆ. ಅದು ‘ಧೋ’ ಎಂದು ಸುರಿಯುತ್ತಿರುವ ತನಕ ಕವಿ ಮನ ಗರಿ ಬಿಚ್ಚಿದ ಹಕ್ಕಿ – ಇದು ಕೇವಲ ಒಂದು ಪಾರ್ಶ್ವದ ನೋಟವಾದರೂ (ಮಳೆಯ ವಿಕೋಪ ಮತ್ತೊಂದು ಪಾರ್ಶ್ವ). ಅದರ ಆಲಾಪದ ತುಣುಕು ಈ ಪದ್ಯ.

ಧುತ್ತನೆ ಮಳೆ…
_____________________

ಎಲ್ಲಿತ್ತೋ ಮೋಡ
ಕಪ್ಪನೆ ಕಾಡ
ಕವಿದು ಮುಗಿಲು ಬೆಟ್ಟ ಗುಡ್ಡ ..
ಕಲ್ಲೆತ್ತರ ಕಟ್ಟಡ;
ಸಂಜೆಗತ್ತಲಿನ ನಾಡ ||

ಧುತ್ತನೆ ಮಳೆರಾಯ
ಸುರಿದ ಪ್ರಾಯ
ತೊಳೆದಾಗಸ ಮೋಡ ಖೆಡ್ಡ..
ಗುಡಿ ಕಟ್ಟಡ ನಡ;
ಕವಿಸುತ ಕತ್ತಲ ಗೂಡ ||

ಮಳೆ ಸದ್ದು ಅವಿರತ
ಹಿನ್ನಲೆ ಸಂಗೀತ
ಮಿಂಚು ಗುಡುಗಿನ ಹಿಮ್ಮೇಳ..
ವಾದ್ಯಗೋಷ್ಠಿ ತಾಳ;
ಸುಸ್ತಾಗದ ನಿಸರ್ಗದ ಬಹಳ ||

ನಿಲಬಾರದು ಸುರಿತವಿದು
ನಿಲದೆ ಮಳೆ ಸದ್ದು
ಅವಿರತ ಸುರಿತ ಆಶಾವಾದ..
ನಿಂತರೆ ಪಿಚ್ಚೆನಿಸಿದ ;
ಸುರಿಯುತಲೇ ಜೀವಂತಿಕೆ ಸದಾ ||

– ನಾಗೇಶ ಮೈಸೂರು

(picture source : http://e2ua.com/WDF-1783423.html)

00678. ಕಗ್ಗ ೦೫ ರ ಟಿಪ್ಪಣಿ

00678. ಕಗ್ಗ ೦೫ ರ ಟಿಪ್ಪಣಿ
______________________

ಕಗ್ಗ ೦೫ ರ ಟಿಪ್ಪಣಿ : ಇಂದಿನ ರೀಡೂ ಕನ್ನಡದಲ್ಲಿ..(೨೯.೦೪.೨೦೧೬)

ಕಗ್ಗಕೊಂದು ಹಗ್ಗ ಹೊಸೆದು… – 5

ಪೋಷಕ, ವಯಸ್ಕ, ಬಾಲಕ..

ಪೋಷಕ, ವಯಸ್ಕ, ಬಾಲಕ.. 

Pubblished in suragi today (28.04.2016)

http://surahonne.com/?p=11484

00676. ವಿನಾಕಾರಣ..

00676. ವಿನಾಕಾರಣ..!
________________

ದೇಶದಲ್ಲೇನೆ ನಡೆದರು
ವಿಪಕ್ಷಗಳಿಗೊಂದೆ ಕಾರಣ
“ಮೋದಿ ಸರ್ಕಾರ !”🙄

ಮನೆಯಲ್ಲೇನೇ ನಡೆದರು
ಸತಿಯರಿಗೊಂದೆ ಕಾರಣ
“ಪತಿ ದೇವರ !” 😜

– ನಾಗೇಶ ಮೈಸೂರು

(Photo source: http://www.dralexandrasolomon.com/common-fights/)

00675. ಚುಚ್ಚು ಮಾತಿನ ಸೂಜಿಮದ್ದು

00675. ಚುಚ್ಚು ಮಾತಿನ ಸೂಜಿಮದ್ದು
___________________________

ಏನು ಮಾಡುವುದು ಬಿಡದೆಲೆ
ಬದುಕಲಿ ಕಾಡುವಾ ಭೂತಗಳ ?
ಬರಿ ಭವಿತದಲಾಗಿಬಿಡುವ ಬೊಗಳೆ ಮಾತು
ಭೂತದ ಹೀಯಾಳಿಕೆ ಮಾತ್ರ ಗೊತ್ತು..
ವರ್ತಮಾನದಲಿ ಬದುಕಿದ್ದು ಯಾವತ್ತು ?

ಯಾರೋ ಏನೋ ಆಗಿದ್ದ ಹೊರತು
ಸಹಿಸುವುದೆಂತು ದಿನ ನಿತ್ಯದ ಗುದ್ದು ?
ತಾಳಿದವನು ಬಾಳಿಯಾನೆ ? ಅನುಮಾನ
ಆನೆ ಬದುಕಿದ್ದರೆ ತಾನೇ ಬಾಳುವೆ ಯಾನ
ಕಟ್ಟಿಕೊಂಡ ಕೆಂಡ ಮಡಿಲ ಸುಟ್ಟ ವ್ಯಥೆಯೆ.

ಮಾತಿಗೊಂದು ಹುಡುಕಿದರೆ ಮೊನೆಚು
ತರಚು ಗಾಯಕೆಸೆದ ಉಪ್ಪಿನ ಅನುಭವ
ತಪ್ಪು ಹುಡುಕೆ ಸಿಗುವುದು ತಪ್ಪೇ ಹೌದು
ಸರಿಯನ್ಹುಡುಕೊ ಮನಸುಗಳೆ ಕಾಣದು
ಜಗವೆ ಚುಚ್ಚು ಮಾತಿನ ಸೂಜಿಮದ್ದಂತೆನಿಸಿ..

– ನಾಗೇಶ ಮೈಸೂರು

(Picture source: https://myspace.com/harsh.words)

00674. ಅರಿತೇನು ಬಂತು, ಕಲಿಯದೆ ?

00674. ಅರಿತೇನು ಬಂತು, ಕಲಿಯದೆ ?
___________________________

ಅರಿತೆ ಅರಿತೆ ಅರಿತೆ
ಬಂತೇನು ಸುಖ ?
ಅರಿತದ್ದ ಕಲಿಯದೇ ಹೋದರೆ..
ಅರಿತು ಜೀರ್ಣವಾಗೆ ಕಲಿಕೆ
ಅಜೀರ್ಣವಾಗೆ ಬದುಕೇ ನುಲಿಕೆ…

ಉರು ಉರು ಉರು
ಹೊಡೆಯುತ್ತಲೆ ಜಗದ್ಗುರು
ಕೇಳಿದ್ದೆಲ್ಲಾ ಕವಿತೆ
ಜ್ಞಾಪಕಶಕ್ತಿಯ ಪರೀಕ್ಷೆ
ಅರಿತೆ, ಏನು ಕಲಿತೆ ?

ದೊಂಬರಾಟ ಗುರುಕುಲ ಜಾಲ
ಅಂಕಿ ಅಂಶದ ಸಮ ಸಮರ
ಬೆನ್ನಟ್ಟಿ ಅಂಕದಲೇ ಶತಕ
ಮರೆತೆಬಿಡುವ ಮೈದಾನ ಕಲಿ
ಕಣ್ಣು ಬಿಟ್ಟಾಗ ಶೂನ್ಯ, ಕಲಿತಿದ್ದೇನು ?

ಅಕ್ಷರ ಜ್ಞಾನ ಮೊದಲ ಕಲಿಕೆ
ಕಲಿತಾದ ಮೇಲೆ ಅರಿವಿಗೆ
ಕಲಿಸಬೇಕು ಕಲಿಯುವ ಬಗೆ ಕುತೂಹಲ
ಜಿಜ್ಞಾಸೆ ಶೋಧನೆ ಚಿಂತನೆ ಚರ್ಚೆ
ಹೊಸತ ಸ್ವತಃ ಕಲಿಯುವ ತಾಕತ್ತು..

ಆಗಷ್ಟೆ ನಿಂತ ನೀರಾದ ಜ್ಞಾನ
ಕೊಳದಲೀಜಾಡೊ ಮತ್ಸ್ಯ ಸಂತಾನ
ಕಲಿಸುವುದು ಸೃಜಿಸೆ ಸೃಷ್ಟಿಸೆ ಹೊಸತ
ದಾಸ್ಯವಲ್ಲದ ಸ್ವತಂತ್ರ ಚಿಂತನಾ ಅದ್ಭುತ
ಸ್ವಾವಲಂಬನೆ ಸ್ವಾಯತ್ತತೆಯ ಕಲಿಸುತ್ತಾ..

– ನಾಗೇಶ ಮೈಸೂರು

(Picture source: https://en.m.wikipedia.org/wiki/File:France_in_XXI_Century._School.jpg)

00673. ಹಾಯ್ಕು ೨೭.೦೪.೨೦೧೬ (ವಯಸಾದಾಗ)

00673. ಹಾಯ್ಕು ೨೭.೦೪.೨೦೧೬ (ವಯಸಾದಾಗ)
___________________________________

(೦೧)
ವಯಸ್ಸಾಯ್ತಲ್ಲ
ಕೂರಬಾರದೆ ಸುಮ್ನೆ !
– ಅತ್ತೆ ಅಮ್ಮನೇ ?

(೦೨)
ಕೂತರೆ ನೋವು
ನಿಂತರೆ ತಲೆ ಸುತ್ತು..
– ಮಾಡಲೇ ಬೇಕು 😔

(೦೩)
ಸೊಂಟ ನೋವಿದೆ
ನಿಂತೇ ಬೇಯಿಸಬೇಕು..
– ಅಡಿಗೆ ಮನೆ !

(೦೪)
ಕೇಳಿದಾಗೆಲ್ಲ
ಕೈ ತುಂಬಾ ಕೊಟ್ಟ ಕಾಸು..
– ಬಾಯೇ ಬಾರದು !

(೦೫)
ಪ್ರತಿ ಹಬ್ಬಕ್ಕೂ
ತಂದು ಕೊಟ್ಟಿದ್ದೆ ಬಟ್ಟೆ
– ಕೊಡುವರಿಲ್ಲ !

(೦೬)
ಹಬ್ಬದಡಿಗೆ
ಮಾಡುವುದು ಯಾರಿಗೆ ?
– ಬರುವರಿಲ್ಲ !

(೦೭)
ಕೈತುಂಬಾ ಕಾಸು
ಬಿಡುವಿಲ್ಲದ ಕೂಸು
– ಮಾತಿಗೇ ಸಿಗ !

(೦೮)
ಬೆಂಡು ಬತಾಸು
ಜೊಲ್ಲು ಸೋರಿದ್ದ ಮಗ
– ಬುದ್ಧಿ ಹೇಳುವ !

(೦೯)
ರಂಭೆ ಸಿಕ್ಕಳು
ಯಾಕೋ ಅಸಡ್ಡೆ ಸ್ವರ
– ಮುಸುಕ ಯುದ್ಧ !

(೧೦)
ಸೊಸೆ ಮಗಳು
ಹೆಣ್ಣುಗಳೆ ಇಬ್ಬರು
– ಸುಮ್ಮನಾಗರು !

– ನಾಗೇಶ ಮೈಸೂರು

00672. ಹಾಯ್ಕು ೨೬.೦೪.೨೦೧೬ (ದಾಂಪತ್ಯ-ಸಾಂಗತ್ಯ)

00672. ಹಾಯ್ಕು ೨೬.೦೪.೨೦೧೬ (ದಾಂಪತ್ಯ-ಸಾಂಗತ್ಯ)
_______________________________________

(೦೧)
ಟ್ರಾಫಿಕ್ಕು ಸಿಕ್ಕು
ಸತ್ತು ಸುಣ್ಣ ಮನೆಗೆ
– ಕಾಫಿ ದಿಕ್ಕಿಲ್ಲ !

(೦೨)
ತಣ್ಣಗೆ ಕೂತು
ಹರಟೆ ಆಫೀಸಲಿ
– ಮಾಡಿಕೊ ನೀನೆ !

(೦೩)
ಪುರುಸೊತ್ತಿಲ್ಲ
ಲಂಚು ಕಾಫಿಗೂ ಕುತ್ತು
– ಮನೆಗೆ ಬೀಗ !

(೦೪)
ಮನೆ ದುಡಿತ
ಇವರಿಗೇನು ಗೊತ್ತು ?
– ಏಸಿ ಸಂಬಳ !

(೦೫)
ಪಾತ್ರೆ ಮುಸುರೆ
ಅಡಿಗೆ ಒಗೆ ಯಂತ್ರ
– ಏನಂತೆ ದಾಢಿ ?

(೦೬)
ಹೊತ್ತಿದೆ ಟೀವಿ
ಧಾರಾವಾಹಿ ನೋಡಲು..
– ಮನೆಗೆಲಸ ?

(೦೭)
ಬರೀ ಆಫೀಸು
ದಿನಸಿ ತರಕಾರಿ ?
– ನೂರೆಂಟು ನೆಪ..

(೦೮)
ಮಕ್ಕಳು ಮರಿ
ನೋಡುವ ಜವಾಬ್ದಾರಿ
– ಬರಿ ನನ್ನದೇ ?

(೦೯)
ನಾನೂ ದುಡಿದು
ಸುಸ್ತಾಗಿ ಬಂದ ಜೀವ
– ನೋಡುವರಾರು ?

