00962. ಹೀಗೇ ಲಹರಿಗೆ…


00962. ಹೀಗೇ ಲಹರಿಗೆ…
___________________

ಭಾವ
ಅಹಂಭಾವ
ಬರಿ ಎರಡಕ್ಷರ ನಡುವೆ ಶಿವ
ಭಾವ ನಾನಾಗಿ ತತ್ಸಮ ತದ್ಭವ..!

ಕಾರ
ಅಹಂಕಾರ
ಇಲ್ಲೂ ಅದೇ ಎರಡಕ್ಷರ
ಕಾರದುಣಿಸು ತಹ ಹಾಹಾಕಾರ..!

ಬ್ರಹ್ಮ
ಅಹಂಬ್ರಹ್ಮ
ಅದೇ ಎರಡಕ್ಷರದಲಿದೆ ತಮ್ಮ
ಸ್ವಯಂ ಬ್ರಹ್ಮವಾಗೆ ತೊಲಗಿ ತಮ..!

– ನಾಗೇಶ ಮೈಸೂರು
07.06.2016

00961. ದೀಪಾವಳಿಗಷ್ಟು..


00961. ದೀಪಾವಳಿಗಷ್ಟು..
_____________


(01)
ದೀಪಾವಳಿಗೆ
ಮಲಿನ ಪರಿಸರ
ಪಟಾಕಿ ಹಬ್ಬ

(02)
ಸಂಪ್ರದಾಯಕೆ
ಹಚ್ಚಬೇಕು ಪಟಾಕಿ
ಮೌನ ಸುಡಲು

(03)
ದುಷ್ಟ ಶಕ್ತಿಗೆ
ಎಚ್ಚರಿಸೆ ಪಟಾಕಿ
ಮೈಲಿಗೆ ಭುವಿ

(04)
ದೀಪ ಹಚ್ಚುವ
ನಾರಿ ಸೀರೆ ಒಡವೆ
ಜಗಮಗಿಸೆ

(05)
ಉಪದೇಶಕೆ
ತಲೆ ಬಾಗದವರು
ದೇಶ ಭಕ್ತಿಗೆ

(06)
ವಿದೇಶಿ ಮಾಲು
ಕೊಳ್ಳಬೇಡಿ ಪಟಾಕಿ
ಬಿಸಿ ಮುಟ್ಟೀತೆ

(07)
ಹಬ್ಬ ಹೋಳಿಗೆ
ಮಾಡೆ ಸಂಭ್ರಮವಿಲ್ಲ
ಕೊಂಡುಂಡರಾಯ್ತು

(08)
ಅಭ್ಯಂಜನಕೆ
ಅಜ್ಜಿ ತೈಲದ ಲೇಹ್ಯ
ಗತ ವೈಭವ

(09)
ದೀಪ ಬೆಳಕು
ಹಚ್ಚೆ ಜೀವನೋತ್ಸಾಹ
ಹಗಲಿರುಳು

(10)
ಆಚರಣೆಗೆ
ಮೌಢ್ಯದ ಹಣೆಪಟ್ಟಿ
ಯಾಂತ್ರಿಕ ಜಗ

– ನಾಗೇಶ ಮೈಸೂರು
(Picture : little India preparations singapore)

00865. ಕಗ್ಗಕೊಂದು ಹಗ್ಗ ಹೊಸೆದು 21


00865. ಕಗ್ಗಕೊಂದು ಹಗ್ಗ ಹೊಸೆದು 21

ಕಗ್ಗಕೊಂದು ಹಗ್ಗ ಹೊಸೆದು… http://bit.ly/2bKMleI

(published in Readoo Kannada)

00864. ಕುಗ್ಗದಿರು ನೀ..


00864. ಕುಗ್ಗದಿರು ನೀ..
____________________


ಸೈನಾ
ನೀ ಹೇಳದಿದ್ದರೂ
ನಿನ್ನ ಕಣ್ಣಲ್ಲಿ ನೋವು..

ನೋವದು
ಹಾಳು ಎಲುಬಿನದಲ್ಲ
ಮುರಿದಾ ಹೊತ್ತಿನದು..

ಅಲ್ಲಿತ್ತು
ಪದಕವಾಗುವ ತವಕ
ಬಿಡದ ಕಾಲ್ತೊಡಕು..

ನಿರಾಶೆ
ಮೆಡಲ್ಲುಗಳ ಬರಕ್ಕೊಂದು
ಹನಿಯಾಗದ ಅಸಹಾಯಕತೆ..

ಆದರೆ ಗೊತ್ತಾ ನಿನಗೆ ?
ಈಗಲೂ ನಮ್ಮದದೆ ನಮನ
ನಿನ್ನ ಯತ್ನಕೆ ಅಭಿಮಾನ..

ನಿನ್ನೆ ನಿನ್ನ ಪಾಳಿ
ಇಂದು ಇನ್ನೊಬ್ಬರದು
ಮತ್ತೆ ನಾಳೆ ನಿಮ್ಮಿಬ್ಬರದು..!

ನಿನ್ನ ಶ್ರಮ ಅಮೂಲ್ಯ
ಚೇತರಿಸಿಕೊಳ್ಳಲಿ ಚೇತನ ಅದಮ್ಯ
ಕಾಯುವ ಮನಗಳಿಗದೆ ಮುಲಾಮು

ಕುಗ್ಗಿ ತಲೆ ತಗ್ಗಿಸದಿರು
ಹೆಮ್ಮೆಯಿಂದಲಿ ಬೀಗು
ಮರೆಯದಿರು ನಾಳೆ ನಿನದು..

ಈ ದೇಶದ ಜನರು
ಅರಿತಿಹರು ನಿನ್ನ ಒಳ ನೋವ
ನಿವಾರಿಸಿಕೊ ಬೇಗ ಹೊರಗಿನೀ ಬೇಗೆಯ..

– ನಾಗೇಶ ಮೈಸೂರು

👍💐Speedy recovery !👏👍👌🙏

(Picture from saina’s official website)

00838. ನಗುವಲ್ಲೆ ಮುಗಿದ ವ್ಯಾಪಾರ…😛


00838. ನಗುವಲ್ಲೆ ಮುಗಿದ ವ್ಯಾಪಾರ…😛
____________________________


(Picture from Internet source – wikihow)

ಏನಿಲ್ಲ ಎಂತಿಲ್ಲ ಬರಿ ನಗೆಯ ಬಂಡವಾಳ
ಹೂಡಿ ನಿರಂತರ ಲಾಭ ಜಾಣೆಯವಳ ಜಾಲ !

ನಗುವಲ್ಲಿ ರಂಗವಲ್ಲಿ ಹಾಕಿದಳು ಮಳ್ಳಿ
ಮೆಲ್ಲ ಮೆಲ್ಲನೆ ಹೆಜ್ಜೆ ಮೈಲಿಗೆ ಮನದಲ್ಲಿ..

ಮಡಿ ಗರಿಗರಿಯಾಗಿತ್ತು ಸ್ವಚ್ಛ ಶುಭ್ರ ವಲ್ಲಿ
ಬಾಡಿಸಿಬಿಟ್ಟಳು ಚಂಚಲ ನಗುವ ಕಸ ಚೆಲ್ಲಿ..

ನಗೆ ಧೂಪ ಹೊಗೆ ಕೋಪ ಚಡಪಡಿಕೆ ಮೊತ್ತ
ಕಾಣಿಕೆಯಿತ್ತು ಅಣಕು ನಗೆಯೆ ಸೆರೆಯಾಗಿಸಿತ್ತ..

ನಗೆ ಮೊಲ್ಲೆ ಸಿಹಿ ಜಲ್ಲೆ ಮಾತಾಗಿತ್ತು ಕೊನೆಗೂ
ಕೊಟ್ಟ ಮಾತಿನ ಬಂಧ ಬಂಧಿಸಿ ಕೊನೆವರೆಗೂ..

– ನಾಗೇಶ ಮೈಸೂರು

ನಗು, ಮುಗಿದ, ವ್ಯಾಪಾರ, ನಾಗೇಶ, ಮೈಸೂರು, ನಾಗೇಶಮೈಸೂರು, nageshamysore,nagesha, mysore

00817. ಲಲಿತೆಗೊಂದು ಬಿನ್ನಹ..


00817. ಲಲಿತೆಗೊಂದು ಬಿನ್ನಹ..
_________________________


ಸಹಸ್ರನಾಮದ ಘನತೆ
ನಿನದಲ್ಲವೇ ಶ್ರೀ ಲಲಿತೆ ?
ಸ್ತುತಿಸುವ ಮನಗಳ ನೋವು ನೂರಂತೆ
ನೀ ಕೈ ಹಿಡಿದು ನಡೆಸಬಾರದೆ ಮಾತೇ ?

ಸಾಧಕ ಸಿದ್ದಿಯ ಹಾದಿ
ಹಿಡಿಯ ಹೊರಡೆ ಬುನಾದಿ
ನಡೆಸುವೆ ಚಕ್ರದಲಾರೋಹಣ ಸಹಸ್ರಾರ
ಸಂಸಾರಚಕ್ರದೆ ಹಿಡಿಯಲೆಲ್ಲಿ ನಮ್ಮ ಬ್ರಹ್ಮರಂಧ್ರ ?

ನಮ್ಮ ನಿರೀಕ್ಷೆಗಳಂತೆ ನೂರಾರು
ನಿನ್ನ ಪರೀಕ್ಷೆಗಳಂತೆ ಹಲವಾರು
ಗೆಲಿಸುತ ನಡೆಸುವ ಜಗಜ್ಜನನಿ ನೀನಿದ್ದೂ
ಮಾಯೆಯ ಮುಸುಕಲಿ ಸಿಲುಕಿಸಲೆಂತೆ ಖುದ್ದು ?

ಪಾಮರ ರಾಜ್ಯದ ಪ್ರಜೆ ನಾವು
ಪಂಡಿತರಲ್ಲ ಆಸೆಗಳೆಮ್ಮ ಬಾವು
ಪರಿಹರಿಸಮ್ಮ ನೀನಲ್ಲವೆ ಚೇತನ ಪರಬ್ರಹ್ಮ ?
ಸೃಷ್ಟಿಯ ಸ್ಥಿತಿ ಲಯ ಪರಿಪಾಲನೆ ನಿನ್ನಯ ಧರ್ಮ ..

ನಿತ್ಯ ನಿರಂತರ ಏರಿದ ಕರ್ಮದ ಬಂಡಿ
ಮದ ಮತ್ಸರ ಮೋಹ ಮಮಕಾರಗಳನೊಡ್ಡಿ
ಏಕಿಂತು ಪರೀಕ್ಷಿಸುವೆ ನಿನ್ನದೆ ಸೃಷ್ಟಿ ಜತೆ ಚೆಲ್ಲಾಟವೇ ?
ಬಿಡದೆ ಕಾಪಾಡು ತಾಯೆ, ಕಾಪಿಟ್ಟರದು ತಂತಾನೆ ನಿನ್ನಯ ಗೆಲುವೇ!

– ನಾಗೇಶ ಮೈಸೂರು

00810. ಮಾತಿಲ್ಲ ಕತೆಯಿಲ್ಲ ಬರಿ ದೂರ..


00810. ಮಾತಿಲ್ಲ ಕತೆಯಿಲ್ಲ ಬರಿ ದೂರ..
_____________________________


ಮಾತಿಲ್ಲ ಕತೆಯಿಲ್ಲ ಬರಿ ಮೌನದ ಸೊಲ್ಲು
ಮೆಲ್ಲ ಮೆಲ್ಲನೆ ಯಾಕೋ ದೂರವಾದ ಗಜಲ್ಲು
ನೆನಪೊಂದೇ ಸಮ ಯಾತನೆ ಮನದೆ ಕಾಡ್ಗಿಚ್ಚು
ಹೊತ್ತಿಸಿ ಹೋದಳೇಕೋ ನಿಟ್ಟುಸಿರ ಕಲಗಚ್ಚಿಟ್ಟು..

ನುಚ್ಚುನೂರಾಗಿ ಮನಸೆ ಹುಡುಕುತ್ತ ಸೊಗಸೆ
ತಡವಿ ತಡಕಿ ಬಚ್ಚಿಟ್ಟಿದ್ದೇನಾದರೂ ಕನವರಿಸೆ
ಹುಡುಕಿಯೂ ಸಿಗದಲ್ಲ ಬರಿ ನಿನ್ನ ಮಾತಷ್ಟೇ
ಬೊಗಸೆ ಕಣ್ಣಿನ ಮಿಂಚು ಮಿಕ್ಕಿದ್ದೆಲ್ಲ ಕನಸೇ… 

ಮಾತು ಮಾತಾಗಿ ಮಾತಾಡಿದ್ದೆಲ್ಲ ಸಮಯ
ಅರ್ಥವೊ ವ್ಯರ್ಥವೊ ಎಲ್ಲ ತಾನಾಗಿ ವಿನಿಮಯ
ಆರ್ತತೆಯಾಗಿತ್ತೆ ದನಿ ಯಾಚನೆಯ ಬೇಲಿ
ದಾಟಿ ಬೇಡಿದ್ದರು ಲೆಕ್ಕಿಸದ ನಿನ ಮನ ಖೋಲಿ..

ಇರದಿರಲೇನು ಸಂವಹನ ? ನೆನಪುಗಳ ಗಡಿಗೆ
ನೋಡಿಸುತ್ತದೆ ಮತ್ತೆ ಅವುಗಳನೆ ಅಡಿಗಡಿಗೆ
ಬಿಡದೊಂದು ಸುಳಿವನ್ನು ಕದ್ದು ಇಣುಕಿ ಹೆಜ್ಜೆಯ
ಗುರುತ ಕಂಡೊ ಕಾಣದೆಯೊ ಚಡಪಡಿಸೊ ಹೃದಯ..

ಮರೆತಿಲ್ಲ ಮರೆತಂತೆ ನಟಿಸುವ ನಟರಲ್ಲವೆ ನಾವು ?
ನಟಿಸುವ ಭರದಲು ಬಿಡದೆ ಕಾಡುವ ಅದೇ ಹಳೆ ನೋವು
ಅನುಕ್ಷಣದ ಚಿತ್ರಹಿಂಸೆ ಅಣುವಣುವಾಗಿ ಕೊಲ್ಲುತ್ತಿಲ್ಲವೀಗ
ಕಣಕಣದಲ್ಲೆಲ್ಲೆಡೆ ಬೆರೆತು ಬದುಕುತಿದೆ ಬಿಟ್ಟುಕೊಡದೆ ಜಾಗ..


– ನಾಗೇಶ ಮೈಸೂರು

(Picture source: http://m.wikihow.com/Get-Over-a-Break-Up)

00793. ಮಂಕುತಿಮ್ಮನ ಕಗ್ಗ ೧೨ ರ ಟಿಪ್ಪಣಿ, ಇಂದಿನ ರೀಡೂ ಕನ್ನಡದಲ್ಲಿ (೧೭.೦೬.೨೦೧೬)


00793. ಮಂಕುತಿಮ್ಮನ ಕಗ್ಗ ೧೨ ರ ಟಿಪ್ಪಣಿ, ಇಂದಿನ ರೀಡೂ ಕನ್ನಡದಲ್ಲಿ (೧೭.೦೬.೨೦೧೬)

ನನ್ನ ಮಂಕುತಿಮ್ಮನ ಕಗ್ಗ ೧೨ ರ ಟಿಪ್ಪಣಿ, ಇಂದಿನ ರೀಡೂ ಕನ್ನಡದಲ್ಲಿ (೧೭.೦೬.೨೦೧೬)

ಕಗ್ಗಕೊಂದು ಹಗ್ಗ ಹೊಸೆದು…

00773. ಯೋಚಿಸಲೇ ಇಲ್ಲಾ ಯಾವತ್ತೂ..!


00773. ಯೋಚಿಸಲೇ ಇಲ್ಲಾ ಯಾವತ್ತೂ..!
__________________________

(೦೧)
ನನಗೊಂದು ಯಕ್ಷಪ್ರಶ್ನೆ
ಪ್ರೀತೀಲಿ ಪ್ರೀತಿಸಿದ್ದೇನನು ಗೊತ್ತಾ ?
ಅಂದ ಚೆಂದ ಸುಗಂಧ
ಹಳ್ಳಕೆ ಕೆಡವಿದ್ದೇನೊ ಸತ್ಯ
ಅಮೇಲಿಂದೆಲ್ಲಾ ಯಾಕೋ
ಮಾಮೂಲಾಗಿ ನಿತ್ಯ
ಹುಡುಕಿತ್ತೇನೊ ಬೇರೆ
ಕಾಣದ ಜರತಾರಿ ಸೀರೆ
ಒಳಗೊ ಹೊರಗೊ ಗೊಂದಲ
ಗದ್ದಲ ಕಳುವಾಗೊ ಭೀತಿ
ಎಡವಿದ್ದೊ ತಡವಿದ್ದೊ
ಪಡೆದಿದ್ದೊ ನೀಡಿದ್ದೊ
ಅಯೋಮಯದಲ್ಲಿ ಮುಳುಗಿ
ಪ್ರೀತಿಸಿದ್ದು ಮಾತ್ರ ಗೊತ್ತು
ಪ್ರೀತಿಸಿದ್ದೇನು ?
ಯೋಚಿಸಲೇ ಇಲ್ಲಾ ಯಾವತ್ತೂ..!

(೦೨)
ಏನೇನೆಲ್ಲಾ ಇತ್ತು ?!
ಕಾಯೋ ಕಾತರ ಸಿಡುಕು ಅಸಹನೆ
ಕಾಣೋ ಚಡಪಡಿಕೆ ಉಲ್ಲಾಸ ಅಧಿಕಾರ
ಹಕ್ಕು ಚಲಾಯಿಸೊ ಸ್ವೇಚ್ಛೆ
‘ಹುಕುಂ’ ಪಾಲಿಸೊ ವಿಧೇಯತೆ
ಮೆಚ್ಚಿಸಲೇನೇನು ಮಾಡಬೇಕೆನ್ನೊ ಪಟ್ಟಿ
ಮಾಡಲಿಲ್ಲದ ಕಸಿವಿಸಿ ಒಳತೋಟಿ
ಪಾರ್ಕು ಸಿನಿಮಾ ಏಕಾಂತ
ಮಾತು ಮೌನ ಮಡಿಲು
ಹೇಳಬೇಕೆಂದುಕೊಂಡು ಹೇಳದೆ ಮರೆತದ್ದು
ಮಾತಾಡದೆ ನೋಡುತ ಮೈ ಮರೆತದ್ದು
ಗುಟ್ಟಲಿ ಭೇಟಿ ಥ್ರಿಲ್ಲಾಗುತ ರಟ್ಟಲಿ
ಒಂದಾಗೊ ಕನಸಿಗೆ ಕಸುವಾಗಿದ್ದೆ ಪ್ರೀತಿಯ ?
ಆದರೆ ನಿಜಕೂ ಪ್ರೀತಿಸಿದ್ದೇನು ?
ಯೋಚಿಸಲೇ ಇಲ್ಲಾ ಯಾವತ್ತೂ..!

(೦೩)


(Picture source: https://4321click.wordpress.com/tag/mirror-photography-reflection-mirror-image/)

ಮುಂದೊಮ್ಮೆ ಎಂದೋ ಕೂತಾಗ ನಿರಾಳ
ಎದುರಿನಲೊಂದು ಕನ್ನಡಿ ಮಾತಾಡಿತ್ತು
ಕಂಡಾಗ ಯಾವುದೋ ಅಪರಿಚಿತ ಪ್ರತಿಬಿಂಬ
ನಾನೇ ? ಇದು ನಾನೇ ? ನನ್ನದೇನೀ ಬಿಂಬ ?
ಎಂದುದ್ಭವಿಸಿದ ಪ್ರಶ್ನೆಗಳೊಳಗಿತ್ತು ಮತ್ತೆ
ನನ್ನರಿಯದದೆ ಅಪರಿಚಿತ ವಿಚಿತ್ರ ಭಾವ
ಯಾರವನು? ಯಾರಿವನು ? ತಲ್ಲಣಿಸಿತ್ತು ಸಂಶಯ
ಪ್ರೀತಿಸಿದ್ದನೆ ಕಾಣೆ ಅವನನೆ ಯಾವತ್ತು
ಪ್ರೀತಿಸಿದ್ದೇನು ಮನಸಲಿ, ಮತ್ತೊಂದು ಜೀವದಲಿ
ಉತ್ತರವಿಲ್ಲದ ನಿರುತ್ತರ ಮಂಕಾಗಿ ನೋಡುತ ಅಯನ..

(೦೪)
ತಟ್ಟನೊಂದುತ್ತರ ಕೊಟ್ಟಿತ್ತು ಪ್ರತಿಬಿಂಬ
ಹೇಳಲಾರೆ ಗೆಳೆಯ ಚರಿತ್ರೆ ಪುರಾತನ ವಿಷಯ
ಪ್ರೀತಿಸಬೇಕೇನು ? ಏಕೆ ? ಕೊಡಬಲ್ಲೆ ಸುಳಿವು
ಸತ್ಯವದನರಿತರೆ ಪ್ರೀತಿಗದೆ ಕೊನೆ ಗೆಲುವು..
ಕಾಣಲಾಗದು ನಿನಗೆ ನಿನ್ನ ಪ್ರತಿಬಿಂಬ
ಪ್ರೀತಿಸಿಕೊ ಏನಾದರು ಕಾಣುವ ಜಗದೊಳಗೆ
ಇರಬೇಕೊಂದೆ ಸವಲತ್ತು ಆ ಪ್ರೀತಿಯ ವಸ್ತು
ಕನ್ನಡಿಯಾಗಿರಬೇಕು ನಿನಗೆ ಯಾವತ್ತೂ
ತೋರುತ ನಿನ್ನ ಕಾಣದ ಮಸ್ತು..
ಹರಿದ ಮೇಲೆ ಮಂಕು ಮಾಯೆ ಪರದೆ
ಕಾಣಿಸೋ ಗುಣವನ್ನೇ ಪ್ರೀತಿಸಬೇಕು ಮುಕ್ತ..
ನಿನ್ನ ಕನ್ನಡಿಯಾಗುವ ಜೀವದ ಮಾತಾ..


(Picture source: https://4321click.wordpress.com/tag/mirror-photography-reflection-mirror-image/)

– ನಾಗೇಶ ಮೈಸೂರು

00754. ಸಮ ಭೋಗ ಪ್ರವರ (01 & 02)


00754. ಸಮ ಭೋಗ ಪ್ರವರ (01 & 02)
_______________________________

ಪುರುಷ ಪ್ರಕೃತಿ ಸಂಯೋಗದ ಸ್ವರೂಪದಲ್ಲಿ ಸೃಷ್ಟಿ ಪ್ರಕ್ರಿಯೆಯನ್ನು ಆಯೋಜಿಸಿದ ಆ ನಿಯಾಮಕನ ವೈಜ್ಞಾನಿಕ ಜಾಣ್ಮೆಯನ್ನು ಹೊಗಳಲು ಖಾಲಿ ಪದಗಳಿಗೆ ಸಾಮರ್ಥ್ಯವಿಲ್ಲ. ಆ ಪ್ರಕ್ರಿಯೆಯ ಮೂಲ ವಿನ್ಯಾಸವಾಗಲಿ, ರೂಪುರೇಷೆಯಾಗಲಿ, ಅದರ ನಿರಂತರತೆಯನ್ನು ಕಾಯ್ದಿಡುವ ನೈಸರ್ಗಿಕ ಕ್ರಿಯೆಯಾಗಲಿ, ಹದ್ದು ಮೀರದ ನಿಯಂತ್ರಣದಲ್ಲಿರಲು ಅನುವಾಗುವಂತೆ ಗಂಡು- ಹೆಣ್ಣಿನ ನಡುವೆ ವಿಭಜಿಸಿಟ್ಟ ಚಾತುರ್ಯವಾಗಲಿ – ಎಲ್ಲವು ಅದ್ಭುತ ಅತಿಶಯಗಳೆ. ಇಂತಹ ಅದ್ಭುತವನ್ನು ಸರಳ ಸಾಮಾನ್ಯ ಕಾರ್ಯವಾಗಿಸಿ ಜನಜೀವನದ ಸಾಮಾನ್ಯ ಸಾಮಾಜಿಕ ಸಂಭವವಾಗಿಸಿದ್ದು ಅದಕ್ಕೂ ಮೀರಿದ ಅದ್ಭುತ.

ಆ ಅದ್ಭುತದ ಲಹರಿಯನ್ನು ಪದಗಳ ಹಿಡಿಯಲ್ಲಿ ಆದಷ್ಟು ಹಿಡಿದಿಡುವ ಯತ್ನ ಕೆಳಗಿನ ಎರಡು ಪದ್ಯಗಳದ್ದು ..

01. ಬೀಜಾಂಕುರ ಸುರತಿ
_____________________________________

(Picture source from : http://sugamakannada.com/assets/images/article/hasya/ganduhennu.jpg)

ಸಮಭೋಗ ಸಮರ
ಸೌಹಾರ್ದ ಸಾಗರ
ಸಹಜದೆ ಸಹಕಾರ
ಅಸಹಜ ಅನಾದರ ||

ಎರಡು ಜೀವ ಶುದ್ಧಿ
ಸೆಳೆತದಡಿ ಸಂವೃದ್ಧಿ
ಬುದ್ಧಿ ಸಂತಾನವೃದ್ಧಿ
ಸಹಯೋಗ ಕೆಳದಿ ||

ನೆಪವೆಷ್ಟು ಸರಸಕೆ
ಪೀಳಿಗೆಗೆ ಸರಸರಕೆ
ಜೋಳಿಗೆ ತುಂಬಾಕೆ
ಮಾಳಿಗೆ ಎಂಬಾಕೆ ||

ಕತ್ತಲೇಕೋ ಧನ್ಯಾ
ಬೆತ್ತಲೆಯೆ ಸುಕನ್ಯ
ಹಿತ್ತಲೇಕೊ ಕನ್ಯಾ
ಗುಟ್ಟು ಕಥೆಗಳಗಣ್ಯ ||

ವಸ್ತು ಸ್ಥಿತಿ ಮಾಹಿತಿ
ಕಾಮ ದೇವನ ಆಸ್ತಿ
ರೋಮಾಂಚಕೆ ಸ್ವಸ್ತಿ
ಬೀಜಾಂಕುರ ಸುರತಿ ||

– ನಾಗೇಶ ಮೈಸೂರು

02. ಗಂಡ್ಹೆಣ್ಣು ಸೃಷ್ಟಿಮನ
_________________________


(Picture source: http://www.nammabanavasi.com/?info=ಪುನರಾಭಿವೃದ್ದಿಗೆ-ಹೆಣ್ಣು-ಸ)

ತೆವಲು ತಿಕ್ಕಲು ತನು
ತಾಡಗಳ ಸಿಹಿ ಜೇನು
ಸುಖ ಬೆವರಿದರೇನು
ಸೊಗವಲ್ಲೆ ಇರದೇನು? ||

ಬೆರೆತಾಗಿಸಿ ಬೆವರು
ಒಳತಾಗಿಸಿ ನೀರು
ಒಳಿತಿಗೊಡ್ಡಿ ತೇರು
ಸೇರಲಿಲ್ಲವೆ ಮೇರು ? ||

ಪ್ರಕೃತಿ ಸಂಯೋಗ
ಪುರುಷ ಸುಯೋಗ
ಜನ್ಮಾಂತರ ಪ್ರಯೋಗ
ಫಲಿತ ಕರ್ಮಯೋಗ ||

ಆಗಿದ್ದರು ಸುಕೃತಿ
ಆಗಿಸುವ ವಿಕೃತಿ
ಮನಕಿಟ್ಟ ಸನ್ಮತಿ
ಜನಕಿಟ್ಟರೆ ಸದ್ಗತಿ ||

ಸಮ ಭೋಗ ಆರಾಮ
ದೈನಿಕ ವ್ಯಾಯಾಮ
ಆತಂಕ ಬಿಡೆ ಧಾಮ
ಗಂಡ್ಹೆಣ್ಣು ಸೃಷ್ಟಿ ಮನ ||

– ನಾಗೇಶ ಮೈಸೂರು

00750. ಹೇಗಿರಬೇಕು, ಹೇಗಿರಬಾರದು (ಬ್ಲಾಗು)


00750. ಹೇಗಿರಬೇಕು, ಹೇಗಿರಬಾರದು (ಬ್ಲಾಗು)
_______________________________

ಬ್ಲಾಗು ಫೇಸ್ಬುಕ್ಕು ಹೇಗಿರಬೇಕು, ಹೇಗಿರಬಾರದು, ಏನು ಮಾಡಬೇಕು, ಏನು ಮಾಡಬಾರದು ಎಂದೆಲ್ಲಾ ತರದ ಪ್ರಶ್ನೆಗಳು ಎಲ್ಲರನ್ನು ಕಾಡುವುದು ಸಹಜ.. ಅದು ಕಾಡಿದ ಹೊತ್ತ ಅನಿಸಿಕೆಗಳಿಗಷ್ಟು ಪದ ಲೇಪನ ಕೊಟ್ಟಾಗ ಮೂಡಿದ ಸಾಲುಗಳಿವು. ನಿಮಗೂ ಹೀಗೆ ಅಥವಾ ಇನ್ನೇನೇನೋ ಅನಿಸಿದ್ದರೆ ಕಾಮೆಂಟಲಿ ಹಂಚಿಕೊಳ್ಳಿ 😊


ಬ್ಲಾಗಿರಬೇಕು ಹೇಗಿರಬೇಕು ?
__________________________

(೦೧)
ಮೊದಲಿರುತ್ತಿತ್ತು
ಸೈಡಿನಲೊಂದು ಬ್ಯಾಗು
ಈಗಿದ್ದರೆ ಸಾಕು ನಿಮದೆ ಬ್ಲಾಗು..

(೦೨)
ಅನಿಸಿದ್ದೆಲ್ಲ ಹೇಳೋಕಾಗಲ್ಲ
ಕೇಳೊ ಜನರಿಗೆ ಅರ್ಥವಾಗಲ್ಲ
ಇಲ್ಲಿ ಮನಸಿಗೆ ಬಂದದ್ದೆಲ್ಲಾ ವಾಂತಿ
ಸಿಕ್ಕರೂ ಸಿಗಬಹುದೇನೋ ಶಾಂತಿ..

(೦೩)
ಕೇಳಿದರ್ಯಾರೊ ನೀತಿ ನಿಯಮ
ಕಟ್ಟುವುದೇನು ಮನೆಯಾ, ಮದುವೆಯಾ ?
ಏನಾದರು ಕಟ್ಟು ಒಪ್ಪ ಓರಣದಲಿ
ಟ್ಯಾಗು ಕೆಟಗರಿ ವಿಷಯ ವಸ್ತು ಬಯಲಲಿ..

(೦೪)
ಅಶಿಸ್ತೆ ನಮ್ಮನೆ ದೇವರು ಗೊತ್ತಾ?
ಅಂದವರ ಬ್ಲಾಗಿಗೆ ಫೇಸ್ಬುಕ್ಕೆ ಸಾಕು
ಹಾಕು ಮನಸಿಗೆ ತೋಚಿದ್ದ ಶೋಧಿಸಿ ಶುದ್ಧ
ಸ್ಟೇಟಸ್ಸು ಪೋಸ್ಟು ಲೈಕು ಶೇರು ಸಮೃದ್ಧ..


(೦೫)
ಬ್ಲಾಗು ಫೇಸ್ಬುಕ್ಕು ಇದ್ದರೇನಿಲ್ಲ ನಿಶ್ಚಿಂತೆ
ಕನಸಲ್ಲೂ ಕಾಡಿ ಹಿಂಬಾಲಕರಿಲ್ಲದ ಚಿಂತೆ
ಬರೆದು ಸುರಿದರು ದಂಡಿ ಬರದ ಲೈಕ ರೀತಿ
ಯಾರಿಗೂ ಬೇಡದವರಾಗಿಬಿಟ್ಟೇವೆ ? ಒಳ ಭೀತಿ!

(೦೬)

ಜಾಸ್ತಿ ಲೈಕು ಬೇಕು, ಹಿಂಬಾಲಕರು ಬರಬೇಕು
ಮಾಡು ಹಾಗಿದ್ದರೆ ಶೇರು, ಬೇರೆಯವರ ಸರಕು
ಬರಿ ಹಾಳುಮೂಳಲ್ಲ, ಅಳೆದು ತೂಗಿದ ಸಾಮಾನು
ಮೌಲ್ಯವಿದ್ದೆಡೆ ಮೆಲ್ಲ, ಬಲ್ಲ ಜನ ಬರುವುದೆ ಕಾನೂನು..!

(೦೭)
ಸಖ್ಯ ಬೆಳೆಸುವುದು ಮುಖ್ಯ, ಸಾಲು ಸಾಲು ಗೋಜಲು
ಗೊತ್ತು ಗುರಿಯಿಲ್ಲದೆ, ಮಿತ್ರರಾಗುವ ಹವಾ ಮಹಲು
ಇರಲೊಂದು ಸಂತೆ, ಗದ್ದಲಕೆಂದೆ ಮೀಸಲಾದ ಖಾತೆ
ಮತ್ತೊಂದು ಖಾಸಗಿ ನಿಯಮಿತ, ಸಮಮನಸ್ಕರ ಜೊತೆ !

(೦೮)
ಸುಮ್ಮನೆ ನೋಡಿದರೆ ಸರಾಸರಿ ಲೆಕ್ಕಾಚಾರ
ಶೇಕಡಾ ಐದರಿಂದ ಹತ್ತರೊಳಗೆ ಮೆಚ್ಚುವ ಸಾರ
ಮಿಕ್ಕ ಕೆಳೆ ನಿಷ್ಪಲ ನಿರಾಸಕ್ತರ ಬಳಗವೆಂದಲ್ಲ ಅರ್ಥ
ಲೋಕೋಭಿನ್ನರುಚಿಃ ನಾನಾ ಗಮನದೆ ಎಲ್ಲ ಪ್ರವೃತ್ತ …

– ನಾಗೇಶಮೈಸೂರು

00726. ಜೀವನ ಚೈತ್ರದ ಓಟ


00726. ಜೀವನ ಚೈತ್ರದ ಓಟ
_______________________


ಜೀವನ ಚೈತ್ರದ ಹಾಗೆ ಸುಪರ್ ಓಟ
ನಮ್ಮ ಮನೆಯ ಬೆಳಗಿನ ಉಪಹಾರ
ಭಾನುವಾರ ರುಬ್ಬಿದ ಹಿಟ್ಟು ಬಿಡುಗಡೆ
ಮಿಕ್ಕ ವಾರಪೂರ್ತಿ ದಿನವೂ ದೋಸೆ !

(Picture source: https://en.m.wikipedia.org/wiki/File:Dosai_Chutney_Hotel_Saravana_Bhavan.jpg)

00718. ನೇತ್ರಾವತಿ ಅತ್ತ ಸದ್ದು..(in Today’s Readoo Kannada – 16.05.2016)


00718. ನೇತ್ರಾವತಿ ಅತ್ತ ಸದ್ದು..(in Today’s Readoo Kannada – 16.05.2016

ನೇತ್ರಾವತಿ ಅತ್ತ ಸದ್ದು..

00717. ಮನಸಿನ ವ್ಯಾಪಾರ


00717. ಮನಸಿನ ವ್ಯಾಪಾರ
___________________


ಬಿಕರಿಗಿಟ್ಟಂತಿತ್ತು ಸರಕು
ಚಂದದ ಬಣ್ಣ ಬಣ್ಣದ ರಂಗೋಲಿ
ನೋಡುತಲೆ ಹುಚ್ಚೆದ್ದು ಮನ
ಬಯಸಿತ್ತು ಬಗಲಲಿಡುವ ಹಂಬಲ
ಬಿಟ್ಟರೆ ಕಳುವಾದೀತೆಲ್ಲೊ ಅಳುಕು
ಹುಚ್ಚು ಛಲದಿ ಬೆನ್ನಟ್ಟಿತು ಹೃದಯ
ಧಾರಣೆ ಎಷ್ಟು ? ಹುಚ್ಚುತನದ ಪ್ರಶ್ನೆ
ಮೆಚ್ಚಿದ್ದಕ್ಕುಂಟೆ ಬೆಲೆ ಕಟ್ಟುವ ಯೋಗ್ಯತೆ ?
ಬಿಡದು ಕೇಳದು ಹುಚ್ಚು ಕುದುರೆ ಮನ
ಮಾಡಿತೇನೇನೆಲ್ಲ ಬಿತ್ತರ ಬಿನ್ನಾಣ ಬೆಡಗು
ಕೊಂಡೇಕೊಳ್ಳುವ ಒಂದೆ ಅವಸರದಲಿ
ಕಟ್ಟಲು ನಿಂತಿತ್ತು ಜೀವದ ಪೇಟೆಧಾರಣೆ
ಯಾಕೋ ಅರಿಯದಾಯ್ತು ಜೀವಕೆ
ಸರಕದು ಮನಸು ಕುದುರದು ಬೆಲೆಗೆ
ಕೂಗುವ ದರಕೆ ಹೆದರಿ ತಬ್ಬಿಬ್ಬಾಯ್ತೋ ಏನೋ ?
ಮೆತ್ತಗೆ ಜಾರಿ ಮೂಲೆಯ ಸೇರುತ್ತ
ಬಿಕರಿಗಿಲ್ಲ ಮಾಲು ಮೌನದೆ ಸಾರುತ್ತಾ
ಕಾಣೆಯಾಗಿತ್ತು ಹುಡುಕಿಯು ಸಿಗದ ಜಗದೆ..
ಹುಚ್ಚುತನವಿಂದು ಹುಡುಕತಲೆ ಇದೆ ಅದೇ ಸರಕ
ಪ್ರೀತಿಸಿದ ವ್ಯಾಮೋಹ ಬಿಟ್ಟು ಹೋಗದ ಮಾಯೆ
ಬಿಕರಿಗೊ ಬಿಟ್ಟಿಗೊ ಸಿಕ್ಕಿತೆನ್ನುವ ಉಸಾಬರಿ
ಕಂಡಿನ್ನು ನಗುತಲಿದೆ ಭಾವದ ರೊಕ್ಕ ಮೌನದೆ
ಸಿಗುವುದೋ ಬಿಡುವುದೋ ಸರಕು..
ಆಸೆ ಮಾತ್ರ ಬಿಕ್ಕುತಿದೆ..
ಏಕಾಂತದ ಮೂಲೆಯಲಿ..
ಒಬ್ಬಂಟಿಯಾಗಿ ಕೂತು…

– ನಾಗೇಶ ಮೈಸೂರು

ಒಂದಿಷ್ಟು ಹಾಯ್ಕುಗಳು ಇಂದಿನ ಸುರಗಿಯಲ್ಲಿ ಪ್ರಕಟಿತ (೧೨.೦೫.೨೦೧೬)


ಒಂದಿಷ್ಟು ಹಾಯ್ಕುಗಳು ಇಂದಿನ ಸುರಗಿಯಲ್ಲಿ ಪ್ರಕಟಿತ (೧೨.೦೫.೨೦೧೬)

http://surahonne.com/?p=11558

00707. ತುಣು’ಕಾಟ’ಗಳು…


00707. ತುಣು’ಕಾಟ’ಗಳು…
_______________________

(೦೧)
ಕೇಳದೆ ಕೊಟ್ಟು
ಕೇವಲವಾಗೊ ದುಃಖ
– ತಡೆದು ಹಿತ.

(೦೨)
ದೂರವಿರಿಸಿ
ದೂರವಾಗೆ ದೂಷಿಸೆ
– ಶೋಷಿತ ಮನ.

(೦೩)
ಸಂವಹಿಸದೆ
ಮೌನ ಧರಿಸೊ ಪಾತ್ರ
– ಕಲ್ಪನೆ ಕೊಳ್ಳೆ.

(೦೪)
ಮುನವೇ ಸುಳ್ಳು
ಮಾತಿರದ ಗಳಿಗೆ
– ಕಾಲ ಸತ್ತಾಗ.

(೦೫)
ಯೋಚಿಸುತಲೆ
ಊಹಿಸೊ ತಲೆ ಒಲೆ
– ಪ್ರಮಾದಕರ.

(೦೬)
ನಡೆವ ಮುನ್ನ
ನಡೆಯಬಹುದೇನು
– ಚಿಂತಿಸೇ ಸುಸ್ತು.

(೦೭)
ಮನ ವಾಗ್ಯುದ್ಧ
ವಾದ ಪ್ರತಿವಾದಕೆ
– ಅದೇ ಫಲಿತ.

(೦೮)
ಜಗಳ ನೆಪ
ನೂರೆಂಟು ಒಳಗುದಿ
– ಕಕ್ಕಿಸಿ ವಿಷ.

(೦೯)
ದೂರವಿಟ್ಟಳು
ದೂರಾಗಳು ಮನದೆ
– ನಿಶ್ಚಲ ಚಿತ್ರ.

(೧೦)
ತುಚ್ಛಿಕರಿಸಿ
ಕಡೆಗಣಿಸಿದರು
– ಶುಭ ಹಾರೈಕೆ.

– ನಾಗೇಶ ಮೈಸೂರು

00700. ಜನ್ಮಾಂತರ ನಂಬಿಕೆ ವೈಚಿತ್ರ – 01


00700. ಜನ್ಮಾಂತರ ನಂಬಿಕೆ ವೈಚಿತ್ರ – 01
______________________________

ಜನ್ಮಾಂತರದ ನಂಬಿಕೆ ನಮ್ಮಲ್ಲಿ ಅಂತರ್ಗತವಾಗಿ ಬಂದ ಭಾವ. ನಂಬಲಿ, ಬಿಡಲಿ ಯಾವುದಾದರೊಂದು ಬಗೆಯಲ್ಲಿ ಎಲ್ಲರನ್ನು ಕಟ್ಟಿಡುವ ಬಂಧ ಜಾಲ. ನಂಬಿದವರಿಗೆ ನಿಮಿತ್ತರೆಂಬ ನಿರಾಳತೆ, ನಂಬದವರಿಗೆ ಡೋಂಗಿ ಬುರುಡೆ ಕಥೆ. ಎರಡು ಅಲ್ಲದ ನಡುವಿನವರಿಗೆ ಒಂದೆಡೆ ವಿಸ್ಮಯ, ಮತ್ತೊಂದೆಡೆ ಅಪನಂಬಿಕೆ. ಈ ಕೂತೂಹಲದ ಮನ ಶೋಧವೆ ಈ ಕವಿತೆಯ ಸಾರ. ಜನ್ಮಾಂತರ ನಂಟಿದ್ದರೂ ನೆನಪೆ ಇರದ ವಿಸ್ಮಯವೊಂದು ಕಡೆ, ಎಲ್ಲೊ ಏನೊ ನೆನಪಿನ ಹಾಳೆಯೊದ್ದ ಅನುಭೂತಿ ಮತ್ತೊಂದೆಡೆ. ಆ ಎರಡರ ನಡುವೆ ಕಟ್ಟಿ ಕೊಡುವ ಬಾಳಿನ, ವಿಸ್ಮೃತಿಯ ನಡುಗಡ್ಡೆ ..


ಜನ್ಮಾಂತರ ನಂಬಿಕೆ
_______________________
(ಜನ್ಮಾಂತರ ನಂಬಿಕೆ ವೈಚಿತ್ರ – 01)

ಬೃಹನ್ಮಿತ್ರ ಸಹ ಕಳತ್ರ
ಸದ್ಯೋಜಾತ ಕದ ಸಚಿತ್ರ
ನಾನಜರಾಮರ ಭೂ ತರ
ಮನದಿಂಗಿತ ನಗೆ ವಿಚಿತ್ರ ||

ಜಾತಾಭಿಜಾತದೀ ಜನ್ಮ
ಏಳೇಳು ಜನುಮ ಕರ್ಮ
ಅರಿತವರಾರೋ ಮರ್ಮ
ನೆನಪಿರದೆ ಸವೆಸಿ ಮಮ ||

ಜನ್ಮದ ವಾಸನೆ ಅಂಟು
ಕಟ್ಟುವುದಂತೆ ತಾ ಗಂಟು
ಹೊತ್ತು ಬಗಲಿನ ಚೀಲ
ಮುಂದಿನ ಜನ್ಮದ ಕಾಲ ||

ಮಾಡಿದ ಪಾಪ-ಪುಣ್ಯ ಫಲ
ಸರಿಯಿದ್ದರೆ ಜೀವ ಸಫಲ
ಹುಟ್ಟುವ ಮಾನವ ಜನ್ಮ
ಪಾಪಕೆ ತಿಗಣೆಯ ಕರ್ಮ ||

ಸಂಗಾತಿಸಿ ಸಹಧರ್ಮಿಣಿ
ಹಿಂಬಾಲ-ಕರುವಿನ ಸರಣಿ
ಸರಿಯಿದ್ದರೆ ಜೀವಕೆ ಗಣಿ
ಬೆಸವಿದ್ದರೆ ಬಾಳೆ ಸಗಣಿ ||

———————————————————-
ನಾಗೇಶ ಮೈಸೂರು
———————————————————–

(Picture source: https://en.m.wikipedia.org/wiki/File:Reincarnation_AS.jpg)

00698. ಸೂರ್ಯನ ಎದುರಲ್ಲಿ ಹಾದು ಹೋಗಲಿರುವ ಬುಧಗ್ರಹದ ಅಪರೂಪದ ದೃಶ್ಯ !


