01643. ಮಿಥ್ಯಾವತಾರ..
___________________________
ಸೂರ್ಯೋದಯ ಅಸ್ತಮಾನ
ದೈನಂದಿನ ಮಿಥ್ಯೋಪಾಖ್ಯಾನ
ಆದರೇಕೊ ಜಗವದರಲೆ ನಿಶ್ಚಿಂತ
ಇದುವೆ ಮಾಯೆಯ ವೃತ್ತಾಂತ ! ||
ದಿನಕರನೆಲ್ಲಿ ಪಯಣಿಸುವ ನಿತ್ಯ ?
ನೆಲೆ ನಿಂತಲ್ಲೆ ನಿಂತವನಾ ಸಾಮರ್ಥ್ಯ
ಮೂಡಿಸಲೆಂತವನ ಮೂಡಣದುದಯ?
ಮುಳುಗಿಸಲೆಂತವನ ಪಡುವಣದಸ್ತಮಯ ? ||
ಸುತ್ತುವುದವನ ಸುತ್ತ ಧರಣಿಯ ಗಿರಕಿ
ಜೂಟಾಟದ ಜೂಜಾಟದೆ ಋತು ಗಿರಾಕಿ
ತನ್ನೆ ಸುತ್ತುತ ಭೂಗೋಳ ಆವರ್ತನ ಬುಗುರಿ
ಪೂರ್ವಾರ್ಧ ಪಶ್ಚಿಮಾರ್ಧ ಸರದಿ ಮೊಗದೋರಿ ||
ರವಿಗಿಲ್ಲದುದಯ ಅಸ್ತಂಗತ ಸ್ಥಿತಿ ಬೊಗಳೆ
ಮೂಡಣ ಪಡುವಣಗಳ ಮುಳುಗೇಳಿಸೊ ಇಳೆ
ಪೂರ್ವೋದಯ ಪೂರ್ವಾಸ್ತಮಾನ ಮೊದಲರ್ಧ
ಪಶ್ಚಿಮೋದಯ ಪಶ್ಚಿಮಾಸ್ತಮಾನ ದ್ವಿತೀಯಾರ್ಧ ||
ಯಾವುದಿಲ್ಲಿ ಸತ್ಯಾವತಾರ? ಮಿಥ್ಯಾವತಾರ?
ಹುಡುಕದಿರು ಮೂಢಮನ ತರ್ಕದ ಲೆಕ್ಕಾಚಾರ
ಭುವಿಗನಿಸಿಕೆ ಹಗಲಿರುಳು ಮುಳುಗೆದ್ದವ ಸೂರ್ಯ
ಪೂರ್ವ ಪಶ್ಚಿಮ ಸರದಿ ದಿನರಾತ್ರಿ ನಿತ್ಯದ ರವಿ ಕಾರ್ಯ ||
– ನಾಗೇಶ ಮೈಸೂರು
೧೦.೦೩.೨೦೧೮
(Picture Source: https://goo.gl/images/TFSoUQ)