01391. ನಿದ್ದೆ ಮಾಡಲಿ ಬಿಡವನ…


01391. ನಿದ್ದೆ ಮಾಡಲಿ ಬಿಡವನ…
_________________________________


ನಿದ್ದೆ ಮಾಡಲವನು ಸದ್ದು ಮಾಡದೆ ಬಾ
ಮುದ್ದು ಮಾಡಲ್ಹೊರಟು ಎಬ್ಬಿಸೀಯಾ ಜೋಕೆ!
ಮುದ್ದು ಕಂಗಳ ಮುಖದಾ ಮುಗುಳುನಗೆ
ಚದುರಿಸೀಯಾ ಕಂದನ ಕನಸಿನ ಮೆರವಣಿಗೆ ||

ನೀನಿದ್ದರೇನು ಅವನಮ್ಮ ಗರ್ಭದೆ ಹೊತ್ತು
ಹೆತ್ತವಳು ನೆತ್ತರು ಹಂಚಿ ಕರುಳಿಗೆ ಜೋತು
ಭುವಿಗೆ ಬಿದ್ದವನವನು ಎದ್ದು ನಡೆಯಬೇಕು
ಮಲಗಿರಲಲ್ಲಿಯವರೆಗೆ ನಿನ್ನಾಸೆಗೆ ತಡೆ ಹಾಕು ||

ಅಪ್ಪ ನನಗಿಲ್ಲವೆನಬೇಡ ಭಾವನೆ ಮೃದುಲ
ತೋರದೆ ನಡೆಯಬೇಕಂತೆ ಒಟ್ಟಾರೆ ಸಮತೋಲ
ಮುದ್ದಾಟದೆ ಜಿಪುಣ ಮಾತಾಟದೆ ನಿಪುಣ
ಗದರಿಸುತ ಸಂತುಲನ ಅವನಾಗಬೇಡವೆ ಜಾಣ? ||

ನಾ ತೋರಲಾರೆ ಪ್ರಕಟ ನಿನ್ನಂತೆ ಪ್ರೀತಿ
ಮಲಗಿದೀ ಹೊತ್ತಲೂ ಮುಟ್ಟೆ ಮನಸಾಗದು ಭೀತಿ
ಎಚ್ಚರವಾದರೆ ಬೆಚ್ಚುತ ಅತ್ತಾನು ಬೆದಬೆದರಿ
ಬೆಚ್ಚಗೆ ಮಲಗಿರಲಿ ಹೇಗು ಎದ್ದಾಗ ನಾನವನ ಕುದುರಿ ||

ಅಂದುಕೊಳ್ಳುವರೆಲ್ಲ ಅಪ್ಪನೆದೆ ಕಲ್ಲು
ಅಮ್ಮನ ಪ್ರೀತಿ ಸುಧೆಯಲಿ ಕೆತ್ತುವ ಉಳಿಗಲ್ಲು
ಕಾಣಲಿ ಬಿಡಲಿ ಗಣಿಸದೆ ಶಿಲ್ಪಿ ತನ್ನ ಪಾಡಿಗೆ
ತನ್ನರಿವಂತೆ ಕೆತ್ತುವ ಜರುಗದಂತೆ ಆ ಕಿರುನಗೆ ||


– ನಾಗೇಶ ಮೈಸೂರು
(Nagesha Mn)
(Picture source: Internet / social media)