00698. ಸೂರ್ಯನ ಎದುರಲ್ಲಿ ಹಾದು ಹೋಗಲಿರುವ ಬುಧಗ್ರಹದ ಅಪರೂಪದ ದೃಶ್ಯ !
________________________________________________________________

ಬುಧಗ್ರಹದ ಸೂರ್ಯಗಮನ – ಸೂರ್ಯನೆದುರಿನ ಹಾದುಹೋಗುವಿಕೆಯನ್ನು ತೋರಿಸುವ ಹಳೆಯ ನಾಸಾ ಉಪಗ್ರಹ ಚಿತ್ರ (ನಾಸಾ ಹ್ಯಾಂಡೌಟ್ ಫೋಟೊ)

ಇದು ಶತಮಾನವೊಂದರಲ್ಲಿ ಕೇವಲ ೧೩ ಬಾರಿ ಮಾತ್ರ ಸಂಭವಿಸುವ ವಿಸ್ಮಯ : ನಮ್ಮ ಸೌರವ್ಯೂಹದಲ್ಲೆ ಅತಿ ಕಿರಿಯನೆಂಬ ಕೀರ್ತಿಗೆ ಪಾತ್ರನಾದ ಬುಧಗ್ರಹವು (ಮರ್ಕ್ಯೂರಿ) ಸೂರ್ಯನ ಮುಂದೆ, ಅತ್ಯಂತ ಸಮೀಪದಿಂದ ಹಾದು ಹೋಗಲಿದೆಯಂತೆ. ಅಮೇರಿಕಾವೂ ಸೇರಿದಂತೆ ಜಗತ್ತಿನ ಬಹುತೇಕ ಭಾಗ, ಬರುವ ಸೋಮವಾರದಂದು ಬುಧಗ್ರಹವು ತನ್ನ ಅತಿಥೇಯ ನಕ್ಷತ್ರವಾದ ಸೂರ್ಯನೆದುರಲೊಂದು ಕಪ್ಪು ಚುಕ್ಕಿಯಾಗಿ ನಿಧಾನವಾಗಿ ಹಾದುಹೋಗಲಿರುವ ಈ ವಿಸ್ಮಯವನ್ನು ಕಾಣಬಹುದು. ಬರಿಗಣ್ಣಿನಿಂದ ಸೂರ್ಯನನ್ನು ನೋಡಲಾಗದ ಕಾರಣ ನೀವು ವಿಶೇಷ ಶೋಧಕವನ್ನಳವಡಿಸಿದ ದೂರದರ್ಶಕದ ಮೂಲಕವೊ ಅಥವಾ ಅಂತರ್ಜಾಲ ಬಿತ್ತರಣೆಗಳ ಮೂಲಕ ಬುಧಗ್ರಹದ ಈ ಕಿರಿಸಂಭ್ರಮಕ್ಕೆ ಸಾಕ್ಷಿಯಾಗಬಹುದು.

ನಿಮ್ಮಲ್ಲಿ ದೂರದರ್ಶಕವಿದ್ದಲ್ಲಿ ದೂರದರ್ಶಕಕ್ಕೆ ಸುರಕ್ಷತೆಯ ಶೋಧಕವನ್ನಳವಡಿಸಿಕೊಂಡು (ನಿಮ್ಮ ಕಣ್ಣುಗಳ ರಕ್ಷಣೆಯ ದೃಷ್ಟಿಯಿಂದ) ನೀವು ಈ ಸಂಘಟನೆಯನ್ನು ವೀಕ್ಷಿಸಬಹುದು. ಒಂದು ವೇಳೆ ಶೋಧಕ ಸಿಗದಿದ್ದರೆ ಒಂದು ಕಾಗದದ ಹಾಳೆಯನ್ನು ಬಳಸಿಕೊಂಡು ನೀವೊಂದು ಕೃತಕ ಹಾಗು ಸುರಕ್ಷಿತ ವೀಕ್ಷಣಾ ವಿಧಾನವನ್ನು ರೂಪಿಸಿಕೊಳ್ಳಬಹುದು. ಸೂರ್ಯನ ಛಾಯೆಯನ್ನು ಕಾಗದವೊಂದರ ಮೇಲೆ ಬಿಳಿಯ ಬಿಲ್ಲೆಯ ರೂಪದಲ್ಲಿ ಪ್ರಕ್ಷೇಪಿಸಿ, ನಂತರ ಬುಧಗ್ರಹವು ಒಂದು ಚುಕ್ಕೆಯ ರೂಪದಲ್ಲಿ ಸೂರ್ಯನಗಲಕ್ಕು ನಿಧಾನಕ್ಕೆ ಸಾಗುವುದನ್ನು ಕಾಣಬಹುದು. ಪರ್ಯಾಯವಾಗಿ ನಾಸಾದ ಅಂತರ್ಜಾಲ ಪುಟ ಅಥವಾ ಸೋಶಿಯಲ್ ಮೀಡಿಯ ಪುಟಗಳಲ್ಲಿ ಹಾಕುವ ನೇರ ಚಿತ್ರಗಳನ್ನು ಕೂಡ ಗಮನಿಸಬಹುದು. ನೀವ್ಯಾವುದಾದರು ಖಗೋಳ ವೀಕ್ಷಣಾಲಯ (ಅಬ್ಸರ್ವೇಟೊರಿ) ಅಥವಾ ವಿಜ್ಞಾನ ಕೇಂದ್ರಗಳ ( ಸೈನ್ಸ್ ಸೆಂಟರು) ಹತ್ತಿರದಲ್ಲಿ ವಾಸಿಸುವವರಾದರೆ, ಅವರ ಕಾರ್ಯಕ್ರಮ ಯೋಚನೆಯನ್ನೊಮ್ಮೆ ವಿಚಾರಿಸಿ ನೋಡುವುದೊಳಿತು – ಬಹುಶಃ ಅವರಲ್ಲಿರಬಹುದಾದ ದೂರದರ್ಶಕದಲ್ಲೊಮ್ಮೆ ಇಣುಕಿ ಈ ಸಂಘಟನೆಯನ್ನು ವೀಕ್ಷಿಸಬಹುದು.

ಇದೇನು ಮಹಾ ? ಯಾವುದೋ ಗ್ರಹದ ಚಲನೆಯನ್ನು ನೋಡಿ ಆಗಬೇಕಾದ್ದರೂ ಏನು ? ಯಾಕಾದರೂ ನೋಡಬೇಕು ಎನ್ನುವ ಅನುಮಾನವಿದ್ದರೆ ಇದೋ ಇಲ್ಲಿದೆ ಒಂದು ಮುಖ್ಯ ಕಾರಣ – ಈ ತಣ್ಣಗಿನ ಪುಟ್ಟ ಗ್ರಹಕ್ಕೆ ಇದೊಂದು ಅತಿ ವಿಶೇಷ ಘಟನೆಯಾದ್ದರಿಂದ.

ಬುಧಗ್ರಹ ಸೂರ್ಯನ ಸುತ್ತ ಒಂದು ಸುತ್ತು ಸುತ್ತಲು ಬೇಕಾದ ಆವರ್ತನಾವಧಿ ಕೇವಲ ೮೮ ದಿನಗಳಾದ ಕಾರಣ ಅದನ್ನು ನಮ್ಮ ಸೌರವ್ಯೂಹದ ‘ಅತೀ ವೇಗದಲ್ಲಿ ಸುತ್ತುವ ಗ್ರಹ’ ಎಂಬ ಕೀರ್ತಿಗೆ ಭಾಜನವಾಗಿಸಿಬಿಟ್ಟಿದೆ. ಅದೇ ರೀತಿ ನಮ್ಮ ಭೂಮಿ ಸಹ ತನ್ನದೇ ಆದ ಆವರ್ತನಾವಧಿಯಲ್ಲಿ (ಸರಾಸರಿ ೩೬೫ ದಿನ) ಸೂರ್ಯನ ಸುತ್ತ ಪ್ರದಕ್ಷಿಣೆ ಹಾಕುತ್ತಿದೆ. ವಿಭಿನ್ನ ಪ್ರದಕ್ಷಿಣಾ ಪಥಗಳ ಈ ಅಂತರದಿಂದಾಗಿ ಇವೆರಡು ಗ್ರಹಗಳು ಒಂದೇ ನೇರದಲ್ಲಿದ್ದು, ನಾವು ಭೂಮಿಯಿಂದ ಈ ಪುಟ್ಟ ಗ್ರಹದ ರವಿತಾಡನವನ್ನು ನೇರ ದಿಟ್ಟಿಸಬಹುದಾದ ಅವಕಾಶ ತೀರಾ ಅಪರೂಪಕ್ಕೆ ಸಿಗುತ್ತದೆ. ಈ ಬಾರಿಯ ಸಂಘಟನೆ ೨೦೦೬ ರ ನಂತರ ಘಟಿಸುತ್ತಿರುವ ಮೊದಲ ಅವಕಾಶ. ಇಂತಹದ್ದೆ ಮತ್ತೊಂದು ದೃಶ್ಯ ವೀಕ್ಷಿಸಬೇಕೆಂದರೆ ಮತ್ತೆ ೨೦೧೯ರ ತನಕ ಕಾಯಬೇಕು.

ತಾಳಿ, ಇದೇನು ಮಹಾ – ಒಂದು ದಶಮಾನಕ್ಕಿಂತ ತುಸು ಹೆಚ್ಚಿನ ಅವಧಿಯಲ್ಲೇ ಘಟಿಸುವುದಾದರು ಅದು ಸುಮಾರು ಬಾರಿ ನಡೆಯುವ ಪ್ರಕ್ರಿಯೆಯೇ ಆದಂತಲ್ಲವೆ ಎನ್ನಬೇಡಿ. ೧೩ ವರ್ಷದ ಸರಾಸರಿಯಲ್ಲಿ ಪರಿಗಣಿಸಿದರು ಒಂದು ಶತಮಾನದಲ್ಲಿ ಎಷ್ಟು ಬಾರಿ ನಡೆಯಲು ಸಾಧ್ಯ ? ಬುಧಗ್ರಹವು ಭೂಮಿ ಮತ್ತು ಸೂರ್ಯನ ನಡುವೆ ಪ್ರತಿ ೧೧೬ ದಿನಕ್ಕೊಮ್ಮೆ ಹಾದು ಹೋಗುತ್ತದೆಯಾದರೂ ಅದರ ಆವರ್ತ ಸಮತಲ ನಮ್ಮ ಭೂಮಿಯ ಆವರ್ತ ಸಮತಲಕ್ಕೆ ಕೆಲವು ಕೋನದಷ್ಟು ವ್ಯತ್ಯಾಸದಲ್ಲಿರುತ್ತದೆ. ಭುವಿಯ ದೃಷ್ಟಿಯಲ್ಲಿ ಬುಧನ ಪ್ರದಕ್ಷಿಣಾ ಪಥವು ಒಂದು ರೀತಿಯ ಓರೆಯಾದ ಪ್ರಕ್ಷೇಪಣಾ ಪಥದಲ್ಲಿರುತ್ತದೆ. ಹೀಗಾಗಿ ಭೂಮಿ ಮತ್ತು ಬುಧಗ್ರಹಗಳೆರಡರ ಪಥಗಳು ಪರಸ್ಪರ ಒಂದನ್ನೊಂದು ಸಂಧಿಸುವ ಅವಕಾಶವೂ ಕೂಡಿಬರಬೇಕು. ಈ ಸಂಯುಕ್ತ ಅಂಶಗಳ ಗಣಿತ ಆ ಸರಾಸರಿ ವರ್ಷಗಳನ್ನು ಏರುಪೇರಾಗಿಸಿಬಿಡುತ್ತದೆಯಾಗಿ ‘ಪ್ರತಿ ಇಂತಿಷ್ಟು ವರ್ಷಗಳಲ್ಲಿ ಇದು ಘಟಿಸುತ್ತದೆ’ ಎಂದು ಸರಳವಾಗಿ ಹೇಳುವಂತಿಲ್ಲ. ಆ ಆವರ್ತನ ಸಂಘಟನೆ ತನ್ನದೇ ಆದ ಮಾದರಿಯನ್ನು ಹೊಂದಿರುವುದಾದರು ಅದು, “ತುಸುಕಾಲ ಪ್ರತಿ ‘ಎಕ್ಸ್’ ವರ್ಷಗಳಿಗೊಮ್ಮೆ, ನಂತರ ‘ವೈ’ ವರ್ಷಗಳಿಗೊಮ್ಮೆ, ಹಾಗೆಯೇ ಮತ್ತೆ ‘ಜಡ್’ ವರ್ಷಗಳಿಗೊಮ್ಮೆ, ಮತ್ತೆ ‘ವೈ’ ವರ್ಷಗಳಿಗೊಮ್ಮೆ, ತದನಂತರ ಮೂರು ಬಾರಿ ‘ಜಡ್’ ವರ್ಷಗಳಿಗೊಮ್ಮೆ….” ಹೀಗೆ ಎರ್ರಾಬಿರ್ರಿಯಾಗಿ ಸಾಗುವ ಕೋಟಲೆ ಲೆಕ್ಕಾಚಾರ.

ಬುಧಗ್ರಹವನ್ನು ಬಿಟ್ಟರೆ ನಮಗೂ ಸೂರ್ಯನಿಗು ನಡುವಿರುವ ಶುಕ್ರಗ್ರಹ (ವೀನಸ್) ಕೂಡ ನಮಗೆ ಬುಧಗ್ರಹದಂತಹುದ್ದೆ ಪಥ ಸಂಚಲನ ವೀಕ್ಷಣೆಯ ಅವಕಾಶ ನೀಡುವುದಾದರು – ಅದು ಹೆಚ್ಚು ನಿಧಾನವಾಗಿ ಮತ್ತು ಬುಧಗ್ರಹಕ್ಕಿಂತಲೂ ಕಡಿಮೆಯದಾದ ಓರೆ ಕೋನ ಸಮತಲದಲ್ಲಿ ಘಟಿಸುತ್ತದೆ. ಹೀಗಾಗಿ ನಮ್ಮಾ, ಸೂರ್ಯನ ನಡುವೆ ಹಾದುಹೋಗುವ ಶುಕ್ರನ ಪ್ರಾತ್ಯಕ್ಷಿಕೆಯೂ ಅಪರೂಪದ್ದಾದರು ಸ್ವಲ್ಪ ಹೆಚ್ಚು ಸುಲಭವಾಗಿ ನಿಗಾ ಇಡಬಹುದಾದಂತದ್ದು: ಇಲ್ಲಿ ಇದು ಯಾವಾಗಲು ಎಂಟು ವರ್ಷಗಳ ಅಂತರದಿಂದ ಬೇರ್ಪಟ್ಟ ಒಂದು ಜಂಟಿ ಸಂಘಟನೆಯಾಗಿ (ಯುಗ್ಮದ ಹಾಗೆ) ನಡೆಯುವ ಮತ್ತು ಈ ಜಂಟಿ ಜೋಡಿ ಒಂದು ಶತಮಾನದಲ್ಲಿ ಒಂದು ಸಾರಿ ಮಾತ್ರವೇ ನಡೆಯುವ ಪ್ರಕ್ರಿಯೆ. ನೀವೊಂದು ವೇಳೆ ೨೦೧೨ರ ಹಾದುಹೋಗುವಿಕೆಯನ್ನು ಗಮನಿಸಲಿಲ್ಲವೆಂದಾದರೆ ನಿಮ್ಮ ಅದೃಷ್ಟ ಪರೀಕ್ಷೆಗೆ ಮುಂದಿನ ೨೧೧೭ ರ ತನಕ ಕಾಯಬೇಕು.

ನಮ್ಮ ಸೌರವ್ಯೂಹದ ನೆರೆಹೊರೆಯ ಇಂತಹ ಚಲನೆಗಳು ಇದೇ ಮಾದರಿಯದ್ದೆ. ಅಲ್ಲಿನ ಗ್ರಹಗಳು ತಮ್ಮ ಸೂರ್ಯರ ಮುಂದೆ ಹಾದು ಹೋಗುವ ಹೊತ್ತಲ್ಲಿ ಅವುಗಳ ಇರುವಿಕೆಯನ್ನು ಗಮನಿಸುವುದು ಮಾತ್ರವಲ್ಲದೆ ವಿವಿಧ ಮಾನಕಗಳ ಮೂಲಕ ಅವುಗಳ ಮತ್ತದರ ಸುತ್ತಲಿನ ವಾತಾವರಣವನ್ನು ಅಳೆದು ಅಲ್ಲೇನಾದರು ಜೀವವಿಕಾಸದ ಕುರುಹೇನಾದರು ಇದೆಯೇ ಎಂದು ಅಧ್ಯಯನ ಮಾಡುವುದು ಪ್ರಚಲಿತ ವಿಧಾನ.

ಈಗಾಗಲೆ ಈ ರೀತಿಯ ಅಧ್ಯಯನಗಳಿಂದ ನಮ್ಮ ನೆರೆಹೊರೆ ಗ್ರಹಗಳ ಪ್ರದಕ್ಷಿಣಾ ಪಥ ಮತ್ತು ಹಾದುಹೋಗುವಿಕೆಯನ್ನು ಎಷ್ಟು ಆಳವಾಗಿ ಅರಿತಿದ್ದೇವೆಂದರೆ, ಅವುಗಳೀಗ ಮೊದಲಿದ್ದಷ್ಟೆ ಅದ್ಭುತ ವೈಜ್ಞಾನಿಕ ಅವಕಾಶಗಳಾಗಿ ಉಳಿದಿಲ್ಲ.

” ವೈಜ್ಞಾನಿಕವಾಗಿ, ಕೆಲವು ನೂರು ವರ್ಷಗಳ ಹಿಂದೆ ಈ ವಿದ್ಯಾಮಾನಗಳು ಹೆಚ್ಚು ಪ್ರಾಮುಖ್ಯವಾಗಿದ್ದವು” ಎಂದು ‘ದಿ ಪೋಸ್ಟ್’ಗೆ ಹೇಳಿಕೆ ನೀಡಿದವರು ಮೆಸೆಂಜರ ಗಗನ ನೌಕೆಯ ಮುಖ್ಯ ವಿಜ್ಞಾನಿ ನ್ಯಾನಿ ಚಾಬೊಟ್ (ಕಳೆದ ವರ್ಷವಷ್ಟೇ ಮೆಸೆಂಜರ ಆಕಾಶ ನೌಕೆಯ ಬುಧಗ್ರಹಕ್ಕೆ ಅಪ್ಪಳಿಸಿದ ನಂತರ ಅದರ ಚಟುವಟಿಕೆಗಳನ್ನೆಲ್ಲ ಸ್ಥಗಿತಗೊಳಿಸಲಾಯ್ತು).

ಆದರೂ ಈ ಅಡ್ಡ ಹಾಯುವಿಕೆಯಿಂದ ವಿಜ್ಞಾನಿಗಳು ಕೆಲವು ಉಪಯುಕ್ತ ಮಾಹಿತಿಯನ್ನು ಪಡೆಯಬಹುದು. ಸೌರವ್ಯೂಹದಲ್ಲೆ ಅತೀ ತೆಳುವಾದ ಬುಧಗ್ರಹದ ವಾತಾವರಣದ ವಿಶ್ಲೇಷಣೆ ಮಾಡಿ ಅಲ್ಲಿ ಜೀವವಿರುವ ಕುರುಹುಗಳಿಗಾಗಿ ಹುಡುಕಬಹುದು ( ಆ ವಾತಾವರಣದಲ್ಲಿರುವ ಅಣುಗಳ ಮೂಲಕ ಹಾಯ್ದು ಬರುವ ಬೆಳಕನ್ನು ಪರೀಕ್ಷಿಸಿ, ವಿಶ್ಲೇಷಿಸುವ ಮೂಲಕ). ಬುಧಗ್ರಹದ ಜಾಗ ಮತ್ತು ಸೂರ್ಯನ ಮುಂದೆ ಹಾದುಹೋಗುವ ಪ್ರಕ್ರಿಯೆ ಕರಾರುವಾಕ್ಕು ಮತ್ತು ವಿಶ್ವಾಸಾರ್ಹ ನಿಖರತೆಯದ್ದಾಗಿರುವುದರಿಂದ, ಈ ಪ್ರಕ್ರಿಯೆಯನ್ನೇ ಆಧಾರವಾಗಿಟ್ಟುಕೊಂಡು ಗಗನ ನೌಕೆಗಳಲ್ಲಿರುವ ಪರಿಕರ, ಉಪಕರಣಗಳ ಸೂಕ್ಷ್ಮ ನ್ಯೂನತೆಗಳನ್ನು ಪರಿಶೀಲಿಸಿ ಸರಿಪಡಿಸಬಹುದು. ಬುಧಗ್ರಹದ ಸ್ಥಾನಿಕ ಆಧಾರದ ಮೇಲೆ ದೂರದರ್ಶಕಗಳನ್ನು ಸರಿಯಾದ ದಿಕ್ಕಿನತ್ತ ನಿಟ್ಟಿಸುವಂತೆ ಮಾಡಬಹುದಷ್ಟೆ ಅಲ್ಲದೆ, ಕೆಲವು ಉಪಕರಣಗಳ ದೃಷ್ಟಿದೋಷಗಳನ್ನು ಈ ಸಂಘಟನೆಯ ಆಧಾರದ ಮೇಲೆ ಸರಿಪಡಿಸಿಕೊಳ್ಳಬಹುದು.

“ಇದೊಂದು ರೀತಿ ಕ್ಯಟರಾಕ್ಟ್ ಇದ್ದ ಕಣ್ಣಲ್ಲಿ ಕಾಣುವ ಹಾಗೆ – ಮಂಜು ಕವಿದ ವಾಹನದ ಗಾಜಿನಿಂದ ನೋಡುತ್ತಿರುವ ಹಾಗೆ, ಪ್ರಕಾಶಮಾನ ಹೊಳಪಿನ ಬೆಳಕಿನ ಸುತ್ತ ನಾವು ತಾರಾ ರೀತಿಯ ಪ್ರಭಾವಲಯವನ್ನು ಕಾಣುತ್ತೇವೆ” ಎನ್ನುತ್ತಾರೆ ಮತ್ತೊಬ್ಬ ನಾಸಾ ವಿಜ್ಞಾನಿ ಡೀನ್ ಪೆಸ್ನೇಲ್. ಸೂರ್ಯನ ಅಗಾಧ ಬೆಳಕಿನೆದುರು ಬುಧಗ್ರಹವು ಸಂಪೂರ್ಣ ಕಪ್ಪು ಕಾಯವಾಗಿ ಕಾಣಿಸಿಕೊಳ್ಳುತ್ತದೆಯಾದರು, ಬಳಸುವ ಉಪಕರಣಗಳು ಬೆಳಕನ್ನು ಚದುರಿಸುವ ಬಗೆಯಿಂದಾಗಿ ಅದೊಂದು ತುಸು ಮೆಲುವಾಗಿ ಹೊತ್ತಿಸಿಟ್ಟ ಕಾಯದ ಹಾಗೆ ಕಾಣಿಸಿಕೊಳ್ಳಬಹುದು. ಈ ಸಂಘಟನೆಯ ಹೊತ್ತಿನ ಅವಕಾಶವನ್ನು ಬಳಸಿಕೊಂಡು ವಿಜ್ಞಾನಿಗಳು ಆ ಉಪಕರಣಗಳನ್ನು ತಿದ್ದಿ ಬುಧಗ್ರಹದ ನೈಜ ಬಣ್ಣಗಳನ್ನು ನೋಡುವಂತೆ ಸರಿಪಡಿಸಿಕೊಂಡರೆ, ಅವುಗಳನ್ನು ಮತ್ತಷ್ಟು ಅಜ್ಞಾತ ಕಾಯ ಮತ್ತು ವಸ್ತುಗಳ ಅಧ್ಯಯನಕ್ಕೆ ಮರು ಬಳಸುವ ಹೊತ್ತಿನಲ್ಲಿ ಉಂಟಾಗಬಹುದಾದ ತಪ್ಪೆಣಿಕೆ ಮತ್ತು ಅವಘಡಗಳಿಂದ ಕಾಪಾಡಿದಂತೆ ಆಗುತ್ತದೆ.

ಚಾಬೋಟ್ ಈ ಪ್ರಕ್ರಿಯೆ ನಮ್ಮ ಜನರನ್ನು ಆಕಾಶದತ್ತ ನೋಡುವಂತೆ ಮತ್ತು ನೆರೆಹೊರೆಯ ಗ್ರಹಗಳ ಕುರಿತು ಆಲೋಚಿಸುವಂತೆ ಪ್ರಚೋದಿಸಲೆಂದು ಆಶಿಸುತ್ತಾರೆ. ಕಳೆದ ಶುಕ್ರವಾರ ಆಕೆ ಮತ್ತವಳ ಮೆಸೆಂಜರ ತಂಡದ ಸದಸ್ಯರು ಬುಧಗ್ರಹದ ಸಂಪೂರ್ಣ ಮೇಲ್ಮೆ ಮಾಹಿತಿಯನ್ನೊಳಗೊಂಡ ಮೊಟ್ಟಮೊದಲ ಭೂಪಠವನ್ನು ಬಿಡುಗಡೆ ಮಾಡಿದರು.

” ಇದು ನಿಜಕ್ಕೂ ಸಕಾಲದಲ್ಲಿ ಬಿಡುಗಡೆಯಾಗುತ್ತಿದೆ..” ಮುಂದುವರೆದು ಆಕೆ ನುಡಿದರು ” ಈಗಾದರೆ ಜನಗಳು ಕೂಡ ಆಸಕ್ತಿಯಿಂದ ನೋಡುತ್ತಿರುತ್ತಾರೆ..”

ಈ ಅಧ್ಯಯನ ಕಾಲದಲ್ಲಿ ಆಕೆಯ ತಂಡ ಬುಧಗ್ರಹದ ಕುರಿತು ಅನೇಕ ರೋಚಕ ಮಾಹಿತಿಗಳನ್ನು ಗ್ರಹಿಸಿ ಕಲೆಹಾಕಿದ್ದಾರೆ. ಚಾಬೋಟ್ ನುಡಿಯುತ್ತಾರೆ “ಯಾವುದೊಂದನ್ನು ಇನ್ನೊಂದಕ್ಕಿಂತ ಹೆಚ್ಚು ಪ್ರಮುಖವಾದದ್ದೆಂದು ಗುರುತಿಸಲು ಬಯಸುವುದಿಲ್ಲ” – ಆದರು ಈ ಮೂರು ಕಾಡುವ ಅಂಶಗಳನ್ನು ಗಮನಾರ್ಹವೆಂದು ಪರಿಗಣಿಸುತ್ತಾರೆ:

” ಬುಧಗ್ರಹದಲ್ಲಿರುವ ದೈತ್ಯ ಗಾತ್ರದ ಆಗಾಧ ವಿಸ್ತೀರ್ಣದಲ್ಲಿ, ಯಾವುದೋ ಹಳೆಯ ಕಾಲದಲ್ಲಿ ಅದರ ಮೇಲ್ಮೆಯನ್ನೆಲ್ಲ ಆವರಿಸಿಕೊಂಡಿರುವ ಅಗ್ನಿಪರ್ವತದಿಂದುಗುಳಲ್ಪಟ್ಟ ಲಾವ – ಅಮೇರಿಕದ ಅರ್ಧಕ್ಕಿಂತಲು ಹೆಚ್ಚು ವಿಸ್ತೀರ್ಣದಲ್ಲಿ ಚಾಚಿಕೊಂಡಿರುವಂತದ್ದು, ಮೊದಲನೆಯ ಅಂಶ. ಅಗ್ನಿಪರ್ವತದ ಯಾವ ರೀತಿಯ ಮಹಾನ್ ಪ್ರಕ್ರಿಯೆಯ ಕಾರಣಗಳು ಇಂತಹ ಅಗಾಧ ಗಾತ್ರದ ಪರಿಣಾಮವನ್ನುಂಟು ಮಾಡಿತೆಂಬುದು ತೀವ್ರವಾಗಿ ಕಾಡುವ ಅಂಶ” ಆಕೆ ಹೇಳುತ್ತಾರೆ.

ಬುಧಗ್ರಹದಲ್ಲಿರುವ ಮತ್ತೊಂದು ಕಾಡುವ ಅಂಶವೆಂದರೆ ಬೇರೆಲ್ಲೂ ಕಾಣದ, ಬುಧನ ಮೇಲೆ ಮಾತ್ರ ಕಾಣುವ ‘ಹಾಲೋಸ್’ ಅಥವಾ ‘ಗುಂಡಿ’ ಬಿದ್ದಂತಹ ಗುರುತುಗಳು. ಈ ಚಿಕ್ಕ ಗುಂಡಿ ಗುರುತುಗಳು ಬುಧನ ಮೇಲ್ಮೈ ಪರಿಸರದಲ್ಲಿ ಉಳಿಯಲಾಗದೆ ಮಂಜಿನಂತೆ ಆವಿಯಾಗಿ ಕರಗಿಹೋದ ಬಂಡೆಗಲ್ಲುಗಳು ಉಳಿಸಿಹೋಗಿರುವ ಜಾಗದ ಗುರುತೆನ್ನುವ ಅನುಮಾನ.

” ಬಂಡೆಗಲ್ಲುಗಳು ಸಾಮಾನ್ಯವಾಗಿ ತಂತಾನೆ ವ್ಯೋಮದಲ್ಲಿ ಮಾಯವಾಗಿಹೋಗುವುದಿಲ್ಲ, ಆದರೆ ಬುಧಗ್ರಹದಲ್ಲಿ ಮಾತ್ರ ಹಾಗಾಗುತ್ತದೆ” ಎಂದು ವಿವರಿಸುತ್ತಾರೆ ಚಾಬೋಟ್.

ಚಾಬೋಟ್ ತಮ್ಮ ಬಹುತೇಕ ಗಮನ ಮತ್ತು ಸಮಯವನ್ನು ನಿರಂತರ ಕತ್ತಲ ನೆರಳಿನಲ್ಲಿರುವಂತಿರುವ, ಬುಧಗ್ರಹದ ಉತ್ತರ ಮತ್ತು ದಕ್ಷಿಣ ಧ್ರುವಗಳಲ್ಲಿ ಉಂಟಾಗುವ ನೀರುಗಡ್ಡೆಗಳ ಅಧ್ಯಯನಕ್ಕೆ ವ್ಯಯಿಸಿದ್ದಾರೆ. ಅವುಗಳ ಇರುವಿಕೆಯ ಸಂಶೋಧನೆಯೇನೊ ಮಹತ್ತರವಾದದ್ದೆ ನಿಜ, ಆದರೆ ಅದು ಮತ್ತಷ್ಟು ಹೊಸ ಪ್ರಶ್ನೆಗಳಿಗೆ ದಾರಿಮಾಡಿಕೊಟ್ಟಿದೆ ಎನ್ನುತ್ತಾರಾಕೆ. ಅವು ಅಲ್ಲಿಗೆ ಬಂದದ್ದಾರು ಹೇಗೆ, ಯಾವಾಗ ಎನ್ನುವ ಪ್ರಶ್ನೆಗೆ ಉತ್ತರ ಗೊತ್ತಾದಲ್ಲಿ, ನೀರು ಹೇಗೆ ಭೂಮಿಗೆ ತನ್ನ ದಾರಿ ಕಂಡುಕೊಂಡಿತು ? ಎನ್ನುವುದರ ಬಗ್ಗೆಯೂ ಬೆಳಕು ಚೆಲ್ಲಲು ಸಾಧ್ಯ ಎನ್ನುವ ಹಿನ್ನಲೆಯಲ್ಲಿ.

ಆಕೆಯೆನ್ನುತ್ತಾರೆ “ವಿಜ್ಞಾನದಲ್ಲಿ ಒಂದು ಸಮಸ್ಯೆ ಬಗೆಹರಿದು ಉತ್ತರ ದೊರಕಿದರೆ, ಅದರ ಹಿಂದೆಯೆ ಕಾಡುವ ನೂರೆಂಟು ಹೊಸ ಪ್ರಶ್ನೆಗಳನ್ನು ಉಳಿಸಿಹೋಗುತ್ತವೆ”

ಸಣ್ಣ ಚುಕ್ಕೆಯಾಗಿ ಬುಧಗ್ರಹ ಸೂರ್ಯನೆದುರು ಹಾದುಹೋಗುವುದನ್ನು ಗಮನಿಸಿ ನೋಡುವುದರಿಂದ ಈ ಪ್ರಶ್ನೆಗಳಿಗೆಲ್ಲ ಉತ್ತರ ದೊರಕಿಬಿಡುವುದೆಂದೇನಲ್ಲ; ಅಷ್ಟೇಕೆ, ಆ ಅಂಶಗಳ ಇರುವಿಕೆಯನ್ನು ಗಮನಿಸಲೂ ಸಹ ಸಾಧ್ಯವಾಗದಿರಬಹುದು. ಆದರೂ ಅದರ ಸಾಧ್ಯಾಸಾಧ್ಯತೆಗಳನ್ನು ಪರಿಗಣಿಸದಿರಲು ಅಸಾಧ್ಯವಾದ ಕಾರಣ, ಪರಿಶೀಲಿಸಿ ನೋಡಬೇಕಾದ ಅಗತ್ಯ ಇದ್ದೆ ಇರುತ್ತದೆ.

– ಕನ್ನಡ ಸಮೀಪಾನುವಾದ: ನಾಗೇಶ ಮೈಸೂರು

© 2016 ದಿ ವಾಷಿಂಗ್ಟನ್ ಪೋಸ್ಟ್ ( © 2016 The Washington Post )
(ವಾಷಿಂಗ್ಟನ್ ಪೋಸ್ಟಿನಲ್ಲಿ ಪ್ರಕಟಿತವಾದ ಬರಹದ ಕನ್ನಡ ಸಮೀಪಾನುವಾದ; ಎನ್.ಡಿ.ಟೀವಿ (NDTV) ಜಾಲ ಮಾಧ್ಯಮದಲ್ಲಿ ಪ್ರಕಟಿತವಾಗಿದ್ದ ರೂಪದಲ್ಲಿ )

Thanks and best regards,
Nagesha MN

00685. ಮರದ ಮಾತು (ಹಾಯ್ಕು)


00685. ಮರದ ಮಾತು (ಹಾಯ್ಕು)
__________________________

(೦೧)
ಮರ ಅಮರ
ಯಾವ ಕಾಲದ ಮಾತು ?
– ಬರಿ ಸಮರ .

(೦೨)
ಉಳಿಸಿಕೊಳ್ಳಿ
ಪ್ರೇಮಿ ಸುತ್ತಲಾದರು
– ಪ್ರೇಮ ಕುರುಡು.

(೦೩)
ನೆಟ್ಟರೆ ಸಾಕು
ನೆರಳಾಗೊ ನಿಯತ್ತು
– ಪುರುಸೊತ್ತಿಲ್ಲ.

(೦೪)
ಹತ್ತು ಮುರಿದು
ಹತ್ತಕ್ಕೊಂದೂ ನೆಡರು
– ನಾಡಿನ ಗಡಿ.

(೦೫)
ರೊಚ್ಚಿನ ಮಳೆ
ತೆರವು ಮಾಡಿ ರಸ್ತೆ
– ಮತ್ತೆ ನೆಡದೆ.

(೦೬)
ರಾ’ಮರ’ ಕಥೆ
ಹಿನ್ನೋಟ ಅಚಲತೆ
– ಹೆಸರ’ಮರ’.

(೦೭)
ಮರ ಮಾದರಿ
ಋತು ಸ್ನಾನ ಹೊಸತು
– ಜೀವನ ಚಕ್ರ.

(೦೮)
ಸೇವೆ ಅಮರ
ಹೆಸರಿಗಷ್ಟೇ ಮರ
– ಅಜರಾಮರ.

(೦೯)
ತರಿದಿದ್ದರು
ನರನ ಸ್ವಾರ್ಥ ಸಹಿಸಿ
ಮೌನದನ್ವರ್ಥ.

(೧೦)
ಬಿದ್ದು ಕಂಗಾಲು
ಕತ್ತರಿಸಿ ಕಟ್ಟಿಗೆ
– ಉರುವಲಷ್ಟೆ.

– ನಾಗೇಶ ಮೈಸೂರು

ಪೋಷಕ, ವಯಸ್ಕ, ಬಾಲಕ..


ಪೋಷಕ, ವಯಸ್ಕ, ಬಾಲಕ.. 

Pubblished in suragi today (28.04.2016)

http://surahonne.com/?p=11484

00666. ಹನುಮ-ಭುವನ


00666. ಹನುಮ-ಭುವನ
_________________

 

ಧಾರಿಣಿ ದಿನ ಸಂಭ್ರಮಣ
ಹನುಮೋತ್ಸವ ಸಮ್ಮಿಲನ
ಸಂಜೀವಿನಿ ಹೊತ್ತವನ ಗುಣ
ಪೃಥ್ವಿಯಲ್ಲು ಅನುರಣ ದಿನ ||

ಅಪರಿಮಿತವಿಹ ಸ್ವಾಮಿ ಭಕ್ತಿ
ಬಿಡದೆ ಜಪಿಸೋ ರಾಮನುಕ್ತಿ
ಅದೇ ಅಪಾರ ತಾಳ್ಮೆ ವಸುಧೆ
ಸಹನೆಯಿಂದ ಸಹಿಸೋ ಶ್ರದ್ಧೆ ||

ಬಿಡನಾರನು ದೂಷಿಸೆ ಪ್ರಭುವ
ಹವಣಿಸಿದವರ ಹಣಿಸೊ ಭಾವ
ಮೀರಿಸಿ ಇಳೆ ಪೊರೆದಿಹಳು
ಮನ್ನಿಸಿ ಮಕ್ಕಳ ಅಟ್ಟಹಾಸಗಳು ||

ಮಾತೆಗಿತ್ತ ಮಾತಿಗೆ ಮಾರುತಿ
ಪ್ರಭುವೆದುರೆ ಕದನದ ಕೀರ್ತಿ
ಅಂಥ ಮಾತೆಯರ ಮಾತೆ ಭೂಮಿ
ಅವಳನಳಿಸೊ ಮಾನವ ಕಾಮಿ ||

ಅಖಂಡ ಶ್ರದ್ಧೆ ಭಕ್ತಿ ಭಾವ ಗಡವ
ಹೃದಯದೊಳಗೆ ಬಚ್ಚಿಟ್ಟ ರೂಪವ
ಬಗೆದು ತೋರದಿದ್ದರೂ ಸರಿ ಮರುಳೆ
ಭುವಿಯುಳಿಸೆ ಕರುಣೆ ತೋರುವಳೆ ||

– ನಾಗೇಶ ಮೈಸೂರು

(Picture source: http://www.indianastrology.com/festival/2016/hanuman-jayanti-20)

00573. ಕುದುರೆ


00573. ಕುದುರೆ
_________________________

  

ನಿದಿರೆಯಿಲ್ಲದ ರಾತ್ರಿ ಕುದುರೆಯನೇರಿ ನಡೆದೆ
ಕುದುರಲಿಲ್ಲ ಸ್ವಪ್ನಲೋಕದಲು ಕಲ್ಲು ಮುಳ್ಳು
ಮುದುರಿಕೊಂಡ ಮನಕೆ ಕನಸೇನು ? ನನಸೇನು ?
ಅಮೂರ್ತ ನೋವನುಭೂತಿ ಪಕ್ವ ಅನುಭವ ಗಮ್ಯ..

ದೇಕುತ್ತಿತ್ತೇನು ಅಶ್ವ ? ನಿಟ್ಟುಸಿರೊ ಬಿಸಿರಕ್ತವೊ ?
ಕೂತಂತೆಯೂ ಇಲ್ಲ, ಜಾರಿ ಬಿದ್ದಂತೆ ಕನಸಲ್ಲ
ಸಿಗುವ ಕಡೆ ಸಿಗಲಿಲ್ಲ, ಚೆಲ್ಲಾಡಿದ ಜಾಗ ಸಗಟು
ಇನ್ನೆಲ್ಲೊ ಹುಡುಕಿದರೇನು ? ಸಿಗುವ ಕಡೆ ಬಿಟ್ಟು..

ಜೀನು ಹಾಕಿದ ಮಾಯದ ಕುದುರೆ ಅವಿನಾಶಿ
ಅದರದೆ ಚಿತ್ತ ಮನೋಗತ ಮನೋರಥ ಸ್ಪೂರ್ತಿ
ಅಣತಿಯಿಕ್ಕುವ ಚಪಲ, ನೀರಸವಾಗಿ ಕರಗಿ
ತಂತಾನೆ ನಡೆದಿದೆ ಎಳೆದು, ಸಿಕ್ಕ ಹಾದಿಯಲಿ..

ಕಂಡಾರು ದೇವ ಯಕ್ಷ ಗಂಧರ್ವ ಅಪ್ಸರ ಗಣ
ಕೊಟ್ಟಾರು ಮದ್ದಿನ ಗುಳಿಗೆ ಮರೆಸುತೆಲ್ಲ ಭೀಕರ
ಆಶಯಕೆಲ್ಲಿ ಅಡೆತಡೆ ? ಮೋಡದೆ ನುಗ್ಗಿ ಧಾಳಿ
ಯಾಕೊ ದಾನವ ರಕ್ಕಸ ದೈತ್ಯ ಪಿಶಾಚಗಣ ವಾಚಾಳಿ..

ಕೊಂಕಣ ಸುತ್ತಿ ಮೈಲಾರಕೆ ಬರುವ ಪಾಡಿದು
ಮನಸನಿಟ್ಟು ನಡೆದರೆಲ್ಲೊ ಸಿಗದು ಗಮ್ಯ ನೆಮ್ಮದಿ
ಅರಸಿದೆಡೆ ಸಿಗಲಿಲ್ಲ, ಅರಸುವೆಡೆ ಸುಳಿವಿಲ್ಲ
ತ್ರಿಶಂಕು ಬದುಕೇ ಹೀಗೆ, ಮರೀಚಿಕೆಯ ಬೆನ್ನಟ್ಟುತ..

– ನಾಗೇಶ ಮೈಸೂರು

(Picture from wiktionary : https://kn.m.wiktionary.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Horse_gif.gif)

00549. ಅಹಲ್ಯಾ ಸಂಹಿತೆ – ೦೪ (ಭೀತಿಯ ಸುಳಿಯಲ್ಲಿ ದೇವೇಂದ್ರ)


00549. ಅಹಲ್ಯಾ ಸಂಹಿತೆ – ೦೪ (ಭೀತಿಯ ಸುಳಿಯಲ್ಲಿ ದೇವೇಂದ್ರ)

(link to the previous episode 03: https://public-api.wordpress.com/bar/?stat=groovemails-events&bin=wpcom_email_click&redirect_to=https%3A%2F%2Fnageshamysore.wordpress.com%2F2016%2F03%2F03%2F00548-%25e0%25b2%2585%25e0%25b2%25b9%25e0%25b2%25b2%25e0%25b3%258d%25e0%25b2%25af%25e0%25b2%25be-%25e0%25b2%25b8%25e0%25b2%2582%25e0%25b2%25b9%25e0%25b2%25bf%25e0%25b2%25a4%25e0%25b3%2586-%25e0%25b3%25a6%25e0%25b3%25a9&sr=0&signature=0dae80deb805e1bf45962b9414b8860a&user=47688601&_e=eyJibG9nX2lkIjo0ODk5NTgxMiwiYmxvZ19sYW5nIjoia24iLCJzaXRlX2lkX2xhYmVsIjoid3Bjb20iLCJ0eXBlIjoibGlrZSIsImNhbXBhaWduIjpudWxsLCJsaW5rX3RhcmdldCI6Ikxpa2VkIFBvc3QiLCJfdXQiOiJ3cGNvbTp1c2VyX2lkIiwiX3VpIjo0NzY4ODYwMSwiX3VsIjoibmFnZXNoYW15c29yZSIsIl9lbiI6IndwY29tX2VtYWlsX2NsaWNrIiwiX3RzIjoxNDU3MDU3NzMwOTAyLCJicm93c2VyX3R5cGUiOiJwaHAtYWdlbnQiLCJfYXVhIjoid3Bjb20tdHJhY2tzLWNsaWVudC12MC4zIiwiYmxvZ190eiI6IjAiLCJ1c2VyX2xhbmciOiJrbiJ9&_z=z)

ಜಾಣತನದಿಂದ ತನ್ನ ಕಾಳಜಿಯನ್ನು ತೋರಿದ ದೇವರಾಜನ ವಿನಯ ನೈಜ್ಯವೊ , ನಾಟಕವೊ ಅರಿವಾಗದಿದ್ದರೂ ಕನಿಷ್ಠ ಅದನ್ನು ತೋರುವ ನಿಷ್ಠೆಯಾದರೂ ಇದೆಯಲ್ಲಾ ಎಂಬ ಭಾವ ಮೂಡಿ ಸ್ವಲ್ಪ ನಿರಾಳರಾದ ನಾರದರು “ಸ್ವರ್ಗಲೋಕ ಸುಖ ತುಂಬಿ ತುಳುಕಿ ತೊಟ್ಟಿಕ್ಕುವ ಆನಂದಧಾಮ ನಿಜ ದೇವೆಂದ್ರ.. ಆದರೆ, ಬರಿ ಅದೊಂದೆ ರಾಜನ ಕರ್ತವ್ಯವಲ್ಲ.. ಆ ಸುಖ ಸುಲಭದಲ್ಲಿ ಕಳುವಾಗದಂತೆ ನೋಡಿಕೊಳ್ಳುವ ಹೊಣೆಯೂ ರಾಜನದೆ..”