(೧೦)
ಸ್ತ್ರೀ ಪುರುಷರ
ಸಮಾನತೆ ಸರಿಯೇ..
– ಯಾರ ಅಡಿಗೆ ?

– ನಾಗೇಶ ಮೈಸೂರು

00670. ನಾನೆಂಬ ಕಣರೂಪಿ ಮೊತ್ತ

00670. ನಾನೆಂಬ ಕಣರೂಪಿ ಮೊತ್ತ
_________________________

(Picture source: https://en.m.wikipedia.org/wiki/File:Helium_atom_QM.svg)

ನಾನೆಂಬ ಕಣರೂಪಿ ಮೊತ್ತ
ಅಣುಅಣು ಕಣವಾದ ಸಮಷ್ಟಿ
ನೋಡೀ ಅಚ್ಚರಿ ಜಗ ನಿಯಮ
ಕೈ ಕಾಲು ಮನ ಹೃದಯ ಸಂಗಮ !

ಯಾರೋ ಕಲಸಿಟ್ಟನ್ನ ಸೊಬಗು
ಯಾವ ಸಂಭ್ರಮದ ಬೆಡಗು ಬಸಿದು
ಸೋಸಿ ಬಗ್ಗಡ ಬೆರೆಸೋ ಮದ್ದೇನೊ ಕಾಣೆ
ಜೀವ ರೂಪಲಿ ಭೌತಿಕ ಲೌಕಿಕ ಜಾಗರಣೆ !

ಅಲೌಕಿಕ ಅಭೌತಿಕ ಒಳಗಿಟ್ಟ ಗುಟ್ಟು
ಅಂತರಂಗ ಬಹಿರಂಗದ ಒಗಟಲಿ ಹೊಸೆದು
ಕುಣಿಸೊ ಕುಣಿದಾಡಿಸೊ ಒಳಗ ಹೊರಗಣ ಜಾಲ
ಇದ್ದೂ ಇರದಂತೆ ಕಡಿವಾಣ ಬಡಿದಾಟದ ಕಾಲ !

ಕದನ ಕುತೂಹಲ ಮನ ಒಂದೇ ಏನು ಪ್ರತಿ ಕಣ ?
ಜೀವ ನಿರ್ಜೀವ ರೂಪದ ವಿಶ್ವ ಸಮಗ್ರತೆ ಪಾಕ
ನಾನಾರು, ನಾನೆಲ್ಲಿ ನೀಲಿ ಗಗನದ ನೀಲಿ ಕೆಂಪು ಮಣ್ಣಲ್ಲಿ ?
ಹಾರುವ ಹಕ್ಕಿ ಬಿಚ್ಚಿದ ರೆಕ್ಕೆ ಒಳಗೇನೊ ಬಿಡಿಸದ ಒಗಟಲ್ಲಿ..

ಹೊರಟ ಯಾತ್ರೆ ಹುಡುಕಾಟ ಕಣಕೂಟದ ಜಂಜಾಟ
ಪ್ರತಿ ಕಣದ ಗಮನ ಎತ್ತಲೋ, ಒಂದಾಗಿಸೊ ಕಸರತ್ತಲಿ
ಒಂದಾಗುವುದೆ ನಾನು, ನಾನೆಂಬ ಅಪರಿಚಿತ ಅತಿಥಿ
ನನ್ನರಿವಾಗಿಸಿ ನನ್ನನ್ನೆ, ಬಿಡಿಸಿಟ್ಟು ತೊಳೆಯಂತೆ ಮುಕುತಿ..

– ನಾಗೇಶ ಮೈಸೂರು

00669. ಅಹಲ್ಯಾ_ಸಂಹಿತೆ_೪೧ (ಕೋಶದ ಜೀವಾವಧಿ ವಿಸ್ತರಣಾ ತಂತ್ರ !)

00669. ಅಹಲ್ಯಾ_ಸಂಹಿತೆ_೪೧ (ಕೋಶದ ಜೀವಾವಧಿ ವಿಸ್ತರಣಾ ತಂತ್ರ !) 
_______________________________________

(Link to last episode 40: https://nageshamysore.wordpress.com/2016/04/09/00646-%e0%b2%85%e0%b2%b9%e0%b2%b2%e0%b3%8d%e0%b2%af%e0%b2%be_%e0%b2%b8%e0%b2%82%e0%b2%b9%e0%b2%bf%e0%b2%a4%e0%b3%86_%e0%b3%aa%e0%b3%a6-%e0%b2%9c%e0%b3%80%e0%b2%b5%e0%b2%95%e0%b3%8b%e0%b2%b6%e0%b2%a6/)

ಅಧ್ಯಾಯ – ೧೨
____________

ಅಲ್ಲಿಂದಾಚೆಗೆ ಎಲ್ಲಾ ಕ್ಷಿಪ್ರಗತಿಯಲ್ಲಿ ಸಾಗತೊಡಗಿತು – ಸಮಾನಾಂತರ ಕಿರುಪಥಗಳಲ್ಲಿ. ಗೌತಮ ಊರ್ವಶಿಯ ಮುಖೇನ ಎಲ್ಲರಿಗು ಸುತ್ತೋಲೆ ಕಳಿಸಿ ಸ್ಪಷ್ಟಪಡಿಸುವಂತೆ ಹೇಳಿದ್ದ – ಪ್ರತಿ ತಂಡದ ಪ್ರಯೋಗಕ್ಕೂ ಜೀವಕೋಶದ ಮೂಲಸಿದ್ದಾಂತ ಒಂದೇ ಇರಬೇಕೆಂದು. ಹೀಗಾಗಿ ಯಾರೂ ತಮತಮಗೆ ತೋಚಿದ ವಿಭಿನ್ನ ಹಾದಿ ಹಿಡಿಯದೆ ಒಂದೆ ನೆಲೆಗಟ್ಟಿನ ಮೂಲತತ್ವದ ಆಧಾರದ ಮೇಲೆ ಕಾರ್ಯ ನಿರ್ವಹಿಸಬೇಕಿತ್ತು. ಇದರಿಂದಾಗಿ ಸ್ಥಳೀಯವಾಗಿ ತಾತ್ಕಾಲಿಕ ವೇಗದ ಕುಂಠಿತವಾಗುವುದಾದರು ತದನಂತರದ ಕ್ಲೇಷಗಳಿಗೆ ಆರಂಭದಲ್ಲೇ ತಡೆ ಹಾಕಲು ಇದೇ ಸೂಕ್ತ ದಾರಿಯಾಗಿತ್ತು. ಆದರು ಅವರೆಲ್ಲ ತಂತಮ್ಮ ಪ್ರಯೋಗಗಳನ್ನು ಸೀಮಿತ ಮಟ್ಟದಲ್ಲಿ ಸದ್ಯದ ಮಾದರಿಯ ಆಧಾರದಲ್ಲೇ ನಡೆಸಿಕೊಳ್ಳುತ್ತ ಪೂರ್ವಸಿದ್ದತಾ ತೀರ್ಮಾನಗಳನ್ನು , ಅಂತಿಮ ಪ್ರಯೋಗದ ಸಿದ್ದತೆಯ ರೂಪುರೇಷೆಗಳನ್ನು ಮಾಡಿಕೊಳ್ಳಲು ಅಡ್ಡಿಯಿರಲಿಲ್ಲ.

ಈ ಅವಸರದ ಪ್ರತಿಬಂಧಕವನ್ನು ಅಳವಡಿಸಿಕೊಂಡಾದ ಮೇಲೆ ಪ್ರತಿತಂಡದಿಂದಾಯ್ದ ಎಲ್ಲಾ ಜೀವಕೋಶ ತಜ್ಞರ ತಂಡದ ಸಮಷ್ಟಿತ ಗುಂಪಿನ ಜತೆ ಪ್ರಮುಖ ಅಂಶದ ಮೊದಲ ಹಂತದ ಪ್ರಯೋಗ ಆರಂಭವಾಯ್ತು. ಗೌತಮನೆ ಅದರ ಮುಂದಾಳತ್ವ ವಹಿಸಿ ಕೆಲವು ಖಚಿತ ಗುರಿಗಳನ್ನು ನಿಗದಿಪಡಿಸಿ, ಪ್ರತಿ ಗುರಿಗೂ ಒಂದೊಂದು ಸಣ್ಣಗುಂಪನ್ನು ಪುನರ್ವಿಂಗಡಣೆ ಮಾಡಿ ಪ್ರತಿಯೊಬ್ಬರೂ ಒಂದು ವಿಷಯದ ಮೇಲೆ ಮಾತ್ರ ಕಾರ್ಯ ನಿರ್ವಹಿಸುವಂತೆ ಆಯೋಜಿಸಿದ. ಆ ಪ್ರಮುಖ ವಿಷಯಗಳು ಅವರು ಅದುವರೆವಿಗೂ ಚರ್ಚಿಸಿ ನಿರ್ಧರಿಸಿದ ವಿಷಯಗಳ ಸಾರವೇ ಆಗಿತ್ತು.

೧. ಮೊದಲ ಕಿರುತಂಡ : ಎರಡು ವಿಭಿನ್ನ ಸ್ತರದ ಜೀವಕೋಶಗಳನ್ನು ಕಸಿ ಮಾಡುವುದು ಮತ್ತು ಪರಿಪೂರ್ಣವಾಗಿ ಮತ್ತು ಸಮರ್ಥವಾಗಿ ಕಾರ್ಯನಿರ್ವಹಿಸಬಲ್ಲ ಹೊಸ ಸಂಯುಕ್ತ ಜೀವಕೋಶದ ಸೃಷ್ಟಿ ಮಾಡುವುದು ಮತ್ತದರ ಬೀಜವಿನ್ಯಾಸವನ್ನು ಸಿದ್ದಪಡಿಸುವುದು ( ಅದನ್ನು ಪ್ರತಿ ತಂಡವೂ ತಮ್ಮ ಕ್ಷೇತ್ರಕ್ಕೆ ಅಳವಡಿಸಿಕೊಳ್ಳುವ ಹಾಗೆ).

೨. ಎರಡನೆ ಕಿರುತಂಡ : ಜೀವಕೋಶದ ಆಯಸ್ಸು ಹೆಚ್ಚಿಸುವ ಸಾಧ್ಯತೆಯನ್ನು ಪರಿಶೀಲಿಸಿ ಅದರ ಮೂಲಸಿದ್ದಾಂತದ ಅಳವಡಿಕೆಯ ಸಾಧ್ಯತೆಯ ಪ್ರಯೋಗ ನಡೆಸುವುದು. ಪ್ರಯೋಗದ ಪೂರಕ ಫಲಿತಾಂಶವನ್ನು ಹೊಸತಾಗಿ ಸೃಜಿಸಿದ ಜೀವಕೋಶಕ್ಕೆ ಅಳವಡಿಸಿಕೊಳ್ಳಲು ಸಾಧ್ಯವಾಗುವಂತಹ ಬೀಜವಿನ್ಯಾಸವನ್ನು ಸಿದ್ದಪಡಿಸುವುದು.

೩. ಮೂರನೆ ಕಿರುತಂಡ : ಜೀವಕೋಶದ ಸ್ವಯಂ-ನಿಯಂತ್ರಣ ಸಾಧ್ಯವಾಗುವಂತಹ ಸ್ವಯಂಭುತ್ವದ ಪರಿಶೀಲನೆ, ಪ್ರಯೋಗ ನಡೆಸಿ ಅದರ ಪೂರಕ ಫಲಿತಾಂಶವನ್ನು ಮೂಲಸಿದ್ದಂತದ ರೂಪದಲ್ಲಿ ಕಸಿ ಮಾಡಿದ ಹೊಸ ಜೀವಕೋಶಕ್ಕೆ ಅಳವಡಿಸಿಕೊಳ್ಳಲು ಸಾಧ್ಯವಾಗುವಂತಹ ಬೀಜವಿನ್ಯಾಸವನ್ನು ಸಿದ್ದಪಡಿಸುವುದು.

೪. ನಾಲ್ಕನೇ ಕಿರುತಂಡ: ಮಿಕ್ಕ ಮೂರರ ಫಲಿತವನ್ನು ಸಂಯುಕ್ತ ರೂಪದಲ್ಲಿ ಕ್ರೋಢೀಕರಿಸಿ ಹೊಸದಾಗಿ ಕಸಿಯಾದ ಕೋಶದಲ್ಲಿ ಸೂಕ್ತವಾಗಿ ಅಳವಡಿಸಿ, ಕಾರ್ಯ ನಿರ್ವಹಿಸುವಂತೆ ನೋಡಿಕೊಳ್ಳುವ ಹೊಣೆ. ಜತೆಗೆ ನಂತರದ ಹಂತದ ಪ್ರಯೋಗಗಳಿಗೆ ಮತ್ತದರ ತಂಡಗಳ ಅಗತ್ಯಗಳಿಗೆ ಅನುಸಾರವಾಗಿ ಸೂಕ್ತ ಹೊಂದಾಣಿಕೆ, ಮಾರ್ಪಾಡುಗಳನ್ನು ನೋಡಿಕೊಳ್ಳುವ ಜವಾಬ್ದಾರಿ. ಈ ನಾಲ್ಕನೇ ತಂಡವನ್ನು ಸ್ವತಃ ಗೌತಮನೆ ಮುನ್ನಡೆಸಲು ನಿರ್ಧರಿಸಿದ್ದ.

