02164. ಸರಳವಿರು ಸಾಕು..


02164. ಸರಳವಿರು ಸಾಕು..

______________________________

ಯಾಕೆ ಮೆಚ್ಚಿಸುವ ಹಂಬಲ ನಿನಗೆ ?

ಬಿಡು ನಿನ್ನ ಸರಳತೆಯೆ ಸಾಕೇ ನನಗೆ

ಯಾಕೆ ಬಳಲುವೆ? ತೊಳಲುವೆ ಉಡುತ ?

ತರತರ ದಿರುಸು ಒಡವೆ ವಸ್ತ್ರ ವೈಭವ.

ನಿಜ ನಿನ್ನ ಹೊನ್ನಿನ ಮೈಬಣ್ಣದ ಬೆರಗಿಗೆ

ಮೆರುಗು ಮಿನುಗು ಸಿಂಗರಿಸೆ ಸೊಬಗು

ಸೌಂದರ್ಯದ ರಂಗು ತೊಗಲಿನಾಳವಷ್ಟೆ

ಮನದಾಳ ಸ್ವಚ್ಚವಿರೆ ಮಿಕ್ಕೆಲ್ಲವು ನಗಣ್ಯವೆ..

ನಿಕೃಷ್ಟವಲ್ಲ ಅಲ್ಲ ನಿರಾಸಕ್ತಿಯೂ ನಿನ್ನಲಿ

ನಿರಾಭರಣ ಸುಗುಣ ಸುಂದರಮನ ನೆಚ್ಚು

ನೀನರಿಯುತಿರೆ ನನ್ನ ಅರಿವಾಗಿಸುತ ನಿನ್ನ

ಸರಳ ಹಂಬಲಿಕೆ, ಅವಲಂಬಿಸುತಿರೆ ಸಾಕೆ..

ಅಹುದು ತೋರಿಕೆಯ ಜಗದ ಬದುಕಿದು

ಬೇಕವರ ನೋಟ ತಣಿವಷ್ಟು ಅಡಂಬರ

ಹೊರಟರೆ ಜಗವ ಮೆಚ್ಚಿಸುವ ಜಾತ್ರೆಗೆ

ನನ್ನಾಣೆ ಯಾತ್ರೆ ಮುಗಿಯದೀ ಜನ್ಮದಲಿ..

ನಿನಗಾಗಿ ಬದುಕು ನಿನ್ನ ಮೆಚ್ಚಿಸು ಸಾಕು

ನಮಗಾಗಿ ಬದುಕು ನಾವಷ್ಟೇ ಮೆಚ್ಚಬೇಕು

ಬಿಡು ಮಿಕ್ಕವರ ಚಿಂತೆ ಬಿಡುವಿಲ್ಲದ ಸಂತೆ

ನನಗಂತೂ ಸಾಕು ನೀನಿರುವಂತೆ ಸಹಜ..

– ನಾಗೇಶ ಮೈಸೂರು

(Picture source: internet / social media)

02163. ನೆನಪು : ಎರಡು ಕವಿತೆಗಳು


02163. ನೆನಪು : ಎರಡು ಕವಿತೆಗಳು
==================

01. ಕಾಡಬೇಡಿ
_______________

ಕಾಡಬೇಡಿ ಮತ್ತೆ
ಖೇಡಿ ನೆನಪುಗಳೆ
ನೆರೆದೇನು ಸುತ್ತ ಫಲ ?
ಸಂತೆಯಲಿದ್ದು ಒಬ್ಬಂಟಿ..

ನೆಪ ಹಿಡಿದ ನೆನಪು
ಚಟವಾಗಿ ಒನಪು
ಇಡಿಯಾಗಿ ನುಂಗುತ
ಕಬಳಿಸುವ ಸನ್ನಾಹ..

ಭೂತಗಳೆ ಭವಿತ
ನುಂಗುತಾ ಪ್ರಸ್ತುತ
ಮುಗಿಸಿಬಿಡೆ ಬದುಕ
ಮಿಕ್ಕಿದ್ದೇನು ಜೀವನ ?