00788. ಕುಂಭಕರ್ಣ ವೈಭವ


00788. ಕುಂಭಕರ್ಣ ವೈಭವ
_________________________________

ಬೆಳಗಾಗುತ್ತಿದ್ದಂತೆ ಎಬ್ಬಿಸಿ, ಸಿದ್ದ ಮಾಡಿಸಿ, ತಿಂಡಿ ತಿನಿಸಿ ಶಾಲೆಗೆ ದಬ್ಬುವ ತನಕ ಮಕ್ಕಳಿಗಿಂತ ಹೆಚ್ಚಿನ ಕಾಟ, ತೊಂದರೆ ಅನುಭವಿಸುವವರು – ಅಪ್ಪ, ಅಮ್ಮಗಳು. ಅದರಲ್ಲೂ ಕೆಲವು ಕುಂಭಕರ್ಣರನ್ನು ಎಬ್ಬಿಸುವ ತನಕದ ಪಾಡು, ದೇವರಿಗೆ ಪ್ರೀತಿ; ಅಂತಹ ಒಂದು ದೈನಂದಿನ ಯತ್ನದ ವರ್ಣನೆ – ಈ ಕವನ.
ನಮ್ಮನೆ ರಾಮಾಯಣವು ಸಹ, ಬಹಳ ಸುಪ್ರಸಿದ್ಧ
ಮಗರಾಯ ಕುಂಭಕರ್ಣನೊಂದಿಗೆ, ದಿನನಿತ್ಯ ಯುದ್ಧ
ರಣರಂಗಕೆ ಕಳಿಸಲವನ, ನಿದ್ದೆಯೆಬ್ಬಿಸೆ ಘನ ಘೋರ
ಶಾಲೇಲಿ ಕಲಿಯಲವನಿಗೆ, ಪಾಪ ವೇದನೆ ಅಪಾರ ||

ರಾತ್ರಿ ಮಲಗೆಂದರು ಬೇಗ, ಪವಡಿಸದ ಸುಕುವರ
ಬಿಸಿನೀರ ಹನಿ ಸಿಂಪಡಿಕೆ, ಆರಂಭ ಎಬ್ಬಿಸೆ ಪ್ರವರ
ಆತ್ಮ ರಕ್ಷಣೆಗೆಂದು ಕೂತ, ರಕ್ಷಣಾತ್ಮಕ ಸರಿ ದೂರ
ಮಳೆ ಸಿಂಚನ ತೊಡೆಯಲು, ಟರ್ಕಿ ಟವೆಲ್ಲಿನ ಚಾರ ||

ಬಿಸಿ ಕಾಫಿ ಲೋಟ, ಕೆಲವೊಮ್ಮೊಮ್ಮೆ ಆಡುವಾಟ
ಚುರುಗುಟ್ಟಿಸುವ ಬಿಸಿ, ಮೈಕೈಗೆ ಸರಿ ನೇವರಿಸಾಟ
ನಿದ್ದೆಗಣ್ಣಲೇ ಸೊರ ಸೊರ, ಇಳಿದರೂ ಬಿಸಿ ಕಾಫಿ
ಮುದುರಿ ಮೆತ್ತೆಗೆ ಮತ್ತೆ, ಒರಗಿಬಿಡುವನಾ ಪಾಪಿ ||

ಅಂಗಮರ್ದನ ಸೇವೆ ರಮಿಸೆ, ಹಿತ ಕೈ ಕಾಲ್ನೋವೆ
ತಲೆಯಿಂದುಂಗುಷ್ಟತನಕ, ನಡೆವ ಅವಿರತ ಸೇವೆ
ಎಚ್ಚರಾಗುವ ಬದಲು, ಬೆಚ್ಚಗಾಗಿಸಿ ಮರ್ದನ ತಾಡ
ಹಾಯಾದ ಸುಖ ನಿದ್ದೆ, ಮತ್ತೋಡುವ ಪರಿ ನೋಡ ||

ಎಡಬಲ ಎಳೆತ ಗುದ್ದು, ಮುದ್ದಾಡಿಸಿ ಒದ್ದಾಡಿಸುತ
ಕಲ್ಲು ಕೊರಡಂತೆ ಬಿದ್ದಿರಲು, ಜತೆ ಬೈಗುಳ ಬಿಗಿತ
ಕಿವಿ ಗುರುಗುಟ್ಟುವ ಗಾತ್ರದೆ, ಒಮ್ಮೊಮ್ಮೆ ಸಂಗೀತ
ಎದ್ದು ಕೂತರು ಚಾದರ, ಹೊದ್ದು ಒರಗಿ ಕೂತ ತಾತ ||