ಈ ಹಂತದ ನಾಲ್ಕು ಕಿರುತಂಡಗಳ ಕಾರ್ಯ ಮುಗಿಯುತ್ತಿದ್ದಂತೆ ಎರಡನೆ ಹಂತದಲ್ಲಿ ಪ್ರತಿಯೊಬ್ಬರೂ ಅದರ ಫಲಿತವನ್ನು ಬಳಸಿ, ಯಥಾನುಸಾರ ಅಳವಡಿಸಿಕೊಂಡು ತಂತಮ್ಮ ಸಂಶೋಧನೆಯನ್ನು ಮುಂದುವರೆಸಬೇಕೆಂದು ಈಗಾಗಲೇ ನಿರ್ಧರಿಸಿಯಾಗಿದ್ದ ಕಾರಣ ಎಲ್ಲರೂ ಈ ಹಂತದ ಫಲಿತಕ್ಕೆ ಕಾತರದಿಂದ ಕಾಯುವ ಸ್ಥಿತಿ ನಿರ್ಮಾಣವಾಗಿಹೋಗಿತ್ತು.

ಇಷ್ಟೆಲ್ಲಾ ಸಿದ್ದತೆಗಳಾದ ಬಳಿಕ ಎಲ್ಲಾ ನಾಲ್ಕು ತಂಡಗಳು ತಂತಮ್ಮ ವ್ಯಾಪ್ತಿಯಲ್ಲಿ ಕಾರ್ಯಯೋಜನೆಯನ್ನು ಆರಂಭಿಸಿಬಿಟ್ಟವು – ಸಾಧ್ಯವಿದ್ದಷ್ಟು ವೇಗದಲ್ಲಿ. ಆ ವೇಗದ ತೀವ್ರತೆ ಎಷ್ಟಿತ್ತೆಂದರೆ ಅದರಲ್ಲಿ ತೊಡಗಿಸಿಕೊಂಡವರಾರಿಗು ಸಮಯ ಕಳೆದುದಾಗಲಿ, ಉರುಳಿದ್ದಾಗಲಿ ಅರಿವಿಗೆ ನಿಲುಕದಷ್ಟು ಕ್ಷಿಪ್ರವಾಗಿ. ಅದನ್ನು ಅದ್ಭುತವಾಗಿ ಸಂಯೋಜಿಸಿ, ಸೂತ್ರಧಾರಿಯಂತೆ ಪ್ರತಿಯೊಂದು ಕೊಂಡಿಯನ್ನು ಅಚ್ಚುಕಟ್ಟಾಗಿ ಸಮಷ್ಟಿಸುತ್ತ ನಿಭಾಯಿಸಿಕೊಂಡು ಹೋದ ಗೌತಮನಿಗೆ ನಿಜಕ್ಕೂ ಬೆನ್ನೆಲುಬಾಗಿ ಸಹಕರಿಸಿದವಳು ಊರ್ವಶಿಯೆ. ಆದರೆ ಗೌತಮನ ನಿರೀಕ್ಷೆಗೂ ಮೀರಿದ ಅಮೋಘ ಸಹಕಾರ ದೊರಕಿದ್ದು ದೇವರಾಜನ ಮೂಲಕ. ಎಲ್ಲಾ ಬಿಡಿ ಭಾಗಗಳು ಯಾವ ರೀತಿಯ ಕೊಂಡಿಯಲ್ಲಿ ಸಂಪರ್ಕವಿರಿಸಿಕೊಳ್ಳಬೇಕು, ಯಾವ ರೀತಿ ಸಂವಹಿಸಬೇಕು, ಹೇಗೆ ಮಾಹಿತಿ ವಿನಿಮಯ ಮಾಡಿಕೊಳ್ಳಬೇಕು, ಹೇಗೆ ಸಹಕರಿಸಬೇಕು – ಎಂಬೆಲ್ಲಾ ಮೂಲ ನೀತಿಸಂಹಿತೆಯನ್ನು ರೂಪಿಸಿ ಎಲ್ಲರೂ ಅದನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಯೋಜನೆ ರೂಪಿಸಿ, ಹಾಗೆಯೇ ನಡೆಯುವಂತೆ ನೋಡಿಕೊಂಡವನು ಅವನೇ. ಅವನ ಶಿಸ್ತುಬದ್ಧ ವ್ಯವಸ್ಥಾಪಕ ವಿಧಾನಕ್ಕೆ ಮಾರುಹೋದ ಗೌತಮನೂ, ಮೊದಲಿಗಿಂತ ಹೆಚ್ಚಾಗಿಯೇ ಅವನ ಸಲಹೆ, ಸಹಕಾರದ ನೆರವು ಪಡೆಯತೊಡಗಿದ.

************

ಸಮಯ ಉರುಳಿದಂತೆ ಸಂಶೋಧನೆಯ ಪ್ರಯೋಗಗಳೆಲ್ಲ ಭರದಿಂದ ಸಾಗತೊಡಗಿದ್ದವು – ನಿರೀಕ್ಷೆಗೂ ಮೀರಿದ ವೇಗದಲ್ಲಿ ಫಲಿತಾಂಶ ನೀಡುತ್ತ. ಅದರಲ್ಲೆಲ್ಲ ಪ್ರಮುಖವಾದದ್ದೆಂದರೆ ಮೊದಲ ಕಿರುತಂಡದ ಜೀವಕೋಶದ ಕಸಿಮಾಡುವ ಪ್ರಯತ್ನ. ಉಚ್ಚೈಶ್ರವಸ್ಸನ್ನು ಸೃಜಿಸಿದ ಮಾದರಿಯಲ್ಲಿ ಊರ್ವಶಿಯ ಉನ್ನತ ಶ್ರೇಣಿಯ ಪರಿಪಕ್ವ ಜೀವಕೋಶದ ತಳಿಯನ್ನು ಚಾಲ್ತಿಯಲ್ಲಿರುವ ಅಪಕ್ವ ಜೀವಕೋಶದ ತಳಿಯ ಜೊತೆ ಸಮೀಕರಿಸಿ ಕಸಿ ಮಾಡಬೇಕಿತ್ತು. ಆದರೆ ಆಗ ಮೊದಲು ಎದುರಾದ ಪ್ರಶ್ನೆ – ಊರ್ವಶಿಯ ಕೋಶದ ಜತೆ ಕಸಿ ಮಾಡಲು ಯಾರ ಕೋಶ ಬಳಸುವುದು? ಎಂದು.

” ನಮ್ಮ ಸಂಶೋಧನೆಯ ಪ್ರಗತಿಗೆ ಇದು ಬಹು ಮುಖ್ಯ ಅಂಶ.. ಊರ್ವಶಿಯ ತಳಿಯ ಶ್ರೇಷ್ಠತೆ ಬಗ್ಗೆ ಎರಡು ಮಾತಿಲ್ಲ. ಆದರೆ ಅದರ ಜತೆಗೆ ಹೊಂದಾಣಿಸುವ ಕೋಶದ ಪಕ್ವತೆ ಅಥವಾ ಸಿದ್ದತೆ ತೀರಾ ಕನಿಷ್ಠ ಮಟ್ಟದ್ದಾದರೆ, ನಾವು ನಡೆಸಬೇಕಾದ ಕಸಿ ಆವರ್ತಗಳ ಸಂಖ್ಯೆ ಹೆಚ್ಚಾಗಬೇಕಾಗುತ್ತದೆ. ಅರ್ಥಾತ್ ಮೊದಲ ಯತ್ನದಲ್ಲಿ ಸಿಕ್ಕ ಯಶಸನ್ನು ಮೂಲವಸ್ತುವನ್ನಾಗಿಸಿಕೊಂಡು ಎರಡನೆ ಪ್ರಯೋಗ, ತದನಂತರ ಅದೇ ರೀತಿ ಮೂರು, ನಾಲ್ಕು, ಐದನೆಯದನ್ನು ನಡೆಸಬೇಕಾಗುತ್ತದೆ – ನಾವು ಎದುರು ನೋಡುತ್ತಿರುವ ಅಂತಿಮ ಫಲಿತಾಂಶವನ್ನು ಸಾಧಿಸುವತನಕ. ಆದರೆ ಆರಂಭದಲ್ಲಿಯೇ ಸಾಧ್ಯವಾದಷ್ಟು ಉತ್ತಮ ತಳಿಯನ್ನು ಬಳಸಲು ಸಾಧವಾಗುವುದಾದರೆ ಆ ಆವರ್ತಗಳ ಸಂಖ್ಯೆಗೆ ಕಡಿವಾಣ ಹಾಕಬಹುದು..” ಎಂದು ಮಾತಿಗಾರಂಭಿಸಿದ ಗೌತಮ. ಯಾರ ಕೋಶ ಬಳಸಬೇಕೆಂಬುದರ ಚರ್ಚೆಗಾಗಿಯೇ ಆ ಸಭೆ ಕರೆಯಲಾಗಿತ್ತು ಬ್ರಹ್ಮದೇವ, ದೇವರಾಜ, ಸೂರ್ಯದೇವ, ಗೌತಮ ಮತ್ತು ಊರ್ವಶಿಯರ ಉಪಸ್ಥಿತಿಯಲ್ಲಿ.

ಗೌತಮನ ಪ್ರಶ್ನಾರ್ಥಕ ಮಾತಿನಿಂದ ಆರಂಭವಾದ ಈ ಸಂವಾದ ಪರಸ್ಪರರ ಅಭಿಪ್ರಾಯ, ಆಲೋಚನೆಗಳನ್ನು ಮಂಡಿಸುವ ಧೀರ್ಘ ಚರ್ಚೆಯಾಗಿ ಪ್ರತಿ ಸಾಧ್ಯತೆಯ ಸಾಧಕ ಬಾಧಕಗಳ ಮಂಡನೆ, ತುಲನೆಯ ಅಖಾಡವಾಗಿ ಪರಿವರ್ತಿತವಾಗಿತ್ತು. ಆವರ್ತನ ಯತ್ನಗಳ ಗಣನೆಯನ್ನು ಲೆಕ್ಕಿಸದೆ ಯಾವುದಾದರೊಂದು ಆಯ್ಕೆಯೊಡನೆ ಮುಂದುವರೆಯಬೇಕೆಂಬುದು ದೇವರಾಜನ ಅಭಿಪ್ರಾಯವಾಗಿದ್ದರೆ ಸೂರ್ಯದೇವನದು ಅದಕ್ಕೆ ತದ್ವಿರುದ್ಧವಾದ ಉತ್ಕೃಷ್ಟವಾದ ಆಯ್ಕೆಯನ್ನೇ ಪರಿಗಣಿಸಬೇಕೆಂಬ ವಾದವಾಗಿತ್ತು.

” ಸೂರ್ಯದೇವ..ನಿನ್ನ ಮಾತು ಕೇಳುತ್ತಿದ್ದರೆ, ನಿನ್ನ ಮನದಲ್ಲಾಗಲೇ ಯಾವುದೋ ಒಂದು ಆಯ್ಕೆಯ ಸಾಧ್ಯತೆಯನ್ನು ಪರಿಗಣಿಸಿಕೊಂಡೆ ಈ ಮಾತಾಡುತ್ತಿರುವಂತಿದೆ. ಹಾಗೇನಾದರು ಇದ್ದಲ್ಲಿ ಸೂಚಿಸಬಹುದಲ್ಲ ?” ಎಂದು ಸೂರ್ಯದೇವನನ್ನೆ ಪ್ರಚೋದಿಸಿದ ದೇವರಾಜ.

ಅವನ ಮಾತಿಗೆ ಹೌದೆನ್ನುವಂತೆ ತಲೆಯಾಡಿಸುತ್ತ, “ಇರುವುದೇನೋ ನಿಜವೇ ಮಹೇಂದ್ರ.. ಬ್ರಹ್ಮದೇವನ ಅಭ್ಯಂತರವೇನು ಇಲ್ಲವೆಂದಾದರೆ ನನ್ನ ಅನಿಸಿಕೆಯನ್ನು ನಿವೇದಿಸಿಕೊಳ್ಳಬಲ್ಲೆ..” ಎಂದ ಸೂರ್ಯ.

” ಇಲ್ಲಿ ಬಿಚ್ಚು ಮಾತಿನ ಅಭಿಪ್ರಾಯ ಮಂಡನೆಗೆ ಯಾವತ್ತೂ ಅಡ್ಡಿ ಆತಂಕಗಳಿರುವುದಿಲ್ಲ ಸೂರ್ಯದೇವ.. ನಿನ್ನ ಅಭಿಪ್ರಾಯವನ್ನು ನಿರಾಳವಾಗಿ ಹೇಳುವಂತವನಾಗು” ಎಂದು ಸ್ವತಃ ಅನುಮತಿಯಿತ್ತ ಬ್ರಹ್ಮದೇವ.