ದಮ್ಮಿದ್ದರೇ ನಿಮಗೆ
ಹಾಕಿ ನೋವಡಿಪಾಯ
ಕಟ್ಟಿ ಮಹಲು ಸ್ಮಾರಕ
ಬಿತ್ತಿ ಬೆಳೆಯುತ ಹಸಿರ..

ಕರೆದುಕೊಳ್ಳದೆ ನೋವ
ಸುಖವ ನೆನೆಯಲಿ ಜೀವ
ಕರಗಲಿ ಪದರ ಚದರ
ನೋವಿನಸಲು ಬಡ್ಡಿ ಸಾಲ !

– ನಾಗೇಶ ಮೈಸೂರು

02. ಕಾಡುತಾವ ನೆನಪು
______________________

ಕಾಡುತಾವ ನೆನಪು..
ಆಡಾಡುತಾವ, ಕಲಕಿ ಕೆದಕಿ.
ಜಾಡು ಹಿಡಿದು ನಡೆದಷ್ಟೂ ದೂರ
ದೂರು ದುಃಖ ದುಮ್ಮಾನ ಸಾಹುಕಾರ..

ಮಲ್ಲೆ ಮೊಲ್ಲೆ ಗೊಂಚಲು ;
ಬರಿ ಬಿಡಿ ಹೂವ-ನಲ್ಲೆ ಹಂಚಿ
ಒಂದೊಂದೆ ಮೊಗ್ಗು, ಅರಳಿ ಹಿಗ್ಗು
ಯಾಕೊ ಮತ್ತೆ ಬಾಡಿ, ಹೊಸತಿಗೆ ಸರದಿ..

ಹೂವು ಮುಳ್ಳು ಜತೆಯಾಟ;
ಪಕ್ಕದಲ್ಲಿರೆ ಚುಚ್ಚದು ತನ್ನ ತಾನೆ !
ಕಿಲಾಡಿ ದಳಗಳು ನೆನಪಾಗದು ಮತ್ತೆ
ತೊಟ್ಟಲಿದ್ದ ಮೊನೆ, ತಿವಿಯುವಾ ಸತತ..

ಕಲೆಯಂತೆ ಉಳಿದ ನೆನಪು;
ಕಲೆಯಾಗಿ ಉಲಿಯುತ ಸಂಧಾನ..
ರೂಪಾಂತರದಲಿದ್ದರು ಅಜಗಜಾಂತರ
ನೆನಪ ಮರೆಸಲು, ಮತ್ತೊಂದರ ಸವಾರಿ !

– ನಾಗೇಶ ಮೈಸೂರು

(Picture Source: http://reconstellation.com/transforming-memories/)

02162. ಇಳೆ ಮಳೆ ಕಥೆ


02162. ಇಳೆ ಮಳೆ ಕಥೆ
________________________

ಮಳೆ ಮಾತಾಡಿತು
ಇಳೆಯ ಜತೆ ಸಮನೆ
ಲೆಕ್ಕಿಸಬೇಡವೆ ಇನಿತೂ ?
ಹಳ್ಳ ಕೊಳ್ಳ ಹೊಂಡದ ಕಥೆ !

ಇಳೆ ಮಳೆ ಹೆಣ್ಣೆರಡು
ಇಜ್ಜೋಡಿನ ಸಂಭಾಷಣೆ
ಎರಚಾಟಾ ಅರಚಾಟಾ ಆಟ
ಇರಬಹುದಪರೂಪದ ಭೇಟಿ !

ಕಾರುವವಳವಳು ಇಳೆಗೆ
ಮಳೆ ಹೀರುವವಳು ಕೆಳಗೆ
ಇವರಿಬ್ಬರ ತಾಳಮೇಳ ಜಿದ್ದಿಗೆ
ದೈನಂದಿನವಾಗದಿರಲಿ ಕೊರಗು !

ಕೊಟ್ಟುಕೊಳ್ಳುವರವರು
ಕೆಟ್ಟರೆ ತಪಿಸುವರು ಜನರು
ಹಾದಿ ಬೀದಿ ನಡಿಗೆ ತೇಲಾಡಿಸೆ
ಕೊಚ್ಚಿ ಹೋಗುವ ಸಹನೆ ದುಮ್ಮಾನ !