ಹೊದ್ದ ಚಾದರ ಕಿತ್ತೆಸೆದು, ಫಂಖವೋಡಿಸುತ ಕಾಟ
ಬೆರಳಲೇ ಹೊಟ್ಟೆ ಮೇಲಾನೆ, ರಥ ಕುದುರೆ ಓಡಾಟ
ಕಚಗುಳಿಸಿ ಕೆರಳಿಸಿ, ದೂರ್ವಾಸನವತಾರದ ಒರಟ
ಕಣ್ಣುಮುಚ್ಚಾಲೆ ಅರಚಿ ಪರಚಿ, ಪರಸ್ಪರರ ಜೂಟಾಟ ||

ಶತ ಸಾಹಸ ಮಾಡಿಸೆದ್ದರು, ಸರಿ ಮುಗಿಯದ ಕಥೆ
ಕಥೆ ಹೇಳಬೇಕೆಂದು ಪಟ್ಟು, ಹಿಡಿದು ಕೂತವನ ವ್ಯಥೆ
ಹೊಸ ಹೊಸತ ಕಲ್ಪನೆ, ಕಥೆ ದಿನ ಹುಟ್ಟಿಸಬೇಕಂತೆ
ಕಡೆಗೂ ಬಚ್ಚಲಿಗೆ, ಎಳೆದೊಯ್ಯುವಷ್ಟರಲ್ಲಿ ಉಸ್ಸಂತೆ ||

ಶಾಲೆಗೆ ಸಂಕಟ ಹೊರಡಲು, ಕಪಟ ಎಲ್ಲ ನಾಟಕ
ಹೊಟ್ಟೆ ನೋವಿಂದಿಡಿದು, ನೆಗಡಿ ಶೀತಗಳಾ ಜಾತಕ
ಸಜ್ಜಾಗಿಸಲು ಯೋಧ, ಕುಂಭಕರ್ಣ ಹರ ಸಾಹಸ
ಮರುದಿನ ಪುನರಾವರ್ತನೆ, ಸಹನೆ ತಾಳ್ಮೆ ಪರೀಕ್ಷ ||

——————————————————————-
ನಾಗೇಶ ಮೈಸೂರು
——————————————————————-
(Picture source : http://www.youtube.com)

00531. ಜೋಗುಳ ಬ್ಲಾಗಿನ ನಿದ್ದೆಗೆ, ಕವಿತೆ ಮರಳಿ ಬರುವವರೆಗೆ..


00531. ಜೋಗುಳ ಬ್ಲಾಗಿನ ನಿದ್ದೆಗೆ, ಕವಿತೆ ಮರಳಿ ಬರುವವರೆಗೆ..
_______________________________________

 

ಜೋಜೋ ಮಲಗು ನನ್ನ ಬ್ಲಾಗೆ..
ಮತ್ತವಳು ಕವಿತೆ, ಮರಳುವ ತನಕ
ಮನಶ್ಯಾಂತಿಗರಸಿ, ನಡೆದಿಹಳು ದೂರಕೆ
ಹುಡುಕಿ ತಡಕಿ, ಕಾಲಯಾನದ ಅನಂತ… ||

ಗಳಿಗೆ ದಿವಸ ವಾರ ತಿಂಗಳು ವರ್ಷ ?
ತಿಥಿ ನಕ್ಷತ್ರ ಗೋತ್ರ ಶುಭ ಶಕುನದ ಪಾತ್ರ
ತಿಳಿಯದಂತವಳಿಗು ಮೊತ್ತದೆ, ಅಲೆದಾಟ
ತನುವೇರಿದ್ದೇನೊ ವಾಹನ, ಮನಸೇಕೊ ಅಸ್ವಸ್ಥ.. ||

ಮನದಲೆದಾಟ ವಿಮಾನ, ಹಕ್ಕಿಯ ಜಾಡು
ಹೋಗುವುದೆಲ್ಲೊ ಎಂತೊ, ಕಾಣದ ಗಗನದೆ ಹೆಜ್ಜೆ
ವಿಲವಿಲ ವಿಲಪಿಸಿ ಕವಿಮನ, ತಡೆದು ಬೇಡಿದರು
ಸ್ವಾಭಿಮಾನಿ ಕವಿತೆ ನುಡಿ, ಬಿಡೆನ್ನ ಪಾಡಿಗೆ ನನ್ನರೆಗಳಿಗೆ..||