“ಬ್ರಹ್ಮದೇವಾ.. ಇದರಲ್ಲಿ ಯೋಚಿಸಿ ಹೇಳಲಿಕ್ಕೆ ತಾನೇ ಏನಿದೆ? ಈ ಸಂಶೋಧನೆಯ ಪ್ರಮುಖ ರೂವಾರಿ ನೀನೆ ತಾನೇ ? ನಮ್ಮಲ್ಲಿರುವ ಯಾವುದೇ ವ್ಯಕ್ತಿಯನ್ನು ಪರಿಗಣಿಸಿದರೂ ಅದರಲ್ಲಿ ವಯೋವೃದ್ಧ, ಜ್ಞಾನವೃದ್ಧಾ, ಅನುಭವಿ ಮತ್ತು ಪರಿಪಕ್ವ ವ್ಯಕ್ತಿತ್ವವೆಂದರೆ ನಿನ್ನದೇ ತಾನೇ? ಪ್ರಯೋಗದ ಒಡೆತನವೂ ನಿನ್ನದೇ ಆಗಿರುವುದರಿಂದ ಈ ತಳಿ ಕಸಿಗೆ ಬೇಕಾದ ಜೀವಕೋಶ ನಿನ್ನದೇ ಏಕಾಗಬಾರದು ? ನಿನಗಿಂತಲೂ ಉತ್ಕೃಷ್ಠ ಮಟ್ಟ ಇಲ್ಲಿ ಸಿಕ್ಕುವುದಾದರೂ ಉಂಟೆ..? ನನ್ನ ಅಭಿಪ್ರಾಯದಲ್ಲಿ ಇದು ಚರ್ಚೆಯ ವಿಷಯವೇ ಅಲ್ಲ.. ನೀನೆ ಇದರ ಪೂರಕ ಶಕ್ತಿಯಾದರೆ ಎಲ್ಲವೂ ಬಗೆಹರಿದಂತೆ. ನೀನು ಸೃಷ್ಟಿಕರ್ತನ ಹೊಣೆಗಾರಿಕೆ ಹೊತ್ತವನಾದ ಕಾರಣ ಇದು ನಿನಗೆ ಹೊಂದಿಕೆಯೂ ಆಗುತ್ತದೆ.. ಈ ಸಂಶೋಧನೆಯಲ್ಲಿ ಫಲಿತವಾಗಿ ಬರುವ ಜೀವಿಗೆ ನೀನು ಜೈವಿಕ ಮತ್ತು ಮಾನಸ ಪಿತೃವಾಗಿಬಿಡುವುದರಿಂದ ನಿನ್ನದೇ ಸಂತತಿಯ ಅನಾವರಣವಾದಂತಾಗುತ್ತದೆ – ಉತ್ಕೃಷ್ಟ ತಳಿಯ ರೂಪದಲ್ಲಿ..” ಎಂದು ತನ್ನ ವಾದವನ್ನು ಬಲವಾಗಿಯೇ ಮಂಡಿಸಿದ ಸೂರ್ಯದೇವ.

ಸೂರ್ಯನ ಈ ಅಭಿಪ್ರಾಯ ಎಲ್ಲರಿಗು ಚೆನ್ನಾಗಿ ಹಿಡಿಸಿಬಿಟ್ಟಿತು. ದೇವರಾಜನಂತು ಬಹಿರಂಗವಾಗಿಯೆ ಸೂರ್ಯದೇವನನ್ನು ಅಭಿನಂದಿಸಿಬಿಟ್ಟ. ಗೌತಮನ ಮನಸಿನಲ್ಲೂ ಹೆಚ್ಚುಕಡಿಮೆ ಇದೇ ಅಭಿಪ್ರಾಯವಿದ್ದ ಕಾರಣ ಇದು ಅವನಿಗೂ ಸಮ್ಮತವೇ ಆಗಿತ್ತು. ಮಿಕ್ಕವರಲ್ಲಿ ಊರ್ವಶಿಗೆ ಅದರ ಕುರಿತೂ ಯಾವ ಅಭಿಪ್ರಾಯವೂ ಇರಲಿಲ್ಲ; ಯಾರಾದರೇನು , ಎಲ್ಲವೂ ಸರಿಯೇ ಎನ್ನುವ ನಿರ್ಲಿಪ್ತ ಧೋರಣೆಯಲ್ಲಿ. ಬ್ರಹ್ಮದೇವ ಮಾತ್ರ ಆ ಕುರಿತು ತುಸು ತೀವ್ರವಾಗಿ ಆಲೋಚಿಸಿದಂತಿತ್ತು. ಯಾವ ಕೋನದಿಂದ ನೋಡಿದರೂ ಅವನಿಗೂ ಸೂರ್ಯನ ಮಾತಿನಲ್ಲಿ ತಥ್ಯವಿದೆಯೆನಿಸುತ್ತಿತ್ತು. ಜತೆಗೆ ಸೃಷ್ಟಿಕರ್ತನಾಗಿ ಅದು ತನ್ನ ಜವಾಬ್ದಾರಿಯಾದ ಕಾರಣ ಅದರಲ್ಲಿ ತನ್ನ ಛಾಪನ್ನು ಮೂಡಿಸಲು ನೇರ ಅವಕಾಶವೀಯುತ್ತದೆ. ಹೆಚ್ಚುಕಡಿಮೆ, ಒಳ್ಳೆಯದು ಮತ್ತು ಕೆಟ್ಟದ್ದಕ್ಕೆಲ್ಲ ಯಾರನ್ನು ದೂರುವ ಅವಕಾಶವಿರುವುದಿಲ್ಲ – ತನ್ನ ಹೊರತಾಗಿ…

ಇದೆಲ್ಲಾ ಆಲೋಚನೆಗಳ ನಡುವೆ ಅನುಮಾನ ಪರಿಹರಿಸಿಕೊಳ್ಳುವ ಕಿರು ಚರ್ಚೆ ನಡೆದು ಅದೇ ಸರಿಯಾದ ಹಾದಿಯೆಂಬ ತೀರ್ಮಾನದೊಂದಿಗೆ ಅಂತಿಮವಾಗಿತ್ತು ಅಂದಿನ ಸಭೆ.

ಅಲ್ಲಿಂದಾಚೆಗೆ ಮತ್ತೆ ನಾಗಾಲೋಟದ ಗತಿಯಲ್ಲಿ ಕಸಿಯ ಪ್ರಯೋಗ ಮುಂದುವರೆಯಿತು. ನಿರ್ಧರಿಸಿದಂತೆ ಬ್ರಹ್ಮದೇವನ ಮತ್ತು ಊರ್ವಶಿಯ ಜೀವಕೋಶಗಳ ಮಾದರಿಗಳನ್ನು ಸಂಗ್ರಹಿಸಿ ಅವನ್ನು ಕಸಿ ಮಾಡುವ ಹಲವಾರು ವಿಕಲ್ಪಗಳನ್ನು ಸಮಾನಾಂತರವಾಗಿ ನಡೆಸತೊಡಗಿತ್ತು ಆ ವಿಜ್ಞಾನಿಗಳ ತಂಡ. ಹಂತಹಂತವಾಗಿ ನಡೆಯುತ್ತಿದ್ದ ಈ ಪ್ರಯೋಗಕ್ಕೆ ನರನಾರಾಯಣರು ಮಾಡಿಟ್ಟಿದ್ದ ಟಿಪ್ಪಣಿಗಳು ಅತ್ಯುಪಯೋಗಿ ಸರಕಾಗಿ, ಹಲವಾರು ಅಂಶಗಳನ್ನು ನೇರವಾಗಿ ಅಳವಡಿಸಿಕೊಳ್ಳುವಂತೆ ಮಾಡಿ ಕೆಲಸವನ್ನು ಇನ್ನು ಸುಲಭವಾಗಿಸಿಬಿಟ್ಟಿದ್ದವು. ಮುನ್ನೆಚ್ಚರಿಕೆಯ ಕ್ರಮವಾಗಿ ವಿವಿಧ ವಿಕಲ್ಪದಲ್ಲಿ ನಡೆಸಿದ ಪ್ರಯೋಗದ ಕಾರಣದಿಂದ ಅನೇಕ ಮಾದರಿಗಳು ಲಭ್ಯವಾಗಿ, ಒಂದು ಸೋತಲ್ಲಿ ಮತ್ತೊಂದಕ್ಕೆ ಹೊಸತಾಗಿ ಸಮಯ ವ್ಯಯಿಸದೆ ಪ್ರಯೋಗ ಮುಂದುವರೆಸಲು ಸಾಧ್ಯವಾಗಿತ್ತು.

ಇದೆ ಹೊತ್ತಿನಲ್ಲಿ ಎರಡನೆ ಕಿರುತಂಡವೂ ತಂಬ ಪ್ರಯೋಗದಲ್ಲಿ ಅದ್ಭುತ ಪ್ರಗತಿಯನ್ನು ಸಾಧಿಸತೊಡಗಿತ್ತು. ಹೇಗಾದರೂ ಮಾಡಿ ಜೀವಕೋಶದ ಆಯಸ್ಸು ಹೆಚ್ಚಿಸಬೇಕೆಂಬುದು ಅದರ ಗುರಿ. ಅದರ ಹಿನ್ನಲೆಯೂ ಸರಳವಾಗಿಯೇ ಇತ್ತು. ದೇಹದ ರಚನೆಯಲ್ಲಿ ಪ್ರತಿನಿತ್ಯವೂ ಹೊಸ ಜೀವಕೋಶಗಳು ಹುಟ್ಟುತ್ತಲೇ ಇರುತ್ತವೆ ಮತ್ತು ಹಳತಾದವು ಸಾಯುತ್ತಲೇ ಇರುತ್ತವೆ. ಬಾಲ್ಯದಲ್ಲಿ, ಪ್ರಾಯದಲ್ಲಿ ಹೊಸದಾಗಿ ಹುಟ್ಟುವ ಕೋಶಗಳ ಸಂಖ್ಯೆ ಹೆಚ್ಚಿರುವುದರಿಂದ ಅದರನುಸಾರ ದೇಹದ ಬೆಳವಣಿಗೆಯೂ ಆಗುತ್ತಿರುತ್ತದೆ. ಆದರೆ ಕ್ರಮೇಣ ವೃದ್ಧಾಪ್ಯದತ್ತ ನಡೆಯುವ ಹೊತ್ತಿಗೆ ಹೊಸತರ ಉತ್ಪಾದನೆ ಕುಂಠಿತವಾಗಿಬಿಡುತ್ತದೆ ಮತ್ತು ನಶಿಸಿಹೋಗುವ ಹಳತರ ಸಂಖ್ಯೆ ಹೆಚ್ಚುತ್ತ ಹೋಗುತ್ತದೆ. ಯಾವಾಗ ಇವೆರಡರ ನಡುವಿನ ಅಂತರ ಜೀವಿಯ ಉಳಿವಿಗೆ ಸಾಕಾಗುವಷ್ಟು ಶಕ್ತಿಮೂಲವನ್ನು ಒದಗಿಸಲಾಗುವುದಿಲ್ಲವೋ ಆಗ ಆ ದೇಹಕ್ಕೆ ಸಾವು ಹತ್ತಿರವಾಯ್ತೆಂದು ಅರ್ಥ. ಅದನ್ನು ವಿಲಂಬಿಸಬೇಕೆಂದರೆ ಒಂದು ಕಡೆ ಹೊಸ ಕೋಶದ ಉತ್ಪಾದನೆ ನಿರಂತರವಿರುವಂತೆ ನೋಡಿಕೊಳ್ಳಬೇಕು. ಮತ್ತೊಂದೆಡೆ ಜೀವಕೋಶದ ನಶಿಸುವ ಕಾಲದ ಅವಧಿಯನ್ನು ವಿಸ್ತರಿಸುವ ಸಾಧ್ಯತೆಯನ್ನು ಗಮನಿಸಬೇಕು. ಇವೆರಡು ಯಶಸ್ವಿಯಾದರೆ ಅಷ್ಟರ ಮಟ್ಟಿಗೆ ಧೀರ್ಘಾಯಸ್ಸಿನ ಪ್ರಯೋಗ ಯಶಸ್ಸು ಕಂಡಂತೆ. ಆದರೆ ಅದನ್ನು ಸಾಧ್ಯವಾಗಿಸುವುದು ಹೇಗೆಂಬ ಪ್ರಶ್ನೆಗೆ ಉತ್ತರವಿದ್ದಿದ್ದು ಮೂರನೆಯ ಕಿರುತಂಡದ ‘ಜೀವಕೋಶದ ಸ್ವಯಂಭುತ್ವ’ ಪ್ರಯೋಗದ ಫಲಿತದಲ್ಲಿ !