ನೀವಿಬ್ಬರು ಮಾತೆಯರು
ಭುವಿಯಾಗಸ ಬೆಸೆದ ಬಂಧ
ನಿಮ್ಮಲಿರೆ ಹೊಂದಾಣಿಕೆ ಸತತ
ಪಾಮರರ ಜಗದಲಿ ಬದುಕೆ ಚಂದ !

– ನಾಗೇಶ ಮೈಸೂರು
(Picture source : internet / social media)

02161. ಯಾರವಳೂ ?


02161. ಯಾರವಳೂ ?
________________________________

ಕಣ್ಣ ಸನ್ನೆಯಲೆ ಪ್ರೇಮ ಪತ್ರ ಬರೆದವಳು
ಹುಬ್ಬುಗಂಟಲೇ ಹುಸಿ ಮುನಿಸ ತರುವಳು
ಮುಗುಳ್ನಗುವಿನಾ ಜತೆ ಜಗಳಾಡೊ ಕೆನ್ನೆ ಗುಳಿ
ಫಕ್ಕನೆಲ್ಲ ಮರೆಸೊ ಸಿಹಿ ಮಾತಾಡೊ ವಾಚಾಳಿ !

ತುಟಿಯ ಕೊಂಕಿಸಿ ಅಣಕವಾಡಿದ ಸೊಗಸು
ಮುಗ್ಗುರಿಸೊ ಮುಂಗುರುಳ ತಳ್ಳುವಾ ಬಿರುಸು
ಉದ್ದಂಡರನೂ ಮಣಿಸೊ ಕಿರುನಗೆ ಮಂತ್ರದಂಡ
ಜಗ ಗೆದ್ದ ಹಮ್ಮ ಮರೆತು ಕಾಲಡಿ ಕೂತ ಪ್ರಚಂಡ !

ಬಣ್ಣನೆಗೆ ನಿಲುಕದ ಎತ್ತರದ ನೀಳ ನಿಲುವು
ಭೌತಿಕವಲ್ಲ ಅಮೇಯ ವ್ಯಕ್ತಿತ್ವ ಸಂಗಮವು
ಬರಿ ಮಾತಲ್ಲ ಮುತ್ತು ಗತ್ತಿನಾ ಮಾತೊಡತಿ
ಚಿಪ್ಪಿನೊಳಗ ಮುತ್ತ ಪೋಣಿಸಿ ಜೋಡಿಸೊ ಛಾತಿ !

ಸಂಜ್ಞೆ ಸನ್ನೆ ಸೂಚನೆ ಮಾತಾಡದವಳಾ ಭಾಷೆ
ಸಂವಹನ ಚಿಲುಮೆ ಅವರವರ ಭಾವದ ಕೂಸೆ
'ಅಹುದು ಅಲ್ಲಾ' ಎನದೆ ಗೊಂದಲದಲಿಡೊ ಜಾಣೆ
ಕೊರಗೇಕೆ ಮಾಯೆಯವಳು, ಚಂಚಲ ಚಿತ್ತೆ ತಾನೆ?

ನೀನರಿಯೊಂದು ಸತ್ಯ ಪ್ರಕೃತಿ ಪುರುಷ ವಿಭಿನ್ನ
ಚಂಚಲತೆ ಜಡತೆ ಎರಡನಾಗಿಸುವ ಮನೋಧರ್ಮ
ಮಿಳಿತವಾದರೆ ಸೂಕ್ತ ಪಕ್ವ-ಪ್ರಬುದ್ಧ ಆಯ್ಕೆ ಬದುಕಿಗೆ
ಹೊಂದುವುದನಾಯುವುದೆ ಕಠಿಣ, ಸೌಭಾಗ್ಯವಿರೆ ಹಿಗ್ಗೇ !