ಶಾಂತಿಯ ತವರಿಗೆ ತಲುಪಿ, ಮಿಂದು ಜಳಕ
ಮುಗಿದಾಗೆದ್ದು ಬರುವ, ಅರೆಬರೆ ವಚನದ ಚಳಕ
ಬರುವಳೊ? ಬಾರಳೊ? ನೆನೆದು ಗಡಿಬಿಡಿ ಮನ ಧ್ವಂಸ
ಮಾಡಿದ ತಪ್ಪನೆ ಮಾಡಿಸೆ, ಯಾವ ಕ್ಷೀರ, ಎಲ್ಲಿಯ ಹಂಸ ? ||

ಸದ್ದುಗದ್ದಲ ಮಾಡಿ, ಕೆಡಿಸದಿರವಳ ಶಾಂತಿಯ ಯಾತ್ರೆ
ಚಿಮ್ಮುತಿರಲೆಲ್ಲಿಂದಾದರದು, ನೀ ಸುಮ್ಮನಿರು ನನ ಬ್ಲಾಗೇ..
ಅದೇ ಜೋಗುಳ ಪದ ಹಾಡುವೆ, ದಿನವು ನಿನ್ನ ಮಲಗಿಸುವೆ
ಮರಳಿದ ಹೊತ್ತಲಿ ಸಂಭ್ರಮ, ನಟ್ಟಿರುಳಲು ಬಡಿದೆಬ್ಬಿಸುವೆ.. ||

– ನಾಗೇಶಮೈಸೂರು

00460.ಕುಂಭಕರ್ಣ ವೈಭವ (ಮಕ್ಕಳಿಗೆ)


00460.ಕುಂಭಕರ್ಣ ವೈಭವ (ಮಕ್ಕಳಿಗೆ)
_________________________________

ಬೆಳಗಾಗುತ್ತಿದ್ದಂತೆ ಎಬ್ಬಿಸಿ, ಸಿದ್ದ ಮಾಡಿಸಿ, ತಿಂಡಿ ತಿನಿಸಿ ಶಾಲೆಗೆ ದಬ್ಬುವ ತನಕ ಮಕ್ಕಳಿಗಿಂತ ಹೆಚ್ಚಿನ ಕಾಟ, ತೊಂದರೆ ಅನುಭವಿಸುವವರು – ಅಪ್ಪ, ಅಮ್ಮಗಳು. ಅದರಲ್ಲೂ ಕೆಲವು ಕುಂಭಕರ್ಣರನ್ನು ಎಬ್ಬಿಸುವ ತನಕದ ಪಾಡು, ದೇವರಿಗೆ ಪ್ರೀತಿ; ಅಂತಹ ಒಂದು ದೈನಂದಿನ ಯತ್ನದ ವರ್ಣನೆ – ಈ ಕವನ.

ನಮ್ಮನೆ ರಾಮಾಯಣವು ಸಹ ಬಹಳ ಸುಪ್ರಸಿದ್ಧ
ಮಗರಾಯ ಕುಂಭಕರ್ಣನೊಂದಿಗೆ ದಿನನಿತ್ಯ ಯುದ್ಧ
ರಣರಂಗಕೆ ಕಳಿಸಲವನ ನಿದ್ದೆಯೆಬ್ಬಿಸೆ ಘನ ಘೋರ
ಶಾಲೇಲಿ ಕಲಿಯಲವನಿಗೆ ಪಾಪ ವೇದನೆ ಅಪಾರ ||

ರಾತ್ರಿ ಮಲಗೆಂದರು ಬೇಗ ಪವಡಿಸದ ಸುಕುವರ
ಬಿಸಿನೀರ ಹನಿ ಸಿಂಪಡಿಕೆ ಆರಂಭ ಎಬ್ಬಿಸೆ ಪ್ರವರ
ಆತ್ಮ ರಕ್ಷಣೆಗೆಂದು ಕೂತ ರಕ್ಷಣಾತ್ಮಕ ಸರಿ ದೂರ
ಮಳೆ ಸಿಂಚನ ತೊಡೆಯಲು ಟರ್ಕಿ ಟವೆಲ್ಲಿನ ಚಾರ ||