ಮೂರನೆಯ ಕಿರುತಂಡದ ಉತ್ಸಾಹದ ಪ್ರಯೋಗದಲ್ಲಿ ಒಂದು ಉಪಯುಕ್ತ ಮಾಹಿತಿ ಅನಾವರಣವಾಗಿಹೋಗಿತ್ತು. ಅದೆಂದರೆ – ಜೀವಕೋಶ ಬದುಕಲು ಮತ್ತು ಸಾಯಲು ಮೂಲಕಾರಣವಾದ ಒಂದು ರಾಸಾಯನಿಕ ಬೀಜವಸ್ತು. ಹೊಸದಾಗಿ ಹುಟ್ಟಿದ ಜೀವಕೋಶದಲ್ಲಿ ಈ ರಾಸಾಯನಿಕ ತಂತು ತೀರಾ ಚುರುಕಾಗಿ, ಸಕ್ರಿಯವಾಗಿರುವತನಕ ಜೀವಕೋಶವೂ ಲವಲವಿಕೆಯಿಂದ ಚಟುವಟಿಕೆಯಿಂದ ಬದುಕಿಕೊಂಡು ಇರುತ್ತಿತ್ತು. ಅದೇಕೋ ಎಂತೋ ಈ ರಾಸಾಯನಿಕ ತಂತು ನಡುವಲ್ಲೊಮ್ಮೆ ಇದ್ದಕ್ಕಿದ್ದಂತೆ ನಿಷ್ಕ್ರಿಯವಾಗಿ, ತನ್ನ ಚಟುವಟಿಕೆಗಳ ಕಾರ್ಖಾನೆಯನ್ನು ನಿಲ್ಲಿಸಿಬಿಡುತ್ತಿತ್ತು. ಆಗಲೆ ಆ ಕೋಶದ ಸಾವಿಗೆ ಮುನ್ನುಡಿ ಆಗುತ್ತಿದ್ದುದ್ದು. ಅದನ್ನು ಯಾವುದಾದರೊಂದು ರೀತಿಯಲ್ಲಿ ಮತ್ತೆ ಉದ್ರೇಕಿಸಿ ಸಕ್ರೀಯಗೊಳಿಸಿಬಿಟ್ಟರೆ ಅದು ಸಾವಿನತ್ತ ನಡೆಯುವ ಬದಲು ಮತ್ತೆ ಚೈತನ್ಯದ ಚಿಲುಮೆಯಾಗಿಬಿಡುತ್ತಿತ್ತು. ಹಾಗೆ ಮಾಡಬಲ್ಲ ಮತ್ತೊಂದು ರಾಸಾಯನಿಕವನ್ನು ಕಂಡುಹಿಡಿದು ಅದನ್ನು ಸಫಲವಾಗಿ ಬಳಸುವ ವಿಧಾನವನ್ನು ಕಂಡುಹಿಡಿದಿದ್ದೆ ಈ ತಂಡದ ಸಾಧನೆ.. ಹೀಗಾಗಿ ಈ ವಿಧಾನದಲ್ಲಿ ಜೀವಕೋಶದ ಜೀವಾವಧಿಯನ್ನು ಲಂಬಿಸುವುದು ಹೇಗೆಂಬ ಪ್ರಶ್ನೆಗೆ ಉತ್ತರ ಸಿಕ್ಕಿಹೋಗಿತ್ತು. ಮಿಕ್ಕಿದ್ದೇನಿದ್ದರು ಅಳವಡಿಕೆಯಲ್ಲಿ ಸರಿಯಾಗಿ ಪ್ರವರ್ತಿಸುವ ನಿಗದಿತ ಪ್ರಮಾಣವನ್ನು ನಿರ್ಧರಿಸುವುದಷ್ಟೆ ಕಂಡುಕೊಳ್ಳಬೇಕಾಗಿತ್ತು. ಇದೇ ಸೂತ್ರದ ಮಾದರಿಯನ್ನು ಅನುಕರಿಸಿ ಹೊಸ ಜೀವಕೋಶಗಳ ಸೃಷ್ಟಿಗೂ ಕೂಡ ಇದೇ ಪ್ರಚೋದಕ ರಾಸಾಯನವನ್ನೆ ಬಳಸಬಹುದೆಂದು ಕಂಡುಕೊಂಡಿದ್ದರಿಂದ ಎರಡನೆಯ ತಂಡದ ಎರಡು ಪ್ರಶ್ನೆಗಳಿಗೂ ಒಂದೇ ಉತ್ತರ ಸಿಕ್ಕಂತಾಗಿ ಅವರ ಪ್ರಯೋಗ ನಿರಾಯಾಸವಾಗಿ ಸಾಗಿಸಲು ಅನುಕೂಲವಾಗಿ ಹೋಯ್ತು.

ಇವನ್ನೆಲ್ಲ ಸಮಷ್ಟಿಸುತ್ತಿದ್ದ ನಾಲ್ಕನೇ ಕಿರಿತಂಡದ ಮೇಲ್ವಿಚಾರಣೆಯ ಚಾಕಚಕ್ಯತೆಯಿಂದಾಗಿ ಮೂರು ತಂಡಗಳೂ ಅತಿ ಶೀಘ್ರದಲ್ಲೆ ತಂತಮ್ಮ ಗಮ್ಯ ತಲುಪಿ ಮೊದಲ ಫಲಿತಾಂಶಗಳೊಂದಿಗೆ ಪ್ರಾಥಮಿಕ ಪರೀಕ್ಷೆ , ವಿಮರ್ಶೆಗೆ ತಯಾರಾಗಿಬಿಟ್ಟಿದ್ದವು – ಅನತಿ ಕಾಲದಲ್ಲೇ..!

(ಇನ್ನೂ ಇದೆ)

(Link to next episode no. 42: https://nageshamysore.wordpress.com/2016/04/24/00669-0041_%e0%b2%85%e0%b2%b9%e0%b2%b2%e0%b3%8d%e0%b2%af%e0%b2%be_%e0%b2%b8%e0%b2%82%e0%b2%b9%e0%b2%bf%e0%b2%a4%e0%b3%86_%e0%b3%aa%e0%b3%a7/)

)

00668. ರಾಜ್ ಇಲ್ಲದ ಕನ್ನಡವೆಂತು ?

00668. ರಾಜ್ ಇಲ್ಲದ ಕನ್ನಡವೆಂತು ?
___________________________

ಏನಪ್ಪಾ ಗತಿ ಕನ್ನಡ ?
ನಿನ್ನ ಹೆಸರಿಲ್ಲದಿದ್ದರೆ ಅಡ್ಡ
ನುಂಗಿ ನೀರು ಕುಡಿದು ಸಕಲ
ಕನ್ನಡ ಹುಡುಕಿದರೂ ಸಿಗದ ಕಾಲ..

ಕಾಲಾಡಿಸಲು ಬಂದವರು
ಜೀವಕಾಲವಿಲ್ಲೇ ಕಳೆವ ಜನರು
ಕಲಿತಾಡಲಿ ಕನ್ನಡನುಡಿ ಬೆರೆಯುತ್ತೆ
ನೋಡಲಿ ಸಾಕು ಸಿನಿಮಾಗಳೆ ಕಲಿಸುತ್ತೆ..

ಮಕ್ಕಳು-ಮರಿಗು ರೀತಿ
ಜೀವನಮೌಲ್ಯದ ಪಾಠ ನೀತಿ
ಬೇಕಲ್ಲವೆ ಬದುಕಿನಡಿಪಾಯ ಸೂತ್ರ
ತೋರಿಸಿ ಸಾಕು ರಾಜಣ್ಣನ ಜೀವನ ಚೈತ್ರ..

ಜನುಮ ದಿನ ಬರಿ ನೆಪ
ನಿತ್ಯ ಸಿನಿಮ ಹಾಡಲಿ ಜಪ
ನೋಡಿ ಕನ್ನಡ ಟೀವಿ ಚಂದದಲಿ
ಚಂದನ ಸುಗಂಧ ಕಸ್ತೂರಿ ಹರಡಲಿ..

ಬೇಡಿನ್ನೇನು ಸ್ಮರಣೆ ನೆನಪು
ಕನ್ನಡ ಮಾತಾಡಿದರದೆ ಕಂಪು
ನಾಡುನುಡಿ ಉಳಿಸೆ ಜೊತೆಗೂಡೆ
ಜತೆಯಾಗಿ ಸದಾ ಕನ್ನಡ ರಾಜನ ಹಾಡೆ..

– ನಾಗೇಶ ಮೈಸೂರು

00667. ಡಾಕ್ಟರ್ ರಾಜ್ !

00667. ಡಾಕ್ಟರ್ ರಾಜ್ !
__________________

ಏಪ್ರಿಲ್ ೨೪ ರಾಜ್ ಹುಟ್ಟಿದ ಹಬ್ಬದ ನೆನಪಿಗಾಗಿ ಕೆಲವು ಹಾಯ್ಕುಗಳು.

(೦೧)
ಹಿಂದೆಯೂ ಇಲ್ಲ
ಮುಂದೂ ಇರುವುದಿಲ್ಲ
– ಡಾಕ್ಟರ ರಾಜ್ !

(೦೨)
ರಾಜ್ ಹೆಸರು
ಭದ್ರತೆ ಕನ್ನಡಕೆ.
– ಭಾಗ್ಯವಂತರು !

(೦೩)
ವೀರ ಕೇಸರಿ
ಸ್ವಾಭಿಮಾನದ ನಲ್ಲೆ
– ಬಾಲ್ಯದಿಂದಲೆ !

(೦೪)
ಕಠಾರಿ ವೀರ
ಹಾಯಾದ ಈ ಸಂಗಮ
– ಪೂರ್ವ ಸುಕೃತ !

(೦೫)
‘ನಾನಿರುವುದೆ
ನಿಮಗಾಗಿ’ ಹಾಡಿದ
– ಸ್ವರ ಮಯೂರ !

(೦೬)
ಬೆಂಕಿಯ ಚೆಂಡು
ಬಂಕಾಪುರದ ಗಂಡು
– ಇನ್ನೂ ಜೀವಂತ !

(೦೭)
‘ನಾನು’ ಹೋದರೆ
ಹೋದೆನು ಅಂದೆ ನಿಜ.
– ಹೋಗೆ ಬಿಟ್ಟೆಯಾ?

(೦೮)
ಇದ್ದರೂ ಲಕ್ಷ
ಹೋದರೂ ಲಕ್ಷ ಜನ
-ಸದಾ ಜೀವಂತ!

(೦೯)
ಬಭ್ರುವಾಹನ
ಅರ್ಜುನನ ಕಡಿದ !
– ಎಲ್ಲವೂ ನೀನೆ !!

(೧೦)
ಪುರದ ಪುಣ್ಯ
ಪುರುಷ ರೂಪದಲಿ..
– ಸರ್ವಾಂತರ್ಯಾಮಿ !

– ನಾಗೇಶ ಮೈಸೂರು

(Picture source: https://en.m.wikipedia.org/wiki/File:Actor_Rajkumar.jpg)

00666. ಹನುಮ-ಭುವನ

00666. ಹನುಮ-ಭುವನ
_________________

 

ಧಾರಿಣಿ ದಿನ ಸಂಭ್ರಮಣ
ಹನುಮೋತ್ಸವ ಸಮ್ಮಿಲನ
ಸಂಜೀವಿನಿ ಹೊತ್ತವನ ಗುಣ
ಪೃಥ್ವಿಯಲ್ಲು ಅನುರಣ ದಿನ ||

ಅಪರಿಮಿತವಿಹ ಸ್ವಾಮಿ ಭಕ್ತಿ
ಬಿಡದೆ ಜಪಿಸೋ ರಾಮನುಕ್ತಿ
ಅದೇ ಅಪಾರ ತಾಳ್ಮೆ ವಸುಧೆ
ಸಹನೆಯಿಂದ ಸಹಿಸೋ ಶ್ರದ್ಧೆ ||

ಬಿಡನಾರನು ದೂಷಿಸೆ ಪ್ರಭುವ
ಹವಣಿಸಿದವರ ಹಣಿಸೊ ಭಾವ
ಮೀರಿಸಿ ಇಳೆ ಪೊರೆದಿಹಳು
ಮನ್ನಿಸಿ ಮಕ್ಕಳ ಅಟ್ಟಹಾಸಗಳು ||

ಮಾತೆಗಿತ್ತ ಮಾತಿಗೆ ಮಾರುತಿ
ಪ್ರಭುವೆದುರೆ ಕದನದ ಕೀರ್ತಿ
ಅಂಥ ಮಾತೆಯರ ಮಾತೆ ಭೂಮಿ
ಅವಳನಳಿಸೊ ಮಾನವ ಕಾಮಿ ||

ಅಖಂಡ ಶ್ರದ್ಧೆ ಭಕ್ತಿ ಭಾವ ಗಡವ
ಹೃದಯದೊಳಗೆ ಬಚ್ಚಿಟ್ಟ ರೂಪವ
ಬಗೆದು ತೋರದಿದ್ದರೂ ಸರಿ ಮರುಳೆ
ಭುವಿಯುಳಿಸೆ ಕರುಣೆ ತೋರುವಳೆ ||

– ನಾಗೇಶ ಮೈಸೂರು

(Picture source: http://www.indianastrology.com/festival/2016/hanuman-jayanti-20)

00665. ಅರ್ಥವಾಗುವುದೇ ಇಲ್ಲ !

00665. ಅರ್ಥವಾಗುವುದೇ ಇಲ್ಲ ! (2 poems)
__________________________________

ಮನಗಳ ನಡುವಿನ ಸಂವಹನದಲ್ಲಿ, ಪರಸ್ಪರರ ನಿರೀಕ್ಷೆಗಳ ಸುತ್ತ ಸುಳಿದಾಡುವ ಪರಿಯಿಂದಾಗಿ ಅದು ಗೆಳೆಯ – ಗೆಳತಿಯರ ಸಖ್ಯದಲ್ಲಿ ತಂದೊಡ್ಡುವ ಸಂಕಷ್ಟ – ಸಂದಿಗ್ದಗಳ ಪರಿಸ್ಥಿತಿ ಕೆಲವೊಮ್ಮೆ ವಿವರಣೆಯ ಎಟುಕಿಗೆ ನಿಲುಕದ್ದು. ಏನೇನೊ ಚದುರಂಗವಾಡಿಸಿ, ಏನೆಲ್ಲಾ ತಪ್ಪೆಣಿಕೆಗಳ ಸುತ್ತ ಸುತ್ತಾಡಿಸಿ, ಹೊಂದಾಣಿಸಿ- ಮುರಿಸಿ , ಮತ್ತದನೆ ಮರುಕಳಿಸಿ, ಯಾತನೆ ಒತ್ತಡಗಳಲಿ ತಡಕಾಡಿಸಿ ಸುಸ್ತು ಮಾಡಿ ‘ಯಾಕಪ್ಪ ಬೇಕೀ ನಂಟು ?’ ಎಂದು ನಿಟ್ಟುಸಿರಿಡುವಂತೆ ಮಾಡಿಸುವ ಅದರ ಸಹವಾಸ ಎಲ್ಲರಿಗೂ ಪರಿಚಿತವೇ. ಅದರಲ್ಲೂ ಹಳಸಿದ ಸಂಬಂಧದ ಪರಿಧಿಯಾಗಿಬಿಟ್ಟರೆ ತಾವಾಗಿಯೇ ಕಟ್ಟಿಕೊಂಡ ಮೌನದ ಬೇಲಿ ದಾಟಲಾಗದೆ, ಏನೇನೊ ಸ್ವಯಂಕಲ್ಪಿತ ಸಂಕೋಲೆಗಳಡಿ ಕೊರಗುತ್ತ, ಪರಸ್ಪರರಿಗೆ ಅರ್ಥವಾಗದವರಾಗುವ ಸಂಬಂಧದ ಸಂಕೀರ್ಣತೆಯ ಒಂದು ಮುಖ – ‘ಅರ್ಥವಾಗದ ಗೆಳೆಯ’ ಕವಿತೆ; ಅದರ ಮತ್ತೊಂದು ಮುಖ ‘ಅರ್ಥವಾಗದ ಗೆಳತಿ’. ಇವೆರಡು ಕವಿತೆಗಳ ಒಟ್ಟಾರೆ ಮಥಿತಾರ್ಥವನ್ನು ಸಾರದಲ್ಲಿ ಹೇಳುವುದಾದರೆ – ಇದೊಂದು ಪರಸ್ಪರರಿಗೆ ಮತ್ತು ಸ್ವತಃ ತಮಗೂ ಸಹ ತಾವೇನೆಂದು ಅರ್ಥವಾಗದವರ ಆಲಾಪ, ಗೋಳು!