– ನಾಗೇಶ ಮೈಸೂರು
೧೫.೦೮.೨೦೧೭

ಅಮೇಯ: ಅಳೆಯಲಾಗದ

(Picture source: internet / social media)

02160. – ಮತ್ತೊಂದು ಪಿಸುಗುಟ್ಟಾಟ…


02160. – ಮತ್ತೊಂದು ಪಿಸುಗುಟ್ಟಾಟ…

ಪಿಸುಗುಟ್ಟುವ ಮಾರುತ
_____________________

ಪಿಸುಗುಟ್ಟುತಿದೆ ಮಂದ ಮಾರುತ
ಆಹ್ಲಾದದ ಜತೆ ತನ್ನನ್ನೇ ಮಾರುತ
ತನಿತನಿ ಹನಿಹನಿ ತುಂತುರ ಚೆಲ್ಲಿ
ನೇವರಿಸುತಿದೆ ಮೊಗ ಕಣ್ಮುಚ್ಚುತಲಿ ||

ಕೊಳ್ಳುವಾ ವೆಚ್ಚ ಬಯಲಿನಾ ಸ್ವೇಚ್ಛೇ
ಬಂದು ನಿಲ್ಲಲ್ಲಿರಬೇಕು ಮನದೇ ಇಚ್ಛೆ
ನಸುಕು ಮುಸುಕು ಮುಂಜಾವಿನ ಚಳಿ
ಮುಸ್ಸಂಜೆ ಹೊತ್ತಲೂ ಸುಳಿವ ತಿಳಿಗಾಳೀ ||

ಪಿಸುಗುಟ್ಟುವ ಪ್ರೇಮದ ಪದಗಳಲಿಲ್ಲ ಅರ್ಥ
ಪಿಸುಗುಟ್ಟಬೇಕು ಬರಿ ಬೇಕ್ಯಾರಿಗೆ ಮಥಿತಾರ್ಥ ?
ಪಿಸುಗುಟ್ಟುವ ಖುಷಿ ಹಂಚಿಕೊಳ್ಳುವ ಭಾವನೆ
ಪಿಸುಗುಟ್ಟದು ಯಾರಾರೊ ಸಿಕ್ಕಸಿಕ್ಕವರೊಡನೆ ||

ಬೇಧವೆಣಿಸದು ತಂಗಾಳಿ ಚರಾಚರ ಪ್ರೀತಿ
ಒಂದೇ ಹದದೆ ಬೀಸುತೆ ಸಮಪಾಲ ನೀತಿ
ಒಡ್ಡಿಕೊಂಡವಗೆಲ್ಲರಿಗು ಪುಕ್ಕಟೆ ಸಿಗುವ ಭಾಗ್ಯ
ನಿಸ್ವಾರ್ಥದಲೆ ಬೀಸೊ ಮಂದಮಾರುತ ಸಾಮ್ರಾಜ್ಯ ||

ಪಿಸುಗುಟ್ಟುತಿವೆ ಹಕ್ಕಿ, ಚಿಲಿಪಿಲಿಗುಟ್ಟುತ ಗುಟುಕು
ಗುಟ್ಟೆಲ್ಲಿದೇ ಕಾಣೇ, ನಿಸರ್ಗದಲಿ ಬಿಚ್ಚಿಟ್ಟ ಬದುಕು
ಮುಚ್ಚುಮರೆಯೇಕೊ ನಮ್ಮಲಿ? ಏನಿಲ್ಲ ಹೆಚ್ಚುವರಿ ಮೊತ್ತ
ಬರಿ ನಮಗಾಗಿ ಬದುಕೊ ಬಗೆ – ಕೊಡದೆ ಪಡೆಯಲಷ್ಟೆ ಚಿತ್ತ ||

– ನಾಗೇಶ ಮೈಸೂರು

02159. ಕಗ್ಗ ೭೨ ರ ಟಿಪ್ಪಣಿ – ರೀಡೂ ಕನ್ನಡದಲ್ಲಿ: ಜಗದ-ನಂಟಿನಂಟಿನ-ವ್ಯಾಪ್ತಿ


02159. ಕಗ್ಗ ೭೨ ರ ಟಿಪ್ಪಣಿ – ರೀಡೂ ಕನ್ನಡದಲ್ಲಿ

ಜಗದ-ನಂಟಿನಂಟಿನ-ವ್ಯಾಪ್ತಿ:

http://kannada.readoo.in/2017/08/ಜಗದ-ನಂಟಿನಂಟಿನ-ವ್ಯಾಪ್ತಿ

02158. ಕಳುವೆಯಲ್ಲ ಸ್ವತಂತ್ರ..


