01182. ಜಲ ದಿನ ಮನ…


01182. ಜಲ ದಿನ ಮನ…
____________________


(೦೧)
ಜಲಲ ಜಲ
ಸುಲಲಿತ ಅಮಲ
– ಅಮೃತ ಧಾರೆ

(೦೨)
ಜಲ ದೇವತೆ
ಜನನಿ ಜನ್ಮ ಭೂಮಿ
– ತುಂಬಿದ ಕೊಡ

(೦೩)
ಧರಣಿ ಪಾತ್ರೆ
ಹಿಡಿದಿಟ್ಟಿಹ ನೀರೆ
– ಪ್ರಕೃತಿ ಸೀರೆ

(೦೪)
ನೆಲ ಬಿರುಕು
ಬಿಕ್ಕಳಿಕೆ ಕುರುಹು
– ಬರ ಸಿಡಿಲು

(೦೫)
ಬರ ಬಾರದು
ಬಂದರೆ ಗಂಗಾಜಲ
– ಪುಣ್ಯದ ನೆಲ

(೦೬)
ತಿಕ್ಕಲು ಹನಿ
ಮಗ್ಗಲು ಬದಲಿಸಿ
– ತಬ್ಬಿ ಸ್ಖಲನ

(೦೭)
ಬೆವರ ಹನಿ
ಲವಣ ನೆಲ ಗರ್ಭ
– ಅಂತರ್ಜಲದೆ

(೦೮)
ನೀರಿಲ್ಲದಿರೆ
ನಿರ್ವೀರ್ಯ ಪುರುಷತ್ವ
– ಪ್ರಕೃತಿ ಬಂಜೆ

(೦೯)
ಜಲ ದಿನದೆ
ಮಲಿನವಾಗಿಸದೆ
– ಬಳಸೆ ಹಿತ

(೧೦)
ನಾಗರೀಕತೆ
ಹುಟ್ಟಿ ಬೆಳೆಯೆ ಜಲ
– ಅನಾಗರೀಕ

– ನಾಗೇಶ ಮೈಸೂರು
೨೨.೦೩.೨೦೧೭
(Picture source: Creative Commons)

01181. ಪದ-ಪದಾರ್ಥ


01181. ಪದ-ಪದಾರ್ಥ

ವಿಶ್ವ ಕವಿತಾ ದಿನ : ಪದ-ದ್ವಂದ್ವಾರ್ಥದ ಬಿನ್ನಾಣ…

ಉದಾ: ಅಡಿಗೆ = ಅಡಿಗೆ ಮಾಡುವುದು, ಕೆಳಗೆ (ಅಡಿಗೆರಗುವುದು)😊

ಪದ-ಪದಾರ್ಥ
__________________


ಅಡಿಗೆ
ನಿನ್ನಡಿಗೆ
ಪಾದದಡಿಗೆ
ಅಡಿಗಡಿಗೆ ಶರಣು !

ತರ್ಕಾರಿ
ತರ ತರ್ಕಾರಿ
ತಾಜಾ ತರ್ಕಾರಿ
ಸಾರ ರುಚಿ ಸಗಟು !

ನಾಡಿಗೆ
ತನ್ನಾಡಿಗೆ
ಗೌರವದುಡುಗೆ
ಬಿಸಿ ನೆತ್ತರ ತೊಡುಗೆ !

ಬರಲು
ಕಸ ಬರಲು
ಬೇಕು ಕಸಬರಲು
ಸ್ವಚ್ಛ ಕಸ ಗುಡಿಸಲು !

ಗುಡಿಸಲು
ಸಾಕು ಗುಡಿಸಲು
ನೆಮ್ಮದಿ ಬದುಕಲು
ಚಿಂತೆಯ ಗುಡಿಸಲು !

ಕಾಡು
ಬಿಡದೆ ಕಾಡು
ಅಪ್ಪುತ ಕಾಪಾಡು
ಸೊಂಪಾಗುವುದ ನೋಡು !

