01659. ಎಚ್ಚರ..
_____________________
ಚುಮುಚುಮು ನಸುಕಲಿ
ಕತ್ತಲ ಹೊದಿಕೆ ಸರಿಸಿ ಸೂರ್ಯ
ಮೈ ಮುರಿದೇಳುವ ಹೊತ್ತು
ಹಗಲ ಜಗವಾಗಲಿದೆ ಆರ್ಯ ..||
ಮಲಗಿ ತಂಪಿದ್ದ ದಿನಕರ
ಬೆಚ್ಚಗಾಗಲು ಬೇಕು ಕುಲುಮೆ
ತನ್ನೊಳಗೆ ತನ್ನನದ್ದಿಕೊಳುತ
ಕೆಂಪಾಗುತಿಹ ಕಾವಿನೊಲುಮೆ ||
ಮಂಕಾಗಲಿವೆ ದೀಪಗಳೆಲ್ಲ
ಕೊಬ್ಬಿ ಮೆರೆದ ಇರುಳ ಗಟಾರ
ವಟಾರದ ಮೂಲೆಗು ಹಿಂಡಿ
ಸುರಿವ ರವಿ ಬೆಳಕಿನ ಆಚಾರ್ಯ ||
ಮಾಡು ಮಹಡಿ ಗುಡಿಸಲು
ಹಾದಿಬೀದಿಗು ದ್ಯುತಿ ಪೊರಕೆ
ತಮಲೋಕದ ಪಾಪವನೆಲ್ಲ
ಜಾಡಿಸೊಂದೆ ಸಲ ತೊಡೆವ ಬಯಕೆ ||
ತನುಮನವಿನ್ನು ಅಸ್ತಂಗತ
ಉದಯವಾಗಲೇನೊ ಆಲಸಿಕೆ
ಬಿಡದು ಜಗ ವ್ಯಾಪಾರ ಗುದ್ದಿ
ಮೇಲೆಬ್ಬಿಸಿ ಕೊಟ್ಟೋಡಿಸೊ ಲಸಿಕೆ ||
– ನಾಗೇಶ ಮೈಸೂರು
೨೧.೦೩.೨೦೧೮
(Picture courtesy: Anvesha Anu – thanks madam! 🙏😊👍👌)