  
01. ಗೆಳತಿ, ನಿನಗಿದೆಲ್ಲ ಅರ್ಥವಾಗುವುದೇ ಇಲ್ಲ !
________________________________

ಗೆಳತಿ,
ನಿನಗಿದೆಲ್ಲಾ
ಅರ್ಥವಾಗುವುದಿಲ್ಲ !
ಕಾಲಗರ್ಭದ ಆಳದಲೆಲ್ಲೋ
ಹುದುಗಿದ
ನೋವಿನ ಸೆಲೆ
ಬಸಿರಾಗದ ಸಂಕಟಕ್ಕೆ
ಬಿಕ್ಕಳಿಸುತ್ತಿದೆ ;
ಹರವಾದ ಎದೆಗಿತ್ತ
ಗುದ್ದನ್ನೆಲ್ಲಾ ಸಹಿಸಿ –
ನಿಟ್ಟುಸಿರು ನುಂಗುತ್ತ,
ಸಾಯಲಾಗದೆ
ಬದುಕಿದೆ
ಆಗ..
ನೀನಾದರೂ
ಸಂತೈಸಿ
ಜೀವ ಕೊಡುವೆಯೆಂದರೆ –
ಗೆಳತಿ, ನಿನಗಿದೆಲ್ಲ ಅರ್ಥವಾಗುವುದೇ ಇಲ್ಲ ||

ವೇದನೆಯ ಮಡು
ಇರುಳಾಗಿ ಕಾಡುತಿದೆ
ಕೆಸರಿನಡಿ ಸಿಲುಕಿ
ಕನಸು ಕಣ್ಮರೆಯಾಗಿದೆ..
ಆಳ ಹೊಕ್ಕು ನೋಡಲೆಂದರೆ
ಹೂತು ಹೋಗುವ ಭಯ !
ಸುಮ್ಮನೆ
ಮೌನದ ಸೆರಗ್ಹಿಡಿದೆ..
ನೀ
ಮತ್ತೆ ಮತ್ತೆ ಕಾಡಿದೆ –
‘ಏನಾಗಿದೆ ನಿನಗೆ ?’
ನಾ ಮೌನದಲೇ ಉಸುರಿದೆ
ಗೆಳತಿ, ನಿನಗಿದೆಲ್ಲ ಅರ್ಥವಾಗುವುದೇ ಇಲ್ಲ ||

– ನಾಗೇಶ ಮೈಸೂರು

02. ಗೆಳೆಯಾ, ನೀ ನನಗರ್ಥವಾಗುವುದೇ ಇಲ್ಲ!
__________________________________

ಸಂಬಂಧಗಳು
ಹುಟ್ಟುತ್ತವೆ, ಸಾಯುತ್ತವೆ
ಭಾವನೆಗಳಂತೆ !
ಭಾವನೆಗಳು
ಅರಳುತ್ತವೆ – ಕಮರುತ್ತವೆ
ಆಸೆಗಳಂತೆ !
ಆಗೊಮ್ಮೊಮ್ಮೆ
ಗಪ್ಪನೆಯ ಏಕಾಂತ
ನೀರವತೆ ಆವರಿಸಿದಾಗ
ಮುಸುಕಿನೊಳಗಿನ
ಸೆಖೆಗೆ ಬೇಸತ್ತು
ಮೆತ್ತನೆಯ ಮಡಿಲನರಸಿ
ನಿನ್ನತ್ತ ನೋಡುತ್ತೇನೆ,
ಕಣ್ಣರಳಿಸುತ್ತೇನೆ,
ಯಾಚಿಸುತ್ತೇನೆ ಗೆಳೆಯಾ ;
ಇದೆಲ್ಲ – ನಿನಗರ್ಥವಾಗುವುದೇ ಇಲ್ಲಾ ||

ಏಕೆ ಇಲ್ಲದ ಚಿಂತೆ-
ಕೊನೆ ಮುಟ್ಟದ ರಗಳೆ?
ಅನಿಸಿ,
ತೆರೆ ಸರಿಸಲೆಣೆಸುತ್ತೇನೆ ;
ನಿನಗರ್ಥವಾಗದ
ನನ್ನತನವ
ತೊರೆಯಲೆತ್ನಿಸುತ್ತೇನೆ
ಭೂತದ ಛಾಯೆಯಡಿ,
ಭವಿತದ ಮಾಯೆಯ
ಹೊದರನೆಲ್ಲಾ ಮುದುರಿ,
ನಿನ್ನ –
ವರ್ತಮಾನದ ಜತೆಗೆ
ನಡೆಯಲೆತ್ನಿಸುತ್ತೇನೆ
ಆಗ ನೀ
ವಿಚಿತ್ರವಾಗಿ ನೋಡುವೆ !
ನಾ ಬೇಸರದಲಿ ನುಡಿವೆ –
‘ಗೆಳೆಯ, ನೀ ನನಗೆ ಅರ್ಥವಾಗುವುದೇ ಇಲ್ಲ!’ ||

– ನಾಗೇಶ ಮೈಸೂರು

(picture source from:
http://cdn.tinybuddha.com/wp-content/uploads/2015/03/Toxic-Relationship.jpg)

00664. ಖಾಲಿ ಬಯಲಿನ ಜಾತ್ರೆ..

00664. ಖಾಲಿ ಬಯಲಿನ ಜಾತ್ರೆ..
________________________

 
(Picture source: https://upload.wikimedia.org/wikipedia/commons/b/b9/Camden_Market_is_empty.jpg)

ಉಳಿಸಿ ಹೋಗಿದ್ದೊಂದು ಪರಿ ಯಾತನೆ
ಬರಿ ನೆನಪುಗಳ ಜಾತ್ರೆ ಸಂತೆ
ಭಣಗುಟ್ಟುತಿದೆ ಖಾಲಿ ಬಯಲು
ಕೂತರೂ ಕೊಳ್ಳುವರಿಲ್ಲ, ಮಾರಲೇನು ?

ಬಿಕರಿಗಿಟ್ಟ ಭಾವನೆಗಳ ಹೊಸ ತರಕಾರಿ
ಮೂಟೆ ಗೂಡೆ ಬುಟ್ಟಿಯೆಲ್ಲಾ ಬಿಚ್ಚಿಟ್ಟು
ಅದೇ ಸರಕಾದರು ಎಳಸು, ಹೊಸತು
ಹಾಸಿ ಸುರಿದು ಕೂತರು ದಿಕ್ಕೆಟ್ಟ ಮೌನ..

ಗಮಗಮಿಸುತಿದೆ ಹಣ್ಣು ಹಂಫಲ ಜೀವ
ಭಾವಕೆ ಜೋಡಿ ತಾನಾಗಿ ಒಕ್ಕೊರಳು
ಜೋಡಿಸಿದ ಚಿತ್ತಾರ ರಂಗೋಲಿಯ ಸೆರಗು
ನೆಚ್ಚಿದ್ದೆಂದರು ನೋಡದೆ ಹೋದ ವ್ಯಥೆಯೆಲ್ಲ..

ರಾಶಿ ರಾಶಿ ಅಲ್ಲೇ ಮೊಲ್ಲೆ ಅರಳಿದ ಹೂವು
ಜೀವ-ಭಾವವ ಬೆಸೆಯೊ ನೂಲಿನಂತೆ ಕಾದಿವೆ
ಸುಡುತಿಲ್ಲದ ಬಿಸಿಲು ಬೀಸುತಿದೆ ತಂಗಾಳಿ
ಮೊಗ್ಗ ಹಿಗ್ಗಿನ ಮಳೆ ಹನಿ ತುಂತುರಲು ನೀನಿಲ್ಲ..

ಒಣಗಿ ಕೊಳೆತು ಮುದುಡಿ ಮುರುಟಿ ಹೋದಾವು
ಎಂದಿನಿತೂ ಕನಿಕರವಿರದೆ ನಡೆದ ನಿಶ್ಯಬ್ದದಲಿ
ಹನಿಗಳೆಲ್ಲ ಕಲಸಿ ಅಳಿಸುತಿವೆ ಸೊಗದ ಚಿತ್ತಾರವ
ಅಸಹಾಯಕ ನೋಟ ಉಳಿಸಿ ನಿರ್ವಾತ ಯಾತನೆ..

– ನಾಗೇಶ ಮೈಸೂರು

00663. ಕಗ್ಗಕೊಂದು ಹಗ್ಗ ಹೊಸೆದು – ಟಿಪ್ಪಣಿ ೦೪

00663. ಕಗ್ಗಕೊಂದು ಹಗ್ಗ ಹೊಸೆದು – ಟಿಪ್ಪಣಿ ೦೪ 

ಇಂದಿನ ರೀಡೂ ಕನ್ನಡದಲ್ಲಿ ಪ್ರಕಟಿತ (೨೦.೦೪.೨೦೧೬) 

ಕಗ್ಗಕೊಂದು ಹಗ್ಗ ಹೊಸೆದು 

00665. ಜಿದ್ದಿನ ಜಿಡ್ಡು ದೇಹದ ಜಡ್ಡು – 02/02

00665. ಜಿದ್ದಿನ ಜಿಡ್ಡು ದೇಹದ ಜಡ್ಡು – 02/02
__________________________________

ಬಾಯೃಚಿಯನ್ನು ಗೆಲ್ಲಬಲ್ಲ ಸಂತರು, ಜಿಹ್ವಾ ಚಾಪಲ್ಯವನ್ನು ನಿಯಂತ್ರಿಸಬಲ್ಲ ಅಸಾಧಾರಣ ಶೂರರು ಎಲ್ಲೆಡೆಯೂ ಕಾಣಸಿಗದ ಅಪರೂಪದ ಸರಕೆಂದೆ ಹೇಳಬಹುದು. ರುಚಿಯಾಗಿದೆಯೆಂದೊ, ಯಾರೊ ಬಲವಂತಿಸಿದರೆಂದೊ, ಇದೊಂದೆ ಬಾರಿ ತಿಂದು ನಾಳೆಯಿಂದ ನಿಯಮ ಪಾಲಿಸುವುದೆಂದೊ, ಆಸೆ ತಡೆಯಲಾಗದೆಂದೊ – ಒಟ್ಟಾರೆ ಒಂದಲ್ಲ ಒಂದು ಕಾರಣಕ್ಕೆ ಜಿಹ್ವಾಚಪಲದ ಸೆಳೆತಕ್ಕೆ ಬಲಿಯಾಗುವವರೆ ಎಲ್ಲ. ಅದರ ವಿಶ್ವರೂಪದ ತುಣುಕನ್ನು ಪರಿಚಯಿಸುವ ಮೊದಲ ಭಾಗ ‘ಚಿತ್ತ ಜಿಹ್ವಾ ಚಪಲ !’ ಕವನ.

ಹೀಗೆ ಚೂರು ಚೂರೆ ಒಳಸೇರುವ ಖಳ, ದಿನಗಳೆದಂತೆಲ್ಲ ಒಟ್ಟುಗೂಡುತ್ತ ದಿನೆ ದಿನೆ ನಿಧಾನವಾಗಿ, ವಿಧವಿಧಾನವಾಗಿ ತರತರದ ತೊಡಕು, ತೊಂದರೆಗಳ ಬಲೆಗೆ ಸಿಲುಕುವ ಪರಿ ಎರಡನೆ ಭಾಗದ ಸಾರ. ಕೆಡುತ್ತ ಹೋಗುವ ದೇಹದ ಆರೋಗ್ಯ, ಉಬ್ಬುತ್ತ ಹೋಗುವ ಉದರ ವಿನ್ಯಾಸ, ಕುಗ್ಗುತ್ತ ಹೋಗುವ ಚಟುವಟಿಕೆಯ ದಾಯ, ಮುಗ್ಗುಲಿಡಿದಂತೆ ಅನಿಸಿಬಿಡುವ ಇಡಿ ದೈಹಿಕ ವ್ಯವಸ್ಥೆ – ಹೀಗೆ ಇದೆಲ್ಲದರತ್ತ ನೋಡುವ ಇಣುಕು ನೋಟ ಈ ದ್ವಿತೀಯಾರ್ಧದ ಸಾರಾಂಶ.