ಮತ್ತು
ಮತ್ತೊಂದಿತ್ತು
ಮತ್ತೇರಿಸುತಿತ್ತು
ಮಾತೆಲ್ಲ ಮರೆಸಿತ್ತು !

ಮುತ್ತು
ಬಿತ್ತಿದ ಹೊತ್ತು
ಫಳಫಳ ಹೊಳೆದಿತ್ತು
– ಕಣ್ಣಿನ ಸಂಪತ್ತು !

– ನಾಗೇಶ ಮೈಸೂರು
೨೧.೦೩.೨೦೧೭
(Picture source: Creative Commons)

01179. ಕಾದವರ ಪರಿತಪನೆ…


01179. ಕಾದವರ ಪರಿತಪನೆ…
________________________

ಭೃಂಗವೊಂದು ಹಾರುತ
ಹುಡುಕಾಡಿತ್ತು ಮಧುವ
ಹೀರುವ ಬಯಕೆಯ ಬಟ್ಟಲು
ಹಿಡಿದು ಹೊರಟಿತ್ತು ಔತಣಕೆ..

ಸಿರಿ ಸಿಂಗಾರ ಅನುಚಿತ
ಪಾದರಕ್ಷೆಗೂ ಬಿಡಲೊಲ್ಲ
ಪಾದದಡಿಗಂಟಿ ಪರಾಗ ರೇಣು
ಯಾವ ಹೂವಿನ ಮಡಿಲ ಸ್ವತ್ತೊ..?


ದಾರಿಯಲಿದ್ದಳಲ್ಲ ಯಾಮಿನಿ
ನಲ್ಲನ ಕಾದು ಕುಳಿತ ವಿರಾಗಿಣಿ
ಚಂಚಲೆ ಸುನಯನ ಕಾಣುತಲೇ
ಭೃಂಗರಾಣಿಯ ನೆನಪಾಗಿತ್ತು…!

ಜೊಂಪೆ ಜೋತಾಡಿ ಮುಂಗುರುಳು
ದಾರಿ ತಪ್ಪಿಸಿತ್ತಲ್ಲ ದುಂಬಿಗೂ
ಮನದುಯ್ಯಾಲೆ ಜೋತಾಡಿಸಿ ಮತ್ತು
ಸುತ್ತು ಸುತ್ತತೊಡಗಿ ಝೇಂಕರಿಸಿ..

ಗಾಬರಿಯಲವಳ ತುಟಿ ಬಿರಿದು
ಸುಕೋಮಲಾಕ್ರಂದನ ಹೂ ನಗೆಯಾಗೆ
ಮುತ್ತಿನಾಧರ ದಳವೆಂದು ಸಂಭ್ರಮಿಸಿ
ಮುತ್ತಿಟ್ಟು ಹೀರಿತ್ತು ಸಿಹಿ ಜೇನ ಸಂತೃಪ್ತ..

ತುಂಟ ಹೆಜ್ಜೆಯೂರಿ ಚೆಲ್ಲಿಟ್ಟ ಪರಾಗ ರೇಣು
ಕೆಂದುಟಿಯ ತುಂಬ ಅರಿಶಿನದ ಕಾನನ
ಕದ್ದೋಡಿದ ದುಂಬಿ ಸುಳಿವ ಕಾಣದ ನಲ್ಲ
ಹೊಸದೇನು ರಂಗೆನಲು ನಾಚಿ ಕೆಂಪಾದಳು..

ದುಂಬಿ ಮುಟ್ಟದ ಹೂವು ಕಾದು ಬಳಲಿ
ಪರಿತಪಿಸಿತ್ತು ಕೊರಗಿ ಖಾಲಿ ಮಧುಪಾತ್ರೆ
ದಾರಿಗಡ್ಡ ಕಾದವಳ ಶಪಿಸುತ್ತಲೆ ಮುನಿದು
ಮುಡಿಗೇರಿತ್ತವಳ ನಲ್ಲನೊಲುಮೆಯ ಕುರುಹಾಗಿ..


– ನಾಗೇಶ ಮೈಸೂರು
೧೮.೦೩.೨೦೧೭
(Pictures : internet, social media and wikshanari)

01178. ಬೆಳಗಾಗುತ್ತಾ ಹೀಗೆ..


