01656. ಮಾಡಿಕೊಂಡೆವು ನಾವೂ ಹಬ್ಬ
_______________________________
(ಘಜಲ್ ಮಾದರಿ)
ಹಾಗೆ ಹೀಗೆ ಹೇಗೋ ಬಿಡಿ
ಮಾಡಿಕೊಂಡೆವು ನಾವೂ ಹಬ್ಬ
ಇದ್ದಷ್ಟರಲ್ಲೇ ಮಡಿ ಗಡಿಬಿಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೧ ||
ಸೂಪರ್ ಮಾರ್ಕೆಟ್ ತರ್ಕಾರಿ
ಬೊಕೆ ಕಿತ್ತು ಹೂವ ಜತೆ ಮಾಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೨ ||
ಸಿಕ್ಕಿದ್ದಷ್ಟು ಸಿಗದಿದ್ದು ಬದಿಗಿಟ್ಟು
ಎಡವಟ್ಟು ಮಾಡಿ ತಡಕಾಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೩ ||
ಇಲ್ಲಿ ಹುಡುಕಲೆಲ್ಲಿ ಬೇವ ಹೂ
ದುಡ್ಡು ಕೊಟ್ಟರು ಸಿಗದ ಜಾಗವಿಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೪ ||
ಇತ್ತಲ್ಲ ಕರ್ಪೂರ ಸಾಂಬ್ರಾಣಿ
ಊದುಬತ್ತಿ ಜೊತೆಗುರಿದಾಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೫ ||
ಸದ್ಯ ಇತ್ತು ರಜೆ ಭಾನುವಾರ
ಮಾಡದೆ ಅವಸರ ದಾಂಗುಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೬ ||
ಇ-ಶುಭಾಶಯ ವಿನಿಮಯದಲೆ
ದೂರವಾಣಿಯ ಕರೆ ನೀಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೭ ||
ದೂರದಿಂದಲೆ ಬಿದ್ದಡ್ಡ ಜನಕೆ
ಕೊಟ್ಟು ಆಶೀರ್ವಾದ ಮೋಡಿ
ಮಾಡಿಕೊಂಡೆವು ನಾವೂ ಹಬ್ಬ ||೦೮ ||
ಗುಬ್ಬಿಗದೆ ನಿರಾಳ ಮನದಲಿ
ಹಾಗ್ಹೀಗೊ ಹೇಗೊ ಹೆಣಗಾಡಿ
ಮಾಡಿಕೊಂಡೆವು ನಾವೂ ಹಬ್ಬ || ೦೯ ||
– ನಾಗೇಶ ಮೈಸೂರು
೨೦.೦೩.೨೦೧೮
(ವಿದೇಶ ಅಥವಾ ಹೊರನಾಡುಗಳಲಿದ್ದವರ ಅನುಭವಕ್ಕೆ ಹೆಚ್ಚು ಸಮೀಪ)
(Picture source : Internet / social media)
ಮನದಿಂಗಿತಗಳ ಸ್ವಗತ 