ಬಿಸಿ ಕಾಫಿ ಲೋಟ ಕೆಲವೊಮ್ಮೊಮ್ಮೆ ಆಡುವಾಟ
ಚುರುಗುಟ್ಟಿಸುವ ಬಿಸಿ ಮೈಕೈಗೆ ಸರಿ ನೇವರಿಸಾಟ
ನಿದ್ದೆಗಣ್ಣಲೇ ಸೊರ ಸೊರ ಇಳಿದರೂ ಬಿಸಿ ಕಾಫಿ
ಮುದುರಿ ಮೆತ್ತೆಗೆ ಮತ್ತೆ ಒರಗಿಬಿಡುವನಾ ಪಾಪಿ ||

ಅಂಗಮರ್ದನ ಸೇವೆ ರಮಿಸೆ ಹಿತ ಕೈ ಕಾಲ್ನೋವೆ
ತಲೆಯಿಂದುಂಗುಷ್ಟತನಕ ನಡೆವ ಅವಿರತ ಸೇವೆ
ಎಚ್ಚರಾಗುವ ಬದಲು ಬೆಚ್ಚಗಾಗಿಸಿ ಮರ್ದನ ತಾಡ
ಹಾಯಾದ ಸುಖ ನಿದ್ದೆ ಮತ್ತೋಡುವ ಪರಿ ನೋಡ ||

ಎಡಬಲ ಎಳೆತ ಗುದ್ದು ಮುದ್ದಾಡಿಸಿ ಒದ್ದಾಡಿಸುತ
ಕಲ್ಲು ಕೊರಡಂತೆ ಬಿದ್ದಿರಲು ಜತೆ ಬೈಗುಳ ಬಿಗಿತ
ಕಿವಿ ಗುರುಗುಟ್ಟುವ ಗಾತ್ರದೆ ಒಮ್ಮೊಮ್ಮೆ ಸಂಗೀತ
ಎದ್ದು ಕೂತರು ಚಾದರ ಹೊದ್ದು ಒರಗಿ ಕೂತ ತಾತ ||

ಹೊದ್ದ ಚಾದರ ಕಿತ್ತೆಸೆದು ಫಂಖವೋಡಿಸುತ ಕಾಟ
ಬೆರಳಲೇ ಹೊಟ್ಟೆ ಮೇಲಾನೆ ರಥ ಕುದುರೆ ಓಡಾಟ
ಕಚಗುಳಿಸಿ ಕೆರಳಿಸಿ ದೂರ್ವಾಸನವತಾರದ ಒರಟ
ಕಣ್ಣುಮುಚ್ಚಾಲೆ ಅರಚಿ ಪರಚಿ ಪರಸ್ಪರರ ಜೂಟಾಟ ||

ಶತ ಸಾಹಸ ಮಾಡಿಸೆದ್ದರು ಸರಿ ಮುಗಿಯದ ಕಥೆ
ಕಥೆ ಹೇಳಬೇಕೆಂದು ಪಟ್ಟು ಹಿಡಿದು ಕೂತವನ ವ್ಯಥೆ
ಹೊಸ ಹೊಸತ ಕಲ್ಪನೆ ಕಥೆ ದಿನ ಹುಟ್ಟಿಸಬೇಕಂತೆ
ಕಡೆಗೂ ಬಚ್ಚಲಿಗೆ ಎಳೆದೊಯ್ಯುವಷ್ಟರಲ್ಲಿ ಉಸ್ಸಂತೆ ||

ಶಾಲೆಗೆ ಸಂಕಟ ಹೊರಡಲು ಕಪಟ ಎಲ್ಲ ನಾಟಕ
ಹೊಟ್ಟೆ ನೋವಿಂದಿಡಿದು ನೆಗಡಿ ಶೀತಗಳಾ ಜಾತಕ
ಸಜ್ಜಾಗಿಸಲು ಯೋಧ ಕುಂಭಕರ್ಣ ಹರ ಸಾಹಸ
ಮರುದಿನ ಪುನರಾವರ್ತನೆ ಸಹನೆ ತಾಳ್ಮೆ ಪರೀಕ್ಷ ||

– ನಾಗೇಶ ಮೈಸೂರು