01178. ಬೆಳಗಾಗುತ್ತಾ ಹೀಗೆ..
________________________


(೦೧)
ಭ್ರಮೆಗಳೆಲ್ಲ
ಹೂವಾಗಿ ಅರಳುತ
– ಕಂಡ ಕನಸು

(೦೨)
ಅದು ತರ್ಕಾರಿ
ತರಕಾರಿ ಅಲ್ಲಾರಿ
– ಬೆಂದ ವಿಚಾರ

(೦೩)
ಸುರಿದ ಹನಿ
ನೀರಾಗದೆ ಉದುರಿ
– ಶ್ವೇತ ಕಮಲ

(೦೪)
ಬಿಕ್ಕುತ್ತಿದ್ದಾಳೆ
ಮೇಘ ಮಲ್ಹಾರ ರಾಗ
– ಎದೆ ತುಂಬುತ

(೦೫)
ನೀರಾಗಿ ಜನ್ಮ
ನಿರ್ಗಲ್ಲುದುರಿ ಹಿಮ
– ಮೃದುಲ ನೆಲ

(೦೬)
ನೆಟ್ಟ ನೋಟಕೆ
ಶುದ್ಧ ಶ್ವೇತ ಶುಭ್ರತೆ
– ಜಾರಿಸೊ ಜಾಣ

(೦೭)
ಹಿಮದ ಗಾಢ
ಬರಿ ಮೈ ಪರಶಿವ
– ಹುಡುಕೆ ಯೋಗಿ

(೦೮)
ನಿತ್ಯದಾಯಾಮ
ಮೈ ಮನದ ವ್ಯಾಯಾಮ
– ಅದೇ ಗೊಂದಲ

(೦೯)
ಚಿಗುರುತಿದೆ
ಚೆಲ್ಲಿ ಆಮ್ಲಜನಕ
– ಉಗುರ ಹುಲ್ಲು

(೧೦)
ನಾನಾಗಿಬಿಟ್ಟೆ
ಸಿಕ್ಕಿದ್ದು ನಾನು ಮಾತ್ರ
– ನೀನಾಗಲಿಲ್ಲ

– ನಾಗೇಶ ಮೈಸೂರು
೧೮.೦೩.೨೦೧೭

01177. ಕಳಚಿದ ಕೊಂಡಿ…


01177. ಕಳಚಿದ ಕೊಂಡಿ…
________________________


ಕೊಂಡಿ ಕೊಂಡಿ ಬೆಸೆದ ಸರಪಳಿ
ಹಾರವಾಗಿತ್ತ ಕೊರಳಲಿ ಜನ್ಮತಃ
ಯಾಕಿಲ್ಲಿ ಪಯಣ ನಿಮಿತ್ತ ಬಂಡಿ
ಗಾಲಿಯುರುಳುತೆ ಕಳಚುವ ಕೊಂಡಿ…

ನಾಮಕರಣ ಕಟ್ಟಿ ಬಟ್ಟೆ ತೋರಣ
ಸೀರೆ ತೊಟ್ಟಿಲಾಗಿ ತೂಗಿಸಿ ಕೊಂಡಿ
ಬೆಸೆದಿತ್ತವಳ ಹಸ್ತಕೆ ಜೋಗುಳ ಜತೆ
ಎದೆ ಹಾಲಿನ ಮಮತೆ ಕಡಿಮೆ ಮಾತೆ ?

ತೂಗಲಿಲ್ಲ ಅವ ಹೆದರಿದ ಗಿರಾಕಿ
ಮುಟ್ಟಲೊ ಬೇಡವೋ ಪುಕ್ಕಲ ಪುರುಷ ಘನ
ಕಿರುಬೆರಳ ಕೊಂಡಿಯಾಗಿಸಿ ಹಿಗ್ಗಿದನವ
ತೋಳಲ್ಹಿಡಿದ ಗಾಬರಿ ಅಚ್ಚರಿಯೆ ಧನ್ಯ..!

