02022. ಭುವನೋತ್ಸವ..


02022. ಭುವನೋತ್ಸವ..
_____________________


ಭುವನೋತ್ಸವ ಇಳೆಗುತ್ಸವ
ನಳನಳಿಸೊ ವನ ಮಹೋತ್ಸವ
ಚಿಗುರೆಲೆ ಚಿಗುಚಿಗುರಿ ಪೂರಣ
ವಸಂತ ನಮನ ಹಸಿರು ತೋರಣ..

ಜಲದುತ್ಸವ ಭುವಿ ನಿತ್ಯ ಮಜ್ಜನ
ಧರಣಿ ಭರಣಿ ಚೆಲ್ಲಾಡಿದ ಕ್ಷಣ
ಸ್ಮರಿಸಿದೆಡೆ ವರ್ಷಾಧಾರಣೆ ಕೃಷಿ
ಫಸಲಾಗಿ ವೃಕ್ಷ ಮರಳಿಸೊ ಮಹರ್ಷಿ..

ತರಂಗ ತರಂಗಿಣಿ ಪಾವನ ಪಾನ
ಜೀವ ವಾಯು ಪವನ ಸಂಧಾನ
ಸುಯ್ದಾಡುತ ಸುಳಿಗಾಳಿ ತನನ
ನಿವಾರಿಸಿ ಅವನಿ ಬವಣೆ ತಲ್ಲಣ..

ಹುಡಿಮಣ್ಣ ಸತ್ವ ಪಂಚಭೂತತ್ವ
ಬೀಜಾಂಕುರ ಗರ್ಭದುದರ ಮಹತ್ವ
ಸೃಜನ ಸೃಷ್ಟಿ ನಿರಂತರ ಸಕ್ರೀಯ
ಭೂಮಾತೆ ಆಗರ್ಭ ಖನಿಜ ಸಿರಿಯ..

ಅವಳುತ್ಸವ ನಿತ್ಯೋತ್ಸವ ನಿಯಮ
ಸತ್ಯೋತ್ಸವ ನಿಸರ್ಗದುಪಮಾಯಾಮ
ಪೊರೆಯದಿರೆ ಜತನ ನಿಸ್ಸಾರ ನಿಸ್ತೇಜ
ಸಮಷ್ಟಿಯಾಗಿ ಪಳೆಯುಳಿಕೆ ಪೂರ್ವಜ..

– ನಾಗೇಶ ಮೈಸೂರು
೨೨.೦೪.೨೦೧೭

(Picture source:http://kauaihabitat.org/tag/earth-day/)

02021. ತಲ್ಲೀನ ತನ್ಮಯ ಪ್ರೇಮ..


02021. ತಲ್ಲೀನ ತನ್ಮಯ ಪ್ರೇಮ..
____________________________


ನೇವರಿಸುತಿದೆ ನವಿರಾಗಿ
ನವಿಲು ಗರಿ ಮೆಲುವಾಗಿ
ಆವರಿಸುತ್ತಿದೆ ಮಧುರವಾಗಿ
ನಿನ್ನ ಮುರಳಿಯ ದನಿ ಕೂಗಿ..

ನುಡಿಸುತಿಹೆಯೊ ಮಾಧವ
ನೋಡಿಹ ನೋಟ ಮಾರ್ದವ
ನನ್ನ ನೋಟಕೆ ಕೀಟಲೆ ಬೇಡ
ಕಲಿತೆ ನಿನ್ನಿಂದಲೆ ಪಡೆದ ಕಡ..

ಮಾಮರವೋ ಮಯೂರವೋ
ತನ್ಮಯದೇ ಮೈ ಮರೆತವೋ
ಕೋಕಿಲ ಗಣ ನಾದಕೆ ನಾಚುತ
ತೊರೆದವೊ ದನಿ ಮರೆಮಾಚುತ !