  
(picture source: https://encrypted-tbn0.gstatic.com/images?q=tbn:ANd9GcSxOZ7rDNsTEKuOTftFA9wZfjG4ihGlOsePdaXcWdoPd4zTagL8VA)

ಅಜೀರ್ಣ ಖಳ ಬೊಜ್ಜಿನ ಗಾಳ!
___________________________

ಚೂರುಚೂರು ವೈವಿಧ್ಯ
ಒಟ್ಟಾಗಿ ಸೇರಿ ದುರ್ವಿದ್ಯ
ಹೊಟ್ಟೆ ಸೇರೆ ಕೆಟ್ಟು ಅಮೇಧ್ಯ
ಸಂಭಾಳಿಸಲು ಬೇಕು ಧನುರ್ವಿಧ್ಯ ||

ಕಷ್ಟ ಕಷ್ಟ ವೈವಿಧ್ಯತೆ
ಅನಿಯಂತ್ರಣದ ಸಾಧ್ಯತೆ
ನಾಲಿಗೆ ಚಪಲ ತಡೆಯೆ ಸಫಲ
ಆದವ ಮಾತ್ರ ಗೆಲ್ಲುವ ಹಾಲಾಹಲ ||

ತಕತಕ ದಿನಕುಹಕ
ಆಕರ್ಷಣೆ ಮನ ಸೋಲುತ
ಸಡಿಲ ಬಿಡುವರು ಒಮ್ಮೆಗೆನುತ
ಒಮ್ಮೆಯಾಗಿ ನಾಳೆ ಪಾಳಿಯ ಸತತ ||

ವ್ಯಾಸ ವ್ಯಾಸ ಸನ್ಯಾಸ
ಗುಡ್ಹಾಣ ಹೊಟ್ಟೆ ವಿನ್ಯಾಸ
ಭೂಮಿ ಸುತ್ತುವಂತೆ ವರುಷ
ಇಳಿಸಲಿಕ್ಕೆ ನೂರಾರು ಪುರುಷ ||

ಬೊಜ್ಜುಬೊಜ್ಜು ಮೈಗೊಜ್ಜು
ದಿನ ಓಡದಿದ್ದರೆ ನುಜ್ಜುಗುಜ್ಜು
ಮೈ ಚಳಿ ಬಿಡದಿರೆ ದೇಹ ಪೂರ್ಣ
ವಾಸಿಯಾಗಲು ಬೇಕು ವೈದ್ಯ ಚೂರ್ಣ ||

– ನಾಗೇಶ ಮೈಸೂರು

00664. ಜಿದ್ದಿನ ಜಿಡ್ಡು ದೇಹದ ಜಡ್ಡು – 01/02

00664. ಜಿದ್ದಿನ ಜಿಡ್ಡು ದೇಹದ ಜಡ್ಡು – 01/02
_________________________

ಬಾಯೃಚಿಯನ್ನು ಗೆಲ್ಲಬಲ್ಲ ಸಂತರು, ಜಿಹ್ವಾ ಚಾಪಲ್ಯವನ್ನು ನಿಯಂತ್ರಿಸಬಲ್ಲ ಅಸಾಧಾರಣ ಶೂರರು ಎಲ್ಲೆಡೆಯೂ ಕಾಣಸಿಗದ ಅಪರೂಪದ ಸರಕೆಂದೆ ಹೇಳಬಹುದು. ರುಚಿಯಾಗಿದೆಯೆಂದೊ, ಯಾರೊ ಬಲವಂತಿಸಿದರೆಂದೊ, ಇದೊಂದೆ ಬಾರಿ ತಿಂದು ನಾಳೆಯಿಂದ ನಿಯಮ ಪಾಲಿಸುವುದೆಂದೊ, ಆಸೆ ತಡೆಯಲಾಗದೆಂದೊ – ಒಟ್ಟಾರೆ ಒಂದಲ್ಲ ಒಂದು ಕಾರಣಕ್ಕೆ ಜಿಹ್ವಾಚಪಲದ ಸೆಳೆತಕ್ಕೆ ಬಲಿಯಾಗುವವರೆ ಎಲ್ಲ. ಅದರ ವಿಶ್ವರೂಪದ ತುಣುಕನ್ನು ಪರಿಚಯಿಸುವ ಮೊದಲ ಭಾಗ ಈ ಕವನ.

  

(Picture source: http://www.missindia.menu/wp-content/uploads/2014/10/home-panel-11-1.jpg

ಚಿತ್ತ ಜಿಹ್ವಾ ಚಪಲ !
___________________

ಜಿಡ್ಡುಜಿಡ್ದಾಗಿದೆ ಕೈ
ಬಲು ಜಡ್ದಾಗಿದೆ ಮೈ
ಲಡ್ಡು ಹಿಡಿದ್ಹೋಗಿದೆ ಮೂಳೆ
ಇನ್ನಷ್ಟು ಕಳೆಯೋದಿದೆ ನಾಳೆ ||

ರುಚಿರುಚಿಯಾಗಿದೆ
ಬಲು ಶುಚಿಯಾಗಿದೆ
ತೇಲಿದೆ ಎಣ್ಣೆ ಮುಚ್ಚು ಕಣ್ಣೆ
ಬಾಯೃಚಿ ಮುಂದೆ ಗಂಡು ಹೆಣ್ಣೆ ||

ಗರಿಗರಿಯಾಗಿದೆ
ಕರಿ ಸರಿ ಕರಿದಾಗಿದೆ
ಹೀರಿಬಿಟ್ಟು ಜೀವಸತ್ವ ಗುಟ್ಟು
ಬಣ್ಣ ಮೈಮಾಟವೆ ನೀರೂರಿಸಿಟ್ಟು ||

ನಳ ನಳಪಾಕ
ಮಾಡುವರ ಪುಳಕ
ಬಾಯ್ಮಾತಿಗೆ ಸಾಕ ಜಳಕ
ಖುಷಿಯಾಗುವಂತೆ ತಿನ್ನಬೇಕ ||

ಬಗೆ ಬಗೆ ತಿಂಡಿ
ತಿನ್ನಲು ಜೀವಹಿಂಡಿ
ಮುಂದಿಟ್ಟು ನಂಟು ನಲ್ಮೆ
ಒತ್ತಾಯಿಸಿ ಬಲು ಕೆಳೆ ಬಲ್ಮೆ ||

– ನಾಗೇಶ ಮೈಸೂರು

00663. ಬೇಸಿಗೆಗೊಂದು ಹಾಡು..

00663. ಬೇಸಿಗೆಗೊಂದು ಹಾಡು..
_________________________
(Picture source : http://www.bostonpublicschools.org/domain/1729)

  
ಬೇಸಿಗೆಗ್ಯಾಕೊ ಹೇಸಿಗೆ ?
ಬೈಯ್ಯೋದ್ಯಾಕೋ ಋತು ಕೂಸಿಗೆ
ನೀರಿಲ್ಲದ ನಿತ್ರಾಣ ಭೂಮಿ
ನೆನೆಸಲೆ ಬೆವರಿನ ಹೊಳೆ ಹೊಮ್ಮಿ !

ಬೆವರಿಗದ್ಯಾಕೋ ದಿಗಿಲು ?
ಸುರಿದಾವೆ ಹರಿಯದೆಯೂ ಮುಗಿಲು
ಬಿರಿದು ದೇಹದ ಕಸು ಸೋಸಿ
ರುಚಿಗಿಷ್ಟು ಉಪ್ಪಿಕ್ಕಿವೆ ಕಡಲನೆ ಬಾಚಿ !

ಕಾಣೆಯೊ ನೀ ಬಿಸಿಲಾಟ
ಎಕ್ಕಾ ಜೋಕರು ಪಕ್ಕಾ ಬಯಲಾಟ
ಬಿರುಸಲೆ ಒಣಗಿಸುತೆಲ್ಲ ಆವಿ
ಮೇಲೇರಿಸಿ ಮರುಮಳೆಯಾಗಿಸೆ ಛಾವಿ !

ಸಾಕು ನಿಲಿಸಪ್ಪ ದೂಷಣೆ
ಜನ ಬದುಕಲಿ ಎಳನೀರು ಹರಳೆಣ್ಣೆ
ನೆತ್ತಿಗೆ ತಂಪೆರೆವ ಪಾಡಲಿ
ಮರ್ದನ ಅಭ್ಯಂಜನ ಗೀತೆ ಹಾಡಲಿ !

ನಿಲಿಸಪ್ಪಾ ಸಾಕು ಹರಟೆ
ಬರಿ ವಾತಾಯನದೊಳಗಿನ ಮಾತೆ
ಗೊತ್ತೇ ಅನುಭವಿಸುವ ಕಷ್ಟ ?
ಚಳಿ ಮಳೆ ಬೇಸಿಗೆ ನರಗೆ ಸಂಕಟ !

– ನಾಗೇಶ ಮೈಸೂರು

00662…….ದಿಗಿಲುಟ್ಟಿಸಿ ಸ್ವಾಮಿ!(ಯಾರೋ ಕಟ್ಟಿದ ಭೂಮಿ ದಿಗಿಲುಟ್ಟಿಸಿ ಸ್ವಾಮಿ 2/2)

00662…….ದಿಗಿಲುಟ್ಟಿಸಿ ಸ್ವಾಮಿ!
______________________________
(ಯಾರೋ ಕಟ್ಟಿದ ಭೂಮಿ ದಿಗಿಲುಟ್ಟಿಸಿ ಸ್ವಾಮಿ 02/02)

   
Picture source from : https://en.m.wikipedia.org/wiki/File:The_Earth_seen_from_Apollo_17.jpg)

ಕೊರೆದು ಗೋರಿದಲ್ಲಿ ನೀರಾಳ
ಕೂರಲು ಬಿಡುವುದೇ ನಿರಾಳ
ಜಲ ಚಕ್ರ ಬಿಕ್ಕಳಿಸಿದ ಕವಳ
ಎಷ್ಟುಪ್ಪು ನೀರಿದ್ದೇನು ಹೇರಳ ||

ಕಾಲಗಳಿಗೆ ಅಕಾಲ ಸಂಗತಿ
ವರ್ಷಪೂರ ವರ್ಷದ ಅತಿಥಿ
ಬಿಸಿಲು ಚಳಿಗಾಲವೆ ಕೋತಿ
ಮಾಯ ಕಾಲ ಕಾಲ ಸರತಿ ||

ಸಾಲಂಕೃತ ನವೀನ ಕಟ್ಟಡ
ಎಲ್ಲೋಯ್ತು ಸುತ್ತ ಮರಗಿಡ
ಭಯವುಟ್ಟಿಸದೆ ಸುಖತಾಡ
ಐಷಾರಮ್ಯ ಕಣ್ಮುಚ್ಚಿಸಿ ಗೂಢ ||

ಎಷ್ಟು ಜತನದಿ ಕಟ್ಟಿಸಿ ಭೂಮಿ
ಬಳುವಳಿ ನಮಗಿತ್ತಾ ಆಸಾಮಿ
ಕಟ್ಟಬರದಿದ್ದರು ಹೊಸ ಭೂಮಿ
ಆಗಬಿಡದೆ ಇಳೆ ಮರುಭೂಮಿ ||

ನಾಜೂಕಾಟಿಕೆ ಮಗು ಕೈಲಿತ್ತು
ನೋಡುವಂತೆ ಆಟದ ಗಮ್ಮತ್ತು
ಆಜ್ಞಾನದಾಟ ಮುರಿದೆಸೆದ್ಹೊತ್ತು
ಕಣ್ತೆರೆದರೆ ತಪ್ಪುವುದೇ ಆಪತ್ತು ||

———————————————————————————-
ನಾಗೇಶ ಮೈಸೂರು
———————————————————————————–

=====================================================================================
ಕವಿ ಭಾವ: ಕಟ್ಟಿಸಿ ಕೈಗಿತ್ತ ಭೂಮಿಯನ್ನು ಜತನದಿ ಕಾಪಾಡಿಕೊಳ್ಳದೆ ಏನೇನೆಲ್ಲಾ ಧಾಂಧಲೆ ಮಾಡಿಕೊಂಡು ಕುಳಿತಿದ್ದೇವಲ್ಲಾ ಎಂಬ ದಿಗಿಲು ಆತಂಕಗಳ ಪದ ಸಂಕಲನ …..ದಿಗಿಲ್ಹುಟ್ಟಿಸಿ ಸ್ವಾಮಿ! ಇಲ್ಲಿ ಈಗಾಗಲೆ ಆಗಿಹೋಗಿರುವ ಅನರ್ಥಗಳನ್ನು ಎತ್ತಿ ತೋರಿಸುತ್ತ ಎಚ್ಚರಿಕೆಯ ಕರೆಗಂಟೆಯೊತ್ತುವ ಆಶಯ ಎದ್ದು ಕಾಣುತ್ತದೆ.
=====================================================================================

00661. ಹಾಯ್ಕು ೧೮.೦೪.೨೦೧೬

00661. ಹಾಯ್ಕು ೧೮.೦೪.೨೦೧೬
___________________________

(೦೧)
ಕೈಯ ಕೊಟ್ಟಾಕೆ
ಮೇಲೆತ್ತಲೂ ಅಹುದು
ಮುಳುಗಿಸಲೂ !

(೦೨)
ಯೌವ್ವನದಲ್ಲಿ
ಕೈ ಹಿಡಿದವ-‘ನಲ್ಲ’
– ಪತಿಯೇ-‘ನಲ್ಲ’!