ಲೀಲಾಜಾಲದ ಮುದುಕಿ ಒಗೆದಂತೆ ಬಟ್ಟೆ
ಬೆತ್ತಲೆ ಕಾಲಿನ ಹಾಸಿಗೆ ಮುಖವಡಿ ಅತ್ತರೂ
ಬಿಡದೆ ನೀರು ಎಣ್ಣೆ ಹಚ್ಚಿದ ಸುಕ್ಕಿನ ಕೈಕೊಂಡಿ
ರಚ್ಚೆಯ ನಿದಿರೆಯಾಗಿಸಿ ಸಾಂಬ್ರಾಣಿಯ ಮಂಕು..

ಹೊತ್ತು ತಿರುಗಾಡಿಸಿ ಸುತ್ತು ಹಾಕಿಸಿದ ಮುದುಕ
ಗಿಲಕಿ ಗಿರಗಿಟ್ಟಲೆ ಆಟಿಕೆ ಕುಲಾವಿ ಕಾಡಿಗೆ ಕಪ್ಪು
ಬಂದು ಹೋದವರೆಲ್ಲರ ಕೊಂಡಿಯದಾವ ಸರಪಳಿ
ಉಂಡುಂಡೆ ನೆನಪು ಮಸುಕು ಮರೆಯಾಗಿ ಹಿತ್ತಲಲ್ಲಿ..

ಗಾಲಿಯ ಹಾದಿ ಸವೆದಿಲ್ಲ ಮುಚ್ಚಿ ಹೋಗಿದೆ
ಹೂಗಿಡಬಳ್ಳಿ ಬೇಲಿ ಚಿಟ್ಟೆ ಹಕ್ಕಿ ಚಿತ್ತಾರ ಮಾಯ
ಯಾಕೆಲ್ಲ ಕಳಚಿಬಿದ್ದ ಕೊಂಡಿಗಳಾಗಿ ಚೆಲ್ಲಾಪಿಲ್ಲಿ ?
ಬಿದ್ದಿವೆ ಸುತ್ತಲೂ ಹೆಕ್ಕಿ ಜೋಡಿಸಲಾಗದ ವ್ಯಥೆಯಾಗಿ..


– ನಾಗೇಶ ಮೈಸೂರು
೧೭.೦೩.೨೦೧೭
(Picture source: Creative Commons)

01176. ಹೇಳಲಾಗದ ಭಾರ, ಹಿತೈಷಿಗಳಿಗೂ…


01176. ಹೇಳಲಾಗದ ಭಾರ, ಹಿತೈಷಿಗಳಿಗೂ…
_______________________________


ಅವನು ಕೇಳುತ್ತಾನೆ
ಅವಳೂ ಕೇಳುತ್ತಾಳೆ
ಅವರಿವರು ಕೇಳುತಲೇ ಇರುವ ಸದಾ
ಹೇಳಲೇನೆಂದು ಪ್ರತಿನಿತ್ಯದ ಗೋಳು..

ಹೇಳಿದ್ದನೆ ಹೇಳಿ ವಟವಟ
ಬಕಪಕ್ಷಿಯ ಏಕಾಗ್ರ ಚಿತ್ತ
ಬಾರದೇಕೋ ಬಿಡಿಸಲೊಗಟ ಸವರೆ
ಚಿಟಿಕೆ ಚಪ್ಪಾಳೆ ಬರಿ ಮಾತಿನ ಸಾರಥ್ಯ..


ಪಾಪ ಕೇಳುವವರ ಸೌಜನ್ಯ
ಕಡುಪಾಪ ಭೋರ್ಗರೆಯುವ ಮುನ್ನ
ಹೇಳಲಿರಬೇಕಲ್ಲ ನಿಚ್ಚಳ ಕಥೆ ಚಿತ್ರ
ಮಬ್ಬು ಮಸುಕಿನ ರಾಡಿ ಗೊಂದಲ ಸುತ್ತ..

