01649. ಘಜಲ್ (ಹೇಗೆ ಸೇರಲೆ ನಿನ್ನ ?)
______________________________________
ಪಡಖಾನೆ ಬೀದಿ ತುಂಬಾ ಕುಡುಕರದೇ ಕಾಟ..
ಹೇಗೆ ಸೇರಲೆ ನಿನ್ನ ?
ಪಡ್ಡೆ ಹುಡುಗರ ಮಧ್ಯೆ ಸರಿ ನಡಿಗೆಯೆ ತೂರಾಟ..
ಹೇಗೆ ಸೇರಲೆ ನಿನ್ನ ? ||
ಕೊಟ್ಟ ಮಾತಿಗೆ ತಪ್ಪದೆಲೆ ಹೊತ್ತು ಮೀರದ ಹಾಗೆ
ಸೇರಲೆಂತೆ ನಿನ್ನ ತಡವರಿಸೊ ಕಾಲ ಚೆಲ್ಲಾಟ..
ಹೇಗೆ ಸೇರಲೆ ನಿನ್ನ ? ||
ಹೇಗೆ ಹುಡುಕಲೆ ಮಬ್ಬು ಕತ್ತಲಲಿ ನಿನ್ನಯ ಮಹಲು
ಮದಿರೆ ಮತ್ತಲಿ ಮಂಕು ದೀಪಕು ಅಮಲು ಪರದಾಟ..
ಹೇಗೆ ಸೇರಲೆ ನಿನ್ನ ? ||
ದಾರಿ ಕೊಡದು ಹಾಳು ಮಳೆ ಕೆಸರ ರಾಡಿ ಕೊಚ್ಚೆ
ರಚ್ಚೆ ಮನದುಪಶಮನಕೆ ನಿನ್ನ ತುಟಿ ಮದ್ದೇ ಉತ್ಕೃಷ್ಟ..
ಹೇಗೆ ಸೇರಲೆ ನಿನ್ನ ? ||
ಸೇರಿ ನಿನ್ನ ಬೆಚ್ಚನೆ ಮಡಿಲು ಮಳೆಯಾಗುವಾಸೆ
ಗುಬ್ಬಿ ಗೂಡಿಗೆ ಕಾತರಿಸಿ ಬೆರೆಸೆ ಉಸಿರಾಟ..
ಹೇಗೆ ಸೇರಲೆ ನಿನ್ನ ? ||
– ನಾಗೇಶ ಮೈಸೂರು
೧೪.೦೩.೨೦೧೮
(Picture source : Internet / social media)
ಮನದಿಂಗಿತಗಳ ಸ್ವಗತ 