01157. ಬದುಕಿನ ಪಾಕಶಾಲೆ

01157. ಬದುಕಿನ ಪಾಕಶಾಲೆ
_________________________

ಕೊಚ್ಚುತ್ತಿದೆ ಬದುಕು ಮಚ್ಚಲಿ
ಎಳೆಕಾಯ ಎಳನೀರನು ಸುಲಿವಂತೆ
ಬಿಚ್ಚಿದರು ಜುಂಗಿನ ಪದರ ಕಾಯ
ಚಿಪ್ಪೆಲ್ಲೊ ಮಾಯ ತರಿದೆಲ್ಲ ತಿರುಳ..

ಬಿಚ್ಚುತಿದೆ ಉಳ್ಳಾಗಡ್ಡೆಯ ಹಾಗೆ
ಪದರ ಪದರ ಸಿಪ್ಪೆ ಬೆತ್ತಲೆ ಸೇವೆ
ಯಾರಾರ ಮುಂದಿನ ಸರಕಾಗಿ ನಿತ್ಯ
ಸಂಭಾಳಿಸಬೇಕಿದೆ ಕಣ್ಣೀರಿನ ಸಾಂಗತ್ಯ

ಹೆಚ್ಚುತ್ತಿದೆ ಸೊಪ್ಪು ತರಕಾರಿಯ ಹಾಗೆ
ಒಟ್ಟು ಬಿಡದೆ ಜುಟ್ಟು ಕತ್ತರಿಸಿ ಒತ್ತಟ್ಟಿಗಿರಿಸಿ
ಬಿಡುವಂತಿಲ್ಲ ನಿಟ್ಟುಸಿರು ಮುಗಿದಾಯ್ತೆಂದು
ತಬ್ಬೆತ್ತಿಕೊಂಡು ಕುದಿವ ನೀರಲಿ ಬೇಯಿಸುತ..

ನಿಲುವುದಿಲ್ಲ ಅಷ್ಟಕೆ ಬದುಕ ಅಟ್ಟಹಾಸ
ಕಟ್ಟೆತ್ತಿಕೊಂಡು ಬೀಸುಕಲ್ಲು ರುಬ್ಬುಗುಂಡಲಿ
ಜಬ್ಬಿ ಗುದ್ದಿ ಕುಟ್ಟಿ ಒನಕೆಯ ಒರಳಾಡಿಸಿ
ಪುಡಿಗುಟ್ಟಿಸಿ ಜಾಡಿ ಬಂಧನದೆ ದಬ್ಬಿ ಅಮುಕ್ತ..

ಆಧುನಿಕ ಯುಗದಲ್ಲಿನ್ನೂ ಅಧ್ವಾನ
ಮಿಕ್ಸಿ ಗ್ರೈಂಡರ್ ಕಟ್ಟರು ಸ್ಲಯ್ಸರು ಇತ್ಯಾದಿ
ಮೋಟಾರಿನ ನೂರುಪಟ್ಟು ವೇಗದ ತೇಜಿ
ಪಾನೀಯವಾಗಿ ಯಾರದೊ ತುಟಿಪಾಲು !

– ನಾಗೇಶ ಮೈಸೂರು
೨೭.೦೨.೨೦೧೭

(Picture source: internet / social media)