01669. ‘ಯಾಕೊ ಗೊತ್ತಿಲ್ಲ!’
___________________________
ಕವಿ ಕೇಳಿದ ಅವನ
ಯಾಕೊ ಸೃಜಿಸಿದೆ ಭುವನ?
ಅವ ನೋಡಿದನೊಮ್ಮೆ ಸುತ್ತೆಲ್ಲ
ನುಡಿದ ಮೆತ್ತಗೆ ‘ಯಾಕೊ ಗೊತ್ತಿಲ್ಲ‘ ! ||
ಕವಿಗಿನ್ನೂ ಅದೆ ಜಿಜ್ಞಾಸೆ
ಪಟ್ಟು ಬಿಡದೆ ಉತ್ತರದಾಸೆ
ಹೋಗಲಿ ತಂದೆಯೇಕೆ ನರನ ?
ಹೇಳು ಯಾಕಿಲ್ಲಿ ಇಹ ಜೀವನ ? ||
ಅವ ಕೆರೆದುಕೊಂಡ ತಲೆ
ಉತ್ತರಿಸಲೊಲ್ಲ ಭವ ಲೀಲೆ
ನೂರೆಂಟಿವೆ ಪ್ರಶ್ನೆ ನನಗೂ ಅರಿವಿಲ್ಲ
ಉತ್ತರಕಿನ್ನೂ ಹುಡುಕಾಟ ‘ಯಾಕೊ ಗೊತ್ತಿಲ್ಲ‘ ||
ಗೊಂದಲ ಚಿತ್ತ ಮೊತ್ತ ಕವಿಗೆ
ಗೊಂದಲಿಸಿದ ಖುಷಿಯವನಿಗೆ
ಬಂಧಿಸಲಿಂತು ಜಗದ ಮಾಯಾಜಾಲ
ಅವನಾಟ ತೊಳಲಾಟ ‘ಯಾಕೊ ಗೊತ್ತಿಲ್ಲ‘ ||
ಗೊತ್ತಾಯಿತೊಂದಷ್ಟೆ ಕವಿಗೆ
ಬರೆದನಷ್ಟು ತರ ಬರವಣಿಗೆ
ಮನೆ ಮನ ಸುತ್ತಿ ಕೇಳುತ್ತಿದ್ದಾನೆಲ್ಲ
ಹಂಚೆಲ್ಲರಿಗು ಅನುಮಾನ ‘ಯಾಕೊ ಗೊತ್ತಿಲ್ಲ!’ ||
– ನಾಗೇಶ ಮೈಸೂರು
೨೪.೦೩.೨೦೧೮
(Picture credit :Suma Kalasapura – thank you madam 🙏👍😊)
ಮನದಿಂಗಿತಗಳ ಸ್ವಗತ 