02158. ಕಳುವೆಯಲ್ಲ ಸ್ವತಂತ್ರ..
__________________________________

ಯಾರಿಗೊ ಬಂತಾರಿಗೊ, ಅನಬೇಡಾ ಸ್ವತಂತ್ರ
ಬರದಿದ್ದರೆ ಇರುತಿತ್ತೆ, ನಿರಾಳದೀ ದಿನನಿತ್ಯ ?
ಯಾರಿಟ್ಟರೊ ತಲೆದಂಡ, ಯಾರಾರದೊ ಬಲಿದಾನ
ಯಾರ ಬೆವರೊ ಯಾರುಣುತಿಹರೊ, ಕಸಿದಾರದೊ ಅನ್ನ..

ಚಳುವಳಿಯೊ ಬಳುವಳಿಯೊ, ಗೊತ್ತಾಗದು ಅಂದು
ಮನೆಯ ಬಿಟ್ಟು ಬದುಕ ಕೊಟ್ಟು, ಧುಮುಕಿದನಾ ಬಂಧು
ಹೋರಾಟವೊ ಉಪವಾಸವೊ, ಕಾರಾಗೃಹ ಸಹವಾಸ
ಓದು ಬಿಟ್ಟು ಖಾದಿ ತೊಟ್ಟು, ತಂದರಲ್ಲಾ ತಾಯಿಗೆ ಹರ್ಷ

ಮರ ಭಾರತಾಂಬೆ ನೂರಾರು, ಕೊಂಬೆ ಚಾಚಿದಂತೆ ಕವಲು
ಯಾರ ಬಿಟ್ಟಿತ್ತಲ್ಲಿ ಕೊಸರು, ಮಂದಿಗೆಲ್ಲ ದೇಶಸೇವೆ ತೆವಲು
ಉಪ್ಪಾದರೊ ಮುಪ್ಪಾದರೊ, ಜೈಕಾರ ಮೊಳಗೆ ತೊಲಗಿಸಲು
ತಮ್ಮೊಂದಿಡಿ ಜೀವಮಾನ ಬಲಿ, ಕೊಟ್ಟರೊ ನಮ್ಮ ನಗಿಸಲು..

ಇಂದಾಡುತಿದೆ ರಂಗಿನ ಬಾವುಟ, ಜಗದೆಲ್ಲೆಡೆ ದಿಗ್ವಿಜಯ
ಯುದ್ಧ ಕದನ ಹೋರಾಟವಿರದೆ, ಜಯಿಸುತ್ತಿಹ ಭಾರತೀಯ
ಅಂದಾಗದಿರೆ ಅಡಿಪಾಯ,ಇಂದಾಗುತಿತ್ತೆ ಈ ಮಾಯಾಜಾಲ ?
ನೆನೆಯದನೊಂದು ದಿನ ಮನವೇ, ಹೀಗಿರಲಿಲ್ಲ ಗೊತ್ತ ಆ ಕಾಲ ?

ಯಾರಿಗೊ ಬಂದಾ ಸರಕಲ್ಲ, ಎಲ್ಲಿಗೊ ಹೊರಡುವ ರಜೆಯಲ್ಲ
ಅಂದು ಯಾರಾರೇನೇನೆಂದು, ಕಿರಿ ಪೀಳಿಗೆಗೆ ತಿಳಿಸಲಿದೆ ಬಹಳ
ತಿಳಿದು ಮೊದಲು ಅರಿತು ಸಕಲ, ಹೆಚ್ಚಲಿ ಮನದಿ ಗೌರವ ಭಾವ
ನಮ್ಮ ನಾಡ ನಾವೇ ಮರೆಯೆ, ಸಿಕ್ಕಲುಂಟೆ ಪರರ ಸಮ್ಮಾನ ಪರ್ವ ?

– ನಾಗೇಶ ಮೈಸೂರು
(Picture SOurce: https://www.google.com.sg/amp/s/gradeup.co/happy-independence-day-jai-hind-i-ba694f6e-629f-11e6-99d7-56f5752f4668_amp)