“ಒಪ್ಪಿದೆ ಮುನಿವರ್ಯ.. ಮುಂದೆ ಅಚಾತುರ್ಯವಾಗದಂತೆ ನೋಡಿಕೊಳ್ಳುವ ಹೊಣೆ ನನಗಿರಲಿ….ಅದಿರಲಿ, ತಮ್ಮ ಈ ಅವಸರದ ಆಗಮನ ಕೇವಲ ಈ ಶಿಷ್ಯನ ಕಿವಿ ಹಿಂಡಿ ಬುದ್ಧಿ ಹೇಳುವ ಉದ್ದೇಶದಿಂದಂತೂ ಅಲ್ಲವೆನ್ನುವುದನ್ನು ಊಹಿಸಬಲ್ಲೆ… ಇರದಿದ್ದರೆ ಈ ನಸುಕಿನ ಹೊತ್ತಲ್ಲೆ ತಾವಿಲ್ಲಿ ಧಾವಿಸಿ ಬರುತ್ತಿರಲಿಲ್ಲ; ಸಾವಕಾಶವಾಗಿ ಬರಬಹುದಾಗಿತ್ತು…”

ದೇವರಾಜನ ವಿನಯಪೂರ್ಣ ತಪ್ಪೊಪ್ಪಿಗೆಯ ದನಿಯಿಂದ ತುಸು ತಣ್ಣಗಾದ ನಾರದ ಮುನಿಗಳು,”ಸದ್ಯ ಅಷ್ಟಾದರೂ ಆಲೋಚಿಸುವ ಛಾತಿ ಇನ್ನು ಉಳಿದಿದೆಯಲ್ಲಾ? ನೀನಿಲ್ಲಿ ಸುಖಭೋಗ ತಲ್ಲೀನತೆಯಲ್ಲಿ ಜಗವನ್ನೆ ಮರೆತಿದ್ದರೆ, ಹೊರಗೆ ನಡೆಯುತ್ತಿರುವ ವಿಷಯಗಳ ಅರಿವಾಗುವುದಾದರೂ ಹೇಗೆ? ಬಹುಶಃ ನಿನ್ನ ಪದವಿಗೆ ಧಕ್ಕೆಯಾಗುವ ಮಟ್ಟ ಮುಟ್ಟಿದ ಹೊರತೂ ನೀನು ಎಚ್ಚರಗೊಳ್ಳುವವನಲ್ಲವೆಂದು ಕಾಣಿಸುತ್ತದೆ..,”

ತನ್ನ ಜೀವಕ್ಕಿಂತ ಮಿಗಿಲಾದ ಇಂದ್ರ ಪದವಿಯ ಮಾತು ಬರುತ್ತಲೆ ತಟ್ಟನೆ ಬೆಚ್ಚಿ ಬಿದ್ದವನಂತೆ ಮೈ ಅದುರಿಸಿದ ಸುರೆಂದ್ರ..

” ನನ್ನ ಪದವಿಯ ಮೇಲೆ ಕಣ್ಣಿಡುವಂತ ಬೆಳವಣಿಗೆಯೇನಾಯ್ತು ಮುನಿಗಳೆ? ಮತ್ತೆ ಯಾರಾದರೂ ಬಲವಾಗುತ್ತಿರುವ ಸೂಚನೆ ಕಾಣುತ್ತಿದೆಯೇನು?”

“ತಕ್ಷಣಕ್ಕೆ ಯಾರೂ ಇಲ್ಲವಾದರೂ, ಆ ಆಕಾಂಕ್ಷೆಯನ್ನು ಹೊಂದಬಲ್ಲವರು ಮತ್ತು ಅದನ್ನು ಈಡೇರಿಸಿಕೊಳ್ಳುವ ಸಾಮರ್ಥ್ಯವಿರುವವರಂತೂ ಸಾಕಷ್ಟು ಜನ ಹುಟ್ಟಿಕೊಂಡಿದ್ದಾರೆ…”

” ಸುಮ್ಮನೆ ಭೀತಿಗೀಡು ಮಾಡಬೇಡಿ ದೇವರ್ಷಿ..ನಿಮಗೆ ದೇವತೆಗಳ ಬಲ, ದೌರ್ಬಲ್ಯಗಳೆಲ್ಲ ಚೆನ್ನಾಗಿ ತಿಳಿದಿದೆ.. ಒಗಟಾಗಿಸದೆ ದಯಮಾಡಿ ಬಿಡಿಸಿ ಹೇಳಿ…”

“ದೇವರಾಜ..ನನಗೂ ನಿನ್ನ ಮುಂದೆ ಜಗದೆಲ್ಲಾ ಆತಂಕ, ತೊಡಕು ಹುಟ್ಟಿಸುವವರ ಪ್ರವರ ಹೇಳುತ್ತಾ ಕೂರುವಷ್ಟು ಸಮಯವಿಲ್ಲ. ಆದರೆ ತೀರಾ ಅಪಾಯಕಾರಿಯಾಗಬಲ್ಲ ಸಾಮರ್ಥ್ಯವಿರುವವರನ್ನು ಕಂಡಾಗ ದೇವತಾ ಸಹಾನುವರ್ತಿಯಾಗಿ ನಾನು ಮಾಡಬೇಕಾದ ಕನಿಷ್ಠ ಕರ್ತವ್ಯವೆಂದರೆ, ಒಂದು ಎಚ್ಚರಿಕೆಯ ಘಂಟೆಯನ್ನಾದರೂ ಬಾರಿಸಿ ಹೋಗುವುದು.. ಅದನ್ನು ಪೂರೈಸಲೆಂದೆ ನಾನಿಲ್ಲಿ ಅವಸರಿಸಿ ಬಂದದ್ದು…”

” ಹೊತ್ತಿನ ಮುಖವನ್ನೂ ನೋಡದೆ ಈ ವಿಷಯದೊಂದಿಗೆ ಧಾವಿಸಿ ಬಂದಿದ್ದಿರೆಂದ ಮೇಲೆ, ನೀವು ಕಂಡ ಆತಂಕದ ಚಿಹ್ನೆ ಬಲು ತೀಕ್ಷ್ಣವಾದದ್ದೆ ಇರಬೇಕು… ಈಗಷ್ಟೊಂದು ಪ್ರಬಲವಾಗಿ ಬೆಳೆಯುತ್ತಿರುವವರಾದರೂ ಯಾರು ಪೂಜ್ಯರೆ?”

” ಒಬ್ಬರಲ್ಲ… ನಿನ್ನ ಸ್ಥಾನ ಕಬಳಿಸಬಲ್ಲ ಸಾಮರ್ಥ್ಯವಿರುವ ಇಬ್ಬರು ಈಗ ಹಿಮಾಲಯದ ತಪ್ಪಲಿನ ಬದರೀನಾಥದಲ್ಲಿ ತಪೋಸಾಧನೆಯಲ್ಲಿ ನಿರತರಾಗಿದ್ದಾರೆ…”

ಸೂಕ್ಷ್ಮಮತಿ ಇಂದ್ರನಿಗೆ ಅಚ್ಚರಿಯಾಯ್ತು ‘ಯಾರು? ವಿಷ್ಣುವಿನ ರೂಪವಾಗಿ ದೈವಾಂಶ ಸಂಭೂತರೆಂದು ಕರೆಸಿಕೊಂಡಿರುವ ನರ ನಾರಾಯಣರೆ?”

ಆ ಕ್ಷಣದಲ್ಲೂ ಚತುರಮತಿ ದೇವೆಂದ್ರನ ಚಾಣಾಕ್ಷತೆಯನ್ನು ಮೆಚ್ಚದಿರಲಾಗಲಿಲ್ಲ ನಾರದರಿಗೆ..

“ಹೌದು.. ಅವರೆ..! ಇಡಿ ಬದರೀನಾಥವನ್ನೆ ಅಮರಾವತಿಗಿಂತ ಮಿಗಿಲಾಗಿಸಿಕೊಂಡಿರುವ ಅವರಿಬ್ಬರ ಅಪಾರ ಶಕ್ತಿ, ಸಾಮರ್ಥ್ಯಗಳ ದರ್ಶನ ಮಾಡಿಕೊಂಡೆ ನಾನಿಲ್ಲಿ ನೇರ ಬಂದದ್ದು ..”

ದೇವರಾಜ ಕೊಂಚ ಗೊಂದಲದಲ್ಲಿ ಬಿದ್ದಂತೆ ಕಂಡ..”ನಾರದರೆ, ನರ ನಾರಾಯಣರು ದೈವಾಂಶ ಸಂಭೂತರು, ವಿಷ್ಣುವಿನ ಅಪರಾವತಾರವೆನಿಸಿಕೊಂಡ ಮಹಾನುಭಾವರು..ಅವರು ಬಲಿಷ್ಠರಾಗುತ್ತಿದ್ದಾರೆಂದರೆ ಏನರ್ಥ? ಅದು ದೇವತೆಗಳಿಗೆ ಅನೂಕೂಲವೆ ಅಲ್ಲವೆ?”

“ಹೌದು ದೇವತೆಗಳಿಗೇನೊ ಅನುಕೂಲವೆ ನಿಜ. ಆದರೆ ಈ ರೀತಿ ಬಲ ಪಡೆದವರ ಕಣ್ಣು ಅಧಿಕಾರಕ್ಕಾಗಿ ಹಂಬಲಿಸಿದರೆ, ಅವರ ಕಣ್ಣು ಮೊದಲು ಬೀಳುವುದು ಯಾರ ಮೇಲೆ ಗೊತ್ತೆ?”

“ಇಂದ್ರ ಪದವಿ…..? ”

“ಖಂಡಿತ ನಿಜ..ಅವರು ಯಾರ ಅವತಾರವೇ ಆದರೂ, ಭುವಿಯಲ್ಲಿರುವ ತನಕ ಅವರ ನಡೆ ನುಡಿ ವರ್ತನೆಗಳು ಹೀಗೆ ಇರುವುದೆಂದು ಹೇಳ ಬರುವುದಿಲ್ಲ…”

” ನಿಮ್ಮ ಮಾತು ನಿಜ ಪೂಜ್ಯರೆ…”

“ಅಲ್ಲದೆ ಬಲಿಷ್ಠರಾದವರಿಗೆ ಇಳೆಯಲ್ಲಿ ಸಮಾನ ಬಲದ ಸಮರ್ಥರು ಕಾಣ ಸಿಗದಾಗಲೂ ಅವರ ಕಣ್ಣಿಗೆ ಬೀಳುವುದು ದೇವತೆಗಳು ಹಿಡಿದು ಕೂತ ಸ್ವರ್ಗ ಲೋಕವೆ….”

ಅದನ್ನು ಅನುಭವದಿಂದಲೆ ಚೆನ್ನಾಗಿ ಬಲ್ಲ ದೇವೇಂದ್ರನೂ ಹೌದೆಂಬಂತೆ ತಲೆಯಾಡಿಸಿದ…

“…ನಾನೀಗ ಕಂಡ ದೃಶ್ಯದ ಆಧಾರದ ಮೇಲೆ ಹೇಳುವುದಾದರೆ, ಅವರೀಗ ಎಣೆಯಿಲ್ಲದ ಅಸೀಮ ಬಲದ ಒಡೆಯರಾಗಿ ಕೂತಿದ್ದಾರೆ…ದಿನೆ ದಿನೆ ಅವರ ಶಕ್ತಿ ಹೆಚ್ಚುತ್ತಲೆ ಇದೆ….ತಮ್ಮ ಸುತ್ತ ತಮ್ಮದೆ ಆದ ಲೋಕವನ್ನು ತಾವೆ ಸೃಷ್ಟಿಸಿಕೊಳ್ಳುವ ಮಟ್ಟಕ್ಕೆ ಬೆಳೆದುಬಿಟ್ಟಿದೆ ಆ ಶಕ್ತಿ…ನನಗಿನ್ನೂ ಅಚ್ಚರಿಗೊಳಿಸಿದ್ದೆಂದರೆ ಅವರ ಯಾವ ಶಕ್ತಿಗೂ ಅವರು ಬ್ರಹ್ಮನನ್ನೊ ಅಥವ ಇನ್ನಾರನ್ನೊ ತಪ್ಪಸ್ಸು ಮಾಡಿ ಅವಲಂಬಿಸಿ ವರ ಕೇಳುತ್ತಿಲ್ಲ. ತಮ್ಮ ಸ್ವಯಂ ಶಕ್ತಿಯಲ್ಲೆ ತಮಗೆ ಬೇಕಾದ ಉತ್ಪತ್ತೋತ್ಪಾತಗಳನ್ನು ತಾವೆ ಸಿದ್ದಿಸಿಕೊಳ್ಳುತ್ತಿದ್ದಾರೆಂದರೆ, ಅವರ ಶಕ್ತಿಯೆಷ್ಟು ಘನವಾಗಿರಬೇಕು – ಊಹಿಸಿಕೊ …! ”

“… ಪೂಜ್ಯರೆ ನಿಮ್ಮ ಮಾತು ಕೇಳುತ್ತಿದ್ದಂತೆ ಯಾಕೊ, ನನಗೂ ಭೀತಿ ಹೆಚ್ಚುತ್ತಿದೆ…”

” ಅದಕ್ಕೆ ಎಚ್ಚರಿಸಲೆಂದೇ ನಾನು ಬಂದಿದ್ದು ದೇವರಾಜ…ಮುಂದೆ ಅವರಿಂದ ಆತಂಕವಿದೆಯೊ ಇಲ್ಲವೊ ಅದು ಬೇರೆಯ ವಿಷಯ – ಆದರೆ ಕಂಟಕವಾಗುವ ಸಾಧ್ಯತೆಯಂತೂ ಇದ್ದೆ ಇದೆ..”

“ನನ್ನನ್ನೀಗ ಏನು ಮಾಡೆನ್ನುತ್ತೀರಿ ಗುರುಗಳೆ?”

“ಏನು ಮಾಡುವೆಯೊ ಬಿಡುವೆಯೊ ನಿನಗೆ ಬಿಟ್ಟಿದ್ದು..ನನ್ನ ಕರ್ತವ್ಯ ಎಚ್ಚರಿಸುವುದಾಗಿತ್ತು.. ಅದನ್ನಂತೂ ಮಾಡಿದ್ದೇನೆ..ಇನ್ನು ಅದು ಹೇಗೆ ಅವರ ಮನ ಕೆಡಿಸಿ ತಪೊಧ್ಯಾನದ ಏಕಾಗ್ರತೆಯಿಂದ ಚಂಚಲವಾಗಿಸಿ, ಇಹ ಸುಖಗಳಿಗೆ ಸಿಲುಕಿಸುತ್ತಿಯೋ ಅದು ನಿನ್ನ ಹೊಣೆ.. ಆದರೆ ಅವರು ಸುಲಭದ ತುತ್ತುಗಳಲ್ಲವೆಂದು ಮಾತ್ರ ನೆನಪಿರಲಿ…”

ಹೀಗೆಂದವರೆ ಬಂದ ಕಾರ್ಯ ಮುಗಿದ ಸಂತೃಪ್ತಿಯಲ್ಲಿ ‘ನಾರಾಯಣ’, ‘ನಾರಾಯಣ’ ಎನ್ನುತ್ತ ಮೇಲೆದ್ದು ನಡೆದೆ ಬಿಟ್ಟರು ನಾರದರು…!

************

ಅಧ್ಯಾಯ – 03

ಮೋಹ, ವ್ಯಾಮೋಹವೆನ್ನುವುದು ಮಾನವನನ್ನು ಕಾಡಿದಷ್ಟೆ ಸಹಜವಾಗಿ ದೇವತೆಗಳನ್ನು ಕಾಡುವುದು ಅತಿಶಯದ ವಿಷಯವೇನಲ್ಲ; ಇದಕ್ಕೆ ದೇವರಾಜನೂ ಹೊರತೇನಲ್ಲವಲ್ಲ ? ನಿಜ ಹೇಳಬೇಕೆಂದರೆ ಅವನ ಪಾಲಿನ ಕಾಮಪಿಪಾಸೆ, ಲಾಲಸೆ, ವ್ಯಾಮೋಹ ಇತರರಿಗಿಂತ ಒಂದು ತೂಕ ಹೆಚ್ಚೆ. ತನ್ನಿಚ್ಚೆ ಬಂದಂತೆ ಸ್ವೇಚ್ಛೆಯಲ್ಲಿ ಹೆಣ್ಣು ಹೊನ್ನುಗಳ ನಡುವೆ ಮುಳುಗಿ ಸುಖಿಸಬೇಕೆಂದರೆ, ಈ ಇಂದ್ರ ಪದವಿಯ ಇರುವಿಕೆ ಬಹಳ ಮುಖ್ಯವೆಂಬುದು ಅವನು ಅರಿಯದ್ದೇನಲ್ಲ. ಹೀಗಾಗಿ ನಾರದರು ಬಂದು ಬಿಟ್ಟು ಹೋದ ಕೀಟ, ಈಗ ಕೊರೆಯುವ ಹುಳುವಾಗಿ ಕಾಡತೊಡಗಿದೆ. ನರ ನಾರಾಯಣರು ತನ್ನ ಅಧಿಕಾರಕ್ಕೆ ಕುತ್ತಾಗುವ ಕ್ಷುಲ್ಲಕ ಮಟ್ಟಕ್ಕಿಳಿಯಲಾರರು ಎಂದೆ ನಿರಾಳವಾಗಿದ್ದವನಿಗೆ ಈಗ ಇದ್ದಕ್ಕಿದ್ದಂತೆ ಸಂಶಯದ ಕೀಟ ಕೊರೆಯಹತ್ತಿದೆ. ಅಲ್ಲಿಯತನಕ ಅವರೇಕೆ ತನ್ನ ತಂಟೆಗೆ ಬಂದಾರು ? ಎಂದು ನಿರಾಳವಾಗಿದ್ದವನಿಗೆ, ‘ಒಂದು ವೇಳೆ ಬಂದುಬಿಟ್ಟರೆ?’ ಎನ್ನುವ ಭೀತಿ ಕಾಡತೊಡಗಿ ಕೂತಲ್ಲಿ, ನಿಂತಲ್ಲಿ ಚಿಂತಿಸುವಂತೆ ಮಾಡಿ ಕಂಗಾಲಾಗಿಸಿಬಿಟ್ಟಿದೆ. ಸುತ್ತ ನೆರೆದ ಆಪ್ತ ಮಂತ್ರಿ ಬಳಗಕ್ಕು ಅವನ ಅನ್ಯಮನಸ್ಕತೆ ಗೋಚರವಾಗಿ ‘ದೇವರಾಜನಿಗಿದೇನು ಹೊಸ ಚಿಂತೆ?’ ಎಂದು ತಲ್ಲಣಿಸುವಂತಾಗಿದೆ… 

ಅವರಿಗೂ ಗೊತ್ತು – ಎಲ್ಲಿಯತನಕ ನರೇಂದ್ರ ಕ್ಷೇಮವೊ, ಅಲ್ಲಿಯತನಕ ಅವರ ಅಧಿಕಾರ, ವೈಭವ, ವೈಭೋಗಗಳು ಸುರಕ್ಷಿತ. ದೇವರಾಜನದೊಂದು ಒಳ್ಳೆಯ ನಡವಳಿಕೆ ಅವರಿಗೆ ಅತ್ಯಂತ ಪ್ರಿಯವಾದದ್ದು; ನರೇಂದ್ರ ತಾನು ಸುಖಿಸುವುದು ಮಾತ್ರವಲ್ಲ, ತನ್ನ ಸುತ್ತಲಿನವರಿಗು ಅವರಿಚ್ಛೆಯನುಸಾರ ಸುಖಿಸಲು ಸ್ವೇಚ್ಛೆ ನೀಡಿಬಿಟ್ಟಿದ್ದಾನೆ. ಹೀಗಾಗಿ ಅವನು ಅಧಿಕಾರದಲ್ಲಿರುವತನಕ ಅವರೆಲ್ಲರಿಗು ನಿರಾಳ. ಅವನು ಬಲಹೀನನಾಗದಂತೆ ನೋಡಿಕೊಳ್ಳುವುದರಲ್ಲೆ ಅವರ ಕ್ಷೇಮವೂ ಅಡಗಿಕೊಂಡಿದೆ. ಮತ್ತಾವನೊ ಸುರಾಧೀಶನಾಗಿ ಬಂದರೆ, ದೇವರಾಜನಂತೆ ಮುಕ್ತ ನೀತಿ ಅನುಸರಿಸುವನೆಂದು ಹೇಳಲು ಬರುವುದೆ ? ಅದಕ್ಕೆ ನರೇಂದ್ರ ಆ ಪದವಿಯಲ್ಲಿರುವುದು ಸ್ವತಃ ಅವನಿಗಿಂತ, ಅವನ ಸುತ್ತಲ ಉಪಗ್ರಹ ದೇವತೆಗಳಿಗೆ ಅತಿ ಮುಖ್ಯ. ಯಾವಾಗ ಅದಕ್ಕೆ ಧಕ್ಕೆಯೊದಗೀತೊ, ಆಗಲೆ ಅವರ ಎದೆಯಲ್ಲೂ ನಡುಕ ಶುರು.. ಈ ಬಾರಿ ಮತ್ತಾವುದಾದರು ಹೊಸ ರಾಕ್ಷಸ ಭೀತಿ ಹುಟ್ಟಿಕೊಂಡಿರಬಹುದೆ ? ಅದಕ್ಕೆ ತಮ್ಮ ರಾಜ ಚಡಪಡಿಸುತ್ತ ಚಿಂತಿತನಾಗಿರುವನೆ ?
“ದೇವೇಂದ್ರ, ಯಾಕೊ ವ್ಯಾಕುಲನಾದಂತಿದೆಯಲ್ಲ?” ಅವನ ಬಂಗಾರದ ಬಟ್ಟಲಿಗೆ ಸುರೆಯನ್ನು ತುಂಬಿಸುತ್ತ ಕೇಳಿದ ವರುಣ..

ಪಾನಗೋಷ್ಠಿಯಲ್ಲಿ ಜತೆ ಸೇರಿರುವ ವಾಯುದೇವ, ಅಗ್ನಿದೇವರು ಸೇರಿದಂತೆ ಶಿಷ್ಠ ಚತುಷ್ಠಯದ ನಾಲ್ವರು ಮಾತ್ರ ಮಂತ್ರಾಲೋಚನೆಯಲ್ಲಿ ಖಾಸಗಿ ಮಂದಿರವೊಂದರಲ್ಲಿ ಸೇರಿಕೊಂಡಿದ್ದಾರೆ. ಮಾಮೂಲಿನ ಗೋಷ್ಟಿಗಳಾದರೆ ಹೀಗಿರುವುದಿಲ್ಲ; ಇಡೀ ಸಭಾಮಂದಿರದ ತುಂಬೆಲ್ಲ ತುಂಬಿಕೊಂಡ ಹಿರಿದೇವತೆಗಳಿಂದ ಹಿಡಿದು, ಪುಡಿ ದೇವತೆಗಳವರೆಗೆ, ಯಕ್ಷಾದಿ ಕಿನ್ನರ ಅಪ್ಸರೆಯರ ಸಾಂಗತ್ಯದಲ್ಲಿ ಎಲ್ಲರೂ ಮುಕ್ತವಾಗಿ ನೃತ್ಯಪಾನಗಾನ ಗೋಷ್ಟಿಯಲ್ಲಿ ನಿರತರಾಗಿಬಿಡುತ್ತಾರೆ. ಆ ಹೊತ್ತಲಿ ಪಾನಮತ್ತರಾಗಿ ಅಲ್ಲೆ ಸರಸ ಸಲ್ಲಾಪದಲಿ ತೊಡಗಿಕೊಂಡವರದೆಷ್ಟೊ.. ಅಪ್ಪುಗೆಯಲಿ ಮೈ ಮರೆತವರಿನ್ನೆಷ್ಟೊ.. ಆದರೆ ಇಂದಿನ ಗೋಷ್ಠಿಯ ವಿಭಿನ್ನತೆಯೆ ವಿಚಾರ ಗಹನವಾದುದ್ದೆಂದು ಸೂಚಿಸುವಂತಿದೆ. ಅದಕ್ಕೆ ಈ ರಹಸ್ಯದ, ಆಪ್ತ ಮಂತ್ರಾಲೋಚನೆ.

ವರುಣನ ಮಾತಿಗೆ ಪ್ರತಿಯಾಡದೆ ತನ್ನ ಬಟ್ಟಲಿನ ಸುರೆಯನ್ನು ಒಂದೆ ಗುಟುಕಿಗೆ ಮುಗಿಸಿದ ಸುರೇಂದ್ರನನ್ನೆ ಆಳವಾಗಿ ನೋಡುತ್ತ ನುಡಿದ ವಾಯುದೇವ..

“ಸುರೇಂದ್ರ.. ನಿನ್ನನ್ನೇನೊ ಬಾಧಿಸುತ್ತಿರುವುದೆಂದು ನಾವರಿಯಬಲ್ಲೆವಾದರು ನೀನಾಗಿ ಹೇಳದೆ ಅದೇನೆಂದು ಅರಿಯುವ ಬ್ರಹ್ಮಜ್ಞಾನ ನಮ್ಮಲಿಲ್ಲ.. ಅದೇನೆಂದು ಬಿಚ್ಚಿ ಹೇಳಬಾರದೆ ? ಆಗ ನಮ್ಮ ಕೈಲಾದ ಉಪಾಯ, ಉತ್ತರಗಳನ್ನು ನೀಡಲಾದೀತೊ ಏನೊ…?”

(ಇನ್ನೂ ಇದೆ)

(Link to the next episode 05: https://nageshamysore.wordpress.com/2016/03/04/00550-%e0%b2%85%e0%b2%b9%e0%b2%b2%e0%b3%8d%e0%b2%af%e0%b2%be-%e0%b2%b8%e0%b2%82%e0%b2%b9%e0%b2%bf%e0%b2%a4%e0%b3%86-%e0%b3%a6%e0%b3%ab/)

ನಾಗೇಶಮೈಸೂರು,ಅಹಲ್ಯಾ,ನಾಗೇಶ,ಮೈಸೂರು,ಕಾದಂಬರಿ,ಸಂಹಿತೆ,mysore,nagesha,samhite,ahalya,novel,nageshamysore,

00546. ಅಹಲ್ಯಾ ಸಂಹಿತೆ – ೦೧ (ಗೌತಮನಾಶ್ರಮದಲ್ಲಿ ಅಹಲ್ಯೆ)


00546. ಅಹಲ್ಯಾ ಸಂಹಿತೆ – ೦೧ (ಗೌತಮನಾಶ್ರಮದಲ್ಲಿ ಅಹಲ್ಯೆ)
__________________________________

ಅಧ್ಯಾಯ – ೦೧:
________________

ತಣ್ಣಗೆ ಬೀಸಿದ ಗಾಳಿ ಸುತ್ತಲ ಹಸಿರು ಗಿಡಮರಗಳನೆಲ್ಲ ನೇವರಿಸಿ, ಮಾತಾಡಿಸಿಕೊಂಡು ಸಮಷ್ಟಿಯಾಗಿ ಕುಟೀರದ ಸುತ್ತ ಸುತ್ತು ಹಾಕಿ ಏನೊ ಆಲೋಚನೆಯಲ್ಲಿ ಮುಂದಿನ ಜಗುಲಿಯಲಿ ಕುಳಿತಿದ್ದ ಅಹಲ್ಯೆಯ ಮೊಗವನ್ನು ನೇವರಿಸಿದಾಗ, ಕಚಗುಳಿಯಿಟ್ಟಂತಾಗಿ ಕಣ್ಣು ತೆರೆದಳು. ಕುಳಿರ್ಗಾಳಿಯ ತಂಪು ಅವಳ ಸುಂದರ ಸುಕೋಮಲ ಕದಪುಗಳನು ಮೆಲುವಾಗಿ ಸವರಿ, ಮುಚ್ಚಿದ ಕಮಲದೆಸಳಿನಂತಿದ್ದ ಕಣ್ಣು ರೆಪ್ಪೆಗಳನ್ನು ತಣ್ಣಗಾಗಿಸಿ ಏನೊ ಆಹ್ಲಾದಕರ ಭಾವ ಒಳಗೆಲ್ಲ ತೀಡಿದಂತಾಗಿ, ಆ ಮತ್ತಿನಲೆ ಮತ್ತೆ ಕಣ್ಮುಚ್ಚುತ್ತ , ‘ ಇದೆಂತಾ ಸೊಗಸಾದ ಸಂಜೆಯಾಗುತ್ತಿರುವಂತಿದೆಯಲ್ಲ…! ಯಾಕೊ ಇನ್ನೂ ಗೌತಮರ ಸುಳಿವೆ ಕಾಣದೆ…?’ ಎಂದು ಆಲೋಚನೆಗಿಳಿಯುವ ಹೊತ್ತಿನಲ್ಲೆ, ಜಗುಲಿಯ ನೆಲದ ಮೇಲೆ ಮಂಡಿ ಮಡಿಸಿಕೊಂಡು ಕುಳಿತಿದ್ದ ಭಂಗಿಯಲ್ಲಿ, ಪಾದದ ತುದಿಯ ಬೆರಳುಗಳಲ್ಲಿ ಏನೊ ‘ಕುಳುಕುಳು’ಗುಟ್ಟುವ ಭಾವ ಉಂಟಾಗಿ, ಸಂಜೆಯ ಹೊತ್ತಿನಲಿ ಸರಿದಾಡುವ ಹುಳು ಉಪ್ಪಟೆಯಲ್ಲಾ ತಾನೆ, ಎಂದು ಬೆಚ್ಚುತ್ತ ಕಾಲೆಳೆದುಕೊಳ್ಳಹೋದವಳ ದಂತದ ಬಣ್ಣದ ಮೊಣಕಾಲಿಗೂ ಅದೆ ಸ್ಪರ್ಷದ ಅನುಭೂತಿಯಾಗಿ, ಅದು ಆಶ್ರಮದಲ್ಲಿ ಸದಾ ಕಾಲ ಸಂಗಾತಿಯಾಗಿರುವ ಪುಟ್ಟ ಜಿಂಕೆಯ ಮರಿ ‘ಹರಿಣಿ’ಯ ನಾಲಿಗೆಯ ಸ್ಪರ್ಷವೆಂದರಿವಾದಾಗ ನಿರಾಳವಾಯ್ತು. ಮತ್ತೆ ಆಚೆಯ ಬದಿಗೆ ಕಾಲು ಮಡಿಸುತ್ತ ಹರಿಣಿಯನ್ನು ಸೆಳೆದು ಮಡಿಲಿಗಿಟ್ಟುಕೊಂಡವಳೆ, ಅದರ ರೇಷಿಮೆಯಂತಹ ತುಪ್ಪಟದ ಮೃದು ಮುಖಕ್ಕೆ ಕೆನ್ನೆಯಾನಿಸಿ ತನ್ನ ಅಷ್ಟೆ ಮೃದು ಮಧುರ ಹಸ್ತಗಳಿಂದ ಅದರ ದೇಹವನ್ನು ನೇವರಿಸುತ್ತ –

“ಯಾಕೆ ದುಗುಡದಲ್ಲಿರುವಂತೆ ಕಾಣುವೆ ಹರಿಣಾ? ಎಲ್ಲಿ ಆ ನಿನ್ನಮ್ಮ ‘ಅಹರ್ನಿಶಿ’? ಸದಾ ಎಡಬಿಡದೆ ಯಾರಾದರೂ ನಿನ್ನ ಕದ್ದೊಯ್ದು ಬಿಡುವರೋ ಎಂಬಂತೆ ನಿನ್ನ ಹಿಂದೆಯೆ ಸುತ್ತುತ್ತಿರುವವಳು, ಇಂದು ನಿನ್ನನ್ನು ನಿರಾಳವಾಗಿ ಆಡಿಕೊಂಡಿರಲು ಬಿಟ್ಟಿದ್ದಾಳಲ್ಲ? ಬಹು ಅಚ್ಚರಿಯಾಗಿದೆಯೆ..?!” ಎಂದಳು.

ಅಮ್ಮ ಹತ್ತಿರವಿಲ್ಲದ ದುಗುಡಕ್ಕೆ ಮೊದಲ ಬಾರಿಗೊಳಗಾದ ಹಸುಗೂಸಿನಂತೆ, ತನ್ನ ಮುಂಗಾಲುಗಳನ್ನು ಮತ್ತಷ್ಟು ಮುಂದಕ್ಕೆ ತೂರಿಸಿ, ಅಹಲ್ಯೆಯ ತೊಡೆಯ ಮೇಲೆ ಸ್ವಸ್ಥವಾಗಿ ಕೂತುಬಿಟ್ಟಳು ಹರಿಣಿ, ತಾಯಿಲ್ಲದ ಹಂಗು ಕ್ಷಣಕಾಲವಾದರೂ ಮರೆಯುವ ಸುಪ್ಪತ್ತಿಗೆಯೆ ದೊರಕಿತೇನೊ ಎಂಬಂತೆ. ಅದರ ಆದರ ಪ್ರದರ್ಶಿಸಿದ ಬಗೆಗೆ ಮತ್ತಷ್ಟು ಪುಳಕಿತಳಾದವಳಂತೆ ಅದನ್ನು ಮತ್ತಷ್ಟು ಬಿಗಿಯಾಗಿ ಅಪ್ಪಿ ಹಣೆಗೊಂದು ಹೂ ಮುತ್ತನಿರಿಸಿ, ಹತ್ತಿರದಲಿದ್ದ ಹುಲ್ಲು ಗರಿಕೆಯ ಪುಟ್ಟ ಕಂತೆಯೊಂದನ್ನು ಎಡಗೈಯಿಂದಲೆ ಹತ್ತಿರಕೆಳೆದುಕೊಂಡು ಅದರ ಬಾಯಿಗೆ ಹಿಡಿದಳು ಅಹಲ್ಯೆ. ಜಗದ ಚಿಂತೆಯೆಲ್ಲ ಮರೆತವಳಂತೆ ಅವಳ ಕೈಯ ಹುಲ್ಲನ್ನು ಮೆಲ್ಲ ತೊಡಗಿದ ಹೊತ್ತಲೆ ಹತ್ತಿರದ ಪೊದೆ ಸರಿದಾಡಿದ ಸದ್ದಾದಾಗ, ಅಲ್ಲಿಂದ ಹೊಳೆದ ಫಳಫಳ ಕಣ್ಣುಗಳು, ಅಹರ್ನಿಶಿಯದೇ ಎಂದು ಸುಲಭವಾಗಿ ಕಂಡು ಹಿಡಿದುಬಿಟ್ಟವು, ಅಹಲ್ಯೆಯ ಆ ಚುರುಕಾದ ಅನುಭವಿ ಕಣ್ಣುಗಳು.

“ಅಕೋ, ನೋಡಲ್ಲಿ…ನಿನ್ನಮ್ಮ ಆಗಲೆ ಬಂದುಬಿಟ್ಟಳು. ನಿಜಕ್ಕು ಅದೆಲ್ಲಾದರು ಹೋಗಿದ್ದಳೊ ಅಥವಾ ನಿನ್ನನ್ನು ಆಟವಾಡಿಸಲು ಇಲ್ಲೆ ಎಲ್ಲಾದರೂ ಅವಿತಿದ್ದಳೊ ನಾಕಾಣೆ..ಹೋಗು, ನಿನ್ನ ಮುದ್ದಿನಬ್ಬೆಯ ಮಡಿಲಿಗೆ..’ ಎಂದು ಅದರ ಬೆನ್ನನ್ನು ಸವರುತ್ತಿದ್ದ ಕೈ ಮೇಲೆತ್ತಿಕೊಂಡವಳೆ, ತನಗೆ ತಾನೆ ಹೇಳಿಕೊಳ್ಳುವವಳಂತೆ ‘ಯಾಕಿನ್ನೂ ಗೌತಮನ ಸುಳಿವೆ ಇಲ್ಲವಲ್ಲಾ, ಇಂದು? ಏಕೆ ತಡವಾಯಿತೊ ಕಾಣೆನೆ?’ ಎಂದು ಅಲವತ್ತುಗೊಳ್ಳತೊಡಗಿದಳು..

ಅವಳ ಮಾತು ಮುಗಿಯುವ ಮುನ್ನವೆ, ಅವಳ ಮಡಿಲಿಂದ ಚಂಗನೆ ಎಗರಿದ ಹರಿಣಿ, ಅಹರ್ನಿಶಿಯತ್ತ ಓಡಿ ತಾಯಿಯ ಮೈ ನೆಕ್ಕತೊಡಗಿದಳು. ಅ ಕಕ್ಕುಲತೆಯನ್ನು ನೋಡಿ ನಕ್ಕು ಕರಗಿ ಮರುಳಾಗಿಹೋದ ತಾಯಿ ಅಹರ್ನಿಶಿ, ಮಾತಾ ಮಮತೆಯ ಹೊನಲನ್ಹರಿಸುವವಳಂತೆ ತನ್ನ ಕಂದನ ಮೈಯನೆಲ್ಲಾ ನೆಕ್ಕತೊಡಗಿದಳು ಆಗ್ರಹಪೂರ್ಣ ಪ್ರೀತಿಯನ್ನು ಪ್ರದರ್ಶಿಸುತ್ತ. ಬಹುಶಃ ಅಹಲ್ಯೆಯ ಮಡಿಲಲ್ಲಿದ್ದ ಮಗಳನ್ನು ಕಂಡು ಅವಳಿಗೆ ಒಂದರೆಗಳಿಗೆ ಈರ್ಷೆಯಾಗಿರಲಿಕ್ಕೂ ಸಾಕು; ಆ ಅಧಿಕಾರವೆಲ್ಲ ತನಗೆ ಮಾತ್ರವೆಂಬಂತೆ ಪ್ರವರ್ತಿಸುತ್ತಿದ್ದ ಅವಳತ್ತ ಅರಿಮೆಯ ಕಿರುನಗೆಯೊಂದನ್ನು ಬೀರುತ್ತ ಮೇಲೆದ್ದಳು ಅಹಲ್ಯೆ, ತನ್ನ ಕೈಲಿದ್ದ ಹುಲ್ಲಿನ ಕಂತೆಯನ್ನು ಅಹರ್ನಿಶಿಯತ್ತ ಉರುಳಿಸುತ್ತ.

ಅಸ್ತಮಿಸಲು ಸಿದ್ದನಾಗುತ್ತಿದ್ದ ದಿನಕರ ತನ್ನೆಲ್ಲ ಪ್ರಖರತೆಯನ್ನು ಒರೆಯೊಳಗಿಟ್ಟು, ಮೃದುಲ ಕಾಂತಿಯ ಹಳದಿ ಮಿಶ್ರ ಕೆಂಪು ಕಿರಣಗಳನ್ನು ಸೂಸುತ್ತ ಬಾನೆತ್ತರದ ಗಾಢ ಗಿಡಮರದೆಲೆಗಳ ಸಂದಿನಿಂದ ಇಣುಕುತ್ತಿರುವುದನ್ನು ನೋಡಿದವಳೆ, ‘ಅರೆ, ಇಳಾದೇವೀಯೂ ತನ್ನ ಪರಿಭ್ರಮಣದ ಸುತ್ತನ್ನು ಮುಗಿಸುವ ಹವಣಿಕೆಯಲ್ಲಿದ್ದಾಳೆ, ಆದಿತ್ಯನಿಗೆ ಬೆನ್ನು ಹಾಕುತ್ತ ; ಅನಂತಾಗಸದ ಕತ್ತಲ ಗರ್ಭದತ್ತ ಮುಖ ತಿರುಗಿಸಿಕೊಂಡು ತಂಪಾಗುವ ಹುನ್ನಾರದಲ್ಲಿ ಹೊರಟಿದ್ದಾಳೆ..ಆದರೂ, ಗೌತಮ ಬರುವ ಕುರುಹು ಕಾಣುತ್ತಿಲ್ಲವಲ್ಲ? ಈ ವೇಳೆಗೆ ಅವನ ಬರುವನ್ನು ಸಾರುವ ಗಿಳಿವಂಕಗಳು, ಇನ್ನು ಮೌನದ ವ್ರತ ಹಿಡಿದೆ ಕುಳಿತಿವೆ… ಅದೋ, ಆ ಹತ್ತಿರದ ಕೊಳದಲ್ಲಿನ ಜಕ್ಕವಕ್ಕಿಗಳೂ ಸಹ ಹಗಲಿನ ಸಾಂಗತ್ಯದ ಪಾಳಿಯನ್ನು ಮುಗಿಸಿ, ಇರುಳಿನ ವಿರಹವನ್ನು ಭರಿಸಲಾರದ ಯಾತನೆಗೇನೊ ಎಂಬಂತೆ ಕಣ್ಣೀರಲಿ ಗೋಳಿಡುತ್ತ ಹೋಗಲಾರದೆ, ಇರಲೂ ಆಗದೆ ಒದ್ದಾಡುತ್ತಿವೆ… ಅವು ಬೇರಾಗುವ ಮುನ್ನವೆ ಗೌತಮನೊಡನೆ ಇಲ್ಲೆ ದಡದ ಕಲ್ಲಿನ ಮೇಲೆ ಕೂತು, ಮೈದಡವಿ ಸಮಾಧಾನಿಸುತ್ತ ಅವೆರಡನ್ನೂ ಒಟ್ಟಾಗಿ ಬೀಳ್ಕೊಡುತ್ತಿರಲಿಲ್ಲವೆ ? ಇಂದೇನಾಯ್ತೋ ಕಾಣೆನೆ ?

ಚಿಂತಾಕ್ರಾಂತಳಾಗಿ ಬಿಗಿದ ಮುಖದ ಚಿಂತೆಯ ಯಾವ ಭಾವವೂ ಹೊರಸೂಸದಂತೆ ಬಚ್ಚಿಡುವುದರಲ್ಲಿ ನಿಷ್ಣಾತಳೊ, ಅಥವಾ ಅದವಳ ಸ್ನಿಗ್ದ, ಮುಗ್ದ ಸೌಂದರ್ಯಕೆ ಪ್ರಕೃತಿದತ್ತವಾಗಿ ಬಂದ ವರವೊ – ಆ ಚಿಂತೆಯೂ ಚಿಂತನೆಯಾದಂತೆ ಹುಬ್ಬುಗಳೆರಡನ್ನೂ ಕ್ರೋಢೀಕರಿಸಿ, ಮೇಧಾವಿ ತೀಕ್ಷ್ಣಮತಿ ಹೆಣ್ಣೊಂದರ ಚಿತ್ತಾರವನ್ನು ಕೆತ್ತಿದಾಗ, ಈ ನೋಟಕ್ಕೆ ಬೆರಗಾಗಿ ತಾನೇ ಗೌತಮ ತನ್ನ ಕೈ ಹಿಡಿಯಬೇಕಾಗಿ ಬಂದ ಸಂಧರ್ಭ ನಿರ್ಮಿತವಾಗಿದ್ದು ಎಂದು ನೆನಪಾಯ್ತು – ಇದೇ ರೀತಿಯ ಸಂಜೆಯೊಂದರ ಸೂರ್ಯ ಮುಳುಗುವ ಹೊತ್ತಲ್ಲಿ..