ನಿಜವ ನುಡಿವೆ ಮುರಾರಿ ಗೊಲ್ಲ
ನೀ ನುಡಿಸಿದ ರಾಗವೇ ಗೊತ್ತಿಲ್ಲ
ನೀ ಹಾಡುತ ನಾ ಕೇಳುತ ಭಾವ
ಸ್ತಬ್ಧ ಜಗದಲಿ ನಮ್ಮಿಬ್ಬರದೆ ಜೀವ..

ನೀ ನೆಟ್ಟ ನೋಟ ಆಹ್ಲಾದ ವರ್ಷ
ಪರಿಶುದ್ಧ ಅಮಲ ನಿರ್ಮಲ ಸ್ಪರ್ಶ
ನೋಡು ಸೆಳೆದು ಸೂಜಿಗಲ್ಲಂತೆ ನನ್ನ
ನಿನ್ನಷ್ಟೆ ತೋರಿದೆ ನಾ ಮಂಪರಲಿ ಮಗ್ನ ..

– ನಾಗೇಶ ಮೈಸೂರು
೧೬.೦೪.೨೦೧೭
(Photo source : internet / social media)

02020.ಅವಳಂತರಂಗ..


02020.ಅವಳಂತರಂಗ..
_____________________


ನಾ ಬಚ್ಚಿಟ್ಟ ಗುಟ್ಟನೆಲ್ಲ
ಬಿಚ್ಚಿಡುವಂತಿಲ್ಲ ಇನಿಯ
ಯಾಕಾಗಬೇಕು ನಂಟು ?
ಚಿಪ್ಪೊಳಗೆ ಬೆಂದ ಮೊಟ್ಟೆ..

ವಯಸೊ, ಕೌತುಕವೊ
ಹರೆಯದ ತೇಜೋಷ್ಣವೊ
ಗಾಳಿ ಜಾರಿಸಿದ ಸೆರಗು
ಮನವಾಗಿ ಮ್ಲಾನವದನ..

ಕದ್ದು ಮುಚ್ಚಿ ಬೆಸೆದ ಹಸ್ತ
ಕತ್ತಲು ಹಿತ್ತಲು ಪಾಳುಕೋಟೆ
ಚಪಲ ಮೆಟ್ಟಿತ್ತು ಭೀತಿ ಲೇಪ
ತೊಗಲ ಸ್ಪರ್ಶವೇನು ಲೆಕ್ಕ ಬಿಡು !

ನಡುಗುವ ಕೈ ಪಡೆದ ಪತ್ರ
ಬರೆದುತ್ತರ ಪ್ರೇಮ ಲೋಕ
ಏನುದ್ವೇಗ ನೋಡೀಗ ಪ್ರಶಾಂತ
ಹೊನಲ ಹಾಗೆ ನಿನ್ನ ಮಡಿಲಲಿ..

ನೋಡೀಗ ನನ್ನಂತರಾಳ
ದಾಳಿಂಬೆ ನೆನಪಿನಾ ಸಜ್ಜೆ
ಸಿಪ್ಪೆ ಸುಲಿಯದ ಹಣ್ಣಾಗಿ
ನಿನ್ನ ಸಖ್ಯದ ಸುಖದಲಿರುವೆ ..


– ನಾಗೇಶ ಮೈಸೂರು
೧೯.೦೪.೨೦೧೭
(Picture source : internet / social media)

02019. ಪಕ್ಕದ ಖಾಲಿ ಸೀಟು


02019. ಪಕ್ಕದ ಖಾಲಿ ಸೀಟು
_______________________


(೦೧)
ಪಕ್ಕದ ಖಾಲಿ ಸೀಟು
ನಿನಗೆಂದೇ ಮೀಸಲು
ಬಂದು ಹೋಗುವವರಾರು
ಕೂರುವುದಿಲ್ಲ ಗೊತ್ತಾ ?
ಇನ್ನೂ ನೀನಲ್ಲಿಲ್ಲದ ಸತ್ಯ
ಬಿಡದೆ ಕಾಡುತಿದೆ ನಿಜದಿ