(೦೩)
ಜಾರುವ ಮುನ್ನ
ಬಿಗಿದುಕೊ ಹಿಡಿತ
– ಸೊಂಟದ ಸುತ್ತ!

(೦೪)
ಇಳಿಜಾರಲಿ
ಕೊರಕಲಲಿ ನಡೆ
– ಕರ ಹಿಡಿದೆ !

(೦೫)
ಟೀನೇಜ ಸಖ
ಕೊಡ ಸುಖಜೀವನ
– ಕೊಟ್ಟರೆ ಸ್ವರ್ಗ !

– ನಾಗೇಶ ಮೈಸೂರು

00660. ಪ್ರಣಯೋನ್ಮಾದ ಪ್ರಕೃತಿ..

00660. ಪ್ರಣಯೋನ್ಮಾದ ಪ್ರಕೃತಿ..
_____________________  

 (Picture source: http://photos1.blogger.com/x/blogger/3477/2535/1600/929360/hebbar%201.jpg)

ಉನ್ಮಾದದ ರುದ್ರವೀಣೆ ನುಡಿಸಿದ ಝೇಂಕಾರ
ಕಾಮನೆಯೊಳತೋಟಿ ಮಿಡಿಯೆ ಅವತರಿಸಿ ತದ್ಭಾವ
ಪ್ರೇಮದ ಸೆರಗುಟ್ಟ ಹಸಿರು, ಗುಟ್ಟಲಿಟ್ಟು ಬಿಸಿಯುಸಿರು
ಆಷಾಢಭೂತಿ ಪ್ರಕೃತಿ, ಬೆತ್ತಲಾಗದು ನೈಜತೆ ಬಸಿರು ..

ಗರ್ಭದೊಳಗಗರ್ಭ ಸಿರಿ, ಬೀಜ ಬಿತ್ತನೆ ಐಸಿರಿ
ಜಯಾಪಜಯೋನ್ಮಾದ, ಸಂಗಮ ಶಿಶು ಸಂವಾದ
ನೆಡಲಷ್ಟಿಷ್ಟು ಸಸಿ ಮರ ಗೋಪುರ ಹೆಸರಿನ ಹಮ್ಮು
ಒಡಲೊಳಗಿನದೇನೊ ಕಾಡುವ ಕೂಡುವ ತಪನೆ…

ಕಂಡಕಂಡಲ್ಲೆಲ್ಲ ಬರೆದಿಟ್ಟು ಹೋಗೆ ಅವಸರ
ಹೆಸರಾಗುವುದೇ ? ಉಳಿವುದೇ ? ಅರಿವೂ ಅಗೋಚರ
ಯಾಕೀ ಧಾವಂತ ಎಲ್ಲೆಡೆ? ಸಹಿಯಾಗುವ ತೆವಲು
ಯಾರ ಪಾಲಿನ ದವಸ , ಯಾರಿಗೋ ದಕ್ಕುವ ನಿಶ್ಚಿತ

ಪ್ರೀತಿ ಪ್ರೇಮ ಪ್ರಣಯ ಕಲಶ ಯಾಕೀ ಕಾಮದ ರಾಗ ?
ಪ್ರತಿ ಋತುಋತು ಬೆತ್ತಲೆ ಮುಸುಕಿಗಷ್ಟೆ ಗೌರವ ಧನ
ಏನೀ ಉನ್ಮಾದದುರಿ ಬೇಗೆ ? ನಿಸರ್ಗದ ಬಯಲಲ್ಲಿ
ಮನವಾಗಿದೆ ತಾದಾತ್ಮ್ಯಕ ದೂರುವುದಾರನ್ನಿಲ್ಲಿ ?

ಬೆತ್ತಲೆ ಕತ್ತಲೆ ಮನದಾಟ ಕಲಿಸುತೆ ಪರಿಸರ ನೀತಿ
ಕಲಿತೂ ಕಾಣಿಸದಂತೆ ಮುಚ್ಚಿಡಬೇಕು ದೇವಗೆ ಪ್ರೀತಿ
ಹೂವಿನ ದುಂಬಿಯ ಸ್ವೇಚ್ಚೆಯಲ್ಹಾರಾಡುತ ಮನಜಾಣ
ತೋರಿಕೆ ಮುಖವಾಡದ ಕೃತಿಮಕೆ ಮೆಚ್ಚುಗೆ ಕಡಿವಾಣದೆ

– ನಾಗೇಶ ಮೈಸೂರು

00659.ಯಾರೋ ಕಟ್ಟಿದ ಭೂಮಿ…….(01/02)

00659.ಯಾರೋ ಕಟ್ಟಿದ ಭೂಮಿ…….(01/02)
___________________________________
(ಯಾರೋ ಕಟ್ಟಿದ ಭೂಮಿ ದಿಗಿಲುಟ್ಟಿಸಿ ಸ್ವಾಮಿ)

  
(Picture source from : https://en.m.wikipedia.org/wiki/File:The_Earth_seen_from_Apollo_17.jpg)

ಯಾರೋ ಕಟ್ಟಿಸಿಬಿಟ್ಟ ಭೂಮಿ
ದಿಗಿಲುಟ್ಟಿಸಿ ಕಳವಳ ಸ್ವಾಮಿ
ಇರುವುದೆ ಇದ್ದಂತೆ ಆಸಾಮಿ ?
ಹೊತ್ತೋಗದೆಲೇ ತ್ಸುನಾಮಿ! ||

ಈಚೆಗೆ ಜಾಗತಿಕ ಶಾಖವಂತೆ
ಇಂಗಾಲದ ಹೆಜ್ಜೆ ಗುರುತಂತೆ
ಹಸಿರುಮನೆ ಪರಿಣಾಮ ಕಥೆ
ನಮಗೋ ದಿನ ದಿನದ ಚಿಂತೆ 😔||

ಆತಂಕವಾದಿಗಳ ಭೀತಿ ಮದ
ಎಲ್ಲಾಗುವುದೊ ಸ್ಪೋಟ ಸದಾ
ಭೀಕರತೆ ಸಂತೆ ಒಳಗಿಟ್ಟಪಾದ
ಗುಟುಕು ಗುಟುಕಾಗಿ ನುಂಗಿದ 😟||

ಪ್ಲಾಸ್ಟಿಕ್ಕುಮಯ ಜಗ ಹೃದಯ
ಆಧುನಿಕ ನಾಗರಿಕತೆ ಸಮಯ
ವಿದ್ಯುನ್ಮಾನ ತ್ಯಾಜ್ಯ ಪರಿಚಯ
ಪರಿಸರವೆ ಅಡವಿಟ್ಟಾ ವಿಷಯ😒 ||

ಎಸೆದಾಟದ ಕಸ ಕುಪ್ಪೆ ಗುಪ್ಪೆ
ಬೆಳೆಯುತಲೆ ತಟವಟ ತಪ್ಪೆ
ನಮ್ಮಾತ್ಮವಂಚನೆ ಮನ ಕಪ್ಪೆ
ಹೊಸತ ರೋಗಾಣು ಬಂದಪ್ಪೆ 😭||

– ನಾಗೇಶ ಮೈಸೂರು

ಕವಿ ಭಾವ: ಯಾರೊ ಪುಣ್ಯಾತ್ಮರು ಕಟ್ಟ್ಕೊಟ್ಟು ಹೋದ ಭೂಮಿಯಲ್ಲಿ ನಾವು ಜೀವನ ನಡೆಸಲು ಏನೆಲ್ಲ ಅಡ್ಡಿ ಆತಂಕಗಳು! ಕೆಲವು ಮಾನವ ಪ್ರೇರಿತ ಹಾಗೂ ಪೋಷಿತವಾದರೆ, ಇನ್ನು ಕೆಲವು ಪ್ರಕೃತಿ, ನಿಸರ್ಗದ ಆವೇಶದುರಿತ. ಅಂತ ಕೆಲವು ಆತಂಕಗಳ ಪಟ್ಟಿ – ಯಾರೊ ಕಟ್ಟಿಸಿದ ಭೂಮಿ….

00658. ನಮ್ಮ ಚಿತ್ರ ನಿಮ್ಮ ಕವನ – ೩೬ (3K ನಮ್ಮ ಚಿತ್ರ ನಿಮ್ಮ ಕವನ – ೩೬)

00658. ಕಾಲಯಾನದ ಕ(ನ)ಸು
______________________________
(3K ನಮ್ಮ ಚಿತ್ರ ನಿಮ್ಮ ಕವನ – ೩೬) 

 

ಮೊಗ್ಗರಳುವ ಮೊದಲೇ
ಸೋತು ಮಲಗಿಬಿಟ್ಟೆ ಹೀಗೆ
ಕಾಲಯಾನದೆ ನಿದ್ರೆ;
ಹೇಗೊ ಮಾಡಲ್ಹವಣಿಸುತ್ತ
ಕಾಲಯಂತ್ರದ ಮಾದರಿ ನಮೂನೆ.
ಏನಿದ್ದರೇನು ಬಿಟ್ಟರೇನು ಸರಕು ?
ಸಾಕೀ ಗುಜರಿ ಮಾಲು ದಿಮ್ಮಿ ಸರಪಳಿ
ಕೆತ್ತುವೆನದರಲ್ಲೇ ಹೊಸತು
ಖರ್ಚಿಲ್ಲದ ಕಾಲಯಂತ್ರ
ಕಾಸಿಲ್ಲದ ದೂರ ಪಯಣ..
ಕನಿಷ್ಠ ಕನಸಿನಲ್ಲಾದರೂ..!
ಮರೆತು ಹೊಟ್ಟೆ ಬಟ್ಟೆ ಸುಪ್ಪತ್ತಿಗೆ
ಬಿಸಿಲು ಗಾಳಿ ಮಳೆ ಚಳಿ
ಋತುಗಾನದ ತುರ್ತು..
ಎಲ್ಲರೂ ಹೇಳುತ್ತಿದ್ದಾರೆ
ಭವಿತ ಸುಂದರ ಮಧುರವೆಂದು
ತಾಳಲಾಗದೀ ಬೇಗುದಿ ಬದುಕು
ಜಿಗಿದುಬಿಡುವೆ ಆ ಭವಿತಕೆ
ಸಿದ್ದವಾದೊಡನೆ ಕಾಲದ ಹಕ್ಕಿ
ಒಂದೆಟಿಗೆ ದಾಟೆಲ್ಲ ಬವಣೆಗಳ ಕಾಲ
ಸುಖದ ಮಡಿಲಿನ ಚೀಲಕೆ
ನನಸಾಗದಿದ್ದರೇನು ?
ಕನಸಲ್ಲಾದರೂ..

– ನಾಗೇಶ ಮೈಸೂರು

00657. ಹಾಯ್ಕು – ೧೭.೦೪.೨೦೧೬

00657. ಹಾಯ್ಕು – ೧೭.೦೪.೨೦೧೬
____________________

(೦೧)
‘ಚಾರ್’ಲಿ ಚಾಪ್ಲಿನ್
‘ಚಾರೋ ತರಪ್’ ನಗು
– ಮಾತಪಹಾಸ್ಯ !

(೦೨)
ಚಾದರ ಹೊದ್ದು
ಮಲಗಿದ ಹುಡುಗಿ..
– ಮುಗುದೆ ಮೊಗ..!

(೦೩)
ಮುಡಿಮಲ್ಲಿಗೆ
ಗಮಗಮಿಸಬೇಕು..
– ಸವಿ ಮಾತಲಿ..

(೦೪)
ಸುಲಭವಲ್ಲ..
ಬದುಕಲು ಜಿಗುಟು
– ಸೋರೀತು ಜೇನು..

(೦೫)
ಜಗದ ಕೆಳೆ
ಮಗ್ಗದ ನೂಲ ಪರಿ
– ನೇಯ್ದಂತೆ ವಸ್ತ್ರ !

(೦೫)
ಬುಡುಬುಡುಕೆ
ಮಾತುಗಳೇ ಮಡಿಕೆ
– ಹುಡಿ ಸಂಬಂಧ !

(೦೬)
ವಿನಾಕಾರಣ
ದೂರಾಗಿ ಮಾತು ಸ್ತಬ್ಧ..
– ನಾನಾ ಕಾರಣ !

(೦೭)
ಬದುಕಿಗೆಂತ
ಭಾವ ಬಂಧ ಸಂಬಂಧ ?
– ಮಾರಾಟದರ!

(೦೮)
ಇಬ್ಬರ ದೂರ
ಕುದುರೆ ಜೊತೆಗಾರ
– ಚದುರೆ ಗರ !

(೦೯)
ಕದ ತೆರೆದು
ನೋಡುವ ಅವಸರ
– ಗುಟ್ಟು’ಗಳಿಗೆ’!

(೧೦)
ತಣ್ಣನೆ ಕರ
ಹೃದಯ ಬೆಚ್ಚಗಾಗಿ
– ಕೈ ಹಿಡಿದಾಗ!

– ನಾಗೇಶ ಮೈಸೂರು

ನರಮಾನವನಾಗಿ ರಾಮನ ಜನುಮ – 4 /5

ನರಮಾನವನಾಗಿ ರಾಮನ ಜನುಮ – 4/5 published in readoo Kannada today (27.04.2016)

ನರಮಾನವನಾಗಿ ರಾಮನ ಜನುಮ – 4

ನರಮಾನವನಾಗಿ ರಾಮನ ಜನುಮ 3 of 5

ನರಮಾನವನಾಗಿ ರಾಮನ ಜನುಮ 3 of 5 published in readoo Kannada on 16.04.2014..😊

ನರಮಾನವನಾಗಿ ರಾಮನ ಜನುಮ – 3