ಕೇಳುವ ಹಿತೈಷಿಗೆ ಕೂಡ
ಹೇಳಲಾಗದ ಸಂಕಟ ನಿಗೂಢ
ಗಾಢ ಸ್ನೇಹಕೂ ಬೇಲಿ ಕಟ್ಟುವ ಜಾಡ್ಯ
ಬದುಕೇ ? ಬವಣೆಯೇ ? ಭಾವನೆಗೂ ಮೌಢ್ಯ..


ಇದು ಸಮಯವಲ್ಲ ಎಂದಾದರೆ
ಬರುವುದೇನು ಜಾಲ ಬಿಡಿಸಿಡುವ ಕಾಲ ?
ಹಗುರಾಗುವುದೇನು ಆತ್ಮದಾಳದ ಒಗರು
ಪೊಗರಡಗಿಸಿ ಮತ್ತೆ ನೆಟ್ಟಲ್ಲೊಂದು ಚಿಗುರು..

– ನಾಗೇಶ ಮೈಸೂರು
೧೩.೦೩.೨೦೧೭
(Picture source : Creative Commons)

01174. ಹೊಂದುವ ಹಂಬಲ..


01174. ಹೊಂದುವ ಹಂಬಲ..
________________________________


ಅದು ಒಗಟೊ, ಜಿಗುಟೊ, ಸಗಟೊ
ಒಟ್ಟಾರೆ ಬೇಕೇ ಬೇಕು
ಬೇಕೆಂದ ಮೇಲಿನ್ನೇನು ಅನುಮಾನ ?
ಬೆನ್ನು ಹತ್ತುವ ಪರಿ ಶಾಪಗ್ರಸ್ತ ಪಿಶಾಚಿ..

ಅದು ಸಿಕ್ಕೇ ಸಿಗಬೇಕು ಸಿಕ್ಕೇ ನೆಮ್ಮದಿ
ಸಿಕ್ಕಬಾರದಿನ್ನಾರ ಕೈಗೂ
ಸಿಕ್ಕುವವರೆಗೂ ಬಿಕ್ಕುತ ರಂಪ ರಣರಂಗ
ಉಸಿರುಗಟ್ಟಿ ಜೀವ ತ್ಯಜಿಸಿತ್ತಂತೆ ದೇಹ..

ಕೈ ವಶವಾಗಲಿಕ್ಕೆ ಏನೆಲ್ಲಾ ಹುನ್ನಾರ
ಕರಗತವಾಗೆ ಏನೆಲ್ಲಾ ಬಾಧೆ
ಕಣ್ಣು ಮುಚ್ಚಿ ತೆರೆದು ನಿದಿರೆಗೆಟ್ಟು ನಿತ್ಯ
ಮನವೊಲಿಸಿಕೊಂಡು ಪಡೆದ ಸತ್ಯ ಸಮಸ್ತ..

ಪಡೆದಾದ ಮೇಲೆಕೊ ನೀರವ ನಿಸ್ಸತ್ವ ಪರಿ
ಹೆಚ್ಚುಗಾರಿಕೆಯೆಲ್ಲ ಕರಗಿ ಮರುಗಿ
ಏನದು ಉಢಾಫೆ ಹಕ್ಕಿನ ವಸ್ತು ನಿರ್ಲಕ್ಷ್ಯ
ಹೊಡೆದಾಡಿದ್ದೆಲ್ಲ ನೇಪಥ್ಯ ನೆಪದ ಸಂಕುಲ..

ಈ ಜೀವ ಜಗದ ಹಂಬಲಗಳೇ ಹಾಗೆ
ಸಿಕ್ಕುವತನಕ ಕಾಡುವ ಪೀಡೆ
ಸಿಕ್ಕ ಮೇಲೇಕೋ ಅಲಕ್ಷ್ಯದ ಅಲಂಕಾರ
ಪ್ರದರ್ಶನಕ್ಕಿಟ್ಟ ಬೆರಗು ಪೊಗರಿನ ಕುರುಹಷ್ಟೆ..!


– ನಾಗೇಶ ಮೈಸೂರು
೧೩.೦೩.೨೦೧೭

(Picture source: Creative Commons )