(೦೨)
ಪಕ್ಕದ ಖಾಲಿ ಸೀಟು
ನಿಮದೆ ಅಧಿಕಾರ
ಜಗಳಾಟ ಮುನಿಸಲಿ
ಹಂಚಿಕೊಳ್ಳುವ ವರಾತ
ಗುದ್ದಾಡಲಾರು ಇಲ್ಲದ ಒಂಟಿ
ನಿನಗೀ ಸೀಟೇ ಗಟ್ಟಿ ಸಖ್ಯ

(೦೩)
ಪಕ್ಕದ ಖಾಲಿ ಸೀಟು
ಬೇಕೆಂದಾಗ ಬಾ ಸಖ
ಬಂದು ಹೋಗುವ ತಂಗಾಳಿ
ಬೇಕಿಲ್ಲ ಅನುಮತಿ ಪಾವತಿ
ನೀ ಪಕ್ವತೆಯ ಸರದಾರ
ನೋಡುವೆ ಸಮಯಾಸಮಯ

(೦೪)
ನೀವಿಲ್ಲಿ ಕೂರುವ ಹಕ್ಕು
ನಿಮದೆ ಚಲಾಯಿಸಿ ಕಾಯಿದೆ
ನಿಮಗಿತ್ತ ಸ್ವೇಚ್ಛೆ ಸ್ವಾತ್ಯಂತ್ರ
ಮೀಸಲಿಡದೆಯೂ ಮುಂಗಡ
ಕಾದಿರಿಸದೆಯೂ ಸಂಗಡ
ನಿಮಗಿತ್ತ ಗೌರವ ರಕ್ಷೆ

(೦೫)
ಹೊರಟಾಗ ಕಾರ್ಯನಿಮಿತ್ತ
ನೀ ಒಬ್ಬಂಟಿ ಪಕ್ಕದ ಸೀಟೇ
ನೆನಪಾಗಿಸುತ್ತಿರುವೆ ಸಕಲ
ನಾನೊಬ್ಬಂಟಿಯಲ್ಲ ಜತೆಗೆ
ನೀನಿರುವೆ ಜತೆ ಜತೆ ಖಾಲಿ
ಬಂದು ಹೋಗುವ ಜೀವನ ಶೈಲಿ !

– ನಾಗೇಶ ಮೈಸೂರು
೨೧.೦೪.೨೦೧೭

02018. ಕಗ್ಗ ೫೫ ರ ಟಿಪ್ಪಣಿ – ರೀಡೂ ಕನ್ನಡದಲ್ಲಿ


02018. ಕಗ್ಗ ೫೫ ರ ಟಿಪ್ಪಣಿ – ರೀಡೂ ಕನ್ನಡದಲ್ಲಿ

“ಪ್ರತ್ಯಕ್ಷದಷ್ಟೇ ಸತ್ಯ, ಪ್ರಸ್ತುತ – ಪರೋಕ್ಷಾನುಭವ ಅನುಭೂತಿ !”

02017. ಹೀಗೆ..