(ಇನ್ನೂ ಇದೆ )

(Link to episode 02: https://nageshamysore.wordpress.com/2016/03/02/%e0%b2%a8%e0%b2%be%e0%b2%97%e0%b3%87%e0%b2%b6%e0%b2%ae%e0%b3%88%e0%b2%b8%e0%b3%82%e0%b2%b0%e0%b3%81%e0%b2%85%e0%b2%b9%e0%b2%b2%e0%b3%8d%e0%b2%af%e0%b2%be%e0%b2%a8%e0%b2%be%e0%b2%97%e0%b3%87%e0%b2%b6/)

00545. ಕವಡೆ ಪಗಡೆ ಬದುಕು


00545. ಕವಡೆ ಪಗಡೆ ಬದುಕು
____________________________________

   
 
ಬೆಲೆಯಿಲ್ಲದ ಕಡೆ ಬದುಕೇ ದುಸ್ತರ
ಪಗಡೆಯಾಟದಾ ದಾಳ ಕವಡೆ ತರ
ಎಸೆದರು ಬಿದ್ದರೆ ಸರಿ, ಗರ ಅವರ ತರ
ಬರದಿದ್ದರೆ ಸರಿಯಂಕೆ, ಹೀಗಳೆದು ಬೈದರ ||

ಎಸೆದಾಗ ಒರಟು, ಬಿದ್ದಾಗ ನೋವು
ಗಟ್ಟಿ ನೆಲವು ಕುಟ್ಟಿ, ತರಚುವ ಬಾವು
ನಡೆಸೊ ಕಾಯಿಗೂ ಉಂಟು, ಮೆತ್ತೆ ಹಾಸಿನ ಭಾಗ್ಯ
ಪಗಡೆ ಕವಡೆಗೆ ಯಾಕೊ, ನೋವಿನ ದೌರ್ಭಾಗ್ಯ ||

ಹಸ್ತದಲ್ಲಿ ಕೂರಬಿಡದೆ ಸ್ವಸ್ಥ, ಉರುಳಿಸುತ ಸತತ
ಮತ್ತೊಂದು ಮುಚ್ಚಿ ಸುತ್ತ, ನಡುವೆ ಉಸಿರುಗಟ್ಟಿಸುತ
ಕುಲುಕಿಸಿ, ತಿರುವಿ, ರುಬ್ಬಿ, ದಬ್ಬಿ – ಎಸೆವಾಟ ಗೊತ್ತಾ?
ನೂರಾಟ ಆಡಿದರೂ ಯಾರು ಕೇಳರು – ಸುಸ್ತಾಯ್ತಾ ? ||

ಆದರೂ ದಾಳದ ಬದುಕು, ಅಂಕಿಯಲೆ ನಗಬೇಕು
ಸವೆದರು ಸಹಿಸುತ ಜನರ, ಸಂತಸಕೆ ಕುಣಿಯಬೇಕು
ವಿಧಿಯಾಟದ ಹೆಸರಲಿ ಯಾರೊ, ಆಡಿಸುವರು ಆಟ
ಗರ ಬೀಳದ ಹೊತ್ತಲ್ಲಿ ಮಾತ್ರ, ದಾಳಕಷ್ಟೆ ಬೈದಾಟ ||

ಚೌಕಾಭಾರ ಪಗಡೆಯಾಟ, ಮನರಂಜನೆ ವಕ್ತಾರ
ಯಾಕೊ ದಾಳವಾಗಿ ಹೋದೆ ? ಎಲ್ಲರಿಗು ಸದರ
ಬೆಲೆಯಿಲ್ಲದ ಕವಡೆಯ ಬದುಕು, ನಿಕೃಷ್ಟವಾಗಿ ನಿಸ್ಸಾರ
ಏಕಿಂತ ಜನ್ಮವೊ ಶ್ರೀ ಹರಿಯೇ, ದುರಿತವಿತ್ತೇನು ಅಪಾರ ? ||

– ನಾಗೇಶಮೈಸೂರು

(first picture from Kannada Wikipedia : https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Cypraeamoneta.jpg;
Dice picture from wikipedia: https://en.m.wikipedia.org/wiki/File:6sided_dice.jpg)

0544. ಮನಸಲೆ ಮನಸಾಗುವೆ ನಾನು… (ಹೀಗೊಂದು ವಿರಹ ಪ್ರೇಮ ಗೀತೆ)


0544. ಮನಸಲೆ ಮನಸಾಗುವೆ ನಾನು…
__________________________________
(ಹೀಗೊಂದು ವಿರಹ ಪ್ರೇಮ ಗೀತೆ : ಯಾರಾದರು ಸಿನಿಮಾದವರು ಓದಿ ಚಲನ ಚಿತ್ರ ಗೀತೆಯಾಗಲು ಚೆನ್ನಾಗಿದೆಯೆಂದು ಆರಿಸಿಕೊಳ್ಳಲೆಂಬ ‘ದುರಾಸೆಯೊಡನೆ) 🙂

  
(a still from movie shiva manasulo shruti , picked from http://www.thehindu.com/multimedia/dynamic/00921/hycp12SMS-Review_AR_921391e.jpg)

ಮನಸಲೆ ಮನಸಾಗುವೆ ನಾನು, ಹೇಳು ನೀ ಹೇಗಳಿಸುವೆ ನೀನು ?
ಕನಸಲಿ ಕನಸ ಕದಿವೆನಿನ್ನು, ಕಾಣದೆ ಹೇಗಿರುವೆ ನೀನು ?
ಹೃದಯದ ಬಡಿತಕು ತಪ್ಪಿಸುವೆ, ಲಯಬದ್ದ ನಿಯಮ
ಕಾಡುವೆ ಪ್ರೀತಿಯ ಸೂರಗಲ, ಮೀರಿದರು ಸಂಯಮ || ಮನಸಲೆ ||

ತಪ್ಪೇನು ನನ್ನದೀ ಎದೆಯ, ಗಡಿಯಾರ ಸರಕು
ಅಡವಿಟ್ಟು ಕೂತಿದೆ ಕೀಲಿಯನು, ನಿನ್ನಲಿ ಹುಡುಕು
ಅರಿವಿದ್ದೊ ಇರದೆಯೊ ನೀನದರ, ಕೀ ಕೊಡುವ ಒಡತಿ
ಕಳುವಾಗಿ ಹೋಗಿದೆ ನಿನ್ನೊಳಗೆ, ಮತ್ತೆ ಸಿಗದ ರೀತಿ || ಮನಸಲೆ ||

ಕಳುವಲ್ಲ ಕಾಡಲು ನಿನ್ನನ್ನು, ತೊಡೆಯಲು ಬೇಡದ ನೋವನ್ನು
ಅರಿತರು ಅರಿಯದ ಹಾಗೇನು, ನಿನ್ನ ನಡೆಯ ಕಾನೂನು?
ಅವರಿಸಿಕೊಂಡುಬಿಡುವೆ ನಿನ್ನ, ಸಂಚು ಮಾಡೊ ಕೋಟಲೆಗೆ
ದಾರಿ ತಪ್ಪಿಸಿ ಕಂಗಾಲಾಗಿಸುತ, ನಿಲುವೆ ಸತತ ನಿನ್ನಾ ಕಾವಲಿಗೆ || ಮನಸಲೆ ||

ನೀ ಹಾಕಿ ಕುಳಿತೆ ಮನಕೆ ಬೀಗ, ನಿಂತಿದೆ ನನ್ನೆದೆ ಗಡಿಯಾರ
ನೀ ಕದವ ತೆರೆಯದೆ ಸರಾಗ, ನಡೆಯಲೆಂತು ಜೀವದ ವ್ಯಾಪಾರ
ನಾನಾಗುವೆ ಅದರ ಮುಳ್ಳ ಚಲನೆ, ನೀ ಮೌಲ್ಯದ ಅಂಕಿ ಕಣೆ
ಅಪಮೌಲ್ಯವಾಗದಂತೆ ಪರಿಗಣನೆ, ಕಾಯುವೆನೆ ನಿನ್ನಾ ನನ್ನಾಣೆ || ಮನಸಲೆ ||

ಹೇಳಲಿದೆ ಕೋಟಿ ಕೋಟಿ ಮಾತು, ಆಡದಿರುವುದೆ ಉಚಿತ
ಹೇಳದೆಲೆ ಮಾಡುವುದೆ ಒಳಿತು, ಒಳಿತಾಗುವುದು ಖಚಿತ
ಬಿಟ್ಟುಬಿಡೆ ಶಂಕೆ ಅನುಮಾನ, ಕೊಟ್ಟಷ್ಟು ಕೊಡಲಿ ವಿಧಿ
ಸಿಕ್ಕಷ್ಟು ಸಿಗಲಿ ಹಿಡಿವೆ ಬೊಗಸೆ, ಇರುವಷ್ಟು ದಿನ ಸನ್ನಿಧಿ || ಮನಸಲೆ ||

– ನಾಗೇಶ ಮೈಸೂರು

00543. ಪುನರಪಿ….


00543. ಪುನರಪಿ….
_______________________________

  
(Picture fromWikipedia : https://en.m.wikipedia.org/wiki/File:EndlessKnot03d.png)

ಪುನರಪಿ ಜನನಂ, ಪುನರಪಿ ಮರಣಂ
ಜಾತಸ್ಯ ಧ್ರುವಂ, ಮರಣಂ ಶರಣಂ
ಪುನರಪಿ ಜನನೀ, ಜಠರೇ ಶಯನಂ
ಬರದೇಕೊ ಜೊತೆ, ಗತ ನಿಚ್ಚಳ ಸ್ಮರಣಂ ||

ಸ್ವರ್ಗವೆ ಜನನಿ, ಜನ್ಮಭೂಮಿ ಇನಿದನಿ
ಜನನ ಮರಣ ನಡು-ಮಾತ್ರಾ ಮನನಿ
ಯಾಕಾಗದು ಸ್ಮೃತಿ, ಮರುಕಳಿಪ ಪ್ರತಿಧ್ವನಿ ?
ಬೀಜಾಕ್ಷರದೆ ಸೂಕ್ಷ್ಮ, ಬರೆದೊಳಗಡೆ ಧಮನಿ ||

ಜನ್ಮಾಂತರ ಜಾಡು ಬರಿ, ಕರ್ಮಾಂತರ ಜಾಡ್ಯ
ಒಳಿತು ಕೆಡಕು ತೂಗಿ, ಕರ್ಮಶೇಷಾ ಪ್ರಾರಬ್ದ
ಅಕ್ಕಸಾಲಿಯಂತೆ ಅವ, ಹಳೆ ಚಿನ್ನಾ ಕರಗಿಸಿ
ತಿಲ ಗುಲಗಂಜಿ ಮಿಗಿಸಿ, ಹಣೆಗಂಟಿಸುವ ಪ್ರಾಪ್ತಿ ||

ಭುವಿ ನಿಶ್ಚಲ ನಿಲಯಂ, ಮನು ಚಂಚಲ ಹೃದಯಂ
ಕರ್ಮಸಂಚಯದ ಬೆಡಗು, ತಪನೆ ಯಾತನೆ ಜೀವನಂ
ನಿಮಿತ್ತ ಮಾತ್ರತೆ ಹೆಗಲೆ, ನಡಿಗೆ ಪೂರ್ವಯೋಜಿತ
ಮಾಯೆ ಕ್ಷಣಚಿತ್ತ ಕ್ಷಣಪಿತ್ತ, ಅಸ್ಥಿರತೆ ಗೊಣಗಾಡಿಸುತ ||

ಜನಜನಿತ ಗುಣ ವಿಸ್ಮೃತಿ, ಜನ್ಮಪಾಕದಲದ್ದಿ ಪರಿಪಕ್ವ
ಜನ್ಮಜನ್ಮ ಸರಕಾಗಿ ಚರ, ನಿವ್ವಳ ತುಲನೆ ಪಕ್ವಾಪಕ್ವ
ಮುಕ್ತಿಯಾಗೆ ಸಂಸಾರ ಚಕ್ರ, ಮೋಕ್ಷ ದೊರಕೆ ಸುಭೀಕ್ಷ
ಸರಿ ತಪ್ಪದದೆ ಪುನರಪಿಸಿ, ಮೋದಾಮೋದದೆ ಪರೀಕ್ಷ ||

– ನಾಗೇಶ ಮೈಸೂರು

00542. ತಬ್ಬಲಿಯು ನೀನಾದೆ ಮಗನೆ…(ಪ್ರೀತಿ)


00542. ತಬ್ಬಲಿಯು ನೀನಾದೆ ಮಗನೆ…(ಪ್ರೀತಿ)
________________________________

  
(picture source : https://i.ytimg.com/vi/5dei_D5SSx8/hqdefault.jpg)

ಪ್ರೀತಿಯೇಕೊ ಆಯ್ತಲ್ಲೆ ತಬ್ಬಲಿ, ತಬ್ಬಿದಾಗ ಶಂಕೆಯಾ ಹೆಬ್ಬುಲಿ 
ಅಬ್ಬರಿಸಿ ಹಿಡಿದವೆ ಅನುಮಾನ, ಮೌನ ಬೇಟೆಯಾಡಿ ಮಾತನ್ನ
ತಬ್ಬಿದದೆ ಮನಗಳದೇಕೊ ಮುನಿಸು, ಜಾರೆಲ್ಲಿ ಹೋಯಿತವೆ ಕನಸು ?
ಯಾಕಾಯಿತು ಹೀಗೆ ಹೇಳು ? ಬಿತ್ತನೆ ಪೈರಾಗುವ ಮೊದಲೆ ಹಾಳು ?

ಕೈ ಕೈ ಹಿಡಿದು ನಡೆದಂತೆ ಜೊತೆ, ಮನಸಾಗಿತ್ತಲ್ಲ ಜೋಡಿ ಕವಿತೆ ?
ಸಾಲು ಹಾಡುವ ಮೊದಲೆ ಪದ, ಮೂಡಿ ಅನುರಣಿಸಿತ್ತೆಲ್ಲಾ ನಿನಾದ ?
ಬಂದಿತ್ತೆಲ್ಲಿಂದಲೀ ನಂಟು ಬಂಧ ? ಎಂದ ಮಾತದೇಕೀಗ ಬರಿ ನಿಶ್ಯಬ್ದ ?
ಬಾಂಧವ್ಯದ ಬಾಂದಳದಲೀಗ, ಯಾಕೆ ಬರಿ ಬಂಧನದ ಹಿಂಸ ರಾಗ ?

ಅತಿಯಾದ ಪ್ರೀತಿಯವತಾರ , ರೂಪು ತಾಳಿತ್ತಲ್ಲ ಜನ್ಮಾಂತರ ಪ್ರವರ
ಮಿತಿಯಿಲ್ಲದತಿಯ ಪ್ರಕಟ, ಮಾಡಲ್ಹೊರಟಿತಲ್ಲ ನಿನ್ನ ಮೆಚ್ಚಿಸುವಾಟ ?
ಅರಿವಾಗದೆ ಹೋಯ್ತು ಅತಿ ಪ್ರೀತಿ, ಉಸಿರುಗಟ್ಟಿಸುವಾ ಅದರ ರೀತಿ
ಅತಿಯಿಂದ ಮೆಚ್ಚಿಸೆ ಪ್ರವಾಹ, ಅವಸರವೆ ಬಳಲಿಸಿ ಮನ ಪ್ರಯಾಸ ..

ಇಂದರಿವಾಗುತಿದೆ ಅದರ ನೋವು, ನೀ ದೂರ ನಿಂತ ಗಳಿಗೆಯ ಕಾವು
ಬೇಕೆನಿಸಿದ ಆಸೆಯ ಬೆರಗೆ, ತಂದು ಕೂರಿಸಿದೆ ನೋಡು ಹೃದಯ ಬೇಗೆ
ತಪ್ಪಾಯಿತು ನನಗೀಗರಿವಾಯ್ತೆ, ಅರಿತಾಗ ನೀನೇಕೊ ದೂರದೆ ನಿಂತೆ
ಕೊಡಬಾರದೆ ಒಂದವಕಾಶ ? ಸರಿ ಮಾಡಿಬಿಡುವ ಮರೆಸೆಲ್ಲ ತರ ಕ್ಲೇಷ..

ತಪ್ಪಾಗದು ಮತ್ತೆ ಎಂದು, ಹೇಳಲ್ಹೇಗೆ – ಹುಟ್ಟುಗುಣದ ಪರಿ ಬಿಡದು
ಆಗಬಿಡದೆ ಪ್ರೀತಿಸುವೆ ನಿನ್ನ, ತೂಗಿ ಅಳೆದು ಅತಿಯಾಗದಂತೆ ಚಿನ್ನ
ಮಾಡಿ ತೋರಿಸುವ ಹುಚ್ಚು ಬಿಡುವೆ, ಸಹಜದಲಿ ನಿನ್ನ ಜತೆಜತೆಗೆ ಬೆರೆವೆ
ಅರಳಿಸುವೆ ಪ್ರೀತಿಯ ಕುಸುಮ, ಮುದದೆ ತಾನಾಗಿ ವಿಕಸಿಸೆ ಸಂಭ್ರಮ..

00541. ಬುಡುಬುಡುಕೆ ದಾಸ


00541. ಬುಡುಬುಡುಕೆ ದಾಸ
______________________________

ಬುಡುಬುಡುಕೆ ದಾಸ, ಸಾಕ್ನಿನ್ಸಾವಾಸ
ನೂರೆಂಟ್ತರ ವೇಷ, ಮಾಡೋಕೆ ಮೋಸ
ಒಪ್ಪತ್ಗೊಂದ್ಮಾತು, ಒತಾರೆಗೇನೆ ತೂತು
ಹಚ್ಕೊಂಡು ಆಡ್ಕೊಂಡು , ಬದ್ಕೆ ಹಾಳಾಯ್ತು ||

ಹಾಳ್ಹೊಟ್ಟೆ ಸಾವಾಸ, ಮಾಡಿಸ್ತಾ ನಾಟ್ಕಾ
ಘಂಟೆಗೊಂದ್ಗಳ್ಗೆಗೊಂದ್, ತೋರುಸ್ತಾ ಜಾತ್ಕಾ
ಮಟ್ಟಾ ಹಾಕ್ತೀನಂತ, ಹೊರಟಿದ್ದು ಗುದ್ದಾಟಕ್ಕೆ
ಗುದ್ಬಿದ್ರು ತಿದ್ಕೊಳ್ದೆ, ಬರಿ ನರಳಾಟ ಗೊರಕೆ ||

ಅವನ್ಹತ್ತೋಕೆ ಹೊರಟ, ಕಾಲೆಳ್ಯೋದೆ ಕೆಲಸ
ಹತ್ತೋಕ್ಬಿಡ್ದೆ ಕಪ್ಪೆ , ಬಾವಿಗ್ಬೀಳ್ಸೋದೆ ಪ್ರತಿ ದಿವಸ
ಅಪ್ಪಿತಪ್ಪಿ ಹತ್ತೀದೊನ್ಗೆ, ಒದಿಯೋದೆ ಸುಲಭ
ಮೇಲ್ಯಾರು ಹತ್ತದಂಗೆ, ಕಾಯ್ತಾನೆ ಕಿರುಬ ||

ಕೂತ್ಮೇಲೆ ತಳಾರ, ಬರಿ ಅವರದೆ ವ್ಯಾಪಾರ
ಮೈಮುರ್ದು ಅವ್ರಿವ್ರ್ಗೆ , ದುಡಿಯೋ ಗ್ರಾಚಾರ
ಮೂರ್ಕಾಸಿನ್ ದೋಸೆಗ್, ಆರ್ಕಾಸಿನ್ ಕೆಲ್ಸಾ
ಸಾಯೊದ್ರೊಳಗುದ್ದಾರ, ಮಾಡ್ಬೇಕ್ನಂಬ್ದೋರ ||

ಈ ದಾಸಯ್ಯನ್ಸಂತೇಲಿ, ಗೂಸಾನೆ ಜಾಸ್ತಿ
ಮಾಡ್ತಾರೆ ತಿಂದೇನೆ, ಅವರಿವರಿಗ್ ಆಸ್ತಿ
ಅನ್ಭವ್ಸೋಕು ಮನಶ್ಯಾಂತಿ, ಇಲ್ದೇನೆ ಸುತ್ಸುತ್ತಿ
ಸಿವುನ್ಪಾದ ಸೇರ್ದಾಗ್ಲು, ಪಾಪಾಪುಣ್ಯದ್ಡೋಲಿ ||

00538. ಬೆಳಕು-ತಮ, ಸಮಾಗಮ !


00538. ಬೆಳಕು-ತಮ, ಸಮಾಗಮ !
________________________

  
(picture source wikipedia : https://en.m.wikipedia.org/wiki/File:Fog_shadow_of_GGB.jpg)

ತಮದ ತುದಿ
ಬೆಳಕಿನ ತಿದಿ
ಒಂದೇ ಪರಿಧಿ –
ನೆರಳಿನ ಸರದಿ ! ||

ತಮದ ಕಪ್ಪು
ಬೆಳಕ ಬಿಳುಪು
ಎರಡೂ ಬೆಪ್ಪು –
ಮಾಡಿಸೆ ತಪ್ಪು ||

ತಮದ ತಂಪು
ಬೆಳಕ ಬಿಸುಪು
ಬೆಸುಗೆ ಹುರುಪು –
ಬೆಚ್ಚಗಾಗೆ ಅಪ್ಪು ||

ತಮವೆ ಭೀತಿ
ಬೆಳಕೆ ಪ್ರೀತಿ
ಹಚ್ಚಿಡೆ ಪ್ರಣತಿ –
ಪ್ರಣಯದ ಶಕ್ತಿ ||

ತಮದ ಅಜ್ಞಾನ
ಬೆಳಕ ಸುಜ್ಞಾನ
ನಡುವ ವಿಜ್ಞಾನ –
ಹುಡುಕಲಿ ಮನ ||

00537. ಸಣ್ಣ ಕಥೆ :ಇಪ್ಪತ್ತೊಂದನೆ ಕೋಳಿ ಮೊಟ್ಟೆ…


00537. ಸಣ್ಣ ಕಥೆ :ಇಪ್ಪತ್ತೊಂದನೆ ಕೋಳಿ ಮೊಟ್ಟೆ…
_____________________________________

  
(picture from http://www.letstalkagric.com/wp-content/uploads/2016/01/hatching.jpg)

ಶಂಕರ ತೀರಾ ಖುಷಿಯಿಂದ ಬೀಗುತ್ತಿದ್ದ, ಅಕ್ಕಿಯ ಪುಟ್ಟಿಯೊಳಗಿನ ಅಕ್ಕಿಯ ಮೇಲೆ ಸಾಲಾಗಿ ಕೂತ ಸಣ್ಣ ಗಾತ್ರದ ನಾಟಿ ಕೋಳಿಮೊಟ್ಟೆಗಳನ್ನು ನೋಡುತ್ತ.. ಅರಳಿದ ಕಣ್ಣುಗಳಿಂದ ನೋಡುತ್ತಿದ್ದವನ ಅಚ್ಚರಿಗು ಕಾರಣವಿತ್ತು.. ಆಗಲೆ ಹತ್ತು ಬಾರಿ ಎಣಿಸಿ ನೋಡಿದ್ದಾನೆ – ಆಗಲೆ ಹದಿನಾರು ಮೊಟ್ಟೆಗಳು ಸೇರಿವೆ.. ಈ ಸಾರಿ ಸಾಕಿದ್ದು ಪರಮಾಯಿಶಿ ಕೋಳಿಯೆ ಇರಬೇಕು.. ಇನ್ನೂ ದಿನವೂ ಮೊಟ್ಟೆಯಿಕ್ಕುತ್ತಲೆ ಇದೆ.. ‘ಹೋದ ಸಾರಿಯ ಮೂದೇವಿ ಕೋಳಿ ಬರಿ ಏಳಕ್ಕೆ ಸುಸ್ತಾಗಿ ಹೋಗಿತ್ತು.. ಇದೇ ವಾಸಿ ಹದ್ನಾರಿಕ್ಕಿದ್ರು ಇನ್ನು ಜಡಿತಾನೆ ಇದೆ ಬಂಪರ ಲಾಟರಿ ತರ.. ಏನು ಇಪ್ಪತ್ತುಕ್ಕೂ ಹೋಗ್ಬಿಡುತ್ತೊ ಏನೊ ..’ ಎಂದು ಹಿರಿಹಿರಿ ಹಿಗ್ಗುತ್ತಿತ್ತು ಶಂಕರನ ಮನಸು..

ಕಳೆದ ಬಾರಿಯ ಆ ಕೋಳಿ ಸಿಕ್ಕಿದ್ದೆಲ್ಲಾ ತಿಂದು ಗಾತ್ರದಲ್ಲಿ ಯಮನಂತೆ ದಷ್ಟಪುಷ್ಟವಾಗಿದ್ದರು, ಮೊಟ್ಟೆಯಿಕ್ಕುವ ವಿಚಾರದಲ್ಲಿ ಮಾತ್ರ ತೀರಾ ಚೌಕಾಸಿ ಮಾಡಿ ನಿರಾಸೆ ಮಾಡಿಬಿಟ್ಟಿತ್ತು.. ಸಾಲದ್ದಕ್ಕೆ ಮೊಟ್ಟೆಯೊಡೆದು ಮರಿಯಾದಾಗ ಕನಿಷ್ಟ ಏಳಾದರು ಕೋಳಿ ಪುಳ್ಳೆಗಳು ಸಿಕ್ಕಿ, ಆ ಏಳೂ ದೊಡ್ಡವಾಗಿ ಇಡಿ ಕೇರಿಯ ತುಂಬಾ ಓಡಾಡಿಕೊಂಡಿರುವ ದೊಡ್ಡ ಗುಂಪನ್ನೆ ಈದುಬಿಟ್ಟಾಗ ಎರಡು ಮೂರು ಕೆಜಿ ತೂಗುವ ಪ್ರತಿ ಕೋಳಿಯು ಎಷ್ಟು ದುಡ್ಡು ತರಬಹುದೆನ್ನುವ ಲೆಕ್ಕಾಚಾರದಲ್ಲಿ ತೊಡಗಿದ್ದವನನ್ನು ಒಂದೇ ಏಟಿಗೆ ಮಕಾಡೆ ಮಲಗಿಸುವಂತೆ ಏಳರಲ್ಲಿ ಆರು ಪಿಳ್ಳೆಗಳು ತಿಂಗಳೊಪ್ಪತ್ತು ಬಾಳಾದೆ, ‘ಗೊಟಕ್’ ಎಂದು ಶಿವನ ಪಾದ ಸೇರಿಬಿಟ್ಟಿದ್ದವು.. ಮಿಕ್ಕಿದ್ದೊಂದು ಕೂಡ ಕುಂಟ ಕಾಲಿನದಾಗಿ ಹುಟ್ಟಿ ಕಾಲೆಳೆದುಕೊಂಡು ನಡೆಯುವುದನ್ನು ನೋಡುವುದೆ ಅಸಹ್ಯವೆನಿಸಿ, ಮೂಲೆ ಮನೆಯ ಪಾತಕ್ಕನಿಗೆ ಕೊಟ್ಟಷ್ಟು ಕಾಸಿಗೆ ಮಾರಿ ಕೈ ತೊಳೆದುಕೊಂಡಿದ್ದ..

ನೂರಾರು ಕೋಳಿಗಳ ಒಡೆಯನಾದಾಗ, ದಿನಕ್ಕೊಂದೆರಡು ಕೋಳಿಯಾದರೂ ಮಾರಿ ಬಂದ ಕಾಸಿಗೆ ಮೂರು ಹೊತ್ತು ಕಳ್ಳೆ ಮಿಠಾಯಿ, ಗಾಂಧಿ ಕೇಕು ತಿನ್ನಬೇಕೆಂದು ಕನಸು ಕಾಣುತ್ತಿದ್ದವನ ಆಸೆಯೆಲ್ಲ ಮಣ್ಣುಪಾಲಾಗಿ ಹೋಗಿತ್ತು. ನಯಾಪೈಸೆಗೂ ಅವ್ವನ ಹತ್ತಿರ ಗೋಗರೆಯುವ ಸ್ಥಿತಿ ಬಂದಾಗೆಲ್ಲ ಇದಕ್ಕೆಲ್ಲ ಕಾರಣ ಆ ಬದುಕದೆ ಹೋದ ಕೋಳಿಪಿಳ್ಳೆಗಳೆ ಎಂದೆನಿಸಿ ದಿನವೂ ಅವುಗಳಿಗೆ ಹಿಡಿಶಾಪ ಹಾಕಿಕೊಂಡೆ ಕಳೆದಿದ್ದ. ‘ಮೊಟ್ಟೆಗೆ ನಾಕಾಣಿ ಕೊಡ್ತೀನಿ, ನಾಟಿ ಕೋಳಿ ಮೊಟ್ಟೆ ನನಗೆ ಮಾರಿಬಿಡೊ…’ ಎಂದ ಸೀತಕ್ಕನಿಗು ‘ ಹೋಗಕ್ಕೊ, ಹೋಗು ನಾನೊಲ್ಲೆ… ದೊಡ್ಡದಾಗ್ಲಿ ಬೇಕಾದ್ರೆ ಆಮೇಲೆ ಇಡಿ ಕೋಳಿನೆ ಕೊಳ್ಳೊವಂತೆ…’ ಅಂತ ಧಿಮಾಕು ಮಾತು ಆಡಿದ್ದವನಿಗೆ ‘ಯಾಕ್ಲಾ ? ನಾ ಮೊಟ್ಟೆ ಕೇಳ್ದಾಗ್ಲೆ ಕೊಟ್ಟಿದ್ರೆ ಆಯ್ತಿರ್ಲಿಲ್ವಾ? ಈಗ ನಿಂಗು ಇಲ್ಲ ನಂಗು ಇಲ್ಲ ಅನ್ನೊ ಹಾಗೆ ‘ಗೊಟಕ್’ ಅನಿಸಿಬಿಟ್ಟೆಯಲ್ಲಾ?’ ಎಂದು ಹಂಗಿಸಿದಾಗಂತು ನಾಚಿಕೆ ಅವಮಾನದಿಂದ ತಲೆ ತಗ್ಗಿಸುವಂತಾಗಿ ವಾರಗಟ್ಟಲೆ ಅವಳ ಕಣ್ಣಿಗೇ ಬೀಳದಂತೆ ಅಡ್ಡಾಡಿದ್ದ.. ಆ ಕ್ಯಾಣಕ್ಕೆ ಅರ್ಧ, ಈ ಸಾರಿ ಎಲ್ಲೆಲ್ಲೊ ವಿಚಾರಿಸಿ ‘ಸ್ಪೆಷಲ್’ ಕೋಳಿಯನ್ನೆ ತಂದು ಸಾಕಿಕೊಂಡಿದ್ದ..!

ಆ ಹಿನ್ನಲೆಯಿಂದಲೆ ಈ ಬಾರಿ ಕೋಳಿಯ ಧಾರಾಳತನಕ್ಕೆ ಕುಣಿದು ಕುಪ್ಪಳಿಸುವಂತಾಗಿತ್ತು… ಸರಿಯಾದ ಹತ್ತು ಮೊಟ್ಟೆಯಿಕ್ಕಿದರು ಸಾಕು ಎಂದು ಎದುರು ನೋಡುತ್ತಿದ್ದವನಿಗೆ ಈ ಹುಲುಸಾದ ಫಸಲು ಕಂಡು ಈ ಬಾರಿ ಕನಿಷ್ಠ ಒಂದು ಹತ್ತಾದರು ಪುಳ್ಳೆಗಳು ಕಚ್ಚಿಕೊಳ್ಳಬಹುದೆಂದು ಭರವಸೆಯಾಗಿ ಮತ್ತೆ ನೂರಾರು ಕೋಳಿಗಳ ಒಡೆಯನಾದ ಕನಸು ಮತ್ತಷ್ಟು ಬಣ್ಣ ಹಚ್ಚಿಕೊಂಡು ಕಣ್ಮುಂದೆ ಕುಣಿಯತೊಡಗಿತು. ಈ ಹೊಸ ಕೋಳಿಯೇನು ಸಾಮಾನ್ಯದ್ದಾಗಿರಲಿಲ್ಲ… ದಿನವೂ ಬೆಳಗಿನ ಮೊಟ್ಟೆಯಿಕ್ಕುವ ಹೊತ್ತಿಗೆ ಸರಿಯಾಗಿ ಎಲ್ಲಿದ್ದರೂ, ತನ್ನ ಕುಕ್ಕೆಯ ಗೂಡಿನ ಹತ್ತಿರ ಬಂದು ಮೈಯೆಲ್ಲಾ ಮುದುಡಿಕೊಂಡು ತನ್ನನ್ನೆ ಕಂಬಳಿ ಹೊದ್ದಂತೆ ಕೂತುಕೊಂಡಿತೆಂದರೆ ತನ್ನ ಗುಂಪಿಗೆ ಇನ್ನೊಂದು ಮೊಟ್ಟೆ ಕೂಡಿತೆಂದೇ ಖಚಿತ ಶಂಕರನಿಗೆ – ಪಕ್ಕದಲ್ಲಿದ್ದ ಕುಕ್ಕೆಯನ್ನು ಅದರ ಮೇಲೆ ಕವುಚಿ ಹಾಕಿ, ಎದುರುಗಡೆ ಕುಕ್ಕುರುಗಾಲು ಹಾಕಿ ಕೂತುಬಿಡುತ್ತಿದ್ದ – ಅದರ ಕೆಲಸ ಮುಗಿಸಿದ ‘ಸಿಗ್ನಲ್’ ಕಾಯುತ್ತ.. ಇನ್ನೇನು ಮುಗಿಯಿತು, ಇನ್ನು ಮೊಟ್ಟೆಗಳನ್ನು ಇಕ್ಕುವುದಿಲ್ಲ ಎನ್ನುತ್ತಲೆ ಇಪ್ಪತ್ತೊಂದನೆ ಮೊಟ್ಟೆಯಿಕ್ಕಿದ ನಂತರವಷ್ಟೆ ಸುಮ್ಮನಾಯಿತು ಆ ಗತ್ತಿನ ಕೋಳಿ…!

ವಠಾರದ ಜಗುಲಿಯಿಂದ ದಿನವು ಈ ಕೋಳಿಯ ದಿನಚರಿಯನ್ನೆ ಗಮನಿಸುತ್ತಿದ್ದ ಸೀತಕ್ಕ, ‘ ಲೋ ಶಂಕ್ರಾ…ಈ ಸಾರಿನಾದ್ರೂ ನಾ ಹೇಳಿದ ಮಾತು ಕೇಳೊ… ಬೇಕಾದ್ರೆ ಮೊಟ್ಟೆಗೆ ಎಂಟಾಣಿ ಕೊಡ್ತೀನಿ.. ನನ್ನ ಮಗಳು ಬಸ್ರೊಸಗೆ, ಬಾಣಂತನಕ್ಕೆ ಅಂತ ಬಂದವ್ಳೆ.. ಅವಳಿಗೆ ನಾಡ್ಕೋಳಿ ಮೊಟ್ಟೆನೆ ಆಗ್ಬೇಕು, ಫಾರಂ ಕೋಳಿ ತೀರಾ ವಾಯು… ಹೋದ್ಸಾರಿ ತರ ಮಾಡ್ದೆ ಕೊಡೊ..’ ಅಂದಳು

ಹೋದ ಸಾರಿಯ ಅನುಭವದಿಂದ ಮೆತ್ತಗಾಗಿದ್ದ ಶಂಕರ, ಈ ಬಾರಿ ಯಾವುದೆ ಗತ್ತು ತೋರಿಸದ ಮಾಮೂಲಿ ದನಿಯಲ್ಲಿ, ‘ ಇಲ್ಲ ಕಣಕ್ಕ.. ನಾ ಎಲ್ಲಾ ಮರಿ ಮಾಡಿ ದೊಡ್ಡ ಕೋಳಿ ಗುಂಪು ಮಾಡಿ ಸಾಕ್ಬೇಕು ಅಂತ ಆಸೆ… ಇದ್ರಾಗು ಅದೆಷ್ಟು ಉಳಿತಾವೊ ಗೊತ್ತಿಲ್ಲ… ಬೇಡ ಕಣಕ್ಕ, ಇನ್ನೊಂದ್ ಸಾರಿ ನೋಡಾಣ..’ ಎಂದ

‘ ಅಯ್… ಅದ್ಯಕ್ಯಾಕ್ ಅಳ್ಮೋರೆ ಮಾಡ್ಕೊಂಡ್ ಒದಾಡ್ತಿಯೊ..? ನಾ ಏನು ಹಾಕಿದ್ದೆಲ್ಲ ಕೊಡು ಅಂತಾ ಕೇಳಿದ್ನಾ? ಹೆಂಗು ಇದು ಇಪ್ಪತ್ತೊಂದು ಮೊಟ್ಟೆ ಮಡಗೈತೆ.. ಹತ್ತು ಇಟ್ಕೊಂಡು ಮರಿ ಮಾಡ್ಕೊ, ಮಿಕ್ಕಿದ್ದು ನನಗೆ ಮಾರ್ಬಿಡು… ಅಲ್ಲಿಗೆ ಇಬ್ಬುರ್ದೂ ನಡ್ದಂಗಾಯ್ತಲ್ಲಾ..? ‘ ಎಂದು ಒಂದು ‘ಪ್ರಳಾಯಂತಕ’ ಐಡಿಯಾದ ಬೀಜ ಬಿತ್ತಿದಳು..

ಶಂಕರನಿಗೆ ‘ಹೌದಲ್ಲವಾ?’ ಅನಿಸಿ ಒಂದು ತರದ ಪ್ರಲೋಭನೆ ಶುರುವಾಯಿತು ಒಳಗೊಳಗೆ.. ಜತೆಗೆ ‘ಸೀತಕ್ಕ ಈಗಲೆ ಕಾಸು ಕೊಡ್ತಾಳೆ… ಪಿಳ್ಳೆನ ಬೆಳ್ಸಿ ದೊಡ್ಡದು ಮಾಡಿ ಮಾರೊತನಕ ಕಾಯೋ ಹಂಗಿರಲ್ಲ… ಹೇಗು ಒಂದಷ್ಟು ಮೊಟ್ಟೆ ಮರಿ ಆಗ್ದೇನು ಇರ್ಬೋದಲ್ವಾ? ಅದರ ಲೆಕ್ಕಾಚಾರದಲ್ಲೆ ಯಾಕೆ ಮಾರ್ಬಾರದು?’ ಅನಿಸಿ ಆಸೆಯ ಬತ್ತಿಗೆ ಎಣ್ಣೆ ಹಚ್ಚತೊಡಗಿತು. ಏನೇನನ್ನೊ ಯೋಚಿಸಿ, ಆಲೋಚಿಸಿ ಹಿಂದಿನ ಅನುಭವದಿಂದ ಎಷ್ಟು ಮೊಟ್ಟೆ ಮರಿಯಾಗದೆ ಹೋಗಬಹುದು ಅಥವಾ ‘ಗೊಟಕ್’ ಅಂದು ಬಿಡಬಹುದೆನ್ನುವ ‘ಮ್ಯಾಜಿಕ್ ಫಾರ್ಮೂಲ’ ದ ಲೆಕ್ಕಚಾರ ಹಾಕಿದವನೆ, ‘ನೋಡು ಸೀತಕ್ಕ ನೀ ಮಗಳ್ಗೆ ಅಂತ ಕೇಳ್ತಿದೀಯ ಹೇಗೆ ಇಲ್ಲಾ ಅಂತ ಹೇಳ್ಲಿ ? ಆದರೆ ಹತ್ತೆಲ್ಲ ಕೊಡಕಾಗಾಕಿಲ್ಲ… ಒಂದೈದು ಕೊಡ್ತೀನಿ ನೋಡು ಬೇಕಾದ್ರೆ… ಆದ್ರೆ ಅರವತು ಪೈಸಾದಂಗೆ ಮೂರು ರೂಪಾಯಿ ಕೊಡ್ಬೇಕು… ‘ ಅಂದ..

ನಾಟಿಕೋಳಿ ಮೊಟ್ಟೆ ಬೇಕಂದ್ರೂ ಅಂಗಡೀಲಿ ಸಿಗೊಲ್ಲ ಅಂತ ಗೊತ್ತಿದ್ದ ಸೀತಕ್ಕ ‘ ಆಗಲಿ’ ಅನ್ನುವಂತೆ ತಲೆಯಾಡಿಸಿದಳು.. ಮೂಲೆಯ ಕಾಕನ ಅಂಗಡಿಯಲ್ಲಿ ಫಾರಂಕೋಳಿ ಮೊಟ್ಟೆಯೊಂದಕ್ಕೆ ಐವತ್ತು ಪೈಸೆ ಅಂತ ಗೊತ್ತಿದ್ದ ಶಂಕರ ತಾನು ಅರವತ್ತು ಪೈಸೆಯ ಹಾಗೆ ಮಾರಿದ ಜಾಣತನಕ್ಕೆ ಒಳಗೊಳಗೆ ಖುಷಿಪಟ್ಟುಕೊಂಡಿದ್ದ… ಅದಾಗಲೆ ಅವನ ಮನದಲೊಂದು ಅದ್ಭುತ ಐಡಿಯಾ ಒಂದು ಮೂರ್ತ ರೂಪ ತಾಳುತ್ತಿತ್ತು… ‘ಹೇಗೂ ಫಾರಂ ಮೊಟ್ಟೆ ಐವತ್ತು ಪೈಸೆ… ಸೀತಕ್ಕ ಕೊಟ್ಟ ಕಾಸಲ್ಲಿ ಐದು ಫಾರಂ ಕೋಳಿ ಮೊಟ್ಟೆ ತಂದು ಮಿಕ್ಕಿದ ಮೊಟ್ಟೆಗಳ ಜತೆ ಮರಿಯಾಗೊ ಹಾಗೊ ಸೇರಿಸಿಬಿಟ್ಟರೆ, ಇಪ್ಪತ್ತೊಂದು ಮೊಟ್ಟೆನು ಉಳ್ಕೊಂಡ ಹಾಗಾಗುತ್ತೆ… ಸೀತಕ್ಕ ಕೊಟ್ಟಿರೊ ಲಾಭದ ಕಾಸಲ್ಲಿ ನಾ ಬೇಕಾದಷ್ಟು ಕಳ್ಳೆ ಮಿಠಾಯಿ, ಗಾಂಧಿ ಕೇಕು ತಗೊಂಡು ತಿನ್ಬೋದು… ಕೋಳಿಗೇನು ಗೊತ್ತಾಗುತ್ತೆ ಮೊಟ್ಟೆ ತನ್ನದಾ ಇಲ್ಲಾ ಫಾರಂದಾ ಅಂತ? ಕಾವು ಕೊಟ್ಟು ಮರಿ ಮಾಡುತ್ತೆ… ನಂಗೆ ಕಾಸು ಸಿಕ್ತೂ, ಕೋಳಿ ಮರೀನು ಉಳೀತು ‘.. ಅಂದುಕೊಂಡ ಹಾಗೆ ಐದು ಫಾರಂ ಮೊಟ್ಟೆ ತಂದು ಸೇರಿಸಿಯೂ ಬಿಟ್ಟಾ ಮೊಟ್ಟೆಯ ಪುಟ್ಟಿಗೆ.. ಅವತ್ತಿನ ಕಳ್ಳೆಮಿಠಾಯಿ ಯಾಕೊ ತುಂಬಾ ರುಚಿಯೆನಿಸಿತ್ತು ಶಂಕರನಿಗೆ..!

ಗುಟ್ಟಾಗಿಡಬೇಕೆಂದಿದ್ದರು ಹೆಂಗಸರ ಬಾಯಲ್ಲಿ ಗುಟ್ಟೆಲ್ಲಿ ನಿಲ್ಲುತ್ತದೆ ? ಅದು ಹೇಗೊ ಸೀತಕ್ಕನ ಬಾಯಿಂದ ನಾಟಿಮೊಟ್ಟೆ ಮಾರಿದ ವಿಷಯ ‘ಲೀಕ್’ ಆಗಿ ಹೋಗಿತ್ತು.. ಅದರ ಮುಂದಿನ ದಿನವೆ ಪಕ್ಕದ ಬೀದಿ ಮೀನಕ್ಕ ಗೋಲಿ ಆಡುತ್ತಿದ್ದವನನ್ನು ಹಿಡಿದು, ‘ ನಾ ಎಪ್ಪತ್ ಪೈಸಾ ಕೊಡ್ತೀನಿ ನಂಗೊಂದೈದು ಮೊಟ್ಟೆ ಕೊಡೊ ಶಂಕ್ರಾ..’ ಅಂದಾಗ ಹೇಗೂ ‘ಹೊಸ ಫಾರ್ಮುಲ’ ಇದೆಯಲ್ಲಾ ಅನಿಸಿ ಹಿಂದೆ ಮುಂದೆ ನೋಡದೆ ‘ಹೂಂ’ ಅಂದುಬಿಟ್ಟಿದ್ದ.. ಕಾಕನ ಅಂಗಡಿಗೆ ಹೋಗಿ ಮತ್ತೈದು ಮೊಟ್ಟೆ , ಮಿಠಾಯಿ ಕೊಳ್ಳುವಾಗ, ‘ಏನೊ ಶಂಕ್ರ ನೀನೆ ಕೋಳಿ ಸಾಕ್ತೀಯಾ ನನ್ಹತ್ರ ಮೊಟ್ಟೆ ತೊಗೋತೀಯಾ… ಏನ್ಸಮಾಚಾರ?’ ಎಂದು ಕೀಟಲೆ ಮಾಡಿದ್ದನ್ನು ಲಕ್ಷಿಸದೆ ಓಡಿಬಂದಿದ್ದ. ಅದೇ ಲಾಜಿಕ್ಕಿನಲ್ಲಿ ಬೀದಿ ಕೊನೆಯ ದೊಡ್ಡ ಮನೆಯ ಸಿಂಗಾರಮ್ಮ ಕೂಡ, ‘ನಂಗೊಂದೈದು ಕೋಡ್ತಿಯೇನೊ ಶಂಕ್ರಾ ? ಜಾಸ್ತಿ ಕಾಸು ಕೊಡ್ತೀನಿ’ ಅಂದಾಗ ಮಾತೆ ಆಡದ ಅಷ್ಟು ದೊಡ್ಡ ಮನೆಯವರು ಸ್ವತಃ ಮಾತನಾಡಿಸಿ ಕೇಳುವಾಗ ಇಲ್ಲಾ ಅನ್ನುವುದು ಹೇಗನಿಸಿ ‘ಪ್ರಸ್ಟೀಜಿಗೆ’ ಮತ್ತೈದು ಮೊಟ್ಟೆ ಮಾರಿ ಮತ್ತೆ ಕಾಕನ ಅಂಗಡಿಗೆ ಧಾಳಿಯಿಟ್ಟಿದ್ದ.. ಈಗ ಉಳಿಯುತ್ತಿದ್ದ ಹೆಚ್ಚಿನ ಕಾಸು ಮಿಠಾಯಿಗೆ ಹೋಗುವ ಬದಲು ದೀಪಾವಳಿಗೆ ಕೊಳ್ಳಬೇಕಾದ ಪಟಾಕಿಯ ಲೆಕ್ಕಕ್ಕೆ ಜಮೆಯಾಗತೊಡಗಿತ್ತು..!

ವಿಷಯ ಹಾಗು ಅಲ್ಲಿ ಇಲ್ಲಿ ಸುತ್ತಾಡಿ ಕೊನೆಗೆ ಅವ್ವನ ಕಿವಿಗು ಬಿದ್ದು, ‘ ಏನ್ಲಾ ಶಂಕ್ರಾ..? ಊರೋರ್ಗೆಲ್ಲ ನಾಟಿಕೋಳಿ ಮೊಟ್ಟೆ ಮಾರ್ತಿದಿಯಂತೆ ? ಬೇವರ್ಸಿ ನನ್ಮಗನೆ ದಿನಾ ನಿಂಗೆ ಉಣ್ಣಕಿಕ್ಕಿ ಸಾಕಿ ಸಲಹೋಳು ನಾನು… ಅಂತಾದ್ರಾಗೆ ಮನೆಗೆ ತೊಗೊಳವ್ವಾ ತಿನ್ಕೊ ಅಂತ ಒಂದೈದು ಮೊಟ್ಟೆ ಕೊಡದೆ ಊರೋರ್ಗೆಲ್ಲ ದಾನ ಮಾಡ್ಕೊಂಡು ಬಂದಿದೀಯಾ.. ಮನೆಗೆ ಮಾರಿ, ಪರರಿಗೆ ಉಪಕಾರಿ ಅನ್ನೊ ಹಾಗೆ… ‘ ಎಂದು ಉಗಿದು ಉಪ್ಪಿನಕಾಯಿ ಹಾಕಿದಾಗ , ಇವಳ ಕಿವಿಗೆ ಹೇಗೆ ಬಿತ್ತು ವಿಷಯ ಅನ್ನೊ ಗೊಂದಲದ ಜೊತೆಗೆ , ಕೇಳಿದಾಗೆಲ್ಲ ಕಾಸು ಕೊಡದಿದ್ರೂ ಈಗ ಮಾತ್ರ ತರ್ಲೆ ತೆಗೀತಿದಾಳೆ ಎಂದು ಸಿಟ್ಟೆದ್ದು, ‘ ..ಸುಮ್ನೆ ಏನು ಯಾರ್ಗೂ ಕೊಟ್ಟಿಲ್ಲ ತಿಳ್ಕೊ… ಎಲ್ಲಾ ಕಾಸ್ ಕೊಟ್ಟವ್ರೆ… ನೀನು ಕಾಸ್ ಕೊಡು ನಿಂಗೂ ಮಾರ್ತೀನಿ… ಬರಿ ಒಂದು ರೂಪಾಯಿ ಒಂದು ಮೊಟ್ಟೆಗೆ…’ ಎಂದು ನೇರ ವ್ಯವಹಾರದ ಮಾತಾಡಿದ್ದ ‘ ಅವ್ವಾ ಅಂತೇನಾದ್ರೂ ಡಿಸ್ಕೌಂಟ್ ಕೊಡ್ಬೇಕಾ? ಬ್ಯಾಡ್ವಾ? ‘ ಎಂಬ ಗೊಂದಲವನ್ನು ನಿವಾರಿಸಿಕೊಳ್ಳಲಾಗದೆ..

‘ ಅಯ್ಯೊ ಪಾಪಿ ನನ್ಮಗನೆ.. ನನ್ ಹತ್ರನೆ ಕಾಸ್ ಕೇಳ್ತೀಯಾ? ಅದೂ ಒಂದ್ರೂಪಾಯ್ಗೊಂದು ?’ ಎಂದು ಮೂಲೆಯಲಿದ್ದ ಬೆತ್ತದತ್ತ ಕೈ ಹಾಕಿದ್ದನ್ನು ಕಂಡೆ ಒಂದೆ ಏಟಿಗೆ ಬಾಗಿಲಿನತ್ತ ನೆಗೆದವನೆ, ‘ ಅಯ್ಯೊ.. ಸುಮ್ಕಿರು ಧೈಯ್ಯ ಮೆಟ್ಕೊಂಡಂಗೆ ಆಡ್ಬೇಡ… ನೀ ಕೊಡ ಕಾಸು ಪಟಾಕಿಗೆ ಇಟ್ಕೊತೀನಿ… ಹಬ್ಬಕ್ಕೆ ನಿನ್ಹತ್ರ ಕೇಳೋದಿಲ್ಲ …ಅದ್ಯಾಕೆ ಇಷ್ಟೊಂದು ಎಗರಾಡ್ತಿ..?’ ಎಂದ

‘ಹಾಳಾಗೋಗು ಬಡ್ಡಿಮಗನೆ… ಹೋಗ್ಲಿ ಎಂಟಾಣೆ ಕೊಡ್ತೀನಿ ..ಮಿಕ್ಕಿದ್ದೆಲ್ಲಾ ತತ್ತಾ…’ ಎಂದವಳ ಮಾತನ್ನೂ ಲೆಕ್ಕಿಸದೆ, ‘ ಹೋಗವ್ವೊ.. ಮಾಡಿ ಮನೆ ಸಿಂಗಾರವ್ವ ಒಂದ್ರುಪಾಯಿ ಕೊಡ್ತಾರಂತೆ.. ನೀನು ಅಷ್ಟೇ ಕೊಟ್ರೆ ಕೊಡ್ತೀನಿ.. ಇಲ್ದೆ ಇದ್ರೆ ಇಲ್ಲಾ’ ಎಂದವನೆ ಓದಿ ಹೋಗಿದ್ದ…

ಹಾಗೆ ಓಡಿ ಹೋದವನ ಮೇಲೆ ಮತ್ತಷ್ಟು ಹಿಡಿಶಾಪ ಹಾಕಿಕೊಂಡು ಸುಮ್ಮನಾಗಿದ್ದಳು ಚಿಂಕರವ್ವ, ಅದು ಬಗ್ಗುವ ಅಳಲ್ಲವೆಂದು ಗೊತ್ತಿದ್ದ ಕಾರಣ… ಶಂಕ್ರ ಅಲ್ಲಿಂದ ನೇರ ಹೋದವನೆ ಮತ್ತೈದು ಮೊಟ್ಟೆಯನ್ನು ಸಿಂಗಾರವ್ವನ ಮಡಿಲಿಗೆ ಹಾಕಿ ಯಥಾ ರೀತಿ ಇನ್ನೈದು ಬಿಳಿಯ ಮಿರಮಿರ ಮಿಂಚುವ ಫಾರಂ ಕೋಳಿ ಮೊಟ್ಟೆ ತಂದು ಸೇರಿಸಿದ.. ಅಲ್ಲಿಗೆ ಹಾಕಿದ ಇಪ್ಪತ್ತೊಂದು ಮೊಟ್ಟೆಯಲ್ಲಿ ಒಂದನ್ನುಳಿದು ಮಿಕ್ಕೆಲ್ಲಾ ಫಾರಂ ಕೋಳಿಯ ಮೊಟ್ಟೆಗಳಾಗಿಹೋಗಿತ್ತು.. ಅದನ್ನೆಲ್ಲ ಒಟ್ಟುಗೂಡಿಸಿ ಕೋಳಿ ಬಂದು ಕಾವು ಕೊಡುವ ಜಾಗದಲ್ಲಿರಿಸಿ ಎದುರು ಜಗುಲಿಯ ಮೇಲೆ ಹೋಗಿ ಕೂತವನೆ ಒಂದು ಕೈಲಿ ಚಡ್ಡಿ ಜೇಬಿನಲ್ಲಿ ಸೇರಿದ್ದ ಕಾಸನ್ನು ನೇವರಿಸುತ್ತ ಕೋಳಿ ಬಂದು ಕಾವು ಕೊಡುವುದೊ ಇಲ್ಲವೊ ಎಂದು ಆತಂಕದಿಂದ ಕಾಯುತ್ತಿದ್ದ.. ಎಲ್ಲಾ ಸರಿಯಾಗಿ ನಡೆದರೆ, ಇನ್ನು ಇಪ್ಪತ್ತೊಂದು ದಿನಕ್ಕೆ ಸರಿಯಾಗಿ ತಾಯಿಕೋಳಿಯ ಕಾವಿಗೆ ಎಲ್ಲಾ ಮೊಟ್ಟೆಯೊಡೆದು ಮರಿಯಾಗಿ ಈಚೆ ಬರಬೇಕು.. ಆ ಇಪ್ಪತ್ತೊಂದನ್ನು ಬೆಳೆಸಿದರೆ ಅದರಿಂದ ಇನ್ನಷ್ಟು ಮರಿಗಳಾಗಿ ಹಾಗೆ ಮುಂದುವರೆಸುತ್ತಾ ಹೋದರೆ ದೊಡ್ಡ ಕೋಳಿ ಫಾರಂ ಮಾಡುವಷ್ಟು ಕೋಳಿಗಳಾಗಿಬಿಡುತ್ತದೆ..! ಆದರೆ ಕೋಳಿಗೆ ಮೊಟ್ಟೆ ತನ್ನದಲ್ಲ ಅಂತ ಅನುಮಾನ ಬಂದುಬಿಟ್ರೆ ಕಾವು ಕೊಟ್ಟು ಮರಿ ಮಾಡುತ್ತಾ? ಫಾರಂ ಕೋಳಿ ಬಿಳಿ ಬಣ್ಣ ನೋಡೀನೂ ಕಾವು ಕೊಡುತ್ತಾ? ಎಂದೆಲ್ಲಾ ಅನುಮಾನದಲ್ಲಿ ದಿಟ್ಟಿಸುತ್ತಿದ್ದವನಿಗೆ ಕೊನೆಗು ಕೋಳಿ ಮಾಮೂಲಿನಂತೆ ಬಂದು ತನ್ನ ರೆಕ್ಕೆಗಳನ್ನು ಬಿಚ್ಚಿ ಅಷ್ಟಗಲಕ್ಕೂ ಹರವಿಕೊಂಡು ಒಂದು ಮೊಟ್ಟೆಯೂ ಹೊರಗೆ ಕಾಣದಂತೆ, ಕಾವು ಕೊಡಲು ಕುಳಿತಾಗ ಸಮಾಧಾನದ ನಿಟ್ಟುಸಿರು ಬಿಟ್ಟಿದ್ದ… ಅಲ್ಲಿಂದಾಚೆಗೆ ದಿನವು ಆಗ್ಗಾಗ್ಗೆ ಬಂದು ಕೋಳಿ ಕಾವು ಕೊಡಲು ಕೂತಿದೆಯೊ ಇಲ್ಲವೊ, ನೋಡುವುದೆ ಒಂದು ನಿತ್ಯದ ಕೆಲಸವಾಗಿಬಿಟ್ಟಿತು ಶಂಕರನಿಗೆ..

ಅವನ ಕಾತರದಷ್ಟೆ ವೇಗವಾಗಿ ಕಾವಿಗೆ ಮರಿಗಳು ಹೊರಬರದಿದ್ದರೂ, ದಿನವೂ ತಪ್ಪದಂತೆ ಬಂದು ಕಾವು ಕೊಡುತ್ತಿದ್ದ ಕೋಳಿಯ ನಿಷ್ಠೆ ಮಾತ್ರ ಮೆಚ್ಚಿಗೆಯಾಗಿ ಹೋಗಿತ್ತು ಶಂಕರನಿಗೆ.. ಒಂದೊಂದೆ ದಿನ ಕಳೆದು ಇಪ್ಪತ್ತೊಂದನೆ ದಿನ ಬರುತ್ತಿದ್ದಂತೆ ಕೋಳಿಯಿಟ್ಟಿದ್ದ ಇಪ್ಪತ್ತೊಂದನೆ ಮೊಟ್ಟೆ ಪಕ್ವವಾಗಿ, ಅದರೊಳಗಿನ ಗೋಡೆಯನ್ನು ಭೇಧಿಸಿಕೊಂಡು ಮೊದಲ ಮರಿ ಹೊರಬಂದಾಗ ಶಂಕರನಿಗೆ ಸ್ವರ್ಗಕ್ಕೆ ಮೂರೆ ಗೇಣು ಎನ್ನುವ ಲೆಕ್ಕ… ಅವ್ವ ಅದನ್ನು ಕೈಗೆತ್ತಿಕೊಂಡು ನೋಡಿದವಳೆ ಅದಾವ ಲೆಕ್ಕಾಚಾರದಲ್ಲೊ ‘ಇದು ಯಾಟೆ ಅಲ್ಲಾ ಹುಂಜ..’ ಎಂದು ಖಚಿತ ತೀರ್ಪು ಕೊಟ್ಟರೂ, ಗುಂಪಿಗೊಂದು ಗಂಡು ಹೇಗೂ ದಿಕ್ಕಿರಬೇಕು ಅದು ಇದೇ ಆಗಲಿ ಅಂದುಕೊಂಡು ಸಮಾಧಾನ ಪಟ್ಟುಕೊಂಡ ಶಂಕರ.. ಮಿಕ್ಕವಿನ್ನು ಮೊಟ್ಟೆಯ್ಹೊಡೆದು ಹೊರಬರದಿದ್ದರೂ, ಅವು ಸ್ವಂತ ಮೊಟ್ಟೆಗಳಲ್ಲದ ಕಾರಣ ಸ್ವಲ್ಪ ಹೆಚ್ಚು ಕಾಲ ಬೇಕೇನೊ ಎಂದುಕೊಂಡವನಿಗೆ ಇಪ್ಪತ್ತೆರಡಾಗಿ, ಇಪ್ಪತ್ತ ಮೂರು ದಾಟಿ, ಇಪ್ಪತ್ತನಾಲ್ಕನೆ ದಿನವಾದರು ಅವು ಚಿಪ್ಪೊಡೆದು ಹೊರಬರುವ ಲಕ್ಷಣವೆ ಕಾಣದಾದಾಗ ಯಾಕೊ ಭೀತಿಯಾಗತೊಡಗಿತು… ಅದೂ ಸಾಲದೆನ್ನುವಂತೆ ದಿನವೂ ತಪ್ಪದೆ ಬಂದು ಕಾವು ಕೂರುತ್ತಿದ್ದ ಕೋಳಿ , ಇದ್ದಕ್ಕಿದ್ದಂತೆ ತನ್ನ ದಿನಚರಿ ಬದಲಿಸಿ ಹಗಲಿನಲ್ಲಿ ಅವುಗಳತ್ತ ಹೋಗುವುದನ್ನೆ ನಿಲ್ಲಿಸಿಬಿಟ್ಟಿತು – ಸಂಜೆಯ ಮಾಮೂಲಿ ಒಡನಾಟದ ಹೊರತಾಗಿ.. ಅಂದು ಮಾತ್ರ ಅನುಮಾನ ಬಲವಾದಂತೆನಿಸಿದ ಶಂಕರನಿಗೆ ಯಾರನು ಕೇಳುವುದೆಂದೂ ಗೊತ್ತಾಗಲಿಲ್ಲ.. ತಟ್ಟನೆ ಅಂಗಡಿ ಕಾಕನನ್ನೆ ವಿಚಾರಿಸಿದರೆ ಹೇಗೆ ಎಂದನಿಸಿ ಮಿಠಾಯಿ ಕೊಳ್ಳುವ ನೆಪದಲ್ಲಿ ಅಲ್ಲಿಗೆ ಓಡಿದ್ದ..

‘ ಕಾಕಾ… ನೀ ಮಾರ್ತೀಯಲ್ಲ ಮೊಟ್ಟೆ, ಅವನ್ನ ಮರಿನು ಮಾಡ್ಬೋದು ಅಲ್ವಾ?’ ಅಂದಾ

ಪೆದ್ದನನ್ನು ನೋಡುವಂತೆ ನೋಡಿ ಕಿಸಕ್ಕನೆ ನಕ್ಕ ಕಾಕ, ‘ ಅದೆಲ್ಲಾಯ್ತುದೆ ? ಫಾರಂ ಕೋಳಿ ಮೊಟ್ಟೆ ಅಪ್ಪಿ ತಪ್ಪಿ ಶಾಖಕ್ಕೆ ಮರಿ ಆಗ್ದೆ ಇರಲಿ ಅಂತ ಫಾರಂನಲ್ಲೆ ಪಿನ್ನು ಚುಚ್ಚಿ ಸಣ್ಣ ತೂತಾ ಮಾಡಿ ಕಳಿಸಿಬಿಟ್ಟಿರ್ತಾರಲ್ಲ? ತೂತು ಬಿದ್ಮೇಲೆ ಅಬಾರ್ಶನ್ ಮಾಡಿದಂಗೆ ಅಲ್ವೇನೊ ಗುಗ್ಗು ? ಮರಿ ಹೆಂಗಾಗುತ್ತೆ? ‘ ಎಂದು ತನ್ನ ಆ ವಿಷಯದ ಮೇಲಿದ್ದ ‘ಸ್ಪೆಷಲ್’ ಧ್ಯಾನವನ್ನು ತೋರಿ ಹಲ್ಲು ಕಿರಿದಿದ್ದ . ಅದೆ ಬಿರುಸಲ್ಲಿ, ‘ ನನ್ಹತ್ರ ಅಷ್ಟೊಂದು ಮೊಟ್ಟೆ ತೊಗೊಂಡು ಹೋಗಿದ್ದು , ಮರಿ ಮಾಡೋಕಲ್ಲಾ ತಾನೆ? ‘ ಎಂದು ಅವಹೇಳನ ಅಪಹಾಸ್ಯದ ನಗೆ ನಗತೊಡಗಿದ.

ಶಂಕರನಿಗೆ ಏನು ಹೇಳಲೂ ತೋಚಲಿಲ್ಲ… ಏನಾಗುತ್ತಿದೆಯೆಂದೂ ಅರಿವಾಗದಷ್ಟು ಅಯೋಮಯ ಮಯಕ ಆವರಿಸಿಕೊಂಡಂತಾಗಿತ್ತು… ಐದು ಹತ್ತಿರಲಿ, ಒಂದೆ ಒಂದು ಗಂಡು ಕೋಳಿ ಬಿಟ್ಟರೆ ಮಿಕ್ಕೇನು ಇರದು ಎನ್ನುವುದನ್ನು ನಂಬಿ ಜೀರ್ಣಿಸಿಕೊಳ್ಳಲೆ ಕಷ್ಟವಾಗಿತ್ತು.. ಯಾವುದಕ್ಕು ಮತ್ತೆ ಹೋಗಿ ನೋಡುವುದು ಸರಿಯೆಂದು ಮನೆಯತ್ತ ನಡೆದರೆ, ಮೊಟ್ಟೆಯಿದ್ದ ಕೊಟ್ಟಿಗೆಯ ಕಡೆಯಿಂದ ವಾಚಾಮಗೋಚಾರ ಬೈದುಕೊಂಡು ಬರುತ್ತಿದ್ದ ಅವ್ವ ಕಾಣಿಸಿಕೊಂಡಿದ್ದಳು… ಇವನ ಮುಖ ಕಂಡವಳೆ ಪಕ್ಕಕ್ಕೆ ‘ಥೂ’ ಎಂದು ಉಗಿದವಳೆ ಒಂದೂ ಮಾತಾಡದೆ ವೇಗವಾಗಿ ನಡೆದು ಹೋದದ್ದು ಕಂಡು ಏನಾಗಿರಬಹುದೆಂದು ಗೊತ್ತಗದೆ ಒಳಗೆ ಬಂದು ಬಗ್ಗಿ ನೋಡಿದ್ದ..

ಅಲ್ಲಿ ನೋಡಿದರೆ ಮಿಕ್ಕೆಲ್ಲಾ ಇಪ್ಪತ್ತು ಮೊಟ್ಟೆಗಳು ಕಾವಿಗೊ ಏನೊ ಅರೆಬರೆ ಚಿಪ್ಪೊಡೆದುಕೊಂಡು ತೆರೆದುಕೊಂಡಿದ್ದವು. ಅವುಗಳ ಒಳಗಿನಿಂದ ಮರಿಯ ಬದಲಿಗೆ ಕಪ್ಪು, ಬೂದು ಬಣ್ಣದ ಲೋಳೆಯಂತಹ ಘನ ಮಿಶ್ರಣವೊಂದು ಹೊರಚಾಚಿಕೊಂಡಿತ್ತು.. ಇನ್ನು ಕೆಲವು ಚಿಪ್ಪು ಒಡೆಯದೆ ಹಾಗೆ ಅನಾಥವಾಗಿ ಬಿದ್ದಿದ್ದವು…

ಅವನ್ನೆತ್ತಿ ಎಸೆಯಬೇಕೊ , ಹಾಗೆ ಬಿಡಬೇಕೊ ಅರಿವಾಗದ ಸಂದಿಗ್ದತೆಯಲ್ಲಿ ದಾರಿ ಕಾಣದೆ ಕಂಗಾಲಾದವನಂತೆ ಅವನ್ನೆ ದಿಟ್ಟಿಸಿ ನೋಡುತ್ತಾ ಜಗುಲಿಯ ಮೇಲೆ ಕುಸಿದ ಶಂಕರನ ಕಣ್ಣಲ್ಲಿ ಇದ್ದದ್ದು ನಿರಾಶೆಯೊ, ಕೋಪವೊ, ಅವಮಾನವೊ ಅರಿವಾಗದ ಗೊಂದಲ ದ್ರವರೂಪಾಗಿ ದ್ರವಿಸಿ ನಿಲ್ಲದ ಕಂಬನಿಯ ಧಾರೆಯಾಗಿ ಹರಿಯತೊಡಗಿತ್ತು..

*****************

00534.ಗುರುತ್ವ ತರಂಗ (ಗುರುತ್ವದಲೆ)


00534.ಗುರುತ್ವ ತರಂಗ (ಗುರುತ್ವದಲೆ)
_______________________________

  
(Picture source: physics world.com)

ಎರಡು ಕಪ್ಪು ಬಿಲದ ಕಥೆ ಗೊತ್ತ ?
ಬಿಲಿಯಾಂತರ ವರ್ಷದ ಹಿಂದಿನ ಮಾತು.
ಅಂತಿಂಥದ್ದಲ್ಲ, ಮೂವತ್ತು ಸೂರ್ಯರ ಗಾತ್ರ
ಅತಿ ಗುರುತ್ವಕೆ ತಲೆ ತಿರುಗಿ ತಂತಮ್ಮದೆ ಸುತ್ತ
ಗಿರಕಿ ಹೊಡೆದು ಮೋಹಕೆ ತಮ್ಮನೆ ಕಬಳಿಸುತ್ತ..

ಭೀಕರ ಅದ್ಭುತ ಗಾತ್ರ ‘ಜಿನಾರ್ಮಸ್’ ಹೆಸರು
ಸದ್ದಿನ ಉಲಿದನಿ ಬಿಲಿಯಾಂತರ ವರ್ಷದ ಫಸಲು
ಢಿಕ್ಕಿಸಿ ಕಬಳಿಸಿದ ಹೊತ್ತು ಗುದ್ದಾಟ ಕುಲುಕಾಟ ಅಪಾರ
ಎತ್ತೆತ್ತಿ ಹಾಕಿ ನುಂಗಿ ನೀರು ಕುಡಿಸೊ ಸಮಬಲ ಭೀಕರ..
ಏದುಸುರಿನಸುರಿ ಶಕ್ತಿ ಪೊಂಗು, ಗುರುತ್ವ ತರಂಗ ಗುನುಗು..

ಹಿರಿಹಿರಿ ಹಿಗ್ಗಿದವೆ ಭೌತ ಖಗೋಳ ಬಳಗ
ಬೆಳಕ ಜತೆ ಸದ್ದ ಕುರುಹು ಅನಂತ ದೂರದ ಜಗ
ಸಂಸರ್ಗ ಮಿಲನದ ಹೊತ್ತಲಿ ತೊಳಲಾಡಿದ ಅಂತರಂಗ
ಮೊದಲಪ್ಪುಗೆಗೆ ಸಿಡಿಸಿದ ಮೊದಲ ಸದ್ದೆ ಈ ತರಂಗ
ಕೊನೆಗೂ ಮುಟ್ಟಿತು ಭೂವಿಯ, ಗುರುತ್ವದತಿ ಅಲೆ ಪ್ರಖರ..

ಆಗಲಿಕ್ಕುಂಟಂತೆ ಈಗ ಕಪ್ಪು ಬಿಲದ ಗುಟ್ಟು ರಟ್ಟು
ನೋಡಿದಷ್ಟೆ ಆಲಿಸೊ ಸುಖ, ವಿಶ್ವ ಸೃಷ್ಟಿಯ ಒಗಟು
ಬೆಳಕಿನ ವೇಗದ ಘರ್ಷಣೆ, ಭೀಕರ ಘರ್ಜನೆ ಸಾಗಿಷ್ಟು ದೂರ
ಸಮ್ಮಿಲನದ ಕೊನೆಗಳಿಗೆಯ ಮೊದಲ, ದಾಖಲೆ ಸದ್ದಿನ ಪ್ರವರ
ನಿಜವಾಗಿಸಿ ಐನ್ ಸ್ಟೈನನ ಮಾತ, ಗುರುತ್ವದಲೆಗಳ ವಿಚಾರ..

ಲೀಗೊ ದರ್ಶಕ ಕೇಂದ್ರದ ಯಂತ್ರ, ಹಿಡಿದನೆ ಸದ್ದು
ಕೋಟ್ಯಾಂತರ ವ್ಯಯಿಸಿ, ದುಡಿದ ಜನಗಣ ಸಹಸ್ರ
ಗುರುತ್ವದಲೆಗಳು ತಟ್ಟಿ ಮನೆ ಬಾಗಿಲಿನಲಿ ಹೊಸತು
ಗೊತ್ತಿರದಿದ್ದಾ ನಿಗೂಢ ತೆರೆಸುವ ಕೀಲಿ ಕೈ ಮಾತು
ಪಿಸುಗುಟ್ಟೆ ಬ್ರಹ್ಮಾಂಡವಲ್ಲೆಲ್ಲೊ ಎದೆಬಡಿತ ಧರಣಿಯಲೊ..!

00528. ಏನು ಗೊತ್ತಾ, ವಿಷಯ..?


00528. ಏನು ಗೊತ್ತಾ, ವಿಷಯ..? 
___________________________

   
(photo source wikipedia – https://en.m.wikipedia.org/wiki/File:Leonid_Pasternak_-_The_Passion_of_creation.jpg)

ನಿನಗೊಂದು ವಿಷಯಾ ಗೊತ್ತಾ ..
ಈಚೆಗ್ಯಾಕೊ ಏನೂ, ಸರಿ ಬರೀತಿಲ್ಲಾ ಚಿತ್ತ.
ಬುಳಬುಳ ಜೊಂಪೆ ಬರ್ತಿತ್ತಲ್ಲ ಎಲ್ಲಾ..?
ಯಾಕೊ ಕಣಿ-ಧರಣಿ, ಕೂತಲ್ಲೆ ತಟ್ಟಿ ಬೆರಣಿ..

ಒಂದಲ್ಲ ಹತ್ತಲ್ಲ ನೂರಾರು ವಸ್ತು !
ಸಾಲುಸಾಲು ಸೀಮೆಣ್ಣೆ, ರೇಷನ್ನಿನ ಹಾಗೆ..
ನಿಂತಿತ್ತಲ್ಲ ಕೂಗಾಡಿ, ಜಗಳಕೆ ಬಿದ್ದ ತರ ?
ತಾ ನಾ ಮುಂದು, ಗುದ್ದಾಡಿದ್ದೆಲ್ಲಾ ನಿಶ್ಯಬ್ದ…

ಹುಟ್ಟುತ್ತೇನೊ ಚಿಲುಮೆ, ಅಕ್ಷರ ಮಣಿಯೊಡವೆ
ಪದಪದವಾಗೊ ಮೊದಲೆ, ಯಾಕೊ ಒಲ್ಲದ ಮದುವೆ.
ತಟ್ಟಂತೇನೊ ಬೆಟ್ಟ, ಕುಸಿದಂತೆ ಮನೆ ಮಾಡು
ಪದಗಳವಕವಕೆ ಜಗಳ, ಹುಟ್ಟೊ ಮೊದಲೆ ಹಾಡು..

ಹುಟ್ಟಿದ್ದೂ ಹಸುಗೂಸು, ಮೀರಲೊಲ್ಲ ಬಾಲ್ಯ
ಬೆಳೆಯೊ ಕೂಸಿಗು ಹುಟ್ಟಲೆ, ಏನೊ ಅಂಗವೈಕಲ್ಯ..
ಹೆತ್ತ ಹೆಗ್ಗಣ ಮುದ್ದಿಗೆ, ಕಟ್ಟಿದರು ತೋರಣ ಬಳಗ
ತಡವಿ ಮೇಲೆತ್ತಿ ಆದರಿಸೋಕಿಲ್ಲ, ಪುರುಸೊತ್ತಿನ ಜಗ ..

ಆದರು ಬರೆಯೊದಂತು ತಾನು, ನಿಲಿಸಿರಲಿಲ್ಲ ಚಿತ್ತ
ಯಾಕೊ ಇದ್ದಕಿದ್ದಂತೆ, ಅನಿಸಿಬಿಡುತೆಲ್ಲ ಬರಿ ವ್ಯರ್ಥ
ಹಠದಿ ಸಂಪು ಕೂತಿವೆ, ಹಾಕೆಲ್ಲ ಭಾವಕೆ ಬಿಗಿ ಬೀಗ
ಮನ ಕಳವಳ ಮಾತ್ರ ಹುಡುಕಿದೆ, ಕೀಲಿ ಸಿಕ್ಕೊ ಜಾಗ..

– ನಾಗೇಶಮೈಸೂರು

00527. ನಮ್ಮ ಸೌರ ಮಂಡಲ (ಮಕ್ಕಳಿಗೆ) 


00527. ನಮ್ಮ ಸೌರ ಮಂಡಲ (ಮಕ್ಕಳಿಗೆ) 
——————————————–

  
(picture source – wikipedia, https://en.m.wikipedia.org/wiki/File:Planets2013.svg)

ಬ್ರಹ್ಮಾಂಡದ ಅಗಣಿತ ವಿಸ್ತಾರಣೆ
ನಾವಿಹ ಸೌರವ್ಯೂಹ ಪುಟ್ಟ ಮನೆ
ಸೂರ್ಯನೆಂಬ ಸೊನ್ನೆಗಿಡಿದ ದೊನ್ನೆ
ನವಗ್ರಹಗಳ ಸುತ್ಸುತ್ತುವಾ ಬವಣೆ ||

ವಿಶ್ವದರಮನೆಗೆ ಈ ಸೂಜಿ ಮೊನೆ
ಸೌರಮಂಡಲವೊಂದ್ತರ ನಮೂನೆ
ನವ ಗ್ರಹಗಳ ಬಂಧಿಸಿದ ಸಿತಾರೆ
ಸೂರ್ಯನೆಂದರೆ ಜೀವನಕಾಧಾರೆ ||

ಗ್ರಹತಾರೆ ಕಲೆತ ಗುರುತ್ವಾಕರ್ಷಿತ
ಬಂಧಿಸುವ ಗೋಚರ ಸೆಳೆತ ಮಿಳಿತ
ಪ್ರತಿಗ್ರಹಕದರದೆ ವಲಯದುಂಗುರ
ಆವರವರುಂಗುರ ವಲಯ ಗ್ರಹಭದ್ರ ||

ಕೇಂದ್ರವೆ ಸೂರ್ಯ ಕೆಂಗಣ್ಣಿನಾರ್ಯ
ಸುಡು ಕೆಂಡದ ವಾಯ್ಗೋಳ ವೀರ್ಯ
ಕ್ಷೀರಪಥದೊಡನೆ ಸುತ್ತಿದರು ಸಾರ
ಸೌರಮಂಡಲ ಲೆಕ್ಕದಲಿದ್ದಂತೆ ಸ್ಥಿರ ||

ರವಿಗ್ಹತ್ತಿರದ ನೆಂಟರೆನೆ ಬುಧ ಶುಕ್ರ
ಅತಿ ಹತ್ತಿರ ಬುಧ ಜೀವನ ದುಸ್ತರ
ಎರಡನೆ ಸ್ತರ ಶುಕ್ರ ಫಳ ಫಳ ಥಳ
ಹೊಳೆವ ಗ್ರಹವೆಂದೆ ಪ್ರಸಿದ್ಧ ಬಹಳ ||

ಮೂರನೆಯವ ಮಂಗಳ ಕೆಂಪಂಗಳ
ಭುವಿಯ ಪಕ್ಕಕಿರುವ ಶುಭಮಂಗಳ
ನಾಲ್ಕನೆ ನೀಲಾತ್ಮ ಶ್ರೇಷ್ಠ ವಸುಂಧರ
ಹಸಿರು ನೀರು ಜೀವರಾಶಿ ನಿತ್ಯಂತರ ||

ಪೃಥ್ವಿಯ ನೆರೆ ಗ್ರಹ ಐದಾರನೆ ಕಕ್ಷ್ಯ
ಗುರು ಶನಿ ಸಹವಾಸ ಮುಂದಿನ ಲಕ್ಷ್ಯ
ಬೃಹತಾಕಾರ ಗುರು ಹತ್ತರ ಗುರುತ್ವ
ಬಳೆಯನಿಲ ತೊಟ್ಟಸುರ ಶನಿ ಕವಿತ್ವ ||

ದೂರದ ಕೆಳೆ ಬಳಗ ಏಳೆಂಟರದೆ ಜಗ
ಚಳಿ ಜ್ವರಕೆ ಯುರೆನಸು ನೆಪ್ಚೂನು ಲಾಗ
ಹಿಮ ಚಳಿ ದೂರದ ತಳಿ ರವಿ ಬೆಳಕಾಗ
ವಿಸ್ಮಯ ಕಿತ್ತು ಹೋಗದ ಬಂಧ ಸೆರೆ ಭಾಗ ||

ತಿಪ್ಪರಲಾಗ ಹಾಕಿ ಪ್ಲೂಟೊ ಕ್ಷುದ್ರಗ್ರಹವೆ
ಗ್ರಹವೆನ್ನಲೆ ಕಷ್ಟ ಪುಟ್ಟ ದೇಹಾಕಾರವೆ
ಗ್ರಹದ ವರ್ತನೆ ರವಿ ಸುತ್ತ ಆವರ್ತನೆ
ಅನುಮಾನವಿದ್ದು ಗ್ರಹವಾಗೊಂಭತ್ತನೆ! ||

ಇದೆ ಸೌರವ್ಯೂಹ ಚಿತ್ರದ ಬ್ರಹ್ಮಾಂಡ
ಅಪಾರ ಅನಂತದಲಿ ಸಾಸುವೆ ಬಿಡ !
ಗೊತ್ತಿಹ ಪರಿಮಿತಿಯಲಿಹ ಸಜೀವತೆ
ಬೇರಿಲ್ಲೆಲ್ಲು ಕಾಣದಿಹ ಜೀವ-ಜಾಲತೆ! ||

00526. ಯಾಕೊ ಯಾತನೆ ಸುಮ್ಮನೆ… (01)


00526. ಯಾಕೊ ಯಾತನೆ ಸುಮ್ಮನೆ… (01)
_______________________________
  
(picture source – http://edunderwood.com/wp-content/uploads/2010/09/suffer.jpg)

ಯಾಕೊ ಏನೊ ಯಾತನೆ
ಸಮ ಕೂತಲ್ಲಿ ನಿಂತಲ್ಲಿ
ಸರಿ ಒಂದೆ ಸಮನೆ
– ಕಾಡಿದ ಗೊನೆ ||

ಕಿತ್ತೊಂದೊಂದೆ ಹೂವನೆ
ಮುಡಿಗೇರಿಸಿ ಭಾವನೆ
ಹಣ್ಣಾಗೊ ಸಾಧನೆ
– ಕತ್ತರಿಸಿ ತೆನೆ ||

ಬೀಜವೃಕ್ಷ ನ್ಯಾಯದಲೆ
ತೆನೆಯಾಗಿ ಮೊದಲೆ
ಯಾತನೆಗೆ ಕವಲೆ
– ಅರಿವೆ ಕಪಿಲೆ ||

ಅರಿವಿದ್ದರೆ ಮುಗ್ದತೆ ತರ
ಯಾತನೆಯೆ ದೂರ
ಅರಿತಷ್ಟು ಆಳಕ್ಕೆ
– ನೋವಿನ ಗಾಳ ||

ಮೌಢ್ಯ ಮುಟ್ಟಾಳತನ
ವರವಾಗಿ ಜಾಣತನ
ಜ್ಞಾನಾರ್ಜನೆ ಕಣ
– ದುಃಖಕೆ ಮಣ ||

———————————————————-
ನಾಗೇಶ ಮೈಸೂರು
———————————————————–

00525. ಕೈ ಚೀಲಗಳೆಂಬ ವಿಶ್ವಕೋಶ – 03 (03)


00525. ಕೈ ಚೀಲಗಳೆಂಬ ವಿಶ್ವಕೋಶ – 03 (03)
_______________________________

 

  
(picture source http://www.123rf.com; http://www.123rf.com/photo_11383297_shopping-lady-with-tablet-pc-and-cloud-computing.html)

ಆಟೊ,ಬಸ್ಸು ಓಡಾಟ ಚಿಲ್ಲರೆ ಹಣ
ರೂಪಾಯಿ ನೋಟು ಕಾಸಿನ ಜಣ
ಕಾರ್ಡಲ್ಲೆ ತುಂಬಿದ್ದರು ಕಾಂಚಾಣ
ಪುಡಿಗಾಸಿರಬೇಕಲ್ಲ ತುರ್ತಿಗಣ್ಣ ||

ಗ್ಯಾಡ್ಜೆಟ್ಟು ಕಾಲ ವಯೋಧರ್ಮ
ಗಾನ ಸಂಗೀತ ಕೇಳುವ ಮರ್ಮ
ಪುಟ್ಟಾಟಿಕೆ ತರಹ ಹಾಡು ತರ
ಕಿವಿಗಚ್ಚಿದರೆ ಹೆಡ್ಪೋನೆ ಸಮರ ||

ಸ್ವಂತದ್ದೊಂದು ಆಫೀಸಿಗೊಂದು
ಇರಬೇಕು ಮೊಬೈಲಲಿ ಬಂಧು
ಕೈ ಪೋನಿರದಿದ್ದರೇ ಬದುಕೆಲ್ಲಿ
ಅಷ್ಟಿಷ್ಟು ಸಿಮ್ಕಾರ್ಡು ನುಸುಳಿ ||

ಸ್ಮಾರ್ಟು ಇರಲಿ ಬಿಡಲಿ ಮಂದಿ
ಚೀಲವಾಗಿ ಸದಾ ತೋಳ-ಬಂಧಿ
ಏನೆಲ್ಲ ಇರಬಹುದಾದ ಭಾಷ
ತೆರೆ ವ್ಯಕ್ತಿ ವೈಯಕ್ತಿಕ ವಿಶ್ವಕೋಶ ||

– ನಾಗೇಶ ಮೈಸೂರು

00524. ಕೈ ಚೀಲಗಳೆಂಬ ವಿಶ್ವಕೋಶ – 02(03)


00524. ಕೈ ಚೀಲಗಳೆಂಬ ವಿಶ್ವಕೋಶ – 02(03)
____________________________________
  
(picture source – http://www.123rf.com/photo_21381305_woman-looking-for-something-in-her-purse.html)

ಒಂದಷ್ಟು ಕಾರ್ಡುಗಳ ತಲಕಾಡು
ಕ್ರೆಡಿಟ್ಟು ಡೆಬಿಟ್ಟು ಬ್ಯಾಂಕು ನೋಡು
ಗುರುತಿನಟ್ಟೆ ಐಡೆಂಟಿಟೀ ಕಾರ್ಡು
ಮೆಂಬರುಶಿಪ್ಪು ಡಿಸ್ಕೌಂಟು ಜಾಡು ||

ದೇವರ ಚಿಕ್ಕ ಚಿತ್ರಪಟ ಭಕ್ತಿಗುಟ್ಟ
ಒಣ ಹೂ ಪ್ರಸಾದ ಪೊಟ್ಟಣ ಕಟ್ಟ
ಭಕ್ತಿಯ ಕುಂಕುಮಕೆ ಅಂಟು ಬಿಂದಿ
ಆಸ್ತಿಕ ಭಾವ ಮುಡಿಪಿಡುವ ಬಂಡಿ ||

ಬೀಗದ ಕೈಗೊಂಚಲುಗಳ ಪಿಂಡಿ
ಮಾತ್ರೆ ಗಣಗಳೆ ಹಿಡಿದಂತೆ ಚಂಡಿ
ನ್ಯಾಪ್ಕಿನ್ನು ಸೇಫ್ಟಿ ಪಿನ್ನು ಇತ್ಯಾದಿ
ಹೆಸರೆ ಗೊತ್ತಿರದಿನ್ನೆಷ್ಟೋ ಯಾದಿ ||

ಕುಟುಂಬದವರ ಭಾವಚಿತ್ರಗಳು
ಪ್ರಿಯಪಾತ್ರರ ಹತ್ತಿರ ನೋಟಗಳು
ನೆಚ್ಚಿನ ನಟ ನಟಿಯರ ಪೋಟೊ
ಲಾಟರಿ ಜತೆ ಒಂದೆರಡು ಟೋಟೊ ||

– ನಾಗೇಶ ಮೈಸೂರು

00523. ಕೈ ಚೀಲಗಳೆಂಬ ವಿಶ್ವಕೋಶ – 01 (03)


00523. ಕೈ ಚೀಲಗಳೆಂಬ ವಿಶ್ವಕೋಶ – 01(03)
___________________________________

   

(picture source – http://www.123rf.com/photo_10048846_children-fashion-doll-little-girl-lipstick-makeup-in-pink-vanity-with-mirror.html & http://www.123rf.com/photo_6624275_cosmetics-isolated-on-a-white-background.html)

ಏನಿರಬಹುದೊಳಗೆನ್ನುತ ತಥಾ
ಕುತೂಹಲಕೆ ಹೆಕ್ಕಿದಳೆ ಸ್ವಗತ
ಜಂಬದ ಕೈಚೀಲ ಹಿಡಿದವಳತ್ತ
ಇಟ್ಟಿರಬಹುದೇನೇನೆಂಬ ಗಣಿತ ||

ನನಸಾಗದ ಕನಸೆ ಕನ್ನಡಿ ಗಂಟು
ಮೇಕಪ್ಪಿಗೆ ಪುಟ್ಟ ಕನ್ನಡಿಯುಂಟು
ತುಟಿ-ರಂಗು ಪೆನ್ಸಿಲ್ಲು ಮಸ್ಕಾರಕೆ
ಬ್ರಷ್ಗಳ ಜತೆ ಪೌಡರು ಗಮಗಮಕೆ ||

ಕೆನ್ನೆಗೆ ರಂಗು ತೇವಾಂಶಕೆ ಪುನುಗು
ಕೂದಲ ರಂಗು ಮದರಂಗಿ ಗುಂಗು
ಶೇಡು ಗೀಡುಗಳ ಪಾಡು ಹೆಸರಿಡು
ಸೌಂದರ್ಯವರ್ಧಕ ಸರಕ ಗೂಡು ||

ಬಳೆಗಳ ಜೊತೆ ಸರಗಳ ಸಂಗಾತಿ
ಉಗುರು ಬಣ್ಣ ಹಚ್ಚುವ ಜೊತೆಗಾತಿ
ಮೆನಿಕ್ಯುರು ಪೆಡಿಕ್ಯುರು ಸಾಧನ ಪಟ್ಟಿ
ಸಾಮಗ್ರಿಗಳ ಲೆಕ್ಕವಿಡದೆ ಒಳಗಟ್ಟಿ ||

– ನಾಗೇಶ ಮೈಸೂರು

00522. ಎಳೆ ಪ್ರಾಯದ ದಿನಗಳು…. (ಭಾಗ 02)


00522. ಎಳೆ ಪ್ರಾಯದ ದಿನಗಳು…. (ಭಾಗ 02)
—————————————————-

  
(Picture from – https://www.ric.edu/educationalstudies/images/youthDev.jpg)

ಕಾಲೇಜಿನ ಕನ್ಯೆಯರ್ಹಿಂದೆ
ಓಡಾಟ ತೆರೆಸಿದ ವಿಶ್ವ ಮುಗುದೆ
ಗೆಳೆಯ ಗೆಳತಿಯಾಗುತ ಮುಂದೆ
ಬೆಳೆಸಿದ ಫ್ರೌಡಿಮೆ ಕಾಡದೆ! ||

ಕಾಡಿ ಕೆಲಸದ ಹೆಣ್ಣೈಕಳ
ಮನೆ ಮುಸುರೆ-ಗಿಸುರೆ ತಿಕ್ಕುವವಳ
ಹಳ್ಳಿ ಭಾಷೆಗಣಕಿಸಿ ಕೋಪಕೆ ತಾಳ
ಮಿತಿ ಮಿರದಂತವಹೇಳ! ||

ಟೈಪಿಂಗು ಇನ್ಸ್ಟಿಟ್ಯೂಟಿನ
ಲಲನೆಯರನು ಕಲಿಯೆ ಹೋದನ
ಬೆರಳಚ್ಚುವಿಕೆಗೆ ಕಲಿತನ ಮರೆತನ
ಪ್ರೇಮಪತ್ರವನ್ನೆ ಬರೆದನ! ||

ಟ್ಯೂಶನ್ನಿನ ಫ್ಯಾಷನ್ನಿನಲಿಳಿ
ಪಾಠಕೆ ಬರಹ ತಾರುಣ್ಯ ಹಾವಳಿ
ಬಾವಲಿಯ ತರುಣಿ ದಂಡೆ ಬವಳಿ
ಭೂತಭವಿತ ಮರೆಸವಕಳಿ! ||

ಮಾಗಿದನುಭವ ವಯಸೆಂದೆ
ಸೇರ್ಯಾವುದೋ ಕೆಲಸದ ಮಂದೆ
ಅಲ್ಸಿಕ್ಕುವ ಮಾಗಿದ ಹೆಣ್ಣ್ಗಳ ಹಿಂದೆ
ಪಕ್ವವಾಗಿಸಿ ಮಾಗುವ ಹಂದೆ! ||

———————————————————————
ನಾಗೇಶ ಮೈಸೂರು
———————————————————————

00521. ಎಳೆ ಪ್ರಾಯದ ದಿನಗಳು…. (ಭಾಗ – 01)


00521. ಎಳೆ ಪ್ರಾಯದ ದಿನಗಳು…. (ಭಾಗ – 01)
_______________________________

  
(Picture source : Kannadamoviesinfo.wordpress.com)

ಹುಡುಗೈಕಳ ಕಾಡಿಸುತ
ರೊಚ್ಚಿಗೆಬ್ಬಿಸಿದ್ದೆ ಹುಸಿ ಛೇಡಿಸುತ
ಹುಡುಗಿಯರನೆ ಹಿಂಬಾಲಿಸುತ
ಕಾಲ ಕಳೆದ ಎಳೆ ಪ್ರಾಯ! ||

ಖಾಲಿ ಕೂತ ಗಳಿಗೆಗಳು
ಕಾಲೇಜು ಮನೆ ಚಹದಂಗಡಿಗಳು
ಕಾಲಯಾಪನೆ ಬಿಡುವ್ಹಗಲುಗಳು
ಅಕ್ಕಪಕ್ಕದ ಹಸುಗೂಸಲು! ||

ಸ್ಕೂಲ್ಹೋಗುವ ಮಕ್ಕಳಿಗೆ
ಚಾಕೊಲೇಟು ಕೊಡಿಸಿ ಮಾತಾಗೆ
ಕಾಡಿಸಿ ಛೇಡಿಸಿ ಅಳಿಸಿದ ಹಾಗೆ
ತಡಕಾಡಿ ಕಾಟ ಕೊಟ್ಟ ಬಗೆ! ||

ಚಹದಂಗಡಿ ಮಾಣಿ ಕಣಿ
ತಂದಿತ್ತ ಚಾ ಹಿಡಿದು ರೇಗಿಸಲಣಿ
ಶಾಲೆಗ್ಹೋಗದ ಬಾಲನ ಪುರವಣಿ
ಕಾಲೆಳೆದು ಹಾಸ್ಯದೇಣಿ! ||

ತುಂಡು ಸಮವಸ್ತ್ರ ತೊಟ್ಟು
ಗೆಳತಿಗೆ ಪಿಸುಗುಟ್ಟು ಗುಸುಗುಟ್ಟು
ಹೈಸ್ಕೂಲ್ಬೆಡಗಿಯದೇನಿದೆ ಸೊಟ್ಟು ?
ಹುಡುಕಲೆ ಹಿಂದೆ ಹೊರಟು! ||

———————————————————————
ನಾಗೇಶ ಮೈಸೂರು
———————————————————————

00520. ಮೇಸ್ಟ್ರು ಹೇಳಿದ್ದು ಸತ್ಯ!


00520. ಮೇಸ್ಟ್ರು ಹೇಳಿದ್ದು ಸತ್ಯ!
______________________________

ಎಳೆ ಪ್ರಾಯದಲ್ಲಿ ಸ್ಕೂಲಿಗೆ ಚಕ್ಕರು ಹಾಕಿ, ಯಾರಾರದೆ ಜತೆ ಕಟ್ಟಿಕೊಂಡು, ಎಲ್ಲೆಲ್ಲೊ ಪೋಲಿ ತಿರುಗಿ, ಏನೆಲ್ಲಾ ಧಾಂದಲೆ ಮಾಡಿಕೊಂಡು, ಸಂಜೆ ಸ್ಕೂಲು ಮುಗಿಯುವ ಹೊತ್ತಿಗೆ ಏನು ಅರಿಯದ ಹಸುಗೂಸಿನ ಹಾಗೆ ಬ್ಯಾಗಿನ ಜತೆ ಮನೆ ಸೇರುವ ಪರಿಪಾಠ ಬಹಳ ಜನರ ಅನುಭವ ಗಮ್ಯಕ್ಕೆ ಸುಲಭದಲ್ಲಿ ನಿಲುಕುವಂತಾದ್ದು – ಸ್ವಂತ ಅನುಭವದಲ್ಲಿ ಅಥವಾ ಹತ್ತಿರದಿಂದ ನೋಡಿ ಗಮನಿಸಿದ ಧೀರ ಪೋಲಿ ಗೆಳೆಯರ ಅನುಭವದಿಂದ. ಹಾಗೆ ಚಕ್ಕರು ಹಾಕಿ ಏನೆಲ್ಲಾ ಮಾಡಿದರೂ ಕಾಡುತ್ತಿದ್ದ ಪಾಪ ಪ್ರಜ್ಞ್ನೆ, ಹೆದರಿಕೆ, ಮೇಸ್ಟ್ರ ದೊಣ್ಣೆಯ ಭೀತಿ, ಫೇಲಾಗಿ ಮಾರ್ಕ್ಸ್-ಕಾರ್ಡಿನಲ್ಲಿ ದೈನ್ಯವಾಗುತ್ತಿದ್ದ ಭೀತಿ, ಭಯ- ಭಕ್ತಿ – ಇದೆಲ್ಲದರ ಸಮ್ಮೇಳನ , ಈ ಕವನ. ಎಷ್ಟೊ ಬಾರಿ ಶಿಕ್ಷಿಸುವ ಮೇಷ್ಟ್ರ ದಂಡವಿರದಿದ್ದಿದ್ದರೆ ಇನ್ನೆಷ್ಟು ಅನಾಹುತವಾಗುತ್ತಿತ್ತೊ ಏನೊ ಎಂಬ ಭಾವವು ಇಲ್ಲಿ ಬಿಂಬಿತ.

  
(Picture source from : http://www.scooppick.com/wp-content/uploads/2014/06/Bunking-Classes.jpg)

ಬೇಡಾ ಅಂದರು ಬಿಡದೆ ಹೊಡೆಸಿದೆ ಚಕ್ಕರೂ
ಎಲ್ಲೋ ಅವಿತು ಕೂತುರಿ ಗಬ್ಬಾಯ್ತು ನಿಕ್ಕರೂ
ಬೇಡವೋ ಚಕ್ಕರಿನಾಟ ಹೋಗಿ ಕಲಿವ ಪಾಠ
ಕಳ್ಳರ ತರ ಥ್ರಿಲ್ಲು ಗೊತ್ತಾದರೆ ಬೀಳೊ ಗೂಸ ||

ಆಟದ ಬಯಲು ಜಾರು ಬಂಡೆ ಗುಪ್ಪೆ ಒಳಗೆ
ಎಷ್ಟೊತ್ತು ಕೂರುವುದೊ ಬಿಸಿಲ ಜಳ ಬೇಸಿಗೆ
ಅಂಡುರಿವ ಅಕಾಲ ಕಾದ ಬಿಸಿನೆಲ ತೋಳ
ತಣ್ಣಗೆ ಕ್ಲಾಸಲಿ ಕೂರದೆ ಏನಿ ಅಲೆದಾಟಕುಲ ||

ಮೂಗಲಿ ಸುರಿ ಗೊಣ್ಣೆ ನೆನೆದೆ ಮೇಸ್ಟ್ರದೊಣ್ಣೆ
ಎಳೆದೆಳೆಯುತ ತೇಪೆಯ ಚೀಲಕೆ ಉರಿಗಣ್ಣೆ
ಜೀಬಲಿಲ್ಲ ಪುಡಿಗಾಸು ದಕ್ಕುವುದೆ ಬತ್ತಾಸು
ಯಾಕಪ್ಪ ಗೋಳು ಸ್ಕೂಲೆ ವಾಸಿ ಸತಾಯ್ಸು ||

ಎಷ್ಟುದಿನ ನಡೆಯೊ ಕಣ್ಣು ಮುಚ್ಚಾಲೆಯಾಟ
ಮೊದಮೊದಲು ಭೀತಿ ದಿನಗಳೆದಂತೆ ಆಟ
ಬರಬೇಕು ಬಯಲಿಗೆ ಒಂದಲ್ಲ ಒಂದಿನ ಸತ್ಯ
ಟೆಸ್ಟು ಪರೀಕ್ಷೆ ಫೇಲಾಗಿ ಮಾರ್ಕ್ಸ್ಕಾರ್ಡಿನಲ್ಲಿತ್ತ ||

ಕೊನೆಗೂ ಮೇಸ್ಟ್ರು ಹೇಳಿದ್ದು ಸತ್ಯದ ಮಾತು
ದನ ಕಾಯೇ ಲಾಯಕ್ಕು ಕಲಿಕೆಯಲ್ಲ ಸ್ವತ್ತು
ನಿಜ ಹೇಳಬೇಕೆಂದರೆ ಕುರಿ ಕಾಯಲು ಬರದು
ಸದ್ಯ ಮೇಸ್ಟ್ರ ದೊಣ್ಣೆ ದಯೆ ತಂದೀಸ್ಥಿತಿ ಎಳೆದು ||

– ನಾಗೇಶ ಮೈಸೂರು

00519. ನಾ ನಿಮಿತ್ತ ನೀ ನಿಮಿತ್ತ …


00519. ನಾ ನಿಮಿತ್ತ ನೀ ನಿಮಿತ್ತ…
_____________________________

ಒಂದು ರೀತಿ ಉಪದೇಶದ ಧಾಟಿಯಲ್ಲಿ ನಾವಿಲ್ಲಿ ಬರಿ ನಿಮಿತ್ತ ಮಾತ್ರರು ಎನ್ನುತ್ತಲೆ, ಸಂಸಾರ ಶರಧಿಯನು ನಿಭಾಯಿಸಲೆದುರಾಗುವ ಅಡೆತಡೆ, ಸಂಕಷ್ಟಗಳನು ಹೆಸರಿಸುತ್ತಲೆ ಅದನ್ನೆದುರಿಸೊ ಸ್ಥೈರ್ಯ ತುಂಬಿಸಲು ಯತ್ನಿಸುತ್ತ ಸಾಗುವ ಲಹರಿ. ಏನು ಮಾಡಿದರೂ, ನಾವಿಲ್ಲಿ ನಿಮಿತ್ತ ಮಾತ್ರದವರಾಗಿರುವವರು; ಎಷ್ಟೇ ತಿಣುಕಾಡಿದರೂ, ಅರಚಾಡಿದರೂ, ಅದರಿಂದಾಚೆಗೇನೂ ಮಾಡಲಾಗದ ಅಸಹಾಯಕರು. ಹೀಗಿರುವಾಗ ಸುಮ್ಮನೆ ಹೊಡೆದಾಟ ಬಿಟ್ಟು ಸಾವರಿಸಿಕೊಂಡು ಹೋಗುತ್ತ, ಎಲ್ಲರ ಮನೆಯಂತೆ ನಮ್ಮ ಮನೆ ದೋಸೆಯೂ ತೂತೆ ಎಂಬುದನರಿತು, ಪರರ ನಡುವೆ ಅಪಹಾಸ್ಯಕ್ಕೆಡೆಗೊಡದಂತೆ ಸಂಭಾಳಿಸಿಕೊಂಡು ಹೋಗುವುದೊಳಿತು ಎನ್ನುವ ಭಾವಾರ್ಥದಲಿ ಕೊನೆಗೊಳ್ಳುತ್ತದೆ.

  
(picture source: http://tse1.mm.bing.net/th?id=OIP.M1ef6b04eae07673e50fd152ffa63acdfo0&pid=15.1)

ಈ ಕವನದ ಮತ್ತೊಂದು ಪುಟ್ಟ ವಿಶೇಷವಿದೆ – ಬರಹದ ಜೋಡಣೆಯಲಿರುವ ಆಕಾರ. ಏಳು ಸಾಲಿಂದ ಆರಂಭವಾಗಿ, ಎರಡೆರಡು ಸಾಲು ಹೆಚ್ಚುತ್ತಾ ಹದಿಮೂರು ಸಾಲಿನಲ್ಲಿ ಕೊನೆಗೊಳ್ಳುತ್ತದೆ. ಈ ಎರಡು ಸಾಲಿನ ಹೆಚ್ಚಳವೂ ನಿಯಮಬದ್ಧವಾಗಿ, ತಾರ್ಕಿಕವಾಗಿ ಸಾಗುವುದರಿಂದ ತೇರು / ದೇಗುಲದ ಗೋಪುರದಾಕಾರ ಪಡೆವ ಪ್ರತಿ ಪ್ಯಾರವು ಓದುತ್ತಾ ಹೋದಂತೆಗಾತ್ರದಲ್ಲಿ ದೊಡ್ಡದಾಗುತ್ತ ಹೋಗುತ್ತದೆ – ಚಿಕ್ಕದನ್ನು ದೊಡ್ಡದು ಮಾಡುವುದು ಅಥವಾ ದೊಡ್ಡದನ್ನು ಚಿಕ್ಕದು ಮಾಡುವುದು ನಮ್ಮನಮ್ಮ ಭಾವಾನುಸರಣೆಗನುಗುಣವಾಗಿ ಎಂಬುದನ್ನು ಸಾಂಕೇತಿಸುತ್ತ.

ಒಮ್ಮೆ
ನೋಡು ನೀನಿತ್ತ,
ನಾ ನಿಮಿತ್ತ ನೀ ನಿಮಿತ್ತ;
ನಮ್ಮ ಸುತ್ತಾ ಬೆಳೆದರೂ ಹುತ್ತ
ನಾವೆಷ್ಟು ಪದರಗುಟ್ಟಿದರೂ ಅತ್ತ ಇತ್ತ
ನಿನಗೊಂದೆ ಒಂದು ಸತ್ಯ ಗೊತ್ತ?
ನಾವು ನಿಮಿತ್ತ, ಅವಗೆಲ್ಲ ಗೊತ್ತ ||

ನಾವು
ಹುಡುಕಿ ಕಾರಣ,
ಗುದ್ದಾಡಿದರು ವಿನಾಕಾರಣ
ಕಟ್ಟಿ ಕುಂಟು ನೆಪಗಳ ತೋರಣ
ಬೈದು ಹಂಚಾಡಿ ಬೈಗುಳದ ಆಭರಣ;
ಕೊಟ್ಟು ಹಿನ್ನಲೆ ಸಂಗೀತ ಮನ ತಲ್ಲಣ
ತಿಳಿಸೆ ನಿಜದೊಳಗಣ ನಿಜಗುಣ,
ರವಿಗುಂಟೊ ಮಕರ ಸಂಕ್ರಮಣ
ಜಗಳ ಕದನ ಬದುಕಿನ್ಹವಾಗುಣ ||

ಸಹಜ
ಸಂಸಾರ ಶರಧಿ,
ನಡುಕವುಟ್ಟಿಸೊ ಎಳೆ ವರದಿ
ನಾಸರಿ ನೀಸರಿಗಳ ಜಡ ಸರದಿ;
ಬಿಡದೆಲೆ ಸುರಿವ ತಪ್ಪಲೆ ಮಳೆ ಭರದಿ
ಮಳೆ ಬಿದ್ದ ಮೇಲೆ ಬೇಸತ್ತ ಇಳೆ ತೆರದಿ
ತುಂತುಳುಕಿ ಹೊಳೆ ಹಸಿರ ಭುವಿ ಗಾದಿ.
ಅನುಭೋಗ ಇಳೆ ಮಳೆ ಜಗಳದಿ
ನೆಲತಣಿದು ಪೈರಾಗೊ ತಳಹದಿ
ಫಲಿತಾಂಶ ಜನ ಮೆಚ್ಚುವ ತೆರದಿ
ಹೊರಮುಚ್ಚಿ ಒಳಬಿಚ್ಚಿ ಒಳಗುದಿ ||

ಸಂಸಾರ
ಗುಟ್ಟು ವ್ಯಾಧಿ ರಟ್ಟು.
ನಿಮಿತ್ತಗಳ ಎಳೆ ನಿಂಬೆ ಪಟ್ಟು
ಇದಮಿತ್ಥಂ ಎಂದಾದರೆ ಎಡವಟ್ಟು
ಎಳಿಬೇಕು ನಾ ಎಡಕಟ್ಟು ನೀ ಬಲಗಟ್ಟು;
ನೊಗವೆತ್ತಿ ನಡಿಬೇಕು ಎತ್ತಿನ ಸಾರೋಟು
ಅಡವಿಟ್ಟು ದುಡಿಬೇಕು ಘನತೆಗೂ ಸೌಟು,
ತೆಂಗಾಯೊಡೆದ ಮಾರಿಗಾರತಿ ತಂಬಿಟ್ಟು.
ಸಡಿಲ ವಾತಾವರಣವಾಗಿಸಿಟ್ಟು
ಹೀಗೆ ಮಾಡಬೇಕು ಇಷ್ಟ ಪಟ್ಟು,
ನಡೆಸಿ ಪೂಜೆ ವ್ರತ ಕಟ್ಟು ನಿಟ್ಟು
ಏನೆ ಮಾಡಿದರೂ ಮನಸನಿಟ್ಟು
ನಿಮಿತ್ತತೆ ನಮ್ಮ ಕಾಯೊಗುಟ್ಟು ||

– ನಾಗೇಶ ಮೈಸೂರು

00518. ಸಿಂಗಾಪುರವೆಂಬ ಕೆಂಪು ಚುಕ್ಕೆ !


00518. ಸಿಂಗಾಪುರವೆಂಬ ಕೆಂಪು ಚುಕ್ಕೆ !
___________________________________

ಬೆಂಗಳೂರಿಗೂ ಚಿಕ್ಕದಾದ, ಊರೆ ದೇಶವಾದ, ಭೂಪಠದ ಕೆಂಪು ಚುಕ್ಕೆಯೆಂದಷ್ಟೆ ಗುರುತಿಸಿಕೊಳ್ಳುವ ಸಿಂಗಪುರ, ಅಷ್ಟೆಲ್ಲ ಪರಿಮಿತಿಗಳ ನಡುವೆಯು ತಲುಪಿದ ದೂರ, ಏರಿದ ಎತ್ತರ, ಸಾಧನೆಯ ಪ್ರಖರತೆ – ಎಲ್ಲವು ಸೋಜಿಗದ, ಅತಿಶಯದ ವಸ್ತುಗಳು. ಅದರ ರೂಪವನ್ನು ಸರಳ ಶಬ್ದಗಳಲ್ಲಿ ಹಿಡಿದಿಡುವ ಯತ್ನ ಈ ಕವನದಲ್ಲಿದೆ.

  
(Picture source from wikipedia : https://en.m.wikipedia.org/wiki/File:Singapore_in_its_region_(zoom).svg)

ಭೂಮಧ್ಯ ರೇಖೆಯ
ನಡುವಿನಲೆಲ್ಲೋ ವಿಸ್ಮಯದ
ಒಂದು ಕೆಂಪು ಚುಕ್ಕೆ
ಸಿಂಗಾಪುರವೆಂಬ ಚಿಕ್ಕ ಚಕ್ಕೆ ||

ಕಾಣುವ ಪ್ರಗತಿ ಸ್ಪಷ್ಟ
ಗೋಪುರದ ತುದಿಯಂತೆ
ನಳನಳಿಸುವ ಹೊಸ ರಸ್ತೆ
ಹೂ ತುಂಬಿದ ಬೋಕೆಯಂತೆ ||

ಸರಾಸರಿ ಉಷ್ಣತೆ ದೇಶ
ಮುವ್ವತ್ತರಿಂದ ನಲವತ್ತು
ಬಾರೊ ಜನ ದೇಶ ವಿದೇಶ
ಬೆವರಿಸಿದರು ಪ್ರವಾಸಿ ಗಮ್ಮತ್ತು ||

ಹೌದು ಎಲ್ಲಡೆ ಬಿಸಿಲು
ಆಗಾಗ ಮಳೆ ಬರಲು
ವರ್ಷಪೂರ್ತಿ ಒಂದೇ ತರದ
ಹವಾಗುಣ ತೊಗಳು ||

ಶಾಪಿಂಗಿನ ಸರ್ಪ ದೋಷ
ಮೆತ್ತಿಸಿಬಿಡೊ ಮುದ್ರಾರಾಕ್ಷಸ
ಏನೆಲ್ಲಾ ಮಾರುವ ದೇಶ
ಯಾಕಪ್ಪ ರಗ್ಗು ಕಂಬಳಿ ದಿವಸ ||

ಬೆಚ್ಚನೆ ಕೋಟು ಸ್ವೆಟರುಗಳು
ಜಾಕೆಟ್ಟು ಬೆಡ್ಶೀಟು ಸೇಲು
ಈ ಬಿಸಿಲಿಗೆಕಪ್ಪ ಬೆಚ್ಚನೆ ದಿರಿಸು
ಅಚ್ಚರಿಯೇಕೆ ಇಲ್ಲೂ ಚಳಿ ಕಾಲು ||

ಅದರದು ಹೊರ ಬೀದಿ
ಮುಗಿಲು ರವಿಗಳ ರಾಜ್ಯ
ಆಫೀಸು ಶಾಪಿಂಗು ಕಟ್ಟಡ
ಎಲ್ಲ ತರ ಕಾಲಕು ಭೋಜ್ಯ ||

– ನಾಗೇಶ ಮೈಸೂರು

00517. ಸಿಂಗಾಪುರದ ಚಳಿಗಾಲ


00517. ಸಿಂಗಾಪುರದ ಚಳಿಗಾಲ
_____________________________

ಸಾಮಾನ್ಯವಾಗಿ ಸಿಂಗಪುರವೆಂದರೆ ಎಲ್ಲರ ಮನಸಿನಲ್ಲಿ ಉದ್ಭವಿಸುವ ಕಲ್ಪನೆ – ಋತುಕಾಲಗಳಿಲ್ಲದ ವರ್ಷವೆಲ್ಲಾ ಒಂದೆ ಋತುಮಾನದ ಹವಾಗುಣವಿರುವ, ಸಮಭಾಜಕವೃತ್ತದ ಆಚೀಚಿನ ಬಿಸಿಲಿನ ದೇಶ. ಇಲ್ಲಿ ಸದಾ ಬಿಸಿಲು, ಹೆಚ್ಚು ಬಿಸಿಲು ಮತ್ತಷ್ಟು ಹೆಚ್ಚು ಬಿಸಿಲು; ಟಿವಿ ಪ್ರದರ್ಶನದ ನಡುವಿನ ವಾಣಿಜ್ಯ ಪ್ರಕಟಣೆ / ಜಾಹೀರಾತುಗಳಂತೆ ಆಗ್ಗಾಗ್ಗೆ ಮಳೆ – ನಿಲ್ಲುತ್ತಿದ್ದಂತೆ ಮತ್ತೆ ಬಿಸಿಲು / ಸೆಕೆಗಳ ಬೆವರೂಡಿಸುವಾಟ. ಅಂತ ಕಡೆ ಚಳಿಗಾಲದ ಮಾತೆಂದರೆ ತುಸು ಅಚ್ಚರಿಯಲ್ಲವೆ? ಆ ಕೃತಕ ಚಳಿಗಾಲ ಸಿಂಗಾಪುರದಲಿ ವರ್ಷವಿಡಿ ಹೇಗೆ ತಾಂಡವವಾಡುತ್ತದೆ ಎಂಬುದರ ಕಿರು ಪರಿಚಯ ಈ ಕವನದ ಮೂಲಕ. ಜಾಗತಿಕ ತಾಪಮಾನ ಏರಿಳಿತದ ಹಿನ್ನಲೆಯಲ್ಲಿ ಸಿಂಗಪುರದ ಹವಾಮಾನವು ಈಚಿನ ದಿನಗಳಲ್ಲಿ ಸಾಕಷ್ಟು ಏರುಪೇರಾಗಿದ್ದರೂ, ಕವನದ ಒಟ್ಟಾರೆ ಆಶಯ ಕೃತಕ ಪರಿಸರದ ಸುತ್ತ ಗಿರಕಿ ಹೊಡೆಯುವುದರಿಂದ, ಕವನದ ಪ್ರಸ್ತುತತೆಗೆ ಧಕ್ಕೆಯಾಗದೆಂಬ ಮತ್ತು ಈ ಕವನಾಸ್ವಾದನೆಗೆ ಅಡ್ಡಿಯಾಗದೆಂಬ ಅನಿಸಿಕೆ / ಭಾವದೊಂದಿಗೆ ಇಲ್ಲಿ ಪ್ರಸ್ತುತಗೊಳಿಸಲಾಗಿದೆ.

  
(picture from wikipedia: https://en.m.wikipedia.org/wiki/File:1_singapore_f1_night_race_2012_city_skyline.jpg)

ಹೆಜ್ಜೆಯಿಟ್ಟಲ್ಲೆಲ್ಲ ಉಂಟು
ಏರ್ಕಂಡಿಶನ್ನಿನ ಜತೆ ನಂಟು
ಹೊರಗೆ ಎಷ್ಟಿದ್ದರೂ ಬಿಸಿಲು
ಒಳಗೆ ಚಳಿಚಳಿ ತೆವಲು ||

ಆಫೀಸಿನಲ್ಲಿ ಕುಳಿತು ಕೆಲಸ
ಆರಂಭ ಸಹನೀಯ ವಾತ
ಕೆಲ ತಾಸು ಕಳೆದು ಮಾತರಿಶ್ವ
ಜಾಕೆಟ್ಟುಗಳ ಹೊಚ್ಚಿಸುವ ಅಶ್ವ ||

ಶಾಪಿಂಗು ಮಾಲಲು ಏಸಿ
ಬೆಚ್ಚಗಿದ್ದರೆ ತುಸು ವಾಸಿ
ಓಡಾಡುತ ಆದರು ಬಿಕನಾಸಿ
ಹೊರ ಬಂದು ಬಿಸಿಲಿಗೆ ಅರಸಿ ||

ಚಿತ್ರ ಮಂದಿರವಂತೂ ಬೇಡ
ತಂಪು ತುಂಬಿಟ್ಟ ಮೋಡ
ಹೊದಿಕೆಯಿರದೆ ಮತ್ತೆ
ನಡುಗಿ ಜ್ವರ ಬರುವ ಮಾತೆ ||

ಮನೆಗಳಲು ಏಸಿ
ಮಾಳಿಗೆಗೂ ಏಸಿ
ಜಾಗತಿಕ ಬೆಚ್ಚಗಾಗುವಿಕೆ
ಹವಾಗುಣ ಚದುರಿಸಿ ||

ಏಸಿ ಇರದಿದ್ದರೂ ಬೇಕು
ಮನೆಯಲಿ ಹೊದಿಕೆ
ಚಳಿಗಾಲ ಇರದೇ ಇದ್ದರು
ಬೇಕು ಬೆಚ್ಚಗಾಗುವಿಕೆ ||

ಹೀಗೆ ಸಿಂಗಾಪುರಕು ಬೇಕು
ದಪ್ಪ ಹೊದಿಕೆ ಮುದುರಿಕೆ
ವರ್ಷ ಪೂರ್ತಿ ನಡೆಸೋ
ದಿನ ಚಳಿಗಾಲದ ಸಿದ್ದತೆ ||

– ನಾಗೇಶ ಮೈಸೂರು

00516. ಚಾಳೀಸಿನ ಬಾಳು


00516. ಚಾಳೀಸಿನ ಬಾಳು
__________________________

ಈಗಿನ ಜಗದ ದೈನಂದಿನ ಬದುಕಿನಲ್ಲಿ ಹೆಚ್ಚೂ ಕಡಿಮೆ ಎಲ್ಲರಲ್ಲು ಕಾಣಬಹುದಾದ ಸಾಮಾನ್ಯ ಅಂಶ – ಚಾಳೀಸು ಧಾರಣೆ. ಸುಲೋಚನೆ ಅಥವ ಕನ್ನಡಕ ಧರಿಸದವರೆ ಅಪರೂಪವೆನ್ನಬಹುದಾದ ಈ ಕಾಲಧರ್ಮದ ಕುರಿತ ಛೇಡನೆ, ಈ ಜೋಡಿ ಪದ್ಯ.

ಮೊದಲದರ ಗುರಿ ಚಿಕ್ಕ ವಯಸ್ಸಿನಲ್ಲೆ ಚಾಳೀಸು ಧರಿಸುವ ಸ್ಥಿತಿಗಿಳಿದ ಮಕ್ಕಳ ಹಾಗೂ ಅದನ್ನುಂಟು ಮಾಡುವ ಪರಿಸ್ಥಿತಿಯ ಸುತ್ತ ಗಿರಕಿ ಹೊಡೆಯುತ್ತದೆ.

ಎರಡನೆಯ ಭಾಗ ವಯಸ್ಕರ ಸುತ್ತ ಗಿರಕಿ ಹೊಡೆಯುತ್ತಾ ಹಾಗೆ ಎರಡರಲ್ಲೂ ಆರು ತಿಂಗಳಿಗೆ ಪರೀಕ್ಷೆ ಮಾಡಿಸಿಕೊಳ್ಳಬೇನ್ನುವ ನಿರೀಕ್ಷೆ, ಹೆಚ್ಚೆಚ್ಚು ಬೆಲೆಯ ಹೆಚ್ಚುವರಿ ಸುವಿಧತೆಗಳ ಆಕರ್ಷಣೆಗೆ ಬಲಿಯಾಗುವ ಅನಿವಾರ್ಯತೆ ಮತ್ತು ಸುತ್ತುವರಿದ ವಾಣಿಜ್ಯತೆಗಳನ್ನು ತಟ್ಟಿಸುವ ಕವನ ಲಹರಿ ಇಲ್ಲಿದೆ.

01. ಚಾಳೀಸಿನ ಬಾಳು – ಬಾಲ್ಯಕೆ ಕಣ್ಹಾಳು!
_____________________________________

  
(picture source wikipedia : https://en.m.wikipedia.org/wiki/File:Reading-Glasses.jpg)

ಈ ಚಾಳೀಸಿನ ಬಾಳು
ಪೂರ ಮನೆ ಹಾಳು
ಮಕ್ಕಳಿಂದ ಮುದಿ ತನಕ
ಸಂಸಾರವೆ ಕನ್ನಡಕ ||

ಈಗ ಮಕ್ಕಳು ನರ್ಸರಿಗಳಲೆ
ಕಣ್ಣೇರಿಸಿ ಮರಿ ಕನ್ನಡಕ
ಬೇಡವೆಂದರು ವೀಡಿಯೋ ಟೀವಿ
ಐದಾರು ವರ್ಷಕೆ ಕಣ್ಮುದುಕ ||

ಕೂತರೆ ಹಿಂದಿನ ಬೆಂಚು
ಕಣ್ಕಾಣದ ಬೋರ್ಡು
ದೂರದಲಿ ಕಟ್ಟಿದ ಫಲಕ
ಏನೊ ಕಲಸಿದ ಬರಹ ||

ಹೆಸರಷ್ಟೇ ಸುಲೋಚನೆ
ಖರ್ಚಿನ ಆಲೋಚನೆ
ವರ್ಷಕೊಮ್ಮೆ ಟೆಸ್ಟಾರ್ಚನೆ
ಜೇಬಿನ ಕ್ಷೌರಕೆ ಕರಣೆ ||

ಒಂದೆರಡಲ್ಲ ತರ ತರ ಕವಣೆ
ಕಣ್ಣಿಗೂ ಮೀರಿ ದುಬಾರಿ ತಾನೆ
ಪ್ರೋಗ್ರೆಸ್ಸಿವ್ ಆಂಟಿಗ್ಲೇರ್ ಕೊನೆ
ಎಲ್ಲಕು ಹೆಚ್ಚಾಗುವ ಬೆಲೆ ಬವಣೆ ||

-ನಾಗೇಶ ಮೈಸೂರು
02. ಚಾಳೀಸಿನ ಬಾಳು – ವಯಸೆ ಗೋಳು
____________________________________

  
(picture source wikipedia :https://en.m.wikipedia.org/wiki/File:Szem%C3%BCveg_-_1920-as_%C3%A9vek.JPG)

ಗಂಡ ಹೆಂಡತಿ ಕಾಲೇಜಿನಲೆ
ಅಪ್ಪಿಕೊಂಡ ಕಣ್ಣ ಸುಖ
ಓದು ಬರೆಯಲು ಕೂತಾಗಲೆ
ಮುಖವಪ್ಪುತ ಕೂರೆ ಸಖ ||

ವಯಸಿನ ಲೀಲೆ ನಲವತ್ತು
ಪೇಪರು ಓದಲು ಎಡವಟ್ಟು
ಕನ್ನಡಕದಲೆ ಓದಲು ಕಷ್ಟ
ಹೊಸ ಕನ್ನಡಕದ ಸಂಕಷ್ಟ ||

ಅಪ್ಪ ಅಮ್ಮ ವಯಸಾಗಿ ಬಲು
ಕಾಣದ ದೃಷ್ಟಿಗೆ ಕನ್ನಡಕ
ವಯೋಧರ್ಮ ಮೈಮನ ನಗ್ಗಲು
ಕಣ್ಣಿನ ಜತೆಗೆ ದನಿ ನಡುಕ ||

ಹತ್ತಿರಕೊಂದು ದೂರಕೊಂದು
ಕಂಪ್ಯುಟರಿಗೆ ಇನ್ನೊಂದು
ಛಾಯಾಚಿತ್ರ ಸ್ಟೈಲ್ಗಿನ್ನೊಂದು
ತಂಪಿಗುಡುಕು ಮತ್ತೊಂದು ||

ಎರಡೆರಡು ಚಾಳೀಸ ಚಾಳಿ
ಹತ್ತಿರ ದೂರ ನೋಟ ಗಾಳಿ
ಹೊಸ ತಾಂತ್ರಿಕತೆ ಧಾಳಿ
ಪ್ರೋಗ್ರೆಸ್ಸಿವಿನ ಮಹಾಕಾಳಿ ||

ಹೀಗೆ ಚಾಳೀಸಿನ ಬಾಳು
ಎಲ್ಲ ಮನೆ ಮನ ತೆವಲು
ಬೇಕಿರಲಿ ಬಿಡಲಿ ಕೊನೆಗೆ
ಕಣ್ಣಿನ ಟೋಪಿಯ ಹಾಗೆ ||

– ನಾಗೇಶ ಮೈಸೂರು

00514. ಮರ ಅಜರಾಮರ ! (ಮಕ್ಕಳಿಗೆ)


00514. ಮರ ಅಜರಾಮರ ! (ಮಕ್ಕಳಿಗೆ)
_____________________________

ತನ್ನ ಹಣ್ಣ ತಾನೆ ತಿನ್ನದಷ್ಟು ನಿಸ್ವಾರ್ಥಿಯಾದ ಮರ ನಿಸರ್ಗ ನಿಯಮದಂತೆ ಸಂತತಿಯನ್ನು ಬೆಳೆಸುತ್ತಾ, ಮತ್ತದೆ ನಿಸ್ವಾರ್ಥತೆಯನ್ನು ಸತತ ಮುಂದುವರೆಸುತ್ತಾ ಸಾಗುತ್ತದೆ. ಅದೆ ಹೋಲಿಕೆಯಡಿ ಮನುಜಕುಲವನ್ನು ಇರಿಸಿದರೆ ನಿಸ್ವಾರ್ಥತೆ ಶೂನ್ಯದತ್ತ ನಡೆದರೆ, ಸ್ವಾರ್ಥಪರತೆ ನೂರರತ್ತ ಸಾಗುತ್ತಿರುವ ವಿಪರ್ಯಾಸ. ಇದರ ಸಂಗ್ರಹ ಭಾವ ಈ ಕವನ.
 

ತನ್ನ ಹಣ್ಣ
ತಾನೆ ತಿನ್ನದ ಮರ
ಆಗಲು ಅಜರಾಮರ |
ಹಕ್ಕಿಗೆ ಹೆಕ್ಕಿ
ತಿನ್ನೆ ಕೊಟ್ಟು ಸದರ
ಬೀಜ ಬಿದ್ದು ಬಂದು ಹೊರ ||

ಹತ್ತಿರವಿರೆ ಬೀಜ
ಮರಕೆ ಸ್ಪರ್ಧೆ ಬಹಳ
ಹುಟ್ಟಿಸಿ ದೊಂಬಿ ಗುಂಪು ಗೊಂದಲ |
ಸಹಾಯದ ಗಾಳಿ
ಹಾರಿಸಿ ತೂರಿಸಿ ಬೀಜ
ಹೊತ್ತೊಯ್ದು ಬಿಸಾಡಿ ಗೋಜ ||

ಎಲ್ಲೋ ಬಿದ್ದು
ಒದ್ದಾಡಿದ ಬೀಜ ಮಣ್ಣು
ಹೂತರೊಳಗೆ ಆಳದ ಒಳಗಣ್ಣು |
ಎಲ್ಲಿಂದಲೊ ಮಳೆ
ಕೊಚ್ಚಿ ತರುವ ನೀರು
ಕುಡಿವ ಭುವಿ ಜತೆ ಬೀಜ ಹೀರು ||

ಟಿಸಿಲು ಬಿಸಿಲು
ಮೊಳಕೆಯೊಡೆದು ಕಾಳು
ಬೇರೊಡೆದು ಸಸಿಯಾಗೆ ದಾಪುಗಾಲು |
ಬೆಳಕು ನೀರು
ಮೊಗೆಮೊಗೆದು ಗಾಳಿ
ಸರಸರ ಸಸಿ ಬೆಳೆದು ಮಹಾಕಾಳಿ ||

ಮತ್ತದೆ ಪ್ರವರ
ಹೊಸ ಹಣ್ಣು ಬೀಜ ಸಮರ
ಹೊಸ ಸಂತತಿ ಹಬ್ಬುವ ಸಂವತ್ಸರ |
ಹೀಗೆ ನಿಸ್ವಾರ್ಥಿ ಮರ
ತನ್ನ ಹಣ್ಣ ತಾನೇ ತಿನ್ನದ ತರ
ಪರರಿಗಿತ್ತು ತನ್ನ ಸಂತತಿ ಬೆಳೆಸೆ ವರ ||

ಮಾನವ ಜೀವನ ಸಾರ
ಅಲ್ಲ ಮರದ ತರ ಎಲ್ಲಕು ದರ
ಸ್ವಾರ್ಥದ ಗರ ಆದರು ಸಂತತಿ ಸ್ವರ |
ಮರ ಮನುಜ ತರ
ನಿಸ್ವಾರ್ಥಿ ಮರ ಸಂತತಿ ಅಮರ
ಸ್ವಾರ್ಥದಲಿ ಮನುಕುಲ ದಿಗಂಬರ ||

– ನಾಗೇಶ ಮೈಸೂರು

00513. ಮಧುಮಾಲತಿ……..


00513. ಮಧುಮಾಲತಿ……..
___________________________

  

(ಫೋಟೊ: 1966 ರಲ್ಲಿ ತೆರೆಕಂಡ ಮಧುಮಾಲತಿ ಚಿತ್ರದ್ದು :https://kannadamoviesinfo.files.wordpress.com/2013/04/madhu-malathi-1966.jpg?w=477&h=400)

ಮಧುಮಾಲತಿಯ ದಂತಕಥೆ ನಮಗೆಲ್ಲರಿಗು ಪರಿಚಿತವೆ. ಸೌಂದರ್ಯದ ಖನಿ ಷೋಡಶಿ ಮಧುಮಾಲತಿ ಅಕಾಲ ಮರಣಕ್ಕೀಡಾದಾಗ, ಅವಳನ್ನು ವರಿಸುವ ವ್ಯಾಮೋಹದಿಂದ ಹಾತೊರೆದು ಬಂದಿದ್ದ ಮೂವರು ಸಾಹಸಿ, ವಿದ್ವಾನ್ ತರುಣರು ಏನೆಲ್ಲಾ ಮಾಡಿ ಕೊನೆಗು ಅವಳ ಮರಳಿ ಜೀವ ತಳೆಯುವಂತೆ ಮಾಡುತ್ತಾರೆ. ಅವಲ್ಲಿ ಒಬ್ಬ ಅವಳನ್ನು ಸುಟ್ಟುಹಾಕಿದ ಅಸ್ಥಿಬೂದಿ ಕಾದರೆ, ಮತ್ತಿಬ್ಬರು ಮಂತ್ರ ತಂತ್ರ ವಿದ್ಯಾ ಪಾಂಡಿತ್ಯವನೆಲ್ಲಾ ಒರೆಗಚ್ಚಿ ಅವಳ ಶೇಷ ಬೂದಿಯಿಂದ ಮತ್ತೆ ಕಳೇಬರಹವನ್ನು ಸೃಜಿಸಿ ಅದಕ್ಕೆ ಜೀವ ತುಂಬುತ್ತಾರೆ. ಹೀಗೆ ಮತ್ತೆ ಜೀವಂತವಾಗಿ ಬಂದ ಮಧುಮಾಲತಿಯ ಪುನರ್ಜನ್ಮ – ಮಂತ್ರ ತಂತ್ರವೆ, ವಿಜ್ಞಾನವೆ ಅಥವಾ ಮತ್ತೇನಿರಬಹುದು ಎಂಬ ಜಿಜ್ಞಾಸೆ ಈ ಕವನದ್ದು.

ಮೊದಲ ಭಾಗದಲ್ಲಿ ಅವರು ಮೂವರು ಅವಳನ್ನು ಬದುಕುಳಿಸಿಕೊಂಡ ಕಥೆ ಹೇಳಿ ಅದು ಮಂತ್ರ ತಂತ್ರವೆ ಅಥವಾ ಆ ಅಡುಗೋಲಜ್ಜಿಯ ಕಥನ ರೂಪದಲ್ಲಿ ಹೇಳಿದ ವಿಜ್ಞಾನದ ಹಿನ್ನಲೆಯಿದೆಯೆ ಎಂಬ ಅನುಮಾನ ವ್ಯಕ್ತಪಡಿಸುತ್ತ ಕೊನೆಗೊಳ್ಳುತ್ತದೆ.

ಅದೆ ಎರಡನೆ ಭಾಗದಲ್ಲಿ ಆ ವಿಜ್ಞಾನದ ಹಿನ್ನಲೆಯೇನಿದ್ದಿರಬಹುದಿತ್ತು? ನಾವೀಗ ಹೇಳುವ ಡಿ.ಏನ್.ಏ, ಕ್ಲೋನಿಂಗ್ ತರದ ಇತ್ಯಾದಿ ವೈಜ್ಞಾನಿಕ ತತ್ವಗಳನ್ನು ಹುದುಗಿಸಿದ ಮಾಯ ಮಂತ್ರದ ಹೊದಿಕೆಯ? ಎಂಬ ಚಿಂತನೆಯನ್ನು ಹೊರಡಿಸುತ್ತದೆ. ಒಟ್ಟಾರೆ ಪವಾಡವೆ, ವಿಜ್ಞಾನವೆ ಅನ್ನುವ ಜಿಜ್ಞಾಸೆ.

ಮಧುಮಾಲತಿ ಸುಟ್ಟು ಬೂದಿ (01)
______________________________

ಷೋಡಶಿ ಮಧು ಮಾಲತಿ
ಗೊತ್ತಲ್ಲ ಸತ್ತು ಹೋದ ಗತಿ
ಒಬ್ಬರಲ್ಲ ಮೂವ್ವರ ಸರತಿ
ಮಾಡಿಟ್ಟಳಲ್ಲ ಅಧೋಗತಿ ||

ಸುಟ್ಟಾದರು ಹಿಡಿಗೆ ಬೂದಿ
ಬಿಡರಲ್ಲ ತರ ಮನೋವ್ಯಾಧಿ
ಮೂವ್ವರ ಮೂರ್ದಿಕ್ಕಾಗಿಸಿ
ಹುಡುಕಿಸಿತಂತೆ ಜೀವ ಕಸಿ ||

ಮಂತ್ರವೇತ್ತ ಜ್ಯೋತಿಷ್ಯಶಾಸ್ತ್ರ
ದೇಹ ಬಲದ ಅಸೀಮ ಅಸ್ತ್ರ
ಒಂದಾಗಿಸಿ ತಂದರೆ ಸುಸ್ನೇಹ
ಮರು ಜೀವಿಸಿದಳೆ ಸಂದೇಹ ||

ಮಧುಮಾಲತಿ ಸುಟ್ಟ ಬೂದಿ
ಆದಳ್ಹೇಗೆ ಮತ್ತೆ ಷೋಡಶಿ ನದಿ
ಹುಡುಗಿತನ ಯೌವ್ವನ ಪ್ರಾಯ
ಬದುಕಿ ಪಡೆದಳ್ಹೇಗೆ ಪರಕಾಯ ||

ಮಾಯಾಜಾಲದ ಕಥೆಯಲ್ಲ
ಮಂತ್ರ ತಂತ್ರದ ಅದ್ಭುತವಲ್ಲ
ವಿಜ್ಞಾನವೇನೋ ಇರಬೇಕಲ್ಲ
ಅಜ್ಞಾನಕೆ ಕಥೆ ಹೇಳಿದರಲ್ಲ ||

– ನಾಗೇಶ ಮೈಸೂರು

ಆದಳ್ಹೇಗೆ ಮತ್ತೆ ಹುಡುಗಿ…!(02)
___________________________

ಬಹುಶಃ ಬೂದಿಯಿಂದಿಡಿದು
ಡಿಯನ್ನೆಯ ಜುಟ್ಟನು ತರಿದು
ಕೋಶವನ್ನೆ ಮರುಕಳಿಸಿ ಕಸಿ
ಕಟ್ಟಿದರೆ ಕೋಶದಲೆ ಕಲಸಿ ||

ಹುಟ್ಟಿದ ಕೋಶ ಕಟ್ಟುತ ದೇಹ
ವೇಗದ ಜಾಗದಿ ಮುಟ್ಟಿ ದಾಹ
ಪುನರುತ್ಥಾನಕೆ ಮಧುಮತಿ
ಪಡೆದಳೆ ಪುನರ್ಜನ್ಮ ಸದ್ಗತಿ ||

ಯಾವ ಜ್ಞಾನದ ಸಿದ್ದಿಯೋ
ಅಪರಿಮಿತ ಶಕ್ತಿ ಬುದ್ಧಿಯೋ
ವೈಜ್ಞಾನಿಕ ಗತಿ ಪ್ರಗತಿಯೋ
ಮುಗ್ದರ ಕಣ್ಣಿಗೆ ಮಂತ್ರವೋ ||

ಅದನರಿಯಲಾಗದ ಶಕ್ತಿ ಬಗೆ
ಜಾದು ಕಥೆಯಾಗಿಸಿ ಯುಕ್ತಿಗೆ
ಪರಂಪರೆಯಿಂದ್ಹರಿಸಿ ಸತ್ಸತತ
ಕಾದಿಹರೆ ಬೆಳೆದ ಮೆದುಳ್ಘಾತ ||

ಏನಾಗಲಿ ಮಧುಮಾಲತಿ ಕಥೆ
ಮಾಯ ಲೋಕವೇ ಇಳಿದಂತೆ
ಅಜ್ಞಾನಕು ವಿಜ್ಞಾನಕು ಗಂಟು
ಬೆಸೆವ ರೋಚಕತೆಗೂ ನಂಟು ||

– ನಾಗೇಶ ಮೈಸೂರು

00512. ಪರೀಕ್ಷೆಯ ಲೆಕ್ಕಾಚಾರ


00512. ಪರೀಕ್ಷೆಯ ಲೆಕ್ಕಾಚಾರ
______________________

  
(picture source wikipedia : https://en.m.wikipedia.org/wiki/File:Test_(student_assessment).jpeg)

ಒಲ್ಲದ ಮನಸಿನಿಂದ ಪುಸ್ತಕ ಹಿಡಿದು ಪರೀಕ್ಷೆಗೆ ಓದಿಕೊಳ್ಳಲು ಒದ್ದಾಡುತ್ತಿದ್ದ ಮಗನನ್ನು ಸಾಮ, ದಾನ,ದಂಡ, ಭೇಧೋಪಾಯಗಳೆಲ್ಲದರ ಬಳಕೆ ಮಾಡುತ್ತ ಸಿದ್ದಗೊಳಿಸಲು ಹೆಣಗುತ್ತ ಕುಳಿತಿದ್ದೆ. ಅದೇ ಹೊತ್ತಿನಲ್ಲಿ ಟೀವಿಯಲ್ಲಿ ಪ್ರವೇಶ ಪರೀಕ್ಷೆಯ ನಂತರದ ಆತಂಕಪೂರ್ಣ ಚರ್ಚೆ ನಡೆಯುತ್ತಾ ಇತ್ತು. ಒಂದು ಕಾಲದಲ್ಲಿ ನಾವೂ ಇದನ್ನೆಲ್ಲಾ ಅನುಭವಿಸಿ ಮುಂದೆ ಸಾಗಿದ್ದವರೆ. ಆದರೆ ಆ ದಿನದಲ್ಲಿ ಕಾಡಿದ್ದ ಅದೆಷ್ಟೊ ಆತಂಕ, ಒತ್ತಡಗಳು ಕೇವಲ ಆತಂಕ, ಅಜ್ಞಾನ, ನಿಖರ ಗಮ್ಯವಿಲ್ಲದ ಒದ್ದಾಟಗಳ ಕಾರಣದಿಂದ ಉಂಟಾದದ್ದು. ಇಂದು ತಿರುಗಿ ನೋಡಿದರೆ ನಾನು ಓದಿದ್ದಕ್ಕೂ, ಮಾಡುತ್ತಿರುವ ಕೆಲಸಕ್ಕೂ ನೇರ ಸಂಬಂಧವೆ ಇಲ್ಲ. ವಿದ್ಯಾರ್ಹತೆ ಕೇವಲ ಕೆಲಸ ಗಿಟ್ಟಿಸುವ ಆರಂಭದ ರಹದಾರಿಯಾಯ್ತೆಂಬುದನ್ನು ಬಿಟ್ಟರೆ ಮಿಕ್ಕೆಲ್ಲ ಹೊಸ ಹೋರಾಟ, ಪರೀಕ್ಷೆಗಳೆ ಎದುರಾದದ್ದು ವಾಸ್ತವ ಸತ್ಯ. ನಮ್ಮ ವಿದ್ಯಾರ್ಹತೆ, ವಿದ್ಯಾಭ್ಯಾಸ ಆ ಹೋರಾಟಕ್ಕೆ ನಮ್ಮನ್ನು ಸಿದ್ದಪಡಿಸಿರಲೆ ಇಲ್ಲ. ಆದರೂ ನಾವು ಅದೆ ಮರೀಚಿಕೆಯ ಹಿಂದೆ ನಮ್ಮ ಭವಿಷ್ಯದ ಪೀಳಿಗೆಯನ್ನು ತಳ್ಳುತ್ತ ಕುರಿಮಂದೆಗಳ ಹಾಗೆ ಸಾಗುತ್ತಿದ್ದೇವಲ್ಲ ಅನಿಸಿ ಖೇದವೂ ಆಯ್ತು.

ಪ್ರತಿಯೊಬ್ಬ ತಂದೆ ತಾಯಿಯರಲ್ಲೂ (ಅದರಲ್ಲೂ ಮಧ್ಯಮ ವರ್ಗದ ಕುಟುಂಬಗಳಲ್ಲಿ) ಈ ಪರೀಕ್ಷೆ ಅನ್ನುವ ಭೂತ ಕಾಡುವ ಪರಿ ಅನನ್ಯ. ಅಲ್ಲಿನ ಸಾಧನೆ ಮತ್ತು ಗಳಿಕೆಯ ಅಂಕಗಳೆ ಮುಂದಿನೆಲ್ಲಾ ಹಂತಕ್ಕೂ ಮಾನದಂಡವಾಗಿ ಬಿಡುವುದರಿಂದ ಅದು ಮಕ್ಕಳಲ್ಲಿ ಹುಟ್ಟಿಸುವ ಉದ್ವೇಗ, ಆತಂಕವೂ ಅಳತೆ ಮೀರಿದ ವ್ಯಾಪ್ತಿಯದು. ಈ ಶ್ರೇಣಿ ಅಂಕಗಳೆ ಜೀವನದ ಅಂತಿಮ ಗಮ್ಯ ಅನ್ನುವಷ್ಟರ ಮಟ್ಟಿಗೆ ಭ್ರಮೆ ಹುಟ್ಟಿಸಿ ಎಲ್ಲರನ್ನು ಆ ಒಂದು ಹುಸಿ ಗಮ್ಯದ ಹಿಂದೆ ಓಡಿಸಿಬಿಡುತ್ತವೆ – ಸದಾ ಬೆನ್ನಟ್ಟುತ್ತಾ ನಡೆಯುವ ಹಾಗೆ. ವಿಧ್ಯಾರ್ಥಿ ಜೀವನ ಭವಿಷ್ಯದ ಜೀವನಕ್ಕೆ ಸಿದ್ದ ಮಾಡುವ ಕಲಿಕೆಯ ವೇದಿಕೆಯಾಗದೆ ಅಂಕಗಳಿಕೆ ಸ್ಪರ್ಧೆಯ ಪಂಥವಾಗಿ ಪರಿಣಮಿಸುವುದು ಈಗ ಎಲ್ಲೆಡೆ ಕಾಣುವ ಸತ್ಯ. ವಿಷಾದವೆಂದರೆ ಸಾಮಾಜಿಕ ಪರಿಸರದಲ್ಲಿ ಬದುಕುವ ಜನ ಇದನ್ನು ಒಪ್ಪಲಿ ಬಿಡಲಿ – ಸುತ್ತಲಿನ ಪ್ರಚಲಿತ ಪರಿಸರದ ಒತ್ತಡ ಅವರನ್ನು ಈ ಹಾದಿಯನ್ನೇ ಹಿಡಿದು ಮುನ್ನಡೆಯುವಂತೆ ಪ್ರೇರೇಪಿಸುತ್ತದೆ – ಸಹಮತದಿಂದಲಾದರೂ ಸರಿ, ವಿಧಿಯಿಲ್ಲದೇ ಅನುಕರಿಸಬೇಕಾದ ಅನಿವಾರ್ಯದಿಂದಾದರೂ ಸರಿ. ಹಿಂದಿನ ಕಾಲದಲ್ಲಿದ್ದ, ಗುರುಕುಲದಲ್ಲಿದ್ದು ಜೀವನವೆಂದರೆ ಏನೆಂದು ಮನೆಯಿಂದ ಹೊರಗೆ, ಕಾಡಿನ ಮತ್ತು ಆಶ್ರಮದಂತಹ ಕಠಿಣ ವಾತಾವರಣದಲ್ಲಿ ಕಲಿಯುವ ವ್ಯವಸ್ಥೆ ಈಗ ಇರದ ಕಾರಣ, ಸ್ವಾಭಾವಿಕ ಹಾಗೂ ನೈಸರ್ಗಿಕ ಕಲಿಕೆಯನ್ನು ಹಣ ತೆತ್ತು ಕಲಿಯುವ-ಪಡೆಯುವ ವಾಣಿಜ್ಯೀಕೃತ ಕೃತಕ ಪರಿಸರ ಈಗಿನ ನಾಗರೀಕ ಜೀವನದ ಮಾದರಿ.ಇದು ಪರಿಸ್ಥಿತಿಯ ಒಂದು ಮುಖ.

ಇನ್ನು ಈ ವ್ಯವಸ್ಥೆಯಲ್ಲಿ ಈಜಿಕೊಂಡು ಸಂಭಾಳಿಸಬೇಕಾದ ಮಕ್ಕಳನ್ನು ನೋಡಿದರೆ – ಕೆಲವರು ಈ ಪರಿಸರಕ್ಕೆ ನೀರಿಗೆ ಬಿದ್ದ ಮೀನಿನಷ್ಟೆ ಸಹಜವಾಗಿ ಹೊಂದಿಕೊಳ್ಳಬಲ್ಲ ಸಾಮರ್ಥವಿದ್ದವರು ಮನಃಪೂರ್ವಕವಾಗಿಯೊ, ಪರಿಶ್ರಮದ ಸಹಾಯದಿಂದಲೊ ಸುಲಲಿತವಾಗಿ ಮುನ್ನಡೆಯುತ್ತಾರೆ. ಸಮಸ್ಯೆ ಅಥವಾ ಪ್ರಶ್ನೆ ಬರುವುದು ಆ ಗುಂಪಿನಲ್ಲಲ್ಲ. ಅದೇ ಮಕ್ಕಳ ಸಮೂಹದಲ್ಲಿ ಮತ್ತೆರಡು ಗುಂಪೂ ಮಿಳಿತವಾಗಿರುತ್ತದೆ. ಮೊದಲನೆಯದು ಆ ಅಂಕಗಳಿಕೆಯ ಸಾಮರ್ಥ್ಯವಿರದ, ಆ ಮಟ್ಟದ ಸ್ಪರ್ಧಾತ್ಮಕ ಜಗದಲ್ಲಿ ಏಗಲಾರದ ದುರ್ಬಲ (ಪ್ರಾಯಶಃ ಅದರಿಂದಲೆ ಕೀಳರಿಮೆಯಿಂದ ಬಳಲುವ ) ಗುಂಪು. ಎರಡನೆಯದು ದುರ್ಬಲವಲ್ಲದಿದ್ದರೂ ಆ ಗುಂಪಿನ ಮಕ್ಕಳು ವಿಶೇಷ ಶಕ್ತಿ ಸಾಮರ್ಥ್ಯಗಳನ್ನು ದೈವದತ್ತವಾಗಿ ಪಡೆದೂ ಅಂಕಗಳಿಕೆಯಂತಹ ವ್ಯವಸ್ಥೆಯಲ್ಲಿ ಹಿಂದೆ ಬಿದ್ದಿರುವವರು; ಯಾಕೆಂದರೆ ಅವರ ಕಲಿಕೆಯ ವಿಧಾನ ಮಾಮೂಲಿಗಿಂತ ವಿಭಿನ್ನವಾದದ್ದು. ಸಾಂಪ್ರದಾಯಿಕ ಕಲಿಕೆ, ಪರೀಕ್ಷೆಗಳು ಅವರ ಮನಸ್ಥಿತಿಗೆ ಹೊಂದಾಣಿಕೆಯಾಗುವಂತದ್ದಲ್ಲ. ದುರದೃಷ್ಟವಶಾತ್ ನಮ್ಮ ಶಿಕ್ಷಣದ ವ್ಯವಸ್ಥೆ ಸರಾಸರಿ ವಿದ್ಯಾರ್ಥಿ ಜನಾಂಗದ ಪರಿಗಣನೆಯಿಟ್ಟುಕೊಂಡು ವಿನ್ಯಾಸಗೊಳಿಸಿದ್ದು. ಹೀಗಾಗಿ ಬಹುತೇಕ ‘ಸರಾಸರಿ ವರ್ಗ’ ಇದರಲ್ಲೇ ಹೇಗೊ ಏಗಿ, ಕೊಸರಾಡಿ ಮೇಲೆದ್ದು ಬಂದರೂ ಈ ಮೇಲೆ ಗುರುತಿಸಿದ ಎರಡು ಗುಂಪುಗಳು ಹೊಂದಿಕೊಳ್ಳಲಾಗದ ಒದ್ದಾಡುತ್ತಲೆ ನರಳುತ್ತವೆ. ಈ ಎರಡು ವರ್ಗಗಳನ್ನು ಹತ್ತಿರದಿಂದ ನೋಡಿ, ಅವರ ಶಕ್ತಿ – ಸಾಮರ್ಥ್ಯ – ಮಿತಿಗಳನ್ನು ಗುರ್ತಿಸಿ ಅದಕ್ಕೆ ಸರಿಹೊಂದುವ ವಿದ್ಯಾಕ್ರಮದ ಹಾದಿಯಲ್ಲಿ ಅವರನ್ನು ಮುನ್ನಡೆಸುವ ಶಿಕ್ಷಣ ಕ್ರಮ ನಮ್ಮಲ್ಲಿ ಇಲ್ಲ. ಈ ಕಾರಣದಿಂದ ಹೋಲಿಕೆಯಲ್ಲಿ ಈ ಎರಡು ಗುಂಪುಗಳು ಹಿಂದೆ ಬಿದ್ದು ಅಥವಾ ದೂಷಣೆ, ಶೊಷಣೆಗೊಳಗಾಗಿ ನರಳಬೇಕಾಗುತ್ತದೆ. ಕೆಲವರು ಹೇಗೊ ಹೆಣಗಾಡಿ ಬದುಕುತ್ತಾರಾದರೂ , ಮತ್ತೆ ಕೆಲವರು ಮುರುಟಿಹೋಗುತ್ತಾರೆ ಕೀಳರಿಮೆಯ ಕಂದರದಲ್ಲಿ.

ಗೊತ್ತಿದ್ದೊ ಗೊತ್ತಿಲ್ಲದೆಯೊ ಅಥವಾ ಬೇರೆ ದಾರಿಯಿಲ್ಲದ ಅನಿವಾರ್ಯತೆಯಿಂದಲೊ – ಈ ಎರಡು ಗುಂಪಿನ ಮಕ್ಕಳ ನರಳಿಕೆಗೆ ಕಾರಣಕರ್ತರಾಗುವಲ್ಲಿ ಪೋಷಕರ ಪಾತ್ರ ಗಣನೀಯ. ಸರೀಕರಲ್ಲಿ ತಲೆಯೆತ್ತಿ ನಿಲ್ಲುವ ಮರ್ಯಾದೆಯ ಪ್ರಶ್ನೆಗೊ, ತಂತಮ್ಮ ನಿಜವಾಗದ ಕನಸು ಮಕ್ಕಳಲ್ಲಿಯಾದರೂ ಸಾಕಾರವಾಗಲೆಂಬ ಹುಮ್ಮಸ್ಸಿನಲ್ಲಿ ಮಕ್ಕಳನ್ನು ವಿಪರೀತ ಒತ್ತಡಕ್ಕೊಳಪಡಿಸಿ ನಿರೀಕ್ಷೆಯ ಗಾಳಿ ಗೋಪುರ ಕಟ್ಟಿಬಿಡುತ್ತಾರೆ. ಅಲ್ಲೇ ಸಮಸ್ಯೆಯ ಮೂಲವಿರುವುದು – ಆ ಮಕ್ಕಳ ವೈಯಕ್ತಿಕ ಸಾಮರ್ಥ್ಯ, ಪ್ರತಿಭೆ, ಪರಿಮಿತಿ, ತೊಡಕುಗಳ ಗಣನೆಯಿಲ್ಲದೆ ನಡೆಯುವ ಈ ಪ್ರಕ್ರಿಯೆ ಅವರ ಮೇಲೆ ಅಸಾಧಾರಣ ಒತ್ತಡ ಹಾಕಿ ಕಂಗೆಡಿಸಿ ಅಸಮರ್ಥರನ್ನಾಗಿಸಿಬಿಡುವುದು ವಾಸ್ತವದ ಕ್ರೂರತೆ. ಇಷ್ಟೆಲ್ಲಾ ಚಿಂತನೆ ಮನಸಿನ ಪಟಲದಲ್ಲಿ ಮೂಡಿದಾಗ ಓದಲು, ಪರೀಕ್ಷೆಯಲ್ಲಿ ಗರಿಷ್ಠ ಅಂಕ ಗಳಿಸಲು ನಾವು ಹಾಕುತ್ತಿರುವ ಒತ್ತಡ (ಸರಾಸರಿ ಮಕ್ಕಳಲ್ಲೂ ಕೂಡ) ಅರ್ಥರಹಿತವಲ್ಲವೇ ಎನಿಸಿತು. ಆ ಒತ್ತಡದ ಜತೆ ಜತೆಯೇ ಅವರಿಗೆ ಮತ್ತೊಂದು ಸಂದೇಶವನ್ನು ಸತತವಾಗಿ ಕೊಡುತ್ತಲೇ ಇರಬೇಕೆನಿಸಿತು – ಅಂಕ, ಪರೀಕ್ಷೆಗಳೇ ಜೀವನದಂತಿಮ ಗಮ್ಯವಲ್ಲ ಎಂದು. ಅವರಲ್ಲಿ ಆ ನಂಬಿಕೆ ಆತ್ಮವಿಶ್ವಾಸ ಹುಟ್ಟಿದಾಗಲೆ, ಏನೋ ಓದಿ ಯಾರದೋ ಕೈ ಕೆಳಗಿನ ವ್ಯವಸ್ಥೆಯ ಕೊಂಡಿಯೊಂದರ ಕೊಂಡಿಯಾಗಿ ಎಲ್ಲೋ ಕಳೆದುಹೋಗುವುದರ ಬದಲು ತಾವೇ ಆ ರೀತಿಯ ವ್ಯವಸ್ಥೆ ನಿರ್ಮಿಸುವ ಪ್ರಭೃತಿಗಳಾಗಬಹುದು ಎಂದು. ಈಗ ದೊಡ್ಡ ದೊಡ್ಡ ಕಂಪನಿ ಕಟ್ಟಿರುವ ಎಷ್ಟೋ ಮಂದಿ ಒಂದು ಕಾಲದಲ್ಲಿ ಓದು ಬಿಟ್ಟು ತಮ್ಮ ಹುಚ್ಚು ಕನಸಿನ ಬೆನ್ನು ಹತ್ತಿದವರೆ. ನಮ್ಮಲ್ಲೂ ಆ ಪರಿಸರವಿದ್ದರೆ ಅಂತಹ ಸಾಹಸಗಳು ತಾನಾಗೆ ಅರಳುತ್ತವೆ ಅನಿಸಿದರು ಅದಕ್ಕೆ ಸಿದ್ದವಿರುವ ಪಕ್ವ ಮನಸ್ಥಿತಿ ಪೋಷಕರಾದ ನಮಗೇ ಇನ್ನು ಇಲ್ಲವೆನಿಸಿತು. ಕನಿಷ್ಠ ಆ ಕುರಿತು ಯೋಚಿಸುವುದು ಆ ದಿಸೆಯಲ್ಲಿಡಬಹುದಾದ ಮೊದಲ ಹೆಜ್ಜೆಯೆನಿಸಿದಾಗ ಮೂಡಿದ ಭಾವಕ್ಕೆ ಕೊಟ್ಟ ಪದಗಳ ರೂಪ ಈ ಕೆಳಗಿನ ಪದ್ಯ. ಅದು ಭವಿತದ ವಾಸ್ತವದಲ್ಲಿಯಾದರೂ ಸಾಕಾರವಾಗಲಿ ಎನ್ನುವುದು ಆಶಯ.

ನನ್ನ ಮಗ
__________

ಪಾಸಾಗಲಿ ನೀ ನನಗೆ ಮಗನೆ
ಫೇಲಾಗಲಿ ನೀ ನನ್ನ ಮಗನೆ
ಫೇಲುಗಳೆ ಪಾಸಿನ ಜೋಳಿಗೆ
ಹೆದರದೆ ನಡೆ – ಮಗನೆ ನೀ ನನಗೆ ||

ದರ್ಜೆ ಶ್ರೇಣಿ ಉನ್ನತಾಂಕ
ಮೂರನೆ ದರ್ಜೆ ಶೂನ್ಯಾಂಕ
ಸುಲಭವಲ್ಲ ಎರಡೂ ಸಾಧನೆ
ನೀನರಿತರೆ ಸರಿ ಬದುಕೆ ಶೋಧನೆ ||

ನೂರಕೆ ನೂರು ಬರೆದರು ಸರಿ
ಅರೆಬರೆ ಹೆಣಗಾಡಿದರು ಜಾರಿ
ಸೋಲು ಗೆಲುವು ಯುದ್ಧದ ನಿಯಮ
ಆ ಪ್ರಜ್ಞೆಯುದಿಸೆ ಮಿಕ್ಕೆಲ್ಲಾ ಕೊರಮ ||

ಬರಲಿ ಬಿಡಲಿ ಬಹುಮಾನ
ಪಾರಿತೋಷಕಗಳ ಸಮ್ಮಾನ
ಹಿಗ್ಗದೆ ಕುಗ್ಗದೆ ಬದುಕೆ ಕಲಿತರೆ
ಮಗನೆಂಬ ಹೆಮ್ಮೆ ಸಾಕೆನಗೆ ದೊರೆ ||

ಯಶಾಪಯಶ ಪರೀಕ್ಷೆಯ ಸಂತೆ
ಮಾಡಬೇಡ ಭವಿತ ಕೆಲಸದ ಚಿಂತೆ
ಯಾರು ಕೊಡದಿದ್ದರೇನು ಉದ್ಯೋಗ
ನೀನೆ ತುಂಬಿಬಿಡು ಉದ್ಯಮಿಯ ಜಾಗ || 

 
– ನಾಗೇಶ ಮೈಸೂರು, 

00511. ಪ್ರೇಮಾವತಾರ….


00511. ಪ್ರೇಮಾವತಾರ….
_______________________________

ಪ್ರೀತಿ ಪ್ರೇಮದ ಯಾವುದೊ ಮಜಲನ್ನು ದಿಟ್ಟಿಸಿದರು ಬರಿ ಅದೆ ಅವತಾರದ ವಿವಿಧ ಆಯಾಮಗಳು.. ಹುಚ್ಚೆಬ್ಬಿಸಿ ಕುಣಿಸೊ ಆನಂದ ಲಹರಿ, ರೊಚ್ಚಿಗೆಬ್ಬಿಸೊ ಕ್ರೋಧದ ನಗಾರಿ, ನೋವಿನ ಅಚ್ಚೆ ಹಾಕಿ ಮಿಡುಕಾಡಿಸೊ ಯಾತನೆಯ ದಾರಿ, ನಿರ್ಲಿಪ್ತತೆಯಲಿ ಕವಚದೊಳಕ್ಕೆ ಮುದುಡಿಸಿ ಅಂತರ್ಮುಖಿಯಾಗಿಸೊ ಸವಾರಿ – ಅಥವಾ ಇವೆಲ್ಲದರ ಮಿಶ್ರಣವನ್ನು ಗಳಿಗೆಗೊಂದರಂತೆ ಕಟ್ಟಿಕೊಡುತ ಸದಾ ಅನಿಶ್ಚಯತೆಯ ತೊಟ್ಟಿಲಲಿ ತೂಗಾಡಿಸಿ ದಿಗ್ಭ್ರಮೆ ಹಿಡಿಸುವ ಮಾಯಾಲಹರಿ. ಅದರ ಹಲವಾರು ಮುಖಗಳನ್ನು ಹಿಡಿದಿಡುವ ಸಂಧರ್ಭ, ಸಂಘಟನೆಗಳು ಅಸಂಖ್ಯಾತವಾದರು, ಮೂಲದ ತಪನೆಯ ಬೇರು ಮಾತ್ರ ಒಂದೆ. ಪ್ರೀತಿಯೆಂಬ ಸಂವೇದನೆಯ ಪ್ರಬಲ ಶಕ್ತಿಯನ್ನು ಎತ್ತಿ ತೋರಿದಷ್ಟೆ ಸಹಜವಾಗಿ ಅದರ ಆ ಶಕ್ತಿಯೆ ಕುಗ್ಗಿಸುವ ದೌರ್ಬಲ್ಯದ ಪ್ರತೀಕವಾಗುವ ವಿಪರ್ಯಾಸವಾದರು, ಅದೇ ಪ್ರೀತಿಯ ಜಗವನ್ನಾಳುವ ಮಾಯಶಕ್ತಿಯೆನ್ನುವುದಂತು ನಿಜ.

ಅಂತದ್ದೊಂದು ಆಯಾಮ, ಅವತಾರದ ಅಗಣಿತ ಸಂಗ್ರಹಕ್ಕೆ ಮತ್ತೊಂದು ಸೇರ್ಪಡೆ ಈ ಪ್ರೇಮ ಪದ 😊

ಸಹಿಸುತ್ತಾಳಷ್ಟೆ, ಸಹಿ ಮಾಡದ ಅವಳ ರೀತಿ
ಬಲವಂತಕೆ ನಟಿಸುತ, ನಿರಾಳ ಕೊಡದೆ ಪ್ರೀತಿ
ಅವನೆದೆಯಲ್ಲಿ ಮಿಡಿದು, ಕಾಡುತ ತಡಕಾಡಿಸಿ
ತುಂಬಿ ತುಳುಕಿದರು, ದೂರದೆ ನಿಂತ ಮನದರಸಿ ||

ಬರಿದೆ ಭೀತಿಯದಷ್ಟೆ, ಕಳೆದುಹೋಗುವ ಸಖ್ಯ
ಗೊತ್ತವನಿಗೆ ಬೇಕು ಭರ್ತಿ, ಪ್ರೀತಿಯ ಸಾಂಗತ್ಯ
ಕೊಡುವಾಸೆಗೆ ನೂರು, ಅಡೆತಡೆ ವಾಸ್ತವ ಗೋಡೆ
ಕೊಡಲಾರೆನೆಂದು ಕಳಚೇ, ಬಿಡದ ಮನದ ಗೂಡೆ ||

ಅವನದೇನೊ ಅವಸರ, ಕಳುವಾಗಿ ಕಾಲದ ಸಂಚಿ
ಹುಡುಕಾಟದ ಬಳ್ಳಿ, ತೊಡರಿದ್ದೆ ತಡವಾಗಿ ತರಚಿ
ಹುಟ್ಟಿದ ಕಾಲಕೆ, ತಪ್ಪಿನ ಆರೋಪ ವಿಧಿಗೆ ಶಾಪ
ಆದರು ಬಿಡದ ಮೋಹ, ಬಿಡದಲ್ಲ ಅವಳದೆ ಜಪ ||

ಮುನಿಸಿ ದಣಿಸಿ ಕಂಗೆಡಿಸಿ, ಓಗೊಟ್ಟ ಗಳಿಗೆಗಳು
ತೇಪೆ ಹಾಕಿದರೇನು, ಮೂಲ ಪ್ರೀತಿಗಲ್ಲಿಲ್ಲ ಒಕ್ಕಲು
ಬರಿ ಸಹಿಸುವ ಬಂಧ, ನಿಜ ಪ್ರೀತಿಯಾಗದ ನೋವು
ಒಂದು ಕೈ ಚಪ್ಪಾಳೆಯೆಲ್ಲಿ, ಚಿಟುಕಿಯದೆ ಕಲರವವು ||

ನೋಯಿಸೆ ಮನಬಾರದು, ನೋಯಿಸದೆ ಬಿಡದು ಪ್ರೀತಿ
ಪ್ರತಿ ಕ್ಷಣ ಮನ ವಿಹ್ವಲ, ಕೈತುತ್ತು ಬಾಯಿಗಿಲ್ಲದ ಮಿತಿ
ಪ್ರತಿ ನಿರೀಕ್ಷೆಗು ಸೋಲು, ಪರೀಕ್ಷೆಯಾಗಿ ಶೂನ್ಯದ ಪ್ರವರ
ಸಹಿಸಿ ನಟಿಸುವ ನೋವ, ತೆರವಾಗಿಸೊ ಸರಿಯವತಾರ ||

– ನಾಗೇಶ ಮೈಸೂರು

00510. ಪ್ರೇರಣೆಗಳ ಗಣಿತ, ಪ್ರೇರೇಪಣೆ ಕಾಗುಣಿತ


00510. ಪ್ರೇರಣೆಗಳ ಗಣಿತ, ಪ್ರೇರೇಪಣೆ ಕಾಗುಣಿತ
________________________________

ಪ್ರತಿಯೊಂದರ ಬೆಲೆ ಅರಿವಾಗುವುದು ಅದಿಲ್ಲದಾಗ ಆಗುವ ಪರಿಣಾಮಗಳ ಅರಿವು, ತಿಳುವಳಿಕೆ ಅಥವಾ ಅನುಭವವಿದ್ದಾಗ ಮಾತ್ರ. ಹೇಗೆ ದುಃಖದ ಅನುಭವವಿರದಿದ್ದರೆ, ಅನುಭವಿಸುತ್ತಿರುವ ಸುಖದ ಬೆಲೆ ಗೊತ್ತಾಗದೊ, ಹೇಗೆ ಕಷ್ಟಗಳ ಸುಳಿಗೆ ಸಿಕ್ಕವರಿಗೆ ನಡುವಿನ ಹಾಸ್ಯ ಮನಕೆ ಬಿಡುವು ಕೊಟ್ಟಂತೆ ಅನುಭಾವಿಸಿ ರುಚಿಸುವುದೊ, ಹಾಗೆ ತರತರದ ಅರಿವಿನ ಮೊತ್ತ, ಮೌಲ್ಯ ಅರಿವಾಗಲಿಕ್ಕೆ ಕೆಲವು ಹಿನ್ನಲೆಗಳು ಬೇಕಾಗುತ್ತವೆ. ಅಂಥಹ ಕೆಲವು ಸರಕುಗಳ ಕೂಡಿಸಿಟ್ಟ ಭಾವ ಈ ಪದ್ಯ.

  
(Picture source wikipedia : https://en.m.wikipedia.org/wiki/File:55-aspetti_di_vita_quotidiana,_gioia,Taccuino_Sanitatis,_Cas.jpg)

ಸುಖ ಒಂದೆ ಇದ್ದರೆ ರುಚಿಸುವುದೆ ಭಾಷ್ಯ
ನೋವಿರದೆ ಕೇಳಿದರೆ ನಗೆ ತಂದೀತೆ ಹಾಸ್ಯ ||

ಸಂಕಷ್ಟಗಳ ಪ್ರೇರಣೆ ಮೂಡಿಸುವ ಜಗತ್ತು
ಸಂತೃಪ್ತಿ ಸಂಭಾಷಣೆ ಆಲಸಿತನ ಸಂಪತ್ತು ||

ಪ್ರೇಮಿಸಿದ ನೋವು ಮಾಗಿಸುವ ಬೆಳೆತ
ಭಾವ ಸುಕ್ಕು ಕಾವು ಮುದುರಿನ ಸೆಟೆತ ||

ಆಪತ್ತುಗಳ ಕುತ್ತು ಹಚ್ಚಿಸಿ ಮನದೀಪ
ಸೆಣೆಸಿದ ಸಂಪತ್ತು ಜ್ಞಾನದಾ ಸ್ವರೂಪ ||

ಘಟಿಸಿ ಪಾಪಕೂಪ ಜಿಜ್ಞಾಸೆ ಸರಿ ತಪ್ಪ
ಸರಿಪಡಿಸೊ ಬೆಪ್ಪ ನಾಳೆಗೆ ಸರಿಸಪ್ಪ ||

ಗತಿಸಿದ ಗತ ಕಾಲ ಆಗಿರೆ ಬರಿ ಸಕಾಲ
ಹೇಗೇ ನಿಲಿಸೆ ಕಾಲ ಸಂಭಾಳಿಸಿ ಅಕಾಲ ||

ಮುಂದೂಡಿದ ಕಷ್ಟ ಕಾಡಿಸುವ ಗವಾಕ್ಷ
ತಪ್ಪಿಸಲಾಗದನಿಷ್ಟ ಬರದಿರ ಕೃಷ್ಣ ಪಕ್ಷ ||

ಕಾವ್ಯದ ಕಾಗುಣಿತ ಕಲಿತಂತೆ ಸಂಗೀತ
ಬರೆವ ಒಳಗಿನೂತ ಪ್ರೇರೇಪಿಸಿ ಸೆಳೆತ ||

ಕವನದಿ ಬಂದಂತೆ ತೆರೆಮರೆಯ ಹಾಸ್ಯ
ಅಪಹಾಸ ಇರದಿರೆ ಅವಿತೆ ಭಾವ ಲಾಸ್ಯ ||

ಲಘು ಮನ ಲಂಘನ ಹೊತ್ತು ಭಾರ ಜಘನ
ಶಂಕೆ ಸಜೀವದಹನ ದಹ್ಯ ವಿಕಾರದಮನ ||

  
(picture source wikpedia – https://en.m.wikipedia.org/wiki/File:Wilhelm_Amberg_In_Gedanken_versunken.jpg)

———————————————————————
ನಾಗೇಶ ಮೈಸೂರು
———————————————————————

00509. ಕಾಲದ ಗುಂಡು


00509. ಕಾಲದ ಗುಂಡು
___________________

ಗುಂಡು ಬೆಲ್ಲದುಂಡೆಯನ್ಹಿಡಿದು ಉರುಳಿ ಬಂದ ತಂಡಿನಂತೆ (ಕಬ್ಬಿಣದ ಕೋಲು) ಉರುಳಿ ಬರುವ ಕಾಲದ ಹೊಡೆತ ಎಣಿಕೆಗೆ ನಿಲುಕದ ಖೂಳ. ಸಿಹಿಯಚ್ಚಿದ ಬೆಲ್ಲದ ತುದಿಯನ್ನಿಡಿದೆ ಬರುವ ಕಾಲದ ಭಾರವಾದ ಕೋಲು ನಮಗರಿವಿಲ್ಲದೆಲೆ ದೇಹವನೆಲ್ಲ ಹಂತ ಹಂತವಾಗಿ ದುರ್ಬಲಿಸುತ್ತಾ ಸಾಗಿದ್ದರು, ಮನಕದರ ಅರಿವಿರುವುದಿಲ್ಲ. ಹಳೆಯ ಶಕ್ತಿ, ಸಾಮರ್ಥ್ಯಗಳೆ ತುಂಬಿಕೊಂಡ ಭಾವ ಮನದಲ್ಲಿ. ದೇಹದ ತೂತುಗಳನರಿಯದ ಮನಕೂ, ಮನದ ತುರುಸು, ಹುರುಪನ್ನರಿಯದ ದೇಹಕು ನಡೆವ ತಾಕಲಾಟವೆ – ಕಾಲದ ಗುಂಡು. ಎರಡು ಪರಸ್ಪರರ ಸಾಮರ್ಥ್ಯ, ಮಿತಿಗಳನ್ನರಿತು ಸಮತೋಲನ ಸ್ಥಿತಿಯ ಘಟ್ಟವನ್ನು ತಲುಪುವ ತನಕ ಕಾಡುವ ಅಂತರದ ಕಾಟ, ಪಾಡಾಟ, ತನುಮನ ಕಾದಾಟ.

  
(Picture sourc Wikipedia: https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:MontreGousset001.jpg)

ಗುಡ ಗುಂಡು ಗುಂಡಿನ ಚಂಡು
ಗುಡುಗುಡು ಲೋಹದ ತಂಡು
ಗುಣದರಿವಿರದಂತೆ ಹೆಣ್ಣೊ ಗಂಡು
ಉರುಳಿ ಬಂತೋ ಕಾಲದ ಗುಂಡು ||

ಉರುಳುತ್ತೋ ಕಾಲದ ಚಕ್ರ
ಮಾಡುತ್ತೆಲ್ಲರಾ ಬಕರಾ
ಗಾಬರಿಯಾಗೋ ಮೊದಲೆ
ನಮಗರಿಯದೆ ನಾವೇ ಪೆಕರ ||

ಕ್ಷಣಕ್ಷಣಕೆ ನಿಮಿಷದ ಗಣನೆ
ನಿಮಿಷ ಗಂಟೆಯ ಗುಣಗಾನೆ
ಕಟ್ಟೆ ಗಂಟೆ ದಿನದ ಪರಿಗಣನೆ
ವಾರ ವರ್ಷ ಕರಗಿತೆ ಹಿಮ ಮನೆ ||

ಅಚ್ಚರಿ ಅದು ಸಮ್ಮೋಹನೆ
ನಮ್ಮೊಳಗದು ಬರಿ ಕಲ್ಪನೆ
ವಯಸಾಗದ ಮನಸ ಮಾತು
ಕೇಳದಲ್ಲ ದೇಹದಾ ತೂತು ||

ಮನ ಎಂದಿನಂತೆ ಖುಷಿಯ ಬುಗ್ಗೆ
ಜಯಿಸಿಟ್ಟು ಬಿಡುವ ವಿಶ್ವಾಸ ನುಗ್ಗೆ
ಹೆಜ್ಜೆಯಿಡಲು ಏದುಸಿರ ಫಸಲು
ಯಾರ್ಹಿಡಿದರೊ ತಡೆ ಆತಂಕಗಳು ||

ಗಟ್ಟಿ, ನಿನ್ನೇ ತಾನೆ ಮಾಡಿದ್ದುಂಟು
ಇಂದೇತಕೊ ಮಿಸುಕಾಡಿದ್ದುಂಟು
ಮಾಗಿದ್ದರು ಮನ ಪ್ರಾಯೋಪವೇಶ
ಮಿಕ್ಕಿಲ್ಲದ ದೇಹ, ಅಂಥ ತ್ರಾಸಾವೇಷ ||

————————————————————
ನಾಗೇಶ ಮೈಸೂರು
————————————————————

ಕಠಿಣ ಪದಗಳ ಅರ್ಥ :
—————————–
ತಂಡು = ಗುಂಪು, ತಂಡ, ಕೋಲು , ದೊಣ್ಣೆ , ಭಾರವಾದ ಕಬ್ಬಿಣದ ಕೋಲು, ಗದೆ
ಗುಡ = ಬೆಲ್ಲ

00506. ವಿರಹ…


00506. ವಿರಹ…
________________

ಪ್ರಾಯ / ವಿರಹದ ಸಹಸ್ರಾಕ್ಷನ ಕಬಂಧ ಬಾಹುವಿನಲಿ ಸಿಕ್ಕ ಜೀವದ ವಿಲವಿಲ ವದ್ದಾಟ ಮಾತಾಗಿ ಹೊರಬಿದ್ದ ತರಹ. ದೈಹಿಕ ಕಾಮನೆ, ಮಾನಸಿಕ ಭಾವನೆ ಹಾಗೂ ಇವೆರಡರ ನಡುವಿನ ಒದ್ದಾಟ, ತಲ್ಲಣ, ತುಮುಲಗಳ ಚಿತ್ರಣ..

ಬೆಂಕಿಯ ಅಲೆ ಮೈ ತಟ್ಟಿದೆ
ನಿಮಿರಿ ನಿಂತ ರೋಮ
ಪ್ರಜ್ವಲಿಸುವ ಸಲೆಯಾಗಿದೆ
ಒಡಲೊಳಗಿನ ಕಾಮ ||

ಒಳಗುಟ್ಟಿದೆ ಹೊರಗುಟ್ಟಿದೆ
ವೇದನೆ – ನಗು ಒಸಗೆ
ಒಣ ಮೌನದಲೇ ಘೀಳಿಟ್ಟಿದೆ
ಮರೆತ ಮನದ ಬೆಸುಗೆ… ||

ತುಟಿ ಮುತ್ತಿನ ಹನಿ ಹನಿಯಲಿ
ಬಿಸಿಯೇರಿದ ಬಯಕೆ
ಬಳಲಿ ಬೆಂದು ಬಿರುಕಾಗಿದೆ
ಕಾದು ನಿನ್ನಾ ಮನಕೆ…||

ಕೋಲಾಟದ ಬಡಿತಕ್ಕೆದೆ
ಏರಿಳಿದಿದೆ ಕಾವು
ಹದಿ ಹರೆಯಕೆ ಮುಪ್ಪಡರಿದೆ
ನೀನುಡಿಸಿದ ನೋವು…||

ನೆನಪಾಗದೆ ಬಿಸಿಯುಸಿರಲಿ
ಹೆದೆಯೇರಿದ ಇರುಳು
ಮತ್ತೇರಿಸಿ ಮನದಣಿಸಿದ
ಪರಿವಿಲ್ಲದ ಹಗಲೂ ? ||

ಸಾಕಾಗಿದೆ ಈ ವಿರಹದ
ದಳ್ಳುರಿಯಲಿ ನೋವು..
ಮರೆತೆಲ್ಲವ ಬರಬಾರದೇ
ನೀಗಿ ಮನದ ಬಾವು…||

– ನಾಗೇಶ ಮೈಸೂರು

00505. ವಿಷಾದಗಳು


00505. ವಿಷಾದಗಳು
_________________

ವಿಷಾದಗಳ ಹಲವು ವಿಶ್ವ ರೂಪಗಳಲ್ಲಿ, ಕೆಲವು ವಿಷಾದವ್ಹುಟ್ಟಿಸಿದ ಪ್ರತಿಕ್ರಿಯೆಗಳು ಮತ್ತೊಂದು ತರದ ವಿಷಾದವಾಗಿಯೆ ಹೊರಹೊಮ್ಮುವ ವ್ಯಂಗ್ಯ, ಈ ಸಾಲುಗಳಲ್ಲಿ ಅಡಕ. ಹೊರಬರುವ ಯತ್ನವೆ ಹೋರಾಟದ ದನಿಯಾದರು ಅದನ್ನಡಗಿಸುವ ವಾಸ್ತವಗಳ ಗುದ್ದಿನ ಶಕ್ತಿ, ಈ ಕವಿತೆಯ ಮತ್ತೊಂದು ಭಾವ. ವಿಷಾದಗಳನೆ ಬಿತ್ತಿ ವಿಷಾದಗಳನೆ ಬೆಳೆವ ವಿಷಾದವೆ ಇದರ ಸಂಗ್ರಹ ಸಾರ.

  
(Picture source wikipedia : https://en.m.wikipedia.org/wiki/File:Maud-Muller-Brown.jpeg)

ನಿನ್ನ ನೆನಪಲ್ಲಿ ಅರಳುತ್ತವೆ
ನೂರೆಂಟು ಕವನ, ಚಿತ್ರ …
ಅಂಚೆಯಲ್ಲಿ
ಸಂಪಾದಕರ ವಿಷಾದ ಪತ್ರ ||

ಮುಗ್ದ ನಗುವಲ್ಲಿ ಆಸೆಯ
ಚಿಮ್ಮಿಸಿದ್ದು ಇತಿಹಾಸ..
ನಿನ್ನ ಪ್ರತಿಕ್ರಿಯೆ –
ಅರ್ಥವಾಗದ ಮಂದಹಾಸ ||

ಅಪ್ಪಿ ಬಿಸಿಯಾಗಲೆ ಬಯಸಿ
ಪಡೆದದ್ದು ನಿನ್ನ ಸಂಗ..
ಆಗಿದ್ದು ಬೆಂಕಿ ಮುಟ್ಟಿದ
ಸುಟ್ಟ ರೆಕ್ಕೆಯ ಪತಂಗ ||

ಕನಸ ಕಣ್ಣಲ್ಲಿ ನೋವ
ಮರೆಸಿದ್ದು ನಿನ್ನ ಪ್ರೀತಿ ;
ಯಾರ ಬಯಕೆಗೋ ಬಿರಿದ
ಹೂವಾಗಿ ಬರಿಯ ಭ್ರಾಂತಿ…||

ಸಂಕ್ರಾಂತಿ ನೋವ ಮನದಿ
ಹಂಚಿದ್ದು ಹಚ್ಚ ಹಸಿರು..
ಆ ನೋವ ಬಿತ್ತಿ ದಿಗ್ಭ್ರಮೆಯ
ಬೆಳೆದಿದೆ ಕ್ಷೀಣ ಉಸಿರು…||

– ನಾಗೇಶ ಮೈಸೂರು

00504. ಸಂಕ್ಷಿಪ್ತದಲಿ…ಬದುಕು


00504. ಸಂಕ್ಷಿಪ್ತದಲಿ…ಬದುಕು
_________________________

ಕೆಲವು ತುಣುಕುಗಳನ್ನು ಪುಟ್ಟ ಸಂಕ್ಷಿಪ್ತ ಪದ್ಯ ಪಂಕ್ತಿಗಳಾಗಿ ಹೆಣೆದ ಸಾಲುಗಳು – ಬದುಕು, ಶಿಕ್ಷಣ, ಬ್ರಹ್ಮಚರ್ಯ, ಮನುಜ, ಮರಣ..  

 (Picture source : https://en.m.wikipedia.org/wiki/File:Coles_Phillips2_Life.jpg)

ಬದುಕು-
ಮೆಟ್ಟಿದರೆ ಪಲುಕು;
ಹಿಮ್ಮೆಟ್ಟಿದರೆ ದಿನ ನೂಕು..
ಮುನ್ನುಗ್ಗಿದರೆ ಸಿಕ್ಕೆ ಬಿಡುವ ಪರಾಕು! |

ಶಿಕ್ಷಣ-
ಸಿಕ್ಕರೆ ಸುಲಕ್ಷಣ;
ಕೈ ತಪ್ಪಿದರೆ ಅವಲಕ್ಷಣ..
ಮೈಯಪ್ಪಿದರೆ ಅವನೆ ಬಲು ಜಾಣ ! ||

ಬ್ರಹ್ಮಚಾರಣ-
ಸಖ ದಕ್ಕದ ಕಾರಣ;
ಸಖಿ ಸಿಕ್ಕದ ಗೋಳು ಮಣ..
ಸನ್ಯಾಸ ಸಖಿ ಸಖರ ನೋವು ಭಕ್ಷಣ ! ||

ಮನುಜ-
ಮನುವಿನ ವತ್ಸಜ;
ಮನ್ವಂತರ ದಾಟಿದ ನಿಜ..
ಅರಿತರಿಯದೆ ನಿಸರ್ಗ ಬಿತ್ತಿದ ಖನಿಜ ! ||

ಮರಣ-
ಮಂಕುತಿಮ್ಮನ ಹರಣ;
ಹುಟ್ಟುಸಾವಿನ ತುಸು ಸ್ಮರಣ..
ಸುಖ ದುಃಖದ ನಡುವಿನ ತೋರಣ ! ||

——————————————————————–
ನಾಗೇಶ ಮೈಸೂರು
——————————————————————–

00503. ಅಜೀರ್ಣ ಖಳ ಬೊಜ್ಜಿನ ಗಾಳ! (ಜಿದ್ದಿನ ಜಿಡ್ಡು ದೇಹದ ಜಡ್ಡು)


00503. ಅಜೀರ್ಣ ಖಳ ಬೊಜ್ಜಿನ ಗಾಳ! (ಜಿದ್ದಿನ ಜಿಡ್ಡು ದೇಹದ ಜಡ್ಡು)
___________________________________________________

ಹೀಗೆ ಚೂರು ಚೂರೆ ಒಳಸೇರುವ ಖಳ, ದಿನಗಳೆದಂತೆಲ್ಲ ಒಟ್ಟುಗೂಡುತ್ತ ದಿನೆ ದಿನೆ ನಿಧಾನವಾಗಿ, ವಿಧವಿಧಾನವಾಗಿ ತರತರದ ತೊಡಕು, ತೊಂದರೆಗಳ ಬಲೆಗೆ ಸಿಲುಕುವ ಪರಿ ಎರಡನೆ ಭಾಗದ ಸಾರ. ಕೆಡುತ್ತ ಹೋಗುವ ದೇಹದ ಆರೋಗ್ಯ, ಉಬ್ಬುತ್ತ ಹೋಗುವ ಉದರ ವಿನ್ಯಾಸ, ಕುಗ್ಗುತ್ತ ಹೋಗುವ ಚಟುವಟಿಕೆಯ ದಾಯ, ಮುಗ್ಗುಲಿಡಿದಂತೆ ಅನಿಸಿಬಿಡುವ ಇಡಿ ದೈಹಿಕ ವ್ಯವಸ್ಥೆ – ಹೀಗೆ ಇದೆಲ್ಲದರತ್ತ ನೋಡುವ ಇಣುಕು ನೋಟ ಈ ದ್ವಿತೀಯಾರ್ಧದ ಸಾರಾಂಶ.

  
(Picture sourcewikipedia : https://en.m.wikipedia.org/wiki/File:Fatmouse.jpg)

ಚೂರುಚೂರು ವೈವಿಧ್ಯ
ಒಟ್ಟಾಗಿ ಸೇರಿ ದುರ್ವಿದ್ಯ
ಹೊಟ್ಟೆ ಸೇರೆ ಕೆಟ್ಟು ಅಮೇಧ್ಯ
ಸಂಭಾಳಿಸಲು ಬೇಕು ಧನುರ್ವಿಧ್ಯ ||

ಕಷ್ಟ ಕಷ್ಟ ವೈವಿಧ್ಯತೆ
ಅನಿಯಂತ್ರಣದ ಸಾಧ್ಯತೆ
ನಾಲಿಗೆ ಚಪಲ ತಡೆಯೆ ಸಫಲ
ಆದವ ಮಾತ್ರ ಗೆಲ್ಲುವ ಹಾಲಾಹಲ ||

ತಕತಕ ದಿನಕುಹಕ
ಆಕರ್ಷಣೆ ಮನ ಸೋಲುತ
ಸಡಿಲ ಬಿಡುವರು ಒಮ್ಮೆಗೆನುತ
ಒಮ್ಮೆಯಾಗಿ ನಾಳೆ ಪಾಳಿಯ ಸತತ ||

ವ್ಯಾಸ ವ್ಯಾಸ ಸನ್ಯಾಸ
ಗುಡ್ಹಾಣ ಹೊಟ್ಟೆ ವಿನ್ಯಾಸ
ಭೂಮಿ ಸುತ್ತುವಂತೆ ವರುಷ
ಇಳಿಸಲಿಕ್ಕೆ ನೂರಾರು ಪುರುಷ ||

ಬೊಜ್ಜುಬೊಜ್ಜು ಮೈಗೊಜ್ಜು
ದಿನ ಒಡದಿದ್ದರೆ ನುಜ್ಜುಗುಜ್ಜು
ಮೈ ಚಳಿ ಬಿಡದಿರೆ ದೇಹ ಪೂರ್ಣ
ವಾಸಿಯಾಗಳು ಬೇಕು ವೈದ್ಯ ಚೂರ್ಣ ||

——————————————————————-
ನಾಗೇಶ ಮೈಸೂರು
——————————————————————-

00502. ಚಿತ್ತ ಜಿಹ್ವಾ ಚಪಲ!(ಜಿದ್ದಿನ ಜಿಡ್ಡು ದೇಹದ ಜಡ್ಡು)


00502.  ಚಿತ್ತ ಜಿಹ್ವಾ ಚಪಲ!(ಜಿದ್ದಿನ ಜಿಡ್ಡು ದೇಹದ ಜಡ್ಡು)
_________________________________________

ಬಾಯೃಚಿಯನ್ನು ಗೆಲ್ಲಬಲ್ಲ ಸಂತರು, ಜಿಹ್ವಾ ಚಾಪಲ್ಯವನ್ನು ನಿಯಂತ್ರಿಸಬಲ್ಲ ಅಸಾಧಾರಣ ಶೂರರು ಎಲ್ಲೆಡೆಯೂ ಕಾಣಸಿಗದ ಅಪರೂಪದ ಸರಕೆಂದೆ ಹೇಳಬಹುದು. ರುಚಿಯಾಗಿದೆಯೆಂದೊ, ಯಾರೊ ಬಲವಂತಿಸಿದರೆಂದೊ, ಇದೊಂದೆ ಬಾರಿ ತಿಂದು ನಾಳೆಯಿಂದ ನಿಯಮ ಪಾಲಿಸುವುದೆಂದೊ, ಆಸೆ ತಡೆಯಲಾಗದೆಂದೊ – ಒಟ್ಟಾರೆ ಒಂದಲ್ಲ ಒಂದು ಕಾರಣಕ್ಕೆ ಜಿಹ್ವಾಚಪಲದ ಸೆಳೆತಕ್ಕೆ ಬಲಿಯಾಗುವವರೆ ಎಲ್ಲ. ಅದರ ವಿಶ್ವರೂಪದ ತುಣುಕನ್ನು ಪರಿಚಯಿಸುವ ಮೊದಲ ಭಾಗ ಈ ಕವನ.

  
(Picture source : https://en.m.wikipedia.org/wiki/File:Trimyristin-3D-vdW.png)

ಜಿಡ್ಡುಜಿಡ್ದಾಗಿದೆ ಕೈ
ಬಲು ಜಡ್ದಾಗಿದೆ ಮೈ
ಲಡ್ಡು ಹಿಡಿದ್ಹೋಗಿದೆ ಮೂಳೆ
ಇನ್ನಷ್ಟು ಕಳೆಯೋದಿದೆ ನಾಳೆ ||

ರುಚಿರುಚಿಯಾಗಿದೆ
ಬಲು ಶುಚಿಯಾಗಿದೆ
ತೇಲಿದೆ ಎಣ್ಣೆ ಮುಚ್ಚು ಕಣ್ಣೆ
ಬಾಯೃಚಿ ಮುಂದೆ ಗಂಡು ಹೆಣ್ಣೆ ||

ಗರಿಗರಿಯಾಗಿದೆ
ಕರಿ ಸರಿ ಕರಿದಾಗಿದೆ
ಹೀರಿಬಿಟ್ಟು ಜೀವಸತ್ವ ಗುಟ್ಟು
ಬಣ್ಣ ಮೈಮಾಟವೆ ನೀರೂರಿಸಿಟ್ಟು ||

ನಳ ನಳಪಾಕ
ಮಾಡುವರ ಪುಳಕ
ಬಾಯ್ಮಾತಿಗೆ ಸಾಕ ಜಳಕ
ಖುಷಿಯಾಗುವಂತೆ ತಿನ್ನಬೇಕ ||

ಬಗೆ ಬಗೆ ತಿಂಡಿ
ತಿನ್ನಲು ಜೀವಹಿಂಡಿ
ಮುಂದಿಟ್ಟು ನಂಟು ನಲ್ಮೆ
ಒತ್ತಾಯಿಸಿ ಬಲು ಕೆಳೆ ಬಲ್ಮೆ ||

————————————————————-
ನಾಗೇಶ ಮೈಸೂರು
————————————————————-

00501. ಅಂತರ್ಯಾನದ ಅವತಾರ


00501. ಅಂತರ್ಯಾನದ ಅವತಾರ
____________________________

  
(Picture source from: http://plato.stanford.edu/entries/introspection/Rubin2.jpg)

ಹುಡುಕಾಟದ ತವಕ ಮಾನವನ ಮನಸಿನ ಕೊನೆ ಮೊದಲಿಲ್ಲದ ಕುತೂಹಲದ ನಿರಂತರತೆಯ ಸಂಕೇತ. ಈ ಹುಡುಕಾಟ ಕೆಲವೊಮ್ಮೆ ಆಧ್ಯಾತ್ಮಿಕದ ಪರಿಧಿಯ ಸುತ್ತ ಗಿರಕಿ ಹೊಡೆದರೆ, ಮತ್ತೊಮ್ಮೆ ಭೌತಿಕ ಜಗದ ವಾಸ್ತವಿಕತೆಯ ಸುತ್ತ ತೊಳಲಾಡಿರುತ್ತದೆ. ಈ ಹುಡುಕುವಿಕೆ ಭೌತಿಕ ಹಾಗೂ ಆಧ್ಯಾತ್ಮಿಕದ ನಡುವೆ ಓಲಾಡುವ ವಸ್ತುವಾದರೆ, ಎರಡು ದೋಣಿಗಳಲ್ಲಿ ಕಾಲಿಟ್ಟು ನಡೆವ ಪ್ರಕ್ರಿಯೆಯಂತೆ ಹುಡುಕಾಟವೂ ಲೋಲಕದಂತೆ ಎರಡರ ಮಧ್ಯೆ ತೂಗಾಡತೊಡಗುತ್ತದೆ.

ಅಂತರ್ಯಾನದ ಈ ಪ್ರವರ ಅಂತದ್ದೆ ಹುಡುಕಾಟವೊಂದರ ವರ್ಣನೆ. ಆಧ್ಯಾತ್ಮಿಕದ ಹುಡುಕಾಟದ ಗಮ್ಯವನ್ಹೊತ್ತ ಆಶಯವೊಂದು ಭೌತಿಕ ಜಗತ್ತಿನಲ್ಲಿ ಸೆಣೆಸುತ್ತ ಅಧ್ಯಾತ್ಮದ ಬೆಳಕಿಗೆ ಹುಡುಕಿ ಹೊರಡುವ ಪಯಣ ಇದರ ವಸ್ತು; ಆದರೀ ಭೌತಿಕ ಜಗ ಹೊರಗಿನ ಪರಿಸರವಾಗಿರದೆ, ಒಳಹೊಕ್ಕು ನೋಡುವ ಅಂತರ್ಯಾನವಾದಾಗ ದರ್ಶನವಾಗುವ / ಹಾದು ಹೋಗುವ ಒಳಾಂಗಗಳ ಸಾಂಕೇತಿಕತೆ ಇಲ್ಲಿ ಚಿತ್ರಿತ. ಪಯಣದ ಅಂತ್ಯದಲಿ ಕೊನೆಗೂ ಕಾಣಿಸುವ ತಾತ್ವಿಕ, ಆಧ್ಯಾತ್ಮಿಕ ಗಮ್ಯವೆ “ಅಂತರ್ಯಾನದ ಅವತಾರ”

ನನ್ನೊಳಗನು ನಾನೇ ಹೊಕ್ಕಾದ ಮೇಲೆ
ನಾನೇ ನಾನಾಗುವ ನಾಳೆ ಇನ್ನು ಮೇಲೆ
ಹೊಕ್ಕ ಒಳಗಿನ ಪಾಳು ನೆನೆದರೆ ಹಾಳು
ಮಿಕ್ಕ ಸರಿಗಟ್ಟುವ ಪಾಲು ಬೆರೆಸಿ ಹಾಲು ||

ಒಳಚಕ್ಷುವಿಗೆ ಕುರುಡು ಕಾಣದಾ ಕರಡು
ಕಂಗಳಿಲ್ಲದ ಒಳಾಂಗ ಕಂಡರೂ ಕೊರಡು
ಇನ್ನು ನಂಬಿಕೆ ಸಾಕು ಹೂತು ಬಿಡಬೇಕು
ಅದಕೆ ಗಟ್ಟಿಸಿದೆ ಮನಸೊಳ್ಹೋಗಬೇಕು ||

ಅಲ್ಲ ಸುಲಭದ ಪಯಣ ಕತ್ತಲೆ ಸಂಪೂರ್ಣ
ತಡವುತ ಎಡವುತ ನಡೆವ ಅಗಮ್ಯ ಯಾನ
ಅಂಗಾಂಗ, ಅನ್ನಾಂಗ ತಣ್ಣನೆ ಮೂಳೆ ಮೌನ
ಹರಿವ ರಕ್ತದೆ ಸ್ನಾನ ಕಪ್ಪು ನರನಾಡಿ ಚರಣ ||

ಕಾಣದ ಅನುಭವದಾ ನಡುವೆ ಮತ್ತೆ ಜಗ್ಗು
ಅನುಭವಿಸೋ ಅನುಭಾವದ ಗಡಿಗೆ ಹಿಗ್ಗು
ಕುಳುಕುಳು ಕಾಲುವೆಯರಿವು ಬಿದ್ದು ಜಠರ
ಅನುಭವವ ಜೀರ್ಣಿಸಲು ಕರುಳಿನಾ ವಠಾರ ||

ಶ್ವಾಸಾಂಗ ಹೃದಯ ಹೊಕ್ಕಂತೆ ತುಸು ನಿರಾಳ
ಶೋಧಿಸಿದ ಗಾಳಿ, ನೆತ್ತರು ಮಾಡಿಸಿತು ಹೇರಳ
ಲಬಡಬದ ನಡುವೆ ತೇಲಿ ವಿಹರಿಸಿದ ಸಮ್ಮೇಳ
ಗಟ್ಟಿ ಆಧಾರಕಿಡಿದು ನಿಂತ ಅಸ್ತಿಗಳ ಹಿಮ್ಮೇಳ ||

ಅಂತೂ ಶಿರ ಶಿಖರ ಪಾದ ಉಂಗುಷ್ಟಾಂತರ ವರ್ಷ
ನೆನೆದು ಹಸಿಯಾದಂತೆಲ್ಲ ಹುಟ್ಟಿಸಿತು ಹೊಸ ಹರ್ಷ
ನೀರಿಗಿಳಿದಾ ಮೇಲೆ ಚಳಿಯೇನು ಮಳೆಯೇನು ಕರ್ಮ
ಅಂಧಕಾರದಲೇ ಈಜುತ ಲಹರಿ ಹರಿಬಿಟ್ಟಿತು ಮರ್ಮ ||

ಆಗ ಕಾಣಿಸಿದ ಅಲ್ಲಿ ಹೊಳೆ ಹೊಳೆಯುವ ಹರಿಕಾರ
ಕಣ್ಣು ಕೋರೈಸಿದ ತಂಪು ಕಾಂತಿಗಳನೆಸೆವ ಸರದಾರ
ಹೊಮ್ಮಿಸುತ ಅಲೆಅಲೆ ಪೂರ ಹರಿಸುತ ಶಾಂತಸಾಗರ
ಹಿಡಿದೆತ್ತಿ ದಡ ಕೂರಿಸಿ ಮುಗಿಸೆ ಅಂತರ್ಯಾನವತಾರ ||

– ನಾಗೇಶ ಮೈಸೂರು

00500. ಹೇಗಿದ್ದಾರೋ ಹಾಗೆ …! (ವಯಸೆ ಆಗದ ದೇವರುಗಳು) (ಮಕ್ಕಳಿಗೆ)


00500. ಹೇಗಿದ್ದಾರೋ ಹಾಗೆ …! (ವಯಸೆ ಆಗದ ದೇವರುಗಳು) (ಮಕ್ಕಳಿಗೆ)
______________________________________________

ದೇವರುಗಳಲ್ಲಿ ನಂಬಿಕೆಯಿರುವ ನಾವೆಲ್ಲ ದೇವರನ್ನು ಕಂಡಿರುವುದು ಫೋಟೊಗಳ ಮೂಲಕ, ದೇವಾಲಯದ ಮೂರ್ತಿಗಳಿಂದ, ಚಿತ್ರಕಲೆಯ ಮೂಲಕ ; ಅದು ಬಿಟ್ಟರೆ ಚಲನ ಚಿತ್ರಗಳ ವೇಷ ಭೂಷಣಗಳ ಮುಖಾಂತರ. ಹೀಗೆ ಎಲ್ಲೆ ನೋಡಿರಲಿ, ಯಾರೆ ನೋಡಿರಲಿ – ನಮ್ಮ ತಾತ, ಮುತ್ತಾತ, ಮುತ್ತಜ್ಜರುಗಳಿಂದ ಹಿಡಿದು ನಮ್ಮ ಮಕ್ಕಳು ಮರಿಗಳ ತನಕ – ಈ ದೇವರುಗಳು ಮಾತ್ರ ಹಾಗೆ ಒಂದೆ ತರಹ ಕಾಣುತ್ತಾರೆ. ವಯಸ್ಸಾಗದ ಅದೆ ಯುವ ಮುಖ, ಕಳೆ ಇತ್ಯಾದಿಗಳು ಅವರ ಅಮೃತ ಸಿದ್ದಿ ಅಮರತ್ವದೊಂದಿಗೆ ಬೆರೆತು ಅವರ ಕುರಿತ ವಿಶಿಷ್ಟ ಕಲ್ಪನೆಗಳಿಗೆ ಮತ್ತಷ್ಟು ನೀರೆರೆದು ಪೋಷಿಸಿ, ಅವರನ್ನು ನಮ್ಮ ದೃಷ್ಟಿಗಳಲ್ಲಿ ಮತ್ತಷ್ಟು ವೈಶಿಷ್ಠ್ಯಪೂರ್ಣರೆನಿಸಿಬಿಡುತ್ತವೆ. ಆ ಭಾವದ ಸಾರಾಸಗಟಿನ ಚಿತ್ರಣ ಈ ಕವನ.

  
(Photo source, wikipedia : https://en.m.wikipedia.org/wiki/File:Hindu_deities_montage.png)

ತಾತ ಮುತ್ತಾತನ ಕಾಲದಿಂದಲೂ
ಹೇಗಿದ್ದಾರೋ ಹಾಗೆ ಇರುವರು
ಕೊಂಚವೂ ಕೂಡ ಕೊಂಕಿದಂತಿಲ್ಲ
ವಯಸೆ ಆಗದೆ ನಿಂತಿಹರಲ್ಲ ||

ದೇಗುಲಗಳಲಿ ಬಾಗಿಲ ತೆಗೆದು
ಹೊಸ ಬಾಗಿಲು ಗೋಡೆ ಕಟ್ಟಿದರೂನು
ಒಂದೆ ಸರ್ತಿ ಪ್ರಾಣಮೂರ್ತಿ ರೀತಿ
ಒಂದೆ ಪ್ರಾಯದಿ ನಗುತಿಹ ಕೀರುತಿ ||

ಒಂದೆ ದಿರುಸು ಶಸ್ತ್ರಾಸ್ತ್ರದ ಬಿರುಸು
ಒಂದೆ ಕಿರುನಗೆ ಮುಗುಳ್ನಗೆ ಸೊಗಸು
ಅಲಂಕಾರ ಮೇಲಚ್ಚಿದರೆಷ್ಟು ಸಗಟು
ಮೊತ್ತದಿ ಹಾಗೆ ಉಳಿಯುವ ಒಗಟು ||

ಎಲ್ಲ ದೇವರಿಗೂ ಇಲ್ಲದ ಮೀಸೆ
ಯೌವನ ಪ್ರಾಯ ಸೂಸುವ ಪರಿಷೆ
ಬದಲೇ ಇಲ್ಲದ ಬಿಳಿ ಮುಖವಾಡ
ಕಿರೀಟ ಧರಿಸೆ ಓಡಾಡುತ ಮೋಡ ||

ಗುಡಿಯಲ್ಲಿರಲಿ ಸಿನಿಮಾಗೆ ಬರಲಿ
ಬದಲೇ ಆಗದ ದೇವರ ಖಯಾಲಿ
ಮತ್ತದೆ ಸೋಜಿಗ ತಿಳಿಯೆ ಮೋಜಿಗ
ಮತ್ತವರವರನೆ ನೋಡುತ ಈ ಜಗ ||

———————————————————————
ನಾಗೇಶ ಮೈಸೂರು
———————————————————————

00499. ತಾರುಣ್ಯ ಹುಟ್ಟಿದಾರಣ್ಯ…


00499. ತಾರುಣ್ಯ ಹುಟ್ಟಿದಾರಣ್ಯ…
______________________________________

ತಾರುಣ್ಯವೆಂಬುದು ಪ್ರತಿ ವ್ಯಕ್ತಿಯ ಬಾಳಿನ ಅಮೋಘ ಅಧ್ಯಾಯ. ರೆಕ್ಕೆ ಬಿಚ್ಚಿದ ಹಕ್ಕಿಯಂತೆ, ಅಡೆ ತಡೆಯಿಲ್ಲದೆ ಹಾರುವ ಪತಂಗದಂತೆ ಹಾರಾಡಿಸುವ ಈ ವಯಸಿನ ರಾಗ ಲಹರಿ ಅರಳಿ, ಹೂವ್ವಾಗಿ, ತೆನೆಯಾಗಿ ಮಾಗುವ ಪರಿಯೆ ಸೊಬಗು. ಆ ಹಾದಿಯಲ್ಲಿ ಸಂತಸ , ಹರ್ಷವೆಲ್ಲ ಇರುವಂತೆಯೆ ನೋವು, ದುಃಖ, ಕಲಿಕೆಯೂ ಅಂತರ್ಗತ. ಆ ತಾರುಣ್ಯದ ಹಮ್ಮಿನಲ್ಲಿ ಏನೆಲ್ಲಾ ಘಟಿಸುವುದೆನ್ನುವುದನ್ನು ಅನುಭವಿಸಿ, ಅನುಭಾವಿಸುವುದೆ ಒಂದು ವಿಸ್ಮಯ ಲೋಕ; ಹುಟ್ಟುತ್ತಲೆ ಹೊಸತೊಂದು ಅರಣ್ಯ ಗರ್ಭವನ್ನೆ ಬಿಚ್ಚಿಡುತ್ತಾ ಹೋಗುವ ಆ ರಿಂಗಣದ ಭಾವವನ್ಹಿಡಿಡುವ ಯತ್ನವೆ ಈ ಕಾವ್ಯ – ತಾರುಣ್ಯ ಹುಟ್ಟಿದಾರಣ್ಯ.

ಮನದ ರಿಂಗಣ ತನನ
ವಯಸಿನ ಸಮ್ಮೋಹನ
ಬಗೆಯಾ ತನು ತಿಲ್ಲಾನ
ಅದೇಕೊ ರೋಮಾಂಚನ ||

ಗುರುಗುಟ್ಟಿ ಸರಿ ಪ್ರಾಯ
ಯಾರಿಟ್ಟರೊ ಅಡಿಪಾಯ
ಬುರುಬುರನೇ ಮೊಗ್ಗರಳಿ
ಹೂವ್ವಾದ ದೇಹ ಮುರಳಿ ||

ತನುವರಳುತಲೆ ಆತಂಕ
ನೀನಿರುವೆ ಎಲ್ಲಿಯತನಕ
ಹಿಗ್ಗೊ ಸಿಗ್ಗೊ ಕುಗ್ಗೊ ಸುಖ
ಗೊಂಚಲ ಗೊಂದಲ ಸಖ ||

ಮೂರು ಗಳಿಗೆ ಕೂರುವ ದೆಶೆ
ಆರುಗಳಿಗೆ ಹಾರಾಡುವ ಆಸೆ
ಒಂಭತ್ತರ ವೇದನೆ ಒದ್ದಾಟಕೆ
ಬೇಕಿತ್ತೆ ತೆನೆ ಯೌವನದಾಟಕೆ ||

ಎಲ್ಲಿತ್ತೊ ಹರ್ಷದ ನೆಲ್ಲಿಕಾಯಿ
ಹುಳಿಯಾದರು ಸಿಹಿ ಬಾಯಿ
ರೆಕ್ಕೆ ಬಿಚ್ಚಿದ ಪತಂಗದ ಸಂಗ
ಮೈ ಬಿಚ್ಚಿ ಹಾರಿದ್ಹಕ್ಕಿ ಪ್ರಸಂಗ ||

——————————————————————–
ನಾಗೇಶ ಮೈಸೂರು
——————————————————————–

00498. ಸಿಗಿದು ತೋರಣ ಕಟ್ಟಿ…..!


00498. ಸಿಗಿದು ತೋರಣ ಕಟ್ಟಿ…..!
_________________________________

ಹಳೆಯ ಬಾಲ್ಯದ ಶಾಲಾ ದಿನಗಳಲ್ಲಿ ನೆನಪಾಗುವ ಒಂದು ಸಾಮಾನ್ಯ ಚಿತ್ರಣ – ಸ್ಕೂಲಿಗ್ಹೋಗಲಿಕ್ಕೆ ಹಠ ಮಾಡಿ ನಾನಾ ರೀತಿ, ನಾಟಕವಾಡುವ, ನೆಪ ಹೂಡುವ ಮಕ್ಕಳ ಆಟ. ಅದರಲ್ಲಿ ಕೆಲವು ಮೊಂಡು ಮಕ್ಕಳಿದ್ದರಂತೂ ಹೇಳ ತೀರದು. ಹೆಡೆಮುರಿ ಕಟ್ಟಿ ಹೊಯ್ವ ಶತೃ ಪಾಳಯದ ಸೈನಿಕನಂತೆ, ಜುಟ್ಟೋ, ಕತ್ತಿನ ಪಟ್ಟಿಯೊ, ಕೊನೆಗೆ ಬರದವನನ್ನು ದರದರನೆಳೆದೊಯ್ಯುವ ಅಂಗೈ ತುದಿಯೊ – ಒಟ್ಟಾರೆ ಬಾಯಲ್ಲಿ ರೋಧನ, ರಸ್ತೆಯಲ್ಲಿ ಕಥನ, ಕೈಲಿಡಿದ ಬೆತ್ತದಿಂದ ಮೈಯೆಲ್ಲಾ ನರ್ತನ ಹಾಗೂ ಬೈಗುಳದ ಮಳೆ ಸುರಿಯುತ್ತಿರುವ ಬಾಯಿಂದ ‘ಸಿಗಿದು ತೋರಣ ಕಟ್ಟೆ ಕಟ್ಟುವ’ ವಾಗ್ದಾನ! ಇದರ ಒಂದು ಪುಟ್ಟ ಚಿತ್ರಣ – ‘ಸಿಗಿದು ತೋರಣ ಕಟ್ಟಿ’ ಕವನ…

ನೆನಪಿದೆಯ ದಿನಗಳು
ಸಿಗಿದು ತೋರಣ ಕಟ್ಟಿದ ಬಾಳು
ಅಪ್ಪನೊ ಉಪಾಧ್ಯಾಯನೊ ಗೋಳು
ಕೆಂಗಣ್ಣಲಿ ನುಡಿದಾ ಕೋಲು ||

ಶಾಲೆಗೆ ಹೊರಟರೆ ಅಂದು
ಯಾವ ದಸರೆ ಅದರ ಮುಂದು
ಕೈ ಹಿಡಿದೆತ್ತಿದಳವ್ವ ದರದರ ಸೆಳೆದು
ರಸ್ತೆಯುದ್ದ ನಾಟ್ಯ ಬೆತ್ತವೆ ಮುರಿದು ||

ಅಳುವೆಂದರೆ ಅರ್ಭಟ, ಗಾನ
ಆಕರ್ಷಿಸುವಂತೆ ಸುತ್ತಲಿನ ಜನ
ಬಿಟ್ಟಾಳೆ ಕಾಳಿ ತಾಯಿ ಚಾಮುಂಡಿವನ
ಬಾಸುಂಡೆ ನಿಲಿಸದ ಕೋಲ್ನರ್ತನ ||

ಕರದೆ ದಂಡಾಯುಧ ವೈಭವ
ಕಿವಿ ಹಿಡಿದೆತ್ತಿದಂತೆ ಮೊಲ ಕಾಯವ
ಬಾಯ್ಕುಹರದೆ ವಂಶಾವಳಿಯ ಶಿವ ಶಿವ
ಬೀಸಿಗೆ ಮೇಲೆದ್ದು ಬಿದ್ದ ಮೊಲ ಜೀವ ||

ಸಹಸ್ರ ನಾಮಾರ್ಚನೆ ಸತತ
ತನು ಸಿಗಿದ್ಹಾಕುವ ವಾಗ್ದಾನ ಸಹಿತ
ಹಿಡಿತದಲೆ ಕಟ್ಟಿದ್ದರು ತೋರಣವಾಗಲೆ ಭೂತ
ಸಿಗಿದು ತೋರಣ ಕಟ್ಟುವ ಚರಮ ಗೀತ ||

——————————————————————-
ನಾಗೇಶ ಮೈಸೂರು
——————————————————————-

00497. ಸರಿಯೆ ಸಮಯದ ಗಡುವು?


00497. ಸರಿಯೆ ಸಮಯದ ಗಡುವು?
_______________________________

  
(Photo source, kannada wikipedia – https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Clock-french-republic.jpg)

ಈಗಿನ ಔದ್ಯೋಗಿಕ ಪ್ರಪಂಚದಲೆಲ್ಲರಿಗು ಪರಿಚಿತವಾದ ಪದ್ದತಿ ಕಾಲಗಣನೆ. ಪ್ರತಿಯೊಂದು ನಡುವಳಿಕೆಗೂ ಕಛೇರಿ, ಗಿರಣಿ, ಕಾರ್ಖಾನೆಗಳಲ್ಲಿ ಕಾಲ ಮಾಪನವೆ ಪ್ರಮುಖ ಮಾನದಂಡವಾಗಿ ಫಲಿತಗಳ, ಮಾನಕಗಳ ಅಳತೆಗೂ ಕಾಲವೆ ಪ್ರಮುಖವಾದ ಅಂಶವಾಗುವುದು ಸಹಜವಾಗಿ ಕಾಣುವ ಪ್ರಕ್ರಿಯೆ. ಕಾಲದ ಬೆನ್ನಲ್ಲೆ ಇಣುಕುವ ಶ್ರದ್ದೆ, ಶಿಸ್ತು, ಅಳತೆ ಮಾಡಿಸಿಕೊಳ್ಳಬಲ್ಲ ಸಾಮರ್ಥ್ಯ – ಇತ್ಯಾದಿಗಳ ತೋರಣವನ್ನೆಲ್ಲ ಬಿಚ್ಚಿ ಪಕ್ಕಕ್ಕಿಟ್ಟು ಅದು ಸರಿಯೆ, ತಪ್ಪೆ, ಪ್ರಸ್ತುತವೆ – ಎಂದು ಕೇಳುವ ಕವನ ‘ಸರಿಯೆ ಸಮಯದ ಗಡುವು?’ ಈ ರೀತಿಯ ಕಾಲಗಣನೆ, ಮಾಪನೆ, ಪರಿಗಣನೆ ಸಾಧುವೆ? ಎಷ್ಟರ ಮಟ್ಟಿಗೆ ಅದು ಫಲಿತಾಂಶ, ಗುರಿಸಾಧನೆಗೆ ಪೂರಕ ಎಂಬುದರ ಜಿಜ್ಞಾಸೆಯಲ್ಲಿ ಸಾಗುತ್ತದೆ..

ಶಾಲೆಯ ಎಲ್ಲ ಶಿಸ್ತಿನ ಮಕ್ಕಳು
ಜಯಶೀಲರೆ ಜೀವನದೊಳು?
ಶಿಸ್ತಿಂದ ಕೆಟ್ಟು ಕೆಳ ಕೂತವರುಂಟು
ಶಿಸ್ತಿಲ್ಲದೆ ಕೊಳೆತು ಹೋದವರೆಷ್ಟು? ||

ಆಫೀಸಿನಲ್ಲಿ ಸಮಯಪಾಲಕ ಜನ
ಕುಳಿತಿದ್ದರೆಂದರೆ ಪೂರ್ತಿ ದಿನ
ಉತ್ಪಾದಕತೆ ದಕ್ಷತೆ ಸರಿ ಹೆಚ್ಚುವುದೆ ?
ಕಳೆದ ಗಂಟೆಗಳೆಲ್ಲ ಫಲಿತದ ಸರಿಸದ್ದೆ? ||

ಎಷ್ಟು ಜನ ನೀತಿ ಪಂಚೆರಡು ಲಂಚೊಂದು
ಕಾಟಾಚಾರದಿ ಒಳಗೆ ಕೂತ ಬಂಧು
ಗುರಿ ಫಲಿತಾಂಶಗಳಲವರ ಅಳೆಯದಿರೆ
ಬರಿ ಸಮಯ ಲೆಕ್ಕದೆ ದಕ್ಷತೆ ಕೊಡುವರೆ? ||

ದಿಟದಿ ಕಲಿಸಬೇಕು ಎಲ್ಲೆಡೆ ಶಿಸ್ತಲ್ಲ ಸಮಯ
ಸರಿ ಸಹಜ ಮನೋಭಾವನೆಯ ದಾಯ
ಅದ ಕಲಿತವರೆಲ್ಲ ತಾನಾಗಿ ಎಲ್ಲೆಡೆ ಗೆಲ್ಲ
ಶಿಸ್ತು ಶ್ರದ್ಧೆ ಜವಾಬ್ದಾರಿ ಹಿಂದ್ಹಿಂದೆ ಸಕಲ ||

ಅದಕೆ ಕೆಡಿಸದೆ ತಲೆ ಶಿಸ್ತು ತುಂಬಿದ ನಾಲೆ
ಬಿಟ್ಟವರ ಕ್ರಿಯಾತ್ಮತೆ ಶಕ್ತಿ ಅರಳಲೆ
ಬೆಳೆಸಿ ಆತ್ಮವಿಶ್ವಾಸ ಜವಾಬ್ದಾರಿ ಮನೋಭಾವ
ತಾನಾಗೆ ಕುಗ್ಗುವುದು ಜನ-ಸತ್ಪ್ರಜೆಗಳ ಅಭಾವ ||

—————————————————————
ನಾಗೇಶ ಮೈಸೂರು
—————————————————————

00496. ಬಾಳೆ ಹೊಂಬಾಳೆ


00496. ಬಾಳೆ ಹೊಂಬಾಳೆ
________________________

  

(Picture source : kannada wikipedia – https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Luxor,_Banana_Island,_Banana_Tree,_Egypt,_Oct_2004.jpg)

ಬಾಳು ಬಾಳೆಯ ಗಿಡದ ಹಾಗೆ – ನೆಟ್ಟ ನೇರವೂ ಹೌದು, ಹಗುರವೂ ಹೌದು, ಕತ್ತರಿಸಲು ಸುಲಭವೂ ಹೌದು, ಸಿಹಿಯೂ ಹೌದು, ಅಳಿಸಲಾಗದ ಕಲೆಯೂ ಹೌದು, ಉಣಿಸುವ ಬಾಳೆಲೆಯೂ ಹೌದು, ಆ ಎಲೆಯಷ್ಟೆ ನವಿರಾದ ಜತನವೂ ಹೌದು, ಜಠರದ ಕಲ್ಲು ಕರಗಿಸುವ ಸ್ಪರ್ಶಮಣಿಯೂ ಹೌದು. ಈ ಬಾಳಿನ ಹೊಂಬಾಳೆಯನ್ನು ಕಾಯಿಂದ ಮಾಗಿಸಿ ಹಣ್ಣಾಗಿಸುವ ಬದುಕಿನ ಚಿತ್ರ ಸೂಚಿ – ಈ ಕವನ. ಬಾಳೆ ಪ್ರಬುದ್ದತೆಯಲ್ಲಿ ಮಾಗಿ ಹಣ್ಣಾಗಬೇಕೆಂಬ ಆಶಯವೂ ಇಲ್ಲಿಯದು.

ಬಾಳೇ ಎಳೆ
ಎಳಸು ಬಾಳೆಲೆ
ತೆಳುವಾದ ಹಾಳೆ
ಜತನ ಕಾದರೆ ಬಾಲೆ
ಎಳೆಳೆಯಾಗಿ ತೆರೆಯುವಳೆ ||

ಎಳೆತನ ಕಾಯ
ಜಾರಿಸುವಪಾಯ
ಗಾಳಿಗ್ಹರಿವ ಸಮಯ
ಕಾಯುತ್ತಲೆ ಸರಿ ಪ್ರಾಯ
ಸುತ್ತಿ ಮುಚ್ಚಿಡಲು ಉಪಾಯ ||

ಎಲೆಯ ಸಾರ
ದೋಣಿಯಾಕಾರ
ಸಿಗಿದು ಬೆನ್ನ್ಮೂಳೆ ತರ
ಕತ್ತರಿಸಿ ಮೂರಾಗುವ ಪೂರ
ಎಲೆಯಿಡೆ ಮೂರಾಳಿಗೆ ಆಹಾರ ||

ಬಾಳೇ ಗಿಡ
ನಿಂತಾಗ ನಡ
ಕಲಿಯುತ ಕನ್ನಡ
ಸೆಟೆದು ನಡೆವ ಜಡ
ಕಲಿತೆ ಬೆಳೆ ಬಾಳ ನಿಗೂಢ ||

ಗಿಡವಾಗಿ ಬಗ್ಗೆ
ಎಳೆ ಕಂದು ಕುಗ್ಗೆ
ಅಡಿಪಾಯದ ಮೊಗ್ಗೆ
ಮೈ ಮರೆತು ನುಗ್ಗಿ ನಗ್ಗೆ
ಜೀವಮಾನ ನೋವಿನ ಬುಗ್ಗೆ ||

——————————————————————-
ನಾಗೇಶ ಮೈಸೂರು
——————————————————————-
ಬಾಳೇ = banana (fruit), Life

00495. ಮೊಟ್ಟೆಯಿಡುವ ಕೋಗಿಲೆ, ಹುಡುಕಲೇಕೆ ಕಾಗೆ ನೆಲೆ?


00495. ಮೊಟ್ಟೆಯಿಡುವ ಕೋಗಿಲೆ, ಹುಡುಕಲೇಕೆ ಕಾಗೆ ನೆಲೆ?
_________________________________________

  
(photo source kannada wikipedia : https://kn.m.wikipedia.org/wiki/%E0%B2%9A%E0%B2%BF%E0%B2%A4%E0%B3%8D%E0%B2%B0:Asian_Koel_(Male)_I_IMG_8190.jpg)

ಪ್ರತಿಯೊಬ್ಬ ವ್ಯಕ್ತಿಯೂ / ವ್ಯಕ್ತಿತ್ವವೂ ದೌರ್ಬಲ್ಯ ಮತ್ತು ಪ್ರಾಬಲ್ಯಗಳ ಸಂತುಲಿತ ಮೊತ್ತ. ಪ್ರತಿಯೊಬ್ಬರ ಒಳಗೊ, ಜೀವನ ವಿಶೇಷದಲ್ಲೊ ಇಣುಕಿ ನೋಡಿದಾಗ ಮೇಲ್ನೋಟಕ್ಕೆ ಕಾಣುವ ಪ್ರಾಬಲ್ಯಗಳಷ್ಟೆ, ದೌರ್ಬಲ್ಯಗಳು ಎದ್ದು ಕಾಣುವುದು ಸಹಜ. ಮೊಟ್ಟೆಯಿಡುವ ಕೋಗಿಲೆ, ಹುಡುಕಲೇಕೆ ಕಾಗೆ ನೆಲೆ’, ಅಪ್ರತಿಮ ಗಾನದ ಕೊರಳಿದ್ದು , ಕುರೂಪಿಯ ಹಿದಿಕೆಯ್ಹೊತ್ತು ನಡೆಯಬೇಕಾದ ಅನಿವಾರ್ಯ, ಹಾಗೆಯೆ ಕಾಗೆಯ ಗೂಡಲಿ ಮೊಟ್ಟೆಯಿಟ್ಟು ಮರಿಮಾಡುವ ಅದರ ಸೋಮಾರಿತನದ ಕುಟಿಲತೆಗಳ ವಿವರಣಾತ್ಮಕ ಸ್ತರದಲ್ಲಿ ವಿಶ್ಲೇಷಣೆಗೆ ಯತ್ನಿಸುತ್ತದೆ.

ಗಾನಯೋಗಿ ಕೋಗಿಲೆ ಚಿಗುರಿಗೆ
ತಿಂದ್ಹಾಡುವ ಗಾಯನವೆ ಸೊಬಗೆ
ಮಧುರ ಕಂಠ ಪಾಲಿಸಿದ ದೈವಕೆ
ಸಮತೋಲನದಲಿ ಕಪ್ಪು ರೂಪಕೆ ||

ರೂಪವಷ್ಟಿದ್ದರೆ ಸಾಲದ ಒಗಟೇಕೆ
ಕುಯುಕ್ತಿ ಕುತಂತ್ರಗಳು ಜತೆಗೇಕೆ
ಬಸಿರಿಗೆ ಮೊಟ್ಟೆಯಿಟ್ಟು ಕೋಗಿಲೆ
ಸಾಕಲು ಹುಡುಕಲೇಕೆ ಕಾಗೆನೆಲೆ? ||

ಮುಗ್ದರಿರುವ ಜಗದಲಿ ಪೀಡಕರು
ಯಾವ ಸಮತೋಲನಕೊ ತೇರು
ಪರಪುಟ್ಟನ ಅರಿವಾಗದ ಕೃತಿಮ
ಕಾವಿಕ್ಕಿ ಮೊಟ್ಟೆ ಮರಿಗೆ ಕಾಕಮ್ಮ ||

ಸೋಮಾರಿಯೆ ಚಾಣಾಕ್ಷ್ಯ ಸರಿಯೆ
ಮುಖ್ಯ ನಿಜಾಯತಿ ನೈತಿಕತೆಯೆ
ದೈವದತ್ತ ಕೊರಳಿದ್ದರು ಕೋಗಿಲೆ
ವಂಚಿಸೊ ಮನಸಾದರು ಹೇಗೆಲೆ ? ||

– ನಾಗೇಶ ಮೈಸೂರು

00494. ದೌರ್ಬಲ್ಯ ಪ್ರಾಬಲ್ಯಗಳ ಮೊತ್ತ


00494. ದೌರ್ಬಲ್ಯ ಪ್ರಾಬಲ್ಯಗಳ ಮೊತ್ತ
__________________________________

ಪ್ರತಿಯೊಬ್ಬ ವ್ಯಕ್ತಿಯೂ / ವ್ಯಕ್ತಿತ್ವವೂ ದೌರ್ಬಲ್ಯ ಮತ್ತು ಪ್ರಾಬಲ್ಯಗಳ ಸಂತುಲಿತ ಮೊತ್ತ. ಪ್ರತಿಯೊಬ್ಬರ ಒಳಗೊ, ಜೀವನ ವಿಶೇಷದಲ್ಲೊ ಇಣುಕಿ ನೋಡಿದಾಗ ಮೇಲ್ನೋಟಕ್ಕೆ ಕಾಣುವ ಪ್ರಾಬಲ್ಯಗಳಷ್ಟೆ, ದೌರ್ಬಲ್ಯಗಳು ಎದ್ದು ಕಾಣುವುದು ಸಹಜ. ರೂಪವಿಲ್ಲದ ವ್ಯಕ್ತಿಯ ದೌರ್ಬಲ್ಯವನ್ನು ಅಪರಿಮಿತ ಬುದ್ಧಿಮತ್ತೆಯಿಂದಲೊ ಅಥವಾ ಸಿರಿವಂತಿಕೆಯಿಂದಲೊ ಸರಿದೂಗಿಸುವ ಹುನ್ನಾರದಂತೆ – ಈ ಒಂದು ಸಮತೋಲನವನಿಟ್ಟು ವ್ಯಕ್ತಿ ಹತೋಟಿ ಮೀರಿ ಗರ್ವಿಸದಂತೆ ನೋಡಿಕೊಳ್ಳುವ ನಿಯತಿಯ ಕುಹಕವೆ ಇದಿರಬಹುದೆಂಬ ಕವಿಯ ಅನುಮಾನ, ಈ ಕವನದ ಹಿನ್ನಲೆಯಲಿರುವ ಅಂತರ್ಗತ ಭಾವ.

ದೌರ್ಬಲ್ಯ ಪ್ರಾಬಲ್ಯಗಳ ಮೊತ್ತ
ಸರಿದೂಗಿಸೆ ಸಮತೋಲನದತ್ತ
ವಿಭಜಿಸಿಟ್ಟಿಹನೆ ವಿಧಾತ ಸೂತ್ರ
ಹಂಚಿಬಿಟ್ಟು ಬಗೆಬಗೆಯಾ ಪಾತ್ರ ||

ಅಪ್ರತಿಮ ಸೌಂದರ್ಯರಾಶಿ ಸಿರಿ
ಆಗಿರಬೇಕಿಲ್ಲ ಬುದ್ಧಿ ಮತ್ತೆ ಐಸಿರಿ
ಕೈ ತೊಳೆದು ಮುಟ್ಟುವ ಬಂಗಾರಿ
ಬಣ್ಣನೆ ಕರಗಿದರೆ ಭಾರಿ ದುಬಾರಿ ||

ಅಂತೆಯೆ ಪ್ರಚಂಡ ಬುದ್ಧಿ ಶಾಲಿ
ಇರಬೇಕಿಲ್ಲ ಸುರಸುಂದರ ಕಲಿ
ಸಾಮಾನ್ಯ ರೂಪ ಸಮತೋಲನ
ಬುದ್ದಿ ಮಟ್ಟದೆದುರು ವ್ಯವಕಲನ ||

ಹೊಂದಾಣಿಸುವ ಸರಾಸರಿ ಕಥೆ
ಸಾಮಾನ್ಯ ರೂಪು ಬುದ್ಧಿಯ ಜತೆ
ಆರಕ್ಕೇರದಲೆ ಮೂರಕ್ಕಿಳಿಯದಾ
ಸಮತೋಲನದಲಿಡುವ ಸಂಪದ ||

ವಿಪರ್ಯಾಸದ ಸಂದಿಗ್ದ ಸಿಕ್ಕಲು
ಕಂಡೂ ಕಾಣದ ಕ್ರಮದ ಸುಕ್ಕಲು
ಯಾವುದೊ ಯೋಜನೆಗೆ ಬದ್ದತೆ
ಬೆಸೆದಿಟ್ಟಿರುವ ದೇವರಾಟ ಸಿದ್ದತೆ ||

ಸಮಭಾರ ಯಂತ್ರ ತೂಗಿದ ಹಾಗೆ
ಸರಿದೂಗಿಸುವ ಹವಣಿಕೆಗೆ ತೂಗೆ
ಕುಂದು ಕೊರತೇ ಮುಚ್ಚುವ ಹಾಗೆ
ಎಲ್ಲರಲೇನೊ ಹೆಚ್ಚು ಇಟ್ಟೆ ಸೋಗೆ ||

——————————————————————-
– ನಾಗೇಶ ಮೈಸೂರು
——————————————————————-

00493. ಹೂವಲು ಉಂಟು ಲಿಂಗ..!


00493. ಹೂವಲು ಉಂಟು ಲಿಂಗ..!
_________________________________ 

ಹೂವಲ್ಲೂ ಗಂಡು ಹೂ ಮತ್ತು ಹೆಣ್ಣು ಹೂವಿರುವುದು ಸಾಮಾನ್ಯ ಜ್ಞಾನವಲ್ಲ. ಬಹುಶಃ ವಿಜ್ಞಾನದ ಕಲಿಕೆಯಲಿ ತೊಡಗಿರುವವರಿಗೆ ಗೊತ್ತಿರಬಹುದಾದರೂ, ಕವಿ ಕಲ್ಪನೆಯ ಮೂಸೆಯಲ್ಲಿ ಹೂವ್ವೆಂದರೆ ಹೆಣ್ಣಿನ ರೂಪವೆ ಕಣ್ಮುಂದೆ ಬಂದು ನಿಲ್ಲುತ್ತದೆ. ಕವಿಯತ್ರಿಗಳೂ ಸಹ ಹೆಚ್ಚು ಕಡಿಮೆ ಇದೆ ಅರಿವಿನ ಮೂಸೆಯಲ್ಲೆ ಕಾವ್ಯ ಹೊಸೆಯುವಂತೆ ಭಾಸವಾಗುತ್ತದೆ. ಈ ಗುಂಪಿನಲ್ಲಿ ಬಹುತೇ