02017. ಹೀಗೆ..
______________


(೦೧)
ಚಳಿ ವಿಷಾದ
ಬೀಳ್ಕೊಡುತ ಬೇಸಿಗೆ
ಅತ್ತಾಗ ಮಳೆ

(೦೨)
ಬಿಸಿ ಬೆವರು
ಅತ್ತೂ ಕರೆದು ಕರಗಿ
ನೀರಾದ ಬೆಂಕಿ

(೦೩)
ಚಳಿಗೆ ನಾಚಿ
ಮಣ್ಣಿನ ತೆಕ್ಕೆ ಸೇರಿದ್ದು
ಹುಲ್ಲಾಗುತ್ತಿದೆ

(೦೪)
ಎದೆ ಸೀಳದೆ
ಅಳಕೆ ಇಳಿಯದೆ
ಬೇರ ಹೂವಿಲ್ಲ

(೦೫)
ಕುಕ್ಕದೆ ರುಚಿ
ದಕ್ಕದ ಅನುಭವ
ಮನಬಾರದು

(೦೬)
ಇಲ್ಲ ಸಮ್ಮತಿ
ಕಾಣದ ಅಸಮ್ಮತಿ
ಪ್ರೇಮದ ರೀತಿ

(೦೭)
ಬಿತ್ತಿದ್ದಲ್ಲೆಲ್ಲ
ಪ್ರೇಮದ ಹೂವು ಬಿಡೆ
ಮುಡಿ ಗೊಂದಲ

(೦೮)
ಚೋಟುದ್ದ ಹುಲ್ಲು
ತುಳಿದರೂ ಚಿಗುರಿ
ಜೀವನೋತ್ಸಾಹ

(೦೯)
ಗಾಳಿ ಬಿರುಸು
ಬಾಗಿ ನಮಿಸೊ ಹುಲ್ಲು
ಸೆಟೆದು ನಿಲ್ಲು

(೧೦)
ಗುಂಡರಗೂಳಿ
ಚೆಲುವೆ ಮೂಗುದಾರ
ಒರಟು ಮೃದು

– ನಾಗೇಶ ಮೈಸೂರು
೧೬.೦೪.೨೦೧೭
(Picture source: internet / social media)

02016.ಮೆಟ್ಟಿದ ಭೂತ ಬಿಟ್ಟಿತು !


02016.ಮೆಟ್ಟಿದ ಭೂತ ಬಿಟ್ಟಿತು !
____________________________


ಬಿಟ್ಟಿತು ಬಿಟ್ಟು ಹೋಯಿತು
ಮೆಟ್ಟಿದ ಭೂತ ಹೇಳುತಾ ವಿದಾಯ
ಕಾಡಿದ ಏಳರಾಟದ ಕಟ್ಟಳೆಯ ದಾಟಿ
ಕತ್ತಲಿನಿಂದ ಬೆಳಕಿನ ದೀಪ ಹಚ್ಚುವ ಹೊತ್ತು..

ಇರಬಹುದೇನು ಇದುವೇ
ಕೊಳವೆಯ ಕೊನೆ ಬೆಳಕಿನ ತುದಿ ?
ಕಂಡಂತಿತ್ತು ಕಾಣದೆ ಆಡಿಸುತ್ತಿತ್ತಲ್ಲ ಆಟ
ಕಾಡಿಸಿ ಕೊಟ್ಟ ಕಾಟದ ಕೊನೆಯಾಟವೇ ಇಂದು ?

ಅಚ್ಚರಿಯಾಗಿ ಅದ್ಭುತ ದೀಪ
ಅಲ್ಲಾದೀನನ ಮಾಂತ್ರಿಕ ಜಾದೂ
ಬಿಡಿಸೆಲ್ಲಾ ತರ ಒಗಟಿಗೊಂದು ಮಂಗಳ
ಹಾಡಲೆಂದೇನೋ ಬಂದತಿದೆಯಲ್ಲಾ ತಿಂಗಳ !?

ಮೆಟ್ಟಿ ಹಿಡಿದಿತ್ತು ಮೆಟರೆ
ಉಸಿರು ಕಟ್ಟಿಸಿ ಒಳ ಪೊಟರೆ
ಮುಟ್ಟಿದ್ದೆಲ್ಲ ಮಣ್ಣ ಬಣ್ಣವ ಮೆಟ್ಟಿತ್ತಲ್ಲಾ
ಮಣ್ಣು ಚಿನ್ನವಾಗುವ ಹೊತ್ತಿನ ಕಾಲ ಬಂತೇನು ?

ಬಿಟ್ಟಿತೊ ಬಿಡಲಿಲ್ಲವೊ ಬದುಕು
ಬಿಡುವುದಿಲ್ಲಾ ಬಾಡಿಸೊ ಸಂಘರ್ಷ
ಕೆಸರೆಲ್ಲರಳಿದ ಕಮಲಾ ಸೊಗವದರಿಂದೆ
ಪಠಿಸಿರೆ ಬಿಟ್ಟೇಬಿಟ್ಟಿತು ಬಿಡದಿದ್ದೀತೆ ಮುಂದೊಮ್ಮೆ..!

– ನಾಗೇಶ ಮೈಸೂರು
೧೫.೦೪.